СОБОРНОЄ ПОСЛАНЇЄ І҆А́КОВЛЄ

Глв̑҇а, а҃·

зач̑҇, н҃·

Иа́ковъ б҃ꙋ и҆ г҃ꙋ і҆с҃ х҃ꙋ ра́бъ, ѻ҆бѣ́манадесѧте колѣ́нома и҆же въ разсѣ́анїи ра́доватисѧ.
всѧкꙋ ра́дость и҆мѣите братїе моѧ̀, е҆гда̀ въ и҆скꙋше́нїа въпадае҆те разли́чна.
вѣдѧще ꙗ҆ко и҆скꙋше́нїе ва́шеа вѣ́ры, съдѣлова́етъ тръпе́нїе.
терпе́нїе҆ же дѣ́ло съвръше́но да и҆́мать, ꙗ҆́ко да бꙋ́дете съверше́ни и҆ всецѣ́ли, и҆ ничи́мже лише́ни.
а҆ще кт̂о ѿ ва́съ лише́нъ е҆сть премꙋ́дрости.
да про́сит꙽ ѿ даю́щаго б҃а всѣмъ вкꙋ́пѣ, и҆ не поноша́юща, и҆ да́стьсѧ е҆мꙋ.
да про́сит же вѣ́рою, ничто́же сꙋмнѧ́сѧ.
сꙋмнѧ́и б̂о сѧ ѹ҆подо́бисѧ волъне́нїю морско́мꙋ вѣтры възмѣта́емꙋ и҆ развѣва́емꙋ.
да не мни́тъ чл҃къ ѻ҆́нъ ꙗ҆́ко прїиметъ чт̂о ѿ́ бг҃а·

Мꙋжъ дв̂оедꙋшенъ, неѹ҆стро́енъ въ всѣх꙽ пꙋтехъ свои҆хъ.
да хва́лит же сѧ братъ смире́ныи, въ высотѣ̀ свое́ѝ бога́тыи же, въ смире́нїи свое҆мъ, занѐ ꙗ҆́коже цвѣтъ тра́вны́и ми́мои́детъ.
въсїѧ́ б̂о слн҃це съ зно́емъ, і҆ и҆ссꙋши травꙋ̀, и҆ цвѣтъ еа̀ ѿпадѐ, и҆ бл҃голѣпїе лица еѧ̀ поги́бе.
си́це и҆ бога́тыи въ хоже́нїи свое҆мъ ѹ҆вѧда́етъ·

Бл҃женъ мꙋжъ и҆же претръпитъ и҆скꙋше́нїе, занѐ и҆скꙋсенъ бывъ, прїиметъ вѣнецъ жи́зни, е҆гоже ѻ҆бѣща̀ б҃ъ любѧщимъ е҆го·

Никтоже и҆скꙋша́емъ да гл҃етъ ꙗ҆́ко ѿ́ бг҃а и҆скꙋша́емъ е҆смь.
б҃ъ б̂о нѣсть и҆скꙋси́тель ѕлы́мъ, не и҆скꙋша́е҆тъ же той никогоже·

Ко́ждо же и҆скꙋша́етсѧ ѿ своеѧ̀ по́хоти влекомъ и҆ прельща́емъ.
т̂аже по́хоть заче́н꙽ши ража́етъ грѣхъ, грѣ́х же съдѣѧ́нъ ража́етъ смерть.
не льсти́тесѧ братїе моѧ възлю́бленаѧ.
всѧ́ко даѧ҆́нїе бл҃го, и҆ всѧ́къ даръ съвръше́нъ свы́ше е҆́сть, сходѧ ѿ ѻ҆ц҃а свѣтомъ, ѹ҆ негоже нѣсть премене́нїѧ и҆ли преложенїю стѣ́нь.
въсхотѣ́въ б̂о породи нас̑҇ сло́вомъ и҆́стины въ е҆же быти намъ, нача́токъ нѣ́кїи създа́нїѻ҆мъ е҆го·

