Библия (1581). [77] Апокалипсис

АПОКАЛИѰИс̑҇ СТ҃ГО ИѠАн̑҇НА ѲЕѠ҆ЛОГА

Глв̑҇а, А҃·

Апокалїѱисъ і҆с҃ х҃а, и҆же дас̑҇ е҆мꙋ бг҃ъ показати рабомъ свои҆мъ, и҆́мже подоба́ше быти въско́рѣ, и҆ сказа̀ пославъ а҆́гг҃ломъ свои҆мъ, раб̀ꙋ свое҆мꙋ і҆ѻ҆а́ннꙋ, и҆же свѣдѣтельствова сло́во бж҃їе, и҆ свѣдѣтельство і҆ѵ҃ х҃во, е҆ли́ко видѣ·

Бл҃женъ чтыѝ и҆ слы́шащїи словеса̀ прро̑҇чествїа е҆го, и҆ съблюда́ющїи пи́санаѧ в немъ, вре́мѧ б̂о близ̑.
і҆ѻ҆а́ннъ сед̑мим̑ цр҃квам꙽ и҆же сꙋть въ а҆сїи.
блгд̑ть вам̑ и҆ миръ, ѿ сꙋщаго, і҆ и҆же б̂ѣ, и҆ грѧдꙋщ́аго, и҆ ѿ сед̑мѝ дх҃овъ, и҆же пред̑ прс̑҇тломъ е҆го, сꙋть.
и҆ ѿ і҆с҃ х҃а и҆же е҆сть свѣдѣтель вѣ́рныи, пр́ъвенец̑҇ и҆з мр҃твых̑, и҆ кн҃зь цр҃ей зем꙽скыхъ, любѧщꙋ н̂ы и҆ ѻ҆мы насъ ѿ грѣхъ на́шихъ кро́вїю своею̀, и҆ сътворилъ е҆сть насъ цр҃ѧ и҆ і҆е҆ре́ѧ б҃ꙋ и҆ ѿц҃ꙋ свое҆мꙋ.
томꙋ сла́ва и҆ дръжа́ва въ вѣкы вѣком̑ а҆ми́нь·

Се грѧдетъ съ ѻ҆́блакы, и҆ ѹ́зрит̑ и҆̀ всѧко ѻ҆́ко, і҆ и҆же е҆го прободо́ша, и҆ плачь сътворѧт̑ на сѧ ѻ҆́ нем̑ вс̂ѧ колѣна зем꙽ска́ѧ.
е́й а҆ми́нь.
аз̑ е҆смь а҆лфа и҆ ѡ, нача́ток̑҇ и҆ коне́цъ, гл҃етъ г҃ь, сыи, и҆ б̂ѣ, и҆ грѧдыѝ, вседръжи́тель·

аз̑ і҆ѻ҆а́ннъ и҆же и҆ братъ вашъ, и҆ ѻ҆бѣщникъ въ печали и҆ въ црс̑҇твїи, и҆ въ тръпѣнїи і҆с҃ хв҃ѣ.
бых̑ въ ѻ҆стровѣ, нарица́емомъ патъмосъ, за сло́во бж҃їе и҆ за свѣдѣтельство і҆с҃ хв҃о.
быхъ в д҃сѣ въ дн҃ь нед̑лныи.
и҆ слы́шах̑ за собо́ю глас̑҇ ве́лїи ꙗ҆́ко трꙋб̀ꙋ, гл҃щъ а҆зъ е҆смь а҆лфа и҆ ѡ, пр́ьвыи и҆ послд̑ѣнїи.
и҆ ꙗ҆́же ви́диши, напиши в кни́ги, и҆ послѝ цр҃квамъ, ꙗ҆же сꙋть въ а҆сїи, въ е҆фесъ, и҆ въ змѷрнꙋ, в пер꙽гамъ, и҆ въ ѳиꙗ҆́тиръ, и҆ въ сардїю, и҆ въ ѳиладелъфїю, и҆ в лаѻ҆дикїю.
и҆ ѻ҆братихъсѧ видѣти глас̑҇ и҆же гл҃ше съ мно́ю·

И҆ ѻ҆бращсѧ видѣхъ сед̑мь свѣти́лникъ златыхъ, и҆ посредѣ сед̑ми свѣти́лникъ подобенъ сн҃ꙋ чл҃вчю ѻ҆блеченъ в подиръ, и҆ препоѧ́санъ при сосцꙋ по́ѧсомъ златымъ.
глава же е҆го и҆ вла́си бѣлы̀ ꙗ҆́ко ꙗ҆ри́на бѣ́лаа ꙗ҆ко снѣ́гъ, и҆ ѻ҆́чи е҆го ꙗ҆́ко пла́мень ѻ҆гненъ.
и҆ но́ѕѣ е҆го подобни мѣди хал̑҇коливановѣ, ꙗ҆́ко в пещи ражд̑еже́нѣ·

И҆ глас̑҇ е҆го, ꙗ҆́ко глас̑҇ во̑ мно́гъ, и҆ дръжа в рꙋцѣ своеѝ деснѣѝ сед̑мъ ѕвѣз́дъ і҆ и҆зъ ѹ҆стъ е҆го мечъ ѻ҆бою́дꙋ ѻ҆стръ и҆зъѻ҆стренъ и҆сходѧѝ·

И҆ лице е҆го ꙗ҆́ко слн҃це сїае҆тъ в силѣ своеѝ.
и҆ е҆гд̑а видѣхъ е҆го, падохъ к ногама е҆го ꙗ҆́ко мр҃твъ, и҆ положи десницꙋ свою на мнѣ̀ гл҃ѧ м̂и, не боисѧ·

А҆зъ е҆смь пр́ьвыи и҆ послд̑ѣнїи и҆ живыи, и҆ бых̑ мр҃твъ, и҆ се жи́въ е҆смь въ́ вѣкы̀ вѣкомъ.
и҆́мам̑ ключа смр҃ти и҆ а́дꙋ.
напиши ѹ҆бо ꙗ҆́же видѣ, и҆ ꙗ҆́же сꙋть і҆ и́мже подоба́етъ быти по семъ·

Таи́нство сед̑ми ѕвѣздъ ꙗ҆́же ви́дѣлъ е҆си на десни́ци моеи, и҆ сед̑мъ свѣтил̑҇никъ златыхъ, сед̑мъ ѕвѣздъ ст̑ꙋ, а҆гг҃ли сед̑мѝ цр҃квеи сꙋть.
сед̑м же свѣти́лник̑҇, ꙗ҆́же видѣ, сед̑мъ цр҃кве́и ст̑ꙋ·

Глв̑҇а, в҃·

Агг҃лꙋ е҆фес̑҇кїа цр҃кве напиши тако гл҃етъ дръжаѝ сед̑мь ѕвѣздъ в десници своеѝ, и҆ ходѧѝ посредѣ сед̑ми свѣти́лникъ златыхъ.
вѣмъ твоѧ дѣла и҆ трд̑ꙋ твои и҆ тръпѣнїе твое, и҆ ꙗ҆́ко не можеши носити злых̑.
і҆ и҆скꙋсил̑҇ е҆си гл҃ющаѧсѧ быти а҆пс̑҇лы, и҆ нѣ сꙋть, и҆ ѻ҆брѣте ѧ҆̀ лжа̀.
и҆ поне́слъ е҆си и҆ тръпѣнїе и҆́маши.
и҆ за и҆мѧ моѐ трꙋдисѧ, и҆ не из̑немо́же.
н̂о и҆́мам̑ на тѧ, ꙗ҆ко любов̑҇ твою̀ пр́ьвꙋю ѻ҆ста́ви.
помѧни ѹ҆бо ѿкꙋд̀ꙋ спадѐ, и҆ пока́исѧ.
и҆ пр́ьваѧ дѣла сътворѝ·

А҆ще ли н̂и, грѧд̀ꙋ т̂и ско́ро, и҆ дви́гнꙋ свѣти́лникъ твои ѿ мѣста свое҆го, а҆ще не пока́ешисѧ.
н̂о сѐ и҆́маши, ꙗ҆́ко ненавидиши дѣлъ никола́итескъ, и҆хже и҆ а҆́зъ ненави́жꙋ·

И҆мѣаѝ ѹ҆хо да слы́шитъ чт̂о дх҃ъ гл҃етъ цр҃квамъ, побѣжда́ющемꙋ дамъ ꙗ҆сти ѿ древа животнаго, е҆же е҆сть посредѣ ра́ѧ бж҃їа·

І҆ а҆гг҃лꙋ цр҃кви змѷрн꙽скїа напиши.
тако гл҃ет̑ пр́ъвыи и҆ послд̑ѣнїи, и҆же быс̑҇ мр҃твъ, и҆ с̂е жи́въ е҆сть.
вѣмъ твоѧ дѣла, и҆ ско́рбь, и҆ ни́щетꙋ.
н̂о богат̑ е҆си, и҆ хꙋлы̀, гл҃ющихъсѧ быти і҆ѹ҆де́а, и҆ нѣ сꙋть.
н̂о со́нмище сатанино.
не бо́исѧ ничесоже ѧж̑ хо́щеши пострадати.
сѐ б̂о и҆́мать дїа́волъ всажати ѿ васъ в темни́цѧ да и҆скꙋ́ситесѧ.
і҆ и́мате скорбь до десѧти дн҃їи.
бꙋди вѣ́ренъ до смр҃ти, и҆ дамъ ти вѣнец꙽ живота·

И҆мѣа́и ѹ҆хо слы́шати да слы́шит̑.
чт̂о дх҃ъ гл҃етъ цр҃квам̑.
побѣжд̑ааѝ, не и҆мать вредитисѧ ѿ смр҃ти вторы́ѧ.
и҆ а҆гг҃лꙋ перъгам꙽скїа цр҃кви напиши.
тако гл҃етъ и҆мѣѧѝ мечъ ѻ҆бою́дꙋ и҆з꙽ѻ҆щренъ.
вм̑ѣ дѣ́ла твоѧ, и҆ гд̂ѣ живеши и҆дѣже прс̑҇тлъ сатанинъ.
и҆ дръжиши и҆мѧ моѐ, и҆ не ѿвр́ъжесѧ вѣ́ры моеѧ̀.
и҆ в моѧ дн҃и.
а҆нтипасъ свѣдѣтель мои вѣрныи и҆же ѹ҆бїенъ бысть в꙽ вас̑҇, и҆дѣже живетъ сатана̀.
н̂о и҆́мамъ на тѧ ма́ло, ꙗ҆ко и́маши т̂ꙋ дръжащаѧ ѹ҆ченїе валаа́мово, и҆же ѹ҆чаше вала́ка, положити съблазнь пред̑ сн҃ъми і҆и҃левыми, ꙗ҆сти жрътвы и҆долскїа, и҆ любы творити.
тако и҆́маши и҆ ты дръжа́щаа ѹ҆ченїе николаи҆тъско, е҆гоже ненави́жꙋ.
покаисѧ, а҆ще ли н̂и, прїидꙋ т̂и ско́ро, и҆ бра́нь сътворю̀ с ними мечемъ ѹ҆стъ мои҆хъ.
и҆мѣаѝ ѹ҆хо слы́шати да слы́шитъ, чт̂о дх҃ъ гл҃етъ црк҃вам̑.
побѣжда́ющемꙋ дам꙽ ꙗ҆́сти ѿ манны съкровенныѧ·

и҆ дам̑ е҆мꙋ ка́мень бл̑҇ѣ, и҆ на ка́мени и҆́мѧ но́во напи́сано, е҆го̑ никтоже вѣсть, токмо прїемлѧѝ·

И҆ а҆гг҃лꙋ ѳѷатѷрскїа цр҃кви напиши.
тако гл҃етъ сн҃ъ бж҃їи, и҆мѣаѝ ѻ҆́чи своѝ ꙗ҆́ко пла́мень ѻ҆гненъ.
и҆ ноѕѣ е҆го подо́бни мѣди ха́лколива́новѣ.
вѣм꙽ твоѧ дѣла и҆ любовь и҆ вѣ́рꙋ и҆ слꙋжбꙋ и҆ тръпѣ́нїе твое, и҆ дѣла твоа, и҆ послѣ́днѧа болша пе́рвыхъ, н̂о и́мам꙽ на тѧ мало, ꙗ҆́ко ѻ҆ставлѧ́еши женѣ і҆е҆завель гл҃ющеисѧ быти прро̑҇чца, ѹ҆читъ и҆ лстит꙽ моа рабы любодѣиствовати, и҆ снѣсти жрътвꙋ и҆дол꙽скꙋю.
и҆ дах̑ ей вре́мѧ да пока́етсѧ ѿ любодѣи҆ства свое҆го, и҆ не пока́ѧсѧ.
с̂е а҆зъ полага́ю ю҆̀ на ѻ҆дрѣ, и҆ любодѣющаѧ с не́ю въ скорбь велїю, а҆ще сѧ не пока́ютъ ѿ дѣлъ свои҆хъ, и҆ чада их̑ ѹ҆мрꙋтъ смр҃тїю.
и҆ разꙋмѣю҆тъ вс̂ѧ цр҃кви, ꙗ҆ко а҆зъ е҆смь и҆спытааѝ срд̑ца и҆ ѹ҆тробы, и҆ дамъ вамъ комꙋждо по дѣ́ломъ ва́шимъ, вам̑ же гл҃ю, и҆ про́чимъ сꙋщим̑ въ ѳїатирѣ, и҆же не и҆мꙋтъ ѹ҆ченїа сего і҆ и҆же не разꙋмѣю҆тъ глꙋбины сатанины, ꙗ҆́ко гл҃ют̑ не възложю̀ на вы̀ тѧготы и҆́ноѧ, токмо е҆же и҆́мате дръжи́те, дондеж̑ прїидꙋ·

И҆ побѣжда́ющемꙋ и҆ съблюда́ющемꙋ дѣ́ла моа до конца̀, дамъ е҆мꙋ власть на ꙗ҆́зы́цехъ и҆ ѹ҆пасет̑ ѧ҆̀ жезломъ желѣз́ным꙽, и҆ ꙗ҆́ко съсꙋды и҆ скꙋделнича съкрꙋшатсѧ.
ꙗ҆́коже и҆ а҆зъ прїѧхъ ѿ ѻ҆ц҃а мое҆го·

И҆ дамъ е҆мꙋ ѕвѣздꙋ ѹ҆тренюю.
и҆мѣаѝ ѹ҆хо слы́шати да слы́шитъ чт̂о дх҃ъ гл҃етъ цр҃квамъ·

Глв̑҇а, г҃·

И а҆гг҃лꙋ сар̑҇дїискїа цр҃кви напиши, тако гл҃етъ и҆мѣѧѝ сед̑мь дх҃ъ бж҃їихъ, и҆ сед̑мь звѣздъ.
вѣм꙽ твоа дѣ́ла, ꙗ҆́ко и҆мѧ и҆́маши ꙗ҆́ко живъ, а҆ мр҃твъ е҆си·

Бꙋди бдѧ̀, и҆ ѹ҆твер꙽жаѧ про́чаѧ, и҆́мже ѹ҆мрети.
не ѻ҆брѣтохъ б̂о дѣлъ твои҆хъ скончаных̑ пред̑ бг҃омъ·

твои҆мъ.

