Мцс̃а того́же въ к҃ дн҃ь, па́мять ст҃а́гѡ
сщ҃е́нно мч҃нка меѳо́дія єпс̃кпа па́трь­
скагѡ, бл҃гословѝ ѻ́ч҃е.

Се́й бл҃же́нный издѣ́тьства себѐ возло­
жи́въ бг҃у. сосу́дъ че́стенъ, и прія́те­
лище ст҃а́гѡ дх҃а бы́сть. тѣ́мъ и жре́­
біемъ бжс̃твенымъ сщ҃е́н̾ству сподо́бися.
до́брѣ же и бголюбе́знѣ пася́ше своѐ ста́­
до. словесы̀ ти́хими просвѣтѝ цр҃ко́вная
исправле́нія. тѣ́мъ и ѻриге́нову пре́лесть
востаю́щю ви́дѣвъ, я́кѡ до́бръ па́стырь,
ѻгне́мъ бжс̃твенымъ словесы̀ свои́ми
попалѝ. и в̾ся́ку мъглу̀ и мра́къ єрети́че­
скій ис̾треби́въ словесы̀ и
бжс̃твеною бл҃года́тію. словеса́ же єгѡ̀ я́кѡ
мо́лнія и ра́зуму труба̀ повсе́й землѝ изы́­
де. тѣ́мъ не терпя̀ вра́гъ деръзнове́нія и
трудѡ́въ єгѡ̀ вели́кихъ воѻружа́етъ слугѝ
къ єгѡ̀ убі́йству. ѻ́нъ же пре́же мч҃нія
во умер̾щве́ніе живоно́сное ѡбле́кся, мече́мъ
главу̀ єгѡ̀ ѿсѣко́ша, и к̾ лу́чшеи жи́зни
преложи́ся. пе́рвіе же служа̀ а́гньцу бж҃ію,
пото́мъ же пожре́ся бг҃у же́ртва жива̀.
тѣ́мъ и сугу́быми вѣньцы̀ укра́шенъ
бы́въ, до́брый побо́рникъ по бл҃гоче́стію
{#л. фм҃}

занѐ кровьмѝ мч҃ническими кон̾чи́ну пріе́мъ;

Вто́йже дн҃ь ст҃ы́хъ мч҃нкъ аристоклі́а
презви́тера, и димитріа́на дія́кона, и афа­
на́сія четца̀.

Вси́хъ у́бѡ ст҃ы́й мч҃нкъ аристоклі́й бя̑ше
ро́домъ кѵ́прянинъ, гра́да тама́са, собо́­
рныя цр҃кве презвѵ́теръ. во времена́ же
максимія́на царя̀, ше́дъ в̾ го́ру кры́яше­
ся в̾ нѣ́коемъ верте́пѣ. убоя́въ же ся
належа́щагѡ гоне́нія, идѣ́же моля́ся,
и свѣ́томъ ѡблиста́яся па́че сл҃нца.
и гла́су прише́дъшу снб҃сѐ, повелѣва́ющу
єму̀ итѝ в̾ соломи́ньскую митропо́ль,
и та́мѡ подвиза́тися. иду́щу же по
дубра́вѣ, до́йде в̾ до́мъ варна́вы апс̃ла,
и ѡбрѣ́те та́мѡ димитріа́на дія́кона, и
афана́сія четца̀, и прія́тъ бы́въ и́ми,
и вину̀ ше́ствія ра́ди по ѻ́ному видѣ́­
нію ѻнѣ́ма сказа́въ. и прича́стники
ѻ́ною дѣ́йствію нарица́ше, возжелѣ́нно
хрс̃та̀ ра́ди хотя́щымъ у́мрети. в̾ше́дъ­
ше же в̾ нѣ́который гра́дъ, и на взо́рнѣ
и высо́цѣ мѣ́стѣ тща́щеся ста́ти.
и́хъ же ви́дѣвъ игѣ́монъ, и призва̀
и́хъ, и ѿни́хъ увѣ́давъ я́кѡ

хрс̃тія́ни су́ть, мече́мъ посѣ́щи велѣ̀
аристоклі́я. ст҃у́ю же димитріа́на и аѳа­
на́сія пребыва́ющу в̾ вѣ́рѣ хрс̃то́вѣ, по
мнѡ́гихъ му́кахъ ѻгню̀ преда́ти повелѣ̀.
без̾ стра́сти же в̾не́мъ сохране́ни бы̑ша.
и посе́мъ повелѣ̀ єю̀ мече́мъ уби́ти
и та́кѡ сконча́стася;

Вто́йже дн҃ь ст҃у́ю му́ченику и́н̾ны
и пиныри́та.

Ті́и ст҃і́и мч҃нцы бѣ́ша ѿсѣ́вер̾скія стра­
ны̀, ѿ землѝ ва́р̾варскіа. ученицы̀
бы́вше андре́я апс̃ла. и мнѡ́ги ѿ ва́р̾варъ
ѡбрати́ша на вѣ́ру хрс̃то́ву ѿ пре́лести
куми́р̾скія. и я́ти бы̑ша и пред̾ста́­
ша кн҃ѕю ва́рварскому, и мнѡ́гими
преще́ніи и ласка́ніи хотя̑ше я̀ прель­
сти́ти. но ті́и не покори́шася честе́мъ
єгѡ̀. тѣ́мъ вѣ́ры ра́ди хрс̃то́вы би́­
ша и́хъ беспощадѣ́нія. зимѣ́е су́­
щи вели́цѣй, рѣка́мъ поме́рзшимъ
и по́ леду могу́щимъ преходи́ти. и посре­
дѝ рѣкѝ поста́вльше на леду̀ проста́я
древеса̀ утверже́на, и к̾ни́мъ ст҃у́ю
привяза́ша. ле́ду же у́бѡ прогиба́ющу­
ся, и водѣ̀ довы́й єю̀ доше́дъши,
{#л. фм҃а}

и та́кѡ ст҃а́я своя̀ дш҃я преда́шя гдс̃еви.
и́хъ же тѣлеса̀ тогда̀ нѣ́которіи хрс̃тія́не
погребо́ша. Послѣди́ же єпс̃кпъ воз̾гре́бъ
я̀, и на своѐ ра́мо взе́мъ, в̾ свое́й положѝ
цр҃кви. и поседмѝ лѣ́тѣхъ муче́нія и́хъ
яви́шася ст҃і́и, и прину́диша єпс̃кпа прене­
стѝ мо́щи и́хъ, в̾ мѣ́стѡ нарица́емое
али́ксъ, и приста́нище су̑хо су̑ще. мы́
же вре́мени невѣ́дуще с̾конча́нія и́хъ,
преложе́ніе пра́здникомъ, на сла́ву бг҃у
и че́сть ст҃ы́мъ єгѡ̀ мч҃нкѡмъ.

Вто́йже дн҃ь сло́во ѿ патерика̀, я́кѡ
да немъща́емъ себѣ̀ ѿ ѡби́дящихъ на́съ.

Бра́тъ пріи́мъ ѻби́ду ѿ ино́гѡ мни́ха и
пріи́де ко ѻц҃у сісѽ́ю ѳиве́янину, и речѐ
доса́ду прія́хъ ѿє́тера бра́та, и хощу̀
м̾сти́ти себѣ̀. и моля̑ше ста́рецъ гл҃я
нѝ ча́до, ѡста́ви єгѡ̀ па́че бг҃ови, да то́й
мсти́тъ тебѣ̀. ѻ́нъ же гл҃аше, не ѡста́­
влю а́ще не мъщу̀ себѣ̀. рече́ же ста́рецъ,
да помо́лимася бра́те къ бг҃у. и воста́въ
речѐ, бж҃е, у́же мы̀ на тя̀ не упова́емъ,
да не пече́шися на́ми, ни мъсти́ши ѻби́­
дящихъ на́съ, мы́ бо са́ми себѐ м̾ща́емъ.

се́же слы́шавъ бра́тъ, падѐ на́ногу ста́рца,
глаго́ля, у́же не сварю́ся с̾ бра́томъ.
и проще́ніе пода́мъ єму̀. и речѐ ста́­
рецъ, ими́ ми вѣ́ру ча́до, я́кѡ пре­
терпѣ́вый доса́ду, беструда̀ спасе́тся.
а гнѣ́ваяися на бра́та своего̀, всю̀ свою̀
добродѣ́тель погубля́етъ и раба̀ себѐ
дія́волу сотворя́етъ;

Вто́йже де́нь сло́во ѿ патерика̀.

Ста́рецъ нѣ́кій живя́ше в̾ да́льнѣй пу­
сты́ни. имѣ́яше же сро́дницу в̾ ми́рѣ
и мно́зѣми лѣ́ты в̾желѣ̀ ви́дѣти
єго̀. испыта́вши же ѡне́мъ гдѣ̀
живе́тъ. и вре́мя улучи́вши, в̾зы̑де
въ пусты́ню ѡбрѣ́тши камиларя̀. бѣ́ бо
гони́ма бѣ́сомъ, и пріи́де две́ремъ
кѣ́ліи ста́рца. и нача̀ бесѣ́довати к̾нему̀
гл҃ющи, я́кѡ сро́дница твоя̀ є́смь.
и пребы́сть унегѡ̀ но́щь єди́ну, и в̾ падѐ
ста́рецъ в̾ блу́дъ сне́ю. Бѣ́ же и́нъ ста́­
рецъ ѡше́лникъ пребыва́я во ѻ́ной стра­
нѣ̀, и начерпа́я ча́шю воды̀, и во́время
снѣ́ди єго̀ превраща́шеся ча́ша. посмо­
тре́нію же бж҃ію гл҃а к̾ себѣ̀, иду̀ в̾пусты́ню
и скажу̀ сія̀ ста́рцу. и воста́въ по́йде.
{#л. фм҃в}

ве́черу у́же бы́вшу. но́щію же спа̀ в̾ це́ркви
и́дольстѣй, и слы́ша въ нощѝ бѣ́сы
глаго́люща, я́кѡ в̾ но́щь сію̀ поверго́хомъ
в̾ блу́дъ мни́ха ѻ́ного, и́мя ре́кше
єму̀. Слы́шавъ же сѐ ѿ бѣсѡ́въ ста́­
рецъ и ѡскорби́ся. и прише́дъ к̾ ста́рцу,
и ѡбрѣ́те єго̀ уны́ла, и гл҃а єму̀,
что̀ сотворю̀ ѻ́ч҃е, я́кѡ наполня́ю ча́шю
воды̀, и во́ время снѣде́нія превра­
ща́ется. и речѐ єму̀ ста́рецъ, а́зъ же
что̀ сотворю̀, я́кѡ в̾но́щь сію̀ в̾падо́хъ
в̾ блу́дъ. ѻ́нъ же речѐ, и а́зъ увѣ́­
дѣхъ ѻ́ч҃е. и вопросѝ єго̀, ка́кѡ
увѣ́дѣлъ єсѝ. ѻ́нъ же речѐ, спя́щу
ми въ це́ркви и́дольстѣй, слы́шахъ
бѣ́сы глаго́люща ѡ тебѣ̀. и речѐ ста́­
рецъ, сѐ а́зъ иду̀ в̾ми́ръ. ѻ́нъ же
моля́ше ѝ гл҃я, нѝ ѻ́ч҃е, но пребыва́й
на мѣ́стѣ своем́ъ, жену́ же ѿженѝ
ѿ себѐ, сіе́ бо искуше́ніе бѣсо́вско є́сть.
ѻ́нъ же послу́шавъ єго̀ и пребы́сть в̾ кѣ́­
ліи свое́й, и держа̀ пра́вило своѐ. и по
вся̀ днѝ прилага́ше сле́зы к̾ слеза́мъ,
до́нде же па́ки пріи́де въ пе́рвый
сво́й чи́нъ;

Вто́йже дн҃ь поуче́ніе ко вся́кому хрс̃тія́нину.

Ча́дца моя̀ возлю́бленная воспомина́йте
коли́кѡ бл҃гъ ѿ всемлс̃тивагѡ бг҃а прія́сте
без̾см҃ртное и беспеча́лное житіѐ. за́ви­
стію и пре́лестію дія́волею, не то́кмѡ
из̾гна́ніе прія́хомъ, но и сме́ртни бы́хѡм̃
и досе́лѣ не преста́етъ ловя̀, и прелща́я
на́съ. тогѡ̀ ра́ди мы̀ бра́тіе ста́немъ про­
ти́вящеся єму̀ надежею бл҃гагѡ бг҃а.
дѣла бо ѻ́ногѡ на на́съ су̑ть, є́же ѿврати́­
ти ѿ вѣ́ры на́съ и наде́жи бг҃а на́шегѡ
и в̾ невѣ́рьство привестѝ. и ктому́ же пре­
стае́тъ вся̀ ѕла́я наводя̀ на ны̀ блу́дъ,
прелюбодѣ́йство, татбы̀, убі́йство, пія́­
ньство, клевету̀, за́висть не́нависть
лихоима́ніе, и ина́я ѕла́я дѣла̀. и чре́зъ
єстество̀, и про́чая. я́же ѿ ада́ма и до
но́я. ѿ но́я же и до авраа́ма, во идолослу­
же́ніе и сребролю́біе, в̾ волхвова́ніе и чародѣя́­
ніе в̾ведѐ, и ѿучѝ ѿ бг҃а жива́гѡ. да то̀
сѐ воу́мъ и в̾ срд̃це приводя̑ще, блюдѝ­
теся ѿ сѣ́ти вра́жія, и ѡ всѣ́хъ дѣ́лъ єгѡ̀
ѕлы́хъ, и потщи́теся уго́дуа твори́ти,
во ст҃у́ю тро̃цу вѣ́рующе, ѻц҃а̀ и сн҃а и ст҃а́го
дх҃а, и в̾ пречс̃тую бцд̃у, и во всѣ́хъ ст҃ы́хъ,
{#л. фм҃г}

да не то́кмѡ му́ки убѣжи́мъ, но и црс̃тва
сподо́бимся. Потщи́мся бра́тіе и ча́да
бл҃га́я уклони́тися ѿ ѕла́гѡ дѣ́ла и лу­
ка́вагѡ, и сотвори́ти бл҃га́я хрс̃ту̀ бг҃у на́­
шему, и имѣ́ти к̾ нему̀ вѣ́ру пра́вую
ѿ дш҃и, и наде́жю и́стинну, ю́же имѣ́шя
пре́же писа́ніи уго́ждьшіи бг҃у. лю­
бо́вь же имѣ́ти не лицемѣ́рну ко вся́кому
хрс̃тія́нину безольстѝ, и ми́ръ, занѐ всѝ
єсмы̀ бра́тіа по́плоти. до́л̾готерпѣ́ніе и кро́­
тость, смире́ніе, и покая́ніе, исповѣ́даніе
и ина́я дѣ́ла бл҃га́я. Вы́ше же всѣ́хъ
млс̃тыню твори̑те ко вся́кому, без̾ го́рдости
и без̾высокоу́мія и велича́нія, со бл҃говоле́­
ніемъ. тогѡ̀ ра́ди бг҃ъ бога́та и убо́га сотво­
рѝ, да препита́нъ бу́детъ убо́гіи ѿ бога́­
таго, и сп҃се́тся бога́тый млс̃тыни ра́ди.
да всѝ изба́влени бу́демъ ѿ вели́кихъ
бѣ́дъ и муче́нія, и услы́шимъ ѡ т̃ гдс̃а бл҃го­
слове́наго гла́са ѻ́ногѡ, пріидѣ́те бл҃гослове́­
ніи ѻц҃а̀ моегѡ̀, наслѣ́дуите угото́ванное
ва́мъ црс̃тво нбс̃ное. в̾залка́хъ бо ся и да́­
стеми я́сти. воз̾жада́хъ, и напои́сте мя̀
стра́ненъ бы́хъ, и в̾ведо́сте мя̀. бо́ленъ
бы́хъ, и посѣти́сте мя̀. в̾ темни́цѣ бых̃,

и пріидо́сте ко мнѣ̀. а не сотво́ршимъ
си́хъ рече́тъ, ѿиди́те ѿ менѐ прокляті́и
во ѻ́гнь вѣ́чный, угото́ванный дія́волу
и а́ггелѡмъ єгѡ̀. тогѡ̀ ра́ди прилѣ́жнѡ
мо́лимъ іс҃а хрс̃та̀ бг҃а на́шегѡ, да
изба́витъ ны̀ ѿ му́ки, и сподо́битъ ны̀
црс̃тва своегѡ̀ нбс̃нагѡ. єму́ же сла́ва нн҃ѣ
и прс̃нѡ и во́ вѣки вѣкѡ́мъ;

Мцс̃а тогѡ́же въ к҃а дн҃ь. па́мять ст҃а́гѡ
мч҃нка іуліа́на тарсяни́на, бл҃гословѝ ѻ́че.

Се́й бя̑ше ѿ наза́рва гра́да, вторы́я
єпархі́и киликі́йскія, сн҃ъ совѣ́тника
нѣ́коегѡ, ма́тере же хрс̃тія́ны, ѿ нея́ же
и бжс̃твеному бл҃гоче́стію науче́нъ. и к̾ на­
уче́нію бжс̃твеныхъ пи́сменъ дерзну́въ.
во ѻсмонадеся́тое лѣ́то во́зраста своегѡ̀,
приведе́нъ бы́сть к̾ маркіа́ну игѣ́мону
и не восхотѣ̀ пожре́ти и́долѡмъ, в̾ разли́­
чныхъ мѣ́стѣхъ по́ тѣлу біе́нъ бы́въ.
та́же в̾ темни́цу в̾саже́нъ, и мт҃рь совѣ́­
тницу имы́й. єму́же ре́кшу у́мрети
въ хрс̃то́вѣ вѣ́рѣ, во вре́тище в̾ложе́нъ
с̾ песко́мъ, и ѕвѣрє́й по́лзящихъ и ядо­
ви́тыхъ, и средѣ̀ пучи́ны в̾ве́рженъ,
и та́мѡ муче́нію коне́цъ прія́тъ
{#л. фм҃д}

Вто́й же де́нь стра́сть ст҃а́гѡ мч҃нка
іуліа́на єгѵ́петскагѡ.

Се́й бя̑ше во времена̀ діоклитія́на
царя̀, и маркіа́на игѣ́мона, и́же
въ нантино́нѣ гра́дѣ єгѵ́петстѣмъ,
монасты́рь вели́къ соста́вивъ, въмѣ­
ща́ющь мужє́й до десятѝ ты́сящъ.
я́тъ же бы́въ и пред̾ста́въ игѣ́мону,
и хрс̃та̀ бг҃а пред̾ни́мъ исповѣ́давъ.
и поруга́въ и́долы, и на гнѣ́въ игѣ́мона
подви́же. Та́же пе́рвіе игѣ́монъ мо­
на́стырь, идѣ́же пребыва́ше ст҃ы́й
запали́ти по велѣ̀, и всѣ́хъ та́мѡ
су́щихъ съжещѝ, и в̾сѣ́хъ прибѣ́гшихъ
та́мѡ єпс̃кпъ ѿ всѣ́хъ стра́нъ, ієре́и же
и кли́рицы и́же и ѻгне́мъ муче́нію
пу́ть сконча́ша. идѣ́же глаго́лется,
да́же досе́лѣ во́ время бжс̃твенагѡ пѣ́­
нія, но́щію же и дні́ю пою́щихъ гла́сы
слы́шати. и чюдесє́мъ содѣ́лованія
на мѣ́стѣ ѻ́номъ с̾быва́ющимся.
ст҃а́го же іулія́на пожре́ти и́долѡмъ
не хотя́ща, повелѣ̀ посте́рши би́­
ти велмѝ, и желѣ́зными у́зами съ­
вяза́ти, и на толи́цѣ сокруша́ти,

я́кѡ и костє́мъ єгѡ̀ сокруши́тися. и
внегда̀ тому̀ та́кѡ болѣ́зновати,
єди́ному ѿ слу́гъ испадѐ ѻ́ко. єму̀
же ст҃ы́й ѡбѣща́ся, а́ще къ хрс̃то́вѣ
вѣ́рѣ ѿ пре́лести и́дольскія преложи́тъ­
ся, исцѣлѣ́етъ. таково́е па́че игѣмо­
ну повелѣ́вшу ієре́ѡмъ и́дольскимъ со­
твори́ти. ѻни́ же не то́чію помо́ль­
шеся, ни ка́кѡ стра́жущему возмо­
го́ша помощѝ, но гла́съ ѿ неподо́­
бныя це́ркве слы́шимь бя̑ше, є́же
ѿитѝ ѿни́хъ іулія́ну моля́хуся.
и́бо речѐ ѿне́лѣже у́бѡ на́ми на истя­
за́ніе поста́вленъ бы́сть, мнѡгосугу́бное
нанесѐ муче́ніє. и а́біе со́ гласомъ
вся̀ истни́шася, и бы́ша а́ки пра́хъ.
маркія́нъ же па́че поху́ливъ, не́бо
вѣ́дяше му́дръ смы́слъ, но въ ѕлы́хъ
свою̀ ду́шю погрузи́въ. Во́ину же
у́бѡ моли́твою ст҃а́гѡ, о́ку ѡздра́­
вѣвшу, и вѣ́ровавшу хрс̃то́ви,
главу̀ тому̀ ѿсѣщѝ повелѣ̀. ст҃а́го
же я́ти, я́кѡ у́же шата́вся волхво­
ва́ти, и ѡба́вника єго̀ мнѣ́въ. и ка́лъ
на главу̀ єму̀ положи́ти пома́завше,
{#л. фм҃е}

и́же въмѣ́стѡ смра́да во уха́ніе валса́­
мово претвори́ся. тогѡ̀ ра́ди и при­
и́де вѣ́рова хрс̃то́ви келесі́й сн҃ъ игѣ́­
моновъ, я́кѡ ви́дѣвъ си́лы а́гг҃ль­
скія на ст҃а́го с̾ше́дшя, и того̀ вѣ­
нце́мъ ст҃ы́мъ вѣнча́вшя, и ѡбъ­
ходя́щя и бесѣ́дующя тому̀. и ѡста́­
вль оц҃а, пребыва́ше со ст҃ы́мъ, и
ѿ негѡ̀ бл҃гоче́стію учи́мь бя̑ше. не
то́чію же у́бѡ то́й, но и два́надесять
вѡ́инъ с̾ни́мъ вѣ́роваша, и дерзнове́­
ннѡ ко хрс̃ту̀ приступи́ша. та́же мл҃твою
ст҃ы́й мертвеца̀ воскр҃сѝ. и ѡсе́мъ игѣ́­
мону испроси́вшу, па́ки на истяза́ніе
приведе́нъ, с̾ дѣ́тищемъ келесі́ємъ.
єго́же нѣ́который ѿ во́инъ ѿто́ргнути
восхотѣ́въ, и къ игѣ́мону привестѝ
того̀, и а́біе ѿпадѐ єму̀ рука̀.
Посе́мъ же в̾ темни́цу мра́чну и смра́дну
затворе́нъ бы́въ, с̾ келесі́ємъ ку́пнѡ,
я́же а́біе свѣ́та на по́лнися, и уха́­
нія бл҃га́го, я́кѡ стрегу́щіи, к҃,
вѡ́инъ въ те́мнѣй темни́цѣ ѡблиста́ему
свѣ́тлую зарю̀ ви́дѣвше, и воню̀ бл҃го­
уха́нія. а́біе хрс̃то́ву призва́вше си́лу

и того̀ бг҃а наре́кше, крс̃ти́шася анто́­
ніемъ презви́теромъ, и́же бя̑ше старѣ́й­
шин̾ствуя во́ градѣ, сы́й ѿ́крове и ро́да
црс̃кагѡ, хрс̃та̀ чты́й съ седмію̀ сн҃ѡ́въ
свои́хъ, бы́вшимъ и тѣ́мъ вра́зумѣ
хрс̃то́вѣ. и́же сѝ бжс̃твенымъ ѡбъявле́­
ніемъ, пріе́мше презвѵ́тера анто́нія
внидо́ша в̾ темни́цу, и спребы́вше со ст҃ы́мъ
іуліа́номъ. и́же и изведе́ни сни́мъ
ку́пнѡ, два́десять, во́инъ, и в̾ ве́рь­
жени бы́ти повелѣ́ни в̾ коно́бь вря̑щь
с̾ смоло́ю клоко́чющею, и́же ѿ ст҃а́гѡ
вели́кому чюдесѝ ви́дцы бы́вшіи.
из̾носи́му же нѣ́коему мертвецу̀,
того̀ мл҃твою ст҃ы́й воздви́же. и́же
и воскре́съ вѣ́рова хрс̃то́ви, и ст҃о́му
бл҃года́рьствія воздая́ше гл҃я, я́кѡ
у́же хотя́ху нѣ́цыи му́рини поя́­
ти, и в̾ му́ки преда́ти, стра́шными
нѣ́кими и бу́ими устремле́ніи. но
мл҃твами ст҃а́гѡ бг҃ъ уще́дривъ в̾ се́лѣхъ
живы́хъ, а́біе того̀ посла́ти повелѣ̀.
крс̃ти́жеся у́бѡ и то́й ан̾то́ніемъ пре­
звѵ́теромъ, и нарече́ся анаста́сіи,
{#л. фм҃ѕ}