зач̑҇, н҃а·

Тѣмже братїе моѧ̀ възлю́бленаѧ̀, да бꙋ́детъ всѧкъ чл҃къ ско́ръ ѹ҆слы́шати, и҆ ко́сенъ гл҃ати, ко́сенъ въ гнѣ́въ.
гнѣ́въ б̂о мꙋжꙋ, правдꙋ бж҃їю не съдѣва́етъ.
сего ради ѿло́жьше всѧкꙋ сквернꙋ і҆ и҆збы́ток꙽ ѕло́бы, въ кротости прїи҆ми́те всажде́нное сло́во, могꙋще спс̑҇ти дш҃а ваша, быва́ите же творцы сло́вꙋ, а не точїю слы́шателе, прельща́юще себѐ самх̑ѣ.
зане а҆ще кт̂о е҆сть слы́шатель словꙋ а҆ не творець, таковыи ѹ҆подо́бисѧ мꙋ́жꙋ смотрѧющꙋ лице бытїа свое҆го въ зерца́лѣ.
ѹ҆смотри б̂о себѐ, и҆ ѿи́де, и҆ а́бїе забы̀ каковъ б̂ѣ·

Приникїи же в законъ съвръшен̑҇ свобо́дѣ, и҆ пребывъ, се́и не слы́шатель забы́тливъ бывъ, н̂о творець дѣлꙋ, се́и бл҃же́нъ въ дѣ́ланїи своемъ бꙋ́детъ·

А҆ще то̀ мнитсѧ добродѣтеленъ бы́ти въ ва́съ, и҆ не ѻ҆бꙋздава́етъ ꙗ҆́зыка свое҆го, н̂о льсти́тъ срд̑це своѐ, сего сꙋетна е҆сть добродѣтель.
вѣ́ра б̂о чи́ста и҆ нескве́рна пред̑ бг҃омъ и҆ ѿц҃емъ сїа е́сть, е҆же посѣщати сѷрыхъ и҆ вдови́цъ въ ско́рбѣх꙽ и҆хъ, и҆ нескве́рна себе съблюсти ѿ ми́ра·

Глв̑҇а, в҃·

зач̑҇, н҃в·

Братїе моѧ̀ не на лица зрѧще и҆мѣ́ите вѣрꙋ г҃а нашего і҆с҃ х҃а сла́вы.
а҆ще б̂о вни́дет̑ въ сон̑҇мище ва́ше мꙋж꙽, злат̑ пе́рстень носѧ и҆ в ри́зѣ свѣтлѣ.
вни́дет же и҆ нищъ въ хꙋ́дѣ ѻ҆де́жд̑и, и҆ възритѐ на носѧ́щего ри́зꙋ свѣтлꙋ, и҆ речете е҆мꙋ, т̂ы сѧ́ди зд̂ѣ добрѣ.
и҆ ни́щемꙋ речете, т̂ы ста́ни тамо, и҆ли сѧ́ди зд̂ѣ на под̑но́жїѝ мое҆мъ, и҆ не расмотри́сте в себѣ и҆ бы́сте сꙋдїѧ помышле́нїемъ ѕлым̑.
слы́шите братїе моа възлю́бленаа, не б҃ъ л̂и из̑бра̀ ни́щаа мира сего, богатых̑ въ вѣрѣ, и҆ наслѣ́дники црс̑҇твїю, е҆же ѻ҆бѣща любѧ́щимъ е҆го;
вы же ѹ҆кори́сте ни́щаго.
не бога́тїи л̂и наси́лꙋютъ вамъ, и҆ тїѝ влекꙋтъ в̂ы на сꙋдища;
не тїѝ л̂и хꙋ́лѧтъ до́брое и҆́мѧ нарече́нное на васъ;
а҆ще ѹ҆бо зако́нъ съвръша́ете црс̑҇кїи по писа́нїю, възлю́биши и҆скренѧго свое҆го ꙗ҆́коже самого себѐ, до́брѣ творитѐ.
а҆ще л̂и на лица зритѐ, т̂о грѣхъ съдѣва́ете, ѻ҆бличае҆ми ѿ зако́на ꙗ҆́кож̑ престꙋпницы·

И҆же б̂о весь зако́нъ съблюдетъ, съгрѣши́т же въ е҆ді́номъ, бысть всѣмъ пови́ненъ.
рекїѝ б̂о не прелюбы сътвори́ши, ре́клъ е҆́сть, и҆ не ѹ҆бїеши.
а҆ще л̂и не прелюбы сътвори́ши, ѹ҆бива́еши же.
бысть престꙋ́пникъ зако́нꙋ.
та́ко гл҃ете и҆ тако твори́те, ꙗ҆́ко зако́номъ свободномъ хотѧще сꙋдъ прїѧ́ти.
сꙋдъ б̂о без ми́лости не сътворшемꙋ ми́лости.
хва́литсѧ милость на сꙋдѣ·

