<<--- 07jul/01.htm>>>

Мцс̃ъ ию́ль и́мать дні́й, л҃а. во́ дни часов̃ д҃і. а в̾ нощѝ і҃.
{*заголовок набран вязью}

Мцс̃а ию́ля въ а҃ дн҃ь. па́мять ст҃ы́хъ
чюдотво́рецъ и без̃сре́бреник̃ козмы̀ и даміа́на,
и́же в̾ ри́мѣ пострада́вшых̃, бл҃гословѝ о́ч҃е.

Сія̀ ст҃а́я бѣ́ста ѿ вели́кагѡ гра́да ри̑ма,
при кари́нѣ царѣ̀, самобра́тія су̑ща,
и врача̀ худо́жествомъ. человѣ́кѡмъ же
и скотѡ́мъ подаю́ща цѣлбы̀, прося́ща
врачев̾ству̀ м̾зду̀, хрс̃то́во исповѣ́да­
ніе и вѣ́ру, и ничто́же и́но пріе́млюща.
ѡклевета́на же бы́вша царе́ви я́кѡ волхвова́­
ннымъ худо́жествомъ чюдодѣ́йствія творя̑­
ща. инѣ́мъ тѣ́хъ ра́ди вѣ́домымъ
сама̀ сія̀ преда́вша себѐ, и не покори́стася
ѿврещи́ся хрс̃та̀. па́чеже и того̀ самого̀
царя̀ кари́на ѿ ѕлоче́стія премѣни́ста.
{#л. фч҃г}

цѣлбу̀ неду́гу тому̀ пода́вша. и вне­
гда̀ вопроша́ше и́хъ, и лю́тыми му́ками
запреща́ти. о́бразъ лица̀ єгѡ̀ ѿпа́дъ,
ѡбрати́ся на плеща̀ єгѡ̀ кри́вѣ. и ѡсе́мъ
предстоя́щіи вѣ́роваша во хрс̃та̀, и то́й
са́мъ цр҃ь со всѣ́мъ до́момъ свои́мъ, и́же
и ст҃ы́я съ чс̃тію въ до́мы своя̀ посла́ша.
пото́мъ же си̑хъ наста́вникъ и́же и то́й
того́же худо́жества сы́й позави́дѣвъ и́мъ,
и на́ гору возведѐ и́хъ, я́кѡ на бра́ніе
враче́вьскихъ бы́ліи, и на па́дъ ка́ме­
ніемъ побѝ и́хъ. соверша́етъжеся
собѡ́ръ и́хъ, во ст҃ѣ́мъ до́мѣ
и́хъ, су́щемъ въ павли́­
нѣхъ;

Вто́йже де́нь прпд̃бнагѡ оц҃а̀ на́шегѡ пе­
тра̀, бы́вшаго патрікі́я въ єва́ндрѣ.

Се́й бя̑ше во времена̀ ири́ны бл҃гочести́­
выя цари́цы, и констянти́на сы́на
єя̀, роди́телю вели́ку и сла́вну.
патрикі́й бя̑ше оц҃ъ єгѡ̀ и страти́гъ
констянти́нъ нарица́емь. се́й бл҃же́нный
пе́тръ ѿ млады́хъ ногте́й кни́жному уче́­
нію прилѣжа̀, и грамматикі́ю и філосо́фію
навы́къ. та́же съ пря́гъся женѣ̀,

поста́вленъ бы́сть въ че́сти доме́стическа­
гѡ чи́на. пото́мъ и констянти́ну оц҃у̀
єгѡ̀ ѿ житія̀ ѿше́дшу. ники́фору же
црс̃тво пріе́мшу, домести́ка и кане́тска­
гѡ того̀ поста́ви. тѣ́мъ и на бо́лгары
того̀ поведѐ. ра́ти же с̾ рази́вшися,
пе́рвѣе го́рцѣ побѣди́ша бо́лгары. по­
то́мъ ѡбрати́вшеся бо́лгары, порази́­
ша гре́ки. и я́ту бы́вшу бл҃же́нному с̾ пя­
тію́десять кн҃ѕь ѿ бо́лгаръ, и приведе́ни
къ муче́нію. яви́ся єму̀ но́щію ст҃ы́й
іѡ҃а́ннъ возлегі́й на пе́рси хрс̃то́вы, изба́­
ви єго̀ ѿ у́зъ и да́же и до ри́ма приведѐ.
Бл҃же́нный же се́й сметіѐ вся̀ въ мѣни́въ,
и́де во оли́мбову го́ру, и а́гг҃льское жи­
тіѐ воспріе́мъ, ку́пнѡ съ вели́кимъ іѡани́­
кіемъ всю̀ добродѣ́тель извы́че. испо́лни
же та́мѡ лѣ́тъ, три́десять четы́ре.
та́же ше́дъ въ цр҃ь гра́дъ, и є́же ѿнегѡ̀
созда́ннѣй цр҃кви єва́ндрійстѣй бы́въ,
и за є́же и женѣ̀ єгѡ̀ ѿ житія̀ ѿше́дши
и сн҃у. надале́че коли́бу потчѐ, пре­
бы́сть та́мѡ ѻ́смь лѣ́тъ, власяна́я
нося̀ по́ тѣлу. но́ѕѣ же во вся̀ лѣ́та
по́стническагѡ житія̀ ника́кѡ ѻбу́въ.
{#л. фч҃д}

посто́мъ и бдѣ́ніемъ, и про́чимъ возде­
ржа́ніемъ себѐ томя̀. и та́кѡ до́брѣ и
бг҃оуго́днѣ пожи́въ, почѝ ѡ́гдс̃ѣ. гла­
го́летъжеся я́кѡ рого́зъ по на́гу тѣ́лу под̃
власяни́цею носи́ти, и́ми же и погребе́нъ бы́сть.

Вто́йже де́нь сло́во по́льзѣ дш҃е́внѣй.

Бра́тъ пріи́де в̾ го́ру ѳере́мскую ко ѻц҃у̀
вели́кому глаго́ля, что̀ сотворю̀ ѻ́ч҃е,
я́кѡ поги́бе ми дш҃а. глаго́ла єму̀
ста́рецъ, по что̀. и речѐ, да я́кѡ єгда̀
бѣ̀ в̾ людьстѣ́мь житіѝ, мнѡ́го пости́­
хся и бдѣ́хъ, и мно́ги сле́зы уми­
ле́нія и теплота̀ бѣ̀ вомнѣ̀. а ны́нѣ
ѻ́ч҃е ни єди́наго добра̀ сотво́рша ви́жю в̾ се­
бѣ̀ весма̀. и глаго́ла єму̀ ста́рецъ,
вѣ́ру ими́ми ча́до, я́кѡ єли̑кѡ творя̑­
ше в̾ просто́мъ житіѝ, ѿ горды́ни и хва­
лы̀ человѣ́чи имя́ше спасе́ніе, и не при­
я́то ти бя̑ше бг҃омъ, тѣ́мъ же и дія́­
волъ не брежа́ше, ни бра́ни творя̑ше
ти, да ѿ є́млетъ ѿ успѣ́ха твоегѡ̀.
а нн҃ѣ тя ви́дитъ я́кѡ на́ брань изше́дша,
тѣ́мъже ѻ́нъ и воѻружи́лся є́сть на тя̀.

ѻба́че го́дѣ є́сть гдс̃ви єди́нъ ѱл҃о́мъ, є́же
ны́нѣ гл҃еши смире́ніемъ, па́че ты́сящъ
є́же глаго́лалъ єсѝ въ простѣ́мъ житіѝ.
ѿвѣща̀ єму̀ бра́тъ, весма̀ ны́нѣ не­
пощу́ся ѻ́ч҃е, но вся̀ до́брыя дѣ́тели
ѿя́ты бы́ша ѿменѐ. и глаго́ла єму̀
ста́рецъ, бра́те довлѣ́етъ тѝ є́же и́маши,
добро́ ти бу́детъ, толи́кѡ терпѝ. При­
лѣ́жно же глаго́лаше, по пра́вдѣ ѻ́ч҃е по­
ги́бла ми є́сть душа̀. Тогда̀ глаго́ла
ста́рецъ, вѣ́ру ими́ ми бра́те, не хотѣ́хъ
ти изъглаго́лати, є́же ти хощу̀ рещѝ,
да не ѡслабѣ́етъ у́мъ тво́й, но па́че
ви́жю тя̀ во уны́ніе в̾па́дъша ѿ діа́вола.
послу́шай бра́те сего̀ єди́наго є́же мни́ши
сѝ, я́кѡ до́брѣ живя́ше, и добродѣ́тель
творя́ше, єгда̀ бѣ̀ въ простѣ́мъ житіѝ
пе́рвая горды́ня є́сть. та́кѡ и фарисе́й
вся́ си погубѝ, єли́кѡ творя́ше вся̀
до́брая. и па́ки не и́маши въ себѣ̀,
весма̀ ни єди́наго добра̀ творя̑ща. до­
влѣ́етъ ти бра́те на сп҃се́ніе душѝ, смире́­
ніе. та́кѡ бо ѡправда́нъ бы́сть мыта́рь,
ни єди́нагѡ добра̀ сотво́рша себѐ глаго́ла.
го́дѣ є́сть бг҃у грѣ́шникъ, и лѣни́вый
{#л. фч҃е}

человѣ́къ, сокруше́ннымъ се́рдцемъ и
смире́ннымъ, па́че творя́щаго добро̀,
и добро̀ иму́ща со тщесла́віемъ, се́ бо
ве́ліе добро̀ твори́тъ. по́льзу же пріє́мъ
бра́тъ, и утѣ́ху душѝ свое́й,
поклони́ся до землѝ ста́рцу
глаго́ля, дне́сь о́ч҃е
спасе́на бы́сть душа̀
моя̀.

Вто́йже де́нь по́вѣсть ст҃а́гѡ ни́ла.

Вѣ́ждь ча́до, я́кѡ маловреме́ненъ є́сть
ро́дъ человѣ́ческій, и сегѡ̀ ра́ди до́лженъ
є́сть смире́ный и́нокъ николи́же забыва́­
ти сме́рти. но лю́бо а́ще сѣди́тъ, лю́бо
хо́дитъ, лю́бо дѣ́лаетъ, лю́бо я́стъ, лю́бо
піе́тъ, да и́мать в̾ по́мыслѣ у́бѡ стра́хъ
бж҃іи, и мы́сль сме́ртную. во устѣ́хъ
же ѱалмы̀ и моли́тву, и славосло́віе
бж҃іе. душа̀ человѣ́ча посредѣ̀ є́сть а́гг҃ла,
и бѣ́са. и у́бѡ а́гг҃лъ влага́етъ и пока­
зу́етъ и учи́тъ, я́же к̾ добродѣ́телємъ.
бѣ́съ же влага́етъ, я́же су̑ть грѣху̀.
душа̀ вла́сть и́мать є́же послѣ́довати,
єму́же хо́щетъ, илѝ а́гг҃лу, илѝ бѣ́су
сегѡ̀ ра́ди внемлѝ да не ѡскорби́ши а́гг҃ла,

вѣ́ждь я́кѡ по́стъ и воздержа́ніе и бдѣ́ніе,
утолѣва́ютъ жела́ніе, и не ѡставля́ютъ
тому̀ возрасти́тися. Безмо́лвіе же и мо­
ли́тва, и любо́вь бж҃ія, ѿню́дъ того̀
посрамля́ютъ. А́ще же є́сть и́нокъ до­
лготерпѣли́въ и ми́лостивъ, бе́звѣ­
сти твори́тъ я́рость ѿню́дъ. бг҃у
на́шему сла́ва, ны́нѣ и при́­
снѡ и во́вѣки
вѣкѡ́мъ
;
{#л. фч҃ѕ}

<<--- 07jul/02.htm>>>

Мцс̃а тогѡ́же, въ в҃ дн҃ь, положе́ніе чс̃тны́я
ри́зы въ цр҃кви прс̃ты́я влд̃чцы на́шея бцд̃ы,
и́же влахе́рнѣ, бл҃гословѝ ѻ́ч҃е.

