Послѣ́дованіе ѡсщ҃е́нія часо́вни.

Поставля́ется столе́цъ, па́волокою покрове́нный, и вода̀ въ сосу́дѣ: архіере́й же, держя̀ въ руцѣ̀ чс̑тны́й крс̑тъ съ васілкѝ, и єѵг̑ліе, предъ̑иду́щу єму̀ діа́кону съ кади́льницею, и двѣма̀ свѣщено́сцема со свѣща́ми.
Прише́дъ же предъ̑ столе́цъ, полага́етъ на не́мъ крс̑тъ и єѵг̑ліе, и взе́мъ кади́льницу кади́тъ во́ду крс̑тоѡбра́знѡ, и начина́етъ ѻбы́чнѡ.

Прѡтодіа́конъ:
Благословѝ, преѡсвяще́ннѣйшій влады́ко.

Архіере́й:
Блгс̑ве́нъ бг҃ъ на́шъ:
Ли́къ:
Ами́нь.
И пою́тъ:
Цр҃ю̀ нбс̑ный:

Прѡтодіа́конъ:
Бг҃ъ гдс̑ь, и яви́ся на́мъ:
три́жды.

И тропа́рь хра́ма.

Сла́ва, и ны́нѣ: ѡбновле́нія, гла́съ д҃:

Я́коже вы́шнія тве́рди бл҃голѣ́піе, и ни́жнюю споказа́лъ єсѝ красоту̀ ст҃а́гѡ селе́нія сла́вы твоея̀ гдс̑и, утвердѝ сіѐ во вѣ́къ вѣ́ка, и пріимѝ на̂ша въ не́мъ непреста́ннѡ приноси̂мая тебѣ̀ молє́нія бцд̑ею, всѣ́хъ животѐ и воскрс̑ніе.

Кадя́щу же архіере́ю хра́мъ, пое́тъ ли́къ тропарѝ сія̂, гла́съ ѕ҃:

Є́же ра́дуйся а́гг҃ломъ пріи́мшая, и ро́ждшая зижди́теля твоего̀, дв҃о, сп҃са́й тя̀ велича́ющыя.

Воспѣва́емъ сн҃а твоего̀ бцд̑е, и вопіе́мъ:
пречс̑тая влд̑чце, вся́кія бѣды̀ изба́ви рабы̂ твоя̂.

Царє́мъ, про̑ро́кѡмъ и апс̑лѡмъ, и мч҃нкѡмъ ты̀ єсѝ похвала̀, и предста́тельница мі́ру, всенепоро́чная.

Неду́гѡвъ, и вся́кихъ болѣ́зней, и бѣ́дъ на́съ свободѝ, къ сщ҃е́нному твоему̀ покро́ву прибѣга́ющихъ.

Сла́ва:
Ѻц҃а̀ и сн҃а славосло́вимъ, и дх҃а ст҃а́го, глаго́люще:
тро̑це ст҃а́я, сп҃сѝ ду́шы на́шя.

И ны́нѣ:
Неизрече́ннѡ въ послѣ̂дняя заче́ншая, и ро́ждшая созда́теля твоего̀, дв҃о, сп҃са́й тя̀ велича́ющыя.

Та́же:
Млс̑рдія двє́ри ѿве́рзи на́мъ бл҃гослове́нная бцд̑е, надѣ́ющіися на тя̀ да не поги́бнемъ, но да изба́вимся тобо́ю ѿ бѣ́дъ:
ты́ бо єсѝ сп҃се́ніе ро́да хрс̑тіа́нскагѡ.

Та́же, прѡтодіа́конъ:
Гдс̑у помо́лимся.

Возгла́съ:
Я́кѡ ст҃ъ єсѝ бж҃е на́шъ:

Ли́къ:
Ами́нь.

Та́же настоя́щыя тропарѝ, гла́съ ѕ҃:

Ны́нѣ наста̀ вре́мя всѣ́хъ ѡсщ҃а́ющее, и првд̑ный на́съ жде́тъ судія̀, но ѡбрати́ся душѐ къ покая́нію, я́кѡ блудни́ца зову́щи со слеза́ми:
гдс̑и, поми́луй мя̀.