зач̑҇, н҃г·

Ка́ѧ по́льза братїе моѧ̀, а҆ще вѣрꙋ гл҃етъ кт̂о и҆мѣ́ти, дѣ́ла же не и҆́мать, е҆да мо́жетъ вѣ́ра спс̑҇тѝ е҆го;
аще же братъ и҆л̂и сестра̀ нага̀ бꙋдета, и҆ лише́ни бꙋ́дета дневныа пища, речет же кт̂о и҆́ма ѿ васъ, и҆дѣта с ми́ромъ, грѣ́итасѧ и҆ насыща́и҆тасѧ, не да́сть же и́ма требованїе теле́сное, каа по́льза;
тако и҆ вѣ́ра а҆ще дѣлъ не и҆́мать, ме́ртва е҆сть ѻ҆ себѣ̀·

Но̂ речетъ кт̂о, ты вѣ́рꙋ и҆́маши, а҆зъ же дѣла и҆́мамъ.
покажи м̂и вѣ́рꙋ твою ѿ дѣлъ твои҆х꙽, и҆ а҆́зъ покажꙋ тебѣ ѿ дѣ́лъ мои҆́хъ вѣрꙋ мою.
т̂ы вѣ́рꙋеши ꙗ҆́ко бг҃ъ е҆ді́нъ е́сть;
до́брѣ твори́ши.
и҆ бѣ́си вѣ́рꙋютъ и҆ трепе́щꙋтъ.
хо́щеши же л̂и разꙋмѣти ѻ҆҇ чл҃че сꙋ́етне, ꙗ҆́ко вѣ́ра без дѣ́лъ ме́ртва е҆́сть;
а҆враа́мъ ѿц҃ъ на́шъ, не ѿ дѣ́лъ л̂и ѻ҆правдасѧ.
възнесъ і҆саа́ка сн҃а свое҆го на ѻ҆л꙽та́рь;
ви́диши л̂и, ꙗ҆́ко вѣ́ра поспѣшествоваше дѣломъ е҆го и҆ ѿ дѣ́лъ вѣ́ра съвершисѧ;
и҆ съверши́сѧ писа́нїе гл҃ющее, вѣ́рова же а҆враам̑ бг҃ови, и҆ вмѣнисѧ е҆мꙋ въ правдꙋ, и҆ дрꙋгъ бж҃їи наречетсѧ.
зри́те л̂и ѹ҆бо ꙗ҆́ко ѿ дѣ́лъ ѻ҆правдаетсѧ чл҃къ, а҆ не ѿ вѣ́ры е҆дїныѧ;
та́кожде же и҆ раа́вь блꙋдни́ца не ѿ дѣ́лъ л̂и ѻ҆правда́сѧ, прїемше схо́дники, і҆ и́нымъ пꙋтем̑ и҆звед̑ше и҆́хъ·

Ꙗ҆́коже б̂о и҆ тѣ́ло без꙽ дꙋха ме́ртво е҆сть, та́ко и҆ вѣ́ра без꙽ дѣлъ ме́ртва е҆сть·