дости́гшеже ку́пнѡ мѣ́ста идѣ́же варя́­
хуся котлы̀, в̾верго́ша и́хъ вну́трь, ст҃ы́й
келесі́й іуліа́нъ, и вѣ́ровавшіи, к҃,
во́инъ, и се́дмь сн҃ѡ́въ кня́жихъ, и
презвѵ́теръ анто́ніи и анаста́сіи, и́же изме­
ртвыхъ воскр҃сы́й. да я́кѡ не вреди́ми
и с̾ коно́бѡвъ изыдо́ша, вѣ́рова во хрс̃та̀
и келесі́ева мт҃и нарица́ємая васили́са,
и крс̃ти́вшися анто́ніемъ презвѵ́теромъ,
иму́щи келесі́я сн҃а по́плоти, ѻц҃а
же по́дх҃у, бо́лѣе подава́ющему поновле́­
нію, я́же и́ми поновле́нію воспріи́мъ­
шая. и́бо са́мъ то́й в̾ вѣ́рѣ хрс̃то́вѣ,
то́й и прія́тникъ бы́сть ѿ бжс̃твенагѡ
кр҃ще́нія. с̾веде́ни же бы̑ша мучи́т­
лемь въ це́рковь и́дольскую, и зна́ме­
навше себѐ зна́меніємъ чс̃тна́гѡ, и жи­
вотворя́щегѡ крс̃та̀, и тѣлеса̀ на́ зе­
млю покло́ньше, терпѣли́вая ѻчеса̀
къ бг҃у возве́дъше, мл҃твами вся̀
и́долы сокруши́ша, и це́рковь просѣ́­
стися сотвори́ша. тѣ́мъ и та́мѡ
су́щимъ, да́же и досе́лѣ глаго́лютъ,
ѻгню̀ сожиза́ти издале́ча явля́тися
и тогда̀ в̾ темни́цу ѿ́слани бы̑ша

идѣ́же пресла́вная яви́шася ст҃ы́мъ,
то́й ча́съ, бу́дущую ѻ́нѣмъ про­
возвѣща́я сла́ву, и неизрече́нная
бл҃га́я. та́же у́бѡ приведе́ни и запале́­
ни, да я́коже не прикосну́ся и́хъ
о́гнь. Ст҃о́му же мч҃нку іулія́ну, и
дѣ́тищу келесі́ю, ко́жѣ съ гла́въ ѡдра́­
ша и ѿметну́ша. ѻ́чи же презвѵ́­
тера анто́нія у́дицами ископа́ша.
ма́тери же дѣ́тища ст҃а́гѡ келесі́я, бл҃го­
да́тію бжс̃твеною, му́чащіи не воз­
мого́ша прибли́житися то́й. но у́бѡ
внегда̀ приступи́ти си́мъ окая́ннымъ
къ ст҃ѣ́й, ѡслѣпо́ша. Посе́мъ ѕвѣ­
рє́мъ и́хъ преда́ша, и я́кѡ у́бѡ звѣ́­
ріе ѡнѝ тѣ́хъ не прикосну́шася, за єди́­
но со инѣ́ми ѡсужде́нными, мече́мъ
ст҃ы́я главы̀ и́мъ ѿсѣко́ша. но по́слѣ
же позна́на бы́ша ст҃ы́хъ тѣлеса̀,
кровє́мъ и́хъ съсѣ́дшимся. и
чю́ду не ма́лу надъ тѣлесы̀ и́хъ яви́ти­
ся, я́кѡ дш҃ямъ ви́домъ дѣви́че­
скимъ нани́хъ при сѣдя́щимъ я́же
по́слѣжде хрс̃тія́не взе́мше, приже́­
ртвеницѣ положи́шя вели́кія цр҃кве.
{#л. фм҃з}

ѿни́хъ же исто́чникъ при́снѡ теку́щъ
истека́етъ, здра́віе подая̀ дш҃е́вное
и тѣле́сное приходя́щимъ. поубіе́ніи же
ст҃ы́хъ гл҃ютъ а́біє тру́су бы́ти. и́же
и па́дшися мно́жайшія ча́сти гра́да,
и поби́ти и растли́ти игѣ́мона, и мно́­
гихъ ѿ є́ллинъ. соверша́етъжеся собѡ́ръ
и́хъ въ ст҃ѣ́мъ и́хъ муче́ніи, су́щемъ
бли́зъ торгу̀.

Вто́йже де́нь сло́во ѡ нѣ́коемъ ста́рцѣ
дх҃о́внѣ и́же мно́ги на́мъ по́вѣсти
ѡ спасе́ніи съписа̀.

Ста́рецъ нѣ́кто ст҃ы́й бгоно́сецъ бѣ̀ на
горѣ̀ ѡли́мбѣ. и к̾ нему̀ прише́дшимъ
мно́зѣй бра́тіи слы́шати ѿ негѡ̀ сло́во
сп҃се́нія. и сѣдя́щимъ тѣ́мъ и ст҃о́му
ста́рцу, и я́же къ сп҃се́нію дш҃е́вному
счиня́ющу по́вѣсть, єди́нъ про́стъ
люди́нъ пріи́де мир̾скі́й, и покло́нься
стоя́ше. Ста́рцу же возрѣ́вшу на́нь
и вопроси́вшу, ко́єя ра́ди потре́бы
пріи́де ко мнѣ̀. и ѿвѣща́въ, ст҃ы́ни
твоє́й исповѣ́дати бесчи́сленыя моя̀ грѣ­
хѝ пріидо́хъ честны́й ѻ́ч҃е. и глаго́ла
єму̀, рцы̀ предъ всѣ́ми не стыдя́ся.

и нача́тъ у́бѡ гл҃ати такова́я, я́же недо­
сто́йна в̾ чл҃ческая слу̑ха в̾ни́ти, илѝ писа́­
нію преда́ти. из̾гл҃авшу же у́бѡ вся̀
єму̀ со слеза́ми, и стоя́ше уны́лъ до́лу
пони́къ сокруше́нымъ срд̃цемъ. и в̾раз̾мы­
шле́ніи у́бѡ ста́рецъ бы́ыъ на до́лгъ ча́съ,
и речѐ кнему̀, хо́щеши ли у́бѡ ча́до ѡбле­
щи́ся во ст҃ы́й ѻ́бразъ. ѻ́нъже речѐ, є́й
ѻ́ч҃е, жела́ю єго̀, и и́мамъ такова́я ѡбол̾че́­
нія пригото́вана на то̀. поучи́въ же єго̀
ста́рецъ ст҃ы́й, и сотворѝ по ѻбы́чаю, и ѡбле­
чѐ єго̀ во ст҃ы́й ѻ́бразъ. и ѿпустѝ єго̀
ре́къ, идѝ ча́до сми́ромъ, и и тому̀ несо­
грѣша́й. ѻ́нъ же поклони́ся до землѝ,
ѿи́де сла́вя бг҃а. мни́хѡмъ же дивя́щы­
мся и гл҃ющымъ, я́кѡ та́кѡ чс̃тны́й ѻ́ч҃е
толи́кѡ тому̀ извѣсти́вшу предо всѣ́ми
на́ми, не в̾да̀ єму̀ ни ма́лы за́повѣди
ни єпитеміѝ. ѻ́нъ же ѿвѣща̀, ѽ лю­
би́мая ча́да, не ви́дѣсте ли ѻ́ного стра́­
шнаго и сла́внаго ѡбону̀ страну̀ му̑жа
стоя́ща, єго́же лицѐ бя̑ше я́кѡ
мо́лнія, и ри́зы єгѡ̀ бѣлы̀ я́кѡ
свѣ́тъ. и в̾руку̀ свое́ю ха́р̾тію имя́­
ше напи́сану исповѣ́давшагѡ грѣхѝ.
{#л. фм҃и}

имя́ше же и черни́ло в̾ сосу́дѣ. и то́й
у́бѡ я́кѡ чл҃вкъ мое́й ху́дости предъ
всѣ́ми ва́ми вся̀ гл҃аше согрѣше́нія, ѻ́нъ
же тро́стію пречерта́ше. да поне́же чл҃колю́­
бецъ млс̃тивый бг҃ъ сія̀ простѝ єму̀, кто̀
є́смь а́зъ грѣ́шный да́ти за́повѣдь тому̀
и єпитемію̀. и сія̀ слы́шавше мни́си, тре́­
петни бы́вше, и поклони́шася чс̃тно́му ста́­
рцу, бл҃годаря́ще гдс̃а на́шегѡ іс҃а хрс̃та̀,
и бл҃гость єгѡ̀ и чл҃колю́біе велича́юще.
и ѿидо́ша чюдя́щеся велмѝ, ѡ пресла́­
ныхъ дѣя́ніи бг҃а на́шегѡ;

Вто́йже дн҃ь сло́во ст҃а́гѡ са́вы ѡ нѣ́коемъ
черноризцѣ добродѣ́телнѣ.

Ст҃о́му ста́рцу иду́щу ѿ́рова къ трос̾тни­
ку̀ іѡрда́нову, срѣ́те ѝ ле́въ превели́къ
храма́я. и припа́дъ каза́ше ста́рцу но́­
гу, и я́кѡ моля́ся получи́ти єму̀ ѿ ста́­
рца исцѣле́ніе. ѻц҃ъ же на́шъ са́ва разу­
мѣ́въ л̾во́ву бѣду̀ сѣ̑де, и за́ногу є́мъ
єгѡ̀, и су́къ вон̾зе́нный из̾я́тъ из̾но­
гѝ. и ѡблег̾ча́въ ѿ болѣ́зни ле́въ
и воста́въ ѿи́де. и ѿто́лѣ в̾ мясопу́­
стныя днѝ въ слѣ́дъ ста́рца хожда́ше ле́въ

и служа́ще єму̀. имя́ше же тогда̀ ст҃ы́й
ста́рецъ ученика̀ усебѐ нѣ́коего сѵ́рина
и́менемъ флавіа́на, иму́ща ѻсла̀ на слу́­
жбу єгѡ̀. и посыла́ше на нѣ́кое ѻру́діе
ученика̀ своегѡ̀ ст҃ы́й са́ва, повелѣва́ше
льву̀ набдѣ́ти ѻсла̀. повся́же у́тра
ле́въ є́мля усты̀ узду̀, и ве́сь дн҃ь
пася́ше, и к̾ ве́черу напои́въ привожа́­
ше. мину́вшим̾ же днє́мъ нѣ́кимъ,
и лву̀ ту̀ слу́жбу творя́щу, по́сланъ
бы́сть на ѻру́діе флавіа́нъ, и своего̀
спасе́нія небре́гъ, илѝ нѣ́кимъ велича́­
ніемъ ѡб̾ятъ в̾падѐ в̾ блу́дъ, и в̾ты̀
днѝ ле́въ сокруши́въ ѻсла̀ и из̾ ядѐ. и сѐ
увѣ́давъ флавіа́нъ, разумѣ́въ ѻсло́во
из̾яде́ніе су́що ѿ своегѡ̀ єму̀ грѣха̀,
и ѿто́лѣ же смѣ̀ пріитѝ и яви́тися
ста́рцу, но ѿча́явся ѕлѣ̀ творя̑ше.
и ше́дъ пребы́сть в̾нѣкоей ве́си своегѡ̀ ­
грѣха̀ пла́чася. и ѻба́че ст҃ы́й ста́­
рец, влд̃чнеє млс̃рдіе подража́я, не пре­
ѡби́дѣ єгѡ̀,но мно́гѡ в̾зыска́въ
и ѡбрѣ́те ѝ, бл҃года́тію же хрс̃то́вою нака­
за́въ єго̀ и утѣ́шивъ ѝ, и ѿпаде́нія
воста́вивъ єго̀. и затворѝ ѝ єди́наго
{#л. фм҃ѳ}

и пока́явъшуся єму̀ все́ю дш҃е́ю, и уго­
ди́вши бг҃у повели́ку. єму́же сла́ва
нн҃ѣ и прс̃нѡ и вѡ́вѣки вѣкѡ́мъ;

Мцс̃а того́же въ к҃в дн҃ь, па́мять ст҃а́гѡ
сщ҃енно мч҃нка єѵ̾се́віа, єпс̃кпа самоса́т̾скагѡ
бл҃гословѝ ѻ́ч҃е.

Єѵ̾се́віи сщ҃енномч҃нкъ, бѣ̀ приконстян̾­
ти́нѣ царѣ̀, рве́ніемъ горя̀ по пра́вой вѣ́­
рѣ. тол̾ми́же єму̀ бѣ̀ дш҃а му́жестве­
на, я́кѡ ино́му никому́же та́кѡ.
тогда́ бо кон̾тянти́ну претя́щу єму̀
десну́ю ру́ку єгѡ̀ усѣщѝ, а́ще небы̀
возбра́ненъ бѣ̀ судо́мъ ѿ ст҃а́гѡ меле́тіа
и́же са́мъ имѣ́яше. ѻ́нъ же просте́ръ
ѻ́бѣ ру́цѣ своѝ я́кѡ вла́сть пріе́мля
усѣче́ніе, илѝ в̾зыска́емаго. преда́ти.
по констянти́нѣ же и іулія́нѣ уале́нтъ
ца́рь, аріа́нскимъ ѕлохи́тръствомъ не­
году́я на ст҃а́го, и с̾ прс̃то́ла єго̀ согна̀
и пребыва́ти во изгна́ніи дале́че єго̀
ѡсудѝ. по уме́ртвіиже уале́нттовѣ
воз̾врати́ся па́ки ст҃ы́й, и по мнѡ́зѣхъ
по́двизѣхъ муче́ніе получѝ си̑це.

женѣ̀ ѕловѣ́рнѣ а́ріева су́щи уче́нія,
кереми́ду с̾покро́ва уро́ньши умертвѝ ѝ.
ю́же проще́нія сподо́би, своему̀ влд̃цѣ,
и первомч҃нку стефа́ну подо́бяся.

Вто́йже дн҃ь ст҃а́гѡ мч҃нка зино́на,
и зи́ны слугѝ єгѡ̀.

Се́й бя̑ше ѿ ѳиладелфі́и арави́тскія
идѣ́же дре́вле нарица́шеся єма́нъ.
ѕи́на же бя̑ше слуга̀, жела́я же х҃а
ра́ди быва́емагѡ муче́нія получи́ти.
ст҃ы́й же ѕино́нъ разда́въ всѐ имѣ́­
ніе своѐ ни́щимъ, и рабы̀ свобо́дою
поче́тъ при игѣ́монѣ маѯиміа́нѣ, и́же
бя̑ше при маѯиміа́нѣ царѣ̀. слы́шавъ
же я́кѡ мно́гу че́сть и́долѡмъ твори́тъ,
пріи́де кнему̀ съ слуго́ю ѕи́номъ, и́бо
ѕи́на та́кѡ изво́ли, не восхотѣ̀ ѡ­
ста́ти гдс̃на своего̀, но и́де сни́мъ.
и я́влься игѣ́мону ст҃ы́й зино́нъ, и
я́кѡ того̀ к̾ су́етным̃ богѡ́мъ тща́щася
ви́дѣ, и ѡ слу́жбѣ и́дольстѣй прилѣжа́­
ща, ѡбличи́въ єго̀. ѻ́нъ же а́біе волу́я­
ми жи́лами би́ти повелѣ̀. біе́мъ же ст҃ы́й
просте́рши ру́ку, и ла́ктем̃ уда́ри в̾ стѣ́ну
{#л. фн҃}

ка́пища, и разори́въ єго̀ и низложѝ.
тогѡ̀ ра́ди повѣ́шенъ и стро́ганъ не ми́ло­
стивно, и ѻ́цтомъ и со́лію по ра́нахъ
тро́мъ, въ кла́дѣ но́зѣ заби́вши
четы́рми кли́ны, идѣ́же и слузѣ̀ єгѡ̀
зи́нѣ вше́дшу и моля́щуся не ѿрази́­
ти ни ѡстави́ти єго̀. игѣ́монъ же
ѡсе́мъ увѣ́давъ, повелѣ̀ и того̀ за
твори́ти. внегда́ же на вопроше́ніе ѻ́ба
приведе́на бы́вша, и хрс̃та̀ ѿврещи́ся
не восхотѣ́вша, біе́ни бы́ша вельмѝ, и
рожны̀ желѣ́зными раз̃же́ными под̃жго́ша
ст҃о́му ѕино́ну пе́рси и срд̃це. Та́же
повѣ́шенъ на́ древѣ, и ѻгне́мъ мы́шцы
и́хъ сожго́ша. и ка́меніемъ поногу̀ ѡтя­
гче́ни, и поси́хъ вро́въ ѻ́гненый въве́­
ржени, пла́мени ма́сломъ покропле́ну
и зане́же пресла́внѡ не вреди́ми бы́ша
и сохране́ни, мече́мъ главы̀ єю̀ ѿ­
сѣко́ша. соверша́ет̾жеся собѡ́ръ
єю̀ въ мч҃ніи ст҃а́гѡ
геѡргія и́же въ
кипари­
сі́и
;

Вто́йже дн҃ь сло́во ѿ ста́рчества.

Речѐ а́вва иса́іа, бога́тый до́брѣ смы́сля
кры́етъ в̾ну́трь хра́ма сокро́вища своя̀.
сокро́вище явля́емо ѡскудѣва́етъ, и ѿ
кня̑зь навѣ́туется. си́це и мни́хъ
смиреному́дръ и добродѣ́теленъ,
таи́тъ своя̀ добродѣ́тели, я́коже
ѻ́нъ своя̀ сокро́вища. и не твори́тъ своя̀
хотѣ́нія, но нався́къ ча́съ себѐ укаря́етъ
и себѐ та́йному поуча́етъ поуче́нію по пи́­
санному, согрѣ́яся срд̃це моѐ во мнѣ̀,
и в̾ поуче́ніи мое́мъ разгори́тся ѻ́гнь.
кото́рый ѻ́гнь; слы́шите писа́ніе гл҃ю­
щеє. и́бо бг҃ъ на́шь ѻ́гнь пояда́яи
є́сть. я́коже бо ѻ́гнь та́итъ во́скъ,
и искуша́етъ ти́ну с̾кве́рныхъ нечистѡ́тъ,
си̑це и сокрове́ное поуче́ніе искуша́етъ
скве́рныя по́мыслы, и увяда́етъ дш҃е́­
вныя стра́сти, и просвѣща́етъ у́мъ,
и я́сну твори́тъ мы́сль, и ра́достнѡ тво­
ри́тъ срд̃це. та́йное поуче́ніе уяз­
вля́етъ бѣ́сы, и ѿгоня́етъ ѕлы́я по́­
мыслы. и́бо в̾ну́треняго человѣ́ка
просвѣща́етъ, и укрѣпля́емь є́сть
{#л. фн҃а}

ѿ а́гг҃лъ, и сла́вимь є́сть ѡи̃ человѣ́къ.
та́йное поуче́ніе и чте́ніе, до́мъ є́сть дш҃и
не прохо́денъ, и сто́лпъ не подви́жимъ,
и приста́нище ти̑хо, и немяте́жно и непо­
дви́жимо дш҃ю спаса́етъ. мно́гѡ сму­
ща́ются и мо́лвятъ бѣ́сове, єгда̀ и́нокъ
воѻружа́етъ себѐ та́йнымъ поуче́ніемъ,
є́же є́сть си́це, гдс̃и іс҃е хрс̃тѐ сн҃е бж҃іи
поми́луи мя, и прочита́ніемъ и́же на
єди́нѣ. поуче́ніе зерца́ло
є́сть уму̀, и свѣти́лникъ со́вѣсти.
сокрове́ное поуче́ніе ис̾суша́етъ блу́дъ,
украша́етъ я́рость, ѿ гоня́етъ гнѣ́въ,
ѿє́млетъ го́ресть, ѿрѣва́етъ напра́­
сньство, тли́тъ уны́ніе. сокрове́­
ное поуче́ніе просвѣща́етъ влд̃чное ума̀,
ѿго́нитъ лѣ́ность. сокрове́ное поуче́­
ніе ражда́етъ умиле́ніе, и вселя́етъ
в̾тя̀ стра́хъ бж҃іи, прино́ситъ сле́зы.
сокрове́ное поуче́ніе хода́тай быва́етъ
мни́ху, смиреному́дрію неле́стному,
и бдѣ́нію бл҃гоумиле́ну, и мл҃твѣ не
сму́тнѣ. сокро́вище мл҃твеное ѿгоня́етъ
скве́рныя по́мыслы, и ра́нитъ бѣ́сы, и
ѡчища́етъ тѣ́ло. сокрове́ное поуче́ніе,

долготерпѣ́нію учи́тъ, воздержа́нію прича́­
стникъ, геє́ну возвѣща́етъ. сокрове́ное
поуче́ніе, ума̀ не глу́мна соблюда́етъ,
сме́рти помышля́ти устрая́етъ. сокрове́ное
поуче́ніе вся́кагѡ бл҃га дѣ́ла испо́лнено
є́сть, и вся́кою добродѣ́телію укра́шено
є́сть, и вся́кагѡ скве́рнагѡ дѣ́ла удале́­
но є́сть, и нѣ́гдѣ дале́че ѿстои́тъ;

Вто́йже дн҃ь сло́во ст҃а́гѡ варсоно́фія,
я́кѡ подоба́етъ претерпѣ́ти вся́кому бра́ту
бе́счина ходя́щему.

Бра́тъ вопросѝ оц҃а вели́каго варсоно́фія
гл҃я, бра́тъ проти́вит̾мися ѿню́дъ,
что сотворю̀. ста́рецъ же речѐ кнему̀,
бра́те ан̾дре́е дивлю́ся не разу́мію тѝ
. занѐ та́кѡ мни́ши про́стѡ, я́кѡ мол̾­
читъ дія́волъ искуша́ти кого̀. не мо́жем̃
вины̀ сотвори́ти ѡгрѣсѣ́хъ па́дающымъ
и пѣ́ны точа́щымъ. та́кѡ и смуще́­
нымъ ѿ дія́вола, в̾ прекосло́віи и не поко́­
рствѣ, не мо́жемъ ѡбъвини́ти. но вне­
мли́те гл҃емымъ. и́бо ты̀ смуща́емь
єсѝ ѿ дія́вола, да и ты̀ не разумѣ́ еши
ѿ своегѡ̀, но и́же су̑ть бли́жняго, ѻ́стрѣ
на́нь бляде́ши. сѐ єсѝ ре́клъ бра́тня,
{#л. фн҃в}

а свои́хъ покры́лъ єсѝ. пре́же бо вопро­
ша́лъ єсѝ ѡсмире́ніи, и слы́ша себѐ
имѣ́ти зе́млю и пе́пелъ, и не расчита́­
ти на́ санъ. но и сѐ, я́кѡ а́ще соверше́нъ
єсѝ во ѻ́бразѣ и в̾ кли́росѣ, то̀ и
соверше́ному носи́ти худа́го гл҃я, я́кѡ и
а́зъ не досто́инъ є́смь. а́ще ли не терпи́­
ши укори́зны, то̀ вотщѐ гл҃еши.
ты́ бо кто̀ єсѝ имѣ́яи о́чи ви́дяща
чюжі́я стра́сти. чл҃къ бо возвѣща́я
ве́щи па́че мѣ́ры и глумя́ся ѡни́хъ,
мни́тся терпя̀ црс̃тва ра́ди, но не
вкуси́лъ є́сть ѿнего̀, да тѣ́мъ не
бы́ша єму̀ любе́зна. подоба́етъ бо
помяну́ти єму̀ ла́заря, коли́кѡ
терпѣ̀ бл҃годаря̀ бг҃а;

Вто́йже де́нь сло́во іѡа́нна златоу́ста­
гѡ ѡ покая́ніи.

Єгда̀ дш҃а ѡбія́та бу́детъ мно́гими
страстьмѝ, и въ глубину̀ ѕлы́хъ при­
и́детъ, преѡби́дитъ про́чее вся̀ бл҃га́я
дѣ́ла, и та́кѡ в̾ послѣ́днее ѿча́яніе
пріи́де. да а́ще что̀ любо тогда̀ извѣ­
ща́еши ѿ ст҃а́гѡ писа́нія на исправле́ніе, не
пріе́млет̃ увѣ́денію дѣ́ла, но любо му́ки,

любо чи́мъ и запреща́еши болѣ́ти, пре­
быва́етъ не ѡбрати́мо. гдс̃ь бг҃ъ на́шь,
не єгда̀ хо́щемъ мы̀, но єгда̀ хо́щетъ
помога́етъ, въ я́зяхъ и въ бѣда́хъ стрс̃те́й
избавля́етъ, и свои́ми времены̀ я́кѡ
бл҃гъ и чл҃колюби́вый вра́чь коєго́ждо по­
двиза́ющихся ис̾цѣля́етъ. ѽ го́ре при­
влача́ющємъ грѣхѝ а́ки у́жемъ, є́же
є́сть прилага́ти къ пе́рвому согрѣше́нію
вторы́я и тре́тія, и я́же пото́мъ не чи́стая
блуже́нія и не пра́вды. подоба́ше бо увя́з̾­
шимъ въ грѣсѣ́хъ възбира́нія мѣ́стѡ
и прилага́нія къ ѕлы́мъ съ плете́ніємъ
раз̾сы́повати грѣхѝ и ис̾требля́ти. не со­
грѣши́ти бо человѣ́ческому єстеству̀ не́мо­
щно. я́коже нѣ́сть без̃ пра́ведна на землѝ
та́кѡ и без̾грѣ́шна. мо́щно у́бѡ ѿ со­
грѣше́ніи а́біе премѣня́ющимся пока́ятися
и не собира́ти ѕла̀ к̾ ѕлы́мъ. но то̀ у́бѡ
свое́ю во́лею грѣхѝ к̾ грѣхѡ́мъ я́кѡ у́же
плету́ще, и сконча́тися у́же хотя́щу
сконча́емому ужи́щу, па́ки друго́е прилага́ют̃
продолжа́юще и с̾вива́юще. та́кѡ у́бѡ ѡбы́­
кли в̾ ѕлых̃ пребыва́ющіи. ѿ сего́же да изба́­
витъ на́съ гдс̃ь свое́ю блгд̃тію. єму́же сла́ва.
{#л. фн҃г}

Мцс̃а тогѡ́же, въ к҃г дн҃ь. стрс̃ть ст҃ы́я
мч҃нцы агрипи́ны, бл҃гословѝ ѻ́ч҃е.