Въ црс̃тво лва̀ и ири́ны, патрикі́я два̀
имены̀, галві́й и канди́дъ, сро́дницы
ардави́рія и а́спаря, любо́вію изыдо́ста
ѿ византі́и, и идо́ста во ієрс̃ли́мъ на
поклоне́ніе ст҃ы́мъ мѣстѡ́мъ. и до­
ше́дше в̾ палести́ну, бы́вше в̾ гали­
ле́йскихъ мѣ́стѣхъ, ѡбрѣто́ша в̾ нѣ́­
коей хра́минѣ євре́яныни жены̀ та́мѡ
лежа́щія мнѡ́жество мно́гѡ возлежа́­
щее. во ино́й же клѣ́ти свѣ́щіє мнѡ́го
и ѳимія́ньскоє приноше́ніє.
И увѣ́дѣвша я́кѡ та́мѡ ри̑за бг҃омт҃ре ле­
жи́тъ. и испроси́вше у жены̀ є́же та́мѡ
всено́щное стоя́ніе со твори́ти. и пре­
мѣ́риша дре́вомъ ковче́га мѣ́ру, и
идо́ша во ієросали́мъ, и сотвори́ста и́нъ
ковче́гъ тако́въ же, и до идо́ста па́ки
к̾ женѣ̀. и утаи́вшеся взя́ста ковче́гъ,
идѣ́же бя̑ше чс̃тна́я ри̑за, сво́й же по­
ложи́ста на мѣ́стѣ. и из̾ше́дше по идо́­
ста къ црс̃твующему гра́ду. и́же и поло­
жи́ста чс̃тно́е сокро́вище въ свое́й клѣ́ти.

в̾ нарица́емѣи лахе́рна. и созда́вше свя­
ще́нную цр҃квь, тая́ще, во́ имя ст҃ы́хъ
апс̃лъ петра̀ и ма́рка. и не возмо́гше на
мно́зѣ кры́ти, яви́ша та́йну цр҃ю̀.
цр҃ьже ра́достію неизрече́нною испо́лнься,
и созда̀ цр҃квь идѣ́же ны́нѣ лежи́тъ ст҃ы́й
ковче́гъ, и положѝ та́мѡ ст҃а́го ковче́га
съ чс̃тно́ю ри́зою. ѡбви́въ многѡцѣ́нною
багряни́цею, в̾садѝ в̾ ковче́гъ мра́мо­
ренъ. и печа́тію цр҃ьскою запеча́тавъ,
и́же и досе́ле є́сть сохране́ніе црс̃твующему
гра́ду. болѣ́знємъ и ра́тємъ прогна́ніе.
соверша́етъжеся таковый собѡ́ръ в̾ лахе́­
рнахъ.

Вто́йже де́нь сло́во увена́лія єпкс̃па
ієрс̃ли́мъскагѡ.

Увена́ліи во ст҃ы́хъ ѻц҃ъ на́шъ, бѣ̀ в̾ лѣ́­
та ѳеодѡ́сія ю́нагѡ. ст҃и́тель бы́сть
во ієрс̃ли́мѣ тре́тіи по кири́лѣ. пребы́сть
же до црс̃тва маркіа́на и лва̀. прише́дъ же
въ єфе́съ на собѡ́ръ посредѝ ст҃ы́хъ ѻц҃ъ,
восія̀ в̾проповѣ́даніихъ с̾ кири́ломъ с̾ па́пою
алеѯа́ндръскимъ. дости́же же и халкидо́­
нскагѡ собо́ра ст҃ы́хъ ѻц҃ъ шести́сѡтъ и три́­
десяти. и почте́нъ бы́сть маркія́номъ ца­
ре́мъ за добродѣ́тель єгѡ̀, я́кѡ сѝ та́кѡ су̑ть,
{#л. фч҃з}

въ єѵѳи́мстѣмъ сказа́ніи, в̾ тре́тіемъ
словесѝ, в̾ четыредеся́тои главѣ̀ ѡбря́ще­
ши. созда́въ же лахе́рну маркіа́нъ,
и спелхері́ею глаго́лаше увена́лію, а́ще вѣ́­
сть ѡтѣлесѝ бж҃ія мт҃ре, гдѣ̀ положено̀
бы́сть. ѻ́нъже ѿписа̀ у́бѡ невѣ́дѣ.
дре́внееже у́бѡ сло́во и́стинное приво́дится,
я́кѡ погребено̀ бы́сть, и є́же ѿ ст҃ы́хъ апс̃лъ
слы́шано бы́сть и а́гг҃льское пѣ́ніе, да́же до тре­
тія́го днѐ. по тре́тіемъ же днѝ єди́ному
ѿ учени́къ не бы́вшу на погребе́ніи пречс̃тагѡ
тѣ́ла, ѿверзо́ша єму̀ гро́бъ и не ѡбрѣ́­
теся тѣ́ло єя̀, но то́кмѡ гро́бная єди́­
на. и помоли́вся ца́рь, понѐ ра́ку с̾ гро́­
бными запечатлѣ́нну посла́ти, є́же и
бы́сть. Ст҃ы́й же увена́ліи єпи́скопъство­
ва всѣ̑хъ лѣ́тъ, три́десять ѻ́смь, и у́спе с̾ ми́ромъ;

Вто́йже де́нь поуче́ніе да никто́же собо́ю
упова́етъ, ни навла́стеля, но на бг҃а.

Бл҃же́нъ є́сть бра́тіе чл҃къ то́й, и́же надѣ́ется
при все́мъ на́ бг҃а, не́жели на чл҃ка. возри́те
на пе́рвыя ро́ды, и ви́дите я́кѡ вѣ́роваша
гдс̃ви, и не постыдѣ́шася; илѝ кто̀ пребыва́я
въ стра́сѣ єгѡ̀ ѡста́влен̃ бы́сть и́мъ; илѝ кто̀

призва́въ єго̀ презрѣ́нъ бы́сть. млс̃тивъ
и ще́дръ гдс̃ь ѿпуща́етъ грѣхѝ, и спаса́­
етъ во́ время ско́рби. тѣ́мъ невослѣ́ду­
емъ мы́сли срд̃ца своегѡ̀, ни рце́мъ,
кто́ ны изба́витъ ѿ ѕла̀; гдс̃ь бг҃ъ ѿ­
м̾сти́тъ ѡби́дящему. тѣ́м̾же добро̀ є́сть
надѣ́ятися на гдс̃а бг҃а, не́жели на чл҃ка;

Вто́йже де́нь сло́во ѡми́лостыни и ѡ
смире́ніи.

Я́кѡ подоба́етъ млс̃тыню хотя́щему тво­
ри́ти, невѣ́дая ра́зньства ни добру̀
ни ѕлу̀, илѝ пра́ведну, илѝ не пра́ведну
въ тѣле́сныхъ потре́бахъ, но всѣ́мъ
ра́внѡ, я́же напотре́бу раздава́етъ.
а́ще бо насы́тился єсѝ пи́щами разли́чны­
ми, накормѝ а́лчющаго хлѣ́бомъ.
напи́лълися єсѝ помно́гу, да́ждь жа́дно­
му єди́ну ча́шю. согрѣ́лълися вомно́гихъ
мя́гкихъ и драги́хъ ри́захъ, приѡдѣ́жи
простѣ́йшею ѻде́жею нагаго, и трясу́­
щагося зимо́ю. въ хра́мѣжели кра́снѣ
и высо́цѣ сѣди́ши, въведѝ скита́ющаго­
ся поу́лицамъ в̾ до́мъ тво́й. возве­
сели́лълися єсѝ ски́мъ твои́мъ весе́ліемъ,
{#л. фч҃и}

ѡб̾веселѝ скорбя́щаго. ѡбра́довалълися
єсѝ ѡ че́мъ, ѡб̾ра́дуй сѣ́тующаго. по­
чти́ша ли тя̀ я́кѡ бога́та, почтѝ и ты̀
убо́га. бу́ди до́мъ тво́й поко́ище
служи́телємъ бж҃іимъ, ре́къше презви́те­
рѡмъ, и вся́кому цр҃ко́вному чи́ну.
бу́ди поко́й по і́ѡву, ѻ́ко слѣпы́мъ
и нога̀ хромы́мъ, наги́мъ ѻде́жа, беспо­
кро́вным̃ покро́въ. бу́ди нога̀ твоя̀ ча́стѡ
ходя́щи к̾ темни́цамъ и къ боля́щимъ,
и къ монасты́рємъ, и ко ст҃ы́мъ домѡ́мъ,
да услы́шиши гдс̃а гл҃юща, пріи́дѣте
блгс̃ве́ніи оц҃а̀ моегѡ̀, наслѣ́дуйте у­
гото́ванное ва́мъ црс̃тво ѿ нача́ла
ми́ра. єму́же сла́ва, ны́нѣ
и при́снѡ и во́ вѣки
вѣкѡ́мъ;

<<--- 07jul/03.htm>>>

Мцс̃а тогѡ́ же, въ г҃ дн҃ь, ст҃а́го му́че­
ника іакі́нѳа, бл҃гословѝ ѻ́ч҃е.

То́й бѣ̀ ѿ кесарі́и пе́рвыя каппокпокі́йскія
єпа́рхіи, кувикула́ріи са́номъ. и слу­
жа́ше тра́пеѕѣ троя́на царя̀ в̾ ри́мѣ.
и ѻболга́нъ бы́сть царе́ви, я́кѡ хрс̃то́во
и́мя исповѣ́дуетъ, и пону́женъ бы́сть
я́сти скве́рная. и не хотя̀ того̀ сотво­
рити, но па́че хрс̃та̀ бг҃а исповѣ́даше,
біе́нъ бы́сть по всему̀ тѣ́лу. посе́мъ в̾ те­
мни́цу в̾ве́рженъ, и предълежа́щихъ идо­
ложе́ртвеныхъ не восхотѣ̀ в̾куси́ти, четы́­
редесять дні́й а́лченъ пребы́сть, царю̀ за­
повѣда́вшу темни́чному стра́жу не да́ти
я́сти хлѣ̑ба. и та́кѡ гдс̃ви дш҃ю свою̀
предадѐ. погребе́нъ бы́сть чс̃тнѡ єдиновѣ́­
рными єму̀ му́жы. творя́тъ же мо́­
щи єгѡ̀ чюдеса̀ и досегѡ̀ днѐ.

В то́й же дн҃ь ст҃ы́хъ мч҃нкъ мокі́а и ма́рка.

Ті́и ст҃і́и мч҃нцы я́ти бы́вше, и пре́дани
максиміа́ну єпа́рху. пе́рвое у́бѡ мо­
лими бы́ша пожре́ти и́долѡмъ, посе́мъ.
прети́ми умерщве́нымъ бы́ти. дѣ́ти­
ще же ма́лѡ пред̃ идя́ше к̾ тре́бищу, и не дадя́­
ше и́мъ. єго́же на плещѝ в̾зе́мше є́ллини,
{#л. фч҃ѳ}

би́ша є̀ подъпру́гою, и ѕлы̀ ра́ны да́вше
єму̀, сто̀ и де́сять. и речѐ дѣ́тище,
ѽ єпа́рше ѕлы́мъ кни́гамъ учи́ши мя.
не поко́ршажеся ст҃а́я му́ченика пожрети
и́долѡмъ, но пребыста во хрс̃то́вѣ вѣрѣ
иисповѣданіи, и мече́мъ главѣ̀ єю̀ усѣ́­
ченѣ бы́стѣ. по ст҃ѣ́мъ же мокі́и идя́ху
жена̀ и дѣ́ти єгѡ̀ въслѣ́дъ и пла́чющеся,
и́мъ же веля̑ше молча́ти ст҃ы́й. ма́рку же
пред̃стоя́щу и усѣка́ему, жена̀ єму̀ гла­
ву̀ єгѡ̀ прія́тъ.

Вто́й же дн҃ь по́вѣсть, и́же во ст҃ы́хъ
ѻц҃а̀ на́шегѡ анато́ліа архієпкс̃па констя­
нти́ня гра́да.

Се́й бя̑ше пе́рвѣе презви́теръ и апокли­
сіа́рхъ, алеѯандрі́йскія цр҃кве. по­
то́мъ же поста́вленъ бы́сть архієре́й конъ­
стянти́ня гра́да, къ с̾конча́нію лѣ́­
томъ ѳеодѡ́сія ма́лагѡ, сн҃а арка́діева.
испы́танъ же діоско́ромъ, мнѣ́вшу
съ му́дреника того̀ бы́ти, ѕловѣ́рному
раз̾смотре́нію, но ника́кѡ ѕлодѣ́лію
єгѡ̀ приста̀. Бы́вшу же собо́ру в̾ халки­
до́нѣ, того̀ самого̀ діоско́ра низложѝ
бл҃же́нный, и и́мя и́же во ст҃ы́хъ флавіа́на,

и́же діоско́ромъ разбо́йнически во єфе́сѣ
на вторѣ́мъ собо́рѣ, не пра́ведною сме́ртію
ѿ єрети́къ убіе́ну, того̀ в̾ пи́сменыхъ
учинѝ. и чс̃тно́му єгѡ̀ пренести́ся со­
творѝ тѣ́лу, и во апс̃льстѣй цр҃кви поло­
жи́ти. и посла́ньми печа́тными ко вся́кимъ
мѣстѡ́мъ, єпкс̃пѡмъ посла́въ, право­
сла́вную вѣ́ру потвержа́я, и повелѣва́я
и́мъ проклина́ти нача́лники єресє́мъ, не­
сто́рія, и єѵ̾тихі́я, и діоско́ра, и всѣ́хъ
и́же ѕлонра́віемъ на бжс̃твеное єстество̀
ху́лящихъ. се́й у́бѡ та́кѡ воспрія́­
това, и учинѝ ст҃а́го флавіа́на. и за
ѻ́смь лѣ́тъ цр҃квь правосла́внѣ упасы́й,
взы̑де ко́ гдс̃у. насто́лника по себѣ̀ ѡста́­
вль ст҃а́го гена́дія;

Вто́йже де́нь сло́во ѡ покая́ніи.

