СОБ́ОРНОЄ ПОСЛАНЇЕ ПЄТРОВО вто́рое
Глв̑҇а, а҃ ,
зач̑҇, ѯд҃·
Сі́монъ петръ, рабъ и҆ посла́нникъ і҆с҃ хв҃ъ, въ равночестнꙋю намъ полꙋчившим̑ вѣ́рꙋ, пра́вдою б҃а на́шего и҆ сп҃са і҆с҃ х҃а·
Блгд̑ть вамъ и҆ ми́ръ да ѹ҆мно́житсѧ въ познанїе бж҃їе, и҆ х҃а і҆с҃а г҃а на́шего, ꙗ҆́ко вс̂ѧ намъ бжс̑҇твеныѧ си́лы свое҆ѧ̀, ꙗ҆́же къ животꙋ и҆ бл҃гоче́стїю подана, разꙋмомъ призва́вшаго нас̑҇, сла́вою и҆ добродѣтелїю, и҆мже честнаѧ нам꙽ и҆ вели́каѧ ѻ҆бѣтованїѧ дарова́шасѧ, ꙗ҆́ко да сихъ ради бꙋ́дете бжс̑҇твенаго причѧ́стницы е҆стества, ѿбѣгше и҆́же въ мирѣ похотныѧ тл̂ѧ·
И҆ самое҆ же сїе тща́нїе вс̂е привне́сше, подадите въ вѣ́ре ва́шеи добродѣтел̑҇, въ добродѣт́ели же, ра́зꙋмъ, въ ра́зꙋмѣ же, въздръжа́нїе, въ воздер꙽жа́нїи же, терпѣ́нїе, въ терпѣ́нїи же, бл҃гоче́стїе, въ бл҃гоче́стїи же, братолю́бїе, въ братолю́бїи же, любо́вь·
Си́мъ б̂о въ вас̑҇ сꙋщим̑ и҆ множа́щем̑сѧ, непраз̑дныхъ ни́же бесплод̑ных꙽ сътворит꙽ въ г҃а на́шего і҆с҃ х҃а позна́нїе·
Є҆мꙋ́же б̂о нѣсть си̂хъ, слѣпъ е҆сть.
мжа, забве́нїе прїемъ чище́нїѧ древнихъ своих̑ грѣхо́въ·
зач̑҇, ѯе҃·
Тѣмже па́че братїе, потщи́тесѧ и҆звѣстно ваше зва́нїе і҆ и҆збра́нїе твори́ти·
Сїѧ́ бо творѧ́ще.
не и҆́мате съгрѣши́ти никогда́же·
си́це б̂о ѻ҆би́лно припода́стъсѧ вам̑ въходъ въ вѣчное црс̑҇тво г҃а на́шего и҆ спаса і҆с҃ х҃а.
сего ради не ѻ҆блѣнюсѧ въспомина́ти вамъ при́сно ѻ҆ сих̑, а҆́ще и҆ вѣ́дите и҆ ѹ҆тверже́ни е҆стѐ въ настоѧ҆́щеи и҆́стинѣ.
пра́вед̑но бо мн̂ю, доне́лѣже е҆смь въ сем̑ тѣлесѝ, въставлѧ́ти вас̑҇ въспомина́нїе҆мъ вѣ́дыи ꙗ҆́ко ско́ро е҆сть ѿложе́нїе тѣлесѝ мое҆мꙋ, ꙗ҆́коже и҆ г҃ь нашъ і҆с҃ х҃с сказа̀ мн̂ѣ·
Потщꙋ́ же сѧ и҆ всегда и҆мѣти васъ по мое҆мъ и҆схо́дѣ ꙗ҆́же ѻ҆ сихъ памѧть твори́ти.
не ѹ҆хищре́нымъ б̂о ба́снемъ послѣ́довавше сказа́хом꙽ вамъ си́лꙋ и҆ прише́ствїе г҃а на́шего і҆с҃ х҃а.
н̂о самовид̑цы быв̑҇ше вели́чествїю ѻ҆́ного.