Поминаи ѹ҆бо како прїа́тъ, и҆ слы́ша и҆ съблюдаи и҆ пока́исѧ.
а҆ще ѹ҆бо не бдиши, прїидꙋ на тѧ ꙗ҆́ко тать, и҆ не и́маши почю́ти, в кїи годъ прїидꙋ на тѧ·

н̂о и҆маши мало и҆менъ и҆ в сардїи, и҆же не ѻ҆скверниша ри́зъ свои҆хъ, и҆ ходити и҆мꙋтъ съ мною въ бѣлыхь, ꙗ҆́ко достоини сꙋть, побѣждааѝ то́й ѻ҆блечетсѧ в ри́зы бѣ́лыа, и҆ не и҆́мамъ ѿмыти и҆́мени е҆го ѿ кни́гъ живот̑ных̑ і҆ и҆сповѣмъ и҆мѧ е҆го пред̑ ѿц҃емъ моим̑, и҆ пред̑ а҆гг҃лы е҆го.
и҆мѣаѝ ѹ҆хо, да слы́шитъ, чт̂о дх҃ъ гл҃етъ цр҃квам꙽·

И҆ а҆гг҃лꙋ филадельфїискїа цр҃кви, напиши.
тако г҃лет̑ ст҃ыи и҆́стинныи, и҆мѣаѝ ключъ двд̑въ.
ѿверзааѝ, и҆ никтоже затворит̑.
затворѧай, и҆ никтоже ѿверзетъ·

Вѣмъ твоа дѣ́ла.
с̂е дах̑ пред̑ тобою двери ѿве́р꙽сты и҆ никтоже мо́жетъ затворитї их̑, ꙗ҆́ко малꙋ и҆маши си́лꙋ, и҆ съблюде́ мое сло́во, и҆ не ѿвръжесѧ и҆мени мое҆го.
с̂е даю̀ ѿ со́нмища сатанина, гл҃ющаѧсѧ быти і҆ѹ҆де́а и҆ нѣ сꙋт꙽, н̂о лжꙋтъ.
с̂е сътворю ѧ҆̀ да прїидꙋтъ и҆ покло́нѧтсѧ пред̑ нога́ма твои́ма, и҆ разꙋмѣют̑ ꙗ҆́ко а҆зъ възлюбих̑ т̂ѧ·

Ꙗ҆ко съблюде сло́во тръпѣ́нїа мое҆го, и҆ а҆зъ т̂ѧ съблюдꙋ̀ ѿ годины и҆скꙋшенїа хотѧщаа прїити на всю̀ вселе́нꙋю, и҆скꙋсити живꙋщаѧ на зем̑ли, с̂е грѧдꙋ скоро, дръжѝ е҆же и́маши, да никтоже прїимет̑ вѣнца̀ твое҆го·

Побѣжда́ющаго сътворю̀ столпа̀ цр҃кви б҃а мое҆го.
и҆ боле не и́мат̑ и҆зыити ктомꙋ·

И҆ напишꙋ на нем̑ и́мѧ б҃а мое҆го, і҆ и́мѧ града б҃а мое҆го но́ваг̑҇ і҆е҆рс̑҇ли́ма сходѧщаго с нб҃съ ѿ ба҃ мое҆го і҆ и҆мѧ моѐ но́вое.
и҆мѣа́и ѹ҆хо да слы́шитъ чт̂о дх҃ъ гл҃етъ цр҃квамъ·

И҆ а҆гг҃лꙋ лаѻ҆дїкїискїа цр҃кви напиши, тако гл҃етъ, а҆ми́нь свѣдѣтель вѣрныи і҆ и́стиныи, нача́токъ създанїа бж҃їа.
вѣмъ твоа дѣ́ла ꙗ҆́ко ни стꙋденъ е҆си ни те́плъ.
не да стꙋден̑҇ б̂ы былъ, ни те́плъ, тако ꙗ҆ко ѻ҆бъѹ҆моренъ е҆си, и҆ ни те́плъ ни стꙋден̑҇.
и҆зблевати т̂ѧ ѿ ѹ҆стъ мои҆хъ и҆мам̑ зане гл҃еши ꙗ҆́ко богатъ е҆смь, и҆ ѻ҆бога́тихъсѧ и҆ ничтоже требꙋ́ю.
и҆ не вѣсѝ ꙗ҆́ко т̂ы е҆си ѻ҆каа́нен꙽ и҆ мнїи и҆ ни́щъ и҆ слѣ́пъ и҆ нагъ·

Съвѣща́ю тебѣ кꙋпити ѿ мене злато ражд̑ежено ѻ҆гнемъ, да ѻ҆богатишисѧ, и҆ ѻ҆дѣѧ́нїемъ бѣ́лым̑ ѻ҆блечешисѧ, да не ꙗ҆́витсѧ срамота̀ наготы̀ твоеа̀.
и҆ кол꙽лꙋрїемъ помажи ѻ҆́чи твоѝ да ви́диши.
а҆зъ и҆хже а҆́ще люблю̀, ѻ҆бличаю и҆ кажю̀.
ревнꙋй ѹ҆бо и҆ пока́исѧ, с̂е стою при дверехъ, и҆ тлъкꙋ, а҆ще кт̂о ѹ҆слы́шитъ глас̑҇ мой, и҆ ѿвр́ъзетъ двери, вни́дꙋ к немꙋ и҆ вечерѧ́ю с нимъ и҆ то́й съ мною.
побѣжда́ющемꙋ дамъ сѣ́сти съ мною на прс̑҇тлѣ мое҆мъ.
ꙗ҆́коже и҆ а҆зъ побѣдихъ и҆ сѣдохъ съ ѻ҆ц҃емъ мои҆мъ на прс̑҇тлѣ е҆го.
и҆мѣаѝ ѹ҆хо, да слы́шитъ чт̂о дх҃ъ гл҃етъ цр҃квамъ·

Глава, д҃·

По си́хъ видѣхъ, и҆ с̂е двери ѿвр́ьсты на нб҃си.
и҆ глс̑҇а пр́ьвый е҆гоже слы́шах̑ ꙗ҆́ко трꙋб̀ꙋ гл҃ющъ со мно́ю гл҃ѧ·

Взыди сѣ́мо, и҆ покаж̀ꙋ т̂и е҆мꙋж̑ подоба́етъ быти по сихъ·

А҆бїе же быхъ въ дс҃ѣ, и҆ с̂е прс̑҇тлъ стоѧ́ше на нб҃си, и҆ на прс̑҇тлѣ сѣдѧ́щъ, и҆ сѣдѧѝ б̂ѣ подобенъ видѣ́нїю ка́мени і҆а́спиди, и҆ сарди́нови·

И҆ б̂ѣ дꙋга̀ ѻ҆́крс̑҇тъ прс̑҇тла подо́бна видѣнїемъ змара́гдови.
и҆ ѻ҆́крс̑҇т꙽ прс̑҇тла прс̑҇то́ли дв̂адесѧть четы́ри.
и҆ на прс̑҇тлѣхъ видѣхъ дв̂адесѧть четы́ре ста́рцы сѣдѧ́ща.
ѻ҆бле́чены в бѣлы ри́ѕы.
і҆ и́мѧхꙋ вѣнца̀ зла́ты на главах̑ своих̑ и҆ ѿ прс̑҇тола и҆схожд̑ахꙋ мо́лнїѧ и҆ громи и҆ гла́сы.
и҆ седмь свѣщникъ ѻ҆гненъ горѧ́щихъ пред̑ прс̑҇тломъ, ꙗ҆же сꙋть седмь дх҃овъ бж҃їихъ.
и҆ пред̑ прс̑҇тлом̑ мо́ре стклѧ́но подобно кристаллꙋ.
и҆ посредѣ прс̑҇тла, и҆ ѻ҆́крс̑҇тъ прс̑҇тла четы́ри живо́тна и҆спо́лнь ѻ҆́чесъ съпреди и҆ съза́ди.
и҆ животно пр́ьвое подобно лвꙋ̀, и҆ второ́е животно подобно телцꙋ̀, и҆ третїе живо́тно и҆мыѝ лице ꙗ҆ко члк҃ъ, и҆ четвертое живо́тно подобно ѻ҆рлꙋ̀ летѧ́щꙋ.
и҆ живо́тна четы́ри, е҆ді́нъ кожд̑о и҆хъ.
и҆мыѝ по шесть крыл̑҇ ѻ҆́крс̑҇тъ и҆ внꙋтръю́дꙋ и҆спо́лнь сꙋть ѻ҆́чесъ·

И҆ поко́а не и҆мꙋще дн҃ь и҆ нощь гл҃юще, ст҃ъ ст҃ъ ст҃ъ, г҃ь б҃ъ вс̂едержи́тель, и҆же б̂ѣ и҆ сы́й, и҆ грѧды́и, і҆ е҆гда̀ да́ша живот̑наѧ сла́вꙋ и҆ честь и҆ хвалꙋ̀ сѣдѧ́щемꙋ на прс̑҇тлѣ живꙋщемꙋ въ вѣкы вѣком̑ падо́ша дв̂адесѧт̑ четири ста́рцы пред̑ сѣдѧ́щимъ на прс̑҇тлѣ, и҆ поклони́шасѧ живꙋщемꙋ въ́ вѣкы вѣкомъ.
и҆ положи́ша вѣнца̀ своѧ пред̑ прс̑҇тлом꙽ гл҃юще, досто́инъ е҆си г҃и прїѧ́ти сла́вꙋ и҆ честь и҆ си́лꙋ, ꙗ҆́ко т̂ы е҆си създал̑҇ всѧческаѧ, и҆ во́лею твоею̀ сꙋть и҆ сътворени·

Гла, е҃·

И видѣхъ в десни́ци сидѧ́щаг̑҇ на прс̑҇тлѣ книгꙋ напи́санꙋ внꙋтръю́дꙋ и҆ внѣю́дꙋ, запечатлѣнꙋ седмїю печатїю и҆ видѣхъ а҆гг҃ла крѣ́пъка проповѣ́дающе гласом̑ вели́кымъ.
кт̂о е҆сть досто́инъ разгнꙋт́и кни́гꙋ, и҆ разрѣши́ти печа́ти еѧ̀;
и҆ никтож̑ можаше, и҆ ни на нб҃си ни на землѝ ни̑ подъ земле́ю разгнꙋти книгы ни зрѣти еѧ̀·

І҆ а́зъ плаках̑сѧ мно́го, ꙗ҆́ко не ѻ҆брѣтесѧ никтоже досто́и҆нъ раз꙽гнꙋти и҆ почестѝ книги ниже зрѣти еѧ̀·

И҆ е҆ді́нъ ѿ ста́рецъ гл҃а м̂и, не пла́чисѧ, с̂е побѣдилъ е҆сть левъ иж̑ сы́и ѿ колѣ́на і҆ѹ҆дова ко́рень двд̑въ, разгнꙋти кни́гꙋ, и҆ разрѣшити седмь печа́тїи еѧ̀.
и҆ видѣхъ, и҆ се посредѣ прс̑҇тола, и҆ четырех̑ живо́тных̑, и҆ посредѣ ста́рецъ, а҆гнецъ стоѧ́щ꙽ ꙗ҆́ко заколенъ, и҆мꙋщъ роговъ сед̑мь и҆ ѻ҆́чесъ сед꙽мь, е҆же е҆сть седмь дх҃ъ бж҃їихъ по́сланыхъ въ всю землю.
и҆ прїиде и҆ прїѧ́ть книгꙋ ѿ десни́ца сѣдѧ́щаго на прс̑҇толѣ.
и҆ е҆гда̀ прїа́тъ книгꙋ, четыри живо́тна, и҆ дв̂адесѧть и҆ четыри ста́рцы падоша пред꙽ а҆́гньцемъ, и҆мꙋще кождо гꙋсли и҆ фиа́лы зла́ты полны ѳимїа́ма, и҆же сꙋть мл҃твы ст҃ыхъ·

И҆ поют̑ пѣснь но́вꙋ гл҃юще, досто́инъ е҆си прїѧ́ти книгꙋ, и҆ ѿврьсти печати еѧ.
ꙗ҆ко заколенъ бысть, і҆ и҆скꙋпи бв҃и насъ кровїю своею ѿ всѧ́кого колѣ́на, и҆ ꙗ҆зы́ка и҆ людїи и҆ племенъ, и҆ сътворил̑҇ е҆си насъ, бв҃и на́шемꙋ, цр҃ѧ і҆ и҆ере́а и҆ въцр҃и́мсѧ на землѝ·

И҆ видѣхъ, и҆ слы́шахъ гласъ а҆гг҃лъ мно́гъ ѻ҆́крс̑҇т꙽ прс̑҇тола, и҆ животныхъ и҆ ста́рецъ, и҆ б̂ѣ число их̑ ты́сѧща ты́сѧщами, гл҃юще гла́сомъ вели́кимъ.
досто́ин̑҇ е҆сть а҆гнець заколе́ныи прїа́ти си́лꙋ и҆ бога́тество и҆ премꙋ́дрос̑҇ и҆ крѣпос̑҇ и҆ чес̑҇ и҆ сла́вꙋ и҆ блс̑҇ве́нїе.
и҆ всѧко създанїе, е҆же е҆сть на нб҃си и҆ на землѝ и҆ подъ земле́ю, и҆ на́ мори, ꙗ҆́же сꙋть и҆ сꙋщаа в них̑ всѧ, слы́шахъ гл҃юща сѣдѧщемꙋ на прс̑҇толѣ, и҆ а́гнъцю блс̑҇внїе и҆ чес̑҇ и҆ сла́вꙋ и҆ держа́вꙋ въ вѣкы вѣкомъ.
и҆ четы́ри животна гл҃ахꙋ.
а҆ми́нь·

И҆ дв̂адесѧть и҆ четы́ри ста́рцы падоша и҆ поклони́шасѧ живꙋщемꙋ въ вѣки вѣкомъ·

Глв̑҇а, ѕ҃·

И видѣхъ е҆гда ѿвр́ьзе а҆гнецъ е҆ді́нꙋ ѿ седми печа́тїи, и҆ слы́шахъ е҆ді́ного ѿ четырех̑ животныхъ гл҃юща ꙗ҆́ко глас̑҇ громныи, грѧди и҆ ви́ждь·

И҆ видѣхъ, и҆ с̂е конь бѣлъ, и҆ сѣдѧѝ на немъ и҆мѣаше лꙋ́къ, и҆ данъ быс̑҇ е҆мꙋ вѣнецъ, і҆ и҆зыиде побѣжд̑аѧѝ да побѣдитъ.
и҆ е҆гда̀ ѿве́рзе печать вторꙋ́ю, слы́шахъ второ́е животно гл҃юще, грѧди и҆ ви́жд̑ь.
і҆ и҆зы́де дрꙋгїи ко́нь ры́жъ, и҆ сѣдѧ́щемꙋ на немъ дано бысть взѧти ми́ръ ѿ землѧ̀, и҆ да ѹ҆бїетъ дрꙋгъ дрꙋга, и҆ данъ бысть е҆мꙋ мечь вели́кїи.
и҆ е҆гда ѿвр́ьзе третїю печать.
слы́шах̑ третїе живо́тно гл҃юще, грѧдѝ и҆ ви́жд̑.
и҆ видѣхъ, и҆ с̂е ко́нь во́ронъ.
и҆ сѣдѧѝ на немъ и҆мѣѧше мѣ́рило в рꙋцѣ свое́й.
и҆ слы́шахъ гласъ посредѣ четы́рехъ животныхъ гл҃ющь.
мѣра пшеницы за дина́рь, и҆ тр̂и мѣ́ры ꙗ҆́чме́ню за дина́рь, і҆ е҆ле́и и҆ вино̀ не вредѝ·