Не срамля́йся бра́те исповѣ́дати грѣхѡ́въ
твои́хъ, ни бе́з̾страха бу́ди прилага́я грѣхѝ
на грѣхѝ. нерцѝ щедрѡ́ты
вели́ки єгѡ̀, и мнѡ́жество грѣхо́въ
и́хъ ѡчи́ститъ. и не ѿлага́й де́нь
за́ день, но ѡбрати́ся къ бг҃у, млс̃ть бо
унегѡ̀ и гнѣ́въ є́сть. покая́ніа бо ѡжи­
да́я, пе́рвое, бл҃готвори́тъ и бл҃годѣ́етъ
{#л. х҃}

ища̀ воз̾враще́ніа, внеза́пу же на́йдетъ на тя̀
стра́хъ гдс̃нь, и во́ время ѿмще́ніа поги́бне­
ши. согрѣши́лъли єсѝ, не приложѝ єщѐ,
но ѡпе́рвыхъ твои́хъ помоли́вся ѡчи́стиши­
ся. гл҃етъ бо иса́ія, пріидѣ́те возра́дуемъ­
ся гдс̃ви бг҃у на́шему, и исцѣли́тъ ны у­
я́звеныя грѣхо́мъ. из̾врачю́етны и з̾дра́­
вы сотвори́тъ подвою̀ дні́ю, и в̾ тре́тіи во­
ста́витъ, и ѡживе́мъ сни́мъ. и увѣ́мы
гл҃ющаго, пріидѣ́те бл҃гослове́ніи ко мнѣ̀ всѝ
тружда́ющіися и ѡбремене́ніи, и а́зъ поко́ю
вы̀. небо̀ тре́буютъ з̾дра́віи врача̀, но
боля́щіи. не пріидо́хъ бо пра́ведных̃ дѣ́ля,
но грѣ́шныхъ на покая́ніе призва́ти. вни­
ма́й же са́мъ себѣ̀ ѡ согрѣше́ніихъ свои́хъ,
и пока́явся за́повѣдь пріи́мъ, да сохранѝ­
ши. а́ще и вели́кѡ и лю́тѡ согрѣше́ніе,
да ѡчи́стится покая́ніемъ.

Вто́йже де́нь сло́во иса́іи мни́ха ѡбез̃зло́біи
є́же непомина́ти зла̀.

По́мните бра́тіе єѵг̃ли́ста гл҃юща. речѐ
гдс̃ь, а́ще не ѡбрати́теся и не бу́дете я́кѡ
дѣти, не имате вни́ти въ црс̃тво нбс̃ное.
и па́ки речѐ, бу́дите я́кѡ новорожде́­
ніи млд̃нцы, слове́снагѡ млека̀ жела́юще,

неле́стнагѡ, я́кѡ да в̾то́мъ живе́мъ. ко́е
же дѣ́ло є́сть дѣ́тищу; дѣ́тище бо речѐ
біе́мо пла́четъ, и па́ки с̾ ра́дующимися ра́ду­
ется. а́ще ли досажде́ніе пріи́метъ, не
гнѣ́вается. сла́вимо, не возно́сится.
а́щели нѣ́цыи ино́го почту́тъ, ѡ то́мъ
не зави́дитъ. а́ще что̀ у негѡ̀ во́змутъ,
ѡ то́мъ не смуща́ется. а́ще ли ѡста́вятъ
єму̀ роди́тели наслѣ́діе, и не́йдетъ ѡ то́мъ
на су́дъ ни свари́тся ниски́мъ, ни вознена­
ви́дитъ вс́якого человѣ́ка. а́ще кто̀
ѡсужа́етъ, не скорби́тъ. а́ще ли богатѣ́­
етъ, высо́кихъ не мы́слитъ. а́ще ли ви́­
дитъ жену̀ красну̀ доброли́чну, не по­
хо́щетъ єя̀ ни попече́нія твори́тъ. ни єди́­
наго раздража́етъ, ни єди́ному льсти́тъ,
ни руга́ется ѻ́бразу бли́жнягѡ. вражды̀
не и́мать ни ски́мъ, ни ѡсужа́етъ ни єди́­
наго. не и́мать ума̀ ѡ собра́ніи бога́ть­
ства, нилю́битъ владѣ́ти. а́ще совлеку́тъ,
то не скорби́тъ ни держи́тъ своея̀ во́ли.
не бои́тся ча́ди, ни бои́тся ра́ти. а́ще
бу́детъ гоне́ніе, не смяте́тся. си́це
речѐ влд̃ка гдс̃ь на́шъ іс҃ъ хрс̃то́съ. тѣ́мъ­
же бра́тіе разумѣ́ємъ, и со извѣ́стіемъ
{#л. ха҃}

въ стра́сѣ бж҃іи пребу́демъ, кромѣ̀ вся́кіа
ѕло́бы, попече́мся ѡ свое́мъ ко́ждо сп҃се́­
ніи, и дру́гъ дру̑га бо́льша себѐ творя́­
ще. А́ще кто̀ на́съ ѡпеча́литъ, илѝ
брани́тъ, илѝ досади́тъ, не того̀ вознена­
ви́димъ, но діа́вола, и́же не почива́етъ
при́снѡ хотя̀ ны̀ ѿ бг҃а ѿлучи́ти. пребы­
ва́яи в̾ любвѝ, в̾ бѕ҃ѣ пребыва́етъ, и бг҃ъ
в̾не́мъ. да кто̀ не убои́тся слы́шаніа;
кто̀ у́бѡ му́дръ и без̾труда̀ свою̀ ду́шю
хотя̀ спастѝ; но вся́ку ѕло́бу и вся́ку не́на­
висть и́же на бли́жняго не и́мать въ срд̃ци
свое́мъ, да не са́мъ сегѡ̀ ра́ди изве́рженъ
бу́детъ из̾ црс̃твіа бж҃ія. бу́дите же тво­
рцы̀ словесѝ бж҃ію, а не то́чію слы́шателіе,
ча́юще прія́ти да́ръ ст҃а́гѡ дх҃а, єгда̀
пріи́детъ и научи́тъ ны бг҃о угодно жи́ти,
и да́стъ ны во вражды̀ мѣ́стѡ любо́вь.
за не́нависть и за я́рость, долготерпѣ́­
ніе. за земна́я, нбс̃ная лю́бя­
щимъ єго̀. єму́ же сла́ва,
ны́нѣ и при́снѡ и во́ вѣки
вѣкѡ́мъ
;

<<--- 07jul/04.htm>>>

Мцс̃а тогѡ́ же, въ д҃ дн҃ь, и́же во ст҃ы́хъ
ѻц҃а̀ на́шегѡ андре́я архієпкс̃па кри́тскагѡ,
бл҃гословѝ ѻ́ч҃е.

Се́й роди́ся ѿ бг҃олюби́ву роди́телю, гра́да
дама́ска. изъ учи́въ ме́ньшая пи́сме­
на, и къ грамматикі́йскому худо́жеству
в̾да́въ себѐ. четы́ренадесятимъ лѣ́­
тѡмъ во́зраста своегѡ̀ сы́й, в̾мѣне́нъ
бы́сть, въ сщ҃е́нническій приче́тъ, ѳе­
о́дѡромъ патріа́рхомъ ст҃а́гѡ гра́да,
инота́ріи назна́менанъ. и бя̑ше всѣ́мъ,
я́кѡ и вся́чески. Ст҃о́му же и вселе́нъ­
скому шесто́му собѡ́ру, со́брану бы́вшу
в̾ констянти́нѣ гра́дѣ, по́сланъ бы́сть
се́й патріа́рхомъ на собѡ́ръ. и до́брыя ра́­
ди добродѣ́тели єгѡ̀ и ра́зума, поста́­
вленъ бы́сть дія́конъ вели́кія цр҃кве.
и пома́лѣ си́рымъ пита́тель. та́же архи­
єпкс̃пъ кри́тскій. и в̾ нѣ́коемъ ѻ́стро­
вѣ бы́въ нарица́емый єри́съ, бли́зъ ми­
тили́на, та́мѡ житіѐ ѡста́ви. пре­
мнѡ́гая же с̾писа́нія цр҃кви ѡста́вль, и
того̀ самого̀ вели́каго кано́на, на пѣ́ніе
и по́льзу мно́гихъ и бг҃олюбе́зныхъ дш҃ъ
{#л. хв҃}

В то́й же дн҃ь ст҃а́гѡ сщ҃енному́ченика ѳе­
о́дѡра єпкс̃па кѷринѣ́йскагѡ.

Се́й бя̑ше при діоклитіа́нѣ царѣ̀, ѿ́ гра­
да ки́ра и́же при ливі́и, ѿнего́ же сѵ́­
мѡнъ кирине́йскій. Бы́сть же добро­
пи́сецъ вельмѝ, с̾верше́нѣ худо́жеству
таково́му извы́къ. и́же и предадѐ ст҃ы́й
цр҃квамъ кни́ги мно́ги свое́ю руко́ю на­
писа́въ. сегѡ̀ ра́ди свои́мъ при́снымъ
сы́номъ ле́ѡмъ ѡклевета́нъ бы́въ, игѣ́­
мону дивліа́ну, я́кѡ кни́ги имѣ́я,
и мнѡ́ги ѿвраща́єтъ ѿ слу́жбы богѡ́въ
къ хрс̃то́вѣ вѣ́рѣ. Приведе́нъ у́бѡ
бы́сть къ игѣ́мону, послѣ́дъствующимъ
єму̀ мнѡ́гимъ христіа́нѡмъ. сни́ми
же бя̑ше и ст҃а́я лукі́а, и іаро́я. по­
проси́ша же у ст҃а́гѡ ѳео́дѡра кни́жія,
и не подадѐ и́хъ, нижѐ покори́ся ѿвре­
щи́ся хрс̃та̀, біе́нъ бы́сть па́лицами
ѻловя́ными вельмѝ ѕѣлѡ̀. Та́же по­
токъ тре́бный разврати́въ. повѣ́шенъ
бы́въ на́ древѣ, и стро́ганъ по всему̀
тѣ́лу, и ѻ́цтомъ и со́лію, и ѻ́стры­
ми клепа́ми по ра́нахъ тро́мъ. та́же
бри́твою и язы́къ єму̀ ѿрѣ́заша.