прїемъ б̂о ѿ б҃а ѿц҃а честь и҆ сла́вꙋ, гла́сꙋ пришед̑шꙋ к немꙋ таковꙋ̀ ѿ велелѣ́пныѧ сла́вы, се́й ес̑҇ сн҃ъ мои възлю́бленыи, ѻ҆ нем̑же а҆́зъ бл҃гои҆зволих̑.
и҆ се́й гласъ м̂ы слы́шахом꙽ съ нб҃се съшед̑шъ с ни́мъ сꙋ́ще на горѣ ст҃ѣи·
І҆ и́мамы и҆звѣстнѣе пророческое сло́во, е҆же до́брѣ творите в꙽нима́юще ꙗ҆коже свѣти́лникꙋ сїѧ́ющꙋ въ те́мнѣ мѣсте, и҆ до́ндеже дн҃ь ѻ҆заритъ, и҆ денни́ца въсїѧ́етъ въ срд̑цыхъ ва́шихъ·
зач̑҇, ѯѕ҃·
Сїе пре́жде вѣ́дꙋще, ꙗ҆́ко всѧ́ко про̑҇рочество кни́жное по своемꙋ сказа́нїю не быва́етъ.
ни б̂о во́лею бысть когда̀ чл҃комъ про̑҇рочество, н̂о ѿ ст҃аго дх҃а просвѣщаеми, гл҃аша ст҃їи бж҃їи чл҃цы·
Глв̑҇а, в҃·
Бы́ша же и҆ лъжи́ви про̑҇роцы въ лю́дехъ, ꙗ҆коже и҆ въ ва́съ бꙋ́дꙋтъ лъжи́ви ѹ҆чи́тели и҆же внесꙋт꙽ е́реси поги́бели, і҆ и҆скꙋ́пльшаго их̑ влд̑ки ѿмета́ющесѧ, приводѧ́ще себѣ̀ ско́рꙋ поги́бель.
и҆ мно́ѕи послѣд꙽ствꙋ́ютъ и҆хъ нечистотамъ, и҆миже пꙋть и҆́стинныи похꙋ́литсѧ, и҆ въ преѹ҆множе́нїи льсти́выхъ словесъ вас꙽ ѹ҆ловѧ́т꙽.
и҆хже сꙋдъ и҆скони не коснит̑, и҆ поги́бель ихъ не въздрѣмлетъ.
а҆ще бо б҃ъ а҆гг҃ловъ съгрѣши́вших̑ не пощадѣ̀, н̂о плени́цами мра́ка свѧзав̑҇, преда́сть на сꙋдъ мꙋ́чимы блюстѝ, и҆ перваго ми́ра не пощадѣ̀, н̂о ѻ҆смаго но́ѧ̀ пра́вдѣ проповд̑ѣника съхранѝ пото́пъ ми́рꙋ нечьствова́вшихъ наведъ, и҆ гра́ды съдомъскїѧ и҆ гомо́рьскїа съже́гъ, разоре́нїемъ ѻ҆сꙋдѝ, ѻ҆́бразъ хотѧ́щимъ нечествова́ти положи́въ.
и҆ пра́ведника ло́та ѻ҆бидима ѿ без꙽зако́нныхъ и҆ живꙋщихъ въ нечистотѣ жите́истеи и҆збави·
видѣ́нїемъ б̂о и҆ слꙋх́омъ пра́ведныи живыѝ в нихъ, дн҃ь ѿ дне дш҃ꙋ пра́веднꙋ без̑законными дѣ́лы мꙋча́ше·
зач̑҇, ѯз҃·
Вѣ́сть г҃ь бл҃гочтс̑҇и́выѧ ѿ напа́сти и҆збавлѧ́ти, непра́ведники же въ дн҃ь сꙋ́дныи мꙋчи́мы блюстѝ·
Ни па́че же въ слѣдъ по́хоти плотьскїа сквръне́нїа ходѧ́щихъ, и҆ ѻ҆ госпо́дьствѣ нерадѧ́щихъ.
продръза́телехъ, себѣ ѹ҆го́дныхъ, сла́вы не трепе́щꙋтъ хꙋлѧ́ще.
и҆дѣже а҆гг҃ли крѣпостїю и҆ си́лою болши сꙋще, не тръпѧ́тъ на́ сѧ ѿ г҃а ѹ҆кори́зненъ сꙋдъ.
