Ча́съ шесты́й

Пріиди́те, поклони́мся:
Покло́ны трѝ.

Бж҃е, во и́мя твоѐ сп҃си́ мя, и въ си́лѣ твое́й суди́ ми: бж҃е, услы́ши мл҃тву мою̀, внушѝ глаго́лы у́стъ мои́хъ.
Я́кѡ чу́ждіи воста́ша на мя̀, и крѣ́пцыи взыска́ша ду́шу мою̀, и не предложи́ша бг҃а предъ̑ собо́ю.
Се́ бо бг҃ъ помога́етъ мѝ, и гдс̑ь засту́пникъ душѝ мое́й.
Ѿврати́тъ ѕла̂я врагѡ́мъ мои̂мъ, и́стиною твое́ю потребѝ ѝхъ.
Во́лею пожру̀ тебѣ̀, исповѣ́мся и́мени твоему̀ гдс̑и, я́кѡ бл҃го.
Я́кѡ ѿ вся́кія печа́ли изба́вилъ мя̀ єсѝ, и на врагѝ моя̂ воззрѣ̀ ѻ́ко моѐ.

Внушѝ бж҃е мл҃тву мою̀, и не пре́зри моле́нія моегѡ̀.
Вонми́ ми, и услы́ши мя̀: возскорбѣ́хъ печа́лію мое́ю, и смято́хся ѿ гла́са вра́жія и ѿ стуже́нія грѣ́шнича.
Я́кѡ уклони́ша на мя̀ беззако́ніе, и во гнѣ́вѣ враждова́ху мѝ.
Се́рдце моѐ смяте́ся во мнѣ̀, и боя́знь сме́рти нападѐ на мя̀.
Стра́хъ и тре́петъ пріи́де на мя̀, и покры́ мя тьма̀.
И рѣ́хъ: кто̀ да́стъ мѝ крилѣ̀ я́кѡ голуби́нѣ, и полещу̀ и почі́ю;
Сѐ удали́хся бѣ́гая, и водвори́хся въ пусты́ни.
Ча́яхъ бг҃а, сп҃са́ющагѡ мя̀ ѿ малоду́шія и ѿ бу́ри.
Потопѝ гдс̑и, и раздѣлѝ язы́ки и́хъ, я́кѡ ви́дѣхъ беззако́ніе, и прерѣка́ніе во гра́дѣ.
Дне́мъ и но́щію ѡбы́детъ ѝ по стѣна́мъ єгѡ̀: беззако́ніе и тру́дъ посредѣ̀ єгѡ̀, и непра́вда: и не ѡскудѣ̀ ѿ сто́гнъ єгѡ̀ ли́хва и ле́сть.
Я́кѡ а́ще бы вра́гъ поноси́лъ мѝ, претерпѣ́лъ бы́хъ у̀бо: и а́ще бы ненави́дяй мя̀ на мя̀ велерѣ́чевалъ, укры́лъ бы́хъ ся ѿ негѡ̀.
Ты́ же человѣ́че равноду́шне, влады́ко мо́й, и зна́емый мо́й:
И́же ку́пнѡ наслажда́лся єсѝ со мно́ю бра́шенъ, въ дому̀ бж҃іи ходи́хомъ єдиномышле́ніемъ.
Да пріи́детъ же сме́рть на тя̀, и да сни́дутъ во а́дъ жи́ви: я́кѡ лука́вство въ жили́щахъ и́хъ, посредѣ̀ ѝхъ:
А́зъ къ бг҃у воззва́хъ, и гдс̑ь услы́ша мя̀.
Ве́черъ и зау́тра и полу́дне повѣ́мъ, и возвѣщу̀, и услы́шитъ гла́съ мо́й.
Изба́витъ ми́ромъ ду́шу мою̀ ѿ приближа́ющихся мнѣ̀: я́кѡ во мно́зѣ бя́ху со мно́ю.
Услы́шитъ бг҃ъ, и смири́тъ я̀, сы́й пре́жде вѣ̂къ: нѣ́сть бо ѝмъ измѣне́нія, я́кѡ не убоя́шася бг҃а.
Прострѐ ру́ку свою̀ на воздая́ніе, ѡскверни́ша завѣ́тъ єгѡ̀.
Раздѣли́шася ѿ гнѣ́ва лица̀ єгѡ̀, и прибли́жишася сердца̀ и́хъ: умя́кнуша словеса̀ и́хъ па́че єле́а, и та̂ су́ть стрѣ́лы.
Возве́рзи на гдс̑а печа́ль твою̀, и то́й тя̀ препита́етъ, не да́стъ въ вѣ́къ молвы̀ пра́веднику.
Ты́ же бж҃е, низведе́ши я̀ въ студене́цъ истлѣ́нія.
Му́жіе крове́й и льстѝ не преполовя́тъ дне́й свои́хъ: а́зъ же гдс̑и упова́ю на тя̀.