Вода́ми ѡдожди́вый хрс̑тѐ исто́чникъ исцѣле́ній, во всечс̑тнѣ́мъ хра́мѣ дв҃ы дне́сь, твоегѡ̀ бл҃гослове́нія ѡкропле́ніемъ, ѿгоня́еши неду́ги немощству́ющихъ, врачу̀ ду́шъ и тѣле́съ на́шихъ.

Дв҃а родила̀ єсѝ неискусобра́чная и дв҃о пребыла̀ єсѝ мт҃и безневѣ́стная, бцд̑е мр҃і́е, хрс̑та̀ бг҃а на́шего молѝ сп҃сти́ся на́мъ.

Прест҃а́я бцд̑е дв҃о, ру́къ на́шихъ дѣла̀ испра́ви, и проще́ніе прегрѣше́ній на́шихъ испросѝ, внегда̀ пѣ́ти на́мъ а́гг҃льское пѣ́ніе:

Ст҃ы́й бж҃е, ст҃ы́й крѣ́пкій, ст҃ы́й безсме́ртный, поми́луй на́съ.

Ѿпѣ́вше же по ѻбы́чаю, и по трист҃о́мъ прѡтодіа́конъ глаго́летъ:
Во́нмемъ.

Архіере́й:
Ми́ръ всѣ̂мъ.

Ли́къ:
И ду́хови твоему̀.

Чте́цъ, прокі́менъ, гла́съ г҃:

Гдс̑ь просвѣще́ніе моѐ, и сп҃си́тель мо́й, когѡ̀ убою́ся;

Сті́хъ:
Гдс̑ь защи́титель живота̀ моегѡ̀, ѿ когѡ̀ устрашу́ся;

Апо́столъ къ євре́ѡмъ, зача́ло т҃ѕ.

Бра́тіе, ст҃я́й и ѡсвяща́еміи, ѿ єди́нагѡ всѝ:
єя́же ра́ди вины̀ не стыди́тся бра́тію нарица́ти ѝхъ, глаго́ля:
Возвѣщу̀ и́мя твоѐ бра́тіи мое́й, посредѣ̀ цр҃кве воспою̀ тя̀.
И па́ки:
а́зъ бу́ду надѣ́яся на́нь.
и па́ки:
сѐ а́зъ и дѣ́ти, я̀же мѝ да́лъ є́сть бг҃ъ.
Поне́же у́бѡ дѣ́ти пріѡбщи́шася пло́ти и кро́ви, и то́й пріи́скреннѣ пріѡбщи́ся тѣ́хже, да сме́ртію упраздни́тъ иму́щаго держа́ву сме́рти, си́рѣчь діа́вола:
И изба́витъ си́хъ єли́цы стра́хомъ сме́рти чрезъ̑ всѐ житіѐ пови́нни бѣ́ша рабо́тѣ.
Не ѿ а́гг҃лъ у́бѡ когда̀ пріе́млетъ, но ѿ сѣ́мене авраа́мова пріе́млетъ.
Ѿню́дуже до́лженъ бѣ̀ по всему̀ подо́битися бра́тіи, да млс̑тивъ бу́детъ и вѣ́ренъ первосщ҃е́нникъ, я̀же къ бг҃у, во є́же ѡчи́стити грѣхѝ людскі̂я.
Въ не́мже бо пострада̀ са́мъ, искуше́нъ бы́въ, мо́жетъ и искуша́ємымъ помощѝ.

Архіере́й:
Ми́ръ тѝ.

Аллилу́іа.
Гла́съ ѕ҃.

Сті́хъ а҃:
Ѿры́гну се́рдце моѐ сло́во бла́го.

Сті́хъ в҃:
Глаго́лю а́зъ дѣла̀ моя̂ цр҃е́ви.

Єѵг̑ліе ѿ іѡа́нна, зача́ло д҃і:

Во вре́мя ѻ́но, взы́де іи҃съ во іерс̑ли́мъ.
Є́сть же во іерс̑ли́мѣхъ на ѻ́вчей купѣ́ли, я́же глаго́лется євре́йски виѳесда̀, пя́ть притвѡ́ръ иму́щи.
Въ тѣ́хъ слежа́ше мно́жество боля́щихъ, слѣпы́хъ, хромы́хъ, сухи́хъ, ча́ющихъ движе́нія воды̀.
А́гг҃лъ бо гдс̑ень на вся́ко лѣ́то схожда́ше въ купѣ́ль, и возмуща́ше во́ду:
и и́же пе́рвѣе вла́зяше по возмуще́ніи воды̀, здра́въ быва́ше, яцѣ́мже неду́гомъ ѡдержи́мь быва́ше.