сїи же ꙗ҆́ко ско́ти животни е҆стеством̑ бывше въ поги́бель и҆ тлю̀, в ни́хже не разꙋмѣю́тъ хꙋлѧ́ще, въ и҆стлѣнїи свое҆мъ и҆стлѣютъ, прїемлюще м꙽здꙋ̀ неправеднꙋ, сласть мнѧ́ще вседне́вное насыще́нїе, скверни́тели и҆ поро́чницы, пита́ющесѧ ле́стьми свои́ми, ꙗ҆́дꙋще с ва́ми, ѻ҆́чи и҆мꙋще и҆спо́лнь блꙋдодѣа́нїѧ и҆ непреста́емаго грѣха, прельща́юще дш҃а неѹ҆тверже́ны, срд̑це наѹ҆че́но лихои́мъствꙋ и҆мꙋще, клѧтвы чада, ѻ҆ста́вльше правыи пꙋть, заблꙋди́ша, послѣ́довавше пꙋтѝ валаа́мовꙋ восо́рова, и҆же м꙽здꙋ̀ непра́веднꙋ възлюбѝ, ѻ҆бличе́нїе же и҆мѣ̀ свое҆го без̑зако́нїа.
под̑ѧ҆ремникъ без꙽гла́сен̑҇, члчс̑҇кым꙽ гла́сомъ провѣща́вша, въз꙽бранѝ про̑҇рокꙋ безꙋмїе·
Сїѝ сꙋть и҆сто́чницы безво́дни, и҆ ѻ҆блацы и҆ м꙽глы̀ ѿ вѣтръ преноси́ми, и҆мже мра́къ те́мныи въ вѣкы блюде́тсѧ·
прего́рдаѧ̀ б̂о сꙋе҆ты вѣща́юще прельща́ютъ въ скве́рны плотьскїѧ похоти, ѿбѣга́юще ѻ҆ти́нд̑ꙋ живꙋщих̑ въ льсти, свободꙋ̀ им̑ ѻ҆бѣщава́юще, сами рабѝ сꙋще тлѣ́нїю.
и҆мже б̂о кт̂о побѣже́нъ быва́етъ, семꙋ̀ и҆ рабо́тенъ е҆сть.
А҆ще б̂о ѿбѣгше скве́рнъ ми́ра въ разꙋмъ г҃а на́шего и҆ сп҃са і҆с҃ х҃а, си́миже пакы съплетшесѧ побѣжд̑а́еми быва́ютъ, бы́ша же и҆мъ послѣднѧа̀ го́рша пе́ръвых̑·
лꙋчше б̂о бѣ̀ и҆мъ не позна́ти пꙋтѝ пра́вды, нежел̂и позна́вшем꙽ възврати́тисѧ ѿ преда́ныа им̑ ст҃ы́а за́повѣди, слꙋчѝ б̂о сѧ и҆м꙽ и҆́стин̑҇наа при́тча, пе́съ въз꙽вра́щсѧ на свою̀ блево́тинꙋ, и҆ свинїа̀ ѻ҆мы́вшисѧ въ ка́лѣ ти́ннѣ·
Глв̑҇а, г҃·
зач̑҇, ѯи҃·
Сїе ѹ҆же възлю́бленїѝ второ́е вамъ пиш̀Ꙋ посланїе, в нихже възбꙋжа́ю васъ въспомина́нїем̑ чи́стаго смы́сла, помѧнꙋти пре́жерече́нныа гл҃ы ѿ ст҃ых̑ прро̑҇окъ, і҆ а҆пс̑҇лъ ва́ших̑, и҆ за́повѣдеи г҃а и҆ сп҃са, сїе пре́жд̑е вѣдѧще, ꙗ҆́ко прїидꙋт꙽ въ послѣднѧа дн҃и рꙋга́теле, по свои҆хъ по́хотехъ ходѧ́ще, и҆ гл҃юще, гд̂ѣ е҆сть ѻ҆бѣтова́нїе прише́ствїа е҆го;
ѿнелиже б̂о ѿц҃ы ѹ҆спо́ша, вс̂ѧ та́ко пребыва́ют̑ ѿ нача́ла създанїю.
ѹ҆таи́тъ б̂о сѧ и҆мъ сїе хотѧ́щимъ, ꙗ҆ко нб҃са бѣша и҆сперва и҆ землѧ̀ ѿ воды̀ и҆ въдо́ю съста́влена бж҃їимъ сло́вомъ, и҆миже тогда́шнїи ми́ръ въдо́ю потоплен̑҇ бывъ поги́бе·
А҆ нн҃ѣшнѧа̀ нб҃са и҆ землѧ̀ тѣмже сло́вом꙽ съкрове́на сꙋть, ѻ҆́гнемъ блюдо́ма въ дн҃ь сꙋда и҆ въ поги́бель нечьсти́вымъ человѣкомъ·
Є҆ді́но же сїе да не ѹ҆таи́тсѧ вамъ възлю́бленїи.
ꙗ҆́ко е҆ді́нъ дн҃ъ пред̑ гм҃ъ ꙗко ты́сѧща лѣтъ, и҆ ты́сѧща лт̑ѣ ꙗ҆́ко дн҃ь е҆ді́нъ, не косни́тъ г҃ь ѻ҆бѣтова́нїѧ, ꙗ҆́коже нѣ́цыи коснѣ́нїе мнѧ́ть, н̂о длъготръпитъ на нас̑҇, не хотѧ̀ да никтоже поги́бнетъ, н̂о да вс̂и въ покаа́нїе прїидꙋтъ·
Прїидетъ же дн҃ь гн҃ь, ꙗ҆́ко та́ть в нощи, во́ньже нб҃са ѹ҆бо съ шꙋмомъ ми́мои҆дꙋтъ, стѷхїѧ же съжега́емы разорѧ́тсѧ, землѧ́ же и҆ ꙗ҆́же на не́и дѣла съгорѧтъ·
си́мъ ѹ҆бо всѣмъ разорѧ́е҆момъ, кацѣмъ подобае҆тъ быти намъ въ ст҃ых꙽ пребыва́нїих̑ и҆ бл҃говѣрїихъ, ча́ющемъ и҆ скорѣе быти жела́ющемъ прише́ствїа бж҃їаго дн҃е е҆гоже ради нб҃са жего́ма разорѧ́тсѧ, и҆ стихїа ѻ҆палѧ́еми раста́ютсѧ нова же нб҃са и҆ зе́млю новꙋ по ѻ҆бѣтова́нїю е҆го ча́емъ, в нихже правда живетъ·
Тѣмже възлю́бленїи, сих꙽ чающе, потщи́тесѧ нескверни и҆ непорочни томꙋ ѻ҆брѣ́стисѧ въ ми́рѣ·
И г҃а на́шего долготерпѣнїе, сп҃сенїе непщꙋите.
ꙗ҆́коже и҆ възлю́бленыи нашъ братъ па́велъ, по да́нѣи е҆мꙋ премꙋ́дрости написа̀ вамъ, ꙗ҆коже и҆ въ всѣхъ свои҆хъ посла́нїихъ гл҃ѧ в нихъ ѻ҆ сихъ, в ни́хже сꙋть неѹ҆добъ разꙋ́мна нѣ́каѧ, ꙗ҆́же не наѹ҆ченїи и҆ неѹ҆тверженїи развращаютъ.
ꙗ҆́коже и҆ про́чаѧ писанїа, къ свое́й поги́бели и҆мъ·
Вы же ѹ҆бо възлюбленїи прежд̑е вѣдѧще, храни́тесѧ, да не лестїю без̑законныхъ сведени бывше, ѿпадете свое҆го ѹ҆тверже́нїа н̂о да растѣте же въ блгд̑ти и҆ ра́зꙋмѣ г҃а нашего и҆ сп҃са і҆с҃ х҃а·
Томꙋ сла́ва и҆ нн҃ѣ и҆ въ дн҃ь вѣка а҆минь·
Конець, посланїю второмꙋ ст҃аго а҆пс̑҇ла петра̀·
И҆мать в себѣ глв̑҇а, г҃ а҆ зачалъ церковных̑, е҃·