И҆ егда ѿвр́ьзе четве́ртꙋю печа́ть, слы́шахъ гласъ четве́ртаго животна гл҃ющь, грѧди и҆ ви́ждь.
и҆ видѣхъ.
и҆ с̂е ко́ньблѣдъ.
и҆ сѣдѧщ̑҇ на немъ и҆мѧ е҆мꙋ смр҃ть, и҆ а́дъ и҆дѧше въ слѣдъ е҆го.
и҆ дана̀ бысть е҆мꙋ ѻ҆́бласть на четвертои ча́сти землѧ̀ ѹ҆бити ѻ҆рꙋжїемъ и҆ гла́домъ и҆ смертїю, и҆ ѕвѣрмѝ земными.
и҆ егда ѿве́рзе пѧтꙋю печа́ть.
видѣхъ под̑ ѻ҆лтаремъ дш҃а и҆збїе́ныхъ за слово бж҃їе и҆ за свѣдѣтельство е҆же и҆мѣа́хꙋ и҆ възопи́ша гласомъ вели́комъ гл҃юще, доко́лѣ влд̑ко ст҃ыи і҆ и́стинныи, не сꙋ́диши, и҆ не м꙽стиши крови на́ша ѿ живꙋщихъ на земли;
и҆ даны быша комꙋжд̑о и҆хъ ризы бѣлы̀.
и҆ ре́чено бысть и҆мъ да почїютъ е҆щѐ времѧ ма́ло дондеже сконча́ютсѧ и҆ клевре́ти и҆хъ, и҆ братїа и҆хъ хотѧ́щеѝ и҆збїени быти ꙗ҆́коже и҆ тїи.
и҆ видх̑ѣ е҆гда ѿве́рзе шестꙋ́ю печа́ть.
и҆ с̂е бысть трꙋ́съ велїи, и҆ сл҃нце мра́чно бысть ꙗ҆́ко вретище вла́сѧно.
и҆ лꙋна̀ бысть ꙗ҆́ко кро́вь.
и҆ звѣѕды нб҃сныѧ падоша на́ землю, ꙗ҆́ко смоков꙽ница ѿмѣта́ющи пꙋпы своа ѿ вѣтра вели́ка дви́жима·

И҆ нб҃о ѿлꙋчи́сѧ ꙗ҆́ко свитокъ свива́емо.
и҆ всѧка гора̀ и҆ ѻ́стровъ ѿ мѣстъ свои҆хъ двигнꙋшасѧ, и҆ цр҃їе земъстїи и҆ велмо́жи и҆ бога́тїи и҆ ты́сꙋщницы и҆ си́лнїи.
и҆ всѧк̑҇ рабъ и҆ всѧкъ свободъ, съкрышасѧ в пещерахъ и҆ каменїи горъстѣмъ.
и҆ гл҃аша горамъ и҆ ка́менїю, падѣте на ны и҆ покрыите н̂ы, ѿ лица сидѧщаг̑҇ на прс̑҇толѣ, и҆ ѿ гнѣва а҆гньчѧ.
ꙗ҆́ко прїиде дн҃ь вели́кїи гнѣва е҆го, и҆ кт̂о мо́жетъ ста́ти·

Глв̑҇а, з҃·

И посемъ видѣхъ четы́ри а҆гг҃лы стоѧ́ща на четырехъ ѹ҆глехъ землѝ, держа́ща четыри вѣтры земъскїа, да не дышет̑ вѣтръ на землю ни на́ море, ни на всѧко древо.
и҆ видх̑ѣ и҆́нъ а҆гг҃лъ въсходѧщъ ѿ восхода слн҃цꙋ, и҆мыи печать б҃а живаго, и҆ възпи гласомъ велїи҆мъ к четыремъ а҆гг҃ломъ.
и҆мже дано̀ бысть вредити землю̀ и҆ мо́ре, гл҃ѧ.
не вредите ни зе́млю ни море ни древа, дондеже запечатлѣемъ рабы̀ б҃а нашего на челѣхъ и҆хъ·

И҆ слы́шахъ число запечатлѣнныхъ, ст̂о четыредесѧтъ четыре ты́сѧщи запечатлѣн꙽ных̑ ѿ всѧкого колѣ́на.
сн҃овъ і҆и҆л҃евъ ѿ колѣна і҆ѹ҆дова, дв̂анадесѧть ты́сѧщъ запечатлѣ́нныхъ, ѿ колѣ́на рꙋви́мова, дв̂анадесѧть ты́сѧщь запечатлѣ́нныхъ, ѿ колѣ́на га́дова дв̂анадесѧть ты́сѧщь запечатлѣнных̑·

ѿ колѣ́на а҆сѷрова, дв̂анадесѧть ты́сѧщъ запечатлѣнныхъ.
ѿ колѣна нефѳали́млѧ дв̂анадесѧть ты́сѧщъ запечатлѣ́нныхъ.
ѿ колѣ́на манасїина, дванадесѧть ты́сѧщъ запечатлѣ́нныхъ.
ѿ колѣ́на сѷмеѻ҆́нова, дванадесѧть ты́сѧщъ запечатлѣнныхъ.
ѿ колѣна левїина.
дванадесѧть ты́сѧщъ запечатлѣнных̑.
ѿ колѣна і҆саха́рова.
дванадесѧть ты́сѧщъ запечатлѣнных̑.
ѿ колѣ́на завꙋлонѧ, дванадесѧть ты́сѧщъ запечатлѣ́нныхъ.
и҆ ѿ колѣна і҆ѻ́сифова, дванадесѧть ты́сѧщъ запечатлѣнныхъ.
ѿ колѣ́на венїа҆ми́нова, дванадесѧть ты́сѧщ̑҇ запечатлѣнныхъ·

По сихъ видѣх꙽ и҆ с̂е народ̑ мно́гъ, е҆гоже и҆счестѝ никтоже мо́жетъ, ѿ всѧкаго ꙗ҆́зы́ка и҆ колѣ́на и҆ людїи и҆ племен꙽.
стоѧ́ще пред̑ прс̑҇тломъ, и҆ пред̑ а́гньцемъ, ѻ҆блечены в ри́зы бѣлы, и҆ фѷницы в рꙋкахъ и҆хъ.
и҆ възопи́ша гласомъ ве́лїимъ гл҃юще, спс̑҇нїе сѣдѧщаго на прс̑҇тлѣ б҃а на́шего и҆ а́гньца.
и҆ вси а҆гг҃ли стоѧ́хꙋ ѻ҆крс̑҇т꙽ прс̑҇тла, и҆ ста́рец̑҇ и҆ четыре животныхъ.
и҆ падоша на лицы пред̑ прс̑҇тломъ и҆ поклонишасѧ б҃ꙋ.
гл҃юще, а҆ми́нь.
блс̑҇венїе и҆ сла́ва и҆ премꙋдрость и҆ хвала̀ и҆ честь и҆ си́ла и҆ крѣпость б҃ꙋ нашемꙋ въ вѣки вѣкомъ а҆ми́нь·

И҆ ѿвѣща е҆ді́нъ ѿ ста́рецъ гл҃а ми.
сїи ѻ҆блеченїи в ри́ѕы бѣлыѧ, кт̂о сꙋть и҆ ѿкꙋдꙋ прїидоша;
и҆ рѣхъ е҆мꙋ, г҃и, т̂ы вѣси·

И҆ рече м̂и, сїи сꙋть и҆же прїидо́ша ѿ скорби вели́кїѧ, і҆ и҆спра́ша ри́ѕы своѧ и҆ ѹ҆бѣли́ша ри́ѕы своѧ во кровѝ а҆́гньчи, сего ради сꙋть пред̑ прс̑҇тломъ бж҃їимъ и҆ слꙋжатъ е҆мꙋ дн҃ь и҆ нощъ въ цр҃кви е҆го.
и҆ сѣдѧ́и на прс̑҇тлѣ всели́тсѧ в н̂ѧ.
не въза́лчꙋть ктомꙋ ни въжа́ждꙋтъ·

Не и҆́мать же па́сти на нихъ слн҃це, и҆ всѧкъ зно́и·

Ꙗ҆́ко а҆гнецъ и҆же посрѣдѣ прс̑҇тла ѹ҆пасет̑ ѧ҆̀ и҆ наста́витъ и҆хъ на животныѧ и҆сточники водъ, и҆ ѿи҆метъ б҃ъ всѧкꙋ слезꙋ ѿ ѻ҆́чїю и҆хъ·

Глв̑҇а, и҃·

И е҆гда̀ ѿвр́ъзе сед̑мꙋ́ю печать, бысть без꙽млъвїе на нб҃си ꙗ҆́ко полъ часа̀.
и҆ видѣхъ седмь а҆гг҃лъ, и҆же пред̑ бм҃ъ стоа́хꙋ, и҆ дано̀ бысть и҆мъ седмь трꙋбъ·

И҆ дрꙋгїи а҆гг҃лъ прїиде, и҆ ста̀ предъ ѻ҆лтаремъ и҆мѣѧѝ кадилницю златꙋ, и҆ даны бы́ша е҆мꙋ ѳїмїѧми мно́ѕи, да дастъ молитвамъ ст҃ыхъ всѣхъ на ѻ҆лта́рь зла́тыи сꙋщїи пред̑ прс̑҇тломъ.
и҆ і҆зы́де дымъ кади́лныи мл҃твамъ ст҃ыхъ ѿ рꙋкы а҆гг҃ла пред̑ б҃а.
и҆ взѧтъ а҆гг҃лъ кадилницꙋ и҆ наполни ю҆̀ ѻ҆гнѧ̀ сꙋщаго на ѻ҆лтарѝ и҆ положѝ на земли·

И҆ бы́ша гласы и҆ гро́ми и҆ блистанїа и҆ трс̑҇ꙋ.
и҆ седмь а҆гг҃лъ, и҆же и҆мѣѧ́хꙋ седмь трꙋбъ, ѹ҆гото́вашасѧ да въстрꙋбѧтъ·

И҆ пръ́вомꙋ а҆гг҃лꙋ въстрꙋбившꙋ, и҆ бысть градъ и҆ ѻ҆́гнь смѣшенъ съ кровїю.
и҆ паде наземлѝ.
и҆ третїа часть дре́ва погорѣ, и҆ всѧ́ка трава̀ злачнаѧ погорѣ.

И҆ вторыи а҆гг҃лъ въстрꙋбѝ, и҆ ꙗ҆́ко гора вели́ка ѻ҆гнемъ жего́ма въвр́ъжена бысть въ мо́ре.
и҆ бысть третїа часть мо́рѧ кро́вь.
и҆ ѹ҆мре третїѧ часть създа́нїѧ въ мо́ри и҆мꙋщихъ дш҃а.
и҆ третїѧ часть кораблей поги́бе·

И҆ тре́тїи а҆гг҃лъ въстрꙋби.
и҆ падѐ с нб҃си ѕвѣзда велика горѧщи ꙗ҆ко свѣща̀, и҆ паде на тре́тїей части рѣкъ, и҆ і҆сто́чникъ водныхъ.
и҆ і҆мѧ ѕвѣздѣ гл҃етсѧ а҆ѱиньѳосъ, и҆ бысть тре́тїѧ часть во́дъ ꙗ҆́ко пелы́нь, и҆ мно́ѕи ѿ чл҃къ ѹ҆мро́ша ѿ во́дъ, ꙗ҆́ко го́рки бѣша.
и҆ четве́ртыи а҆гг҃лъ въстрꙋбѝ, и҆ ѹ҆ꙗ҆зве́на бысть третїа часть сл҃нцꙋ, и҆ тре́тїѧ часть лꙋн̀ѣ, и҆ тре́тїѧ часть ѕвѣздъ, да затми́тсѧ тре́тїѧ часть и҆хъ, и҆ дн҃ѧ тре́тїѧ часть да не свѣтитъ.
и҆ но́щъ такоже.
и҆ видѣхъ и҆ слы́шахъ е҆ді́нъ а҆гг҃лъ парѧщь посредѣ нб҃се, гл҃ющъ гла́сомъ вели́комъ.
го́ре го́ре го́ре живꙋщимъ на землѝ ѿ про́чихъ гласъ трꙋ́бныхъ, трїехъ а҆гг҃лъ, хотѧщихъ трꙋбити·

Глв̑҇а, ѳ҃·

И пѧ́тыи а҆гг҃лъ въстрꙋби.
и҆ видѣхъ ѕвѣздꙋ с нб҃се спад̑шꙋ на́ землю, и҆ данъ бысть е́й ключь стꙋденца бе́зд̑ны, и҆ ѿврь́зе стꙋденца бе́зд̑ны, и҆ взы́иде дымъ ѿ стꙋденца ꙗ҆́ко дым꙽ пе́щи вели́ки, и҆ ѻ҆мр́ьче слн҃це и҆ а҆е҆ръ ѿ дыма стꙋдени́чнаго.
и҆ ѿ дыма и҆зыдо́ша прꙋѕи на́ землю, и҆ дана̀ быс̑҇ и҆мъ ѻ҆́бласть, ꙗ҆́ко и҆мꙋтъ ѻ҆́бласть и҆ скорпїи земнїи, и҆ речено бысть и҆м꙽ да не вредѧтъ травы̀ земны́ѧ, ни всѧ́кого зла́ка, ни всѧ́кого дре́ва.
н̂о чл҃кы то́чїю и҆же не и҆мꙋтъ печати бж҃їа на челѣхъ свои҆хъ.
и҆ дано̀ бысть и҆мъ, да не ѹ҆бїютъ и҆хъ, н̂о да мꙋкꙋ прїимꙋтъ пѧть мцс̑҇ь.
и҆ мꙋче́нїе и҆хъ ꙗ҆́ко мꙋченїе скорпїево, е҆гда̀ сѣкнетъ чл҃ка.
и҆ в т̂ы дн҃и взы́щꙋтъ чл҃цы сме́рти, и҆ не ѻ҆брѧщт̑ꙋ е҆ѧ̀, и҆ вожделѣютъ ѹ҆мрѣти, и҆ бѣжитъ ѿ нихъ сме́рть.
и҆ ѹ҆подобле́нїѧ прꙋгомъ подо́бно ко́немъ ѹ҆гото́вленым̑ на́ брань, и҆ на главах̑ и҆хъ ꙗ҆́ко вѣнцѝ ѹ҆подобле́ни зла́тꙋ, и҆ лица̀ и҆хъ ꙗ҆ко лица члчс̑҇ка.
и҆ і҆мѣхꙋ власы, ꙗ҆́ко власы̀ женскыѧ, и҆ зꙋбы и҆хъ ꙗ҆ко львом̑ бѣша.
и҆ і҆мѣхꙋ бронѧ̀ ꙗ҆ко бронѧ желѣзны·