Сія̀ ѿ млады́хъ ногте́й бг҃у себѐ въда́вши
роже́ніе и воспита́ніе имѣ̀ пресла́внагѡ
гра́да ри́мскагѡ. да я́кѡ я́блоко илѝ
шипо́къ бл҃гоуха́ненъ ѡб̾юха́ющи вѣ́рныхъ
срд̃ца̀, и смра́дъ страстє́й ѿгоня́щи.
дв҃ьствомъ и чистото́ю дш҃ю украси́вши,
и хрс̃то́ви ѡбручи́вши себѐ. де́рзостнѡ
и му́жески къ муче́нію потечѐ. и любвѐ
ра́ди своегѡ̀ жениха̀ хрс̃та̀, на мно́ги себѐ
му́ки в̾да́вши. же́зліємъ у́бѡ по́ тѣлу
біє́на бы́сть, и ко́сти сокруши́ша є́й.
и ѿ ѻде́жи совлечена̀, и у́зами стя́­
гнута, и бж҃е́ственымъ а́гг҃ломъ разрѣ­
шена̀, вся́ко нече́стіє разрушѝ тѣ́ломъ
свои́мъ. и в̾ тѣ́хъ му́кахъ бг҃у дх҃ъ
сво́й предадѐ. ва́с̾саже и па́вла, и
агафоникі́я, та́йнѡ взе́мъше тѣ́ло
му́ченицы ѿ ри́мъскагѡ гра́да, ѿ мѣ́ста
до мѣ́ста преходя́ще, до́лгою пучи́ною
сикилі́йскія єпа́рхіи дости́гше, и та́мѡ
тѣ̑ло ст҃ы́я спря́тавше. да внегда́же
сикилі́я тѣ̑ло єя̀ воспрія́тъ, внеза́пу
мра́чныя бѣсо́въскія изба́вися ѕло́бы

па́чеже и ага́ряне дерзну́вшіи на́ градъ идѣ­
же цр҃кви єя̀ хотя̑ще єго̀ взя́ти, поги́­
бели всеконе́чнѣи пре́дани бы́ша. ѿто́­
лѣ у́бѡ да́же и до дне́сь прокаже́нніи ѡчи­
ща́ются приходя́щіи свѣ́рою, и ско́рбь вся́­
когѡ неду́га мл҃твами єя̀ прогоня́ется;

Вто́йже дн҃ь сло́во ѡбесѣ́дѣ ст҃а́гѡ григо́­
рія и петра̀.

Поє́же в̾ раѝ ра́дости, согрѣше́ніе преслу­
ша́нія сотвори́въ пра́ѻц҃ъ чл҃ческагѡ
ро́да, ѿту́ду из̾гна́нъ бы́сть, и
в̾заточе́ніе сея̀ слѣпоты̀ и печа́ли, я́же
с̾тра́ждемъ пріи́де. согрѣши́въ бо и внѣ̀
себѐ изве́д̾ся, ктому̀ про́чеє не можа́­
ше ви́дѣти ра́дость ѻ́ну, нбс̃нагѡ ѻте́­
чества, я́же пе́рвѣе зря̑ше. в̾ раи́ бо
чл҃къ сы́й бж҃іихъ словє́съ слы́шати ѡбы́че,
и во бл҃же́нныхъ а́гг҃лъ устрое́ніи, чс̃тото́ю
срд̃ца, и высото́ю видѣ́нія, вну́трь бя̑ше.
и по є́же самому̀ па́сти єму̀ по́мыслы
ѻ́ногѡ, и́мъ же свѣ́та исполня́шеся
ѿступѝ. ѿню́дуже ѿ тогѡ̀ пло́ти мы̀
в̾ се́й заточе́ніа слѣпотѣ̀ ро́ждьшеся
ѻте́чество у́бѡ нбс̃ное слы́шимъ
{#л. фн҃д}

и того̀ жи́теля а́гг҃лы слы́шимъ, ѡбѣ́щни­
киже тогѡ̀ бл҃же́нныхъ а́гг҃лъ, дх҃и пра́ве­
дныхъ сконча́вшыхъся. пло́тяниже
нѣ́цыи, неви́димая ѻ́на ви́дѣти немогу́­
ще, и ра́ди не иску́сьства, в̾ стра́хъ ни­
з̾па́дающе в̾ двовѣ́ріи су̑ть, в̾мѣня́юще
бы́ти ѻ́на, я́же тѣле́сными ѻчи́ма ви́дѣ­
ти немо́гутъ. сіє́же страхова́ніе въ пра́­
ѻц҃ѣ на́шемъ небѣ̀. а́ще бо и из̾гна́нъ
бы́сть ѿ ра́йскія пи́щи, но ѻба́че воспо­
мина́ше є́же бѣ̀ ви́дѣлъ, а́ще и ѿве́рглъ
бѣ̀ то̀. сі́иже помы́слити и воспомяну́­
ти слы́шаная не мо́гутъ, за є́же ни єди́н̾
же иску́съ извѣ́стѡ держа́ти и́мъ, я́ко­
же ѻ́нъ ѿ мимоше́дшыхъ. я́коже бо не
пра́здна жена̀ в̾ темни́цу в̾ ложесна̀ бы́вши
и та́мѡ ѻтроча̀ роди́тъ. рожде́ноеже ѻтро­
ча̀ в̾ то́й темни́цѣ воспита́ется и возра­
сте́тъ. тогѡ́же ро́ждьшая мт҃и мнѡ́га­
жды єму̀ сл҃нце и луну̀ и звѣ́зды го́­
рыже и поля̀ и пти́цы паря́щя, ико́ни те­
ку́щя сказу́етъ. ѻ́но же в̾ темни́цѣ ро­
же́но и воспита́но, ничто́же и́но, ра́звѣ
темни́чную тму̀ вѣ́сть. и сія̀ у́бѡ бы́ти
слы́шитъ, зає́же воиску́сѣ та̀ невѣ́дѣти

и́стинаже сія̀ бы́ти не невѣ́руетъ. си̑це
и все́й заточе́нія и́хъ слѣпотѣ̀ ро́ждьшеся
чл҃цы высо́кая и неви́димая слы́шаще
бы́ти, неудо́бь вѣ́руютъ, а́ще во и́сти­
ну су̑ть, то́кмо бо сія̀ вѣ́дятъ худа́я
и ви́димая, в̾ ни́хже роди́шася. ѿту́­
дуже про́чеє бы́сть, я́кѡ да са́мъ не ви́ди­
мымъ и ви́димымъ зижди́тель єдиноро́­
дный сн҃ъ ѻч҃ь, во избавле́ніе чл҃ческагѡ
ро́да пріи́детъ, и дх҃ъ єгѡ̀ въ срд̃ца̀ на́шя
в̾сели́тъ. я́кѡ датѣ́мъ ѡживотворе́ни
бы́вше, вѣ́руемъ ѡни́хже и єщѐ иску́­
сомъ в̾ ра́зумѣ бы́ти не мо́жемъ. єли́­
цы у́бѡ дх҃ъ се́й наслѣ́дія на́шегѡ за­
ло́гъ прія́хомъ, ѡ неви́димыхъ жи́зни
несомни́мся. а и́же и єщѐ въ извѣще́­
ніи се́мъ нѣ́сть утверже́нъ, до́лженъ
є́сть себѐ без̾сомнѣ́нія соверше́ныхъ му­
жє́й словесы̀ к̾ вѣ́рѣ приложи́ти. и́же
про́чеє ст҃ы́мъ дх҃омъ неви́димымъ и­
ску́съ и́мутъ, и тѣ́мъ вѣ́ровати.
су́етенъ бо є́сть про́чеє ѻ́нъ ѻ́трокъ
а́ще сегѡ̀ ра́ди ѡ́свѣтѣ свою̀ мт҃рь солга́ти
мни́тъ, за є́же ѻ́ному ничто́же и́но
вѣ́дѣти, ра́звѣ темни́чную тму̀;
{#л. фн҃е}

Вто́йже де́нь стра́сть ст҃ы́хъ му́ченикъ
єѵ̾сто́хія и га́ія, и и́же сни́ма.

Єѵ̾сто́хіи ст҃ы́й, и га́іи, анепсі́й єгѡ̀
и и́же сни̑мм, в̾ лѣ́та бя́ху максимія́на
царя̀, ѿ́ града садо́на. єѵ̾сто́хіи же
пре́же бя̑ше жре́цъ и́дольскій. и внегда̀
зря̑ше му́чащихся ст҃ы́хъ по хрс̃тѣ̀,
и пресла́вная чюдеса̀ творя́щыхъ, зазрѣ̀
своє́й слу́жбѣ, приступѝ въ єѵ̾доѯі́ю
єпи́скопу антіѡхі́йскому, и крести́ся
ѿ негѡ̀, и поставле́нія презви́тер̾скагѡ
сподо́бися. и ше́дъ в̾ве́сь нарица́емую
лу́стру, ѡбрѣ́те анепсі́я своегѡ̀ га́ія
съ тре́ми ѻ́троки про́віемъ, ло́ліемъ и
у́рваномъ я́же ѡ хрс̃тѣ̀ пріи́мъ и на­
учѝ и крс̃тѝ я̀, и всѐ родъство̀ своѐ.
тѣ́мъ увѣ́денъ бы́сть, и я́тъ и при­
веде́нъ бы́въ къ игѣ́мому. и хрс̃та̀ испо­
вѣ́давъ, повѣ́шенъ бы́въ на́древѣ
истро́ганъ бы́сть ѕѣлѡ̀. посе́мъ по́слани
бы́ша во анкѵ́ру ко агрипи́ну ту̀ су́щу
игѣ́мону, и пред̃ста́вши на испыта́ніе,
хрс̃та̀ ѿврещи́ся не восхотѣ́ша. и пе́рвое
у́бѡ повѣ́шена бы́ста ло́ліи и урва́нъ
пря́мѡ себѐ, и стро́гана бы́ста ѕѣлѡ̀.

и́хъже кро́вь под̾є́мъ га́іи, и біє́нъ бы́сть
по плеща́ма и по чре́ву. ст҃о́му же єв̾сто́­
хію главу̀ ѿсѣко́ша, и подъя́тъ ю̀ га́іи.
а млд̃нцы и́же приведе́ни бы́ша к̾ мѣ́дяну
колесѝ, и ѿ негѡ̀ сохране́ни бы́ша пресла́­
внѡ, колесѝ не подви́гнувшуся ѿню́дъ.
и ѡстри́гше главы̀ и́мъ, и гво́зди при­
гвозди́ша я̀. а я́же бѣ̀ же́нескъ по́лъ,
сосца̀ урѣ́заша и́мъ. а урва́нъ мече́мъ
посѣ́ченъ бы́сть. млд̃нцы же не повину́­
вшеся, но велегла́снѡ хрс̃та̀ ис̾повѣ́да­
вше, ѿсѣкѡ́ша главы̀ и́хъ;

В то́й же дн҃ь сло́во ст҃а́гѡ єфре́ма ѡ учи́­
телехъ, ка́кѡ подоба́етъ твори́ти,
та́ко же и учи́ти.

Нежела́й владѣ́ти дш҃а́ми, єда̀ ка́кѡ
взы́деши на без̾стра́стіе мѣ́ры, да и
себѣ̀ сотвори́ши па́кость, и су́щимъ
под̃тобо́ю. а́ще ли нево́лею привлече́шися
попецы́ся да не своє́ю во́лею привле́кши
сотвори́ши поручи́вшаго тѝ словє́сныхъ
ѻвє́цъ попече́ніє. гл҃етъ бо проро́комь
ієзекі́илемъ, го́ре ва́мъ пастусѝ,
я́кѡ не до́брѣ пасо́сте ѻвє́цъ мои́хъ,
{#л. фн҃ѕ}

но до́брыя закала́ете и волно́ю и́хъ ѡдѣва́е­
теся, и нерадитѐ ѡ овца́хъ мои́хъ. немо­
щна́го же укрѣпи́сте, и крастава́таго не
ис̾цѣли́сте, сокруше́ннаго не утверди́сте
поги́бшаго невзыска́сте. и разыдо́шася
ѻ́вцы моѝ на́ горы и на вся̀ хо́лмы высо́кія,
занѐ не бы́ти пастухѡ́мъ, и по лицу̀ всея̀
землѝ разыдо́шася, и нѣ́сть взыска́ю­
щагѡ ни ѡбраща́ющагѡ. сегѡ̀ ра́ди пастусѝ
слы́шите сло́во гдс̃не. живу̀ а́зъ гл҃етъ
гдс̃ь, занѐ бы́ти ѻвца́мъ наснѣде́ніє
пти́цамъ нбс̃нымъ, занѐ не бы́ти пасту­
хѡ́мъ, и не взыска́ша ѻвє́цъ мои́хъ,
но пасо́ша пастусѝ себѐ, ѻвє́цъ же мои́хъ
погуби́ша. тогѡ̀ ра́ди изба́влю а́зъ
ѻвца̀ изоу́стъ и́хъ, и къ тому̀ не
бу́дутъ въ снѣде́ніє. Разумѣ́йте что̀
потре́ба старѣ́йшинамъ, коли́ку бѣду̀
и́мутъ не брегу́щіи пещи́ся поруче́нными
и́мъ. Подоба́етъ у́бѡ игу́мену хи́тру
бы́ти, востанли́ву на сп҃се́ніе владѣ́е­
мымъ, и ко єго́ждо разумѣ́ти ступа́­
ніе, и неподо́бныя ѡблича́ти. руко­
води́ти, и на бо́лшая учи́ти, не то́кмѡ
же соста́вы писа́нія ученикѡ́мъ каза́ти,

но подоба́етъ и дѣ́лы на труды̀ воз̾води́ти
и ѿ пред̃ста́тель да́же и до ме́ншихъ к̾ сп҃се́­
нію присовокупля́ти, и прелага́ти къ бра́­
тіи я̀. и прети́мыя му́ки лѣни́вымъ
гл҃ати. и во́лцы ви́дѣвше па́стырево при­
лѣжа́ніє ѿбѣ́гнутъ, и ста́до словє́сныхъ
ѻвє́цъ соблюде́тся, и па́стыри ѿ бг҃а по­
хвале́ни бу́дутъ. єму́же сла́ва ны́нѣ
и при́снѡ и во́ вѣки вѣкѡ́мъ;

Сіѐ сло́во чтѝ покаѳи́смахъ.

Мцс̃а ию́ня, въ к҃д дн҃ь, и́же въ ст҃ы́хъ
оц҃а на́шегѡ аѳана́сія вели́кагѡ, архи­
єпс̃кпа алеѯа́ндрі́йскагѡ, сло́во на ржс̃тво̀
іѡ҃а́нна прд̃тчи, и ѡ єлисаве́ѳи, и ѡ бцд̃ѣ,
бл҃гословѝ ѻ́ч҃е.

Ни́ву у́бѡ ис̾со́хшую, и звѣрє́мъ въ по­
пра́ніе бы́ти ѡста́вленую, во́лъ ѡра́тель­
ный с̾ трудо́мъ раз̾бива́я, воздви́жетъ
гру́ды. єли́кѡ бо же дѣ́лана ни́ва вре́мя
пребыва́етъ, толи́ку ѻра́лу пред̃стоя́и
во́лъ къ болѣ́знѣйшимъ трудѡ́мъ пре­
клоня́ется, яремоно́сную угнѣта́я вы́ю.
{#л. фн҃з}

женѣ́_же за_матерѣ́вшей, и въ ѡбѡя̀
ѕла̀ въ па́дшѣй, и долголѣ́тнымъ
вре́менемъ ѡбъветша́вшей, непло́дъ­
ство же и изънеможе́ніє нося́щей,
не пло́д̾ство єстества̀, и из̾неможе́ніє
ста́рости, сло́вомъ а не трудо́мъ, и́же
єстеству̀ содѣ́тель бг҃ъ сло́во, и тѣле́­
сноє ѡбетша́ніє ѡбновля́етъ, и не­
пло́д̾ства за маторѣ́ніє исправля́єтъ.
и свидѣ́тельствуєтъ мѝ сло́ву ѻбру́чница
сщ҃е́нника заха́ріи єлисаве́ѳь, не за­
смѣя́вшися я́коже са́рра, но вѣ́ровавши
я́коже а́ннѳ я́же разоре́нымъ удѡ́мъ,
я́коже оре́лъ ѡб̾нови́ся. вос̾пита́ бо
ѻтроча̀ вѣ́домѡ и достохва́лнѡ, іѡрда́нь­
скимъ струя́мъ сожи́теля. во и́стину
вели́ка въ жена́хъ єлисаве́ѳь, я́кѡ
сро́дница сла́внѣй дв҃ѣй. я́кѡ
слы́ша ны́нѣ гавріи́ла къ дв҃ѣй гл҃юща,
сѐ єлисаве́ѳь ю́жика твоя̀;
ѽ бл҃горо́діе ро́да; ѽ прино́са бл҃го­
говѣ́йнагѡ; ѽ чистоты̀ житія̀;
ѽ бл҃голю́бія дш҃и; ѽ мѷро прія́тнагѡ ­
сосу́да; єв̾ву запя́тъ змі́й;
но єлисаве́ѳь похвалѝ велмѝ а́гг҃лъ.

во и́стину вели́ка въ жена́хъ єлисаве́ть
я́же ѡполчи́теля іѡ҃а́нна носи́вшая.
и невѣ́рному заха́ріи поноси́вшу; и я́кѡ
невѣ́ренъ заха́рія. тѣле́сную не́мощь
изъвѣ́стнѣйшу бж҃іягѡ возвѣще́нія
не пщева́въ. Слы́шалъ єсѝ пред̃почте́ніе
єѵг̃али́ста лукѝ гл҃ющеє; яви́жеся єму̀
а́гг҃лъ гдс̃нь ѡдесну́ю стоя̀ ѻлтаря̀ кади́лна­
гѡ, ѻ́бразъ въ явле́ніе бг҃ овидѣ́нія
бы́сть. ѡдесну́ю а́гг҃лъ ста̀; поне́же
десно́е ржс̃тво̀ хотя́ше роди́тися десно́ю.
пу́ть нбс̃нагѡ црс̃твія проповѣ́дуя порече́­
нному гл҃у. путя̀ и́же ѡдесну́ю вѣ́сть
бг҃ъ, раз̾враще́ниже су̑ть шу́іи. не пу́ть
премѣня́а, но нра́въ на зна́менуя. яви́же­
ся єму̀ а́гг҃лъ гдс̃нь стоя̀ ѡдесну́ю ѻлтаря̀
кади́лнагѡ; да слы́шатъ прише́дшіи,
и да разумѣ́ютъ, и разумѣ́вше да позна́­
ютъ, я́кѡ а́гг҃ли же́ртвенику предъстоя́тъ.
идѣ́же бо а́гг҃льское пред̃стоя́ніе; ту̀ бж҃іе
в̾селе́ніе. заха́рія сщ҃е́нникъ
слу́жбу творя́ше, въ шести́хъ дне́хъ дне́­
внѣй пред̃стоя̀ слу́жбѣ не вовсе́мъ лѣ́тѣ,
но въ дневнѣ́й слу́жбѣ служа̀. уста́вле­
ніи же а́гг҃ли ѿ бг҃а ст҃о́му же́ртвенику,
{#л. фн҃и}

ря́дъ дне́вный нетворя́тъ, но но́щію и дні́ю
не ѿто́ржени пред̾стоя́тъ же́ртвенику.
вѣ́дятъ неради́ваго, и усе́рд̾ствующаго
познава́ютъ, нижѐ со бл҃гоговѣ́ніемъ
приходя́щихъ свѣ́дятъ. и не та́кѡ
приходя́щихъ ви́дятъ, но и клену́щихъ­
ся, и заклина́ющихъся, на зна́ме­
нуютъ, плодонося́щихъ, и лѣня́щихся.
не я́кѡ ка́меніемъ укра́шенъ є́сть же́ртве­
никъ смотря́й, ѿ а́гг҃лъ бо носи́мь
є́сть, арха́гг҃лы ѡкруже́нъ є́сть. а́ще
бо вся́къ предѣ́лъ язы́ческій, почи­
слу̀ а́гг҃лъ ѡпредѣля́ется, порече́нному
глаго́лу, поста́ви предѣ́лы язы́кѡмъ
почислу̀ а́гг҃лъ бж҃іихъ. кольмѝ па́че
же́ртвеникъ а́гг҃лы ис̾по́лненъ не бу́­
детъ, идѣ́же та́йный у́гль лежи́тъ, ­
. єго́же клеща́ми дх҃а серафи́ми пріє́­
млюще, ра́ди служе́нія сщ҃е́ннича,
ѡчище́ніе грѣхо́мъ прося́щему да́руютъ.
и я́кѡ вси́хъ є́сть же́ртвеникъ, слы́ши
иса́ію про̃ро́ка в̾зыва́юща; зрѣ́хъ, и сѐ
по́сланъ бы́сть ко мнѣ̀ єди́нъ ѿ сера­
фи́мъ, и имя́ше у́гль в̾ руку̀ свою̀
єго́же клеща́ми в̾зя́ть ѿ ѻлтаря̀

и коснсу́ся устна́мъ мои́мъ. и речѐ, сѐ
косну́ся сі́и устна́мъ твои́мъ, ѿи́метъ
без̾зако́нія твоя̀, и грѣхѝ твоя̀ ѡчи́­
ститъ. зри́шили, кото́ріи предстоя́тъ
же́ртвенику, и каковѣ́ма ѻчи́мм досто́итъ
в̾зира́ти вну́трь; чи́стыми неле́стны­
ми, бл҃гопода́тными, нищелю́бными.
что̀ у́бѡ єѵг̃ли́стъ лука̀; яви́жеся
єму̀ речѐ а́гг҃лъ гдс̃нь ѡдесну́ю стоя̀
ѻлтаря̀ кади́лнагѡ; и ви́дѣвъ заха́­
рія смяте́ся, и стра́хъ нападѐ на́нь.
рече́же єму̀ а́гг҃лъ гдс̃нь, небо́йся
заха́ріє, занѐ услы́шана бы́сть мо­
ли́тва твоя̀. и сѐ єлисаве́ть жена̀
твоя̀ роди́тъ сн҃а тебѣ̀, и нарече́ши
и́мя єму̀ іѡ҃а́ннъ. и бу́детъ ра́дость
тебѣ̀ и весе́ліе, и всѣ́мъ лю́демъ;
сія̀ а́гг҃лу гл҃ющу, заха́рія стра́хомъ сме́­
ртнымъ ѡбія́тъ бы́въ. и сопроти́въ ко
а́гг҃лу ѿвѣща̀ ре́къ си́це, в̾нѣ̀ стра́ха
повелѣва́еши мѝ бы́ти, и гл҃еши мѝ не
бо́йся заха́ріє. и ка́кѡ мо́щно є́сть
сѐ, є́же неви́дѣхъ когда̀, нн҃ѣ пе́рвѣе
ви́жду, ѻ́гнь вѣща́ющь бестѣле́сна
чл҃ка, непи́санъ ѻ́бразъ, несъчета́нно
{#л. фн҃ѳ}

лицѐ, ѻблакососта́вленъ зра́къ,
воздухоше́ствена ход̾ца̀, крилолу́чна
же́ртвенику сѣди́теля. сло́во в̾лага́е­
ши, и стра́хъ показу́еши. гл҃ы твоѝ
ѻ́гнени, и возвѣще́нія твоя̀ не удо́бь
ятовѣ́рна. єлисаве́ть за́чнетъ,
и а́зъ ѻц҃ъ явлю́ся. єгда̀ сосѣ́дьство
сме́рти, тогда̀ дѣтосажде́ніе.
єгда̀ дѣ́да во́зрастъ, тогда̀ ѻц҃ъ
надѣя́ніемъ. сло́во мнѣ̀ ѡ рожде́ніи
ника́коже. увядо́ша роже́ственіи
у́ди. заспа̀ у́же єстество̀, невоз̾бу­
же́нно къ жела́нію пребыва́етъ, и забы́тно
себѐ сотворѝ. а́зъ ста́ростію къ землѝ
понико́хъ, и єлисаве́ть ко угото́ванію
жезла̀ тщи́тся. єди́ною сухі́й аарѽ́­
новъ же́злъ процвѣтѐ, а не мнѡ́жицею;
почесому̀ у́бѡ разумѣ́ю сѐ; а́гг҃лъ же
къ заха́ріи речѐ, что̀ смуща́ешися заха́­
ріє, и сщ҃еннодѣ́йствуеши, и
сомни́шися; нѝ, не бѣ́ли авраа́мъ
столѣ́тенъ, и са́рра ѡ ме́ртвости чре́ва
упражня́ющися. єда̀ не умно́жися
тѣ́хъ пло́дъ, а́ще не имѣ́лъ бы
показа́нія, до́брѣ сомнѣ́лъся бы;

