^{[глв̑а є҃і]}
Мл҃тва ѡ копа́ніи кла́дязя.

Гдс̑и бж҃е на́шъ вседержи́телю, и всеси́льне, творя́й вся̂ и претворя́яй, то́чію є́же хотѣ́ти: и́же въ непрохо́дныхъ прохо́дъ ѡбрѣта́яй неизрече́нною и непостижи́мою му́дростію: и́же ѿ суха́гѡ ка́мене вѡ́днымъ пода́вый тещѝ пото́кѡмъ, и жа́ждущыя лю́ди твоя̂ насы́тивый: са́мъ и ны́нѣ влд̑ко всѣ́хъ, услы́ши моле́ніе на́съ недосто́йныхъ рабѡ́въ твои́хъ, и да́руй на́мъ во́ду на се́мъ мѣ́стѣ, сла́дкую же и вку́сну, дово́льну у́бѡ къ потре́бѣ невреди́тельную же ко прія́тію: я́кѡ да и въ се́мъ сла́вимъ прест҃о́е и великолѣ́пое и́мя твоѐ, ѻц҃а̀, и сн҃а, и ст҃а́гѡ дх҃а, ны́нѣ и при́снѡ, и во вѣ́ки вѣкѡ́въ, ами́нь.

^{[глв̑а ѕ҃і]}
Мл҃тва надъ̑ кла́дяземъ но́вымъ.

Зижди́телю во́дъ, и содѣ́телю всѣ́хъ, гдс̑и бж҃е вседержи́телю, вся̂ сотвори́вый и претворя́яй, ты̀ са́мъ ѡст҃ѝ во́ду сію̀: послѝ на ню̀ ст҃у́ю твою̀ си́лу, на вся́ку сопроти́вну дѣ́тель, и да́ждь всѣ̂мъ пріе́млющымъ ѿ нея̀, питія̀ ра́ди, илѝ умове́нія ра́ди, здра́віе душѝ и тѣ́лу, на измѣне́ніе вся́кія стра́сти, и вся́кагѡ неду́га: я́кѡ да бу́детъ исцѣле́нія вода̀ и поко́я, всѣ̂мъ прикаса́ющымся къ не́й, и пріе́млющымъ ю̀.

Я́кѡ тебѣ̀ подоба́етъ вся́кая сла́ва, че́сть и поклоне́ніе, ѻц҃у̀, и сн҃у, и ст҃о́му дх҃у, ны́нѣ и при́снѡ, и во вѣ́ки вѣкѡ́въ, ами́нь.

^{[глв̑а з҃і]}
Чи́нъ быва́емый, а́ще случи́тся чесому̀ скве́рному якову́любо впа́сти въ кла́дязь водны́й.

Подоба́етъ пе́рвѣе вы́черпати изъ̑ кла́дязя ка́дей м҃, и излія́ти во́нъ.
Та́же возже́гъ сщ҃е́нникъ свѣщы̀, и взе́мъ кади́льницу, кади́тъ ѻ́крестъ кла́дязя.
Та́же влага́етъ во́ду ст҃ы́хъ бг҃оявле́ній крс̑тови́днѡ, три́жды.

И та́кѡ ста́въ къ восто́ку, мо́лится глаго́ля:

Гдс̑у помо́лимся.

Гдс̑и бж҃е си́лъ, вся̂ добра̂ ѕѣлѡ̀ сотвори́вый, ѡчища́яй и́менемъ твои́мъ вся́кую скве́рну и нечистоту̀, и претвори́вый ѡсщ҃а́яй вся̂: са́мъ и ны́нѣ влд̑ко, пріидѝ въ настоя́щій ча́съ ѡ́бразомъ крс̑та̀ твоегѡ̀, и ѡчи́сти кла́дязь се́й ѿ ѡбрѣ́тшіяся єму̀ нечистоты̀, и ѿ впа́дшагѡ во́нь скве́рнагѡ, илѝ га́да, снизходя̀ несоверше́ннѣй мы́сли на́шей, и не́мощи помышле́ній, и да не ѡсу́диши на́съ до́брыхъ ѕѣлѡ̀ не вмѣща́ющыя: но ѡчи́сти на́съ ѿ вся́кія скве́рны пло́ти и ду́ха: и ѡст҃ѝ во́ду сію̀ дх҃омъ твои́мъ ст҃ы́мъ.

Я́кѡ ты̀ єсѝ ѡсщ҃е́ніе на́ше, и тебѣ̀ сла́ву возсыла́емъ, ѻц҃у̀, и сн҃у, и ст҃о́му дх҃у, ны́нѣ и при́снѡ, и во вѣ́ки вѣкѡ́въ, ами́нь.

Гдс̑у помо́лимся.
Гдс̑и поми́луй.

Бж҃е вели́кій и ди́вный, неисповѣди́мою твое́ю бл҃гостію, и бога́тымъ про́мысломъ стро́яй человѣ́ческій живо́тъ, и мірска̂я на́мъ дарова́вый бл҃га̂я твоя̂: и́же го́рькую во́ду при мѡѷсе́и лю́демъ въ сла́дость претвори́вый, и врє́дныя во́ды при єліссе́и со́лію исцѣли́вый: и́же апс̑лу твоему̀ петру̀ видѣ́ніемъ законоположи́вый, ничто́же мнѣ́ти скве́рно, илѝ нечи́сто: са́мъ чл҃вѣколю́бче, ѡчи́сти во́ду сію̀ знаменова́ніемъ ѡ́браза крс̑та̀ твоегѡ̀ ѿ вся́кія скве́рны, и ѡст҃ѝ ю̀ дх҃омъ твои́мъ ст҃ы́мъ, во є́же бы́ти є́й чи́стѣй причаща́ющымся изъ̑ нея̀.

Я́кѡ ты̀ єсѝ бг҃ъ на́шъ, бл҃гословля́яй и ѡсщ҃а́яй вся́чєская, и тебѣ̀ сла́ву возсыла́емъ, ѻц҃у̀ и сн҃у, и ст҃о́му дх҃у, ны́нѣ и при́снѡ, и во вѣ́ки вѣкѡ́въ, ами́нь.

И ѿпу́стъ.