И҆ гласъ крылъ и҆хъ ꙗ҆́ко глс̑҇а колесницъ и҆ ко́неи мно́го текꙋщихъ на́ брань.
и҆ і҆мѧ́хꙋ ѻ́шиби подобни скорпїинымъ, и҆ жа́ла ѻ́шибеи и҆х꙽.
и҆ дана̀ б̂ѣ ѻ҆́бласть и҆мъ вредити чл҃кы пѧть мцс̑҇ь, и҆ і҆мѣли надъ собо́ю цр҃ѧ а҆гг҃ла безнд̑ы, е҆мꙋже и҆мѧ е҆вреискы, а҆в꙽вадон꙽.
а҆ е҆ллинскы, а҆пполиѻ҆нъ.
горе е҆ді́но ѿи҆де, с̂е грѧдꙋтъ дв̂а го́рѧ по сих̑·

И҆ шестыи а҆гг҃лъ въстрꙋбѝ, и҆ слы́шахъ гласъ е҆ді́нъ ѿ четыр꙽ рогъ ѻ҆лтарѧ̀ злата́го сꙋщаго предъ бм҃ъ, гл҃юща шестомꙋ а҆гг҃лꙋ.
и҆мѣющꙋ трꙋбꙋ.
разрѣши четыри а҆гг҃лы свѧзаны на рѣцѣ велицѣи е҆фратъ.
и҆ разрѣше́ны бы́ша четы́ри а҆гг҃лы ѹ҆готованы на часъ.
и҆ дн҃ь, и҆ мс̑҇ць, и҆ лѣто, да и҆збїютъ третїю часть чл҃къ·

И҆ число̀ воиникъ ко́нныхъ двои҆цею тм̂а тмами слы́шахъ число их̑·

И҆ тако видѣхъ в꙽ видѣ́нїи, кони, и҆ сѣдѧ́щїа на нихъ и҆мꙋща бронѧ ѻ҆́гнены, и҆ а҆ки́нѳны и҆ жꙋ́пелны.
и҆ главы ко́немъ и҆хъ ꙗ҆ко главы лвом̑, и҆ і҆зъ ѹ҆стъ и҆хъ и҆схожд̑аше ѻ҆́гнь и҆ дымъ и҆ жꙋпелъ, и҆ ѿ трехъ ꙗ҆́звъ сихъ поги́бе тре́тїа часть чл҃къ, ѿ ѻ҆гнѧ и҆ ѿ дыма и҆ ѿ жꙋпела и҆сходѧщих̑ и҆зъ ѹ҆стъ и҆хъ.
ѻ҆́бласть бо ко́немъ въ ѹ҆стх̑ѣ и҆хъ б̂ѣ.
и҆ ѻ҆шиби и҆хъ подобни ѕмїем̑ и҆мꙋще главы̀, и҆ тѣми па́кости дѣюще·

И҆ про́чїи ѿ чл҃къ и҆же не врежени бы́ша ꙗ҆́звами си́ми.
ни пока́ѧшасѧ ѿ дѣлъ рꙋкъ свои҆хъ да не покло́нѧт̑сѧ дѣ́мономъ, ни идоломъ зла́тым̑ и҆ сре́бренымъ и҆ мѣдѧнымъ и҆ ка́меным̑ и҆ древѧ́нымъ, и҆же ни ви́дѣти могꙋтъ ни слы́шати ни ходи́ти.
и҆ не пока́ѧшасѧ ѿ ѹ҆бїиствъ свои҆хъ, ни ѿ волхвова́нїа и҆хъ.
ни ѿ блꙋда̀ их̑ ни ѿ та́тьбы и҆хъ·

Глв̑҇а, і҃·

И видѣхъ и҆́нъ а҆гг҃лъ крѣ́пок꙽ сходѧщъ с нб҃се, ѻ҆́блъченъ въ ѻ́блакъ, и҆ дꙋга̀ на главѣ̀ е҆го, и҆ лице е҆мꙋ ꙗ҆́ко сл҃нце, и҆ ноѕѣ е҆го ꙗ҆́ко столпы̀ ѻ҆́гнены·

і҆ и҆мѣ́ѧ в рꙋцѣ свое́и кни́гꙋ раз̑гибенꙋ·

и҆ поста́ви но́гꙋ свою̀ деснꙋ́ю на́ мори, а҆ шꙋю на землѝ·

и҆ възопѝ гла́сомъ вели́кымъ ꙗ҆́ко ле́въ рыка́а·

і҆ егда̀ възгласѝ, гл҃аша седмь громов꙽.
гла́сы свои҆ми.

І҆ егда възгласи́ша седмь гро́мовъ гла́сы свои҆ми.
хотѣхъ писа́ти.
и҆ слы́шахъ гласъ съ нб҃се гл҃ющъ м̂и, запечатлѣи ꙗ҆́же гл҃аше седмь громовъ, и҆ сего не пишѝ.

И҆ а҆гг҃лъ е҆гоже видѣхъ стоѧ́ща на́ мори и҆ на землѝ, въздви́же рꙋкꙋ свою на́ нб҃о и҆ клѧтсѧ живꙋщим̑ въ вѣкы вѣкомъ, и҆же създа̀ нб҃о, и҆ ꙗ҆́же на немъ, и҆ зе́млю, и҆ ꙗ҆́же на неи, и҆ мо́ре, и҆ ꙗ҆же в немъ.
ꙗ҆́ко лѣта ѹ҆же не бꙋдет̑·

Но въ́ дни гласа седмаго а́гг҃ла, е҆гда и҆мать въстрꙋби́ти·

и҆ скьнча́ти та́инꙋ бж҃їю, е҆же бл҃говѣсти свои҆ми рабы про̑҇ркы.
и҆ гласъ е҆го слы́шах̑ с нб҃се паки гл҃ющъ со мно́ю.
и҆ гл҃а.
и҆дѝ и҆ прїими книжицѧ разгнꙋтыѧ въ рꙋцѣ а҆гг҃ла стоꙗ҆щаго на́ мори и҆ на землѝ.
і҆ и҆дохъ къ а҆гг҃лꙋ гл҃ѧ е҆мꙋ, дажд̑ь ми кни́жицѧ и҆ рече м̂и, прїими и҆ снѣжд̑ь ѧ҆̀ и҆ горка бꙋдетъ въ́ чревѣ твоемъ, н̂о въ ѹ҆стѣхъ т̂и сладка бꙋдетъ ꙗ҆́ко мед̑·

И҆ прїѧ́хъ книгꙋ ѿ рꙋкѝ а҆гг҃ла, и҆ снѣдохъ ѧ҆̀.
и҆ быша въ ѹ҆стѣхъ мои҆хъ ꙗ҆ко медъ сладкїи.
и҆ е҆гда снѣдохъ ѧ҆̀ горка бѧше въ́ чревѣ мое҆мъ.
и҆ рече м̂и подоба́етъ т̂и паки про̑҇рчьствова́ти в людехъ.
и҆ въ племенехъ и҆ въ ꙗ҆́зы́цехъ и҆ въ цр҃ехъ мно́ѕѣхъ·

Глв̑҇а, а҃і·

И дана̀ м̂и бысть трость, подобна жезлꙋ̀, гл҃ющи въста́ни, і҆ и҆змѣ́ри цр҃квъ бж҃їю, і҆ ѻ҆лтарь, и҆ кланѧющаѧсѧ в неи.
а҆ дворъ сꙋщїи внꙋтръ цр҃кве и҆знесѝ вн̂ѣю́дꙋ.
ниже и҆змѣ́ри е҆го зане данъ быс̑҇ ꙗ҆́зы́ком̑ и҆ градъ ст҃ыи поперꙋть четы́редесѧт̑ и҆ дв̂а мцс̑҇ѧ·

И҆ дамъ ѻ҆бѣма свѣдѣтелема мои҆ма и҆ прорицаютъ дн҃еи ты́сѧщꙋ дв̂ѣст̂ѣ и҆ шестьдесѧт꙽, ѻ҆болче́на въ вре́тища, с̂и е҆ста дв̂ѣ ма́слици и҆ дв̂а свѣщника пред̑ бм҃ъ землѧ̀ стоꙗ҆́ща.
і҆ и҆же и́ма непра́вдꙋ сътворитъ, ѻ҆́гнь и҆сходитъ и҆зъ ѹ҆стъ ею̀ и҆ поꙗ҆́сть врагѝ и҆хъ, і҆ и҆же хощетъ ѻ҆бидѣти и҆хъ сем̀ꙋ подоба́е҆тъ ѹ҆бїе́нꙋ быти.
и҆ сїи и҆мꙋтъ ѻ́бласть затвори́ти нб҃о да не сни́дет̑ дожд̑ъ на землю во́ дни прорица́нїа ею̀.
и҆ ѻ́бласть и҆мꙋтъ на водахъ ѻ҆бращатї ѧ҆̀ въ кро́вь.
и҆ порази́ти землю всѧкою ꙗ҆звою, е҆лика а҆ще въсхо́щета.
і҆ егда̀ и҆ сконча́ета свѣдѣтельство свое.
ѕвѣ́ръ и҆же и҆сходитъ ѿ бездны, сътворитъ с ними бра́нь, и҆ побѣдит̑ и҆хъ і҆ ѹ҆бїетъ ѧ҆̀.
и҆ трꙋпъ ею̀ ѻ҆ста́витъ на стогнахъ града вели́каго, и҆же нарица́етсѧ дх҃овнѣ, содо́мъ, і҆ егѵ́петъ, и҆дѣже и҆ г҃ь наш̑҇ распѧ́тъ бысть.
и҆ ѹ҆зрѧтъ ѿ людїи і҆ ꙗ҆́зы́къ и҆ ѿ колѣнъ и҆ племе́нъ тѣлеса̀ ею̀, дн҃и тр̂и и҆ полъ, и҆ трꙋпꙋ ею̀ не ѻ҆ста́витъ положити въ́ гробѣ.
и҆ живꙋщеѝ на землѝ възра́дꙋютсѧ и҆ възвеселѧ́тсѧ ѻ҆ нихъ, и҆ да́ры послютъ дрꙋгъ къ́ дрꙋгꙋ, ꙗ҆ко ѻ҆́ба сїа про̑҇рка мꙋ́чиста живꙋщаѧ на землѝ.
и҆ по трехъ дн҃ехъ и҆ полъ, дх҃ъ живо́тенъ вни́детъ в нѧ̀ ѿ́ бг҃а, и҆ ста́нета ѻ҆ба на нога́хъ свои҆хъ, и҆ страхъ ве́лїи нападѐ на зрѧ́щихъ ею̀.
и҆ ѹ҆слы́шатъ гласъ ве́лїи с нб҃се гл҃ющъ и҆ма, взыдѣта сѣ́мо, и҆ взыдоша на нб҃о на ѻ҆́блацехъ·

И҆ видѣша ѧ҆̀ враѕи и҆хъ.
и҆ в часъ тои трꙋсъ быс̑҇ ве́лїи, и десѧтаѧ часть гра́да паде и҆ поги́бе трꙋсомъ и҆ме́нъ члчс̑҇къ сед̑мъ ты́сѧщъ·

И҆ про́чїи пристра́шнибыша, и҆ даша сла́вꙋ б҃ꙋ нбс̑҇номꙋ.
горе второ́е ѿи҆де, с̂е горе третїе грѧдетъ ско́ро.
и҆ седмыи а҆гг҃лъ вострꙋбѝ.
и҆ быша гла́си велицы на нб҃сехъ, гл҃юще, бысть црс̑҇тво ми́ра г҃а нашег̑҇ и҆ х҃а е҆го, и҆ въцр҃итъсѧ въ́ вѣкы вѣком̑ и҆ дв̂адесѧть и҆ четыри ста́рцы пред̑ бм҃ъ сѣдѧщаѧ на прс̑҇тлѣхъ свои҆хъ, падоша на лица своѧ̀ и҆ поклонишасѧ б҃ꙋ гл҃юще.
хвалим̑ т̂ѧ г҃и бж҃е вседержителю.
сы́и, и҆ б̂ѣ, и҆ грѧды́и, ꙗ҆́ко прїѧ́ть си́лꙋ твою вели́кꙋю и҆ въцр҃и́сѧ и҆ ꙗ҆зыцы прогнѣ́вашасѧ, и҆ прїиде гнѣвъ твои.
и҆ вре́мѧ мр҃твым꙽ сꙋд꙽ прїѧ́ти.
и҆ дати мзд̀ꙋ рабомъ твоим̑ про̑҇ркомъ и҆ ст҃ымъ, и҆ боѧ́щимсѧ и҆́мени твое҆го малымъ и҆ вели́кымъ, и҆ растлити посмра́жд̑ьшаѧ зе́млю.
и҆ ѿвр́ьзесѧ храм̑ бж҃їи на нб҃си, и҆ ꙗ҆вис̑҇ кѷвотъ завѣта е҆го въ цр҃кви е҆го.
и҆ бы́ша блиста́нїѧ и҆ гла́сы и҆ громи и҆ трꙋсъ и҆ градъ вели́къ·

Глв̑҇а, в҃і·

И зна́менїе ве́лїе ꙗ҆висѧ на небесѝ, жена̀ ѻ҆блече́на въ солн҃це, и҆ лꙋна̀ под нога́ма еа̀ и҆ на главѣ̀ еѧ̀ вѣнецъ ѿ ѕвѣздъ дв̂оюнадесѧте.
и҆ въ чревѣ и҆мꙋщи вопїетъ болѧщи, и҆ стра́ждꙋщи родити.
и҆ ꙗ҆́висѧ и҆́но ѕна́менїе на́ нбс̑҇и, и҆ с̂е ѕмїи вели́къ чрьменъ, и҆мѣѧ главъ седмь, и҆ роговъ десѧть, и҆ на главахъ е҆го сед̑мь вѣ́нецъ.
и҆ хо́ботъ е҆го ѿтръж́е третїю часть ѕвѣздъ нбс̑҇ныхъ, и҆ положи ѧ҆̀ в зе́млю.
и҆ змїи стоѧ́ше пред꙽ жено́ю хотѧ́щею҆̀ роди́ти, да е҆гда̀ роди́тъ снѣсть чадо еа̀.
и҆ роди сн҃а мꙋжеска и҆же и҆мать ѹ҆пастѝ вс̂ѧ ꙗ҆зыкы жезломъ желѣзнымъ.
и҆ въсхищено быс̑҇ чадо еѧ̀ къ б҃ꙋ и҆ прс̑҇тлꙋ е҆го а҆ жена̀ бѣжа̀ въ пꙋсты́ню і҆дѣже і҆м̀ѣ мѣсто ѹ҆гото́вано ѿ б҃а, да та́мо пита́е҆тсѧ дн҃їи ты́сѧщꙋ дв̂ѣст̂ѣ шестьдесѧтъ.
и҆ бысть брань на нб҃си.
михаи́лъ, и҆ а́гг҃ли е҆го, бра́нь сътвориша съ ѕмїемъ.
и҆ ѕмїи бра́сѧ и҆ а҆гг҃ли е҆го, и҆ не възмого́ша, и҆ мѣста не ѻ҆брѣ́тесѧ и҆мъ ктомꙋ̀ на нб҃си.
и҆ вложе́нъ бысть ѕмїи вели́кїи ѕмїи дре́внїи, нарица́емыи дїа́волъ и҆ сатана̀, льстѧ́и вселенꙋю вс̂ю, и҆ вложенъ бысть на́ землю, и҆ а́гг҃ли е҆го с нимъ в꙽ве́ржени быша·

И҆ слы́шахъ глс̑҇а ве́лїи на нб҃си гл҃ющъ, нн҃ѣ бысть спс̑҇нїе и҆ сила и҆ црс̑҇тво б҃а на́шего и҆ ѻ́бласть х҃а е҆го, ꙗ҆́ко низложе́нъ быс̑҇ клеветни́къ братїѧ на́шеѧ ѻ҆клевеща́ѧ и҆хъ пред̑ бм҃ъ нашимъ дн҃ь и҆ нощ̑҇ и тїи побѣдиша е҆го длѧ крове а҆́гньча і҆ за слово свѣдѣтельства их̑, і҆ не възлюбиша дш҃ъ своих̑ даже до см҃рти.
сего ра́ди весели́тесѧ нб҃са и҆ живꙋщеѝ на них̑·

Го́ре живꙋщим̑ на землѝ и҆ морю, ꙗ҆́ко снїиде дїа́волъ к вамъ и҆мѣѧ ꙗ҆́рос̑҇ вели́кꙋю, вѣ́ды ꙗ҆ко вре́мѧ ма́ло и҆мать.
и҆ егда̀ видѣвъ ѕмїи, ꙗ҆ко низложе́нъ бысть на́ землю.
гонѧше жен̀ꙋ, и҆же роди мꙋжеска.
и҆ даны̀ быша женѣ̀ дв̂ѣ крылѣ, ѻ҆рла̀ вели́каго да паритъ в пꙋсты́ню в мѣсто своѐ, и҆дѣже препита́на бѣше т̂ꙋ вре́мѧ временъ и҆ пол̑҇ времени, ѿ лица̀ ѕмїи́на.
і҆ и҆спꙋстѝ ѕмїи за жено́ю и҆зъ ѹ҆стъ свои҆хъ во́дꙋ ꙗ҆ко рѣкꙋ, да ю҆̀ в рецѣ потопитъ.
и҆ помо́же землѧ̀ женѣ̀.
и҆ ѿвръз́е землѧ ѹ҆ста̀ своа и҆ пожре рѣк̀ꙋ, ю҆же и҆зведѐ ѕмїи ѿ ѹ҆стъ своих̑.
и҆ разгнѣ́вавсѧ ѕмїи на жен̀ꙋ, і҆ и҆де сътвори́ти брань съ ѻ҆ста́вшимъ сѣменемъ еѧ̀, и҆же съблюда́ютъ за́повѣди бж҃їа, і҆ и҆́мѣю҆тъ свѣдѣтельство і҆с҃ хв҃о·

Глв̑҇а, г҃і·

И стах̑ на пѣсцѣ̀ морстем̑ и҆ видх̑ѣ и҆з морѧ звѣръ и҆сходѧщ̑҇, и҆мꙋщъ глав̑҇ сед̑мь, и҆ роговъ десѧт̑, и҆ на розх̑ѣ е҆го вѣ́нецъ десѧт̑ а҆ на главах̑ е҆го и҆мена̀ хꙋлна и҆ ѕвѣръ е҆гож̑ видх̑ѣ, б̂ѣ подобен̑҇ ры́си.
и҆ нозѣ е҆мꙋ ꙗ҆́ко медвѣди.
и҆ ѹ҆ста̀ е҆го ꙗ҆́ко ѹ҆ста̀ лво́ва.
и҆ дасть е҆мꙋ ѕмїи си́лꙋ свою, и҆ прс̑҇толъ свои, и҆ ѻ́бласть вели́кꙋю.
и҆ видѣхъ е҆ді́нꙋ ѿ главъ е҆го, ꙗ҆́ко заколе́нꙋ въ смр҃ть и҆ ꙗ҆́зва смр҃ти е҆го и҆сцѣлѣ.
и҆ чюдисѧ всѧ землѧ въ слѣдъ ѕвѣри, и҆ поклони́шасѧ ѕмїю̀, и҆же дасть ѻ҆бласть ѕвѣрю, и҆ поклони́шасѧ ѕвѣрю гл҃юще кт̂о подобен꙽ ѕвѣрю, и҆ кт̂о мо́жетъ ратова́тисѧ с нимъ;
и҆ даны̀ бы́ша е҆мꙋ ѹ҆ста̀ гл҃юща вели́ка и҆ хꙋлна.
и҆ дана бы́сть е҆мꙋ ѻ҆́бласть твори́ти мцс̑҇ь четыринадесѧть дв̂а.
и҆ ѿвр́ьзе ѹ҆ста̀ своѧ въ хꙋле́нїе къ б҃ꙋ, хꙋлити и҆́мѧ е҆го, и҆ селе́нїе е҆го, и҆ живꙋщаа на нб҃си.
и҆ дано̀ бысть е҆мꙋ бра́нь твори́ти съ ст҃ыми, и҆ побѣдитї ѧ҆̀.
и҆ дана̀ бысть е҆мꙋ ѻ҆бласть на всѧком꙽ колѣнѣ людїи, и҆ на ꙗ҆зы́цехъ и пле́менехъ.
и поклонѧ́тсѧ е҆мꙋ вс̂и.
живꙋщеи на земли, и҆мже не напи́сана сꙋть и҆мена̀ въ кни́гахъ живо́тныхъ а҆гнца заколе́наго ѿ сложенїа ми́рꙋ.
а҆ще кт̂о и҆́мать ѹ҆хо, да слы́шит꙽.
и҆же а҆ще въ плененїе ведетъ, въ пленїе по́идетъ.
а҆ще кт̂о ѻ҆рꙋжїемъ ѹ҆бїетъ, подоба́етъ е҆мꙋ ѻ҆рꙋжїем꙽ ѹ҆бїе́нꙋ быти.
здѣ е҆сть терпѣнїе и҆ вѣ́ра ст҃ыхъ.
и҆ видѣхъ и҆нъ ѕвѣръ въсходѧщъ ѿ землѧ, і҆ и҆мѧше ро́га дв̂а.
подобна а҆гньчимъ, и гл҃ше ꙗ҆́ко ѕмїи.
и҆ власть пр́ьваго ѕвѣри вс̂ю творѧше пред̑ нимъ, и҆ творѧше зе́млю и҆ всѧ живꙋщаѧ на не́и, поклонитисѧ пр́ьвомꙋ ѕвѣ́рю, е҆мꙋже и҆сцѣлена бысть ꙗ҆́зва смр҃тнаа.
и҆ сътвори чюдеса велика, да і҆ ѻ҆́гнь сътворитъ сходити съ нб҃се на́ землю пред̑ чл҃кы.
и льститъ живꙋщаа на земли, ради ѕна́менїи ꙗ҆же дана̀ бы́ша е҆мꙋ пред̑ ѕвѣремъ творити, гл҃а живꙋщимъ на земли, сътворити ѻ҆́бразъ ѕвѣрѧ, і҆ и҆же и́мать ꙗ҆́звꙋ ѻ҆рꙋж́нꙋю, и҆ живъ бысть, и҆ дано̀ бысть е҆мꙋ дати дх҃ъ ѻ́бразꙋ ѕвѣри́нꙋ, да прогл҃тъ и҆ко́на звѣри́на и҆ сътворитъ да и҆же а҆ще не покло́нитсѧ ѻ҆бразꙋ звѣриномꙋ ѹ҆бїенъ бꙋде́тъ.
и҆ сътворит̑ вс̂ѧ ма́лыѧ и҆ вели́кыѧ, богатыѧ и҆ ѹ҆бо́гїѧ, свобод̑ныѧ и҆ работ̑ныа да дас̑҇ и҆мъ начерта́нїе на деснѣи рꙋц̀ѣ и҆хъ, и҆ли на челохъ и҆хъ.
да никт̂оже възмо́жетъ ни кꙋпи́ти ни прода́ти, токмо кт̂о их̑ и҆́мать начерта́нїе и҆ли и́мѧ ѕвѣ́ри и҆ли число̀ и҆мени е҆го.
зд̂ѣ мꙋдрость е҆сть, и҆же и́мать ѹ҆м꙽, да почтетъ число̀ ѕвѣрино, число̀ б̂о члс̑҇чко е҆сть.
и҆ число̀ е҆го, х҃, ѯ҃, ѕ҃·

Глв̑҇а, д҃і·

И видѣхъ, и҆ с̂е а́гнець стоѧ́ше на горѣ сїѻ́нъстѣ, и҆ с нимъ ст̂о и҆ четырдесѧтъ и҆ четыри тысꙋща, и҆мꙋще и҆мѧ ѿц҃а е҆го напи́сано на челохъ свои҆хъ.
и҆ слы́шахъ глас̑҇ с нб҃с ꙗ҆́ко гласъ водъ мно́гъ, и҆ ꙗ҆́ко гласъ гро́ма вели́ка, и҆ гласъ слы́шахъ гꙋдецъ гꙋдꙋщихъ въ гꙋсли своѧ, и҆ пою҆щихъ ꙗ҆́ко пѣснь но́вꙋ пред̑ прс̑҇тломъ и҆ пред̑ четы́ри живот̑ными, и҆ ста́рцы.
и҆ никтоже можа́ше навы́кнꙋти пѣсни, токмо сїи, сто и҆ четы́редесѧт̑ и҆ четы́ре тысѧщи, и҆скꙋплени ѿ землѧ.
сїи сꙋть и҆же съ женами не ѻ҆скверни́шасѧ, зане дѣв꙽ственицы б̂о сꙋть·

сїи, послѣдꙋю҆тъ а҆гньцꙋ, ꙗ҆́може а҆ще по́идет̑.
сїи сꙋть кꙋ́пленї ѿ людїи, пр́ьвѣнцы б҃ꙋ и҆ а́гньцꙋ, и҆ въ ѹ҆стѣхъ и҆хъ не ѻ҆брѣтесѧ лесть ꙗ҆же без порока ѹ҆бо сꙋть пред̑ прс̑҇тлом꙽ бж҃їимъ·

И҆ видѣхъ и́нъ а҆гг҃лъ парѧщь посредѣ нб҃се, и҆мꙋще е҆ѵг̑҇лїе вѣчно, бл҃говѣстити живꙋщимъ на землѝ, и҆ всѧкомꙋ племеню і҆ ꙗ҆зы́кꙋ и҆ колѣ́нꙋ и҆ лю́демъ, гл҃ѧ гласомъ вели́кимъ.
ѹ҆бо́итесѧ б҃а и҆ дади́те е҆мꙋ сла́вꙋ, ꙗ҆ко прїидетъ час̑҇ сꙋда ег̑҇ и҆ поклони́тесѧ сътворшемꙋ нб҃о и҆ землю, и҆ мо́ре і҆ и҆сточникы водны́ѧ·

І҆ и҆нъ а҆гг҃лъ въ слѣдъ и҆де гл҃ѧ, паде паде вавилонъ градъ вели́кїи, зане ѿ вина̀ ꙗ҆рость любодѣѧ́нїа свое҆го напоѝ вс̂ѧ ꙗ҆зыкы·

И҆ третїи а҆гг҃лъ въ слѣдъ е҆го и҆де гл҃ѧ гласом̑ вели́кым̑.
и҆же а҆ще кт̂о покла́нѧетсѧ ѕвѣрю і҆ и҆ко́нѣ е҆го, и҆ прїе́млетъ начерта́нїе на челѣ̀ своемъ, и҆л̂и на рꙋцѣ свое́й, и҆ то́и и҆́мать пити ѿ вина ꙗ҆́рости бж҃їа, чва́на нерастворе́на, в ча́ши гнѣва е҆го, и҆ бꙋдетъ мꙋ́ченъ ѻ҆гнем̑ и҆ жю́пеломъ, пред̑ а҆гг҃лы ст҃ыми, и҆ пред̑ а҆гньцемъ·

И҆ дымъ мꙋченїѧ их̑ въ́ вѣкы вѣкомъ въсходитъ·

И҆ не и҆мꙋть поко́ѧ дн҃ь и҆ нощъ покланѧ́ющеѝсѧ ѕвѣ́рю, и҆ ѻ҆́бразꙋ и҆ прїе́млющеѝ начерта́нїе и҆мени е҆го·

Зд̂ѣ е҆сть терпѣ́нїе ст҃ыхъ, и҆же соблюда́ю҆тъ за́повѣдь бж҃їю и҆ вѣрꙋ і҆с҃овꙋ·

И҆ слы́шахъ глс̑҇а с нб҃се гл҃ющ м̂и, напишѝ, бл҃жени мр҃твїи, ѹ҆мира́юще ѻ҆́ г҃ѣ, ѿ нн҃ѣ е́й, гл҃етъ дх҃ъ, да почїю҆тъ ѿ трꙋдовъ свои҆хъ.
дѣла б̂о и҆хъ хо́дѧтъ въ слѣдъ с ними.
и҆ видѣхъ, и҆ с̂е ѻ҆́блакъ свѣтелъ.
и҆ на ѻ҆́блацѣ сидѧѝ подобен̑҇ сн҃ꙋ члчс̑҇комꙋ имѣѧ на главѣ̀ свое́и вѣнецъ зла́тъ, и҆ в рꙋцѣ е҆го се́рпъ ѻ҆́стръ.
і҆ и́нъ а҆гг҃л꙽ и҆зыиде и҆з храмꙋ, въпїа велїимъ гласомъ сѣдѧщемꙋ на ѻ҆́блацѣ.
послѝ се́рпъ твои, и҆ жнѝ.
ꙗ҆́ко прїиде час̑҇ пожа́ти, зане и҆сше трава̀ зем̑скаѧ.
и҆ положѝ сѣдѧѝ на ѻ҆́блацѣ, се́рпъ свои на́ землю, и҆ пожа́та быс̑҇ землѧ̀.
і҆ и́нъ а҆гг҃лъ и҆зыде и҆з꙽ цр҃кве сꙋщїа на нб҃си, и҆мы́и и҆ то́и се́рпъ ѻ҆́стръ·

І҆ и́нъ а҆гг҃лъ и҆зы́де ѿ ѻ́лтарѧ.
и҆мы̀ ѻ҆́бласть на ѻ҆гнѝ, и҆ воз̑пѝ кли́чемъ великым̑ ко и҆мꙋщемꙋ се́рпъ ѻ҆́стрыи̑ гл҃ѧ, послѝ се́рп꙽ твои ѻ҆стрыи и҆ ѻ҆бъе́мли грозды винограда земнаг̑҇ ꙗ҆́ко съѕрѣша ѹ҆же грозды еа̀.

