Чи́нъ бл҃гослове́нія и ѡсщ҃е́нія надгро́бнагѡ крс̑та̀.

Іере́й во єпітрахи́ль и фелѡ́нь ѡдѣ́янъ зря̀ на восто́къ и крс̑тоѡбра́знѡ покади́въ но́вый крс̑тъ, начина́етъ:

Благослове́нъ бг҃ъ на́шъ:

Та́же тропа́рь крс̑ту̀, и конда́къ єгѡ̀, гла́съ д҃:

Вознесы́йся на крс̑тъ во́лею:

Посе́мъ чте́тъ моли́тву сію̀ ре́къ:

Гдс̑у помо́лимся.

Гдс̑и бж҃е сла́вы, ѻ́ч҃е вседержи́телю, бж҃е саваѡ́ѳъ, и́же дре́вомъ живота̀ посредѣ̀ рая̀ су́щагѡ проѡбрази́лъ єсѝ животво́рный крс̑тъ, на не́мже возлю́бленный тво́й сн҃ъ пригвожде́нъ бы́въ у́мре, и сме́ртію сме́рть умертвѝ, и єго́же це́ркви свое́й ѻру́жіе непобѣди́мое, вѣ́ры утвержде́ніе, крѣ́пкое спасе́нія упова́ніе, и живота̀ получе́ніе дарова̀: тѣ́мже мы̀ рабѝ твоѝ толи́кія бл҃года́ти ту́не сподо́бльшеся и бл҃года́рни су́ще, сла́ву и бл҃годаре́ніе, и смире́нное поклоне́ніе въ мольбу̀ твоему̀ вели́честву прино́симъ: послѝ ны́нѣ бл҃года́ть прест҃а́гѡ своегѡ̀ дх҃а, млс̑тивнѡ призира́я на зна́меніе сіѐ крс̑тное, гро́бъ усо́пшаго здѣ̀ лежа́щагѡ вѣ́рнагѡ раба̀ твоегѡ̀ (илѝ усо́пшія здѣ̀ лежа́щія вѣ́рныя рабы̀ твоея̀) и́мр̑къ, зна́менующее, и бл҃гословѝ и ѡст҃ѝ є̀, и да́ждь єму̀ бы́ти зна́меніемъ стра́шнымъ и крѣ́пкимъ на вся̂ врагѝ ви̂димыя и неви̂димыя, прогна́ніе же и ѿраже́ніе всѣ́хъ ко́зней и прило́гѡвъ діа́вольскихъ: твои̂мъ лю́демъ же да бу́детъ покро́въ держа́венъ, вѣ́ры утвержде́ніе, наде́жды подкрѣпле́ніе, во бране́хъ побѣ́да и во всѣ́хъ добродѣ́телехъ преспѣ́яніе, и всѣ̂мъ предъ̑ си́мъ зна́меніемъ тебѣ̀ кла́няющымся и мѡльбы̀ принося́щымъ млс̑тивенъ послу́шатель, и всѣ́хъ я̀же ко спасе́нію проше́ній бога́тый пода́тель бу́ди.
И я́коже крс̑то́мъ мі́ръ ѿ грѣхо́внагѡ ѡсужде́нія свободи́лъ єсѝ, си́це и рабы̀ твоя̂, сіѐ крс̑тное зна́меніе вѣ́рнѡ соверши́вшыя и здѣ̀ любвѐ ра́ди я̀же къ мє́ртвымъ и усо́пшымъ здѣ̀ лежа́щымъ, воздви́гшыя, си́лою крс̑та̀ возлю́бленнагѡ сн҃а твоегѡ̀, всегда̀ побѣди́тєли бы́ти грѣха̀ явѝ, и вся̂ земна̂я и небє́сная твоя̂ бл҃га̂я и́мъ да́руй, и крс̑то́мъ всегда̀ къ бл҃го́му всѣ́хъ вѣ́рныхъ наставля́я, къ воспрія́тію небе́снагѡ вѣнца̀ приведѝ.
Ты́ бо єсѝ ѡсщ҃е́нія исто́чникъ, и всѣ́хъ бл҃ги́хъ бога́тый пода́тель, и тебѣ̀ сла́ву возсыла́емъ, ѻц҃у̀, и сн҃у, и ст҃о́му дх҃у, ны́нѣ и при́снѡ, и во вѣ́ки вѣкѡ́въ.

Ли́къ:
Ами́нь.

Кропя̀ три́жды сщ҃е́нною водо́ю крс̑тъ, глаго́летъ три́жды:

Ѡсщ҃а́ется крс̑тное сіѐ зна́меніе бл҃года́тію прест҃а́гѡ дх҃а, ѡкропле́ніемъ воды̀ сея̀ сщ҃е́нныя, во и́мя ѻц҃а̀, и сн҃а, и ст҃а́гѡ дх҃а, ами́нь.

И а́біе твори́тъ ѿпу́стъ:

И́же на дре́вѣ крс̑тнѣмъ спасе́нія на́шегѡ ра́ди распны́йся и сме́рть подъ̑я́ти изво́ливый, и тридне́внѡ изъ̑ ме́ртвыхъ воскрс̑ы́й, хрс̑то́съ и́стинный бг҃ъ на́шъ: