СОБ́ОРНОЕ ПОСЛАНЇЄ ПЄТРОВО
Глв̑҇а, а҃·
зач̑҇, н҃и·
Пе́тръ а҆пс̑҇лъ і҆с҃ хв҃ъ, и҆збра́ннымъ прише́лцемъ разсѣѧ́нїа.
по́нтꙋ, галаті́и, каппадокі́и, а҆сі́и, и҆ виѳині́и·
По презрѣ́нїю б҃а и҆ ѿц҃а, въ ст҃ы́ню дх҃а, въ послꙋшанїе и҆ кропле́нїе кро́ви і҆с҃ хв҃ы.
блгд̑ть вам̑ и҆ ми́ръ да ѹ҆мно́житсѧ·
зач̑҇·
Блвс̑҇е́нъ б҃ъ ѿц҃ъ г҃а на́шего і҆с҃ х҃а, и҆же по мно́ѕѣи свое́й млс̑҇ти, порожд̑еѝ на́съ въ ѹ҆пованїе жи́во въскрс̑҇енїемъ і҆с҃ хв҃ымъ ѿ ме́ртвыхъ, въ наслѣдїе нетлѣ́нно и҆ нескверно и҆ неѹ҆вѧда́емо, съблюде́но на нб҃сехъ въ васъ, и҆же си́лою бж҃їею съблюденых̑ вѣ́рою, въ спс̑҇е́нїе гото́во ꙗ҆ви́тисѧ въ́ времѧ послѣ́днее.
ѻ҆ не́мже ра́дꙋитесѧ ма́ло нн҃ѣ, а҆ще лѣ́по е҆сть, приско́рбъни бывше въ разли́чныхъ напа́стех̑, да и҆скꙋшенїе ва́шеѧ̀ вѣ́ры, мн́ого чтс̑҇нѣ́ише зла́та ги́бнꙋща, ѻ҆гне́м꙽ же и҆скꙋше́на, ѻ҆брѧ́щетсѧ въ похвалꙋ̀ и҆ славꙋ и҆ че́сть, въ ѿкрове́нїи і҆с҃ хв҃ѣ.
е҆гоже не видѣ́вше любити, на негоже нн҃ѣ не зрѧще, вѣ́рꙋюще же, ра́дꙋитесѧ ра́достїю неи҆згл҃ан꙽ною и҆ просла́вленною, прїемлюще кон̑҇чи́нꙋ вѣрѣ ва́шеи, спс̑҇нїе дш҃амъ·
ѻ҆ нем̑же сп҃сенїи взыска́ша і҆ и҆спыта́ша прро̑҇роцы, и҆же ѻ҆ ва́шеи блгд̑ти проре́кшеѝ, и҆спыта́юще въ каково и҆ли въ кое вре́мѧ ꙗ҆влѧ́ше в них꙽ дх҃ъ хв҃ъ прежде свѣдѣтельствꙋѧ ѻ хв҃ыхъ стра́стехъ, и҆ ꙗ҆́же по сихъ сла́вах꙽, и҆мже ѿкры́сѧ ꙗ҆́ко не и҆́мъ самѣмъ, н̂о и҆ нам̑ же слꙋжа́хꙋ сїа, ꙗ҆́же нн҃ѣ въз꙽вѣсти́шасѧ вамъ, бл҃говѣствовав̑҇шими вамъ дх҃омъ ст҃ымъ по́сланным꙽ с нб҃се, в нѧ́же жела́ють а҆гг҃лы прини́кнꙋти·
зач̑҇·
Тѣ́мже възлю́бленїи, препоа́савше чресла̀ помышленїа ва́шего, трезвѧ́щесѧ, съвръшенѣ ѹ҆пова́ите на приноси́мꙋю вамъ блгд̑ть, ѿкрове́нїемъ і҆с҃ хв҃ымъ, ꙗ҆́ко ча́да послꙋша́нїю, не преѻ҆бразꙋ́ющесѧ пе́рвыми невѣдѣнїа ва́шего похотѣ́нїи, н̂о по зва́вшемꙋ в̂ы ст҃о́мꙋ, и҆ сами ст҃и въ всемъ житїи бꙋ́дите.