И҆ положѝ а҆гг҃лъ се́рпъ свои на землѝ, и҆ ѻ҆бере виноград̑ земъскїи, и҆ вложѝ в точи́ло вели́кїѧ ꙗ҆рости бж҃їа·

і҆ и҆спра́но бысть точи́ло вн̂ѣ града, і҆ и҆зы́иде кровь ѿ точи́ла даже до ѹ҆здъ ко́ньских̑, ѿ стадїи ты́сѧща и҆ шесть сот̑·

Глв̑҇а, е҃і·

И видх̑ѣ и҆́но знаменїе на нб҃си ве́лїе и҆ чюдно, сед̑мь а҆гг҃лъ и҆мꙋщихъ сед̑мь ꙗ҆звъ послѣднихъ, занѐ в тѣхъ скон꙽ча́етсѧ ꙗ҆́рость бж҃їѧ·

И҆ видѣхъ ꙗ҆́ко мо́ре стклѧно, смѣшено съ ѻ҆гнемъ, и҆ побѣди́вшаа ѕвѣрѧ, и҆ ѻ҆́бразъ е҆го, и начерта́нїе е҆го, и҆ число̀ и҆мени е҆го, стоѧ҆ща на́ мори стъклѧномъ, и҆мꙋще гꙋсли бж҃їа·

И҆ поюще пѣснь моѷсе́ѻвꙋ раба бж҃їѧ, и҆ пѣснь а҆гньчю, гл҃юще, ве́лїа и҆ ди́вна дѣла твоѧ г҃и, б҃е вседержителю, пра́ведни и҆ і҆стини пꙋтїе твои, цр҃ю ст҃ыхъ.
кт̂о не ѹ҆бои҆тсѧ тебе г҃и, и҆ просла́витъ и҆мѧ твое;
ꙗ҆ко е҆ді́нъ преподобенъ е҆си.
ꙗ҆ко вс̂и ꙗ҆зы́цы прїидꙋтъ, и҆ покло́нѧтсѧ пред̑ тобою, ꙗ҆́ко ѻ҆правданїѧ твоѧ ꙗ҆ви́шасѧ·

И҆ по сихъ видѣхъ, и҆ с̂е ѿве́рзесѧ храмъ скѷнїѧ свѣденїѧ на нб҃си.
и҆ і҆зы́де седмь а҆гг҃лъ и҆з храма, и҆же и҆мѣꙗ҆́хꙋ сед̑мь ꙗ҆звъ.
ѻ҆блечены в ризы лнѧны чи́сты и҆ свѣтлы.
и҆ препоѧ́сани на персехъ по́ꙗ҆́сы златыми·

И҆ е҆ді́нъ ѿ четырь живо́тныхъ, дасть сед̑мимъ а҆гг҃ломъ сед̑мь фїа́лъ златыхъ и҆спо́лнь ꙗ҆рости, б҃а, живꙋщаго въ вѣкы вѣ́комъ·

И҆ наполнисѧ храмъ ды́ма, ѿ сла́вы бж҃їѧ, и҆ ѿ силы е҆го·

И҆ никтоже можа́ше въни́ти въ храмъ, до́ндеже сконча́ют꙽сѧ сед̑мъ ꙗ҆́звъ, сед̑михъ а҆гг҃лъ·

Глв̑҇а, ѕ҃і·

И слы́шахъ гласъ ве́лїи ѿ храма гл҃ющъ сед̑мимъ а҆гг҃лом̑, и҆дѣте и҆ і҆злѣите сед̑мь фїал̑҇ ꙗ҆́рости бж҃їѧ на́ землю·

И҆ і҆де первыи а҆гг҃лъ, и҆ і҆злїа фїа́лъ свои на́ землю.
и҆ бысть гно́и золъ и҆ лютъ на чл҃цѣхъ и҆мꙋщихъ начерта́нїе ѕвѣри́но, и҆ кланѧющих̑сѧ и҆ко́нѣ е҆го·

И҆ вторыи а҆гг҃лъ и҆злїѧ фїа́лъ свои в мо́ре, и҆ бысть кро́вь ꙗ҆́ко мрт҃вца, и҆ всѧка дш҃а жива ѹ҆мре, в мо́ри·

И҆ третїи а҆гг҃лъ и҆злїа фїал̑҇ свои на рѣкы, и҆ на и҆сточ̑҇никы вод̑ныа, и҆ бы́ша кровь.
и҆ слы́шахъ а҆гг҃ла во́д꙽наго гл҃юща, пра́веденъ е҆си г҃и, сыи, и҆ б̂ѣ, и҆ прпд̑бенъ, ꙗ҆́ко сїѧ сꙋдилъ е҆си.
занѐ кро́вь ст҃ыхъ и҆ прро̑҇къ и҆злїа́ша.
и҆ кро́вь им̑ далъ е҆си пити, досто́ини б̂о сꙋть·

И҆ слы́шахъ дрꙋгаго ѿ ѻ҆́лтарѧ гл҃юща.
е́й г҃и б҃е вседръжителю.
и҆стинни и҆ прави сꙋди твои·

И҆ четвертыи а҆гг҃лъ и҆злїѧ фїа́лъ свои на сл҃нце, и҆ дано̀ бысть е҆мꙋ ѻ҆палѧти чл҃кы ѻ҆гнем̑, и҆ о҆палишасѧ чл҃цы зно́емъ вели́кымъ, и҆ хꙋлиша и҆мѧ бж҃їе, и҆же и҆́мать ѻ҆́бласть на ꙗ҆́звахъ сихъ, и҆ не пока́ꙗ҆шасѧ дати е҆мꙋ сла́вы·

И҆ пѧтыи а҆́гг҃лъ и҆злїа фїа́лъ свои на прс̑҇тлѣ ѕвѣри́нъ, и҆ быс̑҇ црс̑҇тво е҆го ѻ҆мрачено.
и҆ жва́хꙋ ꙗ҆́зы́ки своѧ ѿ болѣзни.
и҆ хꙋлиша бг҃а нбс̑҇наго, ѿ болѣзни и҆ ѿ ꙗ҆звъ своих̑.
и҆ не пока́ѧшасѧ ѿ дѣлъ своих̑·

И҆ шестыи а҆гг҃лъ и҆злїа фїа́лъ свои на рѣкꙋ вели́кꙋ е҆фра́тъ, и҆ і҆с꙽сѧче вода̀ еѧ̀, да ѹ҆гото́витсѧ пꙋть цр҃емъ сꙋщим̑ ѿ въсто́къ слн҃чныхъ·

И҆ видѣхъ и҆зъ ѹ҆стъ ѕмі́евъ, и҆ і҆зъ ѹ҆́стъ звѣрин꙽, и҆ і҆зъ ѹ҆́стъ лжаго прро̑҇ка дх҃ы три нечи́стыѧ ꙗ҆́ко жа́бы и҆сходѧ́ща·

Сꙋть б̂о дꙋси дем́онстиї творѧще зна́менїа, ꙗ҆́же и҆сходѧтъ на цр҃еи всеѧ вселе́ныѧ, събра́ти ѧ на бра́нь дн҃и того вели́каго б҃а вседръжи́телѧ·

Се̂ грѧдꙋ ꙗ҆́ко тат̑.
бл҃же бдѧѝ и҆ блюдыи ры́зы своѧ да не нагъ хо́дитъ, и҆ ѹ҆зрѧтъ срамот̀ꙋ е҆го.
и҆ събра и҆хъ на мѣсто нарицае҆мое, е҆вреиски, а҆рмагед꙽донъ·

И҆ сед̑мыи а҆гг҃лъ и҆злїѧ фїа́лъ свои на а́еръ.
и҆ і҆зы́де глс̑҇а ве́лїи ѿ храма нб҃ꙋ ѿ прс̑҇тла, гл҃ѧ бꙋди и҆ бы́ша блиста́нїа и҆ гро́ми и҆ гла́си.
и҆ бысть трꙋсъ велик̑҇ ꙗ҆́ковъ николиже не бысть ѿ нелѣже быша чл҃цы на земли, толи́къ трꙋсъ, такъ велїи.
и҆ бысть град̑ вели́къ въ три ча́сти, и҆ гради ꙗ҆́зычестїи падо́ша·

И҆ вавѷло́нъ вели́кыи помѧновенъ бысть пред̑ бм҃ъ, дати е҆мꙋ ча́шꙋ вина̀ ꙗ҆́рости гнѣва свое҆го·

И҆ всѧк̑҇ ѻ҆стровъ бѣжа, и҆ горы не ѻ҆брѣтошасѧ.
и҆ град̑ вели́къ ꙗ҆́ко тала́нтесъ сънїиде с нб҃се на чл҃кы.
и҆ хꙋли́ша чл҃цы б҃а ѿ ꙗ҆звы град̑ныѧ, ꙗ҆́ко ве́лїѧ ꙗ҆́зва е҆го ѕѣло̀·

Глв̑҇а, з҃і·

И прїиде е҆ді́нъ ѿ сед̑ми а҆гг҃лъ, и҆мꙋщихъ сед̑мь фїа́лъ, и҆ гл҃а со мною гл҃ѧ ми, прїидѝ да покажꙋ т̂и сꙋдъ любодѣ́ица вели́кїа сидѧщаа на водах̑ мно́гахъ, с неюже любодѣ́ѧша цр҃и зем̑стїи, и҆ ѹ҆пи́шасѧ живꙋщеѝ на землѝ ѿ вина̀ любодѣѧнїѧ еѧ̀.
и҆ веде мѧ в пꙋс́то мѣ́сто дх҃омъ, и҆ видѣхъ жен̀ꙋ сѣдѧ́щꙋ на звѣ́ри червленѣ, и҆спо́лнь и҆ме́нъ хꙋлныхъ и҆же и҆мѣѧше главъ сед̑мь и҆ роговъ десѧть·

И҆ жена̀ б̂ѣ ѻ҆блечена в порфирꙋ и҆ червленицꙋ и҆ позлащена златомъ и҆ ка́менїемъ драги́мъ и҆ би́серомъ·

И҆мꙋщи чашꙋ златꙋ в рꙋцѣ свое́й по́лнꙋ ме́рзости и҆ скве́рнъ любодѣѧнїѧ еѧ̀·

и҆ на челѣ̀ еа̀ напи́сано и҆мѧ, та́ина, вавѷло́нъ вели́кыи, мати любодѣицам̑ и҆ ме́рзостемъ земъскымъ·

И҆ видх̑ѣ жен̀ꙋ пїанꙋ кро́вми ст҃ых̑, и҆ кро́вми свидѣтелеи і҆с҃овыхъ.
и҆ дивихсѧ видѣвъ еѧ̀ ди́вомъ вели́кымъ.
и҆ рече м̂и а҆гг҃лъ, что̀ сѧ дивиши;
а҆з꙽ ти рекꙋ та́инꙋ жены̀ сеѧ̀, и҆ звѣ́ри носѧ́щаго ю҆̀, сед̑мь гла́въ и҆мꙋща, и҆ рого́въ десѧт̑·

Звѣръ е҆гоже ви́диши, б̂ѣ, и҆ нѣсть, и҆ і́мать прїитѝ ѿ бе́здны, и҆ в пагꙋбꙋ и҆дет̑·

И҆ ѹ҆дивѧтсѧ живꙋщїи на землѝ, и҆мже и҆мена̀ не напи́сана сꙋть въ книгꙋ животнꙋю ѿ сложе́нїа ми́рꙋ, видѧще ꙗ҆ко звѣръ б̂ѣ, и҆ нѣсть и҆ преста̀·

Здѣ ѹ҆мъ и҆же и҆́мать мꙋ́дрость·

И҆ сед̑м꙽ главъ, горы сꙋть сед̑мь, и҆дѣже жена̀ сѣдитъ на них̑, и҆ цр҃їе сед̑мь сꙋть·

Пѧть и҆хъ па́ло, и҆ е҆ді́нъ е҆сть, а҆ дрꙋгїи е҆ще не пришелъ, е҆гда̀ прїидетъ ма́ло е҆мꙋ е҆сть пребыти·

И҆ звѣръ и҆же б̂ѣ, и҆ нѣсть, и҆ тои ѻ҆смыи ес̑҇, и҆ ѿ сед̑михъ е҆сть, и҆ в пагꙋбꙋ и҆дет̑·

И҆ десѧть рогъ ꙗ҆́же видѣ, десѧть цр҃ь е҆сть, и҆же црс̑҇тва не прїѧша.
н̂о ѻ҆́бласть ꙗ҆́ко цр҃и, е҆ді́нъ час̑҇ прїимт̑ꙋ съ ѕвѣремъ·

Сїи е҆ді́нꙋ волю и҆мт̑ꙋ, и҆ си́лꙋ, и҆ ѻ҆́бласть свою звѣ́рꙋ дадт̑ꙋ.
сїи съ а҆́гньцемъ брань сътворѧтъ, и҆ а҆гнецъ побѣдитъ ѧ҆̀, ꙗ҆ко г҃ь гм҃ъ е҆сть, и҆ цр҃ь цр҃емъ.
и҆ сꙋщїи с нимъ зва́нїи и҆ і҆збранїи и҆ вѣрни.
и҆ гл҃а м̂и, во́ды ꙗ҆́же е҆си ви́дѣлъ, и҆дѣже любодѣица сѣдитъ, людїе и҆ народи ст̑ꙋ, и҆ племена̀ и҆ ꙗ҆́зы́цы·

И҆ десѧть рогъ ꙗ҆́же видѣ на ѕвѣ́ри, сїи любодѣицꙋ възненави́дѧтъ, и҆ запꙋстѣвшꙋ сътворѧтъ ю҆̀ и҆ на́гꙋ, и҆ плоть еѧ̀ сънѣдѧтъ, и҆ съжгꙋтъ ю҆̀ ѻ҆гнемъ·

Бг҃ъ б̂о далъ е҆сть въ срд̑ца и҆хъ сътвори́ти во́лю е҆го, и҆ сътвориша е҆ді́нꙋ во́лю, и҆ да́ша црс̑҇тво и҆хъ ѕвѣрꙋ, дон̑҇деже сконча́ютсѧ гл҃ы бж҃їа.
и҆ жена̀ е҆ѧже видѣ, град̑ е҆сть вели́кїи, и҆же и҆́мать црс̑҇тво над̑ цр҃и земными·

Глв̑҇а, и҃і·

И по сихъ видѣх꙽ и҆́нъ а҆гг҃лъ, сходѧщъ с нб҃се, и҆мꙋщъ ѻ҆бласть ве́лїю.
и҆ землѧ просвѣтисѧ ѿ славы е҆го·

И҆ възпѝ в крѣ́пости гла́сом̑ ве́лїимъ, гл҃ѧ, паде паде вавѷлон꙽ вели́кыи, и҆ бысть жи́лище бѣсо́м꙽, и҆ храни́тель всѧкомꙋ дꙋхꙋ нечи́стꙋ, и҆ хранилище всѣхъ птиц꙽ нечи́стых̑, и҆ ненавидинꙋ.
ꙗ҆́ко ѿ вина̀ ꙗ҆́рости любодѣѧ́нїа еѧ̀ напо́ѝ вс̂ѧ ꙗ҆зы́ки·

И҆ цр҃їе зем꙽стїи с нею любы̀ дѣѧ́ша, и҆ кꙋпцы зем꙽стїи ѿ си́лы пи́ща е҆ѧ̀ раз̑бога́тѣша·

И҆ слы́шахъ глс̑҇а и҆́нъ с нб҃се гл҃ющъ, и҆зыидѣте и҆з неѧ̀ люд̑и̑ моѝ, да не причаститесѧ грѣсх̑ѣ еѧ̀, и҆ ѿ ѧ́звъ еѧ̀ да не вредите́сѧ·

Ꙗ҆́ко прилѣпишасѧ грѣсѝ ей даже до нб҃сѝ, и҆ помѧнꙋ б҃ъ неправды еѧ̀·

Въздади́те ей ꙗ҆ко и҆ т̂а въздасть вамъ, и҆ ѹ҆сꙋгꙋ́бите ей сꙋгꙋ́бо по дѣ́лом̑ еѧ̀·

