Мцс̃ъ ию́нь и́мать дне́й, л҃. дн҃ь и́мать часо́въ є҃і.
{*заголовок набран вязью}

а но́щь, ѳ҃. Мцс̃а ию́ня въ а҃ дн҃ь.

стра́сть ст҃а́гѡ му́ченика іусти́на фило­
со́фа. бл҃гословѝ о́ч҃е.

Іусти́нъ хрс̃то́въ му́ченикъ, бѣ̀ ѿ́гра­
да но́вагѡ сѵ́рскагѡ філосо́фъ прему́дръ
ѕѣлѡ̀, и ра́зумъ имѣ́я мнѡ́гъ.
любля́ше же и чтя́ше хрс̃та̀, и не нави́­
дящихъ єгѡ̀ ѿвраща́шеся. и бжс̃тве­
ною ре́вностію по вся̀ днѝ разгара́шеся.
и тогѡ̀ ра́ди ше́дъ в̾ ри́мъ въ црс̃тво антѡни́­
на, написа̀ сви́токъ на пре́лесть и́доль­
скую, побора́я по хрс̃тія́н̾стѣй вѣ́рѣ,
и дадѐ єго̀ царю̀. и почтѐ ѝ ца́рь,
и почюди́ся му́дрости єгѡ̀. и не то́кмѡ
не убѝ ѝ, но и похвалѝ єго̀ пред̾всѣ́ми
{#л. уѯ҃г}

поне́же идолослужи́телємъ посрамля́ше
лица̀, и служе́ніе и́дольское ле́стнѡ явля́­
ше, а хрс̃тія́нское извѣ́стнѡ держа́ти, и
утвержа́ти написа́ніи, и слове́сными пока­
за́ніи. и зави́дѣвъ єму̀ криске́нтъ
філосо́фъ, и за́висти ра́ди убіе́нъ бы́сть
ѿнегѡ̀.

Вто́йже дн҃ь стра́сть ст҃ы́хъ му́ченикъ
іусти́на, іу́ста, и харито́на, и дружи́­
ны и́хъ. {*исправлено из: иусти́на иу́ста}

Ті́и ст҃і́и живя́ху в̾ри́мѣ, уча́ще ѡи́ме­
ни іс҃ъ хрс̃то́вѣ, и я́ти бы́вше ѿ єпа́рха
град̾ска́гѡ, и затворе́ни бы̑ша втемни́­
цѣ. и помно́зѣхъ днє́хъ изведе́ни
бы̑ша истемни́цы, и пред̾ста́ша єпа́­
рху. и вопросѝ єпа́рхъ іусти́на.
и помно́зѣхъ же ины́хъ вопро́сѣхъ
глаго́ла, рцы́ми іусти́не, а́ще убіе́нъ
бу́деши и усѣ́ченъ, вся́кѡ извѣсти́лъли
єсѝ, я́кѡ хо́щеши взы́ти на нб҃са̀.
и речѐ іусти́нъ, є́й, надѣ́юся на­
слѣ́дити црс̃тво нбс̃ное, а́ще претерплю̀
сію̀ му́ку успѣ́шнѡ. єпа́рхъ речѐ,
сія́ ли помышля́еши іусти́не,

я́кѡ взы́деши на нб҃са̀, и пріи́меши во
зда́ніе нѣ́кихъ бл҃гъ. и речѐ іусти́нъ,
не помышля́ю сегѡ̀ про́стѡ, но ѡпа́снѡ
извѣсти́хъ. тогда̀ єпа́рховымъ пове­
лѣ́ніемъ съ харітѡ́номъ и со инѣ́ми главы̀
и́хъ усѣ́кнуша;

В̾ то́йже де́нь па́мять прпд̃бнагѡ оц҃а
на́шегѡ діѡни́сія игу́мена глуши́цкаго
но́ваго чюдотво́рца.

Се́й прпд̃бный оц҃ъ на́шь діони́сій бѣ̀
ѿ́града во́логды, по́прищъ четы́реде­
сять. бли́зъ є́зера гл҃емагѡ вели́кагѡ
ку́беньскагѡ, ѿ восто́чную страну̀
со́лнечнагѡ восхо́да. посе́мъ ѡб̾хожа́ше
ст҃ы́й мнѡ́га мѣ́ста ѡ́кругъ предъ
рече́ннагѡ є́зера вели́кагѡ ища̀ поко́й
ѡбрѣстѝ, идѣ́же бг҃у рабо́тати. и
прии́де в̾ ве́сь глаго́лемую лучи́цу,
имѣ́я с̾ собо́ю бра́та и́менемъ пахо́мія.
и поста́виста себѣ̀ пре́же на то́мъ мѣ́сте
кѣ́лію. та́же и цр҃квь созда́ша во́ имя
ст҃а́гѡ нико́лы. и ѡст҃и́ша ю̀ по благо­
слове́нію григо́рія єпс̃кпа росто́въскагѡ.
и нача́ша бра́тія сожи́тельствовати сни́мъ
по́льзы ра́ди. ст҃ы́й же монасты́рь
{#л. уѯ҃д}

устро́ивъ на мѣ́стѣ то́мъ, и о́бще
житіѐ соста́ви. посе́мъ сщ҃е́н̾ства са́нъ
прія́тъ сѝ, и чи́стѣ же́ртву принося̀
гдс̃ви. та́же в̾ то́й оби́тели идѣ́же жи­
вя́ше ст҃ы́й, поста́ви настоя́теля учн҃ка̀
своегѡ̀ предирече́ннаго пахо́мія. са́мъ же
ми́ръ да́въ бра́тіи, и ѿ тогѡ̀ мѣ́ста
ѿи́де в̾да́лѣ пя̑ть на́десять по́прищъ.
нарѣку̀ глуши́цу, и ту̀ ѡбнощева̀.
и то́нцѣ усну́въ, и слы́шавъ ма́ніем̃ я́кѡ
гла́съ звоня́щь в̾ то́й пусты́ни, и а́біе
воста́въ ра́достенъ в̾ бо́рзѣ. и мл҃тву со­
твори́въ, и на том̃ мѣ́стѣ крс̃тъ поста́ви,
и́же ноша̑ше с̾ собо́ю. посе́мъ же поста́ви
себѣ̀ кѣ́ліицу ма́лу принѣ́коемъ дре́вѣ.
дре́во же то̀ вну́трь мнс̃тря є́сть и досего̀
днѐ я́годичіе и́мать черно̀, зово́мо чере́­
мха. и нѣ́кій чл҃къ имѣ̀ зубѡм̃ болѣ́знь,
и свѣ́рою сьядѐ я́году ѿтого̀ дре́ва, и а́біе
получѝ здра́віе. И пото́мъ прпд̃бный оц҃ъ
на́шъ діѡни́сій, в̾да̀ себѐ воздержа́нію
ѕѣ́лно́му и всено́щному бдѣ́нію,
посту́ же имл҃твѣ. пома́лѣ же вре́­
мени нача́шя бра́тія къ нему̀ прихо­
ди́ти нато̀ мѣ́сто єди́нъ поєди́ному,

и число̀ учени́къ мно́жашеся. и посе́мъ
пораз̾суди́въ ст҃ы́й, и поста́ви нато́мъ
мѣ́стѣ цр҃ковь, во́и́мя прест҃ы́я бцд̃ы,
чс̃тна́гѡ єя̀ покро́ва, и монасты́рь со­
ста́ви. и полѣ́тѣхъ нѣ́кихъ нача̀ мно́­
житися бра́тіи, я́кѡ в̾мѣще́ніе бѣ̀
в̾ цр҃кви ма́лѡ. бра́тія же моли́ша ст҃а́го
да и́ну цр҃ковь воздви́гнетъ бо́льши сея̀.
ст҃ы́й же поста́ви цр҃квь ве́лію бо́льши
пе́рвыя, и украсѝ ю̀ чю́днѡ ико́нами
и кни́гами. и безъ лѣ́ности уча́ше
бра́тію є́же ѡ по́лзѣ дш҃е́внѣй. посе́мъ
же иду́щу ст҃о́му въ цр҃квь на мл҃тву,
и нападо́ша на ст҃а́гѡ мнѡ́жество бѣсѡ́въ
зубы̀ с̾кре́гчюще, и би́ша ѝ. и взня́ша
мо́стъ, положи́ша ст҃а́гѡ та́мѡ. и глаго́ла­
ша єму̀, изы́ди ѿмѣ́ста тогѡ̀, я́кѡ да
не ѕлѣ̀ у́мреши. ст҃ы́й же моли́твою
побѣдѝ и́хъ не крѣ́пкую си́лу, и а́біе
исчезо́ша. бра́тія же прише́д̾ше в̾ кѣ́лію
ст҃а́гѡ, и ви́дѣша ст҃а́го утѣсня́ема,
и в̾зня́ша мо́стъ. о́нъ же глаго́лаше,
бра́тіе ви́дите вра́гъ на́шихъ боре́нія,
и не устраши́мъся и́хъ. и посе́мъ изы́­
де ст҃ы́й изъ ѻби́тели въ та́й бра́тіи,
{#л. уѯ҃е}

и пріи́де в̾ пусты́ню наполу́денную стра­
ну̀, ѿ больші́я ла́вры, по́прища четы́ре на
кра́й бре́га, на то́йже рѣцѣ̀ глуши́цѣ,
зово́мо сосно́вецъ мѣ́сто то̀. и ту̀
цр҃ковь поста́ви во и́мя іѡ҃а́нна крести́­
теля. и кѣ́ліи устро́ивъ преподо́бный
оц҃ъ, и нѣ́коихъ ѿ бра́тіи устро́ивъ
та́мѡ жи́ти. и речѐ бра́тіи я́кѡ все́й
пусты́ни положено̀ бу́детъ тѣ́ло моѐ.
заповѣ́да и́мъ вся́кое тре́бованіе при­
има́ти ѿ бо́льшія ла́вры. Посе́мъ у́бѡ
бл҃же́нный оц҃ъ на́шъ діѡни́сій, иско­
па̀ себѣ̀ гро́бъ за се́дмь лѣ́тъ пре́же
своегѡ̀ преставле́нія в̾ то́йже во ѿхо́днѣй
пусты́ни, помина́я нався́къ де́нь, я́кѡ
всели́тися та́мѡ. и больма̀ нача̀ подви­
за́тися к̾ бг҃у посто́мъ и мл҃твами и бдѣ́­
ніемъ. мно́гащи же всю̀ но́щь стоя́ше
намра́зѣ удруча́я тѣ́ло своѐ. и мно́га
чюдеса̀ сотвори́въ ѡ хрс̃тѣ̀. и на исхо́дъ
дш҃ѝ своея̀ причасти́ся пречс̃тагѡ тѣ́ла
и кро́ве, и преста́вися в̾ вѣ́чный поко́й.
Бѣ́ же видѣ́ніем̃ ст҃ы́й ма́лъ тѣ́лом̃, и сух̃
излиш̃ пло́тію. главу̀ имѣ̀ нема́лу, бро́­
ви ѡкруже́ни. лицѐ до́лго влу́щенѣ скра́ніи.

ти́хи имѣ́я о́чи. браду̀ имѣ́я до
пе́рсей гу́сту, вла́сы свѣ́тлы ру́сы в̾полъ
сѣди́ны.

Вто́йже де́нь сло́во іѡ҃а́нна златоу́стагѡ,
ка́кѡ подоба́етъ чти́ти попа̀.

Слы́шите па́вла гл҃юща, бра́тіе покаря́йте­
ся старѣ́йшинам̃ ва́шимъ, ті́и бо бдя́тъ
ѡ дш҃я́хъ ва́ших̃, я́кѡ сло́во возда́ти
и́мъ в̾ де́нь су́дный ѡ ва́съ. и сегѡ̀ ра́ди
и́злиха чти́те и́хъ. ты́ бо ѡ свои́хъ
то́чію пече́шися, а́ще устро́иши житіѐ
своѐ до́брѣ, ѡ ино́мъ же не ради́ши.
а ієре́й а́ще устро́итъ свою̀ жи́знь,
а ѡтебѣ̀ неради́тъ и нед́обрѣ упра́витъ,
то̀ со ѕлы́ми ѡсу́дится. а́ще зако́нъ
и́мать не пра́въ, то̀ не слу́шай єго̀.
а́ще ли пра́во учи́тъ, не житія̀ єгѡ̀ смо­
трѝ, но словє́съ єгѡ̀ слу́шай. и не гл҃и,
ка́кѡ мнѣ̀ глаго́летъ, а са́мъ того̀ не
твори́тъ. но то̀ є́сть єму̀ дѣ́ло не
лѣни́тися, но глаго́лати ко всѣ́мъ.
а не глаго́лавшу єму̀, су́дъ прія́ти.
да а́ще не послу́шаеши того̀, ѡсу́дишися.
я́коже гл҃етъ гдс̃ь, слу́шаяи ва́съ, менѐ
слу́шаетъ. а ѿмета́яйся ва́съ,
{#л. уѯ҃ѕ}

менѐ ѿмета́ется. а и́же вы̀ ху́литъ
то̀ менѐ ху́литъ. нѝ бра́тіе, не подо­
ба́етъ ѻвца́мъ па́стыря ху́лити. се́й бо
по вся̀ днѝ затя̀ и за твою̀ бра́тію и за
вся̀ слу́жбу прино́ситъ, за у́тра и
ве́черъ бг҃а мо́литъ, въ цр҃кви и внѣ̀
цр҃кве, крс̃ты̀ нося̀, и ту̀ за тя̀ мл҃тва
є́сть. да та̀ вся̀ помы́сливше, вся́­
чески до́брѣ снабди́мъ єго̀ я́кѡ оц҃а.
а́щели єщѐ глаго́леши, скве́рненъ є́сть
и ѕо́лъ, то̀ что̀ є́сть тебѣ̀. а́ще
и до́брый затя̀ бг҃а мо́литъ, то̀ что̀
успѣ́етъ, а́ще ты̀ єсѝ не вѣ́ренъ.
а́ще ли и скве́рненъ, то̀ тебе скве́рна
єгѡ̀ невреди́тъ, а́ще ты̀ вѣ́ренъ.
зане́же вся̀ бл҃года́ть ѿ́ бг҃а є́сть. ієре́й
бо то́чію уста̀ своя̀ ѿверза́етъ, а всѐ
бг҃ъ твори́тъ. єму́ же сла́ва
нн҃ѣ и прс̃нѡ
и во́ вѣки
вѣкѡ́мъ
;

Мцс̃а того́же въ в҃ де́нь, па́мять и́же
во ст҃ы́хъ оц҃а на́шегѡ ники́фора исповѣ́­
дника патріа́рха цр҃я гра́да, бл҃гословѝ
оч҃е.

Се́й бя́ше въ ца́рьство кон̾стянти́на ѕло­
чести́вагѡ роже́ніе и воспита́ніе тогѡ̀ само­
гѡ̀ цр҃ьствующагѡ гра́да. ѻц҃ъ же єгѡ̀
бя́ше пиша́и повелѣ́нія царе́ва. ѡкле­
вета́нъ же бы́въ я́кѡ покло́нникъ
бжс̃твеныхъ икѡ́нъ, біе́нъ бы́сть на
мно́зѣ, и в̾мила́су по́сланъ бы́въ, и
та́мѡ в̾ лютѣ́йшую темни́цу в̾ве́рженъ
Поси́хъ же при́званъ, и не приста́въ ца́рь­
скимъ повелѣ́ніемъ, па́ки въ никі́ю по́­
сланъ бы́въ, и ту̀ проводи́въ ше́сть
лѣ́тъ, во мно́зѣй ѕло́бѣ житіѐ ѡ­
ста́ви. сн҃ъ же єгѡ̀ чс̃тны́й ники́форъ
ѿ са́мыхъ ложе́снъ правосла́вными вѣнцы̀
себѐ ѡбви́въ, и мла́дость ѡста́вль,
и до́брѣ себѐ наказа́въ, во ѡпи́счіе в̾ мѣ­
не́нъ бы́въ. то́ же вся̀ сія̀ уме́ты в̾мѣ́­
стѡ паучи́ны и пра́ха вмѣни́въ, изы́де
и́з̾града, и в̾ под̾гра́діе гра́да в̾шед̃, и та́­
мѡ єди́нъ єди́ному бг҃у внима́я. и мно́­
гимъ трудѡ́мъ и болѣ́знем̃ приѡбщи́вся.
{#л. уѯ҃з}

внегда́ же тара́сій вели́кій архієре́й ѿ­
и́де ѿжитія̀, се́й ники́форъ ники́форомъ
цр҃е́мъ пону́женъ прс̃то́лъ прія́ти конъ­
стянсти́ня гра́да. и пома́лѣ ники́фору цр҃ю
почи́вшу, ставрикі́ю же сн҃у єгѡ̀ пріи́м̾шу
црс̃тво. и тому̀ па́ки на́скорѣ почи́вшу,
михаи́лъ бл҃гочести́вый црс̃твія ски́петры
воспріе́мъ. и по не́мъ же ѕвѣоимени­
тому льву̀ пріє́мъшу, и́же на ст҃ы́я
ико́ны бѣснова́вшуся, и на ст҃у́ю вѣ́ру
на́шю и бл҃гочести́вую дерзну́вшу лю́­
тая. всечестны́й же оц҃ъ на́шъ ники́­
форъ, къ ѕлочс̃ти́вому сему̀ и окая́­
нному изы́де съ дерзнове́ніемъ, и не́­
мощна того̀ наречѐ глаго́лы же и пи́сме­
ны. богоме́рз̾скій же о́нъ ниѕложи́въ
того̀ съ стола̀, и изгна̀, и въ темни́цу
всадѝ, и ни єди́ныя утѣ́хи ни ѿкого́ же
тому̀ бы́ти заповѣ́давъ. и та́кѡ пре­
бы́сть до́блій се́й скорбя̀, доне́лѣ же
окая́нный дш҃ю из̾ве́рже, и́же ѿсвоих̃ єму̀
су́щихъ мечѝ с̾сѣче́нъ въ цр҃кви фараѽ́­
новѣ. бл҃же́нный же се́й мно́гими друче́­
ніи утомле́нъ, и се́дмьдесятое лѣ́то
испо́лнивъ, в̾ ру́цѣ бж҃іи дх҃ъ предадѐ.