зане пи́сано е҆сть, ст҃и бꙋ́дѣте, ꙗ҆́ко а҆зъ ст҃ъ е҆смь.
и҆ а́ще ѿц҃а называ́ете нелицемѣ́рно сꙋдѧ́ща комꙋждо по дѣлꙋ, съ страхомъ житїа ва́шего вре́мѧ жительствꙋе҆те, вѣ́дѧще ꙗ҆́ко не и҆стлѣ́нным꙽ сребромъ и҆л̂и зла́том̑ и҆зба́вистесѧ ѿ сꙋе҆тнаго ва́шего житїа ѿц҃ы преда́ннаго н̂о честно́ю кровїю ꙗ҆́ко а҆гньца непоро́чна и҆ нескве́рна х҃а·
Предъѹ҆вѣ́дѣна ѹ҆бо прежд̑е сложе́нїа ми́ра ꙗ҆́вльша же сѧ въ послѣднѧа лѣта васъ ради, и҆же е҆го ради вѣ́ровавшихъ въ б҃а, въздви́гъшаго его и҆з ме́ртвыхъ, и҆ сла́вꙋ е҆мꙋ да́вша, ꙗ҆́ко да вѣ́ра ваша, и҆ ѹ҆пова́нїе бꙋ́детъ на́ б҃а.
дш҃а ва́ша ѻ҆чи́стивше въ послꙋша́нїе и҆стинѣ дх҃омъ, въ братолю́бїе нелицемѣ́рно, ѿ чи́ста срд̑ца дрꙋгъ дрꙋга люби́те прилѣж́но, порожде́ни не ѿ сѣмене и҆стлѣ́нна, н̂о неи҆стлѣ́нна, сло́вом̑ жива́го б҃а, и҆ пребыва́ющаго въ́ вѣки·
Зане всѧ́ка плоть ꙗ҆́ко трава̀, и҆ всѧ́ка сла́ва чл҃кꙋ ꙗ҆́ко цвѣтъ травны́и.
и҆́сше трава̀ и҆ цвѣтъ еѧ̀ ѿпадѐ, гл҃ъ же гн҃ь пребыва́етъ въ вѣки.
се́й же е҆сть гл҃ъ бл҃говѣствова́ныи въ ва́съ·
Глв̑҇а, в҃·
Ѿло́жьше ѹ҆бо всѧ́кꙋ ѕло́бꙋ, и҆ всѧ́кꙋ лесть, и҆ лицемѣ́рїе и҆ за́висть, и҆ вс̂ѧ клеветы, ꙗ҆́ко но́ворожени младенцы, слове́сное и҆ неле́стное млеко възлюби́те, да ѻ҆ не́мъ върастете въ сп҃сенїе·
Понеже вкꙋси́сте ꙗ҆́ко бл҃гъ г҃ь, к немꙋ же приходѧ́ще, ка́мени жи́вꙋ, ѿ чл҃къ ѹ҆бо ѹ҆ничиже́нꙋ, ѿ́ бг҃а же и҆збра́нꙋ че́стнꙋ, и҆ са́ми ꙗ҆́ко ка́менїе жи́во ѕи́ждѣтесѧ въ хра́мъ дх҃овенъ, сщ҃енъство ст҃о, възнести же́ртвы дх҃овны, бл҃гоприа́тны бв҃и і҆с҃ хм҃ъ·
Зане пи́сано ес̑҇ въ писа́нїѝ, се полагаю въ сїѻ́нѣ ка́мень краеѹ҆голенъ и҆збран̑҇, че́стен̑҇.