Глв̑҇а, г҃·

зач̑҇, н҃д·

Не мно́зи ѹ҆чители быва́ите братїе моѧ, вѣ́дѧще ꙗ҆ко вѧщ̑҇шее ѻ҆сꙋжде́нїе прїимем꙽, мно́го б̂о съгрѣшае҆мъ вс̂и.
аще кт̂о въ сло́вѣ не съгрѣша́етъ, се́и съверше́нъ мꙋ́жъ, си́ленъ ѻ҆бꙋзда́ти и҆ вс̂е тѣ́ло.
с̂е б̂о и҆ ко́немъ ѹ҆зды̀ въ ѹ҆ста̀ влага́емъ, да повинꙋ́ютсѧ на́мъ и҆ вс̂е тѣло и҆́хъ ѻ҆бращаем̑.
с̂е и҆ кораблѝ вели́цы сꙋще, и ѿ жестоких̑ вѣтровъ затача́еми, ѻ҆браща́ютсѧ ма́лымъ корми́лцем̑, ꙗ҆́може а҆́ще стремле́нїе правѧщаго хо́щетъ.
такожде же и҆ ꙗ҆́зы́къ ма́лъ ѹ҆́дъ е҆́сть, и҆ велми хва́литсѧ.
с̂е ма́лъ ѻ҆́гнь и҆ ко́ль вели́цы ве́щи съжига́етъ.
и҆ ꙗ҆́зы́къ ѻ҆́гнь, лѣпота непра́вдѣ.
си́це и҆ ꙗ҆́зы́къ въдворѧ́ет꙽сѧ въ ѹ҆десѣхъ на́ших̑, сквернѧ вс̂е тѣ́ло, и҆ палѧ ѻ҆ко́ло тва́ри нашеа, и҆ ѻ҆палѧ́ѧ҆сѧ ѿ гее҆́ны.
всѧ́ко б̂о е҆стество звѣреи же и҆ пти́цъ, га́дъ же и҆ ры́бъ, ѹ҆мꙋ́чаетсѧ и҆ ѹ҆мꙋ́читсѧ е҆стествомъ чл҃ческимъ.
ꙗ҆́зы́къ же никто́же может̑ ѿ чл҃къ ѹ҆мꙋ́чити, неѻ҆держи́мо б̂о ѕл̂о, и҆спо́лнь ꙗ҆́да смертоно́сна.
тѣмъ бл҃гословлѧе҆мъ б҃а и҆ ѿц҃а, и҆ тѣмъ кленемъ чл҃ки, и҆же по подо́бїю бж҃їю бы́вшаѧ.
ѿ тѣх же ѹ҆стъ и҆схо́дитъ бл҃гослове́нїе и҆ клѧ́тва.
не подоба́етъ братїе моѧ възлю́бленаѧ си́мъ тако быва́ти·

зач̑҇, н҃е·

Є҆́д̂а ѹ҆бо и҆сточник꙽ ѿ е҆ді́ного ѹ҆стїа и҆стача́етъ слад꙽кое и҆ го́ркое;
е҆д̂а мо́жетъ братїе моа, смоко́вница ма́слины твори́ти, и҆л̂и виноград̑наа лоза смо́квы;
такожд̑е ни е҆ді́нъ и҆сто́чникъ сла́нꙋ и҆ сла́дкꙋ творити во́дꙋ·

Кт̂о премꙋдръ и҆ хꙋдогъ въ вас̑҇;
да покажет̑ ѿ до́браго житїѧ дѣ́ла своѧ въ кротостнѣй премꙋ́дрости.
а҆ще л̂и за́висть го́ркꙋ и҆́мате и҆ рве́нїе въ срд̑цыхъ ва́шихъ, не хвали́тесѧ ни лжи́те на и҆́стиннꙋ·

Нѣ́сть сїѧ премꙋ́дость свы́ше низ꙽ходѧ́щи, н̂о зе́мна, дш҃е́вна, бѣсо́въска·

И҆дѣже б̂о за́висть и҆ рве́нїѧ, т̂ꙋ нестрое́нїе, и҆ всѧ́ка зл̂а ве́щь·

А҆ ꙗ҆́же свы́ше премꙋдрость, пр́ьвѣе ѹ́бо чи́ста ес̑҇, потом̑ же ми́рна, кротка, бл҃гопоко́рлива, и҆спо́лнь млс̑҇ти и҆ плодо́въ бла́гыхъ.
несꙋмѣ́нна.
и҆ нелицемѣ́ръна·

Плод̑ же пра́вды съмире́нїемъ сѣе́тсѧ творѧщим̑ ми́ръ·

Глв̑҇а, д҃·

Ѿкꙋ́дꙋ брани и҆ сва́ры въ вас̑҇;
не ѿсю́дꙋ ли ѿ сластеи ва́ших̑ вою́ющихъ въ ѹ҆десѣхъ ва́ших̑;
жела́ете, и҆ не и҆́мате·

Ѹ҆бива́ете и҆ зави́дите, и҆ не мо́жете ѹ҆лꙋчи́ти.
сварѧ́е҆тесѧ и҆ бо́рете, и҆ не и҆́мате, зане не про́сите·

Про́сите, и҆ не прие҆м꙽лете, зане зл̂ѣ про́сите, да въ сла́стехъ ва́ших̑ и҆ждиве́те·

Прелюбодѣ́ицы и҆ прелюбодѣ́ица, не вѣсте ли ꙗ҆́ко любы ми́ра сего, вра́жда бг҃ꙋ ес̑҇.
и҆же б̂о въсхо́щет̑ дрꙋгъ быти ми́рꙋ, вра́гъ бж҃їи быва́етъ·