Живы́й въ по́мощи вы́шнягѡ, въ кро́вѣ бг҃а нбс̑нагѡ водвори́тся.
Рече́тъ гдс̑еви: засту́пникъ мо́й єсѝ, и прибѣ́жище моѐ, бг҃ъ мо́й, и упова́ю на него̀.
Я́кѡ то́й изба́витъ тя̀ ѿ сѣ́ти ло́вчи, и ѿ словесѐ мяте́жна.
Плещма̀ свои́ма ѡсѣни́тъ тя̀, и подъ̑ крилѣ̀ єгѡ̀ надѣ́ешися.
Ѻру́жіемъ ѡбы́детъ тя̀ и́стина єгѡ̀, не убои́шися ѿ стра́ха нощна́гѡ, ѿ стрѣлы̀ летя́щія во днѝ, ѿ ве́щи во тьмѣ̀ преходя́щія, ѿ сря́ща и бѣ́са полу́деннагѡ.
Паде́тъ ѿ страны̀ твоея̀ ты́сяща, и тьма̀ ѡдесну́ю тебѐ, къ тебѣ́ же не прибли́жится.
Ѻба́че ѻчи́ма твои́ма смо́триши, и воздая́ніе грѣ́шникѡвъ у́зриши.
Я́кѡ ты̀ гдс̑и, упова́ніе моѐ, вы́шняго положи́лъ єсѝ прибѣ́жище твоѐ.
Не пріи́детъ къ тебѣ̀ ѕло̀, и ра́на не прибли́жится тѣлесѝ твоему̀.
Я́кѡ а́гг҃лѡмъ свои̂мъ заповѣ́сть ѡ тебѣ̀, сохрани́ти тя̀ во всѣ́хъ путе́хъ твои́хъ.
На рука́хъ во́змутъ тя̀, да не когда̀ преткне́ши ѡ ка́мень но́гу твою̀.
На а́спіда и васілі́ска насту́пиши, и попере́ши льва̀ и ѕмі́я.
Я́кѡ на мя̀ упова̀, и изба́влю ѝ: покры́ю ѝ, я́кѡ позна̀ и́мя моѐ:
Воззове́тъ ко мнѣ̀, и услы́шу єго̀: съ ни́мъ є́смь въ ско́рби, изму̀ єго̀: и просла́влю єго̀:
Долгото́ю дне́й испо́лню єго̀, и явлю̀ єму̀ сп҃се́ніе моѐ.

Сла́ва, и ны́нѣ:

Аллилу́іа, аллилу́іа, аллилу́іа, сла́ва тебѣ̀ бж҃е.
Три́жды.

Гдс̑и поми́луй, три́жды.

И а́ще пое́тся, Бг҃ъ гдс̑ь, глаго́лемъ:
Сла́ва, тропа́рь днѐ.
А́ще же аллилу́іа, глаго́лемъ настоя́щій тропа́рь, во гла́съ в҃:

И́же въ шесты́й де́нь же и ча́съ, на крс̑тѣ̀ пригвожде́й въ раѝ дерзнове́нный ада́мовъ грѣ́хъ, и согрѣше́ній на́шихъ рукописа́ніе раздерѝ хрс̑тѐ бж҃е, и сп҃сѝ на́съ.