Та́же прѡтодіа́конъ єктенію̀:

Ми́ромъ гдс̑у помо́лимся.

Ѡ свы́шнѣмъ ми́рѣ:

Ѡ ми́рѣ всегѡ̀ мі́ра:

Ѡ новосозда́ннѣй часо́внѣ се́й:

Ѡ вели́комъ господи́нѣ и ѻтцѣ̀ на́шемъ:

Ѡ богохрани́мѣй странѣ̀ на́шей, властѣ́хъ, во́инствѣ и наро́дѣ єя̀, гдс̑у помо́лимся.

(А́ще во учи́лищи: Ѡ здѣ̀ нача́льствующихъ, уча́щихъ и уча́щихся:)

(А́ще во враче́бницѣ: Ѡ всѣ́хъ тружда́ющихся и стра́ждущихъ во враче́бницѣ се́й:)

Ѡ всѣ́хъ, во сла́ву бж҃ію потруди́вшихся въ возсозда́ніи и бл҃голѣ́пнѣмъ украше́ніи ст҃ы́я часо́вни сея̀:

Ѡ гра́дѣ се́мъ:

Ѡ бл҃горастворе́ніи возду́хѡвъ:

Ѡ пла́вающихъ, путеше́ствующихъ:

Ѡ є́же ѡст҃и́тися вода́мъ си̂мъ, си́лою и дѣ́йствіемъ, и наи́тіемъ ст҃а́гѡ дх҃а:

Ѡ є́же снизходи́ти на во́ды сія̂ ѡчисти́тельному пресу́щныя тро̑цы дѣ́йству:

Ѡ є́же бы́ти водѣ̀ се́й цѣли́тельнѣй ду́шъ и тѣле́съ, и вся́кія сопроти́вныя си́лы ѿгна́тельнѣй:

Ѡ є́же низпосла́ти гдс̑у бг҃у бл҃гослове́ніе іѻрда́ново, и ѡсвяти́ти во́ды сія̂:

Ѡ всѣ́хъ тре́бующихъ ѿ бг҃а по́мощи и заступле́нія:

Ѡ є́же просвѣти́тися на́мъ просвѣще́ніемъ ра́зума, єдиносу́щною тро̑цею:

Я́кѡ да гдс̑ь бг҃ъ на́шъ вознизпо́слетъ на́мъ блгд̑ть прест҃а́гѡ своегѡ̀ дх҃а ко ѡсщ҃е́нію возсозда́ннагѡ хра́ма сегѡ̀:

Ѡ изба́витися на́мъ ѿ вся́кія ско́рби:

Заступѝ, сп҃сѝ, поми́луй:

Прест҃у́ю, пречс̑тую:

Ли́къ:
Тебѣ̀ гдс̑и.

Возгла́съ:
Я́кѡ подоба́етъ тебѣ̀ вся́кая сла́ва:

Та́же мл҃тву сію̀:

Бж҃е великоимени́тый, творя́й чудеса̀, ѝмже нѣ́сть числа̀! Пріидѝ ны́нѣ къ моля́щымъ тя̀ рабѡ́мъ твои̂мъ, влд̑ко, и послѝ дх҃а твоего̀ ст҃а́го, и ѡст҃ѝ во́ду сію̀:
[сія̂ глаго́ля, бл҃гословля́етъ во́ду десни́цею три́жды:]
и да́ждь пію́щымъ ѿ нея̀ и пріе́млющымъ и кропя́щымся є́ю рабѡ́мъ твои̂мъ премѣне́ніе страсте́мъ, ѡставле́ніе грѣхѡ́въ, болѣ́знемъ исцѣле́ніе, и свобожде́ніе ѿ вся́кагѡ ѕла̀, утвержде́ніе же и ѡсщ҃е́ніе домѡ́мъ, и ѡбновля́емѣй часо́внѣ се́й.
Я́кѡ бл҃гослови́ся и просла́вися пречтс̑но́е и великолѣ́пое и́мя твоѐ, ѻц҃а̀ и сн҃а и ст҃а́гѡ дх҃а, ны́нѣ и при́снѡ и во вѣ́ки вѣкѡ́въ.