Чѧ́шею е҆юже чръ́па вамъ, чръплите еи́ сꙋгꙋ́бо.
е҆лико просла́висѧ и҆ раз꙽свѣрѣ́пѣ, толико дади́те ей мꙋ́къ и҆ рыда́нїи.
ꙗ҆́ко въ срд̑ци своемъ гл҃а, ꙗ҆́ко сѣжꙋ цр҃ицею̀, и҆ вдова нѣсмь, и҆ рыданїѧ не и҆́мамъ ви́дѣти·

Сего̀ рад̑и̑ въ е҆ді́нъ дн҃ь прїидꙋтъ ꙗ҆звы ей.
смр҃ть и҆ плачъ и҆ глад̑, и҆ ѻ҆гнемъ сож̑жена бꙋ́детъ·

Ꙗ҆́ко крѣ́покъ г҃ь б҃ъ сꙋдѧѝ ей.
и҆ възрыда́ютъ и҆ въспла́чꙋтсѧ еа̀ цр҃и зем꙽стїи, любы̀ дѣѧв̑҇шеѝ с нею, и҆ раз̑свѣрѣпѣ́вше, е҆гда ѹ҆зрѧт̑ дым꙽ запаленїа еа̀ и҆здале́ча стоѧ́ще за страхъ мꙋкъ еа̀, гл҃юще, го́ре го́ре, град̑ вели́кїи вавѷлонъ град̑ крѣпкыи, ꙗ҆ко въ е҆ді́нъ часъ прїиде сд̑ꙋ тво́и.
и҆ кꙋпцы земстїи възрыда́ют̑ и҆ въсплачютсѧ ѻ҆ нем̑, ꙗ҆́ко бременъ их̑ никтоже кꙋпꙋетъ ктомꙋ̀, бремен꙽ злата и҆ сребра̀ и҆ каменїа драгаго и҆ би́сера и҆ вїсса и҆ порфѷры и҆ шика и҆ чр́ьвени·

И҆ всѧ́кого древа ѳин꙽на, и҆ всѧкого сосꙋда стисло́нова.
и҆ всѧкого сосꙋ́да ѿ древа чтс̑҇наго, и҆ мѣдѧна и҆ желѣзна и҆ мра́морна, и҆ корица, и҆ ѳѷмїа́ма и҆ мира и҆ лѷва́на и҆ вина̀, і҆ е҆ле́а и҆ семида́линъ и҆ пшени́ца, и҆ скота̀ і҆ ѻ҆вецъ и҆ ко́нь и҆ колесни́ць, и҆ тѣлесъ, и҆ дш҃ъ члчс̑҇кыхъ, и҆ ѻ҆воща̀ похотїи дш҃а твоеа̀ ѿи҆де ѿ тебе, и҆ вс̂ѧ тꙋчнаа и҆ свѣтлаа ѿи҆до́ша ѿ тебе, и҆ ктомꙋ не и҆маши ѻ҆брѣстї их̑·

Кꙋпцы твоѝ сим̑ ѻ҆богащ꙽шесѧ и҆здале́ча ста́нꙋтъ за страх̑ мꙋченїа еа̀, рыда́юще и҆ пла́чющесѧ и҆ гл҃ще, го́ре го́ре, град̑ вели́кыи ѻ҆блече́ныи вѷссом̑ и҆ порфїрою и҆ чр́ьвеницою, и҆ позлаще́ныи̑ златом и҆ каменїемъ драги́мъ и҆ би́серомъ, ꙗ҆ко въ е҆ді́нъ часъ поги́бе толико богат̑ство·

И҆ всѧкъ кор̑҇мъчїи, и҆ всѧкъ пла́ваѧѝ в кораблех̑.
и҆ всѧкъ е҆ликъ в мо́ри дѣлааѝ, и҆здале́че ста́ша, и҆ въпїа́хꙋ ви́дѧще дым̑ ражд̑еженїа е҆го, гл҃ще, кт̂о подо́бенъ градꙋ великомꙋ.
и҆ положиша пр́ъсть на главахъ свои҆хъ, и҆ възъпи́ша пла́чющесѧ и҆ рыда́юще, гл҃юще го́ре го́ре, градъ вели́кїи, въ немже ѻ҆бога́тишасѧ вс̂и и҆мꙋщеѝ кораблѧ̀ в мо́ри ѿ че́сти е҆го, ꙗ҆́ко е҆дїнм̑ѣ часомъ запꙋстѣ̀·

Весели́сѧ ѻ҆ семъ нб҃о, и҆ ст҃їи а҆пс̑҇ли и҆ прро̑҇цы, ꙗ҆ко сꙋдѝ б҃ъ сꙋдъ вашъ ѿ него·

И҆ взѧтъ е҆ді́нъ а҆гг҃лъ крѣ́покъ ка́мень великъ ꙗ҆́ко жр́ъновъ, и҆ ве́рже в мо́ре гл҃ѧ, тако стромле́нїемъ въверженъ бꙋдет̑ вавѷлонъ град̑ великїи, и҆ не и҆́мать ѻ҆брѣстисѧ ктом̀ꙋ.
и҆ глас̑҇ гꙋдець и҆ мꙋсикїи и҆ пи́скъ и҆ трꙋбъ не и҆́мать слы́шатисѧ ктом̀ꙋ в тобѣ, и҆ всѧк꙽ хитрецъ всѧ́кїа хи́трости не ѻ҆брѧщет̑сѧ ктом̀ꙋ в тобѣ.
и҆ шꙋмъ жерновныи не бꙋдет̑ слы́шанъ в тобѣ, и҆ свт̑ѣ свѣти́лника не свѣтит̑ в тебѣ ктом̀ꙋ и҆ гласъ жениха̀ и҆ невѣ́сты не и҆́мать слы́шанъ быти в тобѣ ктомꙋ̀·

Ꙗ҆́ко кꙋпцы̀ твоѝ бѣша вел꙽можи зем꙽стїи, ꙗ҆ко волхвованїи твоими прел꙽щени быша вс̂и ꙗ҆́зыцы, и҆ в нем꙽ кровъ пророческа, и҆ ст҃ыхъ ѻ҆брѣтесѧ и҆ всѣхъ и҆збїеныхъ на землѝ·

Глв̑҇а, ѳ҃і·

И по сихъ слы́шахъ глас̑҇ ве́лїи наро́да мно́га на нб҃си, гл҃ющъ, а҆ллилꙋїа.
спс̑҇нїе и҆ сла́ва и҆ честь и҆ си́ла г҃ꙋ б҃ꙋ на́шемꙋ, ꙗ҆́ко и҆стинни и҆ пра́ви сꙋди е҆го, ꙗ҆ко сꙋдилъ е҆сть любодѣици великои, и҆же просмради зем̑лю любодѣанїемъ своим̑.
и҆ м꙽стѝ кровь ра́бъ свои҆хъ ѿ рꙋкы̀ еа̀.
и҆ второ́е рѣша а҆ллїлꙋїа, и҆ дымъ еѧ̀ въсхождаше въ вѣкы вѣкомъ.
и҆ падоша двадесѧть и҆ четы́ре ста́рцы, и҆ четы́ре животна, и҆ поклони́шасѧ бв҃и сѣд́ѧщемꙋ на прс̑҇тлѣ гл҃ще, а҆мин̑҇ а҆ллїлꙋїа·

И҆ глас̑҇ и҆зыде ѿ прс̑҇то́ла гл҃ющъ, по́ите б҃ꙋ на́шемꙋ вс̂и рабѝ е҆го, и҆ боѧ́щеѝсѧ е҆го, и҆ ма́лїи и҆ вели́цїи·

И҆ слы́шах̑ ꙗ҆́ко глс̑҇а наро́да мно́га, и҆ ꙗ҆ко глас̑҇ во̑ мног̑҇, и҆ ꙗ҆́ко глс̑҇а гро́мов̑҇ крп̑҇ѣкых̑ гл҃ющих̑ а҆ллїлꙋїа.
ꙗ҆́ко въц҃рисѧ г҃ь б҃ъ вс̂едръжи́тел̑҇, радꙋимсѧ и҆ веселим̑сѧ и҆ дадим̑ сла́вꙋ емꙋ ꙗ҆́ко прїиде брак̑҇ а҆гньчїи·

И҆ жена̀ е҆го ѹ҆гото́вала ес̑҇ себѐ, и҆ дано̀ быс̑҇ еѝ ѻ҆блещисѧ въ вѷссон̑҇ чистъ и҆ свѣтел̑҇.
вѷссон̑҇ б̂о ѻ҆правданїа ст҃ых̑ е҆сть·

И҆ гл҃а м̂и напишѝ, бл҃жени званїи на вечерю бра́ка а҆гньча.
и҆ гл҃а м̂и, сїи словеса̀ и҆стинна бж҃їа сꙋть·

И҆ пад̑ пред̑ нога́ма е҆го поклонихсѧ е҆мꙋ.
и҆ гл҃а м̂и, ви́жд̑ь, н̂и, клеврет̑ т̂и е҆см꙽, и҆ братїа твоеѧ̀ и҆мꙋщ́ыхъ свѣдѣтельство і҆с҃ово, б҃ꙋ поклони́сѧ.
свѣдѣтельство б̂о і҆с҃ово ес̑҇ дх҃ъ прро̑҇чествїа·

И҆ видѣхъ нб҃о ѿве́ръсто, и҆ с̂е конь бл̑҇ѣ и҆ сѣдѧи на немъ вѣ́ренъ і҆ и҆стинен꙽, и҆ правдосꙋдныи, и҆ вои́нныи, ѻ҆́чи же е҆мꙋ е҆ста ꙗ҆́ко пла́мень ѻ҆гнемъ, и҆ на главѣ̀ е҆го вѣнцы̀ мно́ѕи·

И҆мыи̑ и҆мѧ напи́сано, е҆же никтоже вѣсть, токмо ѻ҆́нъ самъ·

И҆ ѻ҆блеченъ в ри́зꙋ чр́ъвленꙋ кровїю, нарица́етсѧ и҆мѧ е҆го сло́во бж҃їе·

И҆ вои҆нъства нбс̑҇наа и҆дѧхꙋ въ слд̑ѣ е҆го, на конехъ бѣлых̑.
и҆ ѻ҆блече́ни въ вѷссон̑҇ бѣлъ и҆ чистъ·

И҆ и҆зъ ѹ҆стъ е҆го и҆зыи̑де ѻ҆рꙋжїе ѻ҆стро̀, да тым̑ и҆збїет̑ ꙗ҆зыкы, и той ѹ҆пасет̑ ѧ҆̀ жезлом̑ желѣзным̑, и҆ то́й пе́рет̑ точи́ло вина̀ ꙗ҆́рости и҆ гнѣва бж҃їа вседръжителева·

І҆ и҆мать на рызѣ и҆ на стегн̀ѣ своем̑ и҆мѧ напи́сано, цр҃ь цр҃ем̑, и҆ г҃ь гм҃ъ·

И҆ видѣхъ е҆ді́нъ а҆гг҃лъ стоѧ́щъ на сл҃нци·

И҆ възпѝ гласом̑ ве́лїемъ, гл҃ѧ, всѣмъ пти́цамъ парѧщимъ посредѣ нб҃си·

Прїидѣте и҆ съберѣтесѧ на вечерю великꙋю бж҃їю, да снѣсте плоти цр҃еи, и҆ плоти крѣпкыхъ, и҆ плоти ты́сѧщъниковъ, и҆ плоти конеи, и҆ сидѧщих̑ на нихъ, и҆ плоти всѣхъ свободных̑ и҆ рабовъ, и҆ малыхъ и҆ вели́кыхъ·

И҆ видѣхъ ѕвѣръ и҆ цр҃и земныѧ, и҆ воѧ и҆́х̑ съ́браны, сътворити брань съ сѣдѧ́щимъ на конѝ, и҆ с воинъствы е҆го̀.
и҆ ꙗ҆́тъ бысть ѕвѣръ, и҆ с нимъ л꙽живыѝ прро̑҇къ сотво́ръвыи зна́менїѧ предъ ни́мъ, и҆́миже прельстѝ прїем̑шаа начрътанїе ѕвѣрино, и҆ покланѧ́ющаѧсѧ і҆конѣ е҆го̀·

Жива въвръжена быста ѻ҆́ба въ е҆зеро ѻ҆гнено горѧщее жю́пелом̑·

А҆ про́чїи ѹ҆бїе́ни бꙋдꙋтъ ѻ҆рꙋжїем꙽ сѣдѧ́щаго на конѝ и҆зшед̑шим̑ и҆зъ ѹ҆стъ е҆го, и҆ всѧ п꙽ти́ца насытишасѧ ѿ плотї и҆хъ·

Глв̑҇а, к҃·

И видѣхъ а҆гг҃ла сходѧща съ нб҃си и҆мѣѧ ключъ бе́зд̑нѣ, и҆ ю҆же вели́ко в рꙋцѣ е҆го.
и҆ ꙗ҆́тъ змїа, змїю древнюю, е҆же е҆сть дїа́волъ и҆ сатана̀, и҆ свѧза и҆̀ на ты́сѧща лѣтъ, и҆ в꙽ без꙽днꙋ затворѝ е҆го и҆ заключи е҆го, и҆ запечатлѣ над̑ ним̑, да не прелстит̑ ктомꙋ ꙗ҆́зы́кы, до́н꙽деже скон꙽ча́етсѧ ты́сѧща лѣтъ.
и҆ по сихъ подоба́етъ е҆мꙋ ѿрѣшенꙋ быти ма́ло вре́мѧ·

И҆ видѣхъ престолы и҆ сѣдѧ́щаѧ на них̑.
и҆ сд̑ꙋ данъ бысть и҆мъ.
и҆ дш҃а расте́саныхъ за свѣдѣтельство і҆с҃ово, и҆ за слово бж҃їе, и҆же не поклонишасѧ ѕвѣрю ни и҆конѣ е҆го, и҆ не прїѧша начрътанїа на челѣхъ свои҆хъ и҆ на рꙋц̀ѣ своей и҆ ѻ҆жиша и҆ въц҃ришасѧ съ хм҃ъ ты́сѧща лѣтъ.
и҆ про́чїи же мр҃твеци не ѻ҆жиша, до́ндеже сконча́етсѧ ты́сѧща лѣтъ, с̂е въскрс̑҇нїе пр́ъвое, бл҃женъ и҆ ст҃ъ и҆же и҆мать часть въ воскрс̑҇нїи пр́ъвѣмъ, на ни́хже смр҃ть втора́ѧ не и҆́мать ѻ́бласти, н̂о бꙋдꙋть і҆е҆ре́ѝ б҃ꙋ и҆ х҃ꙋ, и҆ въцр҃ѧт̑сѧ с ним̑ ты́сѧща лѣтъ·

И҆ е҆гда̀ скончаѐт꙽сѧ ты́сѧща лѣтъ, разрд̑ѣшенъ бꙋдет̑ сатана̀ ѿ темница своеѧ̀, і҆ и҆зы́детъ прелстити ꙗ҆́зы́кы сꙋщаѧ на четырехъ ѹ҆глехъ землѧ.
го́га и҆ маго́га собратї ихъ на брань, ихже число̀ ꙗ҆́ко пѣсокъ мо́рскыи·