Сті́хъ а҃:
Внушѝ бж҃е, мл҃тву мою̀, и не пре́зри моле́нія моегѡ̀.

Сті́хъ в҃:
А́зъ къ бг҃у воззва́хъ и гдс̑ь услы́ша мя̀.

Сла́ва, и ны́нѣ, бг҃оро́диченъ:

Я́кѡ не и́мамы дерзнове́нія за премнѡ́гія грѣхѝ на́шя, ты̀ и́же ѿ тебѐ ро́ждшагося молѝ бцд̑е дв҃о: мно́гѡ бо мо́жетъ моле́ніе мт҃рнее ко бл҃госе́рдію влд̑ки.
не пре́зри грѣ́шныхъ мольбы̂ всечс̑тая, я́кѡ млс̑тивъ є́сть, и сп҃стѝ могі́й, и́же и страда́ти ѡ на́съ изво́ливый.

Ско́рѡ да предваря́тъ ны̀ щедрѡ́ты твоя̂ гдс̑и, я́кѡ ѡбнища́хомъ ѕѣлѡ̀: помозѝ на́мъ бж҃е сп҃се на́шъ, сла́вы ра́ди и́мене твоегѡ̀ гдс̑и, изба́ви на́съ, и ѡчи́сти грѣхѝ на́шя, и́мене ра́ди твоегѡ̀.

Трист҃о́е.
По Ѻ́ч҃е на́шъ:

Конда́къ днѐ ст҃а́гѡ.
А́ще по́стъ, глаго́лемъ тропарѝ сія̂, во гла́съ в҃:

Сп҃се́ніе содѣ́лалъ єсѝ посредѣ̀ землѝ хрс̑тѐ бж҃е, на крс̑тѣ̀ пречи́стѣи ру́цѣ твоѝ просте́рлъ єсѝ, собира́я вся̂ язы́ки зову́щыя: гдс̑и, сла́ва тебѣ̀.

Сла́ва:

Пречи́стому ѡ́бразу твоему̀ покланя́емся бл҃гі́й, прося́ще проще́нія прегрѣше́ній на́шихъ, хрс̑тѐ бж҃е: во́лею бо бл҃говоли́лъ єсѝ пло́тію взы́ти на крс̑тъ, да изба́виши, я̀же созда́лъ єсѝ, ѿ рабо́ты вра́жія.
тѣ́мъ бл҃года́рственнѡ вопіе́мъ тѝ: ра́дости испо́лнилъ єсѝ вся̂, сп҃се на́шъ, прише́дый сп҃стѝ мі́ръ.

И ны́нѣ:

Млс̑рдія су́щи исто́чникъ, млс̑ти сподо́би на́съ бцд̑е, при́зри на лю́ди согрѣши́вшыя, явѝ я́кѡ при́снѡ си́лу твою̀: на тя́ бо упова́юще, ра́дуйся, вопіе́мъ тѝ, я́коже иногда̀ гавріи́лъ, безпло́тныхъ архістрати́гъ.

Се́й глаго́лется въ понедѣ́льникъ, во вто́рникъ и четверто́къ.
Послѣ́дующій же глаго́лется въ сре́ду и пято́къ, вмѣ́стѡ:
Млс̑рдія су́щи:

Гла́съ в҃, крс̑тобг҃оро́диченъ:

Препросла́влена єсѝ бцд̑е дв҃о, пое́мъ тя̀: крс̑то́мъ бо сн҃а твоегѡ̀ низложи́ся а́дъ, и сме́рть умертви́ся, умерщвле́нніи воста́хомъ, и живота̀ сподо́бихомся, ра́й воспрія́хомъ дре́внее наслажде́ніе.
тѣ́мъ бл҃годаря́ще, славосло́вимъ я́кѡ держа́внаго хрс̑та̀ бг҃а на́шего, и єди́наго многомлс̑тиваго.

Гдс̑и поми́луй, м҃.

Мл҃тва:
И́же на вся́кое вре́мя:

Посе́мъ:
Гдс̑и поми́луй, три́жды.

