^{[глв̑а м҃ѕ]}
Бл҃гослове́ніе крс̑та̀ къ ноше́нію на пе́рсехъ.

Полага́емь быва́етъ сицевы́й крс̑тъ на бж҃е́ственной трапе́зѣ, и по соверше́ніи бж҃е́ственныя літургі́и, илѝ у́трени, илѝ часѡ́въ, илѝ вече́рни, пре́жде ѿпу́ста чте́тъ іере́й:
Цр҃ю̀ нбс̑ный:
Трист҃о́е.
Ѻ́ч҃е на́шъ:
И тропарѝ сія̂:
Сп҃сѝ гдс̑и лю́ди твоя̂:
Сла́ва:
Вознесы́йся на крс̑тъ во́лею:
И ны́нѣ:
Предста́тельство хрс̑тіа́нъ:

И по си́хъ ре́къ, Гдс̑у помо́лимся.

Ли́къ:
Гдс̑и поми́луй.

Іере́й чте́тъ мл҃тву сію̀:

Гдс̑и іи҃се хрс̑тѐ бж҃е на́шъ, на дре́вѣ крс̑тномъ во́лею сп҃се́нія на́шегѡ ра́ди пригвозди́тися восхотѣ́вый, и пречс̑тно́ю свое́ю кро́вію сіѐ ѡст҃и́ти изво́ливый, и крс̑то́мъ свои́мъ ѿ рабо́ты вра́жія мі́ръ искупи́вый, и дре́внее рукописа́ніе врага̀ на́шегѡ діа́вола крс̑то́мъ растерза́вый, и ро́дъ человѣ́ческій ѿ мучи́тельства єгѡ̀ тѣ́мъ свободи́вый, тебѐ смире́ннѡ мо́лимъ:
при́зри млс̑тивнѡ на зна́меніе сіѐ крс̑тное, и низпослѝ бж҃е́ственное твоѐ бл҃гослове́ніе и бл҃года́ть, и пода́ждь єму̀ си́лу и крѣ́пость, я́кѡ да вся́къ, и́же въ воспомина́ніе.
сп҃си́тельныхъ твои́хъ стрс̑те́й, и животво́рныя твоея̀ сме́рти, и въ сохране́ніе и въ защище́ніе душѝ и тѣ́ла на себѣ̀ носи́ти бу́детъ, нбс̑ное бл҃гослове́ніе и по́мощь въ не́мъ прія́ти сподо́бится.
И я́коже же́злъ аарѡ́новъ, къ ѿраже́нію сопроти́вныхъ невѣ́рствія, и испражне́нію волше́бныхъ мечта́ній бл҃гослови́лъ єсѝ:
си́це и сіѐ зна́меніе крс̑тное бл҃гословѝ, и сопроти́въ всѣ̂мъ ко́знемъ діа̂вольскимъ твоегѡ̀ заступле́нія по́мощь въ нѐ вле́й, я́кѡ да вся́кому на себѣ̀ нося́щему є̀, защище́ніе и соблюде́ніе ѿ вся́кагѡ ѕла̀ душѝ и тѣ́ла сп҃си́тельное, и въ умноже́ніе въ не́мъ дх҃о́вныхъ твои́хъ дарова́ній, и хрс̑тіа́нскихъ добродѣ́телей твое́ю бл҃года́тію бу́детъ.
Ты́ бо єсѝ бл҃гословля́яй и ѡсщ҃а́яй вся́чєская, хрс̑тѐ бж҃е на́шъ, и тебѣ̀ сла́ву, бл҃годаре́ніе и поклоне́ніе возсыла́емъ, со безнача́льнымъ твои́мъ ѻц҃е́мъ, и прест҃ы́мъ, и бл҃ги́мъ, и животворя́щимъ твои́мъ дх҃омъ, ны́нѣ и при́снѡ, и во вѣ́ки вѣкѡ́въ.

Ли́къ:
Ами́нь.

Іере́й:
Ми́ръ всѣ̂мъ.

Ли́къ:
И ду́хови твоему̀.

Діа́конъ:
Главы̂ ва́шя гдс̑еви приклони́те.

Ли́къ:
Тебѣ̀ гдс̑и.

Іере́й же, прекло́нь главу̀, чте́тъ та́йнѡ мл҃тву сію̀:

Гдс̑и іи҃се хрс̑тѐ бж҃е на́шъ, въ высо́кихъ живы́й, и на смирє́нныя призира́яй, твоѝ рабѝ недосто́йніи своя̂ тебѣ̀ приклони́хомъ вы̂я се́рдца на́шегѡ и тѣлесѐ, и смире́ннѡ мо́лимъ тя̀, послѝ нбс̑ное твоѐ бл҃гослове́ніе на зна́меніе сіѐ крс̑тное, и въ ѡкропле́ніи сщ҃е́нныя воды̀ испо́лни є̀ твоея̀ си́лы и крѣ́пости, къ прогна́нію и разоре́нію вся́кія діа́вольскія ко́зни:
вся́кому же нося́щему на себѣ̀ сіѐ, вѣ́рному рабу̀ твоему̀, да́ждь бы́ти защище́ніе душѝ и тѣ́ла, ѿ лица̀ вра̂гъ ви́димыхъ и неви́димыхъ и ѿ вся́кагѡ ѕла̀, и въ умноже́ніе твоея̀ бл҃года́ти.
Ты́ бо єсѝ ѡсщ҃е́ніе на́ше хрс̑тѐ бж҃е на́шъ, и тебѣ̀ сла́ву возсыла́емъ со безнача́льнымъ твои́мъ ѻц҃е́мъ, и прест҃ы́мъ, и бл҃ги́мъ, и животворя́щимъ твои́мъ дх҃омъ, ны́нѣ, и при́снѡ, и во вѣ́ки вѣкѡ́въ.

Ли́къ:
Ами́нь.

Іере́й же взе́мъ сщ҃е́нную во́ду, кропи́тъ є́ю крс̑тъ, глаго́ля:

Бл҃гословля́ется и ѡсщ҃а́ется зна́меніе сіѐ крс̑тное ѡкропле́ніемъ воды̀ сея̀ сщ҃е́нныя, во и́мя ѻц҃а̀, и сн҃а, и ст҃а́гѡ дх҃а, ами́нь.
Три́жды.

И а́біе твори́тъ ѻбы́чный ѿпу́стъ, и ѿдае́тъ крс̑тъ тому̀, єгѡ́же є́сть, въ сла́ву бж҃ію.