И҆л̂и мнитѐ ꙗ҆ко всꙋе писа́нїе гл҃етъ, къ за́висти жела́етъ дх҃ъ, и҆же всели́сѧ в н̂ы;
болшꙋю же дае́тъ блгд̑ть·

Тѣмже гл҃етъ, г҃ь го́рдым̑ проти́витсѧ, смире́ным же дае҆тъ бл҃годать·

зач̑҇, н҃ѕ·

Повини́тесѧ ѹ҆бо б҃ꙋ проти́вите же сѧ дїа́волꙋ, и҆ бѣжит̑ ѿ вас̑҇.
прибли́житесѧ б҃ꙋ, и҆ прибли́житсѧ ва́мъ·

ѻ҆чи́стите рꙋцѣ грѣ́шницы, и҆справите срд̑ца ва́ша дв̂оедꙋшнїи·

Постражи́те и҆ слеѕи́те и҆ пла́читесѧ, смѣх꙽ вашъ въ пла́чь да ѻ҆брати́тсѧ, и҆ ра́дость в сѣтова́нїе.
смири́тесѧ пред̑ бг҃омъ, и҆ възнесет̑ в̂ы·

Не ѻ҆клевета́ите дрꙋгъ дрꙋга бра́тїе.
ѻ҆клевета́ѧѝ б̂о бра́та, и҆л̂и ѻ҆сꙋжа́ѧѝ бра́та свое҆го, ѻ҆клеветае҆тъ закон̑҇, и҆ ѻ҆сꙋжа́етъ зако́нъ.
а҆ще л̂и закон꙽ ѻ҆сꙋжа́еши, нѣ́си творецъ зако́нꙋ, н̂о сꙋдїи·

Є҆ді́нъ е҆сть законополо́жникъ, и҆ сꙋдїи, могїи сп҃стѝ и҆ погꙋби́ти·

Ты́ же кт̂о е҆си ѻ҆сꙋжа́ѧѝ дрꙋ́га;
слы́шите нн҃ѣ гл҃ющеи, днес̑҇ и҆ ѹ҆трѣ по́идемъ в се́й град̑, и҆ сътвори́мъ т̂ꙋ лѣто е҆ді́но, и҆ кꙋ́плю дѣем̑ и҆ приѻ҆брѣтенїе.
и҆же не вѣ́сте чт̂о ѹ҆трѣ слꙋчи́тсѧ·

Ка́ѧ б̂о жи́знь ва́ша;
па́ра ѹ҆бо е҆сть, и҆же въма́лѣ ꙗ҆́влѧ́етсѧ, пото́м же и҆счезает̑.
вмѣ́сто е҆же б̂ы гл҃ати вам̑, а҆́ще г҃ь въсхощет̑, и҆ жи́ви бꙋдемъ и҆ сътворим̑ сїе и҆л̂и ѻ҆́но.
нн҃ѣ же хва́литесѧ въ горды́нѧхъ ва́шихъ·

всѧ́ка хва́ла̀ такова̀, зл̂а е҆сть.
вѣ́дѧщемꙋ же ѹ҆́бо добро̀ твори́ти, и҆ не творѧ́щꙋ, грѣхъ е҆мꙋ е҆сть·

Глв̑҇а, е҃·

Прїидѣте нн҃ѣ бога́тїѝ пла́читесѧ и҆ рыда́ите ѻ҆ лю́тых̑ ско́рбехъ ва́ших̑ грѧдꙋщих꙽ на в̂ы·

Бога́тьство ва́ше и҆з꙽гнѝ, и҆ ри́зы ва́ша мо́лїе поѧдошѧ, зла́то ва́ше и҆ сребро̀ и҆зоржа́вѣ, и҆ ржа̀ и҆хъ в послꙋшество̀ на васъ бꙋ́детъ, и҆ снѣ́сть плоти ва́ша а҆́ки ѻ҆́гнь егоже сниска́сте въ послѣ́днѧа дн҃и·

Се̂ м꙽зда̀ дѣ́лателїи, дѣ́лавших̑ ни́вы ва́ша лише́ни ѿ ва́съ, въпїет꙽, и҆ въпїенїѧ жа́вших̑ въ ѹ́ши г҃а саваѻ҆ѳа внидо́ша·