Сла́ва, и ны́нѣ:

Чс̑тнѣ́йшую херуві̂мъ:

И́менемъ гдс̑нимъ бл҃гословѝ, ѻ́тче.

Сщ҃е́нникъ:
Мл҃твами ст҃ы́хъ ѻтє́цъ на́шихъ, гдс̑и іи҃се хрс̑тѐ бж҃е на́шъ, поми́луй на́съ.

И покло́ны, я́кѡ рече́ся, а́ще є́сть по́стъ.
Та́же мл҃тва ст҃а́гѡ вели́кагѡ васі́ліа:

Бж҃е и гдс̑и си́лъ, и всея̀ тва́ри содѣ́телю, и́же за млс̑рдіе безприкла́дныя млс̑ти твоея̀, єдиноро́днаго сн҃а твоего̀, гдс̑а на́шего іи҃са хрс̑та̀, низпосла́вый на сп҃се́ніе ро́да на́шегѡ, и чс̑тны́мъ єгѡ̀ крс̑то́мъ рукописа́ніе грѣ̂хъ на́шихъ растерза́вый, и побѣди́вый тѣ́мъ нача̂ла и вла̂сти тьмы̀: са́мъ влд̑ко чл҃вѣколю́бче, пріимѝ и на́съ грѣ́шныхъ бл҃года́рствєнныя сія̂ и молє́бныя мл҃твы, и изба́ви на́съ ѿ вся́кагѡ всегуби́тельнагѡ и мра́чнагѡ прегрѣше́нія, и всѣ́хъ ѡѕло́бити на́съ и́щущихъ, ви́димыхъ и неви́димыхъ вра̂гъ.
пригвоздѝ стра́ху твоему̀ плѡ́ти на́шя, и не уклонѝ серде́цъ на́шихъ въ словеса̀ илѝ помышлє́нія лука́вствія: но любо́вію твое́ю уязвѝ ду́шы на́шя, да къ тебѣ̀ всегда̀ взира́юще, и є́же ѿ тебѐ свѣ́томъ наставля́еми, тебѐ непристу́пнаго и присносу́щнаго зря́ще свѣ́та, непреста́нное тебѣ̀ исповѣ́даніе и бл҃годаре́ніе возсыла́емъ, безнача́льному ѻц҃у̀ со єдиноро́днымъ твои́мъ сн҃омъ, и всест҃ы́мъ, и бл҃ги́мъ, и животворя́щимъ твои́мъ дх҃омъ, ны́нѣ и при́снѡ, и во вѣ́ки вѣкѡ́въ, ами́нь.

И а́ще у́бѡ Бг҃ъ гдс̑ь пѣ́то є́сть, изъ̑ѡбрази́тєльная глаго́лемъ здѣ̀.
А́ще же аллилу́іа, глаго́ли я̀ по девя́томъ часѣ̀, а девя́тый ча́съ по шесто́мъ начина́ется си́це:

Ст҃ы́й бж҃е:
По Ѻ́ч҃е на́шъ:
Гдс̑и поми́луй, в҃і.

Сла́ва, и ны́нѣ:
Пріиди́те, поклони́мся: три́жды.

И ѱалмы̀, и прѡ́чая.

Вѣ́домо бу́ди, я́кѡ во ст҃ѣ́й горѣ̀ аѳѡ́нской, и въ про́чихъ монастырѣ́хъ, въ часѣ́хъ глаго́лютъ всегда̀ вмѣ́стѡ кондака̀ предпи̂санныя тропарѝ на ряду̀, си́рѣчь:
Бл҃гослове́нъ єсѝ, хрс̑тѐ бж҃е на́шъ: и прѡ́чая.

А конда́къ глаго́лютъ то́кмѡ на изъ̑ѡбрази́тельныхъ, кромѣ̀ влд̑чнихъ пра́здникѡвъ и ст҃ы́хъ, єгда̀ пѣ́тъ полѷеле́й и вели́кое славосло́віе: тогда́ бо глаго́лется вездѣ̀ конда́къ.