^{[глв̑а к҃д]} Ѡ вжига́ніи свѣ́щъ, ка́кѡ подоба́етъ въ цр҃кви вжига́ти, въ недѣ́лю, и на пра́здники хрс̑тѡ́вы, и бцд̑ы, и ст҃ы́хъ, и про́чыя дни̂.

На ма́лѣй вече́рни, по бл҃гослове́ніи іере́евѣ, до́лжно є́сть вжига́ти свѣщу̀ предъ̑ ѡ́бразомъ сп҃са хрс̑та̀, и єгѡ́же є́сть хра́мъ на деснѣ́й странѣ̀, и предъ̑ ѡ́бразомъ прест҃ы́я бцд̑ы на лѣ́вой странѣ̀, и предъ̑ анало́гіемъ: угаша́ти же си́хъ на ѿпу́стѣ вече́рнѣмъ.
На вели́цѣй же вече́рни, пре́жде кажде́нія іере́ева, до́лжно є́сть вжига́ти свѣщы̀ я́коже указа́ся на ма́лѣй вече́рни, и предъ̑ влд̑чнимъ ѡ́бразомъ въ тя́блѣ, а́ще и́мать ст҃ы́й бдѣ́ніе.
И по а҃-мъ антіфѡ́нѣ каѳі́смы, въ нача́лѣ Гдс̑и воззва́хъ, вжига́ти и про́чыя свѣщы̀: угаша́ти же на коне́чномъ трист҃о́мъ.
На у́трени, на Бг҃ъ гдс̑ь, подоба́етъ вжига́ти свѣщы̀, я́коже пре́жде изъ̑яви́ся.
Въ нача́лѣ же полѷеле́а подоба́етъ вжига́ти вся̂ свѣщы̀, и ѡставля́ти я̀ горѣ́ти до сконча́нія г҃ пѣ́сни, и тогда̀ па́ки погаша́ти я̀.
И на и҃ пѣ́сни вжига́емъ па́ки вся̂, и ѡставля́емъ я̀ горѣ́ти до конца̀ вели́кагѡ славосло́вія.
На літургі́и, пре́жде нача́ла літургі́и, во ѻлтарѣ̀ вжига́ти свѣщу̀ на же́ртвенницѣ.
И єгда̀ іере́й ѡблачи́тся въ ри̂зы, и приспѣ́вшу вре́мени зво́на, пре́жде вжига́ти свѣщу̀ на прс̑то́лѣ, та́же въ цр҃кви, я́коже предрече́ся.
Въ нача́лѣ же ст҃а́гѡ єѵг̑ліа, вжига́ти вся̂ свѣщы̀, и ѡставля́ти я̀ горѣ́ти до заамвѡ́нныя мл҃твы.