и в̾ темни́цу веде́нъ. пріє́мъ ѿ прпд̃бныхъ
жє́нъ ѿрѣ́заный сво́й язы́къ, положѝ
єго̀ на свои́хъ пе́рсехъ, идѣ́же го́лубь
бя̑ше ви́димь прикаса́яся ст҃о́му, я́кѡ
ѿ око́нца прилѣта́я. такова́я ви́дѣвъ
и́долослуже́бникъ лукі́й вѣ́рова хрс̃то́ви.
ст҃ы́й же здра́въ бы́въ. и ма́лѡ нѣ́что
пожи́въ испустѝ дх҃ъ, ку́пнѡ с̾ го́лубемъ
ѿ своєя̀ хра́мины исше́дъ. увѣ́дѣвъ же
игѣ́монъ, я́кѡ лукі́й бы́сть хрс̃тія́нинъ,
повелѣ̀ поби́ти ст҃у́ю лѷкі́ю и іаро́ю и
кѷпри́ллу. и єли́цы прія́шя ѿ ст҃а́гѡ
ѳео́дѡра печа́ть кр҃ще́нія. Посе́мъ
крс̃ти́ся лукі́й, претворѝ дигнія́на игѣ́­
мона вѣ́ровати во хрс̃та̀. и́же и ѿплы́­
вше ку́пнѡ ѿ кри́та въ кѵ́пръ ко ино́му
игѣ́мону, му́чащему нарица́ющихъ
хрс̃та̀. и утаи́вся лукі́й ѿ дигні́я,
предадѐ себѐ мучи́телємъ. и ше́дъ разо­
рити тре́бы, и ѿсѣко́ша мече́мъ
главу̀ єму̀. и́же и дигнія́номъ
взя́тъ бы́сть, и гро́бу пре́данъ.
Соверша́єтъ же ся собѡ́ръ и́хъ въ муче́ніи
ст҃а́гѡ ѳео́дѡра, и́же въ пергі́и.
Кѷпри́лла же му́ченица ѿ тогѡ́ же гра́да
{#л. хг҃}

ст҃а́гѡ ѳео́дѡра бя̑ше. и́же и с̾му́­
жемъ пожи́вши до двою̀ лѣ́ту. и по
сме́рти му́жа своегѡ̀ пребы́сть в̾дови́­
ца, два́десять ѻ́смь, лѣ́тъ. и́же и уми­
ли́вшися роди́телемь свои́мь, и́де къ
ст҃ому ѳео́дѡру єпкс̃пу, затворе́ну
єму̀ су́щу въ темни́цѣ, хрс̃то́ва ра́ди
исповѣ́данія, цѣлбы̀ ра́ди. боля́ше
бо вельмѝ главо́ю, и́же исцѣлѣ́­
вши служа́ше єму̀ съ на рече́нными жена́­
ми, лукі́єю и іаро́єю. по сконча́ніи
же ст҃а́гѡ ѳео́дѡра, ѡ клевета́на
бы́сть къ игѣ́мону, и пред̾ста́вши єму̀
исповѣ́да хрс̃та̀, и не поко́ршися пожре́ти
и́долѡмъ, ѻба́че ре́кши, нѣ́сть сія̀
во́лная же́ртва. и сожго́ша є́й ру́ку
слуга́ми держи́ма. посе́мъ
повѣ́шена на́древѣ, и стро́га­
на. и теча́ше ѿ ра́ны
кро́вь, а ѿ сосе́цъ млеко̀.
и та́кѡ предадѐ бг҃у
дх҃ъ сво́й;

Вто́й же дн҃ь стра́сть ст҃у́ю му́ченику
ѳеѻдо́та и ѳеѻдо́тіи.

Ст҃а́я му́ченика хрс̃то́ва ѳео́дѡтъ, и
ѳеодѡ́тіа, хрс̃то́ва ра́ди исповѣ́данія
я́та бы́ста ѿ нечести́вагѡ царя̀ троя́­
на, и пону́жена бы́ста ѿврещи́ся и́сти­
ннаго бг҃а и пожре́ти и́долѡмъ, и не
покори́стася, и разли́чнѡ му́чена бы́ста.
и затворе́на бы́ста в̾ темни́цѣ, в̾ не́й
же затворе́нъ бы́сть му́ченикъ хрс̃то́въ
ѵакі́нѳъ. и бы́ста уче́на тѣ́мъ,
и на хрс̃то́ву вѣ́ру утвержа́ема. и во­
звѣще́на бы́ста ѿ темни́чныхъ стра̑жъ
къ царе́ви троя́ну. По сконча́ніи же
ст҃а́гѡ ѵакі́нѳа, из̾ веде́на бы́ста исте­
мни́цы и предъста́ста єму̀, и па́ки
пону́жена бы́ста скве́рная я́сти. ѻна́
же ѡбличи́ста скве́рную ле́сть и́дольскую,
тогда̀ повѣ́шена бы́ста и свѣща́ми подо­
ж̾же́на. и с̾ дре́ва сня̑та бы́ста, ме́чную
прія́ста кончи́ну. По сконча́ніи же при­
я́ста живо́тъ и чс̃тны́й поко́й. чс̃тны́я
же и́хъ мо́щи положе́ни бы́ша на мѣ́стѣ
идѣ́же му́чена бы́ста;
{#л. фч҃ѕ}

Вто́йже де́нь преподо́бныя ма́тере на́шея
ма́рѳы, ма́тере ст҃а́гѡ сѷмеѡ́на дивно­
го́рца.

Та̀ вся́кія добродѣ́тели ѻ́бразъ преходя́­
щи поще́ніемъ, и къ тре́бующимъ у­
строе́ніемъ и ми́лостынею, є́юже и всѝ
бг҃ови угожа́ютъ. тѣ́мъ и вели́ку
вѣ́ру иму́щи к̾ бж҃іей мт҃ри пре́жде исхо́­
да жите́йскагѡ щади́мыхъ ра́ди вѣ́чныхъ
бла̑гъ ѡбѣща́нія. ѿнея́ же навы́че до­
бродѣ́тели, и ѿ сю́ду преста́вльшися.
при сѣдя́щимъ же у ст҃а́гѡ тѣ́ла єя̀, я́вль­
шися ра́дости испо́лнена, и речѐ, бл҃го­
да́ть прія́хъ ѿ бг҃а вели́ку, и во́ свѣтѣ
и ра́дости є́смь вели́цѣ и неизглаго́ланнѣй
су́щи. помы́слиша же пребыва́ніе имѣ́­
ти є́й, и дерзнове́ніе сн҃а ра́ди. и сія̀
ѿкрове́ніе явѝ, я́кѡ не сн҃а своегѡ̀ ра́ди
просла́вися, но я́кѡ гдс̃а ра́ди терпѣ́вши,
и по путѝ єгѡ̀ не воз̾бра́ннѡ ходи́вши.
и гдс̃а на́шегѡ іс҃а хрс̃та̀ ро́ждьшюю возлю­
би́вши ѿ всегѡ̀ срд̃ца, и тогѡ̀ ра́ди воз̾­
ведѐ ю̀ ѿ́ рова страсте́й, и ѿ бре́нія ти­
мѣ́нна жите́йскихъ сквє́рнъ и всегѡ̀ сму­
ще́нія;

Вто́йже де́нь сло́во іѡа́нна златоу́ста
я́кѡ не подоба́етъ ѕла̀ за ѕло̀ воздая́ти
ни враждова́ти.

Научи́ся бра́те блюстѝ са́мъ себѐ, и чю­
жа́я ѕла́я а́ки своя̀ внима́й. паде́нію
ино́гѡ не смѣ́йся, но пода́й ру́ку ле­
жа́щему до́лѣ. и єгда̀ у́зриши врага̀
твоегѡ̀ в̾ руку̀ твое́ю, не му́чи єго̀,
но па́че поми́луй. тогда́ бо ти подоба́етъ
пощади́ти врага̀ своего̀, єгда̀ єму̀ гдс̃нъ
бу́деши. поми́ловавъ бо, и са́мъ ѿ бг҃а
ѡбря́щеши ми́лость. А́ще ли и ты̀ ко­
гда̀ в̾паде́ши в̾нѣ́кую лю́тую напа́сть,
с̾ вели́кимъ дерзнове́ніемъ, и самъ испро́­
сиши ѿ бг҃а ѿда́ніе, па́че же и млс̃ть
ѿнего̀ получи́ши. єму́ же сла́ва,
нн҃ѣ и прс̃нѡ и во́ вѣки
вѣкѡ́мъ
;
{#л. хе҃}

<<--- 07jul/05.htm>>>

Мцс̃а того́же, въ е҃ де́нь, па́мять пре­
подо́бнагѡ ѻц҃а̀ на́шегѡ аѳана́сіа аѳѡ́­
нскагѡ, бл҃гословѝ ѻ́ч҃е.

Сего̀ из̾несѐ вели́кій гра́дъ трапе́зо́нтъ.
возрасти́ же слове́снѣ византі́я. ки́­
мина же, та́кѡ глаго́лемое мѣ́сто,
и аѳѡ́нъ плодоноси́ста бг҃ови. роди́те­
ля же сегѡ̀ и та̀ ѿ рече́ннагѡ гра́да,
ѻба́че ѻ́въ у́бѡ ѿ антіохі́и, ѻ́ва же
ѿ колхи́да ро́да влеча́стася. и́же и бл҃го­
ро́дна су̑ща и бога́та, не нета́ко же и
нра́вомъ бы́вша. ѻте́цъ же пре́жде да́­
же роди́тися сему̀, житіѐ ѡста́ви. ма́­
ти же єго̀ роди́вши, и авра́мія єго̀
наречѐ, и та̀ к̾му́жу ѿи́де. И нѣ́кая
ѿ бл҃горо́дныхъ чернори́зица воспрія́тъ
ѝ воспита̀. Се́й же не имя́ше ѻбы́чай
не укра́шенъ же и без̾чи́ненъ, но во
всѣ́хъ пока́зовашеся разу́менъ. нѣ́ко­
гда же восхи́щъше єго̀ с̾ве́рстници єгѡ̀
в̾ нѣ́кую пеще́ру, и дѣ́яху, и не поста­
вля́ху сего̀ цр҃я̀, илѝ воєво́ду, илѝ
жениха̀, но игу́мена. Єлма́ же воспи­
та́вшая сего̀ въ мл҃твахъ и постѣ̀ пребы­
ва́ше, и то́й ѡста́вль дѣ́т̾ская вся̀,

бж҃іи стра́хъ возлюбѝ, и а́біе грамматикі́и
в̾ науче́ніе пре́данъ. и кни́жнагѡ ра́ди
чте́нія {*уч́е} чю́денъ бя́ше, уча́щемуже и и́же
сни́мъ уча́щимся. цр҃ьствующу бо тогда̀
рома́ну. послу́чаю же по́сланъ бы́сть ѿ
тогѡ̀ ка́женикъ нѣ́кто поби́рчіи торговѡ́мъ
в̾ трапе́зо́нтъ, и́же о́трока уви́дѣвъ,
ѕѣлѡ̀ и возлюбѝ, и єдинотрапе́зника
себѣ̀ сотворѝ. Єлма́же и къ царю̀ гра́ду
возврати́ся, о́трока с̾ собо́ю взя́тъ.
и та́мѡ єди́ному ѿ учт҃ль разу́мну и жи­
тіе́мъ изря́дну, аѳана́сіи и́менемъ.
ѻ́трока, и па́ки къ пе́рвымъ въ науче́ніе
ѿдадѐ. се́йже не ма́лѡ ѡ уче́ніи душе́ю
боля̀, ни ѡ добродѣ́тели лѣня́ся.
и та́мѡ нѣ́кимъ ѿ воєвѡ́дъ, и́ме­
немъ зефиназе́ръ, позна́нъ, и́же и
сро́дницу єгѡ̀ уневѣ́стившу сы́ну сво­
ему̀, и у себѐ пребыва́ти тому̀ пове­
лѣ. Се́й же добродѣ́телное житіѐ
снабдѣ̀, я́кѡ и печа́ловати тѣ́мъ,
занѐ не ядя́ше сни́ми на трапе́зѣ,
и ѿ сла́дъкихъ браше́нъ ничто́ же въку­
ша́я. а́ще ли же, но не варе́­
нымъ ѕе́ліємъ исполня́ше утѣше́ніе.
{#л. хѕ҃}

и въ принужде́ніе сн҃а, лоха́ню воды̀ на­
полня́я, погружда́я своѐ лицѐ. и та́кѡ
вся́чески му́ча себѐ. и добродѣ́телнагѡ
ра́ди єгѡ̀ житія̀, ѕѣлѡ̀ возлюби́ша
єго̀ уча́щіися сни́мъ, я́кѡ и царю̀
возвѣсти́ша ѡне́мъ, и ѡ ра́зумѣ єгѡ̀.
самоде́ржецъ же учи́теля єго̀ поставля́­
етъ. во тщету́же сіѐ въмѣнѝ учи́­
тель єгѡ̀. авра́мій же не могі́й терпѣ́­
ти є́же печа́лну бы́ти учи́телю єгѡ̀,
с̾ше́дъ у́бѡ ѿ учи́тельскагѡ прс̃то́ла,
и вся̀ мирска́я ѡста́вль, живя̀ бг҃ови.
Воєво́даже ѻ́нъ єге́йскія пучи́ны воєво́дь­
ство приє́мъ, и за мно́гую любо́вь сего̀
съ собо́ю взя́тъ и во ави́ду доплы́вше,
и устреми́ша ся в̾ лиме́нь, и узрѣ́вшу
авра́мію аѳѡ́нъ, и мы́слящу всели́тися
вне́мъ. и воз̾вра́щ̾шеся, ца́рь гра́дъ
достиго́шя. и по бж҃ію стро́ю, михаи́лу
малеи́ну та́мѡ прише́дшу ѿ ки́менскагѡ
монасты́ря. авра́міи же слы́шавъ ѡ не́мъ
я́кѡ у́бѡ чю́денъ му́жь и вели́къ жи­
тиємъ, и́де к̾ нему̀, и бесѣ́дѣ вни­
ма́я єгѡ̀. михаи́лъ же прозря̀ и я́кѡ
хо́щетъ бы́ти сосу́дъ ст҃о́му дх҃у.