де́вять лѣ́тъ во архієре́йствѣ соверши́въ
три́ же на́ десять во изгна́ніи. бя̑ше
се́й всѣ́мъ подобе́нъ кири́лу алеѯа́ндрь­
скому. соверша́етъжеся собо́ръ єгѡ̀
въ пречс̃тнѣ́мъ апс̃льствѣ ст҃ы́хъ и всехва́­
лныхъ апс̃лъ вели́кихъ, идѣ́же чс̃тно́е
єгѡ̀ тѣ̑ло лежи́тъ.

Вто́йже дн҃ь па́мять и́же во ст҃ы́хъ оц҃а
на́шегѡ алеѯа́ндра, архієпс̃кпа кон̾стя­
нтиня гра́да.

Се́й бл҃же́нный алеѯа́ндръ вся́кими добро­
дѣ́телми бл҃ги́ми испо́лненъ бя́ше.
бѣ́же первосщ҃е́нникъ ст҃а́гѡ митрофа́на
патріа́рха кон̾стянти́ня гра́да. и
в̾ никѣ́йстѣмъ пе́рвѣмъ собо́рѣ се́й
изы́де вмѣ́стѡ ст҃а́го, зане́же митро­
фа́ну ста́ру и не́мощну су́щу. и мно́гѡ
подвиза́вся на собо́рѣ ѡ вѣ́рѣ. посконча́­
ніиже собо́рнѣмъ умоле́ніемъ цр҃е́вымъ,
всѝ оц҃ы̀ доидо́шя во́ градъ, воє́же
бл҃гослови́ти єго̀. и прише́дъ а́гг҃лъ гдс̃нь
речѐ къ бл҃же́нному митрофа́ну, поне́же бг҃у
ты̀ подо́бнѡ угоди́лъ єсѝ, и сѐ подеся́­
тѣмъ днѝ пріи́меши вѣне́цъ ѿ бг҃а.
прс̃то́лъ же цр҃ко́вный в̾ тебѐ мѣ́стѡ
{#л. уѯ҃и}

алеѯа́ндръ сослуже́бникъ тво́й пріи́метъ.
тогда̀ собо́ра ст҃і́и оц҃ы̀ съ бл҃же́ннымъ ми­
трофа́номъ ѡбвесели́вшеся, и того̀ погре́­
бше, а сегѡ̀ ст҃а́го алеѯа́ндра поста́вишя
патріа́рха. царю́ же кон̾стянти́ну уме́­
ршу, прія́тъ ца́рство констянті́й
сн҃ъ єгѡ̀. и́же ѡ ѕлочести́вѣмъ пря́­
ся а́ріи, и понужда́ше ст҃а́го алеѯа́ндра
прія́ти єгѡ̀ къ причаще́нію. о́нъже не
повину́ся, но безмяте́жнѡ ѡ не́мъ бг҃у
помо́лься бл҃году́шьствуя бя̑ше. а́ріи
же тогда̀ бу́йно съ ца́рьскою о́бластію
на бж҃ію цр҃ковь воста́въ иды́й бя̑ше.
прободе́нъ же бы́сть во утро́бу и истощѝ
вся̀ своя̀ вну́треняя прохо́домъ, и
и́з̾дше. бл҃же́нныйже алеѯа́ндръ
соупасы́й бжс̃твеную цр҃ковь
за два́десять и трѝ
лѣ́та, и взы́де
ко́ гдс̃у.

Вто́йже де́нь поуче́ніе іѡ҃а́нна злато­
у́стагѡ.

А́ще нау́къ и́маши ѡ грѣсѣ́хъ, нало­
жи нася̀ стра́хъ бж҃ій, и му́ки вѣ́­
чныя, и ѡдолѣ́еши вся́кѡ. я́кѡ нѣ́сть
труда̀ ѡста́вити гнѣ́въ ѡ печа́лившему
тя̀. ка́я болѣ́знь моли́тися, и проси́­
ти тмы̀ бл҃ги́хъ со усе́рдіемъ даю́щему.
бг҃у. ка́я болѣ́знь є́же ѕла̀ не рещѝ ни
кому́же. ка́я спо́на ѿврещѝ ре́вность
и за́висть. кі́й тру́дъ є́же люби́ти
бли́жняго. ка́я стра́сть невѣща́ти сра́­
мныхъ словє́съ, ни клевета́ти, ни доса­
жа́ти. ка́я бѣда̀ ни кля́тися. ка́я спо­
на поми́ловати. а́ще бо а́л̾чеши, покажѝ
самѣ́ми дѣ́лы. а́ще ви́диши убо́гаго,
поми́луй. а́ще и́маши врага̀, смири́ся
сни́мъ. а́ще и́маши дру́га до́брѣ спѣ́юща
не зави́ди єму̀. а́ще ви́диши жену̀
доброли́чну, преминѝ ю̀. да не уста̀
а́лчутъ то́кмѡ, но и о́ко и слу́хъ и но́­
зѣ и ру́цѣ, и всѝ тѣ́ла твоегѡ̀ у́дове.
Вѣ́доможе бу́ди, я́кѡ непыта́емо є́сть
мл҃твеное мѣ́сто, но нра́въ. ієремі́я
у́бѡ въ про́пасти бѣ̀ но бг҃а умолѝ,
{#л. уѯ҃ѳ}

даніи́лъ въ я́мѣ лво́вѣ, но бг҃а призва̀.
тріѐ о́троцы в̾ пещѝ, но бг҃а призва́шя.
і́ѡвъ на гно́ищи сѣдя́ше, но гдс̃а ви́дѣ.
мѡѷсе́й на́ мори бѣ̀, и гл҃а єму̀ бг҃ъ, что̀
вопіе́ши ко мнѣ̀. разбо́йникъ на крс̃тѣ̀,
но ра́й ѿве́рзе. да и ты̀ гдѣ̀ лю́бо єсѝ,
илѝ на путѝ, ли на́ морѣ, ли на торгу̀, лѝ
в̾ ко́емъ хра́мѣ и мѣ́стѣ, моли́ся в̾ чи́­
стѣ со́вѣсти, и бг҃ъ послу́шаетъ тебѐ.
того̀ бо є́сть земля̀ и концы̀ єя̀,
и на вся́комъ мѣ́стѣ влд̃че­
ствія єгѡ̀.

Вто́йже дн҃ь ст҃а́гѡ великомч҃нка іѡ҃а́нна
но́ваго му́чившагося в̾ бѣ́лѣ гра́дѣ.

Се́й ст҃ы́й мч҃нкъ іѡ҃а́ннъ, бы́сть у́бѡ
ро́домъ ѿ́града сла́внагѡ и вели́кагѡ тра­
пезо́нъта. при́ мори житіѐ имѣ́яше,
помно́гимъ градѡ́мъ пла́ваше, и ку́плю
творя̑ше мно́гу. иногда́же плову́щу єму̀
в̾ кораблѝ, ви́дѣ вра́гъ дія́волъ ча́стѡ
єго̀ моля́щася бг҃у и постя́щася, и стра́жу­
щихъ в̾ болѣ́зни, и́же в̾ кораблѝ ми́лующа
и утѣша́юща, позави́дѣ єму̀, воздви́­
же на него̀ нача́лника кораблю̀ латі́нскія
є́реси су̑ща, су́рова же и не ми́лостива

и без̾человѣ́чна. є́же досади́ти єму̀,
и воз̾брани́ти пу̑ть спасе́нія, и ѿ вѣ́ры
ѿто́ргнути я́же во хрс̃та̀. и нача̀
ст҃ы́й іѡ҃а́ннъ сни́мъ на́мори в̾ кораблѝ
иду́щи ѡ вѣ́рѣ прѣ́тися. и посе́мъ
приста́ша у бѣ́ла гра́да. и въ ше́дъ во́
градъ ѕлочести́вый то́й кора́бленикъ,
повѣ́да игѣ́мону гра́да тогѡ̀, є́сть
речѐ ѽ игѣ́моне му̑жь и́же со мно́ю здѣ̀
пріи́де, ѻте́ческагѡ у́бѡ хотя̀ ѿсту­
пи́ти преда́нія, и хрс̃тіа́н̾скія ѿчю­
жди́тися вѣ́ры, и къ ва́шей вѣ́рѣ
хо́щетъ приступи́ти, и преда́ніемъ
ва́шимъ о́б̾щникъ извѣ́стнѣйшій хо́­
щетъ бы́ти. мнѡ́гими бо кля́тва­
ми извѣсти́лся мнѣ̀ въ морско́мъ пла́­
ваніи. тѣ́мъ же въ ско́рѣ ѡ не́мъ со­
творѝ промышле́ніе, да себѣ̀ вели́ко
похвале́ніе пріи́меши, є́сть бо мнѡ́го
сла́вимь въ пе́рвыхъ вельмо́жахъ трапе­
зо́нта гра́да. сія́ же слы́шавъ игѣ́­
монъ, съ ра́достію сѣ́дъ на суди́щи.
и повелѣ̀ с̾ че́стію призва́ти му́ченика.
и я́кѡ предъста̀ ст҃ы́й предъ игѣ́мо­
номъ, и глаго́ла кнему̀ игѣ́монъ.
{#л. у҃ѻ}

дово́лнѡ ѡ тебѣ̀ слы́шахъ, я́кѡ хо́­
щеши к̾ на́шей вѣ́рѣ приступи́ти. на́­
ша бо вѣ́ра чс̃тны́хъ мы́слію каса́ется.
хрс̃тія́ньскую же смѣ́ху досто́йную ва́шю
вѣ́ру ѿложѝ, преда́нія же и зако́ны
тѣ́хъ свѣ́тлым̃ гла́сомъ пред̾ всенаро́днымъ
си́мъ позо́рищемъ прокленѝ. и просла́ви
свѣтоза́рное сл҃нце, и че́сть возда́й то­
му̀, и пред̾ восіява́ющей ѕвѣздѣ̀. и
же́ртвы и́ма принесѝ, и ѿ царя̀ че́сть
ве́лію и са́нъ пріи́меши. іѡ҃а́ннъ же бл҃го­
де́рзостнѣ ѿвѣща̀ игѣ́мону, не бу́ди
мнѣ̀ ѿврещи́ся хрс̃та̀ моегѡ̀, самому̀
тому̀ сл҃нцу созда́теля, є́же ты̀ в̾ пре́­
лести ѡдержи́мь, чте́ши тва́рь я́кѡ
бг҃а. бж҃ію че́сть прино́сиши тва́ри бе­
зума̀. ѿложѝ молю́ тя игѣ́моне на­
лежа́щую пре́лесть нече́стія душѝ
твое́й, и пріимѝ кр҃ще́нія бжс̃твенагѡ
ѻде́жю па́че сл҃нца сія́ющу. и вѣ́руй
въ гдс̃а на́шего іс҃а хрс̃та̀. сл҃нце бо в̾ че­
тве́ртый де́нь сотворено̀, ка́кѡ у́бѡ
в̾ тва́рь вѣ́руеши. сія́ же слы́шавъ гла­
го́лы мучи́тель, разгорѣ́ся гнѣ́вомъ,
и повелѣ̀ по землѝ протя́гнути мч҃нка,

и же́зліемъ сукова́тым̃ би́ти без̾ми́лости.
ве́черу же приспѣ́въшу, повелѣ̀ ст҃а́го
связа́вше двои́ми вери́гами всади́ти
в̾ темни́цу до у́тра. на у́тріи же де́нь
сѣ́де мучи́тель насуди́щи ѕвѣроѡбра́зный
ѻ́нъ судія̀, и повелѣ̀ предста́вити му́­
ченика. и я́кѡ предъста̀ предни́мъ
ст҃ы́й свѣ́тлымъ лице́мъ и ра́достною
дш҃е́ю, и удиви́ся мучи́тель свѣ́тло­
му єгѡ̀ лицу̀, и нача̀ мч҃ника мно́­
гимъ ласка́ніемъ увѣщава́ти. ст҃ы́й же
ни ма́лѡ сему̀ вня́тъ. но глаго́ла му­
чи́телю, хрс̃тія́нъ є́смь. мучи́тель же
я́кѡ ѕвѣ́рь ры́кнувъ. и а́біе повелѣ̀
по землѝ просте́рта мч҃ника лю́тѣйши
би́ти. и слуга́мъ премѣня́ющимся бію́­
щимъ ст҃а́го. ст҃ы́й же шепта́ніемъ
усте́нъ мл҃твы назна́меноваше. Посе́мъ
повелѣ̀ привяза́ти мч҃нка к̾ коню не­
уче́ну свирѣ́пу, и єди́ному ѿ во́инъ
в̾сѣ́сти на́нь, и гна́ти поу́лицамъ гра́да,
я́коже мо́щнѡ тещѝ коню̀. и сему̀
бы́вшу, влачи́мь бѣ̀ ст҃ы́й по всему̀
гра́ду. июде́инъ же нѣ́кто руга́шеся
мч҃нку, и взе́мъ ме́чь пости́же ст҃а́го,
{#л. уѻ҃а}

и а́біе главу̀ єгѡ̀ ѿсѣчѐ. и та́кѡ ѡсо́бь
главу̀ ѿ́тѣла ѿто́рже, и на мѣ́стѣ
ѡста́ви со главо́ю лежа́ти не брего́ма
ст҃а́го. и никто́же ѿ хрс̃тія́нъ не смѣ́я­
ше прикосну́тися му́ченика мощє́мъ.
посе́мъ в̾ нощѝ то́й лампа́ды мнѡ́ги,
над̾ мощьми ст҃а́гѡ му́ченика горя́ху,
и трѝ свѣтови́дни му́жіе не изрече́нная
поя́ху пѣ́нія, и каже́нія творя́ху.
и сто́лпъ ѻ́гненъ над̾ тѣлесе́мъ мч҃нка
утвержа́шеся. сіе́ же чю́до мно́зи ви́­
дѣша. єди́нъ же нѣ́кто ѿ іюде́й,
єму́ же хра́мина бли́зъ бя̑ше много­
страда́лнагѡ тѣ́ла, мнѣ́въ я́кѡ сщ҃е́­
нницы хрс̃тія́ньстіи хотя́тъ взя́ти
и погребе́нію преда́ти. и взе́мъ лу́къ
и стрѣ́лу, и напряжѐ, и хотѣ̀ пострѣли́­
ти єди́наго ѿ ни́хъ. лу́къ же и стрѣла̀
прилпѐ к̾ рука́мъ єгѡ̀, и та́кѡ пребы́сть
всю̀ но́щь. дню́же свѣтя́щуся, чю́дніи
ті́и му́жи и лампа́ды неви́дими бы̑ша.
и вся́къ во́зрастъ стека́хуся зря̑ще
ѻкая́ннаго о́ного стрѣльца̀. ѻ́нъ же
ска́зывая всѣ́мъ бы́вшеє. Та́же
свобо́ду ка́зни свое́й приє́млетъ.

мучи́тель же ѕѣлѡ̀ убоя́ся, и хрс̃ти­
я́нѡмъ повелѣ̀ погрестѝ тѣ̑ло ст҃а́гѡ.
хрс̃тія́не же взе́мъше погребо́ша єго̀
вмѣ́стѣ чс̃тнѣ. посе́мъ же фря́гъ ѻ́нъ
и́же ст҃а́гѡ на муче́ніе преда̀, восхотѣ̀ єго̀
ѻкая́нный укра́сти и в̾ своя́ си ѿнестѝ.
въ єди́ну ѿ ноще́й с̾ свои́ми прише́дъ,
в̾скопа́вше мѣ́сто хотя́ще взя́ти мо́щи.
Вто́й же но́щи яви́ся хрс̃то́въ мч҃никъ
іѡ҃а́ннъ презви́теру цр҃кве тоя̀ глаго́ля,
воста́ни ско́рѡ и тецы̀ къ цр҃кви, се́ бо
укра́сти мя хотя́тъ. И а́біе презви́­
теръ ско́рѡ воста́въ, и на мѣ́сто прите́къ
и ѡбрѣ́те гро́бъ раско́панъ, и тѣ́ло
ст҃а́гѡ а́біе в̾ ма́лѣ не ѿнесено̀ бы́сть.
и созва́въ бл҃гочести́выя лю́ди, и бы́­
вшее повѣ́давъ. и ту̀ всѝ просла́виша бг҃а
прославля́ющаго ст҃ы́я своя̀. посе́мъ поло­
жи́ша ст҃а́гѡ чс̃тны́я мо́щи въ ст҃ѣ́мъ
же́ртвеницѣ бли́зъ ст҃ы́я трапе́зы, и та́­
мѡ пребы́ша бо́лѣ седми́надесяти лѣ́тъ.
и непреста́ннѡ нѣ́кая разли́чная явле́­
нія явля́хуся в̾ нощє́хъ и во́днєх̃ надъ
тѣ́ломъ ст҃а́гѡ. И посе́мъ пріи́де в̾ слу́хъ
и́же тогда̀ бл҃гочести́вому и гдс̃ьствующему
{#л. уѻ҃в}

все́ю молховлахі́ею и помо́ріемъ тѣ́мъ,
хрс̃толюби́вому и вели́кому воєво́дѣ алеѯа́­
ндру, мч҃нкілю́бцу су́щу; и и́же тогда̀
совѣ́томъ цр҃ко́внагѡ пра́вила пра́вя­
щему, сщ҃е́ннѣйшему архієпс̃кпу іѽ́си­
фу, и а́біе воєво́да в̾ ско́рѣ посла̀ вель­
мѡ̑жъ з̾дово́лнымъ во́иньствомъ в̾ бѣ́лъ
гра́дъ. ѻни́ же въ ско́рѣ принесо́ша
кнему̀ с̾ вели́кою че́стію чс̃тно́е мч҃ника
тѣ́ло. ѻ́нъже взе́мъ со всѣ́ми сла́­
вными свои́ми, и со архієре́омъ и со
всѣ́мъ наро́домъ и досто́йною че́стію,
и та́кѡ въ ст҃ѣ́йшей митропо́ліи поло­
га́етъ чс̃тнѡ, въ свѣ́тлѣмъ свое́мъ сто­
лѣ. и разли́чна исцѣле́нія творя̑ше
ст҃ы́й да́же и досегѡ̀ днѐ ѿ́ гроба своегѡ̀
с̾ вѣ́рою приходя́щимъ. бг҃у на́шему
сла́ва нн҃ѣ и прс̃нѡ и во вѣ́ки
вѣкѡ́мъ
;

М́цс̃а того́ же въ г҃ дн҃ь, па́мять ст҃ы́хъ
мч҃нкъ лукіа́на, и и́же сни́мъ младе́нецъ
клавді́я и ипа́тія па́ѵ̾лы, и діони́сія,
бл҃гословѝ о́ч҃е.

