^{[глв̑а л҃в]} Ѿ пра́вилъ ст҃ы́хъ апс̑лъ, и ст҃ы́хъ ѻтє́цъ, ѡ ст҃ѣ́й вели́цѣй четыредеся́тницѣ, я̀же до́лженъ вся́кій хрс̑тіа́нинъ ѻпа́снѡ храни́ти.

Во ст҃у́ю и вели́кую четыредеся́тницу, а҃-я недѣ́ли пе́рвый де́нь, сі́есть въ понедѣ́льникъ, ѿню́дъ я́сти не подоба́етъ, та́кожде и во вторы́й.
Въ сре́ду же по соверше́ніи преждесщ҃е́нныхъ, трапе́за поставля́ется, и яди́мъ хлѣ́бъ те́плъ, и ѿ снѣ́дей ѻво́щныхъ те́плыхъ, дае́тся же и укро́пъ съ ме́домъ.
Не могу́щіи же сохрани́ти дву̀ дне́й пе́рвыхъ, ядя́тъ хлѣ́бъ, и ква́съ по вече́рни, во вто́рникъ:
Подо́бнѣ же и ста́ріи творя́тъ.
Въ суббѡ̂ты же и недѣ̂ли разрѣша́емъ на єле́й то́чію, и віно̀.
Въ про́чихъ же седми́цахъ пости́мся, до ве́чера є҃ дне́й, и яди́мъ сухояде́ніе, кромѣ̀ суббѡ́тъ и недѣ́ль: ры́бы же во всю̀ ст҃у́ю четыредеся́тницу ника́коже де́рзнемъ я́сти, кромѣ̀ пра́здника бл҃говѣ́щенія прест҃ы́я бцд̑ы, и недѣ́ли цвѣтоно́сныя.
Въ пято́къ а҃-я недѣ́ли, и въ сре́ду вели́кагѡ канѡ́на, и въ вели́кій четверто́къ, а́ще нѣ́цыи уста́вы и повелѣва́ютъ на єле́й разрѣша́ти, но не твори́тся за че́стность дне́й.
Въ на́вечеріе же пра́здника бл҃говѣ́щенія, пре́жде суббѡ́ты ст҃а́гѡ првд̑нагѡ ла́заря, разрѣша́емъ на єле́й и віно̀.
И а́ще мона́хъ ст҃у́ю четыредеся́тницу свои́мъ ла́комствомъ разори́тъ, є́же я́сти ры́бу, кромѣ̀ пра́здника бл҃говѣ́щенія, и недѣ́ли цвѣтоно́сныя, то̀ не причасти́тся ст҃ы́хъ та̂инъ и на ст҃у́ю па́сху: по друзі́и двѣ̀ недѣ̂ли пока́ется, а покло́нѡвъ на де́нь, и на но́щь т҃.

Ѡ причаще́ніи хрс̑то́выхъ та̂инъ.

Єгда̀ хо́щетъ кто̀ причасти́тися ст҃ы́хъ хрс̑то́выхъ та̂инъ, подоба́етъ єму̀ сохрани́ти всю̀ седми́цу, ѿ понедѣ́льника пребы́ти въ постѣ̀, и мл҃твѣ, и тре́звости соверше́нной всеконе́чнѡ, и тогда̀ со стра́хомъ, и ве́ліимъ бл҃гоговѣ́инствомъ пріи́метъ пречс̑тыя та̂йны.

Ѡ помыва́ніи у́стъ бра́тій, причаща́ющихся пречс̑тыхъ хрс̑то́выхъ та̂инъ.

Потре́бно є́сть и сіѐ вѣ́дати, ѡ помыва́ніи въ хра́мѣ причаща́ющихся бра́тій, я́коже рече́ся:
Досто́итъ помыва́ти уста̀ въ служе́бномъ: си́це бо бж҃е́ственный златоу́стъ повелѣ̀, вины̀ ра́ди плюнове́нія.
Быва́етъ же си́це:
По прія́тіи ст҃ы́хъ та̂инъ є́млетъ бра́тъ анті́дѡръ, и потреби́въ ѝ, и пріе́млетъ теплоты̀ [ѡста́вльшія влива́емыя въ бж҃е́ственную ча́шу] во уста̀ ма́лѡ, и пласка́въ поглота́етъ, и уста̀ помыва́етъ ма́лѡ, и ѡтира́етъ пла́томъ чи́стымъ на сіѐ устро́еннымъ надъ̑ сосу́домъ.

Во ст҃у́ю и вели́кую недѣ́лю па́схи, и во всю̀ свѣ́тлую недѣ́лю разрѣша́емъ: мона́си на сы́ръ и я́ица и ры́бы, мірсті́и же на вся̂.

Ѿ но́выя же недѣ́ли понедѣ́льника, по є́же пѣ́ти г҃-й ча́съ, и ѕ҃-й, въ чи́ну и́хъ съ междоча́сіи, къ си̂мъ же и ѻбѣ́дницу: дае́тся бл҃гослове́ніе бра́тіи, въ понедѣ́льникъ, сре́ду и пято́къ, во всю̀ пятьдеся́тницу.
Бл҃гослове́ніе же мѣ́рити подоба́етъ, двѣ̀ ѻ́нгіи чи́сты паѯима́ды сухарѝ, и то̀ снѣда́ти то́чію подоба́етъ, и по ѿпѣ́тіи ѳ҃-гѡ часа̀ соверше́ннѣ я́сти.
Подо́бнѣ и въ на́вечеріи ржс̑тва̀ и бг҃оявле́нія гдс̑ня, а́ще случи́тся въ суббѡ́ту, и недѣ́лю.
Въ недѣ́лю же соше́ствія ст҃а́гѡ дх҃а, быва́етъ колѣнопреклоне́ніе на вече́рни, и недѣ́ля та́я разрѣ́шена я́сти ры́бы, сы́ръ, и я́ица, и млеко̀: а міря́нѡмъ мя́со, до недѣ́ли всѣ́хъ ст҃ы́хъ.