а́ще ли ѿ о́ноговѣхъ привожду́тя
что̀ я́же ѻ́ногѡ не помышля́еши; язы́­
чникъ авраа́мъ вѣ́рова, и ты̀ сщ҃енни́къ
сы́й не вѣ́руеши. ѻ́нъ кромѣ̀ кади́ла
ѡбъюха́нъ бы́сть, а ты̀ в̾ну́трь же́ртве­
ника воздыми́ся. ѻ́нъ наслѣ́дника
пріє́мъ воз̾ра́довася, а ты̀ прд̃тчю іѡ҃а́нна
ни во что́ же въ мѣня́єши; то́й тя
ѡсужде́нія и́зметъ. то́й тя ѿкля́твы
удо́бь свободи́тъ. то́й твоегѡ̀ язы́ка
ключа̀ но́ситъ. то́й мнѡ́ги къ гдс̃у
ѡбрати́тъ. и то́й си́лою иліино́ю предъ­
и́детъ. не ѻ́гненымъ сосу́домъ во ѻруже́­
нія, но іѡрда́ньскую ба́ню угото́вая,
за мно́гія скве́рны грѣхо́вныя. сегѡ̀
ра́ди изрещѝ тебѣ̀ повелѣ́нъ бы́хъ,
услы́шана бы́сть моли́тва твоя̀, занѐ
приспѣ̀ вре́мя, и́же дре́вле прорече́нное,
и ны́нѣ исполня́емо. гла́съ вопію́щаго
въ пусты́ни, угото́вайте пу̑ть гдс̃нь.
пра́вы сотвори́те стезѝ єгѡ̀. ни а́гг҃лъ
ни хода́тай, но са́мъ гдс̃ь пріи́детъ
и спасе́тъ на́съ. сегѡ̀ ра́ди заха́ріе
ты̀ у́бѡ умо́лъкни, во́ время пре­
рѣка́нія, прило́гъ томле́нія пріє́мъ.
{#л. фѯ҃}

а́зъ же ѿ мѣ́ста въ мѣ́сто преиду̀,
и къ дв҃ѣй хощу̀ по итѝ, ѿ вои́ньскія
бесѣ́ды, на апс̃тльскую слу́жбу гряды́й.
Сія мѝ въ ма́лѣ ѽ дру̑же, ѡ предъ­
прія́томъ заха́ріинѣ не вѣ́рованіи про­
изыдо́ша. ка́яже я́же и ны́нѣ почту́­
тся, вре́мя про́чее взыска́ти. ка́я,
сія̀, я́же ѿ гавріи́ла возвѣще́нная, и
ѿ дв҃ы вѣ́рованная, и ѿ дх҃а предъ­
науче́нная, и ѿ́ гдс̃а сокро́вищеванная,
и ѿ ѻц҃а зна́менанная, и ѿ бл҃гочести́­
выхъ храни́мая. и ѿ июде́й ѡбо́лга­
нная, и ѿ єрети̑къ разоря́емая. и
ѿ пра́выя цр҃кве на совѣ́тѣ храни́мая.
Слы́шаще ны́нѣ бл҃говѣ́стника луку̀
глаго́люща, въ мѣ́сецъ шесты́й по́сланъ
бы́сть а́гг҃лъ гавріи́лъ, во гра́дъ галиле́й­
скій, єму́же и́мя назаре́тъ къ дв҃ѣй
ѡбруче́ннѣи му́жеви, єму́же и́мя
іѡ́сифъ; ѽ ѡбруче́ніє, ино́му
ѡбруче́нное, ино́му возвѣще́нноє,
ѡбруче́ніє ра́дости изъ яви́тельноє,
и мяте́жа ѿлуче́нноє. слы́ша ны́нѣ
благовѣ́стника луку глаго́люща,

в̾ше́дъ же в̾до́мъ а́гг҃лъ, цѣлова̀ дв҃ую,
речѐ, ра́дуйся ѡбра́дованная, гдс̃ь с̾ тобо́ю,
бл҃гослове́на ты̀ в̾ жена́хъ. ѻна́ же ви́дѣвъ­
ши, смяте́ся ѡ словесѝ єгѡ̀, и помышля́­
ше въ себѣ̀, каково̀ бу́детъ цѣлова́ніе
сѐ; Ви́дѣли бл҃года́ть єѵг̃а́льскую смяте́­
ніе воздви́гшю. нето́чіюже смяте́ніе
воз̾дви́гшю, но и помышле́нія; не
то́кмо же помышле́ніе, но и сомнѣ́ніе;
не то́кмо же сомнѣ́ніе, но и бли́жьшая
си́мъ. и́бо напра́сный а́гг҃ломъ в̾ хо́дъ,
и стра́нное ѻ́браза, и не ѻбы́чное бесѣ́ды,
и вели́чество ѻбѣтова́нія, и не наде́жное
слу́ха, въ стра́хъ в̾ложи́ша дѣ́вую.
прилѣжа́ніемъ цѣлому́дрія, умышле́ніе
ѿ среды̀ сотвори́ша, тѣ́мъ же и смя­
те́ся, и смути́вшися безъ смуще́нія
пребы́сть. Слы́ши разу́мнѡ; внегда̀
гавріи́лъ а́гг҃лъ по́сланное служе́ніе испо́­
лни, без̾ мо́лвною ного́ю въ дв҃ьственую
ло́жницу вни̑де. єди́на бо пребыва́ющи.
вѣ́сте всѝ я́вѣ, ка́кѡ сматря́етъся
въ нача́тцѣхъ измѣне́ніе дв҃цы; до́лу
лице́мъ понича́щи; ти̑хѡ глаго́лющи
{#л. фѯ҃а}

не вознича́щи, вся́кому цѣлому́дрію при­
лѣжа́щи. вси́хъ ту̀ ви́дѣвъ а́гг҃лъ
речѐ кне́й, небо́йся мр҃іамъ. а́ще и по­
двиза́ся, и я́кѡ дв҃а ѡ цѣлому́дріи по­
пече́ся, да не прите́къ ѻбру́чникъ тво́й,
восхи́титъ твоѐ бл҃гоговѣ́иньство. сѐ
вѣ́ждь дв҃о, я́кѡ ни єди́ноже ѻбще́ніе
бу́детъ тебѣ̀ къ ѻбру́чнику твоему̀ іѽ́си­
фу. и́на ве́щь тебѐ ѡжида́етъ бж҃е́стве­
на, влд̃чняя, неизрече́нная, несказа́­
нна, сло́вомъ пред̾ста́витися не могу́­
щая, влд̃чніи ѡбря́щешися хра́мъ; не­
икусобра́чная нарече́шися мт҃и; нб҃у
и землѝ влд̃ку хо́щеши прія́ти; нетлѣ́­
нно ржс̃тво̀ за́чнеши. не бо́йся мр҃і́е
утверьдѝ сво́й по́мыслъ, въжилѝ свою̀
дш҃ю, укрѣпѝ своѐ срд̃це. да не по­
дража́еши заха́ріи, ни да невѣ́руеши я́коже
ѻ́нъ. ты̀ єсѝ жена́мъ похвала̀. ты̀
язы́кѡмъ украше́ніе. ты̀ ра́дости
ко́рень. ты̀ бл҃гослове́нія садодѣ́йствіе.
ты̀ ѡбрѣ́те бл҃года́ть предъ бг҃омъ, па́че
всѣ́хъ дв҃ъ. и сѐ за́чнеши сн҃а, и на­
рече́ши и́мя єму̀ іс҃ъ; се́й бу́детъ
ве́ліи, и сн҃ъ вы́шнягѡ нарече́тся;

си́мъ па́че ума̀ бл҃ги́мъ пріидо́хъ бы́ти во­
звѣсти́тель. а́ще и внѣ̀ єстества̀
су̑ть глаго́лемая, но ѻба́че ѿ єстества̀
творца̀ всея̀ тва́ри, ничто́же стро́по­
тнѡ, илѝ раз̾враще́нѡ, но вся̀ ко
удо́бьству зря́тъ; Вси́хъ ѡбѣтова́­
ніихъ дв҃ая я́та бы́вши, и вся́когѡ
ѕла́го примышле́нія измѣ́ньшися, не
ктому̀ я́кѡ без̾ дерзнове́нія молча́ше,
но я́кѡ дерзнове́нна вопроша́ше глаго́лю­
щи ко а́гг҃елу. я́коже ны́нѣ слы̑ша,
ка́кѡ речѐ бу́детъ мнѣ̀ сѐ, поне́же
му́жа не зна́ю; что́ ми и срд̃це ужа­
са́еши, и слу́хъ стра́ннѡ ѡглаша́еши
что̀ не слы́шанное ѿ́ вѣ́ка мнѣ̀ возвѣща́­
еши, я́кѡ заче́нши ѡбря́щуся, и му́­
жескагѡ сѣ́мене не пріиму̀; ка́кѡ бу́­
детъ мнѣ̀ сѐ, я́кѡ мт҃и нареку́ся,
и мт҃рьнихъ болѣ́зней внѣ̀ бу́ду
ка́кѡ бу́детъ ми сѐ , сосе́цъ пода́мъ и
пелена́ми повію̀, и ѻтроча̀ млеко́мъ
спита́ю; и что̀ є́сть и́же во мнѣ̀, не­
позна́ю; ка́кѡ бу́детъ ми сѐ, гл҃и
мѝ бл҃госло́внѣ вину̀, да позна́ю вѣ́руе­
мое зача́тіе. стра́ннѡ є́в̾вино рожде́ніе;
{#л. фѯ҃в҃}

но оба́че ѿ́мужа то̀ прія́тъ; и имѣ́я­
ше вину̀, тѣ́мъ же и позна́ся смѣше́­
ніемъ, я́кѡ ѿ негѡ̀ то̀ пріе́мши, и є́же
ѡсо́бь ѡсо́бному напо́лни мѣ́сто. стра­
ннолѣ́прѣйше же є́в̾вы ада́мле рожество;
но оба́че и то̀ явле́ннѡ сотво́рши писа́­
ніе преда́стъ, и ка́кѡ напра́снѡ бы́сть,
и я́вѣ позна́ся. я́кѡ ѿ землѝ пе́рьсть
взе́мъ содѣ́тель, бг҃оѻбра́знѡ живо́­
тно содѣ́ла первозда́ннаго. я́коже ѻ́на
вѣ́дома, и сіе́ ми изъявѝ. єльма̀
предъ рече́нная мѝ ѿ тебѐ, ѿ ража́ютъ
рече́нная; ка́кѡ бу́детъ мнѣ̀ сѐ,
поне́же му̑жа незна́ю; гавріи́лъ же
къ дв҃ѣй, ка́кѡ бу́детъ тебѣ̀ сѐ, ѿ
менѐ ѻ́бразъ и́щеши дв҃о навы́кнути
єда̀ мо́жетъ ра́бъ ра́зумъ вѣ́дати влд̃чніи.
возвѣсти́тель по́сланъ бы́хъ, а не ска­
за́тель. кто̀ увѣ́да у́мъ гдс̃нь;
илѝ кто̀ совѣ́тникъ єму̀ бы́сть. я́же
слы́шю, глаго́лю, ничто́ же своѐ творя̀.
ка́кѡ бу́детъ тебѣ̀ сѐ. є́же ка́кѡ
ѿ́ бг҃а, не ищѝ; ка́кѡ бу́детъ тебѣ̀
сѐ, я́коже иса́іа велегла́снѣйшіи поречѐ
глаго́ля; сѐ дв҃ая во́ чре́вѣ пріи́метъ,

є́же прія́ти тебѣ̀ поречѐ; а́з̾же гл҃ю
тебѣ̀, я́кѡ роди́ши сн҃а, и нарече́ши
и́мя єму̀ іс҃ъ; тому̀ сла́ва и держа́­
ва со оц҃е́мъ и со ст҃ы́мъ дх҃омъ, нн҃ѣ
и прс̃нѡ и во́вѣки вѣкѡ́мъ;

Мцс̃а тогѡ́же, въ к҃д де́нь. ржс̃тво̀
чс̃тна́гѡ и сла́внагѡ про̃ро́ка и прд̃тчи крс̃тля
гдс̃ня іѽ҃а́нна, бл҃гословѝ ѻ́ч҃е.

Се́й въ рожде́нныхъ жена́ми свидѣ́тель­
ствуетъся ѿ хрс̃та̀ па́че всѣ̑хъ,
и про̃ро́къ бо́льши, пред̾ игра́въ во́
чре́вѣ. и су́щымъ на землѝ,
сп҃сово проповѣ́давъ прише́ствіе. и
пред̾те́къ въ а́дѣ, воскс̃рніе бл҃говѣсти́
ти. Се́й бы́сть сн҃ъ заха́ріи архи­
єре́я, и єлисаве́ти непло́дове, роди́вся
по ѡбѣтова́нію. и́же ѻ́ч҃ее молча́ніе
внегда̀ роди́тися раз̾рѣши́въ, всего̀
ми̑ра ра́дости испо́лни. тѣ́мъ же и
а́гг҃ли съ человѣ́ки дне́сь ра́дуются
и вся̀ тва́рь ра́дости и весе́лія испо́лни­
ся. Соверша́етъ же ся єгѡ̀ собо́ръ
въ ст҃ѣйшей єго̀ мл҃твеницѣ, су́щей
в̾форакі́и. того̀ ст҃ы́ми мл҃твами,
поми́луй на́съ бж҃е свое́ю бл҃года́тію.
{#л. фѯ҃г}

Вто́йже де́нь ст҃а́гѡ мч҃нка ѻренти́на,
шести́хъ сни́мъ при́сныхъ бра́тіи єгѡ̀,
фарнакі́я, єро́са, фирмо́са, фирми́­
на, кѷріа́на, и ло́г̾гина.

Сі́и ст҃і́и самобра́теницы бя́ху придіокли­
тиа́нѣ и макссиміа́нѣ царѣ́хъ, нарица́еміи
ѿсо́лнечнагѡ восто́ка. вои́ньствующе же
со двѣ́сте ты́сящями вѡ́инъ. кувику­
ла́ріемъ родо́номъ, во антиохі́йстѣмъ
гра́дѣ, и́же и прише́дше въ страны̀ фра­
кі́йскіа в̾чине́ни бы̑ша в̾ легеѡ́нъ нарица́е­
мый гелеа́ндръ. Бы́сть же в̾ та̀ времена̀
воста́ніе ски́ѳское и преше́дъшимъ и́стръ
рѣку̀, и губя́щимъ фракі́ю. И поскон̾­
чаніи діоклитіа́новѣ, максиміа́ну
ца́рьство пріи́мшу, и воу́жасѣ мно́ѕѣ
бы́въ и в̾ недоумѣ́ніи, па́че же ра́ди маро́фа
кня́ѕя ски́ѳскагѡ, и́же бя̑ше вели́ко
тѣле́сенъ и си́ленъ, я́кѡ мно́гихъ призыва́­
ти єму̀ и́же сни́мъ бра́тися, и нико­
му́же дерза́ющу супроти́витися с̾мучи́те­
лемъ. Повелѣ́но же бы́сть ст҃о́му ѻрента́ну
изы́ти, вся́кими бо жре́біи учине́нъ,
я́кѡ си́ленъ и во бра́нѣхъ иску́сенъ. се́й же
в̾вѣ́ру хрс̃то́ву ѡбо́лкъся, и к̾ ра́ти изы́де,

и ски́ѳянина супроти́вльшася копіе́мъ про­
бо́дъ, и мече́мъ єму̀ ѿсѣчѐ главу̀, и ца­
ре́ви принесѐ, и побѣ́ду соѻдолѣ́нію пока­
за̀. ѻне́м̾ же царю̀ преуди́вльшуся и пора́­
довавшуся. и тогѡ̀ ра́ди побѣ́дныя же́­
ртвы и́долѡмъ прине́сшу. се́й же са́мъ испо­
вѣ́да, я́кѡ хрс̃то́вымъ посо́біемъ и си́лою
ѻграже́нъ, презори́вагѡ дерзнове́ніе побѣ­
ди́въ, а не не́мощію лже имени́тыхъ бо­
гѡ́въ твои́хъ, сія̀ со дерзнове́ніемъ из̾­
ре́къ. И тогда̀ у́бѡ є́же въ ца́рьскихъ
че́стєхъ по́честь прія́ти ѿ царя̀, и бы́ти
тому̀ во исправле́ніихъ ца́рьскихъ вели́­
ку, я́кѡ бы ту̀ и живо́тъ сво́й наслѣ́­
дити, мно́гагѡ ра́ди низ̾ ложе́нія ва́рва­
рова, и многопа́губна су̑ща, и тѣ́мъ
на я́рость царя̀ подви̑же. ца́рь же мно́го
того̀ ну́дя, и тѣ́ша и моля̀ ѿступи́ти
ѿ хрс̃та̀, и не преложѝ, посла̀ того̀ съ ше­
стію̀ бра́тіею єгѡ̀ во арме́н̾скій гра́дъ сата́лъ­
скій. написа́въ та́мѡ су́щему ду́ксу,
а́ще испыта́еми повину́тся пожре́ти богѡ́мъ
то̀ посла́ти и́хъ па́ки кнему̀. а́ще ли не поко­
ря́тся, да прогна́ни бу́дутъ ко авазгі́йтѣй
странѣ̀. ведо́ми же по повелѣ́нію царе́ву
{#л. фѯ҃д}

и та́кѡ до унарече́ннагѡ мѣ́ста недости́гше,
и бл҃же́нный бра́тъ пе́рвый єро́съ и́мене­
мъ, ко́ гдс̃у ѿи́де въ к҃в дн҃ь ію́ня мцс̃а.
Ст҃ы́йже ѻренти́нъ в̾ризѣѝ дости́гъ, ка́мень
на ші́ю єгѡ̀ навяза́вше, и вмо́ре тогѡ̀ в̾ве­
рго́ша, ѡсе́мъ бо си́це повѣ́дася. та́може
настоя́ніемъ арха́гг҃ла рафаи́ла без̃вреда̀ изы́­
де, полегчи́въ того̀ и на су́шю нѣ́коегѡ ка́­
мене поста́вивъ, и та́мѡ помо́льшуся єму̀
испустѝ дх҃ъ. и ту̀ погребе́нъ бы́сть въ к҃д
дн҃ь, того́же мцс̃а. Ст҃ы́й же фарнакі́й
бы́въ в̾ конди́лѣхъ, ко́гдс̃у ѿи́де въ г҃ дн҃ь,
ію́ля мцс̃а. фирсо́нъ же и фирми́нъ дости́­
гша во аспа́рь, кончи́ну ѡбрѣто́ста вре́ме­
ннагѡ живота̀ въ се́дмый де́нь сегѡ̀ мцс̃а.
Ст҃ы́й же кирія́къ веде́нъ во алазо́нскую стра­
ну̀, на мѣ́сто глаго́лемое зигані́я, почѝ
ѡ гдс̃ѣ въ шесты́й на́десять де́нь, ію́ля мцс̃а.
ѿтѣ́хъ же седмѝ бра́тіи, бл҃же́нный ло́гинъ
пловы́й ѿзигане́я в̾ лазикі́ю, треволне́нію
бы́вшу в̾ мо́ри и бу́ри вели́цѣ, и помоли́­
вся предадѐ дх҃ъ сво́й бг҃у. и почеты́реде­
сятихъ днє́хъ кора́блю из̾ве́ржену бы́вшу,
и положе́нъ бы́сть въ єпитну́ндіи, и та́­
кѡ с̾конча́шася.

Вто́йже де́нь поуче́ніе на ржс̃тво̀ ст҃а́гѡ и сла́­
внагѡ про̃рка и прд̃тчи крс̃ти́теля гдс̃ня іѡ҃а́нна.

Подо́бнѡ є́сть бра́тіе со испыта́ніемъ вся́ку
пра́вду твори́ти, и пра́здники уго́дни­
кѡвъ бж҃іихъ в̾ честѝ держа́ти. ѿтѣ́хъ
бо пріє́млемъ ѡставле́ніе грѣхѡ́въ, и бо­
лѣ́знємъ вся́кимъ премѣне́ніе и исцѣле́­
ніе получа́емъ, а́ще с̾вѣ́рою чс̃тою и до́бры­
ми дѣ́лы к̾ ни́мъ прихо́димъ. къ тѣ́мъ
бо речѐ гдс̃ь на́шъ іс҃ъ хрс̃то́съ, ме́ртвыя во­
скреша́йте, прокаже́ныя ѡчища́йте, бѣ́сы
изгони́те. я́кѡ у́бѡ ту́не прія́сте, ту́­
не же и дади́те. а́ще бо и ту́не прія́ша,
но мно́ги стра́сти ѿ невѣ́рныхъ подъя́ша,
не досего́ же то́кмѡ, но и кро́вь свою̀ пролія́­
ша по гдс̃ѣ бз҃ѣ свое́мъ и на́шемъ, велмѝ
жела́юще на́шегѡ спасе́нія. я́коже и се́й вели́­
кій про̃ро́къ и прд̃тча хрс̃то́въ крс̃ти́тель іѡ҃а́ннъ,
и́же ди́вно ржс̃тво̀ имѣ́я, и житіѐ па́че всѣх̃
чл҃къ. та́кѡ бо подоба́ше зарѝ восія́ти, мы́­
сленагѡ сл҃нца хрс̃та̀ проповѣ́дающѣй, є́же
бо бы́сть па́че ума̀ и си́лы чл҃чи хвс̃о ржс̃тво̀.
єму́же проповѣ́дник̃ прд̃тча бы́сть. кто̀ ви́дѣ
колѝ, илѝ кто̀ слы́ша, дв҃у бе́з̾мужа творца̀
чл҃кѡмъ во чре́вѣ пріи́мшю. но поне́же ны̀
{#л. фѯ҃е}

ви́дѣ въ ѕло́бѣ су́щя дія́волѣ, и нетерпѣ̀
зрѣ́ти нас̃ порабо́тившыхся врагу̀, и тогѡ̀
ра́ди в̾ таково̀ смире́ніе вни́де. пре́же посла̀
к̾ заха́ріи ст҃лю арха́гг҃ла гавріи́ла бл҃говѣсти́ти
єму̀ ра́дость зача́тіем̃ іѡ҃а́нновым̃ и ржс̃тво́мъ
испрестарѣ́вшихся ложє́снъ непло́дныхъ,
я́коже слы́шасте єѵг̃а́листа я́снѡ гл҃юща. тѣ́­
мже и мы̀ бра́тіе сегѡ̀ свѣ́тлагѡ пра́здника
прд̃тчи гдс̃ня наслади́мся, и до́брыми дѣ́лы
украси́вшеся, и послѣ́дуемъ сему̀ вели́ко­
му про̃рку іѡ҃а́нну, єго́ же положѝ бг҃ъ воѻ́браз̃
всѣ́мъ хотя́щым̃ спасти́ся. Се́й у́бѡ іѡ҃а́ннъ
свѣ́та сего̀ я́кѡ подѣ́ліе имя́ше. не живя́­
ше бо в̾ домѣ́хъ многослуже́бныхъ, идѣ́же
скве́рна вся̑ка ѡбрѣта́ется, за́висть лжа̀,
клевета̀; но в̾ пусты́ни єдиножи́телнѣ со
а́гг҃елы сконча́вая проро́чество до кр҃ще́нія
гдс̃ня, и проповѣ́дая црс̃твіе бж҃іе. єго́же
мы̀ жела́юще, возлю́бимъ дру́гъ дру́га,
за́висть попира́юще, я́рость низлага́юще,
ѿ клеветы̀ ѿвраща́ющеся, лѣ́ность ѿгоня́­
юще, чистоту̀ и ми́лостыню лю́бяще. А́ще
кто̀ вся̀ сія̀ стя́жетъ предѝ рече́нная, то́й
беструда̀ взы́детъ на нб҃са̀, и сн҃ъ бж҃іи
нарече́тся, и прс̃то́лу бж҃ію пред̃стоя́тель

ми́лостынею бо я́кѡ водо́ю гася́тся грѣ­
сѝ. тѣ́мъ же бра́тіе чистоту̀ и ми́ло­
стыню возлю́бимъ. таковы́я бо гдс̃ь
бг҃ъ блажи́тъ гл҃я. Бл҃же́ни млс̃ти­
віи, я́кѡ ті́и поми́ловани бу́дутъ.
не подоба́етъ бо на́мъ сло́вомъ то́кмѡ хри­
стія́нѡмъ слы́ти, но до́брая дѣ́ла
стяжа́ти, и яви́тися непосты́днымъ
на стра́шнѣмъ суди́щи, идѣ́же не помо́­
жетъ ра́бъ гдс̃ну, ни ѻц҃ъ сн҃у, ни
ма́ти дще́ри, ни бра́тъ бра́ту. но
то́чію до́брая дѣ́ла в̾веду́тъ ны̀ в̾ вѣ́чную
жи́знь. а ѕла́я со студо́мъ в̾ му́ку
ѿжену́тъ. ѿнея́ же да изба́витъ
на́съ гдс̃ь бг҃ъ на́шь. єму́ же
сла́ва ны́нѣ и при́снѡ и во́ вѣ­
ки вѣкѡ́мъ;
{#л. фѯ҃ѕ}

Мцс̃а тогѡ́же, въ к҃е де́нь. па́мять
ст҃ы́я прпд̃бно мч҃нцы *феѵ̾ро́ніи {**фев̾}, бл҃гословѝ
о́ч҃е.