и҆ вѣ́рꙋѧѝ во́нь, не постыди́тсѧ·
Ва́мъ ѹ҆бо че́сть вѣ́рꙋющимъ, а҆ противѧ́щимсѧ, ка́мень, е҆гоже небрего́ша ѕи́ждꙋщеи, се́й бысть въ главꙋ ѹ́глꙋ.
и҆ ка́мень претыка́нїю, и҆ ка́мень събла́знꙋ, ѻ҆ немже и҆ претыка́ютсѧ сло́вꙋ противлѧ́ющеѝсѧ, ѻ҆ немже и҆ положе́ни быша·
Вы же ро̑ и҆збра́нъ, црс̑҇кое сщ҃е́нїе, ꙗ҆́зы́къ ст҃ъ, людїе ѻ҆бновле́нїа, ꙗ҆́ко да добродѣтели възвѣсти́те, и҆же и҆с т꙽мы̀ ва́съ призва́вшемꙋ въ чю́дныи е҆го свѣтъ.
и҆же и҆́ногда не лю́дїе, нн҃ѣ же лю́дїе бж҃їи.
и҆же не поми́ловани, нн҃ѣ же поми́ловани бы́сте·
зач̑҇·
Възлюбленїи, молю ꙗ҆ко пришелца и҆ странники, ѻ҆гребатисѧ ѿ плотьских̑ похотїи, ꙗ҆́же въю҆́ют꙽ на́ дш҃ꙋ, житїе ва́ше и҆мꙋще добро̀ въ ꙗ҆́зы́цх̑ѣ, да ѻ҆ немже клеве́щꙋтъ васъ ꙗ҆́ко ѕло́дѣѧ, ѿ до́брыхъ дѣлъ видѣ́вше, просла́вѧтъ б҃а въ дн҃ь посѣще́нїа.
повини́тесѧ ѹ҆бо всѧ́комꙋ чл҃чю създа́нїю г҃а ради·
А҆ще же цр҃ю, ꙗ҆́ко преѻ҆блада́ющꙋ.
а҆ще ли же кнѧзем̑, ꙗ҆ко ѿ него по́сланомъ, въ ѿмще́нїе ѹ҆бо ѕлодѣ́емъ, въ похвалꙋ же бл҃готво́рцемъ·
Ꙗ҆́ко та́ко е҆сть во́лѧ бж҃їа, бл҃готворѧ́щемъ ѻ҆бꙋздова́ти безꙋ́мныхъ чл҃къ невѣж́дьство.
ꙗ҆́ко свобо́дни, а҆ не ꙗ҆ко прикрове́нїе и҆мꙋще ѕло́бѣ свободꙋ, н̂о ꙗ҆ко рабѝ бж҃їи, всх̑ѣ почита́ите, брат꙽ство възлюби́те·
Бг҃а бо́итесѧ, цр҃ѧ чтѣте·
рабѝ повинꙋ́итесѧ въ всѧком стра́сѣ влд̑камъ·
Не то́кмо бл҃гимъ и҆ кроткимъ, н̂о и҆ стропти́вымъ.
сѐ б̂о е҆сть ѹ҆го́дно пред̑ бг҃омъ, а҆ще со́вѣсти ради бж҃їѧ тръпи́тъ кт̂о скорби стражда̀ бес пра́вды̀·
Каѧ̀ б̂о хвала, а҆ще съгрѣша́юще и҆ мꙋ́чими терпитѐ;
н̂о а҆ще добро̀ творѧще и҆ стра́ждꙋще терпитѐ, сїе ѹ҆го́дно пред̑ бг҃омъ.
на сїѐ б̂о и҆ зва́ни бысте·
зач̑҇, н҃ѳ·
Зане и҆ х҃с пострада̀ по на́съ, намъ ѻ҆ста́вль ѻ҆́бразъ, да послѣ́дꙋемъ стопамъ е҆го, и҆же грѣха не сътвори, ни ѻ҆брѣтесѧ ле́сть въ ѹ҆стѣхъ е҆го.