и а́біе пріи́де к̾ вели́кому восто́чный воєво́­
да ники́форъ, анеѱе́й єгѡ̀, и́же и
цр҃ь бы́сть по́слѣжде. авра́міи же я́кѡ
ви́дѣ сего̀, ѿлучи́тися хотя̀. ста́­
рецъ же не посла́би єму̀. ма́ло же дні́й
пожда́въ, поклоне́ніе сотво́рь, и ѿи́де
ѿнегѡ̀. до́брый же ники́форъ вопроша́я
стры́я своего̀ речѐ, кто̀ є́сть се́й,
и чесѡ̀ ра́ди бы́сть у тебѐ. и увѣ́­
дѣвъ ѿ вели́кагѡ вся̀ авра́міева. Но
у́бѡ бж҃е́ственый михаи́лъ, ѿи́де
къ ки́меню. та́ко же и авра́міи ѿи́де
к̾нему̀. и ѡблечѐ и михаи́лъ во и́но­
ческій ѻ́бразъ, и аѳана́сія єго̀ имено­
ва̀. и за четы́ре у́бѡ лѣ́та, вся́къ
ви́дъ по́двига испра́ви. и въ безмо́лвія
три́знище ѿхо́дитъ, по повелѣ́нію ѻц҃а.
воєво́да же ники́форъ в̾ ки́менскій мнс̃ты́рь
прише́дъ, и к̾ стры́еви своему̀ в̾ше́дъ,
и бесѣ́дова сни́мъ. и ѡ аѳана́сіи воспо­
мяну́въ, и жела́ше ви́дѣти того̀.
ту́ же прише́дъ и патрикі́й ле́въ, бра́тъ ни­
ки́форовъ, и ку́пнѡ по идо́ста ви́дѣти
єго̀. аѳана́сіи же изшед̃ бесѣ́дова к̾ни́мъ.
{#л. хз҃}

и ѿ сла́дости бо ѻ́ногѡ словє́съ, єдва̀
ѿто́ргнутися си́ма бесѣ́ды єгѡ̀. и во­
з̾вра́щьшеся, бл҃года́рьствиша ста́рца,
є́же и́маши ре́кше сокро́вище. михаи́лу
же за поручѝ и́ма повину́тися аѳана́сію
я́кѡ ѻц҃у, я́кѡ ку́пнѡ сни́ма су́щу.
ники́форъ же исповѣ́да єму̀ бг҃оуго́дный
сво́й по́мыслъ, я́кѡ жела́етъ ми дш҃а
ѿ лучи́тися ми́ра, и мно́гу любо́вь по­
каза̀ ко аѳана́сію. Єльма́ же бл҃же́нный
михаи́лъ приходя́щыя к̾нему̀ моли́твы
ра́ди, ѿ сыла́ше ко аѳана́сію, и ѡ се́мъ
стужи́въ сѝ, єще́ же и игу́менъство
в̾ вѣ́рити хотя̀, а́біе ко аѳѡ́ну ѿ хо́­
дитъ. и та́мѡ жесточа́йшее пребыва́­
ніе ѻц҃ъ из̾слѣ́дивъ, бл҃года́рствивъ
бг҃а, и веселя́ся дш҃е́ю. узрѣ́ же ми­
ну́вша аѳѡ́нъ маги́стра льва̀, бра́та
ники́форова, и усумнѣ́ся, да не по­
зна́нъ бу́детъ тѣ̑мь, и варна́ву себѐ име­
нова̀. и уклони́ся прише́дъ во ѻби́тель
глаго́лемую гре́чески тузи́гу, и ту̀ ѡбрѣ́­
те внѣ̀ ста́рца безмо́лъвствуюша про́ста
и не хи́тра, и умолѝ ѝ пребы́ти у негѡ̀,

и повину́ся вовсе́мъ во́ли єгѡ̀. та́же
умоля́етъ єго̀ и кни́гамъ ѿнегѡ̀ на учи́­
тися, творя̀ себѐ я́ко бы ничто́же вѣ́ду­
ща, и писа́ніа ѿню́дъ не разумѣ́юща.
Ники́форъ же нача́ло пріє́мъ всея̀ восто́чныя
страны̀. и поне́же увѣ́дѣ бѣжа́ніе єгѡ̀
и преселе́ніе, стужи́въ сѝ. и писа́нія
моле́бна к̾ селу́ня судя́щему посла́въ,
да испыта́етъ ѡ и́ноцѣ аѳана́сіи, и возвѣ­
сти́тъ єму̀. Се́йже на́скорѣ ст҃у́ю го́ру
дости́гъ, и вопроша́я ѿпро́та слы̑ша, я́кѡ
тако́въ якова̀ че́сть твоя̀ и́щетъ му́жа,
в̾ го́ру сію̀ нѣ́сть прише́лъ. ѻба́че невѣ́мъ,
поне́же пріе́млемъ вре́мя собо́ру, и се́й со инѣ́­
ми вся́кѡ пріи́детъ. и собра́шася всѝ ѿвсю́­
ду оц҃и. посредѣ́же си́хъ и иско́мый позна­
ва́шеся про́томъ. та́же приспѣ̀ и чте́нію
вре́мя, и аѳана́сію честѝ повелѣва́ется.
че́тъшу же єму̀ дотоли́ка, я́кѡ удиви́ти
всѣ́хъ слы́шащыхъ, я́кѡ и уча́щему
єго̀ ста́рцу в̾ вели́къ сра́мъ пріитѝ.
но ѻба́че бг҃а бл҃года́рствивъ, я́кѡ дости́же
бы́ти учи́тель таково́му учи́телю пре­
му́дрости. Єльма́же аѳана́сіи позна́нъ
бы́сть, повѣ́да про́тъ вся̀ я́же ѡне́мъ,
{#л. хи҃}

и совѣщава́етъ єму̀ безмо́лвъствовати.
Маги́стръ же у́бѡ ле́въ по побѣ́дѣ аѳѡ́на
дости́гъ, и аѳана́сіа ѡбрѣ́тъ, и вда̀
имѣ́ніа дово́лнѡ на созда́ніе цр҃кви. и та́кѡ
ѿи́де. Аѳана́сію же во вну́тренняя горы̀
ѿступи́вшу. Держа́вный же ники́форъ всегѡ̀
во́инъства ѻ́бласть пріи́мъ, и в̾ кри́тъ
по́сланъ бы́сть. и посла̀ нѣ́коего ѿ су́­
щихъ подни́мъ во аѳѡ́нъ, є́же посла́ти
кнему̀ аѳана́сіа. аѳана́сіи же кри̑та
достиза́етъ, и богослове́ніе в̾ ку́пѣ и
цѣлова́ніе да́руетъ позва́вшему єго̀. я́кѡ
у́бѡ тому̀ и въ спомяну́вшу дре́внія
к̾нему̀ обѣ́ты къ е́же бѣжа́ти мир̾ски́хъ.
и ни єди́на є́сть на́мъ речѐ препо́на,
то́чію є́же созда́ти жили́ща. дая́ше же
єму̀ и зла́то зи́ждемымъ на слу́жбу.
аѳана́сій же зл̑ата не взя̀, но безмо́лвіе
любя̀, и си́мъ да́вшаго не ма́лѡ ѡпеча́ли.
и та́кѡ ѿлучи́стася дру̑гъ ѿ́друга.
и па́ки ники́форъ посыла́етъ нѣ́коего ѿ подъ­
вла́стныхъ ко аѳана́сію, меѳо́діа и­
мену́ема, зла̑ты принося̑ща єму̀
ли́тры ше́сть, и зда́ніе нача́ти

аѳана́сійже ктому̀ непререкова̀, ѿ по́сла­
ннагѡ зла́то пріе́мъ, и воспріима́я є́же
ѡзда́ніи попече́ніе. и пе́рвое у́бѡ ве́щное
мѣ́сто, и чс̃тну́ю молча́лницу устро́ивъ
въ жили́ще ники́фору. и хра́мъ мл҃твы
ра́ди тому̀ созда̀ во́ имя предоте́чи.
Пото́мъ и цр҃ковь бцд̃ы воздви́же. та́же
пото́мъ и про́чая мнс̃трѝ созда̀. и ина́я
вся̀ до́брѣ уряди́въ, къ цр҃ю̀ восхо́­
дитъ. цр҃ьже прише́ствія ра́ди ст҃а́гѡ
возра́довася, и я́кѡ всѣ́хъ твои́хъ
скорбє́й и трудѡ́въ, а́зъ ре́къ по­
ви́ненъ, занѐ бж҃іи стра́хъ пре оби́­
дѣлъ, и и́же к̾нему̀ ѡбѣ́ты.
Посе́мъ ст҃ы́й во ст҃у́ю го́ру ѿхо́дитъ
и мно́га чюдеса̀ сотворѝ, и бѣсо́в̾скія
полкѝ раз̾гна̀. и поне́же бо я́коже вы̑ше
рече́но бы́сть ѡ ѻц҃ѣ, ну́жду имѣ́я
пора́венству и́нѡкъ устро́ити цр҃ко́вное
простра́ньство. Єльма́же єди́на кама́ра
не сконча́на бѣ̀ затвои́тися цр҃ко́внагѡ
ѻлтаря̀, готовля́шеся в̾зы́ти на дѣ́ло,
я́кѡ да посѣти́тъ сіѐ. и пе́рвіе у́бѡ сово­
купи́въ бра́тію всю̀, и поуче́ніе тѣ́мъ,
{#л. хѳ҃}

ѿ блаже́ннагѡ ѳео́дѡра студі́йскагѡ со­
творѝ. та́же и наказа́ніе приложѝ
сво́йствено, бра́тія моя̀ глаго́ля,
внима́йте себѣ̀. и ѡдѣ́явся ри́зою
и ма́нтіею, єще́же и въ сщ҃е́нный ку́­
коль бл҃же́ннагѡ оц҃а̀ своегѡ̀ михаи́ла
малеи́на. и въ ну́трь бы́въ клѣ́ти
своея̀, ипомоли́ся на мно́зѣ, и дру­
ги́хъ ше́сть бра́тѡвъ пои́мъ с̾ собо́ю,
на дѣ́ло в̾зы́де. в̾ку́пѣже у́бѡ внегда̀
тѣ́мъ в̾зы́ти, провали́ся а́біе, и
изведѐ всѣ́хъ. но у́бѡ пя̑ть на­
пра́снѡ душя̀ {*ду́шы} своя̀ бг҃ови преда́ша.
ѻц҃ъ же и єди́нъ зде́цъ даніи́лъ, жи́ви
с̾ ка́меніємъ ѡста́ша, я́кѡ у́бѡ и ѻц҃у
слы́шатися ѿвсѣ́хъ, да́же до трє́хъ
часѡ́въ илѝ мно́жае зову́щу, гдс̃и іс҃е
хрс̃тѐ помози́ ми. сла́ва тебѣ̀ бж҃е.
пли́щу же бы́въшу, и бра́тіямъ всѣ́мъ
ры́ющымъ прилу́чьшимися орга́ны изъ­
нося́щымъ ка́меніе и ва́ръ, ѡбрѣто́­
ша ѻц҃а̀ ужѐ ѡ́гдс̃ѣ сконча́въшася,
цѣ́лъ нѣ́какѡ и здра́въ. деснѣ́й у́бѡ
єгѡ̀ нозѣ̀ то́кмѡ разцѣпи́вшися.