Сія̀ ѿ ю́нагѡ во́зраста яре́мъ гдс̃нь воспри­
е́мши, прпд̃бнѣ живу́щи въ своє́й оби́те­
ли, въ предѣ́лехъ грече́скихъ и пе́р̾­
с̾скихъ, лежи́мѣй нисиві́и, и́же
нари́чется антіохі́я мигдоні́йская. и
всѣ́хъ и́же су́щихъ сне́ю превзы́де,
посто́мъ же и ра́зумомъ, и кни́жными
чте́ніи. исхожда́ше же и поучава́ше сію̀
нарица́емаа вріє́нія. Во времена̀ діокли­
тія́на, сели́ну игѣ́мону гоня́щу хри­
стія́ны. и тогда̀ у́бѡ про́чія и́нокини и­
зыдо́ша из̾ монастыря̀, тща́щеся угон̾­
зну́ти ѿ належа́щія сме́рти. бл҃же́нная
же феѵ̾ро́нія неду́гомъ содержи́ма,
и не могу́щи что̀ сотвори́ти, в̾ нѣ́­
коємъ подо́ліи лежа́ше, присѣдя́щи
є́й вріє́нія, и сигклитикі́я ієрі́я.
а́біе на падо́ша сели́новы во́ини, и сѣки́­
рами врата̀ разъсѣ́кше внидо́ша. и
извле́кше же мечѝ своя̀, и хотя́­
ху с̾сѣщѝ вріє́нію. но ту́ю засту­
пи́въ при́мъ лисима́ховъ стры́й,

и́же ко христія́нѡмъ кро́токъ и ми́лостивъ
явля́яся. феѵ̾рѽ́нію же похи́тивше,
к̾ сели́ну приведо́ша. є́й же полѣ́дова­
вше вріе́нія и ієрі́я и ѳѡмаи́да, утве­
ржа́юще ю̀ к̾ вѣ́рѣ, и наказа́юще ю̀ не
убоя́тися му́къ, но въ хрс̃то́вѣ пре­
быва́ти бл҃гоче́стіи. помяни́ бо глаго́ла­
ху ливі́ю и леѡни́ду, сестры̀ своя̀, и
ѻтрокови́цу єѵ̾тро́пію, ка́кѡ ливі́и гла­
ву̀ ѿсѣко́ша хрс̃та̀ ра́ди. а леѡни́ду
ѻгню̀ преда́ша. ѻтокови́ца же єѵ̾тро́­
пія слы́шавши ѿ ма́тере, да побѣ́гне­
ши речѐ ча̑до, но ру́цѣ своѝ на́ опакъ
сотво́рши, слуга́мъ главу̀ преклонѝ.
вріе́нія же по наказа́ніи дово́лнѣмъ ѡбрати́­
ся въ монасты́рь слезя́щи и пла́чющи,
и коне́чнагѡ стра́ха боя́щися, и по­
бѣ́ду є́й ѿ́бг҃а надія́вола прося́щи.
ѳ ѡмаи́да же и ієрі́я в̾ му́жеская ѡбо́­
лкъшѣся, съ послѣ́дъствовастѣ свя­
тѣ́й со слуга́ми себѐ замѣси́вшѣ. Пе́­
рвіе же приведена̀ бы́сть лисима́ху сели́­
нову анепсе́ю, и вопроше́на бы́вши, испо­
вѣ́да и́мя и ро́дъ и слу́жбу. и в̾мѣ́­
стѡ вся́кихъ, христія́нку себѐ именова̀.
{#л. фѯ҃з}

на истя́заніе сели́на ѻ́ного ста́вши. и́же
и то́й ласка́ніемъ, и ти́хѡ глаго́ланіемъ
наче́нъ, преложи́ти ю̀ ѿ хрс̃то́вы вѣ́ры,
и не возмо́гъ, растящѝ ю̀ повелѣ̀ наче­
тве́ро, из̾долу̀ ѻ́гнь подъгнѣща́ти.
с̾ вы́ше же во́ины біе́мѣ, и ма́сло на
ѻ́гнь возлива́ти, и ѿ мнѡ́гихъ ра́нъ
и ѻ́гненагѡ запале́нія, та́яти и низ̾­
тека́ти пло́ти єя̀. Пото́мъ повелѣ̀ по­
вѣ́сити ю̀, и желѣ́зными тесла́ми стро­
га́ти ю̀, и свѣща́ми ѡпаля́ти. та́же
язы́къ є́й ѿрѣ́зати, и зу́бы иско­
рени́ти, и ѻ́ба сосца̀ єя̀ ѿрѣ́зати,
и ру́цѣ и но́ѕѣ ѿсѣщѝ. и пото́мъ
главу̀ є́й ѿсѣко́ша. и та́кѡ ст҃у́ю
бл҃же́нную свою̀ дш҃ю бг҃у предадѐ. ску́та
ти же ст҃о́е тѣ́ло єя̀ христія́нѡмъ, ли­
сима́ху та́кѡ повелѣ́вшу, фи́рмомъ
коми́томъ, и́же и несе́но бы́сть фи́­
рмомъ коми́томъ. и собра́вшу и сло́жь­
шу вся̀ у́ды єя̀, ко́егождо в̾ чину̀
свое́мъ. зубѡ́мъ же и язы́ку на пе́рсѣхъ
єя̀ положе́номъ. и та́кѡ со ѱалмы̀
и пѣ́сньми съ ше́дшимся єпи́скопѡмъ,
и кли́рикѡмъ ку́пнѡ и мни́хѡмъ

и мнѡ́гу мнѡ́жеству хрс̃тія́нъ, пѣ́ніе
погребе́нію сотво́рше, и погре́бше чс̃тнѣ
ѿидо́ша. та́же па́мяти єя̀ прилѣ́жнѣ
во ѻби́тели єя̀ твори́мѣ. Глаго́лется,
я́кѡ му́ченицѣ въ полу́нощи явля́тися
явле́ннѡ, и съ дв҃цами пою́щи, и своѐ
мѣ́сто идѣ́же стоя́ше исполня́ющи,
да́же до ѿпу́стныя моли́твы. я́же
и нѣ́когда вріє́нія ру́ку сти́снувши,
и а́біе не ви́димѣ бы́ти є́й, я́кѡ и
немогу́щи стерпѣ́ти ручна́гѡ сти́снутія
возопи́вши. Лиси́маху же тя́жкое на
паде́ніе ѡповѣ́да събы́тися, зане́же
бы́ти єму̀ ѿ ма́тере христія́нки,
и за є́же су́рово ѻ́ну и ѕвѣроѡбра́знѡ,
сели́номъ потре́бованнѣ, и растли́ти дѣ́вь­
ству ю́ностную добро́ту, лу́чшее бя́­
ше, є́же не почеловѣ́честву. тогда̀
у́бѡ а́лчну бы́ти, и му́ченицы сме́рть
ви́дѣти, и пла́кати го́рькѡ. в̾ ма́­
лѣ же на послѣ́докъ съ при́момъ присту­
пи́ти ко хрс̃ту̀, и бж҃е́ственое воспрія́­
ти креще́ніе. Сели́ну же во из̾ступле́­
ніи бы́ти, и къ нб҃сѝ возрѣ́ти,
{#л. фѯ҃и҃}

и я́кѡ и во́лъ вели́къ, къ єди́ному ѿ
мра́морныхъ вели́кихъ столпѡ́въ срази́ти
главу̀, и та́кѡ ѕлѣ̀ ду́шю свою̀ исто́­
ргнути. Соверша́етъ же ся собо́ръ ст҃ы́я,
въ про̃ро́чествіи ст҃а́гѡ про̃ро́ка и предоте́чи,
крс̃ти́теля іѡ҃а́нна, су́щагѡ во ѻксі́и;

Вто́йже де́нь па́мять ст҃у́ю бл҃говѣ́рную
и бл҃гочс̃ти́вую ст҃а́гѡ кн҃зя петра̀, и ст҃ы́я
кн҃гни феѵ̾ро́ніи* {**февро́ніи}
, нарече́нную вои́ноческомъ
чину̀ дв҃да и єѵ̾фроси́ніи му́ромскую но́вую
чюдотво́рцу.

Се́й бл҃гочс̃ти́вый кн҃зь пе́тръ роди́ся ѿ бл҃го­
чс̃ти́ву и ст҃у ко́рене, и нака́занъ бы́сть
в̾ добрѣ̀ исповѣ́даніи и цѣлому́дріи
во́ градѣ му́ромѣ, и пра́веднѡ вла́сть
свою̀ пра́вя. По́времени же сочта́ся ст҃ы́й
пе́тръ со бл҃говѣ́рною своє́ю кн҃гнею феѵ̾ро́­
ніею. и сія̀ та́коже ѿ бл҃гочс̃ти́ву ко́рене
роди́ся, и до́брѣ научена̀ бы́сть бл҃го­
че́стію. и та́кѡ ѻ́ба ст҃а и пра́ведна бѣ́ста,
и любя́ста цѣлому́дріе и чистоту̀, и бы́­
ста ми́лостива и пра́ведна и кро́тка,
и ѡби́димыя изима́ста изрукѝ ѡби́дя­
щихъ. и и́ноческій и сщ҃е́нническій чи́нъ
до́брѣ любя́ста и млс̃тыню подава́ста и́мъ.

та́коже ни́щыя ми́ловаста велмѝ, и по­
сту̀ и воздержа́нію прилѣжа́ста. и па́ки
по премно́гу хрс̃ту̀ угоди́въша во все́мъ
до́брыми дѣ́лы свои́ми, жела́юща по гдс̃ню
словесѝ кро́ткихъ зе́млю наслѣ́дити,
и поко́й пра́ведныхъ ѡбрѣстѝ. И посе́мъ
бл҃же́нный кн҃ѕь пе́тръ, въ ста́рости масти́­
тѣ в̾ болѣ́знь тѣле́сную в̾падѐ, и постриже́­
ся. и вои́ноческомъ чину̀ нарече́но бы́сть
и́мя єгѡ̀ дв҃дъ. и посих̃ ма́лѡ поболѣ́въ,
преста́вися к̾ бг҃у, в̾ до́брѣ исповѣ́даніи
в̾ црс̃тво нбс̃ное. Та́коже и ст҃а́я кн҃гня феѵ̾ро́­
нія с̾ вели́кимъ жела́ніемъ постриже́ся, и в̾
и́ноческомъ чину̀ нарече́но бы́сть и́мя є́й
єѵ̾фроси́нія. та́коже и та̀ в̾ до́брѣ исповѣ́­
даніи и в̾ чи́стѣ со́вѣсти преста́вися, и
предадѐ в̾ ру́цѣ бж҃іи дш҃ю свою̀. и о́ба
наслѣ́доваста кро́ткихъ зе́млю, я́же и́змла­
да вожделѣ́вша. Посе́мъ пла́кахуся боля́ре
и велмо́жи бл҃же́ннаго, я́кѡ оц҃а. гра́жане
я́кѡ засту́пника и ѡборони́теля. ни́щіиже
и вдови́цы и а́лчющіи, я́кѡ пита́теля
и наказа́теля. и та́кѡ ст҃ы́хъ ве́сь гра́дъ
проводи́вше чс̃тнѡ, и положи́ша чс̃тны́я
єю̀ мо́щи въ то́мъ же гра́дѣ му́ромѣ.
{#л. фѯ҃ѳ҃}

в̾ цр҃кви, въ єди́номъ гро́бѣ. творя́т̾
же разли́чная чюдеса̀ ѿ ст҃ы́хъ свои́хъ
моще́й с̾ вѣ́рою приходя́щымъ и досегѡ̀
днѐ въ сла́ву бж҃ію.

Вто́йже де́нь сло́во ѡмирстѣ́й ча́ди.

Слы́шахъ нѣ́кія мирсќія лѣни́во живу́­
щя, и глаго́лющя ко мнѣ̀, ка́кѡ мо́­
жемъ с̾ подру́жіемъ живу́щи и в̾ печа́лєхъ
су́ще черне́чески жи́ти. Кни́мъ же
ѿвѣща́хъ а́зъ, всѐ є́же мо́жете бл҃го тво­
ри́ти, твори̑те. никого́ же не ѡклевета́й­
те, никого́ же не соблазни́те. чюжи́мъ
женам̃ не приближа́йтеся, и дово́лни бу́ди­
те свои́ми уро́ки. Посе́мъ у́бѡ разумѣ́й
я́кѡ вся̀ су́щыя прс̃ныя рабы̀ бж҃ія и дру́­
ги уго́ждьшыя в̾ миру̀ и в̾ бога́тьствѣ,
и с̾ ча́ды свои́ми къ бг҃у приведе́ни. реку́
же, авраа́ма и і́ѡва, и дв҃да, и по­
до́бныя си́мъ. бл҃го́е бо бога́тьство,
вне́мже нѣ́сть грѣха̀. да а́ще
та́кѡ сотворитѐ, то̀ недале́­
че бу́дете црс̃тва нбс̃наго.
бг҃у на́шему сла́ва, ны́нѣ
и прс̃нѡ и во́ вѣки
вѣкѡмъ;

Мцс̃а того́же, въ к҃ѕ де́нь, па́мять преподо́­
бнагѡ оц҃а на́шегѡ дв҃да и́же вселу́нѣ,
бл҃гословѝ о́ч҃е.

Се́й бл҃же́нный имѣ́яше роже́ніе ѿ восто́­
ка, и я́кѡ звѣзда̀ мнѡгосвѣ́тлая
ве́сь ми́ръ ѡблиста̀. из̾ млады́хъ бо
ногте́и воздержа́ніемъ стра́сти тѣле́сныя
покори́въ, ви́димъ бы́сть с̾ пло́тію я́кѡ
а́гг҃лъ. кѣ́лію же водрузи́въ по́д̾ дубомъ
мигда́льскимъ, я́кѡ пти́ца доброгла́сная
всѣ́хъ притека́ющихъ словесы̀ ѡб̾веселѝ.
са́мъ же у́мъ сво́й на высоту̀ бжс̃твеную
в̾пери́въ, тѣ́мъ и чюде́сными содѣ́лованіи
ѡбога́тися, сто́лпъ яви́ся свѣтоза́р­
ный, и всѣ́хъ просвѣща́я чюдесы̀.
мра́зомъ томи́мь и ва́ромъ со́лнечнымъ къ
без̾стра́стію премѣни́ся. да я́кѡ попалѝ
тѣле́сныя стра́сти, на́ руку у́гліе взе́мъ,
пред̾ лице́ же царе́во до́йде, и не ѡпали́мъ
пребы́сть. тѣ́мъ вся́кое чл҃ческое єсте­
ство̀ житіе́мъ и чюдесы̀ преудиви́въ,
и къ бг҃у пре́йде ра́дуяся, єго́же и́з̾млада возлюби́въ;

Вто́йже дн҃ь па́мять прпд̃бнагѡ оц҃а на́ше­
гѡ іѡ҃а́нна, єпкс̃па го́тѳьскагѡ.
{#л. фо҃}

То́й бѣ̀ при кон̾стянти́нѣ царѣ̀, и при
лвѣ̀ и савряни́нѣ ѿскѵ́ѳьскня страны̀,
под̾ вла́стію го́тфьскою. по ѻбѣща́нію же
роди́ся, и бг҃у пре́данъ бы́сть. поне́же
в̾ мѣ́ру тѣле́снагѡ во́зраста до́йде, ѿ
свои́хъ людє́й к̾ вирі́йскому архієпс̃кпу
по́сланъ бы́сть, и ѿ тогѡ поставле́ніе
прія́тъ. и в̾ кон̾стянти́нь гра́дъ ше́дъ,
и мнѡ́го къ цр҃цѣ ири́нѣ ѡ пра́вой вѣ́рѣ
подвиза́ся, и па́ки къ свое́й странѣ̀ ѡбра­
ти́ся, и мнѡ́ги бѣды̀ под̾я́тъ, поне́же
преда́ша єго̀ лю́діе кизи́ческим̃ вла́стелємъ.
и бѣжа̀ в̾ мастріа́ду, и к̾ гдс̃у ѿи́де. мо́щи же
єгѡ̀ положе́ни бы́ша в̾ цр҃кви ст҃ых̃ апс̃лъ.

Вто́йже де́нь сло́во ѿста́рчетва.

Ви́дѣхомъ ѻц҃а пала́дія добродѣ́телна­
го и просвѣще́ннаго, и́же бесѣ́дова
с̾ на́ми дш҃еполе́зная словеса̀ и по́вѣсти.
в̾ни́хъ же и прилучи́вшаяся єму̀ сказа̀
на́мъ, и ка́кѡ мл҃твою оц҃а дани́ла дарова̀
єму̀ побѣ́ду бг҃ъ, и хотя̀ на́съ по́льзо­
вати ста́рецъ, повѣ́да на́мъ си̑це. нѣ́коей
потре́бѣ речѐ бы́вши оц҃у дани́лу во алеѯа­
ндрі́ю, поє́мъ и менѐ с̾ собо́ю вни̑де во гра́дъ,
и послу́чаю стрѣ́те на́съ бра́тъ ю́нъ ѕѣлѡ̀.

исходя́щу же єму̀ ѿ ба́ни, бѣ́ бо мы́л̾ся
в̾ ба́ни. ви́дѣвъ єго̀ ста́рецъ, и воздохну́въ
гл҃ами, се́й бра́тъ увы̀ мнѣ̀, поху́лено
бу́детъ и́мя бж҃іе ѡ не́мъ. но послѣ́дуем̃ єму̀
єда̀ ка́кѡ ви́дим̃ гдѣ̀ пребыва́етъ, и ше́д̾ше
внидо́хомъ в̾слѣ́дъ єгѡ̀. пое́мъже єго̀ ста́­
рецъ ѡсо́бь, и гл҃а єму̀, ю́ну ти су́щу ча́до
и здра́ву, не подоба́етъ ти в̾ ба́ни измыва́­
тися. вѣ́руйже ми ча́до, я́кѡ мнѡ́гихъ
блажня́еши, не то́чію мирсќія, но и и́но­
ки. ѿвѣща́въ же бра́тъ ста́рцу, а́ще бы́хъ
речѐ чл҃кѡмъ угожа́лъ, хрс̃ту̀ ра́бъ не бы́хъ
бы́лъ. пи́сано бо є́сть, не ѡсужа́й, да не
ѡсуже́ни бу́дете. тогда̀ сотворѝ єму̀
ста́рецъ мета́ніе гл҃я, прости́ мя ча́до
гдс̃а ра́ди, занѐ я́кѡ чл҃къ согрѣши́хъ. и
ѿлу́чьшеся ѿнегѡ̀ ѿидо́хома. и гл҃ахъ
ста́рцу, єда̀ ка́кѡ не́мощенъ є́сть бра́тъ
ѻ́ч҃е, не и́мать грѣха̀. воздохну́въ ста́­
рецъ и прослези́вся рече́ ми, да извѣсти́тъ
тѝ и́стина бра́те, я́кѡ мнѡ́жае пяти́­
десяти бѣсѡ́въ ви́дѣхъ послѣ́дующя
єму̀, и посыпа́ющя єго̀ смра́домъ, и му́­
рина сѣдя́ща на ра́му єгѡ̀ и цѣлу́юща
єго̀. и друга́го му́рина иду́ща предни́мъ
{#л. фо҃а}

и раз̾дража́юща єго̀, и без̾сту́дію уча́ща,
и ѡ́крестъ у́бѡ єго̀ бѣ́сы иду́ща, и
веселя́щася ѡ не́мъ. ст҃а́го же а́гг҃ла єгѡ̀
неви́дѣхъ, нижѐ бли́зъ єго̀, нижѐ из̾да­
ле́ча. тѣ́мъже сматря́ю бра́та сего̀, я́кѡ
вся́кія дѣ́тели бѣсо́вскія испо́лненъ є́сть
свидѣ́тельствуютъ же и ри́зы єгѡ̀, поне́­
же кози́чны и мя́к̾ки су̑ть. и є́же си̑це
без̾сту́днѣ ю́ну су́щу єму̀, посредѝ
сице́вагѡ гра́да пребыва́ти, идѣ́же мно́зи
по́стницы и ѿше́лницы въ хо́дятъ,
и па́ки ско́рѡ исхо́дятъ. а́ще бо не бы̀
блудолюби́въ бы́лъ и миролюби́въ, то̀
не бы̀ в̾ ба́ню в̾ходи́лъ на́гъ, и на и́ны на́ги
бесту́днѣ взира́лъ. къ тому́же ст҃ы́мъ
ѻц҃є́мъ на́шимъ, антѽ́нію же и пахо́мію,
ам̾мѽ́нію же и серапіѽ́ну, и про́чимъ
ѻц҃є́мъ заповѣ́давшимъ, я́кѡ да ни­
кто́же ѿ и́нокъ кромѣ̀ вели́кия болѣ́зни,
илѝ ну́жи ѡбнажи́тъ тѣ́ло своѐ. ѡбрѣ­
та́емъ же и тѣ́хъ ра́ди ну́жныя потре́бы
и служе́нія, хотя́щихъ рѣку̀ преитѝ,
и кораблю̀ не су́щу, и ни ѿ кого́ же ви́­
дими, стыдя́хуся послѣ́дующаго а́гг҃ла,
и наня̀ сія́ющаго со́лнъца, є́же на́ги

зрѣ́тися и́мъ ѿ лучѝ сл҃нечныя. а́ще ли
случа́шеся кому̀ ѿ ѡц҃ъ рѣко́ю прейтѝ,
и ученику̀ єгѡ̀ сни́мъ су́щу, не ѡб̾нажа́ху
себѐ до́ндеже дру́гъ ѿ́ друга дале́че разы́ду­
тася, я́кѡ да не дру́гъ дру́га наготу̀ ви́­
дитъ. сія̀ ре́къ ми ста́рецъ, и умолчѐ.
прише́дшымъ на̑мъ въ ски́тъ, по ма́лѣхъ
дне́хъ прише́дше бра́тія ѿ алеѯандрі́и повѣ́­
даша, я́кѡ бра́тъ и́же въ хра́мѣ ст҃а́гѡ и­
си́дора, прише́дый ѿ констянти́ня гра́да
ѡбрѣ́теся блу́дъ творя̀ с̾ жено́ю єпа́рха
и я́тъ бы́сть ѿ ра́бъ єгѡ̀ и бли́жнихъ сосѣ́дъ,
и ѿрѣ́заша єму̀ ѻ́бѣ ло́нѣ с̾ та́йнымъ у́до­
мъ, и болѣ́въ трѝ днѝ сконча́ся, и бы́сть
всѣ́мъ мни́хѡмъ поруга́ніе и уко́ръ. сія̀
слы́шавъ а́зъ, и сослеза́ми теко́хъ ко ѻц҃у
дани́лу, и ѡбрѣто́хъ сѣдя́ща ѻц҃а исаа́ка
сни́мъ, игу́мена ски́тскагѡ, и гл҃ахъ
єму̀, ѻ́ч҃е, сіѐ и сіѐ прилучи́ся бра́ту ѻ́ному
исходя́щему изба́ни, и срѣ́тшу на́съ и́же ѿ­
рече́ся наказа́нія твоегѡ̀. прослези́вжеся
ста́рец̃ речѐ, показа́ніе го́рдымъ паде́ніе и́хъ.
и сказа́хъ ѻ́тай ѻ́ну исаа́ку, я́же ѿ ста́рца
ви́дѣнная и рече́нная ко мнѣ̀. тѣ́м̾же я́кѡ
досто́йна писа́нію повелѣ̀ ѻц҃ъ написа́тися,
{#л. фо҃в}

и положи́ти в̾ кни́зѣ знаменоно́сныхъ ѻц҃ъ,
к̾ по́лзѣ и созида́нію прочита́ющимъ;

Вто́йже де́нь сло́во ст҃а́гѡ васи́лія, да ни­
кто́ же ѿча́ется сп҃се́нія в̾па́дъ вомно́гія
грѣхѝ, но да пока́ется и́хъ.