Се́й ст҃ы́й мч҃нкъ лукіа́нъ, бя̑ше во вре­
мена̀ авриліа́на царя̀, пе́рвѣе ієре́ю
су́щу єму̀ и́дольскому. ста́ръ взо́­
ромъ, и бѣ́лъ вла́сы. жили́ще имѣ́я
не дале́че никомиді́йскагѡ гра́да. прело­
жи́вжеся къ хрс̃то́вѣ вѣ́рѣ, и приве­
де́нъ бы́въ к̾ силва́ну коми́ту, и не по­
вину́ся ѿврещи́ся хрс̃та̀, и и́дольстѣй
приѡбщи́тися слу́жбѣ, и сокруши́ша
єму̀ че́люсти, и же́зліемъ біе́нъ, и
стре́мъ гла́въ повѣ́шенъ. та́же въ
темни́цу въве́рженъ, и́же и ѡбрѣ́тъ
та́мѡ четве́ро дѣтє́й в̾ве́ржены хрс̃то́вы
ра́ди вѣ́ры. и́же и сни́ми я́влься
коми́ту. и єдина́че пребыва́юще въ хрс̃то́­
вѣ вѣ́рѣ, въ пе́щь о́гненую въве́рженъ
бы́въ съ дѣтмѝ. и свы́ше излія́вшуся
дождю̀, и пла́мень погаси́вшу, изыдо́шя
не вреди́ми. и́же и ку́пнѡ ѡсужде́ніе
съ дѣтмѝ прія́тъ. заведе́нъ бы́сть въ
византі́ю, та́кѡ коми́ту повелѣ́вшу.
{#л. уѻ҃г}

и дѣ́ти у́бѡ мече́мъ посѣчени бы́шя.
ст҃ы́й же лукіа́нъ на крс̃тѣ̀ повѣ́шенъ, и
повсему̀ тѣ́лу гвоздьмѝ пригвожде́нъ,
бг҃у дх҃ъ предадѐ. ст҃ѣ́йже дв҃цѣ па́ѵлѣ
се́й прише́дши, и по путѝ ра́намъ єгѡ̀ при­
лѣжа́вши. и внегда̀ скончат́ися и́мъ,
тѣлеса̀ и́хъ собра́вши. бя́ше бо ѿроди́те­
лю вѣ́рныхъ. и таково́е дѣ́ло творя́щи
по темни́цахъ ходя́щи, и є́же за хрс̃та̀
стра́ждущихъ устрабля́ше и пита́ше
и́же и та̀ я́та бы́вши, и приведена̀ къ
коми́ту. и не поко́ршися пожре́ти и́до­
лѡмъ, пе́рвіе ѡбнажена̀ бы́вши,
и дубцы̀ біе́на, та́же же́зліемъ. и ѿ
мно́гихъ ра́нъ тѣлесѝ єя̀ раз̃слабѣ́вшю.
и́же и настоя́ніемъ а́гг҃ловымъ ѡздра́­
вѣвши. и дерзнове́нна къ муче́нію пока­
за́ся. и па́ки къ коми́ту приведена̀ и
біе́на бы́сть по усто́мъ, зане́же єго̀ ѡѕло­
сло́вивши. та́же въ темни́цу въве́­
ржена, и па́ки на испыта́ніе изведена̀
и въ пе́щь въвержена, и изы́де безъ
вреда̀. пріє́мши же ме́чное ѡсужде́ніе,
и въ византі́ю дости́гши по повелѣ́нію
коми́тову. и бы́вши на мѣ́стѣ,

идѣ́же ст҃ы́й лукія́нъ сконча́ся, та́мѡ
и та̀ воспрія́тъ вѣне́цъ муче́нія. сове­
рша́етъжеся собо́ръ и́хъ въ ст҃ѣ́мъ и́хъ а
муче́ніи, су́щемъ бли́зъ цр҃кве арха́гг҃ла
миха́йла во окси́ни.

Вто́йже де́нь поуче́ніе ст҃а́гѡ єфре́ма.
я́кѡ не подоба́етъ мни́ху ѿмѣ́ста намѣ́­
сто преходити.

Въ слѣ́дъ у́бѡ влд̃ки хрс̃та̀ та́кѡ вослѣ́­
дуемъ, въ покоре́ніи ста́рєцъ ѡ́гдс̃ѣ во­
схо́щем̃ бы́ти, а не ѿмѣ́ста намѣ́сто
преходя̑ще. и пе́рвое, коему́ждо и­
спыта́ти себѣ̀ свою̀ мы́сль, почто̀ и за
ку́ю вину̀ хо́щетъ ѿитѝ ѿ своегѡ̀
мѣ́ста, въ не́мъ же ѡбѣща́ся бы́ти.
єда̀ ка́кѡ труда̀ хотя̀ бѣжа́ти во и́нъ
мнс̃трь ѿходя̀, мня̀ ме́ньшій тру́дъ
ѡбрѣстѝ и лу́чшую дружи́ну. єда̀
ка́кѡ па́ки ѿ доброненави́дящагѡ бѣ́са,
ре́вностію и за́вистію устрѣле́нъ бы́въ,
я́кѡ ино́му поспѣшеству́ющу бра́ту на
ви́димое, тому́ же не полу́чьшу на­
ча́тка, и сегѡ̀ ра́ди хо́щетъ ѡста́вити
мѣ́сто. єда̀ ка́кѡ бра́ни бѣ́гая,
{#л. уѻ҃д}

добродѣ́тели и не повинове́нія ѡ хрс̃тѣ̀ не
хотя̀ воспрія́ти, мнс̃тыря ѿхо́дитъ.
єда̀ ка́кѡ наслѣ́діе гоня̀, мѣ́сто своѐ
хо́щетъ ѡста́вити. и́бо по́мыслы явя́тъ
сія̀, а́ще у́бѡ пре́же испыта́ем̾ся є́же
є́сть в̾ на́съ стра́сть, сему́ же невослѣ́­
дуемъ, да не в̾паде́мъ в̾ ру́цѣ ѕлы́хъ
бѣсѡ́въ. и́хъ же многоѡбра́зны сѣ́ти
на ны̀ прс̃нѡ просте́рты. ѿни́хъ же смире́­
ніемъ и терпѣ́ніем̃ убѣжа́ти потщи́мся,
ѡ хрс̃тѣ̀ іс҃ѣ гдс̃ѣ на́шемъ;

Вто́йже дн҃ь сло́во ст҃а́гѡ васи́лія ѡ много­
имѣ́ніи.

И́же чюжа́го жела́етъ, то̀ пома́лѣх̃ днє́хъ
по свое́мъ возрыда́етъ. у́не є́сть пома́лу
к̾ своему̀ житію̀ прилага́ти со утѣше́ніем̃,
не́же ли внеза́пу возвы́ситися чюжи́мъ,
а послѣдѝ ѡбнажи́тися ѻбои́хъ. и́же
чюжа́я гра́бя, и млс̃тыню твори́тъ тѣм̃,
то̀ не поми́ловалъ, но ѻби́дѣлъ па́че, и со­
грѣши́лъ грѣ́хъ послѣ́дній. а́ще бо ми́ло­
стыню твори́ши и́м̾же гра́биши, то̀ пре́­
же тѣх̃ поми́луй, и́х̾же єсѝ ѻби́дѣлъ. не
то́й бо є́сть бл҃гочс̃ти́въ и́же мно́ги ми́лует̃,

но и́же никого́ же преобиди́тъ. и́же
бл҃га́я дѣ́ла нача́лъ твори́ти, и па́ки
въсту́питъ на пе́рвый ѻбы́чай, то̀ не
то́кмѡ всу́е труди́ся, но и бо́лшему
ѡсужде́нію сподо́бится. никто́же бо
вогрѣсѣ́хъ живы́й да ѿча́ется. вѣ́домо
бо я́кѡ я́кѡ копа́я и садя̀ вели́къ са́дъ ра­
сти́тъ. па́ки же предая̀ измѣня́ется.
сажено̀ є́сть сло́во, а дш҃е́вное є́сть
строє́ніе, мо́жетъ воздержа́ти вся́ки
неду́ги. я́коже че́рвіе въ гни́лѣ дре́вѣ
ража́ются, та́коже и печа́ли въ худы́я
чл҃ки вхо́дятъ. и́же глаго́летъ я́кѡ
недосто́итъ пра́веднику печа́ли имѣ́ти,
то́й мо́жетъ изрещѝ, я́кѡ недосто́йнѡ
борцу̀ проти́вника имѣ́ти. но ка́кѡ
позна́ется хи́трость єгѡ̀
беспроти́вника;
{#л. уѻ҃e}

Вто́йже де́нь поуче́ніе к̾ жена́мъ, да
бу́дутъ молчали́вы.

Послу́шайте жены̀ за́повѣди бж҃ія, и
научи́теся молча́ти, да спасетѐ
душя̀ своя̀. в̾ нача́лѣ бо речѐ гдс̃ь къ
є́взѣ, ѿму́жа взята̀ єсѝ, и то́й
тобо́ю да ѡблада́етъ, єму́ же ты̀
повини́ся в̾ молча́ніи. жена́ бо своего̀
му̑жа чс̃тна творя́щи, мудра̀ и похва­
лена̀ пред̃ всѣ́ми показу́ется, и ѿ бг҃а по­
хвалена̀ и бл҃гословена̀ є́сть. жены̀ мужєм̃
свои́мъ да не супроти́вятся. я́коже бо х҃с
глава̀ є́сть цр҃кви, та́кѡ и му́жь глава̀
є́сть женѣ̀. и я́коже цр҃ковь повину́етъ­
ся х҃у, та́коже и жены̀ свои́мъ мужє́мъ
повину́йтеся во все́мъ. жены́ же въ цр҃кви
да молча́тъ, гну́сно бо є́сть жена́мъ въ
цр҃кви бесѣ́довати. а́ще же что̀ хотя́тъ во­
проша́ти, то̀ в̾домѣ́хъ мужє́й свои́хъ во­
проша́ютъ. жена̀ добра̀ и молчали́ва,
вѣне́цъ му́жу своему̀ є́сть. ѡбрѣты́й
жену̀ добру̀, изно́сит̃ и́здому своегѡ̀ бл҃га́я.
прему́дрыя жены̀ возгради́ша до́мы,
а безу́мныя раскопа́ша язы́ки свои́ми.
жены̀ добры̀ блажи́мь є́сть му̑жь.

жена̀ добра̀ весели́тъ му̑жа своего̀, и
лѣ́та єгѡ̀ испо́лнитъ в̾ беспеча́ліи. че́сть
блага ѿ бг҃а, жена̀ мол̾чали́ва. жена́ же
язы́чна му́жеви загрѣхѝ дае́тся ѿбг҃а.
лю́тѣ же тому̀ му́жеви и́же зри́тъ на
лицѐ жены̀, и слу́шаетъ язы́ка єя̀, а не
пыта́етъ дѣ́лъ єя̀, и ѿтѣ́хъ не позна­
ва́етъ ю̀. лу́чьши є́сть болѣ́ти тря́­
сцею, не́жели ѕло́ю жено́ю ѡблада́ну
бы́ти. тря́сца бо тря́сши пусти́тъ,
а ѕла́я жена̀ и досме́рти му́жа своего̀
суши́тъ. слы́шите же па́вла гл҃юща,
женѣ̀ учи́ти не велю̀, ни владѣ́ти
му́жемъ, но повинова́тися
вовсе́мъ бг҃ови.

Вто́йже дн҃ь сло́во ѿ патерика̀ ѡ нѣ́коемъ
пусты́н̾ницѣ, и́же согрѣши́въ пока́яся.

Повѣ́дашє ѻц҃ъ пафно́тій, помы́слихъ
речѐ итѝ в̾ пусты́ню, єда̀ гдѣ̀ ѡбря́щу
чл҃ка рабо́тающа хрс̃ту̀. и ше́дъ дні́й,
л҃, и ѡбрѣто́хъ пеще́ру, и стопы̀ му́­
жески к̾ не́й, и ра́дъ бы́хъ. при­
бли́жихся кне́й, и ше́дъ вню̀ и не
ѡбрѣто́хъ ни кого́ же, и глаго́лахъ,
я́кѡ рабу̀ бж҃ію подоба́етъ здѣ̀ бы́ти.
{#л. уѻ҃ѕ}

и я́кѡ де́нь ми́мо идя́ше, и ви́дѣхъ
вел̾блу́ды гряду́ща. и сни́ми раба̀ бж҃іа
на́га, и вла́сы свои́ми закры́вша сра́мныя
у́ды. єгда́ же прибли́жися ко мнѣ̀,
и мнѣ́въ мя ду̑ха су̑ща, и ста̀ на
мл҃твѣ, бѣ́ бо я́коже и послѣдѝ сказа̀,
прія́лъ мнѡ́ги па́кости ѿ бѣсѡ́въ.
а́зъ же разумѣ́въ рѣ́хъ, чл҃къ є́смь
ра́бе бж҃ій, ви́ждь стопы̀ моя̀ и ѡсяжи́
мя, я́кѡ пло́ть и кро́вь є́смь. и
єгда́ же речѐ ами́нь, ви́дѣвъ мя, утѣ́­
шися. и пое́мъ мя в̾ведѐ в̾ пеще́ру
и вопроша́ше, ка́кѡ сѣ́мѡ пріи́де. а́зъ же
рѣ́хъ, взыска́ти раба̀ бж҃іа в̾ пусты́ни
се́й. и сѐ не лиши́лъ є́сть гдс̃ь жела́нія
моегѡ̀. и вопроси́хъ єго̀ глаго́ля,
ка́кѡ у́бѡ сѣ́мѡ пріи́де, и коли́кѡ
лѣ́тъ и́маши, и чи́мъ пита́ешися.
и ка́кѡ на́гъ сы́й, не тре́буеши ри́зы,
ѻ́нъ же речѐ, а́зъ в̾ монастырѝ бы́хъ
под̃ игу́меномъ, и дѣ́ло имя́хъ тќанія.
в̾ни́де же в̾мя̀ мы́сль глаго́лющи, изы́ди
и живѝ єди́нъ, и мо́жеши бо́льшю
мзду̀ прія́ти ѿ трудѡ́въ дѣ́лъ свои́хъ.
и я́ко же изыдо́хъ изъбра́тъства,

созда́хъ себѣ̀ кѣ́лію, и мнѡ́го имѣ́ніе со­
бра́хъ. подвиза́хъ жеся ни́щимъ ра­
здая́ти и стра́н̾никѡмъ. и сѐ вра́гъ
на́шь дія́волъ возревнова́въ ми, я́ко же
и прс̃нѡ на всѣ́хъ вою́етъ, и тща́шеся
ис̾проврещѝ труды̀ моя̀. и ви́дѣхъ
єди́ну чернори́зицу, веля́щу ми у­
стро́ити полотно̀. и сотво́р̾ши сѐ,
и да́хъ є́й, и прину́ди мя устро́ити и
друго́е. и я́кѡ у́же свы́чай ми бы́сть
сне́ю и дерзнове́ніе бо́льшеє. посе́мъ
ѡсяза́ше рука́ма, и смѣ́хъ, и сужи́тіе
и заче́ньши роди́хова без̾зако́ніе. и
я́кѡ пребы́хъ сне́ю трѝ мцс̃ы в̾ па́дая,
помы́слихъ, я́кѡ дне́сь или у́трѣ
сме́рть вари́тъ мя, и прія́ти и́мамъ
му́ку вѣ́чную. и а́ще кто̀ жену̀
му́жеску просмради́тъ, пови́ненъ є́сть
вѣ́чнѣй му́цѣ. коли́цѣмъ же стра­
стє́мъ пови́н̾ный а́зъ досто́инъ є́смь,
просмра́жь невѣ́сту хрс̃то́ву. и та́кѡ
в̾ пусты́ню сію̀ бѣжа́хъ та́й, ѡста́вль
имѣ́ніе своѐ всѐ женѣ̀. и здѣ̀ пріидо́хъ
в̾пеще́ру сію̀, и ѡбрѣто́хъ исто́чникъ
се́й и фи́никъ, иму́щь, в҃і, вѣ́твіи.
{#л. уѻ҃з}

и на мцс̃ъ ражда́етъ ка́яждо вѣ́твь є́же ми
довлѣ́етъ на л҃, дні́й. и посе́мъ со­
зрѣ́етъ и друга́я. по лѣ́тѣхъ же мнѡ́­
зѣхъ возрасто́ша ми вла́си, и тѣ́ми мнѣ̀
бы́сть подо́ба, я́же закрыва́ти тѣлесѐ сра­
моту̀. и па́ки вопроша́хъ єго̀, єгда̀
в̾ нача́тцѣ стужа́шели ти. и рече́ми,
нача́тцѣ вельмѝ изнемога́хъ, я́кѡ
и на землѝ па́дати ми ѿутро́бы, и неможах̃
стоя̀ мл҃твы сотвори́ти, но лежа́хъ в̾ пе­
ще́рѣ на землѝ в̾ тузѣ̀ мнѡ́зѣ и въ
стра́сти, я́кѡ неможа́хъ и во́нъ исхо­
ди́ти ис̾ пеще́ры. и посе́мъ ви́дѣ му̑жа
в̾ лѣ́зъша и гл҃ющами, чи́мъ боли́ши.
а́зъ же єдва̀ воз̾могох̃ ѿвѣща́ти, и рѣ́хъ
єму̀, утро́ба ми боли́тъ. и рече́ ми,
гдѣ̀ боли́тъ, и показа́хъ єму̀. ѻ́нъ же
пе́р̾сты рукѝ своея̀ упра́вль, и прорѣ́за
мѣ́сто я́кѡ ноже́мъ, и исто́ргъ я́тра
моя̀, и показа́ми стру́пы. и руко́ю ѡ­
строга́въ, в̾ пла́тѣ стру́пы моя̀ положѝ,
и па́ки вложѝ я́тра моя̀. и руко́ю мѣ́сто
зама́зав̃, и рече́ми, сѐ здра́въ бы́въ, служѝ
влд̃цѣ хрс̃ту̀ я́ко же подоба́ет̃. и ѿто́лѣ бы́сть
здра́въ. и та́кѡ здѣ̀ живу̀ бес̾труда̀.