си́цевый же коне́цъ не то́кмѡ в̾ поуче́ніи,
но и на пре́дь єди́ному ѿ учени́къ анто́нію
предъ речѐ въ предъ лежа́щемъ путѝ к̾ цр҃ю̀
гра́ду. и чю́до, я́кѡ и по тре́хъ дне́хъ
ѿ́тѣла ст҃а́гѡ исходи́ти кро́ви я́звена­
гѡ мѣ́ста. и пятѝ у́бѡ изне́сше тѣ­
леса̀ сокруше́на. и́нока же дани́ла уя́зве­
на не ху́дѣ и тогѡ̀, и́же бѣ̀ че́стенъ
и дх҃о́венъ я́кѡ и в̾ видѣ́ніи ѡ страстѝ
извѣ́тъ прии́мшу. зрѣ́хъ бо речѐ я́кѡ
нѣ́кій по́сланъ ѿ цр҃я̀ зва́ше ѻц҃а. и
изше́дъ съ шестію̀, вни́хъ же и а́зъ.
и в̾ни́де с̾ пятію̀, а́зъ же внѣ̀ ѡста́хъ,
и уми́лно зовя́хъ ѡ разлуче́ніи ѻц҃а.
и слы́шахъ ѿвну́трь нѣ́коего мѝ глаго́лю­
ща, в̾су́є рыда́еши человѣ́че, а́ще не
да́руетъ тѝ ѻц҃ъ; и сія̀ зидцу̀
ст҃а́гѡ же чюдеса̀ и по ѿше́ствіи єгѡ̀ ви́­
дѣти быва́ющя, ѡни́хъ же в̾ кра́тцѣ
рече́мъ. а́біе изы́ти ѿ ла́вры нѣ́кимъ,
и и́ноку анто́нію. и в̾ га́нской странѣ̀
сн҃у па́стыреву ѿ ку́чки пораже́ну. ѻц҃у
же ѻ́трока си́хъ призва́вшу, и любе́­
знѡ устранноприи́мовавшу. и єди́нъ
у́бѡ ѿ си́хъ сѷмеѡ́нъ нарица́емь,
{#л. хі҃}

убру́съ нѣ́какъ изне́съ, кро́вію ѻц҃а
ѡ мо́ченъ, и си́мъ ѻбяза̀ вы́ю ѻтроча́те,
и в̾ то́й ча́съ у́спе ѻтроча̀, и здра́во воста̀.
и и́нокъ нѣ́кій ѿ лю́тагѡ бѣ́са томи́мь, и
к̾ ра́цѣ прикосну́ся ѻц҃а, и а́біе исцѣлѣ̀.
и и́на мно́га в̾ сла́ву бж҃ію содѣ́яшася чюдє­
са̀ ѿ моще́й ст҃а́гѡ ѻц҃а;

Вто́й же де́нь сло́во іѡ҃а́нна златоу́стагѡ
ѡ єпи́скѡпѣхъ не пеку́щихся людмѝ,
ни уча́щихъ я̀ наспасе́ніе.

Єпкс̃пъ не творя́и по пече́нія владѣ́емыми,
ни пекі́йся ѡи́хъ спасе́ніи, нѣ́сть єму̀
извѣ́та пре́дъ бг҃омъ, ни избавле́нія
ѿ ѕѡ̑лъ. єли́кѡ бо на вы́шнюю вла́сть
в̾зы́ детъ єпи́скопство получи́въ, толи́кѡ
бо́лѣ испы́танъ бу́детъ словесѐ, не
уче́нія то́кмѡ, но и у́бѡгихъ засту­
пленія. я́коже бо гдс̃нъ да́въ сребро̀ рабѡ́мъ
ку́плю твори́ти, ѡвсе́мъ истяза́етъ
и́хъ; си́це и бг҃ъ уче́нія на́мъ поручи́лъ,
того̀ и взы́щетъ строе́нія и дѣ́ла.
єпкс̃пъ бо не иску́сенъ, па́губу твори́тъ
владѣ́емымъ. и и́же не смотря́я по вся̀
днѝ, ка́кѡ утѣша́ти скорбя́щихъ, и на­
сы́тити а́лчющыя и избавля́ти ѡбиди́мыя,

цр҃квь бж҃ію безропта́ніа сотвори́ти, у́же
нѣ́сть учи́тель, но мучи́тель. не на со­
бра́нія бо ни на гордѣ́ніе апс̃тльскій прс̃то́лъ
прія́хомъ. да немни́те єпкс̃пи я́кѡ напи́щю
и напитіѐ вла́сть пріе́мъше, всего́бо є́сть
тру́днѣе и́же душя̀ насѐ приводя̀ крѣпи́­
тися а́ки натру́дъ болѣ́зненъ приходи́ти.

Втѡ́йже де́нь сло́во іѡ҃а́нна златоу́стаго
ѡ жи́дѣхъ, ка́кѡ в̾ пусты́ни прогнѣ́ваша
бг҃а, да никто́же сія̀ слы́шавъ престу́питъ
за́повѣди бж҃ія.

Хо́щетели, да укажу̀ вам̃ ѿ писа́нія ѡ мно́­
зѣмъ нарѡ́дѣ,
изра́йлтескомъ. коли́ка
бла́га жидо́в̾скій нарѡ́дъ наслади́вся ѿ́ бг҃а,
невся́ли ви́димая тва́рь наслу́жбу гото­
вля́шеся и́мъ, чю́денъ бо ѻ́бразъ житіа̀
и́хъ, я́кѡ ни нато́ргъ хожда́ху ни купова́­
ху, а всего̀ наслажда́хуся. нира́ломъ бо
чертя́ху зе́млю, ни сѣ́мєнъ сѣ́яху, ни
дождя̀ тре́боваху, ни гумна̀ нижи́та вѣ́я­
ху, ни жернова́ми меля́ху, ни пе́щи сози­
даху, ни ѻгня̀ ни дро́въ в̾ хлѣви́ну но­
ша́ху, ни хлѣ́ба печа́ху, ни ри́зъ т̾ка́ху,
но всѐ и́мъ сло́вомъ бж҃іимъ бѣ̀, и гото́ву
имя́ху совсѣм̃ трапе́зу и ѡби́лну беструда̀.
{#л. ха҃і}

Та́ко бо и́хъ бг҃ъ ма́нною кормя́ше, и не
творя̑ше и́мъ труда̀. ри́зыже ни сапозѝ
не ветша́ху, ни дра́хуся в̾ ни́хъ, ни са́мое
то̀ єстество̀ тѣле́сное неду́га незна́яше.
и но́ги и́хъ невреди́шася, а толи́кѡ до́лгѡ
вре́мя ходя́щимъ. ѡ вра́чѣхже и ѡбы́ліих̃
не помина́ху. бѣ́ бо вся́къ неду́гъ ѿя́тъ
ѿни́хъ. изведе́ бо я̀ речѐ с̾ сребро́мъ и з̾ла́­
томъ, и небѣ̀ в̾ колѣ́нѣхъ и́хъ боля́и. но
єгда̀ єгѵ́петъ ѡста́виша, тогда̀ и труда̀
нечю́яху. зно́йже сл҃нчный главы̀ и́мъ не
ѡж̾жѐ, я́кѡ заступа́ше ѻ́блакъ всего̀ наро́­
да. в̾ нощи́же свѣ̑щь не тре́боваху, но бя́ше
и́мъ сто́лпъ ѻ́гненъ, без̾мѣ́ры точа̀ свѣ́тъ
и пу̑ть и́мъ показу́я, я́коже сѐ во́ждь
хи́трый вожда́ше и́хъ в̾ пусты́ни вели́цѣ.
и хожда́ху не то́кмѡ по землѝ, но и по́ морю
а́ки по́ суху, и я́кѡ по тве́рду ка́мени хожда́­
ху. єгда́же вразѝ и́хъ в̾лѣзо́ша в̾мо́ре,
и є́же твори́ти водѣ̀, то̀ творя́ше. о́нѣмъ
бы́сть мо́ре преше́ствіе, а супоста́тѡмъ
гро́бъ. о́нѣхъ до́брѣ преведѐ, а єгѵ́птяны
ѕлѣ̀ потопѝ, без̃смы́сленѣ су́щи водѣ̀,
а́ки смы́сленъ му̑жь, повелѣ́ніе показа̀.
ѻвогда̀ я́кѡ стражь, ѻвогда́же я́кѡ губи́тель,

во єди́нъ дн҃ь ѻ́бое проти́ву показа̀; что́
же и́мать кто̀ рещѝ, я́кѡ ка́мень рѣ́ки
испуща́я, и пти́цы а́ки ѻ́блаки зе́млю
покрыва́ху ѻ́нѣхъ. что́ же ѡ чюдесѣ́хъ
я́же во єгѵ́птѣ, и в̾ пусты́ни ѡ пресла́­
вныхъ дѣ́ланіихъ я́же бе́з̾ крове, я́кѡ
бо игра́юще проти́вныя побѣжда́ху своегѡ̀
хрс̃та̀ си́лою, без̾ ѻру́жія ѡдолѣ́ша.
и па́ки тру́бяще и пою́ще хананѣ́йскія
царѝ погуби́ша. имѣ́яху бо уче́ніе,
ане ѻру́жіе, и бѣ̀ ли́къ идѣ́же бра́нь бы­
ва́ше. вся́ же сѝ чюдеса̀ не тогѡ̀ ра́ди бы́­
ша, да потре́бу и́мъ испо́лнитъ бг҃ъ, и
ѡ то́мъ по хва́лится то́чію, но да уче́­
ніе мѡѷсе́ѡво събу́дется. и гла́си ѿ всю́­
ду и́мъ бя́ху проповѣ́дающе. се́ бо и мо́­
ре вопія́ше, ѻ́вы проводя̀ по́ суху,
ѻ́выже водо́ю потопля́я. и ни́ловы во́ды
се́й же гла́съ испуща́ху, на́ кровь вся̀ прелага́­
юще, мнѡ́жество жа̑бъ, пру̑гъ и гу́се­
ницъ и сѣ́ріи. и вся̀ сія̀ пресла́вная бж҃ія
чюдеса̀, в̾ кни́гъ мѣ́стѡ бы́сть и́мъ, ни­
коли́ же за глажа́ющеся, но по вся̀ днѝ но́ву
па́мять дѣ́юще. но ѻба́че потоли́цей блгд̃ти
и по вели́цѣхъ чюдесѣ́хъ, и по неизрече́ннѣй
{#л. хв҃і}

млс̃ти, и потоли́це мѡѷсе́ѡвѣ уче́ніи,
и повели́цѣхъ побѣ́дахъ, повели́цей тра­
пе́зѣ, и по ѡби́лномъ винопи́тіи, и по не­
изрече́ннѣй сла́вѣ, ю́же имѣ́юще па́че
вс̑ѣхъ человѣ́къ живу́щихъ на землѝ,
и зане́же не покори́ви бя́ху и не послушли́­
ви сотвори́ша теле́цъ, и воло́вѣ главѣ̀
служаху, бо́ги прося́ще сотвори́ти себѣ̀,
но́ву па́мять имѣ́ти хотя́ше, всѣ́хъ
ѿ́ бг҃а бл҃годѣя́ніи забы́вше, и ничто́ же
и́мъ успѣ̀ уче́ніе мѡѷсе́ѡво, самѣ́мъ
тѣ́мъ су́щемъ сла́бымъ. тѣ́мъже мо­
лю̀ вы̀ ча́да, не бу́демъ ѿ вѣ́ры сла́бы,
да не заблуди́вше ѡ путѝ пра́вагѡ въ ѕла́я
в̾паде́мъ.

Вто́йже дн҃ь сло́во іс҃а сира́хова.

Не належѝ имѣ́ніи свое́мъ, и не рцы̀ само­
дово́лнѡ ми є́сть. не послѣ́дуй дш҃ѝ свое́й
и крѣ́пости свое́й ходи́ти въ по́хотѣх̃ срд̃ца
твоегѡ̀. и не рцѝ кто́ мя премо́жетъ,
гдс̃ь бо м̾стя́и ѿм̾сти́тъ тѝ. не рцы̀ со­
грѣши́хъ и что́ ми бы́сть, гдс̃ь бо є́сть до­
лготерпѣли́въ. ѡ ѡчище́ніи бе́зъ страха не
бу́ди, прилага́ти грѣхѝ на грѣхѝ, и не
рцѝ щедро́та єгѡ̀ мно́га є́сть, мнѡ́жество

грѣ́хъ мои́хъ ѡчи́ститъ. млс̃ть бо и
гнѣ́въ унегѡ̀, и на грѣ́шницѣхъ бу́детъ
я́рость єгѡ̀. не ме́дли ѡбрати́тися
къ гдс̃у, и не ѿлага́й дн҃ь ѿ́ дне. внеза́пу
бо изы́йдетъ гнѣ́въ гдс̃нь, и во́ время
ме́сти поги́бнеши. не упова́й на имѣ́нія
не пра́ведна, ни что́ же бо по́льзуеши в̾ дн҃ь
на веде́нія. невѣ́й вся́цѣмъ вѣ́тромъ,
и неходѝ вся́цѣмъ путе́мъ неподо́бнымъ,
си́це грѣ́шникъ двоязы́ченъ. бу́ди
утверже́нъ в̾ ра́зумѣ свое́мъ, и єди́но
ти бу́ди сло́во твоѐ. бу́ди ско́ръ в̾ по­
слуша́ніи свое́мъ, и долготерпѣ́ніемъ
ѿвѣщава́й ѿвѣ́тъ. А́ще є́сть в̾ тебѣ̀
ра́зумъ ѿвѣща́й и́скренему, а́ще ли нѝ
то̀ бу́ди рука̀ твоя̀ на устѣ́хъ твои́хъ.
я́кѡ сла́ва и бесче́стіе в̾ бесѣ́дѣ, и язы́къ
человѣ́чь паде́ніе єму̀. Не словѝ шепо­
тни́къ, и язы́комъ свои́мъ не уловля́й.
ѡ та́ти бо сту́дъ є́сть, и зазо́ръ лу­
ка́въ ѡ двоязы́чнѣмъ. ѡ вели́цѣ
и ѡ ма́лѣ разумѣва́й. бг҃у на́­
шему сла́ва, нн҃ѣ и прс̃нѡ
и вѡ́вѣки вѣ­
ко́мъ
;
{#л. хг҃і}

<<--- 07jul/06.htm>>>

Мцс̃а тогѡ́ же, въ ѕ҃ дн҃ь, па́мять
прпд̃бнагѡ ѻц҃а на́шегѡ сісѡ́я вели́кагѡ,
бл҃гословѝ ѻ́ч҃е.