Никто́же в̾ ѕло́бѣ грѣхо́внѣй ходя̀ са́м̾ся
ѿча́етъ, вѣ́дый дш҃е́вному неду́гу
дш҃е́вное бы́ліе, покая́ніе. тѣ́мъ бо мо́щнѡ
вся́кій неду́гъ из̾врачева́ти, єму́же падет̃
крѣ́постный сто́лпъ. бра́те, да не поху́лена
тѝ бу́дет̃ я́же на пи́щю бы́лія, ни затворе́нъ
ти бу́ди исповѣ́данія гра́дъ. ни во глубинѣ̀
ѕлы́хъ ѡставля́й себѐ, ни преда́йся са́мъ
чл҃коубі́йцѣ. вѣ́сть бо воставля́ти па́дъ­
шыя гдс̃ь. а́ще ка́я наде́жа ѡста́вила є́сть
тебѐ бра́те сп҃се́нія, илѝ ка́я ти па́мять
ѡ́ бз҃ѣ, илѝ кі́й по́мыслъ бу́дущихъ бл҃гъ,
илѝ кі́й стра́хъ при ѡбрѣте́ныхъ му́кахъ
не пока́явшимся, восклони́я ско́рѡ, во­
зведѝ ѻ́чи своѝ на нб҃о, и пріидѝ в̾ чю́вьство.
преста́ни ѿ ѕѡ́лъ твои́хъ, ѿтрясѝ ѡбде­
ржа́щее пія́ньство. не супроти́вися бію́ще­
му тя̀. воспомянѝ бл҃гаго па́стыря, я́кѡ
изба́витъ ны̀. ѿскочѝ ѿ уязви́въшагѡ
тя̀. помянѝ щедро́ты бж҃ія, я́кѡ

исцѣля́етъ древя́нымъ ма́сломъ и вино́мъ.
не ѿча́йся спасе́нія, но воспріимѝ па́мять
на пи́санныхъ, я́кѡ пады́й воста́нетъ,
и ѿвраща́яйся ѡбрати́тся. ѕвѣре́мъ не
укроти́мымъ преѻдолѣ́етъ исповѣ́даяися
и не ѿгони́мь є́сть. небо̀ хо́щетъ бг҃ъ
сме́рти грѣ́шнагѡ, но ѡбрати́тися и спа­
се́ну бы́ти. а́ще и въ глубину̀ ѕѡ́лъ въ­
па́дъ, не ѿча́йся. вре́мя ти воздержа́­
нія є́сть, вре́мя терпѣ́нія и исцѣле́­
нія, и вре́мя исправле́нія. поползе́лися,
воста́ни. согрѣши́лъ ли єсѝ, преста́ни
не ста́ни на путѝ грѣ́шныхъ, и ѿскочѝ.
єгда́ бо ѡбрати́вся воста́неши, тогда̀
воста́въ спасе́шися. є́сть бо ѿ болѣ́зни
здра́віе, и ѿ покая́нія спасе́ніе. дерза́й
не ѿча́йся; нѣ́сть бо зако́нъ бж҃іи, я́ко­
же судя́щихъ властє́й, и́же без̾ми́лости
насме́рть ѡсужа́ютъ, но бл҃года́ти пребы­
вающи, ѿлага́етъ муче́ніе, ѡжида́я
управле́нія, доне́лѣ же затвори́тся
две́рь, и не услы́шитъ
невѣ́стникъ;

Вто́й же де́нь сло́во ст҃а́гѡ єфре́ма ѡ непо­
каря́ющихся мни́сѣх̃ игу́мену и бра́тіи.
{#л. фо҃г}

А́ще пріи́детъ бра́тъ въ монасты́рь ко́ею лю̑­
бо вино́ю, и а́ще невозбуди́тъ, поглоти́тъ
єго̀ дія́волъ напра́снѡ, на́чнетъ бо лю́тыя
влага́ти єму̀ по́мыслы глаго́ля, что̀
хо́щеши тружа́тися в̾ добродѣ́тели и труд̃
пріима́ти и из̾немощѝ, воста́нію не су́­
щу. єда́ бо свои́мъ изволе́ніемъ прише́лъ
єсѝ въ мнс̃ты́рь, а́ще небы̀ тѝ приключи́ла­
ся та́кѡ ве́щь, и пону́женъ бы́хъ мни́хъ
бы́ти, и николи́же бы ты̀ мни́хъ бы́лъ.
невосхощѝ у́бѡ ны́нѣ изнемога́ти, ибо
бг҃ъ и́мать бл҃года́ть да́ти ѡсе́мъ. сія̀
вра́гъ по́мыслы влага́етъ бра́ту, хотя̀
и воврещѝ во глубину̀ ѿча́янія, тогда̀
на́чнетъ бра́тъ про́чее в̾ небреже́ніи пребы­
ва́ти и без̾стра́шіи, проти́ву же глаго́лати
ма́лымъ ивели́кимъ, и несы́тна сна̀ при­
има́ти. и а́ще кто̀ сотвори́тъ бла́го,
тогда̀ ка́ется я́кѡ и тщету̀ себѣ̀ сотво́­
рша мни́тъ, ча́стѡ ро́пщетъ и раста́итъ
себѐ, иєди́но, про́стѡ па́губѣ предае́тъ себѐ.
и є́же хотя́ше изли́ше тружа́тися в̾ добро­
дѣ́телєхъ, то̀ проти́вно начина́етъ тво­
ри́ти, не раз̾сужа́я в̾ себѣ̀ бл҃годаре́нія
хрс̃то́ва. и занѐ бѣ̀ єму̀ гл҃ати в̾ дш҃ѝ свое́й,

ко́ль бл҃го и́же мно́гагѡ ра́ди поста̀,
и мно́гія ра́ди ми́лостыни в̾сіѐ житіѐ
пріитѝ. ѻ́нъ же нелѣ́пая воз̾гл҃етъ,
и та́кѡ всѣ́хъ бл҃гъ ѿщети́тся. же по­
мина́я сего̀ є́же нелѣ́ностну мы̀ и безъ­
мяте́жну житію̀ сподо́блени ѿ гдс̃а на́ше­
гѡ іс҃а хрс̃та̀. тѣ́мъ же пра́веднѣ по­
тщи́теся жи́ти и досто́йнѡ покая́нію,
и неле́стна дѣ́ла твори́ти. бг҃у
на́шему сла́ва нн҃ѣ
и прс̃нѡ и во́ вѣки
вѣкѡ́мъ
;

Мцс̃а того́же, въ к҃з дн҃ь, па́мять прпд̃бна­
гѡ ѻц҃а на́шегѡ сам̾ѱѽ́на странно­
пріи́мца, бл҃гословѝ ѻ́ч҃е.

Се́й бя̑ше ро́домъ ри́млянинъ, сро́дникъ
въ цр҃ѣ́хъ вели́кому констянти́ну.
и́же и расточи́въ ни́щимъ ѡста́вленое
єму̀ ѿ роди́телей бога́тьство си́рымъ
и у́бѡгимъ, и и́де в̾ цр҃ьствующіи град̃.
и бл҃гостоя́нныя чс̃тны́я до́мы ѡб̾те́къ
и че́стнѣ безмо́лвіе воспріи́мъ, бг҃оду­
хновеннагѡ писа́нія себѐ напита̀, иєди́­
ному бг҃у прилѣжа́въ. тѣ́мъ ѡб̾явле́нъ
бы́сть чс̃тно́му патріа́рху, и поста́вленъ
бы́сть ѿнегѡ̀ презви́теромъ, иєди́нъ ѿ
кли́рикъ бы́въ. и бя̑ше сп҃се́ное приста́нище
ни́щимъ и неду́жнымъ и тре́бующимъ
по́мощь, я́кѡ и враче́в̾скому худо́жеству
иску́сенъ бя̑ше. то́й іустія́на царя̀
в̾ не исцѣли́мую стра́сть впа́дшася увра­
чева̀. ѡ се́мъ же цр҃ь возлюби́въ добро­
дѣ́тель му́жа, и че́сть єму̀ возда́въ,
вели́къ до́мъ и преди́венъ тому̀ воздви́же.
страннопріи́мство сотворѝ, и сосу́дохрани́те­
ля вели́цѣй бж҃іей цр҃кви того̀ поста́ви. то́й
же до́брѣ и бг҃олюбе́знѣ пожи́въ, почѝ ѡ гдс̃ѣ.

и положено̀ бы́сть чс̃тно́е тѣ́ло єгѡ̀ в̾ ве­
ли́цѣй цр҃кви ст҃а́гѡ мокі́я, точа̀ всегда̀ цѣ­
лбы̀ в̾сла́ву и хвалу̀ гдс̃а на́шегѡ іс҃а хрс̃та̀.
соверша́етъжеся собѡ́ръ єгѡ̀ в̾ цр҃кви созда́­
ннѣй ѿ негѡ̀ и в̾ста́вленѣй болни́цѣ;

Вто́йже де́нь сло́во ѡ марти́нѣ мни́сѣ и́же
бо в̾ ту́ровѣ, у цр҃кве ст҃у́ю мч҃нику
бори́са и глѣ́ба, єди́нъ живы́й ѡ́бз҃ѣ.

Нѣ́кто ста́рецъ и́менемъ марти́нъ,
бы́въ пре́же по́варъ єпс̃кпѡмъ ту́ровъ­
скимъ, сѷмеѽ́ну игна́тію и іѡаки́му.
сего̀ єпс̃кпъ геѽ́ргіи свободѝ ста́рости ра́ди
и бы́сть мни́хъ. пребыва́ше въ єпкс̃пли
монастырѝ у ст҃у́ю мч҃нку єди́нъ живы́й.
ча́сто же боля́ше ста́рецъ ло́номъ, чре́во бо
єму̀ в̾ ло́но выхожда́ше. иєгда̀ сѐ быва́­
ше, тогда̀ лежа́ше ста́рецъ вопія̀, немо­
гі́й воста́ти и послужи́ти своему̀ тѣ́лу.
єди́ною же боля́щу єму̀ тѣ́мъ же неду́­
гомъ, и лежа́ше в̾ кѣ́ліи, ѿжа́жди водны́я
изнемога́ше, никому́ же посѣти́вшу єго̀,
занѐ бѣ̀ вода̀ вели́ка ѻ́коло монастыря̀.
в̾ тре́тіи же дн҃ь внидо́ста кнему̀ ст҃а́я
мч҃нка бори́съ и глѣ́бъ я́вѣ въ свое́мъ подо́­
біи, я́кѡ и на ико́нѣ напи́сана єста̀,
{#л. фо҃е}

и гл҃аста, чи́мъ боли́ши ста́рче. ѻ́нъ же испо­
вѣ́да и́ма неду́гъ сво́й. и реко́ша єму̀,
хо́щеши ли воды̀. и речѐ ста́рецъ, ѽ гдс̃и́на
моя̀ у́же єя̀ давно̀ жада́ю. и взе́мъ єди́нъ
ру́чку ста́рчю, и принесѐ воды̀, и взе́мша
коре́цъ, напои́ста ста́рца. и речѐ ста́рецъ,
чія̀ єста̀ дѣ́тища. и гл҃а єму̀, яросла́­
вля. и мнѣ́въ ста́рецъ геѽ́ргіева яросла́­
ва слуѕѣ̀ єста̀. и речѐ, бг҃ъ да сотвори́тъ
ва́мъ мнѡ́га лѣ́та гдс̃на моя̀, ѻба́че
са́ми взе́мъше хлѣ́бъ яди́та, а́зъ же
не могу̀ служи́ти ва́ма. ѻна́ же рѣ́ста,
да бы̀ тебѣ̀ хлѣ́бъ бы́лъ, мы̀ у́бѡ ѿи́де­
ма ѿсе́лѣ, а ты̀ не болѝ, но почі́й. и а́біе
неви́дима бы́ста. ста́рецъ же ѡбрѣ́теся
здра́въ, и воста́въ просла́ви бг҃а и ст҃у́ю
му́ченику. и пребы́сть про́чее здра́въ,
са́мъ сказа̀ ѻц҃у дх҃о́вному;

Вто́йже дн҃ь сло́во ѿбесѣ́дъ ст҃а́гѡ григо́рія.

Въ страна́хъ туре́я гра́да, между̀ двою̀
го́ру во юдо́линѣ и бесѣ́дою мѣ́ста тогѡ̀,
єн̾терокли́на имену́ема, бѣ̀ цр҃квь
влд̃чцы на́шея бцд̃ы и прс̃нѡ дв҃ы мр҃і́и,
му́жь нѣ́кій севи́ръ и́менем̃, ѕѣлѡ̀ чю́дна
жи́тельства. в̾ то́й цр҃кви сщ҃е́нникъ бѣ̀.

до́му же влд̃ка нѣ́кій въ послѣ́дніи де́нь
сме́рти єгѡ̀ прише́дъ, въ ско́рѣ къ пре­
зви́теру тому̀ посла́въ моля́шеся,
я́кѡ да сотща́ніемъ к̾ нему̀ пріи́детъ,
и мл҃тву ѡ не́мъ сотвори́тъ, я́кѡ да
исповѣ́даніемъ и покая́ніемъ содѣ́янная
и́мъ согрѣше́нія разрѣше́нія пріи́мутъ,
пре́жде да́же єму̀ ѿ́тѣла сегѡ̀ изы́ти.
случи́жеся поприлу́чаю презви́теру тому̀,
во є́же виногра́дъ ѡбрѣ́зати бы́ти упра́жне­
ну. и к̾ нему̀ прише́дшимъ речѐ пред̃ва­
ри́те вы̀, и сѐ а́зъ достижу̀ ва́съ.
ви́дѣвъ же я́кѡ ма́лѡ є́сть, ѡста́вль
с̾ в̾ дѣ́лѣ єгѡ̀, умы́сли ма́лѡ по­
жда́ти я́кѡ да соверши́тъ є̀. то́же
соверши́въ, нача́тъ к̾ боля́щему итѝ.
иду́щу же єму̀ срѣто́ша єго̀ на путѝ,
и́же пре́жде кнему̀ пришед̃шіи, гл҃юще,
почто̀ ѻ́ч҃е укоснѣ́лъ єсѝ ктому̀ у́бѡ не
тружда́йся, ѻ́нъ у́бѡ у́мре. Се́же
презви́теръ слы́шавъ, и тре́петенъ бы́въ
нача́тъ пла́кати, и ве́ліимъ гла́сом̃ себѐ убі́й­
цу тому̀ нарица́ти. пла́ча у́бѡ дости́же,
идѣ́же тѣ́ло уме́ршагѡ лежа́ше, и себѐ пред̃
одро́мъ єгѡ̀ со слеза́ми на зе́млю пове́рже.
{#л. фо҃ѕ}

тому́же ѕѣлѡ̀ пла́чющу, и главу̀ ѡ́землю
ударя́ющу, и себѐ пови́нна сме́рьти єгѡ̀
глаго́лющу, в̾неза́пу уме́рый ду́шю во­
спрія́тъ. Сіе́же пред̾стоя́щіи уви́дѣвъ­
ше, и ѕѣлѡ̀ ѡ чюдесѝ уди́вльшеся,
нача́шя на ипа́че ѿ ра́дости пла́кати, и того̀
вопроша́ти, гдѣ̀ бы́лъ єсѝ, икакѡ воз̾­
врати́ся; то́йже ѿвѣща̀ речѐ, му́жіе
нѣ́цыи го́рди ѕѣлѡ̀ бя́ху и́же мя̀ поя́ша,
и́мъ же ѿ у́стъ и ѿ ноздре́й о́гнь исхожда́­
ше, єго́ же терпѣ́ти не можа́хъ. в̾ нели́цѣ
же с̾квозѣ̀ те́мная мѣ́ста ѡб̾вожда́ху
мя̀. напра́снѡ ю́ноша ѕѣлѡ̀ бл҃гоговѣ́инъ
и съ други́ми въ стрѣте́ніе на́мъ пріи́де
и к̾ водя́щымъ мя̀ речѐ, воз̾врати́­
те єго̀ я́кѡ севи́ръ презви́теръ пла́­
четъ ѡ не́мъ. ѻ́ному бо слє́зъ ра́ди
єгѡ̀ гдс̃ь сего̀ дарова̀. Севи́рже през­
ви́теръ ѿ землѝ воста́въ, и бг҃а благо­
дари́въ, и є́же ѡ покая́ніи словесы̀ того̀
наказа́въ. и мл҃твою єгѡ̀ немощ̾ны́й
ѡчище́ніе грѣхѡ́въ пріе́мъ. се́дмь
дні́й в̾ жи́знь сію̀ возвра́щ̾ся сотворѝ,
ѡ содѣ́янныхъ покая́ніе творя̀. во о­
смы́йже де́нь веселя́ся ко гдс̃у ѿи́де,

разумѣ́й у́бѡ, в̾ каковѣ̀ любвѝ гдс̃ь
севи́ра презви́тера имя́ше, єго́ же ни в̾ ча́съ
ѡскорби́тися хотя́ше;

Вто́йже дн҃ь сло́во я́кѡ добро̀ присѣща́ти
боля́щихъ.

Не лѣни́теся присѣща́ти боля́щихъ гдс̃а
ра́ди, ра́вно бо є́сть ми́лостыни, є́же
присѣ́щати боля́щихъ. слы́ши гдс̃а гл҃ю
ща, бо́ленъ бѣ́хъ, и посѣти́сте менѐ.
а и́же загради́тъ у́ши своѝ не слы́шати
боля́щаго, и то́й помо́лится и не бу́дет̾
послу́шающа єго̀. а́ще бо в̾вели́цѣ сану̀
єсѝ, бо́льшю у́бѡ ѿ хрс̃та̀ м̾зду̀ пріи́­
меши, и сегѡ̀ ра́ди возлю́бленъ бу́деши.
а́ще ли єсѝ ни́щь и не и́маши что̀ до нести
на потре́бу и́мъ, то̀ себѐ донесѝ, и є́же
ѿ словє́съ утѣше́ніе тому̀ принесѝ. и та́ко
во о́нъ дн҃ь услы́шиши ѿ негѡ̀, пріидѣ́те
бл҃гослове́ніи оц҃а моегѡ̀, наслѣ́дуйте
угото́ванное ва́мъ црс̃тво, я́кѡ
бо́ленъ бы́хъ и посѣти́сте
менѐ. єму́ же сла́ва
ны́нѣ и прс̃нѡ и во́ вѣки
вѣко́мъ;
{#л. фо҃з}

Мцс̃а того́же въ к҃и де́нь, возвраще́ніе
мощє́мъ ст҃у́ю без̾сре́бренику и чюдотво́­
рцу, ки̑ра и іѡ҃а́нна, бл҃гословѝ о́ч҃е.

Сія̀ ст҃а́я мч҃нка и чюдотво́рца, врачя̀
бѣ́ста придіоклитіа́нѣ царѣ̀. ст҃ы́й у́бѡ
ки́ръ бя́ше ѿ алеѯандрі́и, іѡ҃а́ннъ же
ѿ єде́са. и совокупи́стася єди́нон̾ра́віа
ра́ди. ѡбте́кшеже и проше́дше врачева́ста
вся́къ неду́гъ и вся́ку болѣ́знь. и мно́­
ги научи́ста ко спасе́нію. и явле́на бы́вша
мѣ́ста того̀ кня́ѕю, єю́же и предъста́­
вивъ, и мно́ги наня̀ му́ки положи́въ.
Пото́мъ главы̀ и́ма ѿсѣчѐ. чс̃тны́я же
єю̀ мо́щи, вѣ́рными тогда̀ сокрове́ны,
ѡбдержа́щагѡ ра́ди ѕлоче́стія. Пото́мъ
же въ црс̃тво арка́діево, патріа́ршеству­
ющу во алеѯан̾дрі́и ѳео́филу, ѡбрѣто́ша­
ся мо́щи єю̀, и положе́ни бы́ша
въ цр҃кви. и́хъ же торжество̀ пра́здну­
емъ дне́сь. соверша́етъ же ся собѡ́ръ єю̀
въ ѳоракі́и во арка́діанѣхъ.

Вто́йже де́нь па́мять преподо́бнагѡ оц҃а̀
на́шегѡ па́вла врача̀.

Па́велъ преподо́бный ѻц҃ъ на́шъ, бѣ̀
у́бѡ ѿ́града кори́нѳа, ѿ христія́ну роди́­
ся роди́телю. и́з̾млада бг҃а возлюби́въ.
и в̾ ше́дъ ѿ монастыре́й во єди́нъ, и бы́­
сть мни́хъ, и мнѡ́го потружа́вся и́ми­
же бы́сть иску́сенъ. и боря́шеся сни́мъ
бѣ́съ блу́дный. воєди́ну же но́щь мо­
ли́тву єму̀ дѣ́ющу, ста́въ предни́мъ
бѣ́съ я́вѣ, и речѐ єму̀, а́ще не сотвори́­
ши єди́ныя по́хоти, хощу̀ натя̀ во­
ѻружи́тися. ѻ́нъ же запрети́въ єму̀
хрс̃то́вымъ и́менемъ и изгна̀ ѝ. посе́мъ
вни̑де бѣ́съ в̾нѣ́кую жену̀, и та̀ прине́сши
младе́нца, пове́рже ѝ на ло́нѣ па́влу гл҃ющи,
я́кѡ ѿ тебѐ взя́хъ ѝ и зача́хъ и роди́хъ
ѻ́нъ же прія̀ младе́нца с̾ ра́достію. прише́­
дше же єретикѝ с̾вяза́ша ѝ на́ опакѡ рука́­
ма, и на вяза́вше младе́нца на вы́ю єгѡ̀,
и водя́ху єго̀ по́ граду. ста́въ же па́велъ
по средѣ̀ наро́да и помаа́въ руко́ю речѐ, слы́­
шите бра́тіє, да вопро́симъ млд̃нца ко́е єгѡ̀
ѻц҃ъ. бѣ́ же млд̃нцу ѿ рожде́ніа тре́тіи
дн҃ь. и гл҃а млд̃нцу, рцы̀, ко́е є́сть ѻц҃ъ
тво́й. млд̃нцъ же растерза́въ пелены̀, и пока­
за́въ руко́ю свое́ю на нѣ́коего ковача̀, и речѐ,
{#л. фо҃и}

сѐ є́сть ѻте́цъ мо́й, а не па́велъ мни́хъ.
и па́дше всѝ поклони́шася єму̀. и ѿто́­
лѣ дадѐ єму̀ бг҃ъ враче́бныя да́ры, и
воскла́даше на неду́жныя, и здра́ви
быва́ху. и пожи́въ лѣ́тъ се́дмьдесятъ,
в̾ ста́рости до́брѣ ко гдс̃у ѿи́де.

Вто́й же де́нь сло́во ѡ страннолю́біи.

Бу́дите бра́тіє ревни́тели до́брымъ дѣ́­
лѡмъ, да доконца̀ поживетѐ ми́рнѡ
ѡ гдс̃ѣ. не укорѝ стра́нна и прише́лца,
но пріимѝ я̀ в̾ до́мъ сво́й. и помянѝ
да іс҃а хрс̃та̀ тебѐ ра́ди стра́нна бы́вша,
не стыди́ся ѡмы́ти но́ѕѣ єгѡ̀, єда̀ бо бу́­
детъ а́гг҃лъ искуша́яй тя̀, и ѿ щети́ши
ся м̾зды̀ пра́ведныхъ. слы́ши что̀ сотво­
рѝ авраа́мъ; сѣдя́щу єму̀ у́дуба ма́м̾врій­
скагѡ под̃сѣ́нію в̾полу́дни, возрѣ́в̾же и
ви́дѣ трѝ му́жи ми́мѡ єго̀ гряду́ща,
и в̾ ста́въ течѐ на стрѣ́теніе и́хъ, и поклони́­
ся и́мъ до землѝ, гл҃я, а́ще ѡбрѣто́хъ бл҃го­
да́ть пред̃ва́ми, неми́мѡ иди́те раба̀ своего̀.
да принесе́тся вода̀, и умы́ются но́ги ва́­
ши. и возму̀ хлѣ́бъ, и яди́те, и посих̃
иди́те путе́мъ свои́мъ. что́же бы́сть єму̀

страннолю́біе; пе́рвое дру́гъ бж҃іи нарече́ся.
посе́мъ слы̑ша во́время, сѐ роди́тъ тебѣ̀
са́рра сн҃а, и мно́гимъ оц҃ъ бу́деши.
та́коже и ло́тъ два̀ стра́нника умолѝ усебѐ
вита́ти, и та̀ изведо́ста єго̀ из̾ содо́ма,
да не с̾гори́тъ съ без̾зако́нники. та́коже,
и тові́я слѣ́пъ сы́й, и то́й прія́тъ а́гг҃ла
и́же сотворѝ єго̀ прозрѣ́ти. късему́ же
и гдс̃ь учи́тъ ны̀ гл҃я, пріе́мляи про̃ро́ка
во́ имя проро́чо, м̾зду̀ про̃ро́чю пріи́метъ.
и прие́мляи пра́ведника во́ имя пра́ведничо,
м̾зду̀ пра́ведничю пріи́метъ. тѣ́м̾же бра́­
тіе, стра́нники люби́те, и своея̀ трапе́зы
о́бщники и́хъ твори̑те, да и вы̀ услы́шите
хрс̃та̀ гл҃юща, поне́же сотвори́сте єди́ному
ѿси́хъ ме́ншихъ бра́тіи мое́й, мнѣ̀ со­
твори́сте. и а́зъ ва́мъ подам̃ жи́знь вѣ́чную.

Вто́йже де́нь сло́во ка́кѡ подоба́етъ чти́­
ти оц҃а̀ и ма́терь.