мно́го же моли́хъ єго̀, дабы̀ жи́лъ
бли́зъ пеще́ры. и рече́ ми, не мо́жеши
терпѣ́ти напа́сти дѣ́монскія. а́зъ же
моли́хся єму̀, да мл҃тву сотвори́тъ.
и ѿступѝ ѿменѐ, и неви́димъ бы́сть.
бг҃у на́шему сла́ва, нн҃ѣ и прс̃нѡ и во́
вѣ́ки вѣкѡ́мъ.

Мцс̃а тогѡ́же въ д҃ дн҃ь, па́мять и́же во
ст҃ы́хъ оц҃а на́шегѡ митрофа́на, патріа́рха
констянти́на гра́да, бл҃гословѝ о́ч҃е.

Се́й бя̑ше в̾ лѣ́та констянтин́а цр҃я ве­
ли́кагѡ, сн҃ъ бы́въ дометі́евъ. доме­
ті́й же бя̑ше бра́тъ про́ва царя̀, и́же
родѝ два̀ сн҃а, про́ва и митрофа́на.
то́й мы́слію цѣлому́дреною и́дольскагѡ
служе́нія ѿве́ржеся, раз̃смотри́въ бо я́кѡ
преле́стнѡ є́сть и ло́жнѡ, и пріи́де к̾ вѣ́рѣ
хрс̃то́вѣ. и прише́дъ в̾ византі́ю, и пре­
бы́сть у архієпс̃кпа византі́йскагѡ,
му̑жа до́блественаго и бг҃ому́дрена, и́же
того̀ приведѐ въ цр҃ко́вный приче́тъ. по
сконча́ніи же єпс̃кпа поставленъ бы́въ доме­
ті́й первосѣда́лникъ. и того̀ воспри­
я́тъ сн҃ъ єгѡ̀ про́въ, и́же содержа́въ
цр҃овь трѝ лѣ́та и ѿи́де къ гдс̃у.
{#л. уѻ҃и}

и а́біе митрофа́нъ бра́тъ про́вовъ,
а дометі́евъ сн҃ъ на архієре́йскій возве­
де́нъ бы́сть прс̃то́лъ. єго́ же ѡбрѣ́тъ
вели́кій констянти́нъ въ византі́и
єпс̃кпа, и добродѣ́тели єгѡ̀ и нра́ву
пра́вому поразумѣ́въ подиви́ся, и не
ма́ла ѡ не́мъ бесѣ́довавъ приведѐ въ
ри́мъ. византі́ю же поставле́нія ра́ди
гра́да, бголюбе́зна къ подо́бію иму́ща
разъсмотри́въ цр҃ь, и плода̀ не ѡскудѣ́­
ніе. къ тому́ же мо́ремъ и сухото́ю
подо́бна, и ку́пнѡ присѣдя́ща ѻбои́хъ
въ селе́ніихъ сѣче́ніемъ, євро́піи же
и асі́и. возлюби́въ же селе́ніе то̀,
любоче́стнѣ сложи́въ ѡ то́мъ, є́же
ни ѡ каковѣй поги́бели бы́ти, воздви́­
гнути зда́ніемъ гра́дъ. ѡ вся́кихъ
человѣ́цѣхъ с̾ быва́ющь и со ѡдолѣва́ющь
во ѡкроче́ніи своем́ъ, вне́мъ же держа́­
ву и црс̃тво учинѝ. того́ же митрофа́на
ѿ ста́рагѡ ри́ма ту̀ преведѐ. никѣ́й­
скому же пе́рвому собо́ру съ ше́дшуся.
бл҃же́нный же митрофа́нъ ста́ростію и неду́­
гом̃ изнемо́гъ. и́бо бя̑ше у́же в̾ вре́мени
погорби́вся, єсте́ственѣй си́лѣ ѿпа́дши.

пе́рваго же во сщ҃е́нницѣхъ алеѯа́ндра му̑­
жа чс̃тна посла̀ в̾ мѣ́стѡ себѐ, єго́ же и на­
сто́лника именова̀. прише́дшу же цр҃е́в
съ бг҃оно́сными и чс̃тны́ми ѻц҃ы̀, и собо́ру
раз̾ше́дшуся, ѿкрове́ніемъ бж҃іимъ
алеѯа́ндра, и и́же сни́мъ па́вла наро́чита
су̑ща и бг҃у угожда́юща, нарекова̀ по себѣ̀
на прс̃то́лъ ст҃льства. преста́вльже ся
и в̾ поко́й бл҃же́нный къ бг҃у пре́йде. со­
верша́етъ же ся собѡ́ръ єгѡ̀ въ ст҃ѣ́й
вели́цѣй цр҃кви, и в̾ чс̃тнѣ́мъ єгѡ̀ хра́­
мѣ су́щемъ бли́зъ ст҃а́гѡ
мч҃нка ака́кія во єптаѯа́лѣхъ,
идѣ́же лежи́тъ ст҃о́е
и чс̃тно́е тѣ́ло
єгѡ;
{#л. уѻ҃ѳ}

Вто́йже де́нь стрс̃ть ст҃а́гѡ мч҃нка асті́я
єпкс̃па диракі́йскагѡ.

Асті́й сщ҃енномч҃нкъ бѣ̀ при троя́нѣ царѣ̀ и
при агрикола́и игѣ́монѣ. бѣ́ же ѿпе́рвых̃
гра́да, ну́димъ бѣ̀ пожре́ти и́долѡмъ,
и не повину́вся, в̾ве́рженъ бы́сть в̾те­
мни́цу. и пре́же я́тія, ви́дѣвъ со́нъ
тако́въ, стоя́ше бо на ка́мени смоло́ю
с̾ма́сломъ пома́занѣ. и речѐ свои́мъ
приче́тникѡмъ, пострада́ти ми подоба́етъ
по хрс̃тѣ̀ бра́тіе. но вы̀ ѿ иди́те ко́ждо
ва́съ, идѣ́же мо́жете спасти́ся. и
пото́мъ приведе́нъ бы́сть ко агрикола́ю,
и біе́нъ пру́ты ѻловя́ными. посе́мъ
жи́лами говя́жіими сухи́ми, и непо­
кори́ся ѿврещи́ся хрс̃та̀. та́же пома́заша
єго̀ ме́домъ, распя́ша ѝ на́ древѣ.
и ѡста́виша ѝ пред̃ гра́домъ, я́кѡ да ѿше́­
ршне́й и ѿму́хъ уя́звенъ бы́въ у́мрет̃.
и помоли́вся бг҃у ст҃ы́й, предадѐ дх҃ъ
сво́й. посе́мъ взя́ша мо́щи єгѡ̀ хрс̃ти­
я́не, и положи́ша я̀ во́ гробѣ, и погре­
бо́ша чс̃тнѡ;

Вто́йже де́нь сло́во іѡ҃а́нна златоу́ста­
го є́же не проповѣ́дати бж҃ества̀ не
вѣ́рнымъ.

Речѐ гдс̃ь, не дади́те ст҃а́я псѡ́мъ, ни по­
мещи́те би́сера пред̾ свинія́ми. а́ще
бо и пре́же повелѣ̀ гдс̃ь гл҃я, я́коже
слы́шасте воу́ши, проповѣ́дайте на
распу́тіи; но непроти́вно є́сть сѐ
пре́жнему; нитогда́ бо повелѣ̀ всѣ́мъ
про́стѡ рещѝ. всѣ́хъ же здѣ̀ и́же без̃за­
ко́ннѡ живу́щихъ и не и́стиннѡ прилѣжа́­
ніе къ вѣ́рѣ иму́щихъ ѿню́дъ, наречѐ
свинія̀. поне́же недосто́йны такова́го
слы́шанія. сѐ у́бѡ и па́велъ явля́я
гл҃аше, пло́тный человѣ́къ не при­
е́млетъ дх҃о́вныхъ, уро́дъство бо єму̀
є́сть, и не хо́щетъ прія́ти гдс̃нихъ по­
велѣ́ніи. тѣ́мъ и повелѣва́етъ не ѿ­
ве́рсти и́мъ двере́й и́хъ, поне́же ѿ єсте­
ства̀ немо́гутъ тѣ́хъ навы́кнути. нибо̀
свинія̀ вѣ́сть же́м̾чюга что̀ є́сть.
та́кѡ и ст҃а́я попру́тся тѣ́ми, невѣ́ду­
ще что̀ су̑ть та̀. и пото́мъ воѻружа́тъ­
ся наня̀. и до́брѣ речѐ воз̃вра́щшеся расто́­
ргнутъ вы̀ и лицемѣ́руютъ кро́тостію,
{#л. уп҃}

до́ндеже навы́кнут̃. иєгда̀ науче́ни бу́дут̃,
поно́сятъ и ѡблыга́ютъ и смѣю́тся, я́кѡ
прельсти́вшіи на́съ. сегѡ̀ ра́ди и па́велъ
к̾ тимоѳе́ю пиша̀ гл҃аше, мно́зи ле́стію
приступа́ютъ к̾ вѣ́рѣ, ѿни́х̾ же и ты̀ храни́­
ся. ѕѣло́ бо проти́вятся на́шим̃ словесє́мъ.
и па́ки речѐ, сн҃е, да не прельстя́тъ тебѐ
му́жи нечести́віи. ра́дуют̾бося ті́и ѡ
всѣ́хъ и́хъ же не нави́дитъ гдс̃ь. сегѡ̀
ра́ди напра́сна нани́хъ па́губа пріи́детъ.
И вся́къ не спасе́ный ѿ гдс̃а впаде́тъ вню̀.

Вто́йже дн҃ь сло́во ст҃аго оц҃а на́шего
мѡисе́я ѡротѣ́хъ и ѡклевета́хъ.

Прро̃къ гл҃етъ, я́кѡ тогѡ̀ ра́ди заключи́­
ся нб҃о непопусти́ти на́землю дождя̀,
я́кѡ да не клену́тся человѣ́цы бг҃омъ
и ст҃ы́ми єгѡ̀, и дру́гъ дру́га не го́нит̃ до
кля́твы. и́бо ст҃у́ю цр҃ковь невѣ́сту хв҃у
рото́ю скверня́тъ, приводя́ще сн҃а закала́­
ютъ пред̃ ма́терію, и слу́хи же тоя̀ ма́тере
ро́ждьшія. и по́ дх҃у бра́та своегѡ̀ ст҃ы́мъ
креще́ніем̃, пію́тъ кро́вь заколе́ннагѡ сн҃а
мт҃ре тоя̀. тогѡ̀ ра́ди вся̀ нбс̃ныя си́лы со́
страхом̃ трепе́щутъ, зане́же гдс̃ь бг҃ъ не
вели́тъ чл҃ка до гна́ти до кля́твы и роты̀.

по и́стиннѣ бо сп҃съ на́шъ іс҃ъ хрс̃то́съ речѐ,
человѣ́цы сіѝ рото́ю мя чту́тъ и зна́ютъ.
сегѡ̀ ра́ди с̾ нб҃сѐ сходя́щь се́рпъ о́гненъ
заха́рія прро̃къ ви́дѣ иду́щъ на́ землю въ
долготу̀ два́десять лако́тъ, а в̾ ширину̀
де́сять лако́тъ. и ѡ се́мъ моля́шеся бг҃у,
да прояви́тъ єму̀. и пріи́де кнему̀ гла́съ
гл҃я. се́й є́сть се́рпъ, гнѣ́въ бж҃ій с̾ходя̀
натѣх̃, и́же на́кривѣ клену́тся и ротя́тся,
да пож̾же́тъ я̀, и дш҃я и́хъ огню̀ нега­
си́мому преда́стъ. бг҃у на́шему сла́ва нн҃ѣ
и прс̃нѡ и во вѣ́ки вѣкѡ́мъ;

Мцс̃а того́же въ е҃ де́нь. па́мять ст҃а́гѡ
сщ҃енно мч҃нка дороѳе́я єпкс̃па ти́р̾скагѡ,
бл҃гословѝ о́ч҃е.

Дороѳе́й прс̃нѡ воспомина́емый, єпкс̃пъ
бы́въ гра́да тѵ́р̾скагѡ {*ти́р̾}, вся́кое писа́ніе
кни́жное проше́дъ. бя́ше же побѣ́гнулъ
гоне́нія ра́ди. посконча́ніи же діокли­
тія́новѣ до́йде па́ки в̾тѵ́ръ {*в̾ти́р̾}, пасы́й
бж҃ію цр҃квь, да́же до іулія́на престу́пни­
ка. и зане́же не я́вѣ, но скро́внѣ, и спе́рва
боля́ръ ра́ди свои́хъ, убива́ше іулія́нъ
хрс̃тія́ны. Слы́шавъ же ст҃ы́й дороѳе́й,
ѿи́де ѿтѵ́ра {*и́} и до́йде во фракі́ю. но
и та́кѡ ѿ идолослужи́тель не угоньзѐ,
{#л. уп҃а}

я́тъ же бы́въ ѿ князе́й іулія́новыхъ,
и мно́га муче́нія претерпѣ́въ, ста́ръ сы́й;
стѡ́мъ бо и седми́мъ лѣ́томъ бы́въ.
в̾тѣ́хъ му́кахъ хрс̃то́ва ра́ди исповѣ́да­
нія, бл҃же́нную свою̀ дш҃ю предадѐ бг҃ови.
и мнѡ́га дш҃еполе́зная писа́нія изложи́въ
пе́рвіе, и изъ ѡста́вивъ;

Вто́йже де́нь, стра́сть ст҃у́ю мч҃нику
маркіа́на и ника́ндра.

Маркіа́нъ и ника́ндръ хрс̃то́ва му́че­
ника съ дружи́ною свое́ю, бѣ́ста
ѿстраны̀ єгѵ́пет̾скія {*єги́}. исповѣ́данія
же ра́ди я́же во хрс̃та̀ я́та бы́ста кня́­
ѕемъ, и ну́жена бы́ста ѿврещи́ся
хрс̃та̀, и поклони́тися и́долѡм̃, и непокори́ста­
ся. и пе́рвое біе́на бы́ста ѕѣлѡ̀. и ре́бра
єю̀ свѣща́ми подож̾го́ша. и повѣ́сивше
строга́ша я̀ ногты̀ желѣ́зными, до́нь­
деже пло́ть єю̀ ѿпадѐ на́землю. посе́мъ
затворена бы́ста в̾темни́цѣ є́ле жи́ва
су̑ща. и ту̀ яви́ся и́ма а́гг҃лъ гдс̃нь
и исцѣлѝ и́хъ. и помнѡ́зѣх̃ днє́хъ изы­
до́ста ис̾ темни́цы з̾дра́ва. и па́ки пред̾­
ста́ста пред̃ суди́щем̃ кня́зю, и мнѡ́ги ѿне­
вѣ́рныхъ чюдє́съ ра́ди ѡбрати́ста к̾ бг҃у.

и па́ки предана̀ бы́ста в̾ темни́цу, и гла́­
домъ и жа́ждею страда́вша, и ту̀ скон̾­
ча́стася.

Вто́йже дн҃ь па́мять преподо́бнагѡ оц҃а
на́шегѡ ѳео́дѡра чюдотво́рца.

Прпд̃бный оц҃ъ на́шь ѳео́дѡръ, ѿю́ности
бѣ̀ скопе́цъ, ѡста́ви же ми́ръ, и бы́сть
мни́хъ. и посе́мъ и́де в̾ пусты́ню
иѡрда́нову, и мно́го потружа́вся на добро­
дѣ́тель. тѣ́мъ прія́тъ ѿ бг҃а да́ръ чюдотво­
ре́нія. и сѐ єму̀ ну́жа бы́сть изы́­
ти в̾ коньстя́нтинь гра́дъ нѣ́кія ра́ди
потре́бы, и влѣ́зшу єму̀ в̾ кора́бль,
и заблуди́вшу кораблю̀ в̾ пучи́нѣ мор̾стѣ́й,
и скудота̀ бы́сть водѣ̀, и во мно́зѣ уны́­
ніи и недоумѣ́ніи бя́ху кора́бленицы и
вса́дницы. воста́в̾ же ѳео́дѡръ, ру́цѣ
воздѣ́въ на́ нб҃о к̾ бг҃у спаса́ющему дш҃я
на́шя ѿ сме́рти, и сотворѝ мл҃тву,
и прекрс̃тѝ во́ду зна́меніемъ крс̃тнымъ,
и гл҃а кора́бленикѡмъ, бл҃гослове́нъ бг҃ъ,
почерпи́те воды̀ єли́кѡ вы̀ є́сть тре́бѣ.
и напо́лниша вся̀ сосу́ды своя̀ ѿ́моря
сла́д̾кія воды̀, и всѝ просла́виша бг҃а.
и поклони́шася ста́рцу до землѝ,
{#л. уп҃в}

ѻ́нъже речѐ, прости́те мя госпо́діе моя̀.
не мене́ бо дѣ́ля бы́сть сѐ, но ва́съ ра́ди
скорбя́щихъ воды̀ дѣ́ля. и и́на сотворѝ
чюдеса̀, и преста́вися къ бг҃у.

Вто́йже дн҃ь сло́во ѡ прему́дрости,
ѡ наказа́ніи ча́дъ.