Сісѡ́й бл҃же́нный, и́з̾млада бг҃а возлю­
би́въ, и крс̃тъ єгѡ̀ взе́мъ, послѣ́дова
єму̀, и ѡполче́нія не ви́димыхъ вра́гъ
побѣди́въ. и ра́дуяся ѿлучи́ся къ по́­
стническимъ подвигѡ́мъ. смирено­
му́дренъ же вельмѝ ѕѣлѡ̀ бы́въ, и тогѡ̀
ра́ди, дадѐ єму̀ гдс̃ь бл҃года́ть ме́ртвыя
воскреша́ти, поне́же въ пло́ти сы́й а́гг҃ль­
ски поживѐ. сотвори́же мно́га зна́менія.
и мно́гими словесы̀ къ бра́тіи бесѣ́дова,
и по́льзова на успѣ́хъ и на бесконе́чный жи­
во́тъ. сего̀ гдс̃ь по зва̀, идѣ́же ст҃і́и
хра́ми и присносу́щная свѣ́тлость, и
ны́нѣ заны̀ грѣ́шныя мо́лится;

Вто́йже де́нь ст҃ы́я му́ченицы лукі́и
дв҃цы, и вика́ріи, и ри́ѯа, и инѣ́хъ де­
вятѝ му́ченикъ и́же в̾ ком̾па́ніи муче́­
ныхъ, и ту̀ сконча́вшихся.

Та̀ ст҃а́я мч҃нца лукі́а, бѣ̀ у́бѡ в̾ сикилі́и,
ѿ каппадокі́йскія страны̀. я́та же бы́вши
ви́ксомъ и вика́ріемъ, и пону́жена бы́сть
пожре́ти и́долѡмъ, и не покори́вшися,

восхотѣ̀ хрс̃то́ва раба̀ бы́ти. и умили́вся
вика́ріи пустѝ ю̀ и рабы́ни ея̀, и до́мъ
дадѐ є́й. и повелѣ̀ є́й мл҃тву мол̾ча́щи
дѣ́яти. и нѣ́когда иды́й на́ брань молѝ
ю̀ да помо́лится ѡ не́мъ к̾ бг҃у, и помо́лшися
є́й возврати́ся с̾ побѣ́дою. По два́десятиже
лѣ́тъ молѝ ст҃а́я лукі́а вика́рія, итѝ
хотя́щи в̾ кам̾пані́ю му́читися по хрс̃тѣ̀.
ѻ́нъже не восхотѣ̀ єю̀ єди́ноя пусти́ти,
но ѡста́вивъ свою̀ вла́сть и бога́тьство, же­
ну̀, и дѣ́ти, и пое́мши ю̀ и́де в̾ кампані́ю.
и я́ти бы̑ша ѿ су́щагѡ ту̀ игѣ́мона,
и усѣ́кнуша главу̀ ея̀. му́чениже бы̑ша
и ині́и сни́ми, анто́ній и лукія́нъ, иси́дѡръ
и діо́нъ, діо́ръ и куто́ніи, ароно́съ и капи́къ,
сату́ръ, и коне́цъ муче́нія прія́ша;

Вто́йже де́нь ст҃а́гѡ мч҃нка кои́нта.

Се́й роди́ся во ѳригі́и. научѝ себѐ бл҃го­
че́стію. прише́дъже в̾ неоли́ду, млс̃тыню
тре́бующимъ, и цѣлбу̀ стра́ждущимъ
лука́выми ду́хи подава́ше. ру́ѳуже игѣ́­
мону того̀ ну́дящу пожре́ти и́долѡмъ,
и́же и бѣ́сомъ нечи́стымъ я́тъ бы́сть,
и уврачева̀ єго̀ ст҃ы́й. ру́ѳъ же да́ры у́бѡ
и чес́ти пода́въ ст҃о́му, ѿпустѝ єго̀.
{#л. хд҃і}

и иды́й путе́мъ к̾ перга́му, я́тъ бы́сть
кѷве́йскими є́ллины, и́же и нача́ша того̀
му́чити. напра́снѡ тру́су бы́вшу,
падо́ша поземлѝ це́ркви и и́долы. и свя­
за́вше ст҃а́го, ѡста́вишя того̀ безму́ки
пребыва́ти. клеа́рже нѣ́кто прише́дъ ко́
граду, и є́мъ ст҃а́го, сокрушѝ єму̀
го́лени, но па́ки ѡздра́вѣвъ. и ѿто́лѣ
десятьлѣ́тъ пожи́въ, и мнѡ́гая чюдеса̀
сотвори́въ, ко́гдс̃у ѿи́де;

Втѡ́йже де́нь ст҃а́гѡ сщ҃е́нно мч҃нка иса́вра.
и и́же сни́мъ иноке́нтія філи́ка, єрмі́а
васи́лія и перги́на.

Ст҃ы́й са́връ и́же та́йнамъ хрс̃то́вым̃ діа́конъ
бѣ̀. и́же роди́шася во аѳи́нѣхъ, во вре­
мена̀ нумеріа́нова. во ста́вшеже ѿ оте́че­
ства, до идо́ша во аполоніа́дъскій гра́дъ.
и та́мѡ ѿкрове́ніемъ а́гг҃льскимъ пріидо́ша
в̾нѣ́корый вертеп̃, идѣ́же живя́ху філи́къ
и пергі́нъ и ієрмі́а, су̑ще хрс̃тія́не. и́же бл҃го­
чести́выми словесы̀ пита́еми, и са́вромъ
ст҃ы́мъ, пи́щю и́мъ тѣле́сную принося̀.
та́же пома́лѣ тѣ́шенми ст҃а́гѡ, стяжа́нія
своя̀ ни́щымъ разда́вше пребыва́ху сни́мъ.
сро́дницыже и́хъ превестѝ и́хъ хотя̀ во своя̀.

и ѿлучи́ти ѿ ст҃а́гѡ наче́нше, и не во­
змого́ша. ѡклевета́ша и́хъ препонті́й­
скому єпа́рху, и́же и я́атъ и́хъ, и ѿ хрс̃та̀
ѿста́вити не возмо́гъ, мече́мъ главы̀
и́хъ повелѣ̀ ѿсѣщѝ. Са́връ же дія́­
конъ, и и́же сни́мъ по́слани бы́ша ѿ
єпа́рха ко аполо́нію сы́ну єгѡ̀, идѣ́же
ѻгне́мъ и водо́ю искуси́ми, и ѿ си́хъ же
пресла́внѡ спасе́ни бы́вше, и мно́гія при­
ведо́ша къ хрс̃то́вѣ вѣ́рѣ. вни́хъ же
ру́фъ, и руфи́нъ, боля̑ре су̑ще гра́да
аполоні́йскагѡ. коне́чное ѡсуже́ніе пріе́­
мше. и на мно́ѕѣ помо́льшеся, пре­
кло́ньше главы̀, преда́ша дш҃я̀ своя̀ гдс̃ви;

Вто́йже дн҃ь сло́во ѿ патерика̀, ѡ па́влѣ
простѣ́мъ, и ѡ аммѡ́ніи, и ѡ ѻрсисі́и.

Речѐ ста́рецъ, слы́шахом̃ ѡ нѣ́коихъ ст҃ы́хъ
хрс̃та̀ иму́щихъ в̾ себѣ̀, гл҃ющихъ ѡ сово
купле́ніи четы́рєхъ ста́рєцъ, и́же поручи́­
шася дру́гъ съ дру́гомъ, да єдиноду́шнѡ,
и єди́ному́дренѡ жи́вше в̾ вѣ́цѣ се́мъ;
влд̃чнему гла́су вѣ́ровавше гл҃ющему, а́ще
два̀ ѿ ва́съ и́мене моегѡ̀ ра́ди, на землѝ
совѣща́ета ѡ вся́кой ве́щи, є́же а́ще по­
про́сита, бу́детъ и́ма ѿ ѻц҃а моегѡ̀ нбс̃нагѡ.
{#л. хе҃і}

И тріѐ у́бѡ в̾ постѣ̀ терпя̑ще молча́ль­
ствоваху в̾ пусты́ни. другі́й же служа́ше
и́мъ потре́бная. случи́ся у́бѡ двѣма̀
сконча́тися ѡ хрс̃тѣ̀, и ѿитѝ ѿ житія̀,
и ѿ несе́нѡмъ бы́ти во єди́но мѣ́сто по­
ко́ищно. и ѡста́ти же двѣма̀ на землѝ,
служа́щему у́бѡ и молча́льствующу.
ѿ навѣ́та же ѕла́гѡ бѣ́са в̾ блу́дъ в̾падѐ
служа́и. и ѿ крове́но бы́сть єди́ному
прозорли́ву ѿ ст҃ы́хъ, я́кѡ два̀ преста́­
вльшаяся мо́лятъ ѡ служи́тели бг҃а гла­
го́люще, я́кѡ пре да́ждь бра́та снѣ́сти­
ся ѿ лва̀, илѝ ѿ ино́гѡ звѣ́ря, да
ѿ мы́въ грѣ́хъ пріи́детъ в̾ мѣ́сто,
идѣ́же и ѻнѝ бя́ху, и да нераздѣли́тся
согла́сіе и́хъ. и бы́сть внегда̀ пріитѝ
бра́ту по ѻбы́чаю слу́жбы, и возврати́­
тися єму̀ к̾ молча́лнику, стрѣ́те єгѡ̀
ле́въ, и хотя́ше єго̀ умори́ти. увѣ́­
дѣвъ же молча́лникъ бы́вшее, ѿкры́ бо
ся єму̀, и ста̀ на мл҃твѣ моля̀ бг҃а
ѡ бра́тѣ, и внеза́пу ста̀ ле́въ. два̀
у́бѡ ѿц҃а сконча́вшаяся моля́ста бг҃а глаго́­
люще, мо́лимъ тя влд̃ко, ѡста́ви бра́та
да пріи́детъ к̾ на́мъ въ бл҃же́ньство сіѐ,

и не услы́ши моля́щагося ѿше́льника.
ста́рецъ же в̾ кѣ́ліи со вся́кою прилѣ́жною
мл҃твою, и со слеза́ми моля́ше бг҃а, изба́ви­
ти бра́та, и поми́ловати ѿ льва̀. и услы́­
ша бг҃ъ моле́ніе ста́рца, и речѐ ко оц҃є́мъ
на́ нб҃си су́щимъ, пра́веднѡ є́сть о́ногѡ
послу́шати па́че ва́съ. вы̀ бо здѣ̀ во
ѿра́дѣ єстѐ, премѣ́ншеся трудѡ́въ и
потѡ́въ жите́йскихъ, то́йже изъмо­
жда́лъ є́сть пло́тію трудѡ́мъ пло́т̾скимъ,
и в̾ борбѣ̀ духовѡ́мъ лука́вствія. пра́ве­
днѡ у́бѡ є́сть о́ному да́ти блгд̃ть па́че
ва́съ. и а́біе ѿи́де ле́въ ѿ бра́та. и при­
ше́дъ в̾ кѣ́лію, ѡбрѣ́те ста́рца слезя́ща
за́нь, и повѣ́да єму̀ вся̀ случи́вшаяся.
и исповѣ́да єму̀ грѣ́хъ сво́й, є́же
содѣ́я. и увѣ́дѣ я́кѡ пощадѣ̀ єго̀
бг҃ъ, пока́яся, и вну́трь ма́ла вре́мене
до́йде въ пе́рвое пря́сло. случи́ся у́бѡ
ѻбѣ́ма сконча́тися ѡ хрс̃тѣ̀. и ѿкрове́но
бы́сть предърече́нному ст҃о́му ста́рцу про­
зорли́вому, я́кѡ и четы́ре во єди́номъ
мѣ́стѣ су̑ть, по нело́жныхъ ѻбѣ́то­
ваніихъ гдс̃а на́шегѡ іс҃а хрс̃та̀. єму́же
сла́ва, нн҃ѣ и прс̃нѡ и во́вѣки вѣкѡ́мъ;
{#л. хѕ҃і}

<<--- 07jul/07.htm>>>

Мцс̃а тогѡ́же, въ з҃ де́нь па́мять
прпд̃бнагѡ ѻц҃а на́шегѡ, и в̾ чюдесѣ́хъ
вели́кагѡ ѳѡмы̀, и́же в̾ горѣ̀ малеѝ,
бл҃гословѝ ѻ́ч҃е.