Ли́къ:
Ами́нь.

Архіере́й:
Ми́ръ всѣ̂мъ.

Ли́къ:
И ду́хови твоему̀.

Прѡтодіа́конъ:
Главы̂ ва́шя гдс̑еви приклони́те.

Ли́къ:
Тебѣ̀ гдс̑и.

Архіере́й: же чте́тъ та́йнѡ мл҃тву сію̀:

Приклонѝ гдс̑и у́хо твоѐ, и услы́ши ны̀, и́же во іѻрда́нѣ крести́тися изво́ливый, и ѡсвяти́вый во́ды:
и бл҃гословѝ всѣ́хъ на́съ, ѝже преклоне́ніемъ своея̀ вы́и, назна́менающихъ рабо́тное воѡбраже́ніе:
и сподо́би на́съ испо́лнитися ѡсвяще́нія твоегѡ̀, воды̀ сея̀ причаще́ніемъ:
и да бу́детъ на́мъ гдс̑и, во здра́віе душѝ и тѣ́ла.

Возгла́съ:
Ты́ бо єсѝ ѡсщ҃е́ніе на́ше, и тебѣ̀ сла́ву и бл҃годаре́ніе и поклоне́ніе возсыла́емъ, со безнача́льнымъ твои́мъ ѻц҃е́мъ, и всест҃ы́мъ, бл҃ги́мъ, и животворя́щимъ твои́мъ дх҃омъ, ны́нѣ и при́снѡ, и во вѣ́ки вѣкѡ́въ.

Ли́къ:
Ами́нь.

Та́же взе́мъ чс̑тны́й крс̑тъ, бл҃гословля́етъ во́ды три́жды, крс̑тоѡбра́знѡ низводя̀ и возводя̀ ѝ пра́вѡ, и поя̀ настоя́щій тропа́рь, гла́съ а҃, три́жды:

Сп҃сѝ гдс̑и лю́ди твоя̂, и бл҃гословѝ достоя́ніе твоѐ, побѣ̂ды на сопроти̂вныя да́руя, и твоѐ сохраня́я крс̑то́мъ твои́мъ жи́тельство.

И а́біе прѡтодіа́конъ:
Гдс̑у помо́лимся.

Архіере́й же чте́тъ моли́тву:

Гдс̑и нб҃сѐ и землѝ, и́же ст҃у́ю твою̀ цр҃ковь неизрече́нною прему́дростію ѡснова́вый, и во ѡ́бразъ а́гг҃льскагѡ на нб҃сѝ служе́нія, свяще́нничества чи́нъ на землѝ соста́вивый.

При́зри ны́нѣ, влд̑ко великода́рне, ми́лостивымъ твои́мъ ѻ́комъ на ны̀, недостѡ́йныя рабы̂ твоя̂, во умиле́ніи серде́цъ соверша́ющыя ѡсщ҃е́ніе часо́вни сея̀ въ че́сть:
(и́мр̑къ, єгѡ́же часо́вня), въ сла́вномъ бл҃голѣ́піи возсозда́нныя къ сла́вѣ твое́й и ко утѣше́нію люде́й правосла́вныхъ гра́да на́шегѡ (а́ще во учи́лищи: и всѣ́хъ здѣ̀ нача́льствующихъ, уча́щихъ и уча́щихся: а́ще во враче́бницѣ: и всѣ́хъ тружда́ющихся и стра́ждущихъ во враче́бницѣ се́й).

Низпослѝ прест҃а́гѡ твоегѡ̀ дх҃а и ѡст҃ѝ часо́вню сію̀ и утвердѝ ю̀ до сконча́нія вѣ́ка цѣ́лу и непоколеби́му и сподо́би въ не́й моли̂твы и славослѡ́вія всегда̀ тебѐ приноси́ти ѡ всѣ́хъ лю́дѣхъ твои́хъ.