Внемли́те себѣ̀ извѣ́стнѡ ѡ гл҃емыхъ.
казни́те дѣ́ти своя̀ и́з̾млада. гл҃етъ бо
прему́дрость, любя́и сн҃а своего̀, жезла̀
нанем̃ нещадѝ, казнѝ єго̀ ѿю́ности, да на ста́­
рость твою̀ поко́ит̾ тя̀. а́ще ли и́з̾млада
не на ка́жеши єго̀, то̀ ѡжесточа́въ не по­
вине́тъ ти ся. Гл҃етъ бо в̾ четве́ртыхъ
црс̃твахъ си́це. бы́сть нѣ́кто сщ҃е́нникъ
во ієрс̃ли́мѣ и́менемъ илі́я, смире́нъ и кро́­
токъ, уго́дникъ бж҃ій на вся́ко дѣ́ло бл҃го.
сі́и же бѣ̀ двою̀ отроча́ту ѻте́цъ. и водя̀ єю̀
наѕло̀ ше́ствующа, и неказня́ше и́хъ,
ни воз̾браня́ше и́мъ ни уча́ше боя́тися
бг҃а, и ка́зни не нанесѐ дѣ́тємъ своимъ
жеѕло́мъ, но во́лю и́мъ бя́ше в̾да́лъ.
они́же в̾ бу́ести и в̾ ненаказа́ніи всѐ ѕло́е
творя́ста. И речѐ бг҃ъ илі́и ѻц҃у и́хъ, поне́
же не казни́лъ єсѝ сы́на своя̀ до́брѣ,

нн҃ѣ да у́мрета сы́на твоя̀ мече́мъ.
и ты̀ са́мъ, и ве́сь до́мъ тво́й по­
ги́бнетъ сн҃у твое́ю дѣ́ля, поне́же не
наказа́лъ єсѝ я̀ до́брѣ боя́тися.
а́ще бо и мно́гѡ лѣ́тъ сщ҃е́н̾ствова во
іи҃ли, и бг҃оуго́днѡ поживѐ, но поне́ же
дѣтмѝ не печа́ловался с̾ прилѣжа́ніемъ,
тогѡ̀ ра́ди ѕлѣ̀ поги̑бе. слы́шасте ли
бра́тіе словеса̀ сія̀, я́кѡ илі́и та́кѡ со­
твори́лъ бг҃ъ в̾ ве́тсѣмъ зако́нѣ, да что̀
подъи́мемъ мы̀ въ но́вѣмъ су̑ще за­
ко́нѣ, неуча́ще дѣтє́й свои́хъ на добро̀.
ѡсе́мъ и іѡ҃а́ннъ златоу́стый гл҃етъ. и́же
дѣтє́й свои́хъ цѣлому́дрію ненаказу́етъ,
то́й горѣ́е разбо́йникъ ѡсу́дится.
разбо́йникъ бо тѣ́ло сме́рти предае́тъ,
а ѻ́нъ дш҃ю. но вы̀ бра́тіе и ча́да люби́­
мая, учи́те дѣ́ти своя̀ и́з̾млада всему̀
бж҃ію зако́ну и добру̀ нра́ву, да стра́хъ
гдс̃нь пріе́мъше не ѡпеча́лятъ вы̀ на
ста́рость ва́шю. а́ще ли не послу́шаютъ
тебѐ дѣ́ти твоѝ, то̀ нещадѝ нани́хъ
лозы̀, я́коже прему́дрость бж҃ія глаго́­
летъ. до шестѝ ра́нъ, илѝ до двуна́де­
сяте ра́нъ да́си сн҃у. а́ще ли вели́ка вина̀,
{#л. уп҃г}

и ты̀ два́десят̃ ра́нъ да́си. Бра́тіе наказу́й­
те дѣ́ти своя̀ бг҃а боя́тися, а ѕлы́хъ дѣ́лъ
ѡста́тися, да не ѕлѣ̀ поги́бнете. ієре́и же
наказу́ите дѣ́ти своя̀ дх҃о́вныя, єпите­
мія́ми с̾вя́зывающе. а́ще ли здѣ̀ вы̀
не связу́ете, то̀ жду́тъ ва́съ неразрѣши́­
мыя у́зы. роди́мыя же дѣ́ти своя̀
учи́те наказу́юще не сло́вомъ то́чію, но
и ра́нами, да не пріи́мѣте зани́хъ ны́нѣ
ѿ человѣ́къ сра̑ма, а въ бу́дущій вѣ́къ
муче́ніа сни́ми. се́же не єди́нѣмъ попо́мъ,
но и всѣ́мъ христія́нѡмъ, да наказу́ютъ
дѣ́ти своя̀ до́брѣ;

Вто́йже де́нь сло́во ст҃а́гѡ васи́лія
ѡ сме́рти.

Бра́тіе убои́мся сме́рти и ужа́снемъся.
убои́м̾же ся и род̃ства̀ о́гненаго, я́кѡ вѣ́ченъ
є́сть. убои́мся ѻгня̀, я́кѡ не гаси́мь
є́сть. убои́мся грозы̀, я́кѡ не прелага́е­
тся въ теплоту̀. убои́мся тмы̀, я́кѡ
не прелага́етъся в̾ свѣ́тъ. убои́мся че́рь­
вій, я́кѡ без̾сме́ртенъ є́сть. убои́мся
а́гг҃лъ и́же над̾ судо́мъ, я́кѡ без̾ ми́ло­
стиви су́ть. го́ре мнѣ̀, я́кѡ тебѣ̀ гдс̃и
вопію́щу, непослу́шахъ глаго́люща ми.

дш҃е ѿста́ни ѿ вся́когѡ скверне́нія, и
вся́ческихъ вещє́й я́кѡ су̑ть ме́рз̾ска.
го́ре мнѣ̀ я́кѡ хра́мъ тво́й ѡскве­
рни́хъ, и ст҃ы́й дх҃ъ ѡскорби́хъ. бж҃е
пра́ведна дѣ́ла твоя̀ и суды̀, зама́лъ
грѣ́хъ пи́щи ра́йскія, и црс̃твія нбс̃нагѡ
разлуча́юся, и неумира́я му́чюся. за пло­
тны́я сла́сти ѻ́гневи предаю́ся. пра́ве­
дный су́дъ гдс̃нь, уча́ху мя, и не послу́­
шах̃. послушествова́ху ми, а́зъ же руга́хся.
та́кѡ на́чнеши гл҃ати. а́ще ключи́тъ­
тися пре́же покая́нія исто́ргнутися
чл҃че, илѝ гее́ны убо́йся, илѝ к̾ црс̃тву
потщи́ся. бра́тіе ничто́же пре́же чти́те
ра́звѣ не презри́мыя любвѐ. мнѡ́го бо
согрѣша́емъ по вся̀ днѝ и времена̀ и часы̀
и но́щи, да сегѡ̀ ра́ди любо́вь имѣ́емъ.
сія́ бо покрыва́етъ мнѡ́жество грѣхѡ́въ.
кі́й успѣ́хъ ча́да а́ще ве́сь ми́ръ пріи́мем̃,
а спаса́ющія любвѐ не и́мамъ. кі́й успѣ́хъ
а́ще кто̀ ѻбѣ́дъ вели́къ сотворѝ, и убѣ­
ди́тъ цр҃я илѝ кн҃зя, и всѐ пригото́витъ
мно́го єли́ко же тре́бует̃, а со́ли не и́мать
єда̀ мо́жется я́сти ѻбѣ́дъ то́й. не то́же
єди́но є́же бу́дет̃ изгото́вилъ своя̀ бл҃га́я,
{#л. уп҃д}

до́мъ сотворѝ ст҃о́му дх҃у. сія̀ у́бѡ і́ѡва
укрѣпѝ. что́же гл҃ю вя́щше, сія̀ сн҃а
бж҃ія съ нб҃сѐ к̾ на́мъ с̾ведѐ. любвѐ ра́ди
всѐ до́брое яви́ся. сею́ бо сме́рть уме­
ртви́ся, и а́дъ плѣни́ся, и ада́мъ
ѡбнови́ся. любвѐ ра́ди єди́но ста́до
бы́сть а́гг҃лѡмъ и чл҃кѡм̃. любвѐ ра́ди ра́й
ѿве́рзеся. любвѐ ра́ди црс̃тво нбс̃ное про­
повѣ́дася. сія̀ пусты́ни явѝ я́кѡ гра́­
ды. сія̀ рыбаря̀ уму́дри. сія̀ го́ры
и верте́пы испо́лни пѣ́сньми. сія̀ научѝ
му́жи и жены̀ тѣ́снымъ и ско́р̾бнымъ
путе́мъ ходи́ти. но доко́лѣ не ѡста́влю
любо́внагѡ словесѐ. а́гг҃ли бо не мо́гутъ
исповѣ́дати я́же ѡ любвѝ су̑ть, испра­
вле́ніи бл҃же́нныхъ. любы̀ приноси́тель
всему̀ добру̀ дѣ́лу. бл҃же́нъ чл҃къ и́же
и́стину нелицемѣ́рну любо́вь из̾ѡбрѣ́тъ.
я́коже гл҃а влд̃ка, я́кѡ бо́льши сея̀ любвѐ
никто́же и́мать, да кто̀ дш҃ю свою̀
преда́стъ за и́скреняго своего̀. сію̀ лю­
бо́вь имы́й па́велъ апс̃лъ гл҃аше. любы̀
бли́жнему ѕла̀ не твори́тъ. не возда́й же
никому́же ѕла̀ за ѕло̀. ни клеветы̀
за клевету̀. сію́ же любо́вь изъѡбрѣ́тъ
{#л. уп҃е}

но са́м̾ся ѡбря́щетъ посра́мленъ ѿ зва́­
ныхъ. та́кѡ и здѣ̀ бра́тіе моя̀, кі́й
успѣ́хъ толи́кѡ труди́тися въ вѣ́тръ
без̾любвѐ. без̾любви́ бо вся́ко дѣ́ло нечи́­
сто. а́ще кто̀ и́мать дѣ́вьство, илѝ
поще́ніе, илѝ бо́дрость, илѝ мл҃тву, илѝ
страннопрія́тіе, илѝ да́ръ прино́ситъ бг҃у
и плоды̀ своя̀ цр҃кви, ли и́но что̀ твори́тъ
без̾любвѐ, всѐ нивочто́же явля́ется пре́дъ
бг҃ом̃, не тре́буетъ бо и́хъ. не мы́сли без̃любвѐ
ничто́же твори́ти ни когда́же. а́ще ли рече́­
ши не хощу̀ с̾ бра́томъ мои́мъ смири́тися,
но хрс̃та̀ люблю̀, ѡбря́щешися ло́жь,
ѡблича́етъбо тя іѡ҃а́ннъ апс̃лъ. кончи́­
набо зако́ну любы̀. Ѽле си̑ла любвѐ
непобѣди́мыя. Ѽле си̑ла любвѐ бесчи́­
сленыя. ничто́же нѣ́сть любвѐ бо́лѣ,
ни на нб҃сѝ ни на землѝ. сія̀ ст҃а́я любы̀
є́сть глава̀ добродѣя́нія. любы̀ є́сть
зна́меніе ксему̀ добродѣя́нію. любы̀
є́сть со́ль вся́кому. любы̀ не превозно́­
сится. любы̀ є́сть кончи́на зако́ну.
сія̀ всели́ся въ срд̃це а́велево. сія̀ па­
тріа́рхѡмъ помога́ше. тѣ́мъже сію̀ хра­
ня́тъ. сія̀ въ прро̃ки всели́ся. сія̀ дв҃да

ни єди́ногоже непре́зри, ни зави́ди, ни
ропщѝ, ни ненави́ди бра́та своего̀ нико­
гда́же. не то́кмѡ тѣ́хъ любѝ и́же тя
лю́бятъ, но и ненави́дящыя тя любѝ.
сію̀ ст҃у́ю любо́вь имы́й первому́ченикъ
стефа́нъ, за ты́я и́же бія́ху и ка́ме­
ніемъ, моля́ше бг҃а глаго́ля, гдс̃и
не поста́ви и́мъ грѣха̀ сегѡ̀. бл҃же́нъ
чл҃къ и́же пре́же всегѡ̀ из̾ ѡбря́щетъ ю̀.
сему̀ мзда̀ на вся́къ де́нь расте́тъ.
сему̀ вѣне́цъ угото́вися. сего̀ всѝ а́гг҃ли
блажа́тъ. ѿ сегѡ̀ бг҃ъ не ѿлуча́ется
ни когда́же. бг҃ъ любы̀ є́сть, да и́же
живе́тъ въ любвѝ, въ бз҃ѣ живе́тъ,
и бг҃ъ вне́мъ. и любо́вію всѐ є́сть.
бг҃у на́шему сла́ва нн҃ѣ
и прс̃нѡ и во вѣ́ки
вѣкѡ́мъ
;

Мцс̃а того́же, въ ѕ҃ дн҃ь. прпд̃бнагѡ оц҃а
на́шегѡ ілариѽ́на но́вагѡ, игу́мена далъ­
ма́т̾скагѡ, бл҃гословѝ о́ч҃е.

Се́й бл҃же́нный іларіѽ́нъ, бя̑ше сн҃ъ петра̀
каппадо́чанина, мт҃ре же ѳеодѽ́сіи, ѡбою
бл҃гочести́вою и бголюбе́зною, но и зна́емь
цр҃е́ви. бя̑ше бо ѻц҃ъ єгѡ̀ хлѣ́бы подая̀
на трапе́зѣ црс̃тѣй. Роди́вшужеся прпд̃бно­
му и ѿдоє́ну, прилѣ́жнѡ нака́занъ бя̑ше
сщ҃е́нным̃ писа́ніемъ. двадеся́тымъ же лѣ́том̃
бы́въ, и ѡста́ви по єѵг̃а́лію ѻц҃а и мт҃рь,
и до́мъ и бога́тьство, и бы́сть мни́хъ, во
ѻби́тели ісѷхі́я вертогра́ды къ визан̾ті́и.
Пото́мъ прише́дшу во оби́тель далма́т̾скую,
и пріє́мъ а́гг҃льскій ст҃ы́й ѻ́бразъ вели́кій,
и молча́ніе и послуша́ніе и смире́ніе мно́гое
имы́й. рабо́таше же вертогра́даріе задесять
лѣ́тъ, и дш҃ю я́кѡ сл҃нце просвѣти́въ,
бы́сть чюдотво́рецъ. ду́ха бо не чи́стаго про­
гна́въ ѿ нѣ́коегѡ ю́ноши, и и́на мно́га содѣ́я
чюдеса̀. Игу́менъ же оби́тели тоя̀ сщ҃е́нника
того̀ поста́ви и не хотя̑ща. та́же уме́ршу
игу́мену, по прехожде́ніи нѣ́колицѣ лѣ́тъ,
ѿскочи́въ се́й ѿсобѡ́ра, и прише́дъ во оби́тель
чи́стыхъ. Таково́е же мни́си увѣ́дѣвше,
{#л. уп҃ѕ}

воспомяну́вше ники́фору патріа́рху ст҃ѣ́­
ишему. патріа́рхъ же цр҃ю̀ воспомяну́въ.
цр҃ь же посла̀ привестѝ єго̀. и умоле́ніемъ
цр҃е́вымъ и патріа́рховымъ, бы́сть игу́менъ
и архи́маритъ, я́коже та́мѡ ѡбы́чай бя̑ше
ѿ собо́ра воѡбраже́нъ. и ѻ́смь лѣ́тъ хрс̃то́ву
па́ству хрс̃топодо́бнѣ пасѐ. льву́ же ѕвѣро­
имени́ту цр҃ьствія ски́петры воспри­
є́м̾шу, и ст҃ы́я ико́ны низло́жьшу,
приведе́нъ бы́въ и се́й ст҃ы́й въ ца́рьская,
и ну́димь бя̑ше прекосло́віемъ, я́кѡ
скве́рненъ мни́мъ, содержа́ніем̃ ст҃ых̃ икѡ́нъ,
є́же кни́мъ соѡбще́нія. но се́й того̀
ѡбличи́въ, и без̾бо́жна и но́ваго престу́­
пника наре́къ, и на гнѣ́въ того̀ подви́же.
тогда̀ мнѡ́ги му́ки и разли́чны на бл҃же́­
ннаго нане́съ, и затворѝ єго̀ в̾ темни́цѣ.
По́времени же па́ки предъста́вивъ єго̀,
и мнѡ́го истяза́въ предадѐ єго̀ єдино­
мы́сленому своему̀ патріа́рху. и́же и то́й
подо́бная сотвори́въ, во мра́чнѣи темни́­
цѣ затворѝ ст҃а́го, и за мно́гѡ дні́й
друча́ше єго̀. ни хлѣ́ба же ни воды̀ да́­
ти єму̀ повелѣ̀. таково́е же мни́си увѣ́­
дѣвъше, до идо́ша къ царю̀ и реко́ша

пода́й на́мъ па́стыря на́шегѡ ѽ царю̀, и на
мно́зѣ ѡбѣща́емтися твое́й повину́тися
во́ли. Ца́рь же пора́довася ѡбѣща́нію и́хъ
подадѐ и́мъ ст҃а́го сотща́ніемъ. Ст҃о́му же
препроводи́вшу лѣ̑то во ѻби́тели, и ма́лѡ
поко́я стрс̃тє́мъ и гла́дови воспріе́мшу,
су́етьствоваше ца́рь ѡбѣща́нія жды̀ {*ждя̀}. пона­
ходи́в̾ же я́кѡ пору́ганъ бы́сть, и мни́хи
зазли́въ, ст҃а́го же в̾ темни́цу всадѝ.
та́же посла̀ єго̀ во оби́тель фане́ову, и ту̀
в̾ тѣснотѣ̀ за ше́сть мцс̃ъ в̾ темни́цѣ
сѣдя́ше, лю́тѡ и неми́лостивнѡ и же́стокѡ
оби́тели тоя̀ па́стыря су́щагѡ. па́ки же
ца́рьскимъ повелѣ́ніемъ ст҃о́му ѿведе́ну
бы́вшу, ласка́ніемъ ѡкуша́шеся ѕвѣроиме­
ни́тый того̀ раз̾врати́ти. и я́кѡ не послу́ша
єго̀ во оби́тель кикловѣ́еву посла̀ ѝ, и та́мѡ
в̾ темни́цѣ ме́рзцѣй затворя́ется. и ѡ­
ѕло́бленъ за́два лѣ́та и ше́сть мцс̃ъ. и ѿту́­
ду изведе́нъ, и па́ки велмѝ біе́нъ, и во про­
ти́льскій гра́дъ заточе́нъ бы́сть. царя́же
мечѝ с̾сѣко́шя и ду́шю свою̀ ѕлѣ̀ изве́ргъ,
в̾ цр҃кви, идѣ́же ст҃у́ю ико́ну хрс̃то́ву
пе́рвіе ѡбруга́въ низложѝ. Пріе́мже црс̃тво
михаи́лъ тра́влый. тогда̀ ст҃ы́й ѿпуще́нъ.
{#л. уп҃з}

прія́тъ бы́сть нѣ́коею жено́ю вѣ́рною, и
бл҃гочести́вою во свое́мъ єя̀ стяжа́ніи,
и засе́дмь лѣ́тъ тому̀ послужи́вши.
ѳео́филу же црс̃твующу, и вся̀ исповѣ́­
дники собра́въшу. тогда̀ и бл҃же́нный ила­
ріѽ́нъ приведе́нъ бя̑ше и испыта́емь,
и неповину́вся ца́рьскому повелѣ́нію, па́чеже
и ѡбличи́въ єго̀ я́ко без̾бо́жна и престу́­
пника. и тогѡ̀ ра́ди сто̀ и се́дмьдесятъ
ра́нъ по плещу̀ пріе́мъ, и во афусі́йскій
о́стровъ заточе́нъ бы́въ. и ис̾сѣ́къ
та́мѡ кѣ́лію велмѝ ма́лу, и ту̀ пре­
бы́сть седмьлѣ́тъ. Посе́мъ ѳео́филу
уме́ршу. цр҃ца же єгѡ̀ ѳео́дѡра,
вся̀ исповѣ́дники, и́же во изгна́ніи
собра́вши въ црс̃твующіи гра́дъ, и право­
сла́віе укрѣпѝ, ст҃ы́хъ ра́ди икѡ́нъ,
во ображе́нія же и поклонянія. ѿпу­
ще́нъже бы́въ и се́й, и воспріе́мъ свою̀
оби́тель, блиста́я чюдесы̀.
и затрилѣ́та пожи́въ. и бг҃о­
уго́днѡ уч҃нки упра́вль,
къ гдс̃у ѿи́де.