Гдс̃ь просла́вилъ оц҃а̀ ѡча́дѣхъ, и су́дъ
ма́терень утверди́лъ на сн҃ѣхъ. чты́й
оц҃а̀ ѡчи́ститъ грѣхѝ своя̀, та́коже ѡ­
бога́тится прославля́ющіи ма́терь свою̀.
чты́й оц҃а̀ возвесели́тся ѡ ча́дѣхъ своих̃,
и в̾ дн҃ь мольбы̀ своея̀ послу́шанъ бу́детъ
{#л. фо҃ѳ}

и па́ки, прославля́яи оц҃а̀, до́лги днѝ
сотвори́тъ, и послу́шаяи гдс̃а поко́итъ
ма́терь свою̀. Си́це у́бѡ и при́точе­
ствуяи глаго́летъ, чтѝ оц҃а̀ своего̀,
да на́идетъ на тя̀ блс̃гве́ніе ѿнегѡ̀. блс̃гве́­
ніе бо ѻ́ч҃ее утвержа́етъ до́мы ча́дѡмъ,
кля́тва же ма́терня искореня́етъ до ѡснова́­
нія. и несла́вися въ бесче́стіи ѻц҃а̀ своегѡ̀,
и поноше́ніе ча́дѡмъ ма́ти в̾ безсла́віи.
ча́до заступѝ въста́рости оц҃а̀ твоего̀,
и не ѡскорбѝ єго̀ в̾ животѣ̀ єгѡ̀, а́ще
и из̾безу́мится в̾че́мъ, не за́зри єму̀,
и не укорѝ єго̀ все́ю крѣ́постію свое́ю.
мл҃тва бо ѻ́ч҃а незабве́на быва́етъ,
и в̾грѣ́хъ мѣ́стѡ привзы́щетътися, и в̾ дн҃ь
ско́рби помя́нетътися. я́коже на ю́гѣ
мра́зъ, та́ко у́бѡ грѣсѝ твоѝ раста́­
ются. в̾хулѣ̀ не ѡставля́и оц҃а̀.
про́клят̃ бо гдс̃емъ раздража́яи ѻц҃а̀ и ма́терь
свою̀. ча́до лѣ́та своя̀ скро́тостію провожа́и,
да человѣ́кѡ́мъ прія́тенъ и возлю́бленъ бу́­
деши. єльма̀ у́бѡ вели́къ єсѝ,
толма̀ смири́ся пре́дъбг҃омъ, да ѡбря́щеши
блгд̃ть. лу́чша себѐ не ищѝ, и крѣ́пль­
ша себѐ не пыта́й. я́жети су̑ть повелѣ́ на,

та̀ разумѣва́й, нѣ́сть бо тѝ потре́ба.
та́йныхъ во избы́тцѣхъ дѣ̑лъ свои́хъ не
распыта́й, вя́щшіи бо ра́зумъ человѣ́ческа­
гѡ пока́занъ тѝ є́сть. мно́ги у́бѡ пре­
льсти́ло высокоу́міе, и мнѣ́ніе лука́во по­
губи́ло совѣ́ты и́хъ. срд̃це жестоко̀, ѡѕло́­
бится напослѣ́докъ. любя́и бѣду̀, пре­
быва́етъ вне́й. срд̃це жестоко̀ ѿтягчи́тся
болѣ́знію грѣ́шникъ, и приложитъ грѣхѝ
на грѣхѝ. му́дрости вѣ́дѣніе и ра́зума,
зако́нъ ѿбг҃а да́нъ бы́сть на́мъ. и творя́и
дѣ́ла до́брая, прія́тенъ бг҃у. велича́яи­
жеся свое́ю ѕло́бою, сне́ю же и состарѣ́ется.
навод̃не́нію лука́вагѡ и велича́вагѡ нѣ́сть исцѣ­
ле́нія, са́дъ бо лука́вства укорени́лся вне́м̾.
срд̃це разу́мнагѡ, разумѣ́етъ при́тчю,
и у́хо послушли́вагѡ словеса̀ премрд̃агѡ. ѻ́гнь
паля́щь угаси́тъ вода̀, а ми́лостыня ѡчи́­
ститъ грѣхѝ. воздая́и блгд̃ти по́мнимь
є́сть прс̃нѡ, и во́ время ско́рби ѡбря́щетъ
утверже́ніе. ча́до, ни́щаго хлѣ́ба не ли­
шѝ, и не минѝ ѻ́чію прося́щагѡ. дш҃и
а́лчюща не ѡскорбѝ, и не раз̾гнѣ́вай му̑жа
в̾нищетѣ̀ єгѡ̀. ни срд̃ца раз̃гнѣ́вана не прево­
змутѝ, и не ми́мѡ несѝ дая́нія тре́бующаго.
{#л. фп҃}

раба̀ скорбя́ща не ѿрѣ́й, и не ѿвратѝ лица̀
своегѡ̀ ѿ ни́щагѡ. ѿ тре́бующагѡ не ѿвра­
тѝ о́чію свое́ю, и не да́й же мѣ́ста чл҃ку
кля́ти тя. клену́щу бо тя̀ в̾го́рести
дш҃и своея̀, молбу̀ єгѡ̀ услы́шитъ со­
твори́вый єго̀, и прія́теля собо́рищу своему̀
сотворя́етъ. старѣ́йшему поклоня́й гла­
ву̀ свою̀. приклонѝ у́хо своѐ ни́щему, и
ѿвѣща́й єму̀ ми́рнѡ. измѝ ѻби́дима
изрукѝ ѡби́дящагѡ, и не изнемогоа́й єгда̀
су́диши, бу́ди си́рымъ помо́щникъ, и
вдови́цамъ я́кѡ ѻц҃ъ. и та́кѡ бу́­
деши сн҃ъ вы́шнягѡ. єму́ же
сла́ва, нн҃ѣ и при́снѡ и во́вѣки вѣ­
кѡ́мъ;
Сіѐ сло́во чтѝ покаѳи́смахъ.

Мцс̃а тогѡ́же, въ к҃ѳ дн҃ь, сло́во и́же
вост҃ы́хъ ѻц҃а̀ на́шегѡ іѡ҃а́нна, архієпс̃кпа
констянти́ня гра́да златоу́стагѡ, похва­
ла̀ ст҃ы́мъ верхо́внымъ апс̃лѡмъ петру̀ и па́­
влу, бл҃гословѝ ѻ́ч҃е.

Нб҃сѐ и землѝ ре́ть ви́жю настоя́щагѡ ра́ди
торжества̀, па́мятію апс̃лъ. нбс̃нымъ
у́бѡ си́ламъ бл҃гохва́лящымъ, почте́­
нными гла́сы, болѣ́зненыхъ учи́лище,
я́кѡ тѣ́ми позна́нѡ бу́детъ. нн҃ѣ
нача́ломъ и властє́мъ на нбс̃ныхъ цр҃квію,
многѡразли́чная бж҃ія прему́дрость, су́­
щымъ же на землѝ человѣ́кѡ́мъ ну́дя­
щымся досто́йнѡ бл҃гохвале́ніе, к̾ ве­
рхо́внымъ че́сти ра́ди показа́ти, я́кѡ
тѣ́хъ ра́ди во спасе́ніе прише́дшымъ;
что́ бо петра̀ бо́льши; что́ же па́влу
то́чнѡ; и́же сло́вомъ и дѣ́ломъ всю̀
я́же на нб҃сѣ́хъ и на землѝ тва́рь удиви́­
ша. и́же бре́ніемъ тѣле́снымъ съ пле­
тены̀, но лу́чши а́гг҃елъ ѡбрѣ́тшеся.
что̀ у́бѡ рече́мъ со учт҃лемъ го́рнягѡ
и до́лнягѡ созда́нія. не ѡбрѣта́ю бо
досто́йна словесѐ похвали́вшыхъ ро́дъ на́шъ,
{#л. фп҃а}

и зе́млю всю̀ и мо́ре ѡбше́дшихъ, и ко­
ре́ніе грѣхо́вное истерза́вшихъ, и сѣ́­
мена бл҃гоче́стія посѣ́явшихъ, въ се­
рдцы́хъ непокори́выхъ человѣ́къ. пе́тръ
наста́вникъ апс̃лѡмъ; па́велъ каза́тель
смотре́нія вы́шнимъ си́ламъ. пе́тръ
ѕлонра́внымъ июде́ѡмъ брозда; па́велъ
язы́кѡмъ утѣше́ніе. и ви́ждьми влд̃ки
пре иму́щую прему́дрость. петра́ бо ѿ
ры́барей избра̀. па́вла же ѿ усма́рь.
и не кромѣ̀ по́льзы се́й сотвори; погря­
за́ше бо сла́ва июде́йская. сегѡ̀ ра́ди
ры́барю в̾вѣ́ри гдс̃ь, ре́къ кнему̀,
идѝ въ мо́ре, и в̾ве́рзи у́дицу, и во­
сходя́щую пе́рвѣе ры́бу є́мъ, и ѿве́­
рзи уста̀ єя̀ и ѡбря́щеши стати́ръ;
мо́ре глаго́ля, без̾зако́нныхъ июдє́й
нра́въ; у́дицу, бл҃гохи́тростное сло́­
во уче́нія; ры́бу, зако́нъ назна́ме­
наетъ. а є́же ѿве́рьсти уста̀ єя̀,
є́же ска́зовати єго̀ глаго́летъ. Па́­
влуже вся̀ язы́ки я́коже усмарю̀ вру­
чѝ, да ѡблече́тъ зако́номъ и благода́­
тію нагі́я червле́ною ко́жею, я́коже
водо́ю и кро́вію влады́чнею ѡбагре́ною.

си́це тому̀ влд̃ка вопія̀, я́кѡ а́зъ в̾ язы́ки
дале́че послю́тя; ѽ бл҃же́нная дво́ице,
въвѣ́рена бы́вшая всегѡ̀ ми̑ра дш҃и.
Пе́тръ нача́ло правосла́вія, вели́кій цр҃ко́­
вный сщ҃енноглаго́лникъ, ну́жный совѣ́­
тникъ хрс̃тія́нѡмъ, сосу́дъ вы́шнихъ
си̑лъ, почте́нный ѿ влд̃ки чл҃къ; Па́велъ
ну́жный цр҃ко́вный а́гг҃лъ. похвала̀ вселе́­
нныя. и́же на́нб҃сѣхъ чл҃къ, и на зе­
млѝ а́гг҃лъ. сла́ва цр҃ко́вная, высокопа́рный
ѻре́лъ, свирѣ́ль дх҃о́вная, ластовица
и щу́ръ и сосу́дъ влд̃чень, потре́бный
хрс̃то́въ служи́тель. Пе́тръ и па́велъ
въ пряже́на вола̀ цр҃ко́вная, и́же до́брую
ку́плю вселе́ннѣй прине́сше, и́же крс̃тъ
въ мѣ́стѡ ярма̀ възе́мше. въ мѣ́стѡ
вса́дникъ, сп҃са хрс̃та̀. въ мѣ́сто у́бѡ
тѣле́съ, писа́ніи завѣ́та. въ мѣ́сто же
бре́мене, блгд̃ть ст҃а́гѡ дх҃а, и́же
цр҃квь по вся̀ днѝ посвѣтля́ющю. сокро́­
вища влд̃чня. гости́нницы вселе́нныя,
прія́телища ст҃а́гѡ дх҃а, ст҃ы́я тро̃цы
сказа́теліе. смотре́нія бж҃ія словесѐ,
исповѣ́дателіе. моѐ, дх҃о́вное раче́ніе;
{#л. фп҃в}

па́велъ сосу́дъ избра́нный, моя̀ па́­
лица; Пе́тръ цр҃квь бж҃ія. Па́велъ
уста̀ хрс̃то́ва. трилако́тный, нб҃съ
каса́яся. и́же въ мѣ́стѣ ѡпису́емь,
и ми́ръ влд̃цѣ ѡпису́я. и́же ѿ ієрс̃ли́­
ма, и ѡ́крестъ да́же до иллири́ка испо́лнив̾
бл҃говѣ́стіемъ. быстроте́чный пу́тникъ,
и́же на нб҃са̀ возлетѣва́яи ѻре́лъ. и́же
бж҃е́ственыя бл҃года́ти испо́лненый свидѣ́­
тельствованный ѿ́гдс̃а пронестѝ и́мя єгѡ̀
предъвсе́ю вселе́нною. и́же трикро́вное
нб҃о проше́дъ, и вра́й въше́дъ, и да́же
до не ѡбъмы́слимагѡ прс̃то́ла въше́дъ.
и въше́дъ, слы́шавъ не изрече́нных̃ та́инь­
ствъ, и́хъже не лѣ́ть є́сть чл҃кѡмъ
глаго́лати. что́ же и къ петру̀ рече́мъ;
Пе́тръ сла́дкое це́ркви видѣ́ніе, свѣти́ло
вселе́нныя. не с̾кве́рная голуби́ца.
во́ждь апс̃тлѡмъ. те́плый апс̃лъ горя̀
дх҃омъ. а́гг҃лъ и чл҃вкъ, и́же бл҃года́­
ти испо́лненый. тве́рдый вѣ́рѣ ка́мень.
ста́рческое це́рькви мудрова́ніе. бл҃же́­
нный сн҃ъ. голуби́ца зва́тися услы́­
шавъ, чистоты̀ ра́ди ѿ влд̃чнихъ у́стъ.

и́же ключѝ црс̃твія нбс̃нагѡ ѿ самогѡ̀ гдс̃а
воспріи́мъ; а́гг҃льскія чи́ны ва̀ ѡкра́­
доста. и что̀ мнѡ́го глаго́лю; са́мъ гдс̃ь
похваля́етъ ва́съ гл҃я. вы̀ єстѐ со́ль зе­
млѝ. вы̀ цр҃е́й крѣпча́йше. вы̀ єстѐ
свѣ́тъ ми́ру. бога́тыхъ бл҃гоѻби́лнѣйше.
пре му́дрыхъ и любому́дрыхъ пре му́дрѣ­
йше. ри́тѡръ бл҃гоязы́чнѣйше. ничто́
же иму́ще, а вся̀ содержа́ще. вы̀ єстѐ
му́ченикѡмъ терпѣ́ніе, патріа́рхѡмъ
правосла́віе, и́ночествующымъ пос́тни­
чество, дв҃амъ вѣне́чницы. и́же
въ супру́жьствѣ миротво́рцы. хи́щни­
кѡмъ бога́тымъ вос̾хлаще́ніе. не во­
зде́ржнымъ уцѣлому́дрителіе. покро́въ
правосла́внымъ царє́мъ. стѣ́ны хри­
стія́нскія. ва́рварѡмъ сопротивобо́рцы.
и́же брозду̀ єретикѡ́мъ наложи́вше.
и́же стра́сти умерщвя́юще. и́же леге­
ѽ́ны бѣсо́въскія прогна́вше. и́же тре́би­
ща є́ллиньская низложи́вше. и́же го́­
рняя и до́лняя наслѣ́довавше. го́рнихъ
у́бѡ ключѝ пріи́мше, до́лнихъ же рѣши́­
ти и вяза́ти согрѣше́нія вла́сть иму́ще.
{#л. фп҃г}

ѽ гру́багѡ чюдесѐ; ѽ без̾кни́жнагѡ пре­
му́дроти; пе́тръ и́же сѣ́нію свое́ю, раз̃сла́­
бленыя стя́гнувъ, и сме́рть разрѣша́я
а́велъ и́же ри́зами свои́ми неду́ги ѿго­
ня́я, и бѣ́сы прогоня́я. и́же посредѝ
сме́рть гдс̃ню иму́ще, и лу́чше вся́кагѡ
дх҃а пра́ведныхъ су́ща. па́велъ немо́лчная
ла́стовица цр҃ко́вная, пе́тръ и́же всегда̀
вселе́ннѣй я́коже славі́й не преста́ннѡ поя̀.
столпа̀ цр҃ко́вная, вселе́ннѣй свѣти́лни­
ка, и́же лу́чша дру́гъ дру́га, и бо́льша
всея̀ в̾ку́пѣ тва́ри; ра́дуися пе́тре ка́меню
вѣ́ры; ра́дуися па́вле цр҃ко́вная похва­
ло̀. и́же тма́ми лю́тая єя̀ ра́ди прете­
рпѣ́вый; въ темни́цѣ затворя́ема,
ѿ ию́дей не нави́дима. ѿ ва́рваръ влачи́­
ма, дыха́ти не попуща́ема, и преста́ти
не трепе́щуща уче́нія. и́же и у́дъ тѣ­
ле́сный подви́гнути не могу́ща тя́жести
ра́ди у́зныя, но всю̀ вселе́нную с̾вя́за­
нную грѣхописа́ньми, разрѣша́юща. бѣ­
со́вскія полкѝ измѣни́ста. ва́ма ст҃а́гѡ
дх҃а бл҃года́ть вовселе́нную простре́ся.
м̾глу̀ пре́лести ѿ землѝ съпря́таста.
кото́рая бл҃годаре́нія возда́мы ва́ма

толи́ка нас̃ ра́ди труди́вшимся. помина́ю
петра̀, и удивля́юся. воспомина́ю
па́вла, и ужаса́юся, слеза́ми содержи́м̾
є́смь. что́ бо реку̀, илѝ что̀ воз̾­
гл҃ю, в̾зира́я на ва́шя ско́рби, невѣ́дѣ.
коли́кѡ темни́цъ ѡст҃и́сте. коли́кѡ вериг̃
просвѣти́сте; коли́кѡ му̑къ претерпѣ́сте.
коли́ка хуле́нія ѿрази́сте. коли́кѡ хрс̃та̀
понесо́сте. ка́кѡ цр҃кви свѣ́тлы сотвори́­
сте про́повѣдію; бл҃гослове́нъ сосу́дъ
язы́ка ва́шегѡ. кро́вію смѣ́шены у́ды
ва́шя цр҃кви ра́ди. неѡску́днѡ во всем̃ хрс̃та̀
подража́сте. во всю̀ зе́млю изы́де вѣща́­
ніе ва́ю, и в̾ концы̀ вселе́нныя гл҃ы ва́ю.
не расто́ржену и́же ва́ма уневѣ́щеную
цр҃квь сохранѝ хрс̃то́съ. никто́же пре́­
жде ва́съ, нижѐ пова́съ яви́ся тако́въ
кто́ бо учт҃льское сло́во имы́й, дерзну̀
гл҃ати что̀ кромѣ̀ ва́шегѡ преда́нія, вся̀
учт҃ли вы̀ сокруши́сте. ѡдолѣ̀ на́шимъ
ѡмраче́ніе, ва́ше терпѣ́ніе. ана́ѳема
са́ми моля́щеся бы́ти ѿ хрс̃та̀, да чл҃ки при­
ѡбря́щете. что̀ у́бѡ возда́мъ ва́мъ
ѡ всѣ́хъ, и́хъ же возда́ста нам̃ бл҃ги́хъ,
дне́сь ва́шегѡ страда́нія па́мять є́сть.
{#л. фп҃д}

ра́дуися пе́тре и́же дре́ва крс̃тнагѡ наслади́­
вся, и подо́бнѡ учт҃лю распя́тися не во­
схотѣ́въ, пра́вымъ о́бразом̃, я́коже влд̃ка
на́шь; но па́че стре́мъ гла́въ на́ нб҃о ше́­
ствіе творя̀ ѿ землѝ. ѽ бл҃гослове́но
гво́здіе, и́же ст҃ы́я у́ды проидо́ша мнѣ̀,
возжелѣ́нныя и лу́чшія нбс̃ныя сла́вы
мѝ су́ща, и́же содер̾знове́ніемъ в̾ ру́цѣ
влд̃чнѣ дш҃ю преда́въ. рабо́тавый гдс̃ви
бес̾ попече́нія, и у невѣща́нной тому̀
цр҃кви со вся́кимъ усе́рдіемъ, влд̃ко
любо́вный и благорабо́тный гдс̃ви. и се­
му̀ ревну́я горя́щымъ дх҃омъ, па́сты­
рю влд̃чніи всѣ́хъ апс̃лъ. Па́велъ же
бл҃же́нный мече́мъ въ главу̀ усѣ́ченъ
бы́сть, не исповѣ́димый человѣ́къ.
кото́рый у́бѡ ме́чь про́йде о́ного горта́нь,
влд̃чняго сосу́да, и́же ѿнб҃сѐ удивля́­
ема, и ѿ землѝ ужаса́ема; кото́рое
же ли мѣ́сто прія́тъ кро́вь твою̀, я́же
млекови́дна ви́дѣна бы́сть на ри́зѣ;
и́же тебѐ усѣ́кнувшаго, я́же ва́рваръ­
скую ду́шю єгѡ̀ па́че ме́да услади́въ
вѣ́рна устро́й бы́ти, и съ дружи́ною мнѣ̀
ме́чь о́нъ да бу́детъ в̾ вѣнца̀ мѣ́стѡ.

и́же л҃е лѣ́тъ рабо́тавъ гдс̃ви совся́кимъ
усе́рдіемъ. сконча́въжеся бл҃гочс̃тія тече́­
ніемъ, почѝ ѡ́гдс̃ѣ, сы́й лѣ́тъ шести́деся­
ти осмѝ. супротив̃ вѣща́емъ ва́ма бжс̃тве­
ная ва́ша гла́са. ра́дуйтася ѡ́гдс̃ѣ всегда̀,
беспреста́ни ѡна́съ моли́тася обѣща́нія ва́ю
испо́лнити. возвыша́еши бо бл҃же́нне
пе́тре си́це гл҃я. потщу́жеся и всегда̀ имѣ́­
ти ва́съ по мое́мъ ѿше́ствіи я́же ѡси́хъ
па́мят̃ твори́ти. є́сть у́бѡ бл҃же́нный
апс̃лъ хрс̃то́въ пе́тръ ѿ виѳсаи́ды галилє́й­
скія, идѣ́же гдс̃ь на́шъ іс҃ъ хрс̃то́съ
мно́жайшая чюдотворе́нія содѣ́лавъ, ѿ
него́ же и фили́ппъ бя̑ше гра́да. Всему́­
дрый же па́велъ ѿ та́рса киликі́йскагѡ.
успо́ша же в̾вели́комъ ри́мѣ ста́ромъ,
при неро́нѣ без̾зако́ннѣйшѣмъ царѣ̀.
убіе́на бы́вша, и къ учт҃лю и гдс̃у
всѣ́хъ сомно́жайшею ку́плею ѿше́дъ­
ша. вся́кѡ у́бѡ тща́ніе показа́ти
дѡ́лжни єсмы̀ возлю́бленніи, моля́ще­
ся всѣ́хъ цр҃ю̀ хрс̃ту̀ бг҃у на́шему.
да и на́съ сподо́битъ того́же человѣкѡлю́­
бія, в̾тѣ́хъ преда́ніи и уче́ніи пребыва́­
ти, да пріи́мемъ тѣ́хъ ра́ди ми́лость
{#л. фп҃є}

предъсуди́щемъ хрс̃то́вымъ. сни́мъже бг҃у
оц҃у сла́ва, ку́пнѡ и съ прс̃ты́мъ и бл҃гим̃
и животворя́щимъ дх҃омъ, ны́нѣ и прс̃нѡ
и во́ вѣки вѣкѡ́мъ;

Мцс̃а того́же въ к҃ѳ де́нь. ст҃ы́хъ
сла́вныхъ всехва́лныхъ верхо́вныхъ апс̃лъ,
петра̀ и па́вла, бл҃гословѝ о́ч҃е.

Си́мъ ко́е похва́лъ изложе́ніе вя́щ̾ше кто̀
у́бѡ помы́слитъ, же гдс̃ня свидѣ́тель­
ства и про́повѣди. ѻ́во у́бѡ убла­
жи́вша, и ка́мень наре́кша, нане́мъ же
водрузи́ти цр҃ковь речѐ. ѻвого же,
сосу́дъ из̾бра́нія бы́ти предъре́кша,
є́же пронестѝ и́мя єгѡ̀ пре́дъ мучи́тели
и царѝ. Бя́ше же ст҃ы́й пе́тръ, бра́тъ
первозва́ннагѡ андре́я, ѿ гра́да не сла́вна
и ху́да виѳсаи́ды. сн҃ъ іѽ́нинъ, ѿ
колѣ́на сѷмеѽ́нова, при урка́нѣ архи­
єре́и, в̾нищетѣ̀ послѣ́дней живы́й,
и свои́ма рука́ма є́же жи́ти сниска́я.
Тому́ же сконча́вшуся, *сѵ́монъ {**си́мон̃} у́бѡ
себѐ в̾нае́мъ ѿда́въ, и поя́тъ дще́рь ари­
стову́лову, бра́та варна́вы апс̃ла, и ча́да
родѝ. ан̾дре́й же чистотѣ̀ себѐ ѿ́далъ
є́сть. по́времениже вне́же в̾сажде́нъ бы́сть

іѡ҃а́ннъ в̾ темни́цу, іс҃ъ къ є́зеру гениса­
ре́тьскому прише́дъ и ѡбрѣ́тъ андре́а и пе­
тра̀, по правля́юща сѣ́ти своя̀, возва̀
я̀, и а́біе послѣ́доваста єму̀. и про́чее
проповѣ́давъ пе́тръ єѵг̃а́ліе во июде́и и анти­
охі́и, и въ по́нтѣ, и галаті́и, и каппа­
докі́и, асі́и же и виѳині́и. сни́де да́же
до ри̑ма. и за є́же преѡдолѣ́ти єму̀ в̾ чю­
десѣ́хъ, *сѵ́мѡна {*си́мона} волхва̀, тогда̀ не­
ро́ну ца́рьствующу, ра́спятъ бы́въ стре́мъ
гла́въ я́коже са́мъ испросѝ, и та́кѡ бл҃же́­
нную кончи́ну прія́тъ; Ст҃ы́й же па́велъ,
євре́инъ у́бѡ бя̑ше ро́домъ и то́й, ѿ ко­
лѣ́на веніами́нова. є́ресію фарисе́й. на­
уче́нъ ѿ гамаліи́ла, и в̾ коне́цъ мѡѷсе́й­
скому зако́ну нака́занъ. въ та́рсѣ жи­
вы́й, є́же и преи́злиха ревни́тель бы́въ
зако́ну, разоря̑ше бж҃ію цр҃ковь. то­
гѡ̀ бл҃говоле́ніемъ и предъложе́ніемъ, уби­
ва́ется стефа́нъ первому́ченикъ. по́званъ
же бы́въ ѿбг҃а в̾ полу́дне, и ѡслѣпле́ну
ѻчи́ма гла́су єму̀ бж҃е́ственому прише́дшу
с̾ вы̑ше посыла́ется ко ана́ніи дре́вню уч҃нку̀,
живу́щу в̾ дама́сцѣ. єго́ же ѡгласи́въ и
крс̃ти́въ, поне́же сосу́дъ из̾бра́нія бы́сть,
{#л. фп҃ѕ}

я́коже перна́тъ нѣ́кій, всю̀ ѡб̾ше́дъ вселе́­
нную, улови́въ є́сть. и в̾ ри́мъ дости́гъ
и научи́въ мнѡ́ги, та́мѡ житіѐ разрѣшѝ,
лѣ́то по́слѣжде по петрѣ̀ живѐ. и в̾ вы́ю у­
сѣ́ченъ. ѿ я́звы же истещѝ рѣ́ша, кро́ви
со млеко́мъ. а́ще же и по́слѣжде сконча́­
ся бл҃же́нный па́велъ лѣ́томъ, но въ єди́­
номъ мѣ́стѣ положи́шася єю̀ мо́щи.
тою̀ мл҃твами хрс̃тѐ бж҃е поми́луй и спасѝ
на́съ;

Вто́йже де́нь сло́во ѡ прѣ́ніи петро́вѣ с̾ си́­
мономъ вол̾хво́мъ.