и҆же ѹ҆карѧ́емъ проти́вꙋ не ѹ҆карѧше, стражда, не прѣща́ше, предаѧше же сꙋдѧщемꙋ пра́ведно, иже грѣхи наша са́мъ възнесѐ на́ тѣлѣ сво́емъ на́ древо, да ѿ грѣх꙽ и҆збы́вше, правдою поживе́мъ, е҆гоже ꙗ҆́звою и҆сцѣлѣ́сте·
Бѣсте б̂о ꙗ҆ко ѻ҆́вца заблꙋ́жшаѧ, не и҆мꙋще па́ствырѧ.
н̂о възврати́стесѧ нн҃ѣ къ па́стырю, и҆ посѣти́телю дш҃ъ ва́ших̑·
Глв̑҇а, г҃·
Такожд̑е же и҆ жены̀ повинꙋ́ющесѧ свои́мъ мꙋжемъ, да и҆ а҆ще нѣ́цыи не повинꙋ́ютсѧ сло́вꙋ, же́ньскимъ жи́тїем̑, без слова плѣнени бꙋ́дꙋт꙽, видѣвше е҆же съ́ страхомъ чи́сто житїе ваше·
И҆мже да есть не внѣш́нее плетенїе влас̑҇, и҆ ѻ҆бложенїе зла́та, и҆л̂и ѻ҆дѣа́нїемъ ризъ лѣ́пота, н̂о потае́ныѝ срд̑ца чл҃къ, въ неи҆стлѣнїе кроткаго и҆ мол̑҇чали́ваго дх҃а, е҆же е҆сть пред̑ бг҃омъ мно́гоцѣ́нно·
Тако б̂о и҆ногда и҆ ст҃ы́а жены̀ ѹ҆пова́ющаѧ на́ б҃а, ѹ҆кра́шахꙋ себе, повинꙋ́ющесѧ свои҆мъ мꙋже́мъ.
ꙗ҆́коже са́рра послꙋш́аше а҆враа́ма, господина того зовꙋщ́и·
Є҆а́же бысте ча́да бл҃готворѧ́ще, и҆ не боѧ́щесѧ ни е҆дїного стра́ха·
Мꙋж́їе та́кожде въ кꙋ́пѣ живꙋще съ свои́ми жена́ми по ра́зꙋмꙋ ꙗ҆́ко немощнѣ́ишꙋ съсꙋ́дꙋ жен̑҇скомꙋ, въздаю́ще честь, ꙗ҆́ко и҆ снаслд̑ѣ́ницы бл҃годатнѣи жи́зни, въ е́же не прекраща́тисѧ мл҃твамъ ва́шимъ·
Коне́цъ же, вс̂и е҆дїномꙋ́дрени, ми́лостиви, братолю́бцы, милосе́рди бл҃гоѹ҆тро́бни, мꙋдролю́бцы, смиреномꙋ́дри, не въздаю́ще ѕл̂а за ѕло̀ и҆л̂и досажде́нїе за досажде́нїе, сꙋпроти́вно же, блс̑҇вѧ́ще.
вѣ́дѧще ꙗ҆́ко на сѐ звани бы́сте, да блс̑҇ве́нїе наслѣдите·
зач̑҇, ѯ҃·
Хотѧѝ б̂о живот̑ люби́ти, и҆ ви́дѣти дн҃и бл҃ги, да ѹ҆дръжит̑ ꙗ҆́зы́къ свои ѿ зла̀, и҆ ѹ҆стнѣ̀ своѝ не гл҃ати льсти.
да ѹ҆кло́нитсѧ ѿ зла̀ и҆ да сътвори́т꙽ бл҃го·
да възы́щетъ смире́нїе, и҆ да держит̑сѧ е҆го, зане ѻ҆́чи гн҃и на пра́вед̑ныѧ, и҆ ѹ́ши е҆го въ мл҃твꙋ и҆хъ.