Всѣ́мъ потруди́вшымся въ̑ сооруже́ніи часо́вни сея̀ ѡставле́ніе согрѣше́ній пода́ждь:
да́руй ѝмъ (а́ще во учи́лищи: и всѣ̂мъ здѣ̀ нача́льствующымъ, уча́щымъ и уча́щымся: а́ще во враче́бницѣ: и всѣ̂мъ тружда́ющымся и стра́ждущымъ во враче́бницѣ се́й) вся̂ я̀же ко сп҃се́нію прошє́нія, здра́віе же и сп҃се́ніе, и во всѣ́мъ бл҃го́е поспѣше́ніе, да неѡсужде́ннѡ покло́нятся тебѣ̀ єди́ному и́стинному бг҃у, и єго́же посла́лъ єсѝ іи҃су хрс̑ту̀, мл҃твами бцд̑ы, [и єгѡ́же є́сть часо́вня] и всѣ́хъ ст҃ы́хъ твои́хъ, ами́нь.

Я́кѡ ст҃ъ єсѝ бж҃е на́шъ, и во ст҃ы́хъ почива́еши, и тебѣ̀ сла́ву возсыла́емъ, ѻц҃у̀ и сн҃у, и ст҃о́му дх҃у, ны́нѣ и при́снѡ, и во вѣ́ки вѣкѡ́въ.

Ли́къ:
Ами́нь.

Та́же кропи́тъ архіере́й часо́вню сщ҃е́нною водо́ю глаго́люще:

Ѡсщ҃а́ется часо́вня сія̀ ѡкропле́ніемъ воды̀ сея̀ сщ҃е́нныя, во и́мя ѻц҃а̀, и сн҃а, и ст҃а́гѡ дх҃а, ами́нь.

Кли́ріцы же кропя́тъ ю̀ ѿвнѣ̀.

Лю́діе же пою́тъ настоя́щій тропа́рь, гла́съ д҃:

Сп҃сѝ гдс̑и лю́ди твоя̂, и бл҃гословѝ достоя́ніе твоѐ, побѣ̂ды на сопроти̂вныя да́руя, и твоѐ сохраня́я крс̑то́мъ твои́мъ жи́тельство.

Посе́мъ:

Прѡтодіа́конъ:
Прему́дрость.

Архіере́й:
Прест҃а́я бцд̑е, спасѝ на́съ.

Ли́къ:
Честнѣ́йшую херуві̂мъ:

Архіере́й:
Сла́ва тебѣ̀ хрс̑тѐ бж҃е, упова́ніе на́ше, сла́ва тебѣ̀.

Ли́къ:
Сла́ва, и ны́нѣ:
Гдс̑и поми́луй, три́жды.
Преѡсвяще́ннѣйшій влады́ко бл҃гословѝ.

Архіере́й твори́тъ ѿпу́стъ по ѻбы́чаю.

Прѡтодіа́конъ:
Вели́кому господи́ну и ѻтцу̀ на́шему ст҃ѣ́йшему патріа́рху моско́вскому и всея̀ русѝ алеѯі́ю со все́ю єгѡ̀ бг҃оспаса́емою всерѡссі́йскою па́ствою, и господи́ну на́шему преѡсвяще́ннѣйшему митрополі́ту (илѝ архіепі́скопу, илѝ єпі́скопу) [и́мр̑къ, єгѡ́же ѻ́бласть], богохрани́мѣй странѣ̀ на́шей, властѣ́мъ, во́инству и наро́ду єя̀, (а́ще во учи́лищи: и всѣ̂мъ здѣ̀ нача́льствующымъ, уча́щымъ и уча́щымся: а́ще во враче́бницѣ: и всѣ̂мъ тружда́ющымся и стра́ждущымъ во враче́бницѣ се́й), всѣ̂мъ потруди́вшымся въ возсозда́ніи и бл҃голѣ́пнѣмъ украше́ніи часо́вни сея̀ и всѣ̂мъ правосла̂внымъ хрс̑тіа́нѡмъ мнѡ́гая лѣ̂та.

И пое́тъ ли́къ:
Мнѡ́гая лѣ̂та, три́жды.