СОБОРНОЄ ПОСЛАНІЄ ІЮДИНО·
Глв̑҇а, а҃·
зач̑҇, о҃з·
Иѹ҆́да і҆с҃ х҃ꙋ ра́бъ, бра́тъ же і҆а́ковꙋ·
Сꙋщимъ ѻ҆ бз҃ѣ ѿц҃и ѻ҆с꙽щ҃е́ннымъ, і҆с҃ хм҃ъ съблюде́нымъ, зва́нымъ млс̑҇ть ва́мъ и҆ ми́ръ и҆ любы̀ да ѹ҆мно́житсѧ·
Възлю́бленїи, всѧко тща́нїе творѧ̀ писа́ти ва́мъ, ѻ҆ ѡ҆́бщемъ спс̑҇нїи ва́шемъ, нꙋж́да м̂и бысть писати вамъ, молѧ подвиза́тисѧ ѻ҆ преда́ннѣи вѣ́рѣ ст҃ым̑ е҆ді́ною, привнидо́ша б̂о нѣ́цыи чл҃цы и҆же дре́вле пред̑ѹ҆ста́влени на сїе ѻ҆сꙋжде́нїе нечестїа.
б҃а на́шего блгд̑ть прелагающе въ сквернꙋ.
и҆ еді́ного влд̑ки б҃а и҆ г҃а на́шего і҆с҃ х҃а ѿмѣта́ющесѧ·
Въспомѧнꙋти же вамъ хощꙋ̀, вѣ́дꙋщимъ и҆ вамъ е҆ді́ною с̂е, ꙗ҆́ко г҃ь лю́ди ѿ землѧ е҆гѷпетъскїѧ сп҃се, послѣди невѣ́ровавшихъ погꙋбѝ·
А҆́гг҃лех же не съблюдших̑ своего нача́льства, н̂о ѻ҆ста́вльшихъ свое жили́ще, на сꙋдъ вели́каго дн҃е ѹ҆́зами вѣ́чными под̑ мра́комъ съблюде·
Ꙗ҆́коже съдо́ма и҆ гомо́ра, и҆ ѻ҆кре́стъныѧ и҆хъ грады подобнимъ их̑ ѻ҆́бразом̑ преблꙋдивше, и҆ ходи́вше въ слѣдъ плоти и҆ны́ѧ.
пред̑лежатъ в показанїе ѻ҆гню вѣ́чномꙋ, сꙋдъ прїе҆мше.
такожде ѹ҆бо и҆ сїи, со́нїа ви́дѧще, плоть ѹ҆бо сквернѧт̑.
господьства же ѿмѣта́ютсѧ.
сла́вы же хꙋ́лѧще не трепещꙋтъ·
Михаи҆л же а҆рха́гг҃лъ, е҆гда со дїа́воломъ разсꙋжаѧ гл҃аше ѻ҆ моѷсе́ѻ҆вѣ телеси, не смѣѧ сꙋда навестѝ хꙋлна, н̂о рече, да запрѣтитъ тебѣ г҃ь.
сїи же е҆ли́ка ѹ҆бо не вѣ́дѧтъ хꙋ́лѧтъ, е҆ли́ка же по е҆стествꙋ̀ ꙗ҆́ко безслове́снаѧ живот̑наа вѣ́дѧтъ в сихъ сквернѧ́тсѧ·
зач̑҇, о҃и·
Горе и҆мъ, ꙗ҆́ко въ пꙋть ка́иновъ ходиша, и҆ въ ле́сть валаа́мовы м꙽зды̀ пролїѧ́шасѧ, и҆ въ прерѣка́нїи корре́ѻ҆вѣ погибо́ша·
Сїи сꙋть въ любвах̑ ва́шихъ скверни́теле с вами ꙗ҆дꙋще, без боѧ́зни себе пасꙋще.
ѻ҆́блацы без̑водни ѿ вѣт́ръ преносими, древеса̀ е҆се́нна без̑плодна, дв̂ажды ѹ҆ме́рша и҆скорене́на·
волны̀ сверѣ́пыа морѧ въспѣнѧ́ющи своѧ стрꙋѧ̀, звѣзды преле́стныѧ, и҆мже мра́къ тм̂ы въ вѣки блюдетсѧ·
Про̑҇рочествова же и҆ ѻ҆ си́хъ седмыи ѿ а҆да́ма е҆нох꙽ гл҃ѧ, се прїидетъ г҃ь въ ст҃ыхъ тмахъ а҆́гг҃лъ свои҆хъ, сътворити сꙋ́дъ ѻ҆ всх̑ѣ і҆ и҆зъѻ҆бличити всѣхъ нечести́вых꙽ ѻ҆ всѣхъ дѣлехъ нечестїѧ их̑, и҆миже нечествова́ша, и҆ ѻ҆ всѣхъ жестокыхъ, словесехъ и҆хъ, и҆хже гл҃аша на́нь грѣшницы нечести́вїи, сїи сꙋть ропотницы, ѹ҆кори́теле часть порочна, въ по́хотх̑ѣ своих̑ ходѧще, нече́стїемъ и҆ законопрестꙋпле́нїем̑, и ѹ҆ста̀ и҆хъ гл҃ютъ прего́рдаѧ, чюдѧ́щесѧ лицемъ по́лзы рады·
Вы же възлю́бленїи, поминаите гл҃ы преже рече́нныа ѿ а҆пс̑҇лъ г҃а на́шего і҆с҃ х҃а, занѐ гл҃ахꙋ вамъ, ꙗ҆́ко въ послѣднее вре́мѧ бꙋдꙋтъ рꙋга́теле, по свои́хъ по́хотехъ ходѧще и҆ нече́стїихъ.
сїи сꙋть ѿдѣлѧ́юще себе ѿ е҆ді́ности вѣры, и҆ сꙋть теле́сни, дх҃а не и҆мꙋще·
Вы же възлю́бленїи, ст҃ою ва́шею вѣ́рою назида́юще себѐ, дх҃омъ ст҃ымъ и҆ молѧщесѧ, са́ми себѐ въ любви бж҃їи съблюда́ите, ждꙋще млс̑҇ти г҃а на́шего і҆с҃ х҃а въ жи́знь вѣчнꙋю·
І҆ ѻ҆ всѣхъ ѹ҆бо ми́лꙋите разъсꙋжа́юще, ѻ҆вѣх же стра́хомъ сп҃са́йте ѿ ѻ҆гнѧ̀ въсхища́юще·
ѻ҆блича́ите же съ боѧзнїю.
ненавидѧ́ще и҆ ꙗ҆́же ѿ́ плоти ѻ҆скверненꙋю ри́зꙋ·
Могꙋщемꙋ же в̂ы съхрани́ти без꙽ грѣха и҆ без꙽ скверны и҆, поста́вити пред꙽ сла́вою своею̀ непоро́чны въ радость, е҆дїномꙋ премꙋдромꙋ б҃ꙋ, и҆ сп҃сꙋ на́шемꙋ, і҆с҃ хм҃ъ гм҃ъ на́шим꙽.
сла́ва, и҆ вели́чїе, дръжава и҆ ѻ҆́бласть, прежд̑е всего вѣка и҆ нн҃ѣ и҆ въ всѧ̀ вѣки а҆ми́нь·
Конецъ посла́нїю і҆ю҆́динꙋ·
И҆мать в себѣ глв̑҇а, а҃, а҆ зач̑҇, цр҃ковныхъ, в҃.