Вто́йже де́нь сло́во ѡ слу́жбѣ, ка́кѡ
стоя́ти въ цр҃кви со́страхомъ бж҃іимъ.

Пріидѣ́те послу́шайте ча́да, и возлю́бле­
нная моя̀ бра́тія, в̾ цр҃квь бж҃ію при­
ше́д̾ше, да повѣ́мъ ва́мъ, я́кѡ с̾ вели́ким̃
блюде́ніемъ и со́ страхомъ бж҃іимъ послу́­
шаемъ в̾ ча́съ пѣ́нія ст҃ы́я литоргі́и.
и да не гл҃емъ ѡжите́йскихъ в̾ цр҃кви бж҃іей.
си́це бо и пред̾ земным̃ цр҃е́мъ пред̃стоя́тъ со́
страхом̃, да не ѿ цр҃я себѣ̀ вину̀ ѡбря́щут̃.
и толи́кѡ тща́ніе к̾ земно́му цр҃ю̀ творят̃,
єли́кѡ предни́мъ не смѣ́ютъ бра́тъ на бра́та
и возрѣ́ти. а́ще ли во́зритъ, а́біе я́ростію
цр҃е́вою біе́нъ быва́етъ; коли́кѡ у́бѡ бра́тіе
моя̀ возлю́бленная, пред̾стоя́ще в̾ цр҃кви
пре́д̾ бг҃омъ; лѣ́по у́бѡ никому́ же по́вѣсти
дѣ́яти дру́гъ со́ другомъ, но то́кмѡ
у́мъ имѣ́ти в̾ пѣ́ніи и в̾ мл҃твѣ. да не пре­
ѡби́ди в̾ цр҃кви мо́лвя и смѣя́ся и дре́мля
и мня́ся не согрѣша́ти; но слу́шай и вне­
млѝ что̀ гл҃еши усты̀ и язы́комъ свои́мъ
и вся́ку в̾ то̀ вре́мя ѿве́рзи печа́ль, я́кѡ
цр҃я всѣ́хъ под̾є́мля; цр҃ь бо црс̃твующим̃.
Да и́же хотя́ше спс̃ни бы́ти, то̀ подоба́ет̃
на́мъ цѣлому́дрены бы́ти в̾ ча́съ моле́нія,
{#л. уп҃и}

а не тща́тися на пу́стошъ прельща́ющи­
ся ѿдія́вола, всѣ́ми ко́зньми и нера­
зу́міем̃. не поразумѣ́емъ ли я́кѡ пра́вдою
нано́ситъ бг҃ъ, и наво́дитъ гнѣ́въ на на́съ
согрѣша́ющихъ. но и о́нѣхъ ра́ди и́же не за­
преща́ютъ по повелѣ́нію па́стуси, и непокори́­
выхъ и́же ненауче́ныхъ ѿпопо́въ, и непо­
слушли́вых̃, вели́къ бо є́сть тѣ́мъ грѣ́хъ
ті́и бо гл҃ютъ, не умѣ́емъ пѣ́ти. почто̀
неумѣ́ете пѣ́ти; не разумѣ́ете ли гл҃емых̃
в̾ цр҃кви. хо́щете ли да реку̀ ва́мъ; чесо̀
ра́ди всегда̀ в̾ ча́съ служе́бный внѣ̀ стоитѐ,
игра́ете и смѣе́теся; сегѡ̀ ра́ди не разу­
мѣ́ете быва́ющихъ в̾ цр҃кви, єгда̀ діа́кону
гл҃ющу, во́нмемъ. да во́нмемъ гл҃ющая
словеса̀ ѿна́съ, вѣ́рую воєди́наго бг҃а оц҃а все­
держи́теля, и во єди́наго гдс̃а іс҃а хрс̃та̀ сн҃а
бж҃ія єдиноро́днаго, и́же ѿ оц҃а рожде́ннаго
пре́жде всѣ́хъ вѣ́къ. и́мъже вся̀ бы́ша,
на́ нб҃си и я́же на землѝ, и є́же в̾ бе́з̾днах̃.
и въ ст҃а́гѡ дх҃а и животворя́щагѡ, глаго́­
лавшаго прро̃ки. и во єди́ну ст҃у́ю собо́­
рную и апс̃льскую цр҃ковь. что̀ ра́ди ст҃а̀;
я́кѡ бг҃ъ пребыва́етъ вне́й. что̀ ра́ди собо́­
рная; я́кѡ ѿ всѣ́хъ язы́къ вѣ́рующих̃,

и креща́ющихъся цр҃ковь бж҃ія пріе́млетъ.
са́мъ бо гдс̃ь речѐ, я́кѡ приходя́щих̃ ко мнѣ̀ не
из̾жену̀ во́нъ. и пото́мъ діа́конъ гл҃етъ,
ста́немъ до́брѣ. нестоя́ніе нога́мъ гл҃етъ,
ни вну́трь и́на и внѣ̀ по́мыслъ. ниту̀ сто­
я́нія, а внѣ̀ помина́ніе ѡ скотѣ̀ и ѡ ни́­
вахъ и ѡ виногра́дѣхъ, и нечи́стыхъ помы­
слѡ́хъ, и про́чеє житія̀ сегѡ̀ печа́ли.
ста́немъ со́ страхомъ и́же со всѣ́мъ бгоразу́­
міемъ пред̾стоя́ти въ цр҃кви бж҃іей.
во́нмемъ ст҃о́е возноше́ніе, и є́же слу́шати
ѿ всегѡ̀ срд̃ца своегѡ̀ гл҃емая ѿ ієре́я, а небла­
зни́тися умо́мъ и́намѡ. дія́кону гл҃ю­
щу, ми́ромъ гдс̃у прино́сим̃. мы́же ѿвѣща́­
емъ, млс̃ть ми́ръ же́ртва, и пѣ́ніе. млс̃ть
гл҃етъ нани́щыхъ, ми́ловати и поко́ити
и́хъ. ми́рже со всѣ́ми имѣ́ти. же́ртва
и пѣ́ніе, да пріи́метъ бг҃ъ же́ртву
на пред̃лежа́щей трапе́зѣ, за славосло́віе срд̃ца
твоегѡ̀. ієре́ю гл҃ющу, горѣ̀ и́мамъ срд̃ца̀,
ѡбѣща́ющымся на́мъ и гл҃ющимъ, и́мамъ
къ гдс̃у, тре́буемъ млс̃ти єгѡ̀. поми́­
луемъ же в̾ бѣда́хъ, а́лчющыя, и стра́­
нныя и нагі́я, и и́же в̾ болѣ́знехъ лежа́­
щыя, и втемни́цахъ су́щихъ. вся́ бо сія̀
{#л. уп҃ѳ}

ст҃а́я слу́жба помина́етъ, до́брѣ творя́­
щыя, и бл҃годѣ́ющыя во ст҃ы́хъ цр҃квахъ
ми́лующыя ни́щыя. и єре́й гл҃етъ,
побѣ́дную пѣ́снь принося́ще. что̀ ра́ди
побѣ́дную; да бж҃іею бл҃года́тію сохраня́е­
ми, воздади́мъ трист҃у́ю пѣ́снь бг҃у
на́шему. моля́щеся єму̀ и ми́ли дѣ́ю­
ще, да млс̃ть кна́мъ пока́жетъ, и спа­
се́тъ на́съ ѿ вся́когѡ ѕла̀, и да изба́­
витъ ны̀ ѿ всѣ́хъ грѣ́хъ, и по­
ми́луетъ ны̀ я́кѡ єди́нъ
бл҃гъ и чл҃ко­
лю́бецъ.

Вто́йже дн҃ь сло́во ст҃а́гѡ васи́ліа, да не
преѡби́дятъ рабѝ господє́й свои́хъ.

Єли́цы ку́пленіи рабѝ ко и́ночеству восхо­
тя́тъ пріитѝ, утѣ́шити и́хъ, и на­
каза́въ, ѿсла́ти къ господє́мъ и́хъ, по
подо́бію ст҃а́гѡ апс̃ла па́вла, и́же ани́сима ро­
ди́въ єѵг̃а́ліемъ, посла̀ к̾ филимо́ну, возвѣ­
стѝ яре́мъ рабо́тный ѡ не́мъ. и пе́рвое
ѡ не́мъ моли́въ, ѿя́ти ѿ негѡ̀ преще́ніе пове­
лѣва́я, помина́я гдс̃а ре́кшаго, а́ще ѡста́ви­
те чл҃кѡмъ согрѣше́нія и́хъ, ѡста́витъ
и ѻц҃ъ ва́шъ нбс̃ный согрѣше́нія ва́шя.

и́же бо разлучи́ся в̾ ма́лѣ ѿ тебѐ, да вѣ́­
чна того̀ пріи́меши, и не я́кѡ раба̀, но
я́кѡ бра́та люби́маго. а́ще бо ѕо́лъ госпо­
ди́нъ кому̀ лучи́тся, без̾зако́нная
повелѣва́я твори́ти къ преступле́нію за́по­
вѣдей, и́стиннагѡ бг҃а и гдс̃а на́шегѡ іс҃а
хрс̃та̀, да не послу́шаетъ єго̀, а́ще и рече́­
нно бы́сть рабѝ по́плоти повину́йтеся
господє́мъ, не я́кѡ чл҃комъ рабо́тающе, но
я́кѡ бг҃у, да сло́во бж҃іе не ху́лится и уче́ніе
и́ми. и́бо рабѝ пра́во живу́ще, напа́стьми
спасу́тся. бг҃у на́шему сла́ва нн҃ѣ и при́­
снѡ и во вѣ́ки вѣкѡ́мъ.

Мцс̃а того́же въ з҃ де́нь. стра́сть ст҃а́гѡ
сщ҃е́но му́ченика ѳеодо́та аг̾ки́рьскагѡ
бл҃гословѝ о́ч҃е.

Се́й бя̑ше во агки́рѣ гала́тстѣй. ѡкле­
вета́нъ же бы́сть к̾ ѳеоте́кну игѣ́мо­
ну, я́кѡ тѣлеса̀ ст҃ы́хъ дв҃цъ в̾ве́рже­
ная въ є́зеро, то́й изнесѐ и погребѐ.
приведе́нъ же бы́сть кнему̀ и испы́танъ,
и себѐ наре́къ препро́ста су̑ща, и па́че цр҃є́й
си́лнѣйша. и себѐ в̾да́въ на хрс̃то́во исповѣ́­
даніе. и ничто́же кня́зю внима́ти,
{#л. уч҃}

біє́нъ бы́сть ѕѣлѡ̀. та́же повѣ́шенъ
и поре́брѡмъ стро́ганъ. к̾ тому́же и главу̀
єму̀ ѿсѣко́шя.

Вто́йже де́нь ст҃ы́хъ жє́нъ, кѷріякі́и,
и кале́ріи, и ма́ріи.

Кѷріакі́а хрс̃то́ва мч҃нца и кале́рія и ма́­
рія бы̑ша ѿ́града кесарі́и палести́н̾скія.
ѿ нѣ́коегѡ̀ хрс̃тія́на научи́шяся вѣ́рѣ
хрс̃то́вѣ. и ѿверго́шася жє́ртвъ ме́­
рзскихъ и́дѡлъ, и приступи́шя
къ хрс̃ту̀, и крс̃ти́шяся. и сѣдя́ху
в̾ молча́ніи в̾ нѣ́коей хи́жѣ пребыва́юще
моля́ше бг҃а, я́кѡ да разори́тся ле́сть
и́дольская, доконца́ же восія́етъ хрс̃то́ва
вѣ́ра во все́мъ ми́рѣ. и да преста́нетъ
на хрс̃тія́ны гоне́ніе. и та́кѡ творя́ще,
ѡклевета́ни же бы̑ша ѿ и́долослужи́тєль
ко́ князю страны̀ тоя̀, и пону́жени
бы̑ша ѿ врещи́ся хрс̃та̀, и поклонитися
и́долѡмъ. и не восхотѣ́вше того̀ сотво­
ри́ти, му́чени бы́ша ра́нами
неща́днѡ. и в̾ тѣ́хъ му́кахъ
в̾ ру́цѣ бг҃у дш҃я своя̀
преда́ша.

Вто́йже дн҃ь сло́во ѡ оц҃ѣ дани́лѣ.

Се́й у́бѡ ѻц҃ъ дани́лъ ѿ младе́нства ѿре́­
кся ми̑ра, и живя́ше в̾ ски́тѣ. єди́ною же
прише́дшим̃ ва́рварѡмъ ивзе́мшимъ єго̀,
и пребы́сть сни́ми двѣ̀ лѣ́тѣ. и нѣ́кій
хрс̃толю́бецъ му́жь ис̾ купѝ єго̀ ѿни́хъ.
и па́ки полѣ́тѣ нѣ́коємъ прише́дше ва́рвари
и плѣни́ша ѝ, и сотворѝ сни́ми ше́сть
мцс̃ъ, и убѣжѐ ѿ ни́хъ. и па́ки трети́цею
прише́дъ плѣни́ша ѝ, и ѡѕло́биша єго̀
мнѡ́гими муче́ньми и ра́нами не ми́лости­
внѡ. єдиною у́бѡ взе́мъ ка́мень, и
уда́ри нечести́ваго ва́рвара и у́мре. и по
ѿбѣжа́ніи оц҃у̀ дани́лу ѿ ва́рваръ, раска́­
явшуся ѡ ве́щи убі́йства є́же сотворѝ.
и прише́дъ во алеѯан̾дрі́ю повѣ́да тимоѳе́ю
патріа́рху ѡ ве́щи. Слы́шавъ же патріа́рхъ
ѡ ве́щи укорѝ єго̀ ре́къ, я́кѡ бг҃ъ
изба́ви тебѐ два́щи ѿ ни́хъ, и трети́­
цею можа́ше из̾ба́вити тя̀, но ѻба́че у­
бі́йство нѣ́сть сѐ, ѕвѣ́ря бо уби́лъ єсѝ.
Влѣ́зъ же въ кора́бль ѻц҃ъ дани́лъ, и до­
плы̀ ри̑ма, повѣ́да и та́мѡ па́пѣ ѡ
ве́щи, є́же речѐ єму̀ патріа́рхъ алеѯа́н̾­
др̾скій. и ѿвѣща̀ єму̀ па́па ри́м̾скій,
{#л. уч҃а}

я́кѡ до́брѣ речѐ тѝ патріа́рхъ алеѯа́ндръ­
скій. ше́дшу же єму̀ въ констян̾ти́нь
гра́дъ, и во єфе́съ и ієрс̃ли́мъ, и во анти­
охі́ю, повѣ́доваше патріа́рхѡмъ я́же ѡ
убі́йствѣ; и то́ же сло́во слы́шавъ ѿвсѣх̃
патріа́рхѡвъ. па́ки же возврати́въся во
алеѯандрі́ю, и гл҃а в̾ себѣ̀, дани́ле дани́ле
убі́йство сотвори́вый, подоба́етъ ти самому̀
убіе́ну бы́ти. и ше́дъ к̾ судія́мъ гл҃а,
поне́же крамолу̀ с̾ нѣ́ким̃ сотвори́хъ, взе́мъ
ка́мень и уби́хъ єго̀. сегѡ̀ ра́ди молю́ся
ва́мъ, предади́те мя кня́зю, я́кѡ да
умори́тъ мя заубі́йство я́же сотвори́хъ,
и лише́нъ бу́ду вѣ́чныя му́ки. Слы́­
шавше же сія̀ судіѝ, в̾ сади́ша ѝ в̾ темни́­
цу, и пребы́сть вне́й три́десятъ днє́й.
пото́мъ же сказа́ша кня́зю я́же ѡ не́мъ.
кня́зь же изведѐ єго̀ истемни́цы, и
истяза̀ ка́кѡ убі́йство сотворѝ. и повѣ́да
єму̀ ста́рецъ всю̀ и́стину. Кн҃зь же по­
чюди́ся раз̾сужде́нію ста́рца, и ѿпустѝ єго̀
гл҃я, ше́дъ молѝ замя̀ а́вво, а́ще бы и дру­
гі́я се́дмь ва́рваръ уби́лъ. Ста́рецъ же гл҃а
в̾ себѣ̀, упова́ю на чл҃колю́біе бж҃іе, я́кѡ к̾ то­
му̀, не вмѣнит̃ ми бы́ти убі́йство блго̃ть.