Възвесели́стесѧ на землѝ, и҆ наслади́стесѧ, ѹ҆пита́сте срд̑ца ва́ша а҆́ки въ дн҃ь заколе́нїѧ·

ѻсꙋди́сте, ѹ҆би́сте пра́вед̑наго, не проти́витсѧ вам̑.
длъготръпи́те ѹ҆бо братїе моа до прише́ствиѧ гн҃ѧ.
с̂е земледѣлец꙽ ждетъ чтс̑҇ный плод̑ ѿ землѧ̀ долготерпѧ ѻ҆ немъ, до́ндеже прїиметъ дождь ранъ и҆ по́зденъ·

до́лготерпи́те ѹ҆бо и҆ в̂ы.
ѹ҆тверди́те срд̑ца ва́ша, ꙗ҆́ко прише́ствїе гн҃е прибли́жисѧ·

Не въздыха́ите дрꙋгъ на́ дрꙋга братїе, да не ѻ҆сꙋжд̑ени бꙋдете·

с̂е сꙋдїѧ пред̑ две́рми стои́тъ·

зач̑҇, н҃з·

Ѡ҆́браз̑ прїимѣте братїе моа, ѕл̂остра́стїю и҆ длъготерпѣ́нїю, проро́кы, и҆же гл҃ашѧ и҆́менем̑ гн҃имъ·

с̂е блажим̑ терпѣ́щаа.

Терпѣ́нїе і҆ѻ҆́вово слы́шасте, и҆ кончи́нꙋ гн҃ю видѣ́сте, ꙗ҆́ко мно́гомлс̑҇тивъ ес̑҇ г҃ь, и҆ ще́дръ·

Пре́жде всѣхъ братїе моа, не кленѣтесѧ, н̂и нб҃ом꙽ ни землею, н̂иже и҆но́ю клѧ́твою ко́ею·

Бꙋ́ди же вамъ, е҆же е́й, е́й.
и҆ е́же н̂и, н̂и.
да не в ли́цемѣрїе впадете·

Зл̂о стра́жетъ л̂и кт̂о въ васъ;
да мл҃твꙋ дѣ́етъ.
бл҃годꙋшьствꙋетъ ли кт̂о;
да поет̑.
боли́тъ л̂и кт̂о въ ва́съ;
да призовет̑ попы̀ цр҃ко́вныѧ, и҆ да мл҃твꙋ сътворѧ́тъ над̑ ни́мъ, пома́завше е҆го ма́сломъ въ и҆́мѧ гн҃е·

И҆ молитва вѣры, сп҃сетъ болѧ́щаго, и҆ въз꙽дви́гнетъ е҆го, г҃ь·

И҆ а҆́ще грѣхи бꙋдет̑ сътворилъ, ѿпꙋстѧ́тсѧ е҆мꙋ·

И҆сповѣ́даите ѹ҆́бо дрꙋгъ дрꙋгꙋ съгрѣше́нїа, и҆ моли́тесѧ дрꙋгъ за́ дрꙋга, ꙗ҆́ко да и҆сцѣлѣ́ете·

мно́го б̂о мо́жет̑ мл҃тва пра́вед̑наго поспѣшествꙋе҆ма·

Илїѧ чл҃къ б̂ѣ подобостра́стенъ нам̑, и҆ мл҃твою помоли́сѧ, да не бꙋ́дет̑ до́жд̑ь, и҆ не ѻ҆дожди по землѝ лѣта тр̂и, и҆ мс̑҇ць ше́сть.
и҆ па́ки помоли́сѧ, и҆ нб҃о до́ждь да́сть, и҆ землѧ̀ прозѧбе плод̑ свой·

Бра́тїе а҆́ще кт̂о въ васъ заблꙋ́дитъ ѿ пꙋтѝ и҆́стинны, и҆ ѻ҆брати́тъ кт̂о е҆го, да вѣ́сть, ꙗ҆́ко ѻ҆брати́выѝ грѣшника ѿ заблꙋже́нїѧ пꙋтѝ е҆го, и҆ сп҃се́тъ дш҃ꙋ ѿ сме́рти, и҆ покры́е҆тъ мно́жество грѣховъ·

Коне́цъ і҆а́ковлю събо́рномꙋ посла́нїю.

Имать в себѣ, глв̑҇а, е҃·

а҆ зача́лъ цр҃ко́вныхъ, и҃·