лице́ же гн҃е на творѧ́щаѧ злаа.
е҆же потреби́ти их̑ ѿ землѧ̀·
И҆ кт̂о ѻ҆зло́битъ вас̑҇ а҆́ще бл҃го́мꙋ подо́бницы бꙋдете;
н̂о а҆ще и҆ стра́жете пра́вд̑ы рад̑и̑ бл҃жени.
стра́ха же и҆хъ не ѹ҆бои́тесѧ, ни́же смꙋща́итесѧ·
Г҃а же б҃а ст҃и́те въ срд̑цыхъ ва́шихъ.
гото́вы же присно къ ѿвѣтꙋ всѧ́комꙋ въпраша́ющемꙋ в̂ы сло́во, ѻ҆ ва́шемъ ѹ҆пова́нїи, съ кро́тостїю и҆ стра́хомъ, со́вѣсть и҆мꙋ́ще бл҃гꙋ, да ѻ҆ не́мже клевещꙋтъ вас̑҇ ꙗ҆́ко злодѣѧ, постыдѧт̑сѧ злосло́вѧщеѝ ваше бл҃го́е ѻ҆ х҃ѣ житїе·
Лꙋче б̂о ес̑҇ бл҃готворѧщим̑, а҆ще хощет̑ во́лѧ бж҃їѧ, пострадати, нежел̂и зло творѧ́щим̑·
Зане и҆ х҃с е҆ді́ною ѻ҆ грѣсѣ́хъ пострада̀, пра́вед̑никъ за непра́вед̑ники, да приведет̑ ны бг҃ови, ѹ҆мрьщве́нъ ѹ҆бо пло́тїю, ѻ҆жи́в же дх҃омъ·
ѻ҆ немже и҆ сꙋ́щим̑ въ темни́цы дх҃о́мъ съшед̑ проповѣда, проти́вльшимсѧ и҆ногда, е҆гд̑а ѻ́жидаше бж҃їе длъготерпѣ́нїе, въ дн҃и но́евы дѣла́емꙋ ковче́гꙋ, в нем̑же ма́ло, сирѣ́чь, ѻ҆́смь дш҃ъ сп҃со́шѧсѧ ѿ воды̀.
е҆гоже въѻ҆браже́нїе нн҃ѣ и҆ насъ сп҃са́етъ кр҃ще́нїе, не плотьскїѧ́ ѿложенїе скве́рны, н̂о со́вѣсти бл҃ги въпроше́нїе ѹ҆ б҃а, въскрс̑҇нїемъ і҆с҃ хв҃ымъ, и҆же е҆сть ѻ҆деснꙋю б҃а, възшед̑ на́ нб҃о, поко́ршем̑сѧ е҆мꙋ а҆́гг҃еломъ и҆ вла́стемъ и҆ си́ламъ·
Глв̑҇а, д҃·
зач̑҇, ѯа҃·
Хѹ҃ ѹ҆бо пострада́вшꙋ за н̂ы пло́тїю, и҆ в̂ы в꙽ тꙋже мы́сль въѻ҆рꙋжи́тесѧ, зане пострадавы̀ пло́тїю преста̀ ѿ грѣха̀, въ е҆же не ктомꙋ̀ в꙽ члчс̑҇кїѧ по́хоти, н̂о въ во́лю бж҃їю прочее въ плоти жи́ти вре́мѧ.