ѿ нн҃ѣ же всего̀ в̾ даю̀ себѐ хрс̃ту̀, я́кѡ по
вся̀ днѝ живота̀ моегѡ̀ служи́ти ми єди́но­
му прокаже́нному, в̾мѣ́стѡ убі́йства, є́же
сотвори́хъ. и взя̀ ста́рецъ єди́ного ѿ прока­
же́нныхъ, и служа́ше єму̀. и гл҃а в̾себѣ̀,
а́ще у́мрет̃ прокаже́нный се́й, иду̀ во єгѵ́­
петъ, и возму̀ друга́го в̾мѣ́стѡ сегѡ̀. вси́
же скитя́не невѣ́дяху сегѡ̀, я́кѡ и́мать
прокаже́нна. никто́же мо́жаше ви́дѣти лицѐ
єгѡ̀, то́чію ста́рецъ єди́нъ. Во єди́н̾же
ѿ дні́и призва̀ ста́рецъ ученика̀ своего̀ снѣ́­
сти хлѣ́бъ по ѡбы́чаю. и по смотре́нію бж҃ію
прилучи́ся забы́ти ста́рцу, и ѡста́вити
две́ри ѿве́р̾сты кѣ́ліи своея̀, и сѣдя́ше
на сл҃нцѣ ста́рецъ служа́ше прокаже́нному.
бѣ́же прокаже́нному съ гнила̀ вся̀ пло́ть
єгѡ̀, ѿ мно́жества ра́нъ лю́тыхъ. учени­
ку́ же иду́щу къ ста́рцу, и ѡбрѣ́те две́ри
кѣ́ліи єгѡ̀ ѿве́р̾сты, и ви́дѣ ста́рца ка́кѡ
служа́ше прокаже́нному. вшед̃ бо в̾кѣ́лію и
принесѐ снѣд̃, и влага́ше во уста̀ єгѡ̀, занѐ
не имѣ́ти прокаже́нному ру́ку. и зане́же
немощѝ єму̀ поглота́ти снѣ́дь, поне́же бы́­
ти єму̀ доконца̀ гни́лу устна́ма. ста́рецъ
же влага́ше во уста̀ єгѡ̀ свои́ма рука́ма,
{#л. уч҃в}

и я́же не можа́ше снѣда́ти, изима́ше ста́­
рецъ изо у́стъ єгѡ̀ и са́мъ снѣда́ше. ви́­
дѣв̾же учени́къ ди́вное дѣ́ло є́же творя́ше
ста́рецъ, удиви́ся, и просла́ви бг҃а ѡ та­
ковѣ́мъ дѣ́лѣ, подаю́щаго таково́е терпѣ́ніе
ста́рцу, є́же си́це служи́ти прокаже́нному.

Вто́йже дн҃ь поуче́ніе григо́рія мни́ха
ѡ ми́лостыни.

А́ще ревну́еши хрс̃ту̀ бг҃у, бу́деши бл҃же́нъ,
и сме́ртію да неу́мретъ дш҃а твоя̀. и
не пріи́детъ ѕло́ба к̾ тѣлесѝ твоему̀, но бу́­
дет̃ исхо́дъ тво́й я́кѡ исхо́дъ ѕвѣзды̀
и воста́ніе твоѐ, я́кѡ сл҃нце просвѣти́тся.
го́ре без̾зако́ннику в̾ дн҃ь сме́рти, и не­
пра́ведныхъ ду́шы поги́бнутъ во вре́мя
лю́то. дш҃я пра́ведныхъ во́дятъ а́гг҃ли,
душя́ же ѕлы́хъ пріи́мутъ бѣ́си. ѿку́ду
же бо вни́детъ ѕло́ба, тудѣ́же и неразу́міе.
срд̃ца же прпд̃бныхъ испо́лнятся ра́зума.
неми́лостивый непода́тливъ є́сть, кормя́и
же ни̑ща наслѣ́дитъ сокро́вища. лу́чьше
убо́жество с̾ ра́зумомъ, не́же бога́тьство
без̾рас̾суже́нія и без̾ра́зума. красота̀ гла­
вѣ̀ вѣне́цъ, красота́ же срд̃цу ра́зумъ бж҃іи.
притяжѝ ра́зум̃, лу́чши бо сребра̀ му́дрость,

и па́че бога́тьства мно́га. лука́внующіи бо
потребя́тся, терпя́щіиже гдс̃а, ті́и наслѣ́­
дятъ зе́млю. ми́луяи убо́гія утоля́етъ
я́рость, и пита́яи тѣ́хъ, испо́лнится
бл҃гъ. бг҃у на́шему сла́ва нн҃ѣ и прс̃нѡ
и во вѣ́ки вѣкѡ́мъ;

Мцс̃а того́же въ и҃ де́нь. па́мять ст҃а́гѡ
великомч҃ника фео́дѡра стратила́та,
бл҃гословѝ ѻ́ч҃е.

Вели́кій ѳео́дѡръ стратила́тъ, бя̑ше во
времена̀ ликині́я царя̀. ѻте́чество
имѣ́яше въ єѵ̾хаи́тѣхъ. жи́тельство
же имя́ше во ираклі́и по́нт̾стѣй.
му́жь рѣчи́стъ и красе́нъ, мно́гихъ ста́­
рыхъ ра́зумомъ преходя̀. бя́ше же
пора́тному рачи́тельству, и рѣчеви́тія
ра́ди и сла́вы, и царе́мъ зна́емь.
тѣ́мъ же єгѡ̀ жи́тельствіе и друголю́біе
любоче́ствовашеся, и повсю́дѣ плоди́мо.
бя́ше бо сла́докъ словесы̀ и пре́ю, и ви́­
домъ бл҃голѣ́пенъ, и лице́мъ свѣ́телъ.
увѣ́давъ же ѡ не́мъ ликині́и ца́рь,
я́кѡ хрс̃тія́ньскаго бг҃а чте́тъ, и руга́­
ется богѡ́мъ є́л̾линьскимъ, и уничи­
жа́етъ и́хъ, посла̀ ѿ никомиді́и понего̀,
{#л. уч҃г}

и повелѣ̀ съ че́стію привестѝ єго̀. и́хъже
бл҃же́нный кнему̀ посла́въ и речѐ, я́кѡ па́че
подоба́етъ царю̀ с̾ бо́лшими свои́ми бо́ги
пріитѝ, и́м̾же повелѣва́етъ на́мъ же́ртвы
приноси́ти. ѻни́же ше́д̾ше повѣ́даша
єму̀. ца́рьже ликині́й возра́довася,
подви́гся ѿ никомиді́и, и идя́ше во ира­
клі́ю. Вве́черъ же прилучи́ся съ нб҃сѐ
гла́съ слы́шати укрѣпля́ющь мч҃нка.
и де́рзость пріи́мъ, внегда̀ приближа́­
тися ликині́ю во́градъ, всѣ́дъ на ко́нь
ѳео́дѡръ, и срѣ́те єго̀ подо́бнѡ,
и почтѐ єго̀ я́кѡ царя̀. ца́рьже десни́цу
в̾да́въ єму̀, и ѡблобыза́въ єго̀. и
в̾ше́дъ во́градъ на высо́цѣ прс̃то́лѣ сѣ́дъ,
бл҃же́нному повелѣва́ше ѳео́дѡру бо­
го́мъ єгѡ̀ же́ртву принестѝ. ст҃о́муже
наро́читѣишыя бо́ги испроси́вшу єгѡ̀,
я́кѡ да ѻ́нѣхъ в̾ дому̀ учреди́тъ и
же́ртвы и жре́нія принесе́тъ. По по­
велѣ́нію же царе́ву, пое́мъ златы́я
и сре́бреныя бо́ги, и в̾ полу́нощи со­
круши́въ и́хъ, и из̾дроби́въ, раздадѐ
ни́щимъ въ тре́бованіе. Понѣ́коли­
цѣхъ же днє́хъ царю̀ иду́щу,

че́сть возда́ти свои́мъ богѡ́мъ, я́вѣ
у́бѡ ст҃ы́й срази́ся с̾ царе́мъ и речѐ єму̀,
сокруши́хъ царю̀ бо́ги твоя̀ и издроби́хъ
и тре́бующимъ ни́щимъ разда́хъ. Маѯе́нь­
тію коментари́сію су́щу ре́кшу єму̀,
ви́дѣхъ артеми́ды вели́кия боги́ни главу̀
убо́гимъ нѣ́которымъ носи́му. ѡ се́м̾ же
мч҃нику воз̾смѣя́вшуся и ре́кшу, ка́кѡ
у́бѡ бо́зи мо́гутъ на́мъ помощѝ, а́ще
себѐ ѡборони́ти не возмого́ша. Ликині́й же
вели́ких̃ наде́жъ ѿпа́дъ. пе́рвое в̾ недоумѣ́­
ніи бы́въ, и бы́сть во у́жасѣ. и въспомя­
ну́вся, пре́лести свое́й поноша́ше, царю̀
держа́вну прише́дшу къ губи́телю сему̀
ре́къ. та́же за бо́ги своя̀ пла́каше. посе́мъ
я́ростію неистовле́нія напо́лнься, совлещѝ
ст҃а́го повелѣ̀, и начетве́ро растя́гнути
и волу́ями жи́лами похребту̀ се́дмьде­
сятъ ра́нъ наложи́ти, и по́чреву пять­
сѡ́тъ, и ѻловя́ными мла́ты поші́и
би́ти. та́же тѣ́ло єгѡ̀ строга́ти, и свѣ­
ща́ми до́лу подъжига́ти, и чрепи́нами
ра́ны єго̀ потира́ти. ѻ́нъ же тве́рдѡ сія̀
му́ки терпя̀. Поси́хъ же в̾саже́нъ бы́сть
в̾ темни́цу, и но́зѣ єгѡ̀ тве́рдѡ заби́ша.
{#л. уч҃д}

пребы́сть та́мѡ а́лченъ до пятѝ дні́й.
и посе́мъ па́ки изведе́нъ, и на крс̃тѣ̀ пригво­
жде́нъ рука́ма и нога́ма. и єди́нъ гво́здь
вонзи́ша в̾ та́йный у́дъ єгѡ̀, да́же и до
вну́тренихъ проитѝ єму̀. ста́вше же ю́но­
ши стрѣля́ху єго̀ в̾ лицѐ и в̾ ѻ́чи, и исто­
рго́ша стрѣ́лы зѣ́ницы ст҃а́гѡ. друзі́и же
пота́йныхъ удесѣ́хъ крои́лы сѣменоно́сных̃
рѣ́заху. и на крестѣ̀ но́щію єди́нъ ѡста́­
вленъ. мнѣ́вшу ликині́ю царю̀, я́кѡ уме́­
ршу у́же ст҃о́му. А́гг҃лъ же с̾ ше́дъ ѿ гво́­
здія сня́тъ єго̀, и всего̀ здра́ва сотворѝ.
и бя̑ше ѻ́нъ поя̀ и бл҃гословя̀ бг҃а, вознесу́
тя гдс̃и цр҃ю̀ мо́й и бж҃е мо́й, и бл҃гословлю̀
и́мя твоѐ в̾вѣ́къ и в̾вѣ́къ вѣ́ка, и про́чая.
и у́же днѝ явля́ющуся, по́сланніи ѿ ли­
кині́я пріидо́ша, є́же ѡбрѣстѝ тѣ́ло єгѡ̀
мер̾тво̀, и воврещѝ в̾ мо́ре. и я́кѡ доидо́­
ша, и ви́дѣша ст҃а́го здра́ва, и вѣ́роваша
въ хрс̃та̀. ви́дѣв̾ же ликині́й ца́рь ве́сь гра́дъ
жаля̑щь по ѳео́дѡрѣ, и всѣ́хъ приходя́щих̃
къ вѣ́рѣ хрс̃то́вѣ, повелѣ̀ мече́мъ главу̀
ст҃а́го ѿсѣщѝ. идѣ́же с̾находи́вше мно́гое
мнѡ́жество, хотя́ще ви́дѣти убіе́ніе
ст҃а́го, исотвори́шя пли́щъ вели́къ,

єдва̀ нѣ́когда утолѝ ст҃ы́й наро́дъ.
и хрс̃то́ви помоли́вся, иположено̀ бы́сть
в̾ дѣ́днѣмъ єго̀ стяжа́ніи въ и҃ де́нь ию́ня
мцс̃а, я́коже са́мъ мч҃нкъ а́вгарю своему̀
скоропи́сцу пре́же своегѡ̀ посѣче́нія повелѣ̀
написа́ти. и́же и то́й все́ю свое́ю си́лою
устраби́вся, не без̾раз̾суже́нія разли́­
чнымъ му́камъ о́бразы ши́ршѣ
проначерта̀, ничто́же ѿ и́сти­
ны ѡста́вивъ.

Вто́йже де́нь преподо́бнагѡ оц҃а на́шегѡ
єфре́ма бы́вшагѡ архієпс̃кпа антіѡхі́й­
скагѡ.

Се́й бѣ̀ пре́же воєво́да, ѕѣло́же бѣ̀
млс̃тивъ и теплъ ѡвѣ́рѣ гдс̃а на́шегѡ
іс҃а хрс̃та̀. по́сланъ же бы́сть анаста́­
сіемъ царе́мъ на созда́ніе ан̾тіохі́и гра́­
да, я́ко бѣ̀ па́лся ѿтру́са. по изво­
ле́нію же бж҃ію поста́вленъ бы́сть патріа́­
рхомъ, и мно́гѡ подвиза́шеся ѡвѣ́рѣ
хрс̃то́вѣ. и слы́шавъ ѡ єди́номъ сто́лъ­
пницѣ, я́кѡ ѕловѣ́рныя є́реси севи́­
ровы є́сть, и без̾прича́стія є́сть.
и и́де кнему̀ хотя̀ єго̀ ѡбрати́ти и на­
учи́ти вѣ́рѣ. и молѝ єго̀, дабы̀ прія́лъ
{#л. уч҃е}

апс̃льское преда́ніе и приѡбщи́лся бы ст҃ѣ́й
апс̃льстѣй цр҃кви. ѿвѣща́въже сто́лъ­
пникъ, а́зъ сва́ми не причащу́ся, ни
вѣ́ры ва́шея пріиму̀, я́кѡ сія̀ лу́чши
є́сть. єфре́мъ речѐ, то̀ ка́кѡ ти уго́днѡ
бу́детъ, я́кѡ бл҃года́тію гдс̃а на́шегѡ іс҃а
хрс̃та̀ свобо́дна бы́сть цр҃кви ѿ вся́кія є́реси
и скве́рны и єрети́ческагѡ уче́нія. и речѐ
сто́лпникъ, гдс̃и вож̾же́ма о́гнь, и вни́дема
внего̀ а́зъ же и ты̀, да и́же изы́детъ не­
вреженъ, то́й и правовѣ́ренъ є́сть, и
тому̀ всѝ послѣ́дуемъ; се́же речѐ, дабы̀
устраши́лъ патріа́рха. ѿвѣща́въ же
єфре́мъ, подоба́етъ тебѣ̀ менѐ я́кѡ оц҃а по
слу́шати, и ничто́же истяза́ти ѿ на́съ.
но поне́же восхотѣ̀ ве́щи преходя́щія моѐ
окая́ньство, надѣ́юся на щедрѡ́ты сн҃а
бж҃ія, я́кѡ сп҃се́нія ра́ди дш҃и твоея̀
сотворю̀ сѐ. и гл҃а предстоя́щимъ,
бл҃гослове́нъ гдс̃ь, принеси́те дрова̀ и о́гнь,
и возже́гъ я̀ архієпс̃кпъ пред̾столпо́мъ.
и гл҃а сто́лпнику, сни́ди посуду̀ твоему̀,
да вни́дема о́ба. сто́лпникъ же чюди́­
вся є́же къ бг҃у упова́нію єгѡ̀,
и нехотѣ̀ сни́ти. гл҃а єму̀ єфре́мъ,

не ты́ ли сѐ избра̀ та́кѡ искуси́ти бг҃а,
то̀ ка́кѡ нн҃ѣ сѐ твори́ти не хо́щеши.
тогда̀ патріа́рхъ сне́мши ѻм̾фѡ́ръ вне́­
мже бя̑ше ѡболче́нъ, и прише́дъ бли́зъ
ѻгня̀, и помоли́ся гл҃я, гдс̃и ісе хрс̃те
бж҃е на́шъ, на́съ ра́ди роди́тися изво́ли
ѿ пречс̃тыя влд̃чцы на́шея бцд̃ы и прс̃нѡ
дв҃ы мр҃і́и, нн҃ѣ покажѝ на́мъ и́стинную
вѣ́ ру. и конча́въ мл҃тву, и све́рже ѻмъ­
фѡ́ръ сво́й посредѣ̀ ѻгня̀. ѻгню́же трѝ
часы̀ пребы́вшу, и дрова́мъ изгорѣ́­
вшимъ, и взя́ша ѻм̾фо́ръ цѣ́лъ и не­
згорѣ́вшъ. тогда̀ сто́лпникъ ви́дѣ
бы́вшеє, и извѣстѝ себѐ, и покле́пъ
сев̾ги́ра єретика̀, и своѐ ѕловѣ́ріе. и при­
и́де къ ст҃ѣ́й собо́рнѣй и апс̃льстѣй
цр҃кви, и ѿ рукѝ блаже́ннагѡ єфре́ма
прія̀ ѻбще́ніе. и просла́ви бг҃а и вѣ́­
рова въ хрс̃та̀. мно́гаже зна́ме­
нія и и́на сотворѝ ст҃ы́й,
и преста́вися
къ бг҃у;
{#л. уч҃ѕ}

Вто́йже дн҃ь сло́во ѿ при́тчей солѽ́монихъ
ѡ наказа́ніи ча́дъ.