Прише́дшу у́бѡ ст҃о́му апс̃лу петру̀ ѿ анти­
охі́и в̾ ри́мъ, и ѻбита̀ бли́зъ торгу̀ у
кли́мента нѣ́коегѡ̀ кора́бленика, и уча́ше
сло́ву бж҃ію приходя́щыя к̾нему̀. и во­
звѣсти́ша єму̀, я́кѡ сѵ́монъ нѣ́кто
здѣ̀ ѿ єгѵ́пта прише́лъ, и нарица́етъ
себѐ хрс̃та̀, твори́тъ же и чюдеса̀ мнѡ́га.
и ца́рь тивє́ріи в̾ сла́дость послу́шаетъ єго̀.
и раз̃жже́гся пе́тръ ст҃ы́мъ дх҃омъ, пріи́де
к̾нему̀ идѣ́же бѣ̀ *сѵ́монъ {**си́}, и мнѡ́ги ѡбрѣ́­
те стоя́ща у вра́тъ, и ті́и воз̾брани́ша
єму̀ в̾ни́ти. рече́ же пе́тръ почто̀ возбра­
ня́етеми вни́ти ко льсти́вому волхву̀.

ѻни́ же рѣ́ша, не во́лхвъ є́сть, но бг҃ъ
си́ленъ, и то́й поста́ви стра́жа увра́тъ,
вѣ́дуща помышле́нія челѡвѣ́ческа. и по­
каза́ша єму̀ че́рна пса̀ во вратѣ́хъ лежа́ща,
и рѣ́ша, сі́й пе́съ умерщвя́етъ, ѡ си́монѣ
не пра́вду помышля́ющи. рече́ же пе́тръ,
а́зъ пра́вая ѡ не́мъ гл҃ю, я́кѡ ѿ бѣ́са є́сть
си́монъ. и приступи́въ речѐ ко псу̀, идѝ
и рцы̀ си́мону, пе́тръ апс̃лъ хрс̃то́въ хо́щет̃
к̾ тебѣ̀ вни́ти. и прише́дъ пе́съ человѣ́че­
скимъ гла́сомъ речѐ я́же повелѣ̀ єму̀ пе́тръ
к̾ си́мону. и ужасе́ся ве́сь наро́дъ и́же
ѡ си́монѣ. си́монъ же та́коже посла̀ пса̀,
и речѐ, да вни́детъ сѣ́мо. и вшед̃шу петру̀,
нача̀ си́монъ мечты̀ твори́ти пред̃наро́домъ
при петрѣ̀. пе́тръ же си́лою хрс̃то́вою бо́льша
показа̀ чюдеса̀. и возвѣсти́ша ѡ ни́хъ
тиве́рію царю̀, и повелѣ̀ я̀ привестѝ к̾ себѣ̀.
вопроси́ же ца́рь си́мона, ты́ ли єсѝ хрс̃то́съ.
си́монъ же речѐ, а́зъ є́смь хрс̃то́съ.
пе́тръ же речѐ, нѝ, но а́зъ учн҃къ
є́смь хрс̃то́въ, и пред̾на́ми ра́спятъ бы́сть
во ієрс̃ли́мѣ пила́томъ, и в̾ тре́тіи дн҃ь
воскр҃се, а в̾ четы́редесятый де́нь вознесе́ся
на нб҃са̀. и повелѣ̀ ца́рь призва́ти пила́та.
{#л. фп҃з}

и речѐ єму̀, се́йли є́сть хрс̃то́съ єго́же ты̀
испе́рва не пра́вдою ѡсудѝ на распя́тіе.
и речѐ пила́тъ, не се́й царю̀. хрс̃то́съ бѣ̀
сму́глъ лице́мъ, и до́бръ брадо́ю, о́чи
имѣ́я свѣ́тлы. а се́й му̑жь голоу́съ,
че́рнъ велмѝ, сти́щенъ бровмѝ, зѣ́кръ
ѻчи́ма, и мню̀ я́кѡ ло́жь є́сть. и пока­
за̀ ца́рь на петра̀ и речѐ, а сего̀ ви́дѣлъ ли єсѝ
со хрс̃то́мъ, я́кѡ учени́къмися єгѡ̀ твори́­
тся. и речѐ пила́тъ, сего̀ у́бѡ зна́ю,
лкѡ приведо́ша єго̀ предмя, ѿве́ржеся
хрс̃та̀, я́кѡ незна́ю єго̀. и повелѣ̀ ца́рь
из̾ри́нути обою̀ испола́ты, си́мона я́кѡ сол̾га́­
вша, петра́же я́кѡ ѿве́ргъшася. и бы́сть
между̀ и́ма пря̀ вели̑ка. и повелѣ̀ ца́рь
агри́ппѣ єпа́рху суди́ти я̀. си́монъ речѐ,
повелѝ да мя̀ усѣ́кнут̃, и воскресну̀ в̾ тре́тіи
дн҃ь. и поста́ви въ мечтѣ̀ ѻве́нъ, и у­
сѣ́кну главу̀ ѻвну̀. пе́тръ же ѡбличѝ
єго̀. Посе́мъ повелѣ̀ си́монъ поста́вити
сто́лпъ, да на́нь в̾ше́дъ вознесе́тся на́ нб҃о,
и па́ки сни́детъ. тому́ же бы́вшу, возлѣ́зъ
си́монъ на сто́лпъ, и взя́тъ бы́сть бѣ́сы,
и неся́ху ѝ на возду́хъ. пе́тръже запретѝ
бѣсѡ́мъ, и пове́ргъше си́мона бѣжа́ша

и ни́зъ па́дши си́монъ, сокруши́ся на четы́­
ре ча́сти, и та́кѡ с̾конча̀ ѻкая́нный сво́й
живо́тъ. петро́ви же мнѡ́ѕи вѣ́роваша
ѿ ри́млянъ, и крс̃ти́шася во́ имя ѻц҃а̀ и сн҃а
и ст҃а́гѡ дх҃а.

Вто́йже де́нь поуче́ніе
на па́мять ст҃у́ю и верхо́вную апс̃лу петра̀
и па́вла.

Слы́шасте бра́тіе въ єѵг̃а́ліи самого̀ гдс̃а гл҃ю­
ща ко уч҃нкѡ́мъ свои́мъ живо́тная слове­
са̀, и́хъ же послу́шающе и на пису́юще
на срд̃цы́хъ ва́шихъ, дх҃о́вни да бу́­
демъ. та́же цр҃ьски я́же речѐ бг҃ъ к̾ пе­
тро́ви, я́кѡ ты̀ єсѝ пе́тръ, си́рѣчь
тве́рдый вѣ́ры ка́мень. пе́тръ бо ка́мень
нарі́чется, нане́мъ же созда̀ хрс̃то́съ цр҃квь
дх҃о́вную, є́й же врата̀ сме́ртная немо́­
гутъ удолѣ́ти. идѣ́же са́мъ творе́цъ
ѻснова́ніе положѝ и стѣ́ны возградѝ вѣ́­
рою, кто̀ возмо́жетъ є́й проти́витися.
кто́й бо вѣ́рою вся́къ прите́къ, спасе́тся.
к̾ то́й бра́тіе прибѣжи́мъ, ту̀ всѣ̑хъ
грѣ́хъ ѿпу́стъ пріи́мемъ. ту̀ исцѣле́ніе
страстє́мъ получи́мъ. ту̀ весе́лія и ра́­
дости наслади́мся. сему́ бо верхо́вному
апс̃лу петру̀ дадѐ вла́сть гдс̃ь бг҃ъ гл҃я,
{#л. фп҃и}

сѐ а́зъ даю̀ тебѣ̀ ключа̀ црс̃тва нбс̃нагѡ.
и єго́же с̾ вя́жеши на землѝ, бу́детъ
с̾ вя́занъ и на́ нб҃си. иєго́же разрѣши́ши
на землѝ, бу́детъ разрѣше́нъ и на́ нб҃си.
к̾ то́й нн҃ѣ припаде́мъ бра́тіе прося̑ще разрѣ­
ше́нія вѣ́рою и чистото́ю и любо́вію не зави́­
стною, дѣ́лы до́брыми украси́вшеся, ми́ло­
стынею, и посто́мъ ѡчи́стившеся, ни́щыя
ми́лующе. да и са́ми ѿбг҃а млс̃ть получи́мъ.
стра́нныя пріє́млюще нагі́я ѡдѣва́юще,
а́лчныя насыща́юще, жа́дныя напая́юще.
тѣ́ми бо ѿверза́ется црс̃тво нбс̃ное, и грѣ­
сѝ ѿдаю́тся. Тѣ́мъже немо́жемъ и́хъ
презрѣ́ти. тѣ́хъ бо ра́ди дано̀ є́сть имѣ́­
ніе, да и ѻ́нѣхъ насы́тимъ, и сво́й до­
во́лъ испо́лним̃. я́коже речѐ гдс̃ь, вню́же мѣ́­
ру мѣ́рите, воз̃мѣ́рится ва́мъ. да добро̀
є́сть бра́тіе житіе́мъ непоро́чнымъ сконча́­
ти житіѐ свѣ́та сегѡ̀, не́же ли ѕлы́мъ
вѣ́чную му́ку воспрія́ти. пріити́ бо
и́мать сн҃ъ бж҃іи іс҃ъ хрс̃то́съ, суди́ти
живы́мъ и ме́ртвымъ и возда́ти кому́­
ждѡ подѣ́ломъ єго̀. бг҃у на́шему сла́­
ва, нн҃ѣ и при́снѡ и во́ вѣки вѣкѡ́мъ;

Мцс̃а тогѡ́же, въ л҃ дн҃ь, собо́ръ ст҃ы́хъ
сла́вныхъ и всехва́лныхъ апс̃лъ двою̀ на́деся­
те, бл҃гословѝ ѻ́ч҃е.

Бл҃же́нный дв҃дъ ст҃ы́мъ дх҃омъ учи́мь,
я́снѡ ст҃у́ю тро̃цу въ єди́но црс̃твующю
исповѣ́да глаго́ля, словесе́мъ гдс̃нимъ
нб҃са̀ утверди́шася, и дх҃омъ у́стъ єгѡ̀
вся̀ си̑ла и́хъ. Се́й первонача́льный нача́­
токъ, и́же во єди́но трили́чное црс̃тву­
ющее бж҃ество̀, при устра́ньшееся у́ду­
ба пе́рво ѻц҃у, не ѡста́вльшу нбс̃ная
и провозвѣща́ющу и́же плотьска́гѡ сло́­
ва, бу́дущагѡ ѡб̾ явле́нія. рече́ бо
єму̀, мнѡ́жя умнѡ́жю сѣ́мя твоѐ,
и ис̾тебѐ изы́дутъ цр҃и. тѣ́мъ и ѻ́ба
на́десять ѿ єгѡ̀ ча́да, патріа́рси пропо­
вѣ́дани бы̑ша. смотрѝ у́бѡ нѣ́кая,
ѽ послу́шателю, съ єдиному́дръству­
ющыхъ ве́тхимъ но́вая показа́нія. ѻба́­
че провозвѣща́ти и ааро́на, внегда̀ єму̀
ст҃льствовати. что̀ бя́ху ѻ́ба на́десять
звоно́въ, не бя́ше ли є́же по все́й землѝ
с̾ бы́вшыхся ѻбою̀ на́десятихъ апс̃лъ, вопло­
ти́вшагося хрс̃то́ва прише́ствія. па́че же и
по и́стинѣ. и́бо іѡсі́я прро̃къ дх҃ом̃ си̑це речѐ,
{#л. фп҃ѳ}

внегда̀ исто́чникъ и́же в̾ силоа́мѣ са́мъ на́
дв҃а на́десять раздѣли́тся. и бу́дутъ
два̀ на́десять исто́чницы, и тогда̀ хрс̃ту̀
пріитѝ, и́же и с̾ бы́сться. да я́коже в̾ за­
ко́нѣ про ѡбразова́вшейся бл҃года́ти имѣ́ти
произы́тіе, повсю́ду явле́нѡ бы́ти.
но по неизрече́ннѣй млс̃ти истощѝ себѐ
ѡбожи́вый воспрія́тін, яснѣ́йшее пока­
за́ти хотя̀, є́же к̾ на́мъ свою̀ бл҃госты́­
ню, воспріе́мъ бл҃госта́точныхъ, и я́вль­
шихся сщ҃е́нныхъ апс̃лъ, самови́децъ про
усмотре́нію с̾лучи́вшихся, в̾видѣ́ніи
ѻ́гненыхъ язы́къ, бж҃е́ственый дх҃ъ
си́хъ раздѣли́вый. и бг҃осло́вити ѻ́нѣхъ
ѡ бж҃и́вшуюся пло́ть подъ всю̀ подъсо́лне­
чную, бл҃говѣствова́ти, и кр҃ща́ти
ѡне́й посла̀. тѣ́мъ си́хъ ра́ди просвѣти́­
вшаяся вся̀ тва́рь, въ правосла́вную вѣ́­
ру бл҃гочести́внѡ, ст҃ѣ́й тро̃цѣ слу́житъ
не мо́лчнѡ, и совоку́пнѡ єди́наго исповѣ́­
дающе бг҃а и сн҃а бж҃ія, и́же ѿсамы́я мр҃і́и
дв҃цы, и́стинныя бцд̃ы, и́же бг҃а сло́ва без̃
сѣ́мене ро́ждьшія. тѣ̑мъ си́хъ я́кѡ и
свѣти́ла и проповѣ́дники, и пре́лести иско­
рени́тели случа́ющихся, всѝ по достоя́нію

хвали́ти и пѣ́ти до́лжни єсмы̀. ну́жнѡ
у́бѡ є́сть, є́же ѡб̾ яви́ти и рещѝ, ка́кѡ
ко́ждо проповѣ́да, и гдѣ̀ преста́вися.
и́бо не совоку́пнѡ всѝ, но и́ндѣ, и во и́ныхъ
гра́дѣхъ и в̾ се́лѣхъ. но и пре изя́щныя
ра́ди че́сти и́хъ, па́мять совоку́пнѡ воспо­
мина́етъ, и пра́зднуетъ хрс̃то́ва цр҃кви.

Вто́йже дн҃ь сло́во к̾ бога́тымъ и не творя́­
щимъ ми́лостыни.
что̀ скорби́ши чл҃че, тлѣ́нныхъ ра́ди
нехотя̀ пода́ти ни́щему, зато́боти
ѿбг҃а непрія́ти црс̃тво нбс̃ное. почто̀ ѿме́­
щешися бж҃іа наказа́нія ѡ млс̃тни. а́ще
ли невѣ́руеши, то̀ и креще́нія лѣ́поти
є́сть ѿврещи́ся. а́ще ли вѣ́ренъ ся мни́ши,
то̀ что̀ ѿвѣща́еши судіѝ, стѣ́ны ѡблача́я,
а чл҃ка не ѡдѣ́жеши. ко́ни украша́еши,
а ни́ща на́га су̑ща презира́еши. не поми́ловал̃
ли єсѝ, и ты̀ не поми́лованъ бу́деши.
не ѿве́рзели ты̀ ни́щему хра́ма своегѡ̀,
затворе́нъ бу́детъ и тебѣ̀ ра́й. не да́си
ли хлѣ́ба а́лчющему, не пріи́меши и ты̀
вѣ́чныя жи́зни. покажѝ человѣ́че дѣ́ла
речѐ гдс̃ь, невостязу́й ѿда́нія. никто́же
поразсы́паніи то́рга ку́пли твори́тъ,
{#л. фч҃}

ни по бра́нѣхъ му́жества показу́етъ. ни
потри́знахъ вѣнча́нъ быва́етъ, си́це и по
сме́рти не ми́лостивое истощи́мое бога́ть­
ство, зане́же не пріи́мутъ бога́тіи цр҃ьства
нбс̃нагѡ, но то́кмѡ ѿ му́ки изба́вятся,
а́ще и мно́гимъ моля́щимъ ся ѡ душя́хъ
и́хъ и́же ѿ яде́нія и насыще́нія, и сре́бре­
ницы задш҃я и́хъ взе́мшимъ доброчс̃ти́­
вѣ потруди́вшимся. тѣ́мъ потщи́те­
ся бога́тіи на млс̃тню, да пріи́мѣте
ми́лость ѿгдс̃а на́шегѡ іс҃а хрс̃та̀;

Вто́йже де́нь сло́во ѡ хрс̃тія́нинѣ в̾ зе́мъ­
шемъ зла́то у жидови́на и запре́ся єго̀,
кля́шеся єму̀ я́кѡ не в̾зе́мъ.

Нѣ́кто жидови́нъ во алеѯандрі́и купе́цъ бѣ̀,
живя́ше бли́зъ хрс̃тія́нина нѣ́коегѡ. и­
мѣ́яста же между̀ собо́ю любо́вь вели́ку.
и ѿходя̀ жидови́нъ то́й на ку́плю, по­
ста́ви у хрс̃тія́нина влага́лище со зла́томъ
запечатлѣ́ннѡ. и єгда́ же воз̾врати́ ся
жидови́нъ с̾ путѝ своего̀, посла̀ к̾ хрс̃тія́нину
да́ры заблгд̃ть хране́нія влага́лища о́ногѡ.
єгда́ же хрс̃тія́нинъ прія̀ да́ры ѿ жидови́на,
руга́яся єму̀ в̾ срд̃цы̀ свое́мъ речѐ, вои́сти­
ну и да́ры пріе́млю, а своего не во́змеши.

совѣща́жеся хрс̃тія́нинъ с̾ жено́ю свое́ю ѿвре­
щи́ся кля́твами жидови́ну зла́та. ничто́­
же бо кля́тва єгѡ̀ успѣ́етъ наны̀, занѐ
жидови́ну клене́мъся, а не христія́нину.
во у́тріи же де́нь пріи́де жидови́нъ къ хри­
стія́нину прося̀ своего̀ зла́та. и наваже́­
ніемъ дія́волимъ христія́нинъ запре́ся
с̾ кля́твою жидови́ну, и нача́стася кото­
ра́ти я́кѡ всему̀ гра́ду алеѯандрі́йскому сни́­
тися. жидови́нъ речѐ, слы́шю дру̑же
ѡ ст҃ѣ́мъ мч҃нцѣ ми́нѣ, я́кѡ вели́ка єгѡ̀
сла́ва є́сть, и посрамля́етъ бес̾ пра́вды кле­
ну́щыяся. совѣща́ста же, и идо́ста
въ цр҃квь ст҃а́гѡ ми́ны. и речѐ жидови́нъ
къ хрс̃тія́ннну, дру̑же убо́йся бг҃а и поми́­
луй дш҃ю свою̀, єли́кѡ хо́щеши, возмѝ
сѝ зла́та, а про́чее да́ждь мнѣ̀, и не клени́­
ся. христія́нинъ же речѐ, нѣ́си досто́инъ
в̾лѣ́сти въ цр҃квь, жидови́нъ сы́й. жидо­
ви́нъ же речѐ, а́ще є́смь не досто́инъ
въ цр҃квь в̾лѣ́сти, а́зъ ста́ну внѣ̀ у́ду, ты́ же
ше́дъ вну́трь клени́мися. и преклони́въ
колѣ́на жидови́нъ со слеза́ми речѐ, бж҃е сподо́­
бивый мя̀ пріитѝ в̾ цр҃квь ст҃а́гѡ мч҃нка ми́ны,
ты̀ бу́ди хода́тай между̀ мно́ю и хрс̃тія́нином̃
{#л. фч҃а}

в̾ сі́й ча́съ. и возопѝ велмѝ и речѐ, ст҃ы́й
ми̑но явѝ ѡ мнѣ̀ и ѡ хрс̃тія́нинѣ. хри­
стія́нинъ же кля́тся єму̀ въ цр҃кви. и
мня́ше жидови́нъ, я́кѡ бу́детъ єму̀
нѣ́что, и ѿ идо́ста ѻ́ба из̾ цр҃кве. бы́­
вшима же и́ма на путѝ, смяте́ся ко́нь под̃
хрс̃тія́ниномъ, и с̾ ве́рже єго̀ до́лу, и вы́­
паде єму̀ изочпа́га клю́чь ковче́га жидови́­
на. и поиска́въ христія́нинъ и не ѡбрѣ́те
ключа̀, ра́дъже бы́сть христія́нинъ, поне́­
же спадѐ с̾коня̀, мня̀ я́кѡ то̀ є́сть возда́­
ніе кля́твы. пото́мъ же в̾ста́въ в̾сѣ́дъ на
коня̀, иѣ́хаста в̾ку́пѣ ѻ́ба. и прише́дши­
ма на мѣ́сто реко́мое лускони́тъ, внидо́­
ста на то́ргъ, и купи́ста бра́шна, и сѣдо́ста
нача́ста я́сти. раска́яжеся жидови́нъ и ре­
чѐ, почто̀ а́зъ иму̀ вѣ́ры ст҃о́му ми́нѣ,
я́кѡ ѿ чюдє́съ єгѡ̀ и́хъ же слы́шахъ я́же тво­
ритъ, ниє́ди́наго ви́дѣхъ. лу́чши бы бы́­
ло да бы́хъ не кля́лъ єгѡ̀, єда̀ пома́лу бы
мѝ в̾да́лъ. ноѻба́че наде́жю мою̀ возложю̀
на́ бг҃а. и я́кѡ сѣдо́ста ѻ́ба. и сѐ ра́бъ
христія́нина ѻ́ного идя́ше, нося̀ влага́­
лище со зла́томъ, и ви́дѣвша чюди́стася
ѻ́ба. гдс̃и́нъже раба̀ тогѡ̀ убоя́ся велмѝ,

и вопросѝ єго̀ гл҃я, ѿку́ду здѣ̀ пріи́де,
и ка́кѡ сѐ но́сиши. и ѿвѣща̀ ра́бъ и речѐ,
пріидо́хъ к̾тебѣ̀ по́сланъ ѿжены̀ твоея̀
сконча́ти повелѣ́нное тобо́ю. и речѐ гдс̃нъ
єгѡ̀ кнему̀, ко́е вели́мое. и речѐ ра́бъ,
гдс̃не мо́й. дне́сь пріи́де во́инъ сла́венъ
къ гс̃жи мое́й, яздя̀ на конѣ̀, и держа̀
клю́чь, и гл҃а є́й, се́й клю́чь зна́ешили.
и речѐ, зна́ю. о́нъ же речѐ, возмѝ ѝ,
му̑жь тво́й моли́мися и посла́мя к̾тебѣ̀
глаго́ля, посли́ми влага́лище с̾ рабо́мъ
мои́мъ, є́же положѝ жидови́нъ о́нъ,
я́кѡ му́чюся въ цр҃кви ст҃а́гѡ ѕлѣ̀,
и тогѡ̀ ра́ди принесо́хъти влага́лище сѐ.
и а́ще не́ймеши вѣ́ры, ви́ждь клю́чь ларца̀
твоегѡ̀, є́же о́нъ во́инъ да́лъ є́сть гжс̃и
мое́й. жидови́нъ же прія̀ влага́лище своѐ
запечатлѣ́нно, и с̾ ра́достію зва́ше гл҃я,
вели́къ бг҃ъ, и ст҃ы́й мч҃нкъ єгѡ̀ ми́на.
чю́дна є́сть вѣ́ра хрс̃тія́нская. и никто̀
же надѣ́яися на тя̀ гдс̃и и на́помощь твою̀
и си́лу ст҃ы́хъ твои́хъ, не постыди́тся.
ѿсе́лѣ и а́зъ бу́ду хрс̃тія́нинъ. и шед̃ дадѐ
зла́та тре́тію ча́сть в̾ цр҃квь ст҃а́гѡ ми́ны,
и крс̃ти́ся со всѣ́мъ до́момъ свои́мъ,
{#л. фч҃в}

и се́ю ве́щію жидови́нъ бы́сть хрс̃тіа́нинъ
хрс̃тіа́нинъ же то́й взе́мши по́лъ имѣ́ніа
своего̀, несѐ въ цр҃квь ст҃а́гѡ ми́ны.
и ту̀ ѡста̀, и доконца̀ живота̀ своегѡ̀
пла́чася грѣхѡ́въ свои́хъ. преста́вижеся
въ покая́ніи, получи́въ ѡставле́ніе
ст҃ы́мъ му́ченикомъ ми́ною.
бг҃у на́шему сла́ва,
ны́нѣ и прс̃нѡ и во́
вѣки вѣкѡ́мъ;