И҆ взы̀дꙋтъ на широтꙋ землѧ, и ѻ҆бы́идт̑ꙋ ст҃ыхъ ста́нъ, и град̑ възлюбленыи, и҆ сниде ѻ҆гнь ѿ б҃а с нб҃се и҆ поꙗ҆́сть ѧ҆̀, и҆ дїѧ́волъ лестѧѝ их̑ въве́рженъ бꙋдет̑ въ е҆зеро ѻ҆гнено и҆ жꙋпелно, и҆дѣже ѕвѣръ и҆ л꙽жи́выи прро̑҇къ, и҆ мꙋчени бꙋ́дꙋтъ дн҃ь и҆ нощъ въ вѣкы вѣком̑·

И҆ видѣхъ прс̑҇тлъ вели́къ бѣ́лъ, и҆ сѣдѧщего на нем̑, е҆мꙋже ѿ лица̀ бѣжа̀ нб҃о и҆ землѧ, и҆ мѣ́сто не ѻ҆брѣтесѧ и҆мъ·

И҆ видѣхъ мр҃твеца ма́лыа и҆ вели́кїѧ, стоѧ́ща пред̑ бм҃ъ, и҆ кни́ги разгнꙋшасѧ, і҆ и҆на кни́га ѿверзесѧ ꙗ҆же е҆сть живот̑наѧ̀, и҆ сд̑ꙋ прїа́ша мр҃твецѝ ѿ напи́саныхъ въ кни́гахъ по дѣ́ломъ и҆хъ·

И҆ дасть мо́ре мрътвеца своѧ, и҆ смр҃ть и҆ а҆дъ да́ша своѧ мертвеца.
и҆ сꙋдъ прїѧ́ша по дѣломъ своим̑.
и҆ смр҃ть и҆ а҆дъ воверже́на быста въ е҆зеро ѻ҆́гненое, и҆ с̂е е҆сть втора́ѧ смр҃ть.
і҆ и҆же сѧ не ѻ҆брѣт́е въ кни́ѕе живо́тнеи напи́санъ, въве́рженъ бꙋдет̑ въ е҆зеро ѻ҆́гненое·

Глв̑҇а, к҃а·

И видѣхъ нб҃о но́во и҆ зе́млю но́вꙋ.
пр́ьвое б̂о нб҃о и҆ землѧ пр́ъваѧ преи҆доша, и҆ мо́рѧ нѣсть ктомꙋ·

І҆ а҆зъ і҆ѻ҆а́ннъ видѣхъ градъ ст҃ыи і҆ерс̑҇ли́мъ, новь сходѧ́щъ ѿ б҃а с нб҃си приготованъ, ꙗ҆́ко невѣстꙋ ѹ҆крашенꙋ мꙋжꙋ свое҆мꙋ·

И҆ слы́шахъ гласъ велїи с нб҃се гл҃ющъ, с̂е скѷнїа бж҃їѧ съ чл҃кы, и҆ всели́тсѧ с ними, и҆ тїи лю́дїе е҆го бꙋдꙋтъ, и҆ самъ б҃ъ бꙋдетъ с ними б҃ъ и҆хъ, и҆ ѿи҆метъ б҃ъ всѧ́кꙋ сле́зꙋ ѿ ѻ҆чїю их̑·

И҆ смр҃ти не бꙋ́детъ ктомꙋ ни пла́ча ни во́плѧ ни болѣзни не бꙋ́детъ ктомꙋ, ꙗ҆́ко пр́ьваѧ мимои҆до́ша.
и҆ рече сѣдѧи на прс̑҇тлѣ, се нова̀ вс̂ѧ творю̀.
и҆ гл҃а м̂и, напиши, ꙗ҆́ко сїи словеса̀ и҆стинна и҆ вѣрна сꙋть.
и҆ рече м̂и съвръшишасѧ.
а҆зъ е҆смь а҆лфа, и҆ ѡ нача́ток̑҇ и҆ конецъ·

А҆зъ жаждꙋщемꙋ дамъ ѿ и҆сто́чника воды̀ животныѧ тꙋне·

Побѣждааѝ наслѣдит̑ вс̂ѧ, и҆ бꙋ́дꙋ е҆мꙋ б҃ъ, и҆ то́ѝ бꙋдетъ мнѣ в꙽ сн҃а·

Страшли́вым же и҆ невѣ́рнымъ, и҆ скве́рнымъ и҆ ѹ҆бїицам̑, и҆ блд̑ꙋ творѧ́щимъ, и҆ чѧры творѧщим̑ и҆доложр́ъцем̑ и҆ всѣмъ л꙽жи́вым̑ часть им̑ въ е҆зерѣ горѧщем̑ ѻ҆́гнем̑ и҆ жꙋпелом̑, е҆же ес̑҇ смр҃ть втора́ѧ·

И҆ прїиде ко мнѣ е҆ді́нъ ѿ сед̑ми а҆гг҃лъ и҆мꙋщи сед̑мь фиал̑҇, и҆сплъненыхъ сед̑михъ ꙗ҆звъ послд̑ѣнихъ, и҆ рече ко мн̂ѣ гл҃ѧ.
грѧдѝ да покажю̀ т̂и невѣстꙋ а҆гньчю женꙋ·

И҆ веде м̂ѧ дх҃омъ на горꙋ вели́кꙋ и҆ высок̀ꙋ, и҆ показа м̂и град̑ великыи ст҃ыи і҆ерс̑҇лим̑ низходѧ́щъ с нб҃си ѿ б҃а и҆мꙋще славꙋ бж҃їю·

И҆ свѣти́ло е҆го подобно ка́мени драго́мꙋ.
ꙗ҆́ко камени а҆спиди.
крѷсталнꙋ·

І҆мꙋщъ стѣнꙋ велїкꙋ и҆ высокꙋ, и҆мꙋщъ вратъ дв̂анадесѧть и҆ на вратѣхъ а҆гг҃лов꙽, в҃і.
і҆ и҆мена̀ напи́сана, ꙗ҆же сꙋть и҆мена̀, дванадесѧте.
колѣн꙽ма сн҃въ і҆ил҃ев꙽.
ѿ востока врата̀ троѧ, и҆ ѿ сѣвера врата̀ троѧ, и҆ ѿ ю́га врата̀ троа и҆ ѿ запада̀ врата̀ троѧ.
и҆ стѣна градꙋ и҆мꙋщи ѻ҆снованїи.
в҃і, и҆ на нихъ и҆менъ.
в҃і, а҆пс̑҇лвъ а҆гньчих̑·

И҆ гл҃ѧй съ мно́ю и҆мѧше трость зла́тꙋ, да и҆змѣритъ град̑ и҆ врата̀ е҆го и҆ стѣны е҆го·

И҆ град̑ на четы̀ри ѹ҆глы стои́тъ, долгота е҆го толика е҆сть е҆лика же и҆ широта̀.
і҆ и҆змѣри градъ тростїю на стадїи дванадесѧт̑ тысѧщ̑҇ долгота̀ и҆ широта̀·

І҆ высота́ е҆го ра́вна ес̑҇, и҆ размѣ́ри стѣнꙋ е҆го, во́ сто и҆ четыридесѧт̑ и҆ четы́ре лакти, в мѣрꙋ члчс̑҇кꙋ, ꙗ҆́же ес̑҇ а҆гг҃льскꙋ·

И҆ б̂ѣ созданїе стѣны е҆го, а҆спид̑, и҆ град꙽ ѿ злата чи́ста, подобенъ сткл́ꙋ чи́стꙋ·

И҆ ѻ҆снованїе стѣны градꙋ всѧ́цѣмъ драгым̑ каменїемъ ѹ҆крашено·

ѻ҆снованїе пр́ьвое, и҆а҆списъ.
второ́е, сапфи́ръ.
тре́тїе, хал꙽кидон̑҇.
четве́ртое, змара́гдъ.
пѧтое сардониѯ́̀, шесто́е, сардїѻ҆съ, сед̑мое, хрисолит̑.
ѻ҆смое, вѷрїллосъ.
девѧ́тое, топазїѻ҆нъ.
десѧ́тое, хрисопрасосъ.
а҃і, і҆а҆кѷнѳъ.
в҃і, а҆меѳѷстъ·

и҆ дванадесѧте врат̑, дванадесѧте бисера.
да е҆ді́на каѧ́ждо врата̀ бѣше ѿ е҆ді́ного бисера·

И҆ сто́гны градꙋ зла́то чи́сто, ꙗ҆́ко сткло пресвѣтло.
и҆ цр҃кви не видѣхъ в нем̑·

г҃ь б̂о б҃ъ вседръжитель цр҃кви е҆мꙋ ес̑҇, и҆ а҆гнецъ.
и҆ град̑ не требꙋа слн҃ца и҆ лꙋны̀ да свѣтѧт̑ в немъ, сла́ва б̂о бж҃їѧ просвѣти и҆̀.
и҆ свѣтилникъ е҆мꙋ а҆гнецъ.
ꙗ҆зыцы спа́сени свѣтом̑ е҆го поидꙋтъ, и҆ цр҃и зем꙽стїи принесꙋт꙽ сла́вꙋ и҆ чс̑҇ть свою во́нь, и врата̀ е҆го не и҆мꙋтъ затвори́тисѧ въ дн҃е, но́щи б̂о не бꙋ́детъ т̂ꙋ·

И҆ принест̑ꙋ сла́вꙋ и҆ чс̑҇ть ꙗ҆́зыков̑҇ во́нь, и҆ не и҆́мать вонь внїити всего скврънаго, и҆ творѧѝ мръзость и҆ л꙽ж̀ꙋ, н̂о то́кмо напи́санныѧ въ кни́гах̑ животных̑ а҆гньчи·

Глв̑҇а· к҃в·

И показа м̂и чи́стꙋ рѣкꙋ, воды̀ живо́тныѧ, свѣтлꙋ ꙗ҆́ко криста́лъ, и҆сходѧ́щꙋ ѿ прс̑҇тла бж҃їа и҆ а҆́гньча.
просреди стогны е҆го.
и҆ ѻ҆ба полы рѣкы дре́во животное, и҆же творитъ плод̑ дванадесѧте, на кыиждо мс̑҇ць въздаѧ плод̑ свои·

И҆ ли́ствїе дре́вꙋ въ и҆сцѣленїе ꙗ҆́зы́комъ.
и҆ всѧ́ка а҆наѳе́ма не бꙋдетъ ктомꙋ.
и҆ престолъ бж҃їи и҆ а҆́гнечь бꙋ́детъ в нем꙽.
и҆ рабы̀ е҆го послꙋжатъ е҆мꙋ, и҆ ѹ҆зрѧт̑ лицѐ е҆го, и҆ і҆мѧ е҆го на челѣхъ и҆хъ·

И҆ но́щи не бꙋдетъ тамо, и҆ не потребꙋютъ свѣта ѿ свѣти́лника, ни свѣта слн҃чнаго.
ꙗ҆́ко г҃ь б҃ъ просвѣща́етъ ѧ҆̀, и҆ въцр҃ѧтсѧ въ вѣки вѣкомъ·

И҆ рече м̂и.
с̂и словеса̀ вѣ́рна и҆ і́стинна.
и҆ г҃ь, б҃ъ ст҃ыхъ прро̑҇къ посла̀ а҆гг҃ла свое҆го показа́ти рабом̑ своим̑, и҆мже е҆сть быти вскорѣ·

Се̂ прїидꙋ ско́ро блаженъ съблюдаѧѝ словеса̀ проро́чества книги сеѧ̀·

И҆ а҆́зъ і҆ѻ҆а́нъ видѣхъ сїа и҆ слы́шахъ·

И҆ е҆гда слы́шахъ и҆ видѣхъ, падохъ поклони́тисѧ на́ ногꙋ а҆́гг҃лꙋ показꙋ́ющемꙋ м̂и с̂е, и҆ гл҃а м̂и, ви́ждь, н̂и, клевретъ твои ѹ҆бо е҆смь, и҆ братїѧ твоеѧ прро̑҇къ, и҆ съблюда́ющихъ словеса книги сеѧ̀, б҃ꙋ поклони́сѧ·

И҆ гл҃а м̂и, не запечатлѣй словесъ пророчествїа книги сеѧ, ꙗ҆́ко времѧ близ̑ е҆сть·

ѻ҆бидѧѝ, да ѻ҆бидит̑ е҆щѐ.
и҆ скве́рныи, да скве́рнитсѧ е҆щѐ, и҆ пра́ведныи, пра́вдꙋ да творит̑ е҆щѐ·

И҆ ст҃ыи, да ст҃и́тсѧ е҆щѐ.
и҆ с̂е грѧдꙋ ско́ро, и҆ мзда моѧ̀ съ мно́ю, въздати комꙋж́до по дѣ́ломъ е҆го·

А҆зъ е҆смь, а҆лфа и҆ ѡ.
нача́ток̑҇ и҆ конецъ первыи и҆ послѣднїи·

Блаже́ни творѧ́щеѝ за́повѣди е҆го, да бꙋ́дет꙽ ѻ҆́бласть и҆мъ на́ древо животное, и҆ враты̀ вни́дꙋтъ въ градъ·

Внѣ же ѱы҆ и҆ чародѣ́е, и҆ любодѣ́и, и҆ ѹ҆бїица, и҆ і҆долослꙋжители, и҆ всѧкъ любѧѝ и҆ творѧѝ лж̀ꙋ·

А҆́зъ і҆с҃ послах̑ а҆гг҃ла мое҆го засвѣдѣтельствовати вамъ сїа̀ въ цр҃квахъ·

А҆зъ е҆смь ко́рень и҆ родъ двд̑въ·

И҆ звѣзда ѹ҆́тренѧѧ и҆ денни́ца.
и҆ дх҃ъ и҆ невѣ́ста гл҃ѧѝ, прїидѝ.
и҆ слы́шаѝ да гл҃ет̑, прїидѝ.
и҆ жаждаѝ да прїидетъ, и҆ хотѧѝ да прїиметъ во́дꙋ животнꙋю тꙋне.
свѣдѣтельствꙋю б̂о всѧкомꙋ слы́шащемꙋ словеса̀ прро̑҇чества кни́ги сеѧ̀.
а҆ще кт̂о приложитъ на нихъ, наложитъ б҃ъ на него ꙗ҆́звъ напи́саных̑ въ книзѣ се́й.
и҆ а҆ще кт̂о ѿи́метъ словесъ сꙋщихъ прро̑҇чествїа въ кни́зе се́й, ѿи́метъ б҃ъ часть е҆го ѿ кни́ги живо́тныѧ, и҆ ѿ града ст҃го, ꙗ҆же напи́сана въ кни́зѣ се́й·

Гл҃етъ свѣдѣтельствꙋѧѝ сїѧ̀, е́й прїидꙋ ско́ро·

А҆ми́нь е́й грѧди г҃и і҆с҃е.
бл҃годать г҃а на́шего і҆с҃ х҃а съ всѣми ва́ми.
а҆ми́нь·

Конецъ а҆покали́ѱисꙋ ст҃аго і҆ѻа́нна бг҃осло́ва.

И́мать в себѣ, глв̑҇а, к҃в·