Услы́шите дѣ́ти наказа́ніе ѻ́ч҃о, и внемли́­
те разумѣва́ти помышле́ніе. да́ръ бл҃гъ
даю̀ ва́мъ, сло́ва моегѡ̀ не ѡставля́йте.
сн҃ъ бо бы́хъ и а́зъ послушли́въ оц҃у,
ивозлю́бленъ сы́й пред̾лице́мъ ма́тере.
я́же гл҃аста и учя́стамя, да утвержа́е­
тся на́ше сло́во в̾ твое́мъ срд̃цы. сохраня́й
за́повѣди и не забыва́й. стяжѝ ра́зумъ,
не уклонися ѿ гл҃ъ у́стъ мои́хъ. нижѐ
пре́зри гл҃аніе мои́хъ у́стъ, не ѡста́ви єго̀
и име́тся тебѐ. похощѝ єму̀ и соблюде́­
тъ тя̀. нача́токъ прему́дрости стяжа́ти
прему́дрость, и во вся́комъ стяжа́ніи
твое́мъ, стяжѝ ра́зумъ. взыщѝ єго̀,
и вознесе́тъ тя̀. почтѝ єя̀, да тя̀ обы́й­
метъ, да да́стъ главѣ̀ твое́й вѣне́цъ
бл҃гослове́нъ. вѣнце́мже пи́щнымъ защи­
ти́тъ тя̀. слы́ши сн҃е и пріимѝ моя̀ сло­
веса̀, и умно́жатся лѣ́та живота̀ твое­
гѡ̀. датѝ бу́дутъ мно́зи путѝ живо­
ту̀. путе́мъ бо прему́дрости учю́ тя,
наставля́юже тебѐ натече́нія пра́вая.
а́ще бо хо́диши, не за́пнутся стопы̀ твоя̀.

а́ще ли тече́ши, не труди́шися. ими́ся
помоѐ наказа́ніе, не ѿпусти́ся. сохранѝ я̀
себѣ̀ в̾ живо́тъ тво́й. на пу́ть нечести́вых̃
не найдѝ. ни возревну́й путе́мъ законо­
престу́пникъ. нане́мъ же мѣ́стѣ а́ще
во́я беру́тъ, не найдѝ на то̀, уклони́ся
ѿ ни́хъ и ра́зньстви. не у́снутъ бо а́ще
ѕла̀ не сотворя́тъ. на́съ же да сохрани́тъ
бг҃ъ ѿ си́хъ. єму́же сла́ва нн҃ѣ
и прс̃нѡ и во вѣ́ки вѣкѡ́мъ;

Мцс̃а того́же, въ ѳ҃ дн҃ь. па́мять и́же
во ст҃ы́хъ ѻц҃а на́шегѡ кѷри́ла, архієпс̃кпа
алеѯандрі́йкагѡ, бл҃госло̀ви ѻ́ч҃е.

Кѷри́лъ ди́вный ѻц҃ъ на́шъ, бѣ̀ ѿ́­
града алеѯа́ндрьскагѡ, сестри́чищъ
ѳеѽ́ѳила патріа́рха тогѡ́же гра́да
алеѯандрі́и. воспита́нъ же бы́сть
в̾то́мъже гра́дѣ во мно́зѣ наказа́ніи.
ри́м̾скимъже и є́ллинскимъ научи́ся кни́­
гамъ. по успе́ніи же ѻц҃а своегѡ̀ ѻ́бщимъ
при́чтомъ прія̀ прс̃то́лъ алеѯа́ндрьскій.
єретики́ же а́ки во́лки ѿ цр҃кве ѿгна̀, и не­
вѣ́рныя в̾ вѣ́ру ѡбратѝ, и вселе́нную бл҃го­
че́стіемъ насади́въ. и вся́ко писа́ніе ве́тхое
и но́вое сказа́въ. єретика́ же несто́рія
{#л. уч҃з}

с̾ прс̃то́ла с̾ве́рже. и пречс̃тую дв҃у мр҃і́ю хрс̃та̀
ро́ждьшую, бцд̃у наречѐ. при ѳеодѽ́сіи
ю́ннѣмъ царѣ̀, собѡ́ръ во єфе́сѣ со­
вокупи́въ, и несто́рія посрами́въ я́коже
бы́сть рече́но, и бцд̃у возвели́чивъ и бг҃а
просла́вивъ. и доше́дъ алеѯандрі́и мно́ги
кни́ги на писа̀ дш҃еполе́зны, и ко гдс̃у
ѿи́де;

Вто́йже дн҃ь па́мять прпд̃бнагѡ ѻц҃а на́ше­
гѡ кѷри́ла чюдотво́рца бѣлоєзе́рскагѡ.

Прпд̃бный ѻц҃ъ на́шъ кѷри́лъ, рожде́ніе и во­
спита́ніе преимени́тагѡ гра́да москвы̀.
бл҃горо́дну и бл҃гочести́ву роди́телю сн҃ъ.
в̾да́нъ же бы́сть ѿ́млада во́зраста науче́­
ніе ст҃ых̃ кни̑гъ. и любоучи́теленъ и бл҃го­
говѣ́инъ бѣ̀ ѻ́трокъ ѕѣлѡ̀. тогѡ̀ ра́ди
в̾ско́рѣ сщ҃е́нная пи́смена извы́къ, уму­
дря́шеся и́ми во спасе́ніе. въ воздержа́­
ніи же и чистотѣ̀ расты́й, преспѣва́ше въ
дѣ́лѣ бж҃іи. Попреставле́ніи же роди́телю
своею̀, изво́ли себѐ примета́ти въ дому̀
бж҃іи. ѿре́кшися ми́ра, єди́ному гдс̃ви
рабо́тати. и испыта́ше мѣ́ста и ѻ́бра­
зы и сѣда́лища, гдѣ̀ удобно є́сть єму̀
спс̃ти́ся. и сія̀ жела́я со мно́гим̃ ра́зумомъ,

и попече́ніемъ худо́жнымъ ѡбрѣстѝ му́жа
наста́вника своему̀ спасе́нію непреле́стна.
смотре́ніемъ же бж҃іимъ наста́вленъ бы́сть
ѿ нѣ́коегѡ ста́рца и́менемъ стефа́на, пріи́де
во ѻби́тель зово́мую сѵ́монову, ко архи́ма­
риту ѳео́дѡру, и́же и созда́тель бѣ̀ тоя̀
ѻби́тели. бѣ́же то́й ѳео́дѡръ му́жь
разсуди́теленъ бжс̃твенагѡ писа́нія, до́брѣ
вѣ́дый наставля́ти и́же къ бг҃у гряду́ща.
бя́ше бо учн҃къ и сро́дникъ вели́кагѡ се́ргіа,
и́же во мно́гихъ си́лахъ и зна́меніихъ про­
сія́вшаго. Се́й у́бѡ ѳео́дѡръ прія̀
бл҃же́ннагѡ кѷри́ла, и повелѣ̀ єму̀ вре́мя
нѣ́кое пребы́ти въ монастырѣ̀, и испыта̀
извѣ́стнѡ ѡ не́мъ. и разумѣ̀ я́кѡ въ
стра́сѣ бж҃іи со тща́ніемъ хо́щетъ спс̃ти́ся,
а́біе пострижѐ єго̀ и бра́тіи съчета̀. бѣ́ же
тогда̀ нѣ́кій ста́рецъ во ѻби́тели то́й,
велмѝ чю́дна жи́тельства, и́менемъ ми­
ха́илъ. и́же по́слѣжде ра́ди добродѣ́тель­
нагѡ єгѡ̀ житія̀, єпс̃кпъ бы́сть гра́да
смоле́нска. и тому̀ да́нъ бы́сть кѷри́лъ
нака́занъ бы́ти и́ноческому житію̀. ви́­
дѣвъ же ѻ́нъ своего̀ учт҃ля михаи́ла гобзу́­
юща в̾ добродѣ́телєхъ, и наказу́юща єго̀
{#л. уч҃и}

пора́зуму бжс̃твеныхъ писа́ніи, и́стиному
путѝ спасе́нія. тѣ́мъ у́бѡ кѷри́лъ всю̀
свою̀ во́лю ѿве́ргъ, послу́шаше єго̀ во
все́мъ. и вре́мя дово́лнѡ пребы́сть унегѡ̀
в̾ послуша́ніи. та́же повелѣно бы́сть єму̀
архи́маритомъ, по совѣ́ту єгѡ̀ ста́рца
слу́жбы монасты́рьскія проходи́ти, хлѣ́­
бню и пова́рню и про́чая. ѻ́нъже во все́мъ
послу́шая усе́рднѡ сія̀ творя̑ше. устна́­
ма же ѿ мл҃твы не преста́яше, умо́мъ
в̾ ра́зумъ бж҃іи упражня́шеся. имя́ше
же и пи́щю ума́лену ѕѣлѡ̀, жа́ждею и
бдѣ́ніемъ срд̃це согнѣта́я. и прія́тъ уми­
ле́нія да́ръ, слеза́мъ исто́чники пролива́­
ше. бя́ше бо пред̾ угото́вленъ ѿ прпд̃бнагѡ
послуша́нія. и вомно́зѣ вре́мени с̾ трудом̃
и тща́ніемъ бра́тіи служа̀. поне́же бѣ̀ и­
ску́сенъ во вся́ку слу́жбу. бя́ше бо пре­
му́дръ по бѕ҃ѣ, и чи́стъ єстеством̃, с̾ сми­
ре́ніем̃ послушли́въ во вся́ко дѣ́ло бл҃го. и сегѡ̀
ра́ди люби́мь бѣ̀ и почита́емь ѿ всѣх̃. ѻ́н̾же
не нави́дя сла́вы и че́сти ѿ чл҃къ, бг҃олю́бец̃
сы́й и нача́тъ твори́тися юро́дъ. ви́дѣв̾же
єго̀ ѻби́тели ѻ́ноя оц҃ъ в̾ таковѣ̀ устрое́ніи
єго̀ су̑ща, запреще́нія налага́ше єму̀,

на мно́ги днѝ и́но ничто́же вкуша́ти, ра́­
звѣ хлѣ́бъ и во́ду. дѣ́ла же мнс̃ты́рьская
тя́жкая в̾руча́ше єму̀. ѻ́н̾же запреще́ніе
держа̀ с̾ ра́достію, в̾ слу́жбахъ же усе́рднѡ
тружда́яся. и та́кѡ добродѣ́тели с̾крыва́­
ше. и позна́нъ бы́сть ѿ разу́мных̃ ѻц҃ъ,
я́кѡ тогѡ̀ ра́ди твори́тся юро́дъ, да бг҃ови
прему́дръ бу́дет̃. пону́женъ же бы́сть ѿ оц҃а
своегѡ̀ прія́ти сщ҃е́ньство. и не хотя̀ пови­
ну́ся насѐ. сщ҃е́ньства у́бѡ слу́жбу в̾чину̀
чреды̀ своея̀ проходя̀. єгда́же имя́ше праз̃­
дно вре́мя, ѿрабо́ты непреста́яше. смире́­
нію же бо́лшему в̾дая́ше себѐ, ра́ди гл҃юща­
гѡ. и́же хо́щет̃ старѣ́йшіи бы́ти, да бу́дет̃
всѣм̃ ра́бъ. нижѐ в̾вас̃ ме́ншіи, се́й є́сть ве­
ли́къ. по избра́ніи же ѳео́дѡра архи́мари­
та на прс̃то́лъ росто́в̾скія архієпс̃піи, почюди́­
вшеся всѝ во всем̃ бл҃же́ннагѡ кѷри́ла исправле́­
ніе, ну́ждею на архи́маритію си́монов̾скую
возведо́ша єго̀. ѻ́н̾ же помина́я сло́во гдс̃не
гл҃ющее, єму́ же мно́го дано̀ бу́дет̃, мно́жае
и взы́щется ѿ негѡ̀. на и па́че подвиза́шеся
не точію ѡ себѣ̀, но и ѡбра́т̾ском̃ спс̃ніи печа́ше­
ся, с̾ смире́ніе и любо́вію дх҃о́вною. сія́ же ви́­
дяще, на и па́че почита́ху єго̀ и сла́вляху.
{#л. уч҃ѳ}

ѻ́нъже смире́нъ умо́мъ сы́й, и ненави́дя
сла́вы, безмо́лвіе же любя̀, ѡста́ви нача́ль­
ство, и ѿи́де в̾ мнс̃ты́рь ста́рый зово́мый,
не дале́че ѿту́ду. и та́мѡ безмо́лствова­
ти нача̀. су́щу же єму̀ в̾ нощнѣм̃ бдѣ́ніи
ѻбы́чное пра́вило сотворя́ющу, и пою́щу
ст҃ѣ́й бцд̃ѣ несѣда́лно, и до́йде мѣ́ста
пи́саннагѡ, стра́нно ржс̃тво̀ ви́дѣвше,
устрани́мся ми̑ра. уди́вльжеся ѡ словесѝ
се́мъ, помышля́ше в̾ себѣ̀, ка́кѡ сегѡ̀ ра́­
ди высо́кій в̾ вели́чествѣ бжс̃тва̀, на землѝ
яви́ся во́плоти, и смире́нъ чл҃къ бы́сть.
да устрани́вшыяся ми̑ра любвѐ єгѡ̀
ра́ди, к̾ высотѣ̀ бг҃овидѣ́нія возведе́тъ.
и нача̀ жела́ти вся́чески устрани́тимися
ми̑ра любвѐ ра́ди бж҃ія. и моля́ше гдс̃а
бг҃а и ст҃у́ю бцд̃у, да наста́вленъ бу́детъ
ка́кѡ спасти́ся. и а́біе слы́шит̃ гла́съ гл҃ющь
єму̀, кѷри́ле идѝ на бѣло̀ є́зеро, и до́бръ
поко́й ѡбря́щеши. ѡтвори́въ же ѻко́н̾це
кѣ́ліи, зри́тъ свѣ́тъ сія́ющь съ нб҃сѐ,
къ страна́мъ сѣ́вернымъ, идѣ́же є́сть
бѣло̀ є́зеро. и я́кѡ пе́рстомъ показу́ю­
ще єму̀ мѣ́сто в̾ селе́нія єгѡ̀. ѡбрѣ́те
же и срд̃це своѐ ра́дости и ми́ра испо́лнено.

и пребы́сть всю̀ но́щь веселя́ся и сла́вя
бг҃а, и пречс̃тую єгѡ̀ мт҃рь. имя́ше же
ту̀ дх҃о́вна бра́та и вѣ́рна єму̀ су̑ща
и́менемъ ѳерапо́нта, и сему̀ повѣ́да я́же
ви́дѣ и слы́шавъ, ипросла́виста бг҃а, и со­
гласившася ѻ́ба идо́ста в̾ пу̑ть. и при­
ше́дша въ страны̀ бѣла̀ є́зера, ѡбрѣто́­
ста мѣ́сто удо́бнѡ безмо́лвію. и пре́­
же потко́ша ма́лу коли́бу сѣдо́ша. По
то́же бл҃же́нный ѻц҃ъ на́шь кѷри́лъ,
жела́я коне́чнагѡ безмо́лвія, по совѣ́ту
разлучи́стася с̾ ѳерапо́нтомъ. и ископа̀
себѣ̀ пеще́ру в̾ землѝ, и ра́дуяся всели́­
ся вню̀ и без̾мо́лвъствоваше. Єгда́же
бл҃говолѝ бг҃ъ показа́ти жи́тельство єгѡ̀
на по́лзу мно́гимъ, пронесе́ся сла́ва єгѡ̀
по всю́ду ѡ не́мъ. и прихожа́ху кнему̀ мно́­
зи созида́ніи ра́ди дх҃о́вныхъ. и у́же
бл҃года́тію дх҃а ст҃а́гѡ до́брѣ воздѣ́лану
срд̃цу єгѡ̀, сла́дки плоды уче́ніи пода­
ва́ше. и слы́шаще сія̀, и ви́дяще
чю́дное житіѐ єгѡ̀, мнѡ́зи моля́ху
єгѡ̀, хотя́ще пребыва́ти сни́мъ, я́кѡ
да бу́детъ и́мъ къ бг҃у наста́вникъ и па́­
стырь. о́нъ же на мнѡ́зѣ ѿрица́шеся,
{#л. уф҃}

недосто́йна себѐ и грѣ́шна имену́я. по­
бѣжа́емъ же бы́сть ѿ ми́лованія и братолю́­
бія, єдва̀ повину́вся, нача́тъ пріима́ти
бра́тію. и я́коже собра́шася кнему̀ нема́­
лѡ число̀ бра́тіи. о́нъже воздви́же цр҃квь
во́имя ст҃ы́я бцд̃ы чс̃тна́гѡ єя̀ успе́нія
и монасты́рь соста́ви. и законоположе́нія
о́бща житія̀ предадѐ. са́м̾же о́бразъ и про­
писа́ніе во все́мъ су́щымъ у негѡ̀ свои́мъ
ученикѡ́мъ бы́сть, и поне́мъ хотя́щымъ
ревнова́ти добродѣ́телному єгѡ̀ житію̀.
претерпѣ́же пре́жде мнѡ́ги напа́сти ѿ бѣ­
сѡ́въ, и ѿ лука́выхъ человѣ́къ навѣ́ты.
и ѿ всѣ́хъ бл҃года́тію бж҃іею сохране́нъ
бы́сть, и в̾ соверше́ную ста́рость доспѣ̀.
я́коже бы́ти всѣ́хъ лѣ́тъ житія̀ єгѡ̀
де́вятьдесять. и ма́лѡ поболѣ́въ с̾ ми́­
ромъ дш҃ю в̾ ру́цѣ бг҃у предадѐ. чюде­
сє́мъ мнѡ́гимъ пре́жде сме́рти дѣ́латель
бы́въ. та́коже и по см҃рти ѿ́гроба чс̃тны́хъ
єгѡ̀ моще́й приходя́щымъ с̾ вѣ́рою, зна́­
менія разли́чна и исцѣле́нія источа́етъ,
въ сла́ву бг҃у прославля́ющему уго́дники
своя̀. єму́же сла́ва, нн҃ѣ и при́снѡ
и во́ вѣки вѣкѡ́мъ.