довлѣ́ет꙽ бо вам̑ мимошед̑шее вре́мѧ житїѧ во́лю ꙗ҆́зы́ческꙋю твори́ти, хожд̑ьшем̑ въ нечи́стотах̑, въ по́хотех꙽, в мꙋжеложъствѣ, въ скотоло́жъствѣ, въ по́мыслохъ, въ пїа́нъствѣ, въ козлогласова́нїихъ, в лихои҆ма́нїихъ, и҆ бг҃оме́рьскихъ и҆долослꙋже́нии҆хъ, ѻ҆ немже дивѧ́тсѧ не и҆сходѧ́щимсѧ вам̑ въ то́же блꙋда̀ разлїѧнїе, хꙋлѧ́ще, и҆же въздадѧт̑ сло́во готовꙋ сꙋщемꙋ сꙋдити живымъ и҆ мр҃твым̑·
На сѐ б̂о и҆ мр҃твымъ бл҃говѣсти́сѧ, да сꙋ́дъ ѹ҆бо прїимꙋтъ пло́тїю по чл҃кꙋ, поживꙋтъ же по́ бѕ҃ѣ дх҃омъ.
всѣм же кончи́на прибли́жисѧ·
Ѹ҆цѣломꙋ́дритесѧ ѹ҆бо, и трезви́тесѧ въ мл҃твахъ, прежде же всѣхъ ꙗ҆́же к себѣ любовъ прилѣжнꙋ и҆мꙋще.
зане любовь покрыва́етъ мно́жество грѣховъ·
Страннолю́бцы дрꙋгъ къ дрꙋгꙋ безъ ропта́нїи, ко́ждо ꙗ҆коже приѧ́тъ дарова́нїе междꙋ себе сїе слꙋжа́ще, ꙗ҆ко добрїи строи́телїе разли́чънѣи бл҃года́ти бж҃їи·
А҆ще кт̂о гл҃ет̑, ꙗ҆́ко словеса̀ бж҃їѧ.
а҆ще кт̂о слꙋ́жит̑, ꙗ҆́ко ѿ крѣ́пости, ꙗ҆́коже пода́стъ б҃ъ, да ѻ҆ всемъ сла́витсѧ бг҃ъ і҆с҃ хм҃ъ, е҆мꙋже е҆сть сла́ва и҆ держа́ва въ вѣки вѣкомъ, а҆ми́нь·
зач̑҇, ѯв҃·
Възлю́бленїи не диви́тесѧ и҆же въ васъ ражд̑еженїю, къ и҆скꙋшенїю вам̑ быва́емꙋ, ꙗ҆́ко чю́ждꙋ вамъ слꙋча́ющꙋсѧ, н̂о понеже приѻ҆бща́етесѧ хв҃ымъ стрс̑҇темъ, ра́дꙋитесѧ, ꙗ҆́ко да и҆ въ ꙗ҆́вле́нїе сла́вы е҆го възра́дꙋе҆тесѧ веселѧ́щесѧ.
а҆ще ѹ҆карѧ́еми быва́ете ѻ҆ и́мени хв҃ѣ, блаже́ни е҆сте·
Ꙗ҆́ко сла́вы и҆ бж҃їи дх҃ъ, на васъ почїетъ.
ѻ҆нѣми ѹ҆бо хꙋ́лит꙽сѧ.
а҆ ва́ми прославлѧ́етсѧ.
да не кт̂о ѹ҆бо ѿ ва́съ постра́жетъ ꙗ҆́ко ѹ҆бі́ица, и҆л̂и ꙗ҆́ко та́ть, и҆л̂и ꙗ҆́ко ѕлодѣи, и҆л̂и ꙗ҆ко чю́жь посѣти́тель·
А҆ще ли же ꙗ҆́кы хрс̑҇тїа́нинъ, да не стыдитсѧ.
н̂о да прославлѧ́ет же б҃а в ча́сти се́й.
ꙗ҆ко времѧ начати сꙋда ѿ домꙋ бж҃їѧ·
А҆ще ли преже ѿ вас̑҇, чт̂о кончи́на проти́вѧщимсѧ бж҃їю е҆ѵг̑҇лїю;
и҆ а́ще пра́вед̑никъ е҆́два сп҃са́е҆тсѧ, нечести́выи и҆ грѣшныи гдѣ ꙗ҆́ви́тсѧ;
тѣмже и҆ стра́жꙋщеѝ по во́ли бж҃їи, ꙗ҆́ко вѣрнꙋ ѕижи́телю да предадѧтъ дш҃а своѧ, въ бла́готворе́нїе·
Глв̑҇а, е҃·
Ста́рца ꙗ҆́же въ ва́съ молю̀, ꙗ҆ко ста́рецъ сы́и, и҆ свѣдѣтель хв҃ымъ стрс̑҇темъ, и҆же и҆ хотѧ́щей ꙗ҆́ви́тисѧ сла́вѣ ѻ҆бѣщникъ, паси́те е҆же въ васъ ста́до бж҃їе, посѣща́юще не нꙋжд̑ею н̂о волею, и҆ по́ бѕ҃ѣ, ни́же непра́вед̑ными прибы́тки, н̂о ѹ҆серъдно.
ни ꙗ҆ко ѻ҆блада́юще рѧдꙋ, н̂о ѻ҆́брази быва́ите ста́дꙋ.
и҆ ꙗ҆́влъшꙋсѧ пастыреи начѧ́лникꙋ, прїимете неѹ҆вѣда́емыи славы вѣнец꙽·
Та́коже ю҆нїи, повини́тесѧ ста́рцем̑, вси же дрꙋгъ дрꙋгꙋ повинꙋ́ющесѧ, смиреномꙋдрїе стѧжи́те.
зане б҃ъ гр́ъдымъ проти́витсѧ, смире́ным꙽ же дае҆тъ блгд̑ть·
зач̑҇, ѯг҃·
Смири́тесѧ ѹ҆бо под̑ крѣ́пкꙋю рꙋ́кꙋ бж҃їю, да в̂ы възнесе́тъ въ времѧ, всю печѧ́ль вашꙋ възвр́ьгше нань, ꙗ҆́ко то́й пече́тсѧ ѻ҆ ва́съ·
Трезви́тесѧ, бо́дръствꙋите, зане сꙋпостатъ ва́шъ дїа́волъ ꙗ҆́ко ле́въ рыкаѧ хо́дитъ и҆скы̀ кого поглоти́ти.
е҆мꙋже проти́витесѧ тве́рди вѣ́рою, вѣдѧще ꙗ҆́ко тѣже стра́сти слꙋчѧ́ю҆тсѧ ва́шемꙋ брат꙽ствꙋ е҆же въ ми́рѣ·
Бг҃ъ же всѧ́кїѧ блгд̑ти призва́выѝ васъ въ вѣ́чнꙋю свою сла́вꙋ ѻ҆ х҃ѣ і҆с҃ѣ, ма́ло пострадавшемъ, то́й да съвр́ьшитъ в̂ы, да ѹ҆твръдит̑, да ѹ҆крѣпит̑, да ѻ҆сноветъ.
томꙋ сла́ва и҆ дръжа́ва въ вѣки вѣкомъ, а҆ми́нь·
Сїлꙋа́номъ вамъ вѣрным̑ братом, ꙗ҆́ко непщꙋю, въ ма́лѣ написах̑, молѧ и҆ засвѣдѣтельствꙋѧ, се́й быти и҆́стиннѣи блгд̑ти бж҃їи въ не́иже стоитѐ.
цѣлꙋ́етъ в̂ы ꙗ҆́же въ вавѷло́нѣ съи҆збра́ннаѧ, и҆ марко сн҃ъ мо́и.
цѣлꙋите дрꙋгъ дрꙋга лобза́нїемъ любви·
Ми́ръ всѣмъ вам̑ ѻ х҃ѣ і҆с҃ѣ.
а̀ми́нь·
Конецъ, събо́рномꙋ посланїю пе́рвомꙋ ст҃а́го а҆пс̑҇ла петра·
И҆́мать в꙽ себѣ глв̑҇а, е҃. зч̑҇а цр҃ковных̑, ѕ҃.