Се́й и́же ѿ испе́рва своєгѡ̀ житія̀, бы́сть
вели́къ и чю́денъ бога́тьствомъ и си́лою.
но и ва́рварская въ спятѝ ве́ліа и не свѣ́до­
мая боре́нія. послѣди́же хрс̃та̀ возлюбив̃,
и житія̀ ѡста́вль го́ркую бу́рю, прія́тъ
ле́гкій яре́мъ хрс̃то́въ. и мни́шеская
жили́ща ѡб̾ше́дъ, нищетѣ̀ и смире́нію
хрс̃то́ву уподо́бився. и сто́лпъ ѻ́гненый
но́щію свѣтя̀ бя̑ше ви́домъ. ревну́я
иліѝ ѳезви́тяніну житіе́мъ. и на́ гору
взы́де гл҃емую малея̀. и́же и та́мѡ я́кѡ
ѕвѣзда̀ я́влься, и ѡзаря́я землена́я.
и мл҃твою и бдѣ́ніемъ прогоня̑ше лука́выя
ду́хи, и бѣсо́вскую молву̀. Бл҃года́ть
чюдесє́мъ воспрія́тъ. исто́чникъ водны́й,
моли́твою истещѝ сотворѝ. и слѣпы́мъ
прозрѣ́ніє, хромы́мъ тече́ніе бл҃гохо́­
дное подадѐ. но и житіѐ ѡста́вль,
и бг҃у дх҃ъ преда́въ, непреста́я всегда̀,
и́же к̾нему̀ с̾ вѣ́рою приходя́щихъ,
вся́кія стра́сти и неду́ги исцѣля́я,

ѿ теку́щагѡ исто́чника, чс̃тна́гѡ ко­
вче́га єгѡ̀;

Вто́йже дн҃ь ст҃ы́я мч҃нцы кѷріакі́и.

Во́ дни діоклитіа́на царя̀, дорѡѳе́й нѣ́кій
хрс̃тіа́нинъ єѵ̾се́віею жено́ю свое́ю,
бесчя́дна же су̑ща, моля́стася бг҃у по
да́ти и́ма пло́дъ чре́ва, и того̀ принестѝ
єму̀. роди́ста же ѻтроча̀ же́ньскій по́лъ
въ де́нь недѣ́лный, и нареко́ста є́й и́мя
кѷріакі́я, и́же и крс̃ти́ста ю̀. во уче́ніи же
и наказа́ніи пита́юща, соблюдо́ста дв҃цу ту́ю,
бг҃у возложи́ти мы́сляща. гоне́нію же бы́­
вшу, пре́дани бы́ша діоклитіа́ну царю̀.
и суди́въ и́хъ и би́въ на мно́зѣ. и роди́те­
ля єя̀ посла̀ иу́сту ду́ксу, въ стра́нахъ
митили́нскихъ. кѷріакі́ю же маѯиміа́ну
кесарю̀ в̾ никомиді́ю, и ту́ю испыта́въ.
и в̾ вѣ́рѣ ѡбрѣ́тъ ю̀ тве́рду, и не поколеби́­
му, пове́ргъ по землѝ и би́въ не ми́лостивнѡ
на мнѡ́ги часы̀. ст҃ѣ́йже моля́щися,
не и́стовствоваше судія̀. рече́же къ нему̀
ст҃а́я, не пре́льщаися маѯиміа́не, нико­
гда́же мно́ю ѡблада́ти и́маши, бг҃у по­
мога́ющу мѝ. Тогда̀ посла̀ ю̀ иларія́ну
кня́ѕю виѳіні́йскому. ѻ́н̾же ту́ю испытав̃,
{#л. хз҃і}

в̾ведѐ въ ка́пище. и помо́льшися є́й,
бы́сть тру́съ ве́ліи, и падо́ша всѝ и́доли
церко́вніи и сокруши́шася, и бы́ша я́кѡ
пра́хъ. и доше́дшу ви́хру вѣ́трену, и
дви́гшу пра́хъ на возду́хъ. и блесну́вши­
ся ѻ́гненѣи мо́лніи, и попалѝ лицѐ ила­
ріа́на кня́ѕя, и па́дъ съ престо́ла и́здъ­
ше. прише́дъ же и́нъ кня́ѕь, и бы́въ
єму̀ с̾насто́лникъ. и увѣ́дѣвъ ѡси́хъ,
ѡсудѝ ст҃у́ю ѻгне́мъ сожже́ну бы́ти.
и запа́льше с̾ковраду̀ ве́лію, и в̾верго́ша
ст҃у́ю посредѣ̀. ѻна́же ру́цѣ къ бг҃у про­
сте́рши, помо́лшися на мно́ги часы̀.
и лѣ́тному возду́ху чи́сту су́щу,
сни̑де ѻ́блакъ съ нб҃сѐ, и погасѝ всю̀ си́лу
ѻ́гненую, ника́кѡ мч҃нцѣ вреди́мѣ бы́въ­
ши. поста́вль же ю̀ на суди́щи, на пу­
стѝ разли́чныя ѕвѣ́ри на ню̀, и ничто́же
успѣ̀, валя́хубося ѕвѣ́ріе пред̾нога́ма
єя̀. тѣ́м̾же и мно́зи вѣ́роваша въ гдс̃а
на́шего іс҃а хрс̃та̀. Ст҃а́я же в̾ве́рже­
на бы́сть въ темни́цу. Пото́мъже
сѣ́дъ кня́ѕь на суди́щи, дадѐ ѡсужде́­
ніе на ню̀. ѻна́же испросѝ помоли́ти­
ся. и́же и помоли́ся на мно́ги часы̀,

и получи́вши с̾послѣ́дъствующыя є́й хри­
сті́яны. и прекло́ньшися к̾ землѝ, у́спе
с̾ ми́ромъ. и прише́дше во́ини, я́кѡ
ви́дѣша ю̀ уме́ршю, удиви́шася. и
бы́сть к̾ни́мъ гла́съ, идѣ́те бра́тія,
и повѣ́дите вся̀ вели́чія бж҃ія. ѻни́ же
воз̾врати́вшеся, сла́вляху бг҃а;

Вто́й же дн҃ь стра́сть ст҃ы́хъ му́ченикъ
пелегри́на, лукіа́на пом̾пі́а, исихі́а сато­
рнила, ге́рмана.

Сі́и бы́ша ѿ галилѣ́и, в̾ лѣ́та троя́на ца­
ря̀. належа́щагѡ же ра́ди гоне́нія, є́же на
хрс̃тія́ны, в̾лѣ́зше в̾ кора́бль преѣ́хаша
во́ градъ реко́мый турахі́й. в̾не́мъ же бы́­
вше, ви́дѣвше ст҃а́гѡ єпкс̃па асті́я ви́­
сяща на́ древѣ ме́домъ пома́зана, и ѿ ше́­
ршнєй уязвля́ема и ѿ му́хъ, ѡ испо­
вѣ́даніи хрс̃то́вѣ, ублажи́ша ѝ. тѣ́мъ
увѣ́дани бы́ша я́кѡ хрс̃тія́не су̑ть,
я́ти бы́вше ѿ вѡ́инъ, и вопроше́ни бы́­
вше, исповѣ́даша хрс̃та̀. повелѣ́ніемъ
же антипа́та агрикола́я, в̾саже́ни бы́ша
в̾ кора́бль, и во глубинѣ̀ мо́ря погруже́ни, и
та́кѡ муче́нію коне́цъ прія́ша. мо́щи же
и́хъ из̃ве́рже мо́ре, и погребо́ша и́хъ в̾ песцѣ̀.
{#л. хи҃і}

и мину́вшымъ девяти́десятимъ лѣ́тѡм̃,
яви́шася архієпкс̃пу алеѯа́ндръскому глаго́­
люще, возмѝ мѡ́щи на́ша, и погре́бши и́хъ
чс̃тнѡ, сотворѝ надни́ми цр҃квь ма́лу;

Вто́йже дн҃ь поуче́ніе, я́кѡ добро̀ є́сть те­
щѝ к̾ цр҃кви, и проси́ти поле́зныхъ у бг҃а.

Потщи́теся бра́тіе и сестры̀ зову́ще дру́гъ
дру́га к̾ цр҃кви. ѡста́вите дѣ́лѡ ру̑къ
ва́шихъ, и взы́дите на вы́шнее нб҃о.
цр҃кви бо нб҃о земно́е є́сть, в̾не́йже а́гг҃ли
неви́димо сла́вятъ бг҃а со чл҃ки. ѻлта́рь
же разумѣ́й, бж҃іе жили́ще. а трапе́зу,
прс̃то́лъ ст҃ы́я тро̃ци, ѿ нея́ же бра́шно по­
дае́тся пло́ть сн҃а бж҃ія, и ст҃а́я єгѡ̀ кро́вь
ѡчища́ющи дш҃я на́шя. И́бо са́мъ гл҃етъ
гдс̃ь, яды́й пло́ть мою̀, жи́въ бу́детъ
во́ вѣки. тѣ́м̾же живота̀ ра́ди вѣ́чнагѡ
потру́димся въ ст҃у́ю цр҃квь, и съ прро̃комъ
вопіе́мъ, возвесели́хся ѡ ре́кшихъ мнѣ̀,
до́мъ гдс̃нь в̾ни́демъ. и па́ки, ѿве́рзите
мнѣ̀ врата̀ пра́вды, и в̾ше́дъ вня̀ испо­
вѣ́мся гдс̃ви. и та́кѡ услы́шиши, бл҃же́­
ни живу́щіи в̾ дому̀ твое́мъ, и в̾ вѣ́къ
вѣ́ка восхва́лятъ тя гдс̃а. в̾ цр҃квахъ бо
речѐ бл҃гослови́те гдс̃а. доброче́стія бо є́сть

зна́меніе, є́же всегда̀ тещѝ къ цр҃кви,
и ча́стыми моли́твами умоли́ти бг҃а.
и́бо са́мъ речѐ гдс̃ь, проси́те и да́стъ ся
ва́мъ. вели́тъ бо бг҃ъ къ цр҃квамъ
человѣ́кѡмъ а́ки къ приста́нищу ти́хому
притещѝ ѿ бу́ри, и зати́шія жите́й­
скихъ печа́лей прія́ти. и ѿврещѝ ѿ себѐ
вся́къ соу́зъ непра́вды, гнѣ́въ за́висть
я́рость, клевету̀ не́нависть и є́же не по́­
мнити ѕла̀, и пріи́метъ бг҃ъ мл҃тву твою̀,
я́кѡ ма́ти своя̀ младе́нцы, и пода́стъ
тѝ вся̀ проше́нія срд̃ца твоегѡ̀
єли́кѡ тре́буеши. єму́же
сла́ва ны́нѣ и при́снѡ
и во́ вѣки
вѣкѡм̃
;
; ;
;
{*знаки расположены центрированно, ромбом}
{#л. хѳ҃і}

<<--- 07jul/08.htm>>>

Мцс̃а того́же въ и҃ дн҃ь, па́мять ст҃а́гѡ
вели́кѡ мч҃нка проко́піа, бл҃гословѝ о́ч҃е.

Вели́кій преди́вный в̾ чюдесѣ́хъ проко́пій,
бя̑ше во времена̀ діоклитіа́на царя̀, на­
рица́емь ѿ єліе́йскагѡ гра́да. роди́ся
ѿ оц҃а бл҃гочести́ва, и хрс̃та̀ исповѣ́даю­
ща, христоѳѡ́ра и́менемъ, ма́тере
же ѳеодѡ́сіи и́долѡмъ служа́щи. оц҃у
же єгѡ̀ ѿ житія̀ ѿше́дшу. ма́ти же
тогѡ̀ ѕлочести́вѣи вѣ́рѣ уча́ше и пита́­
ше. бы́вшуже єму̀ в̾ му̑жь, приведѐ
єго̀ к̾діоклитіа́ну, ходя́щу єму̀ во
антіохі́и, мольбы̀ ѡ не́мъ творя́щи,
и мнѡ́гая имѣ́нія подаю́щи, прія́ти сн҃а
єя̀. єго́же пріє́мъ и ду́ку алеѯа́ндр̾скагѡ
поста́ви того̀. а́біе же тому̀, є́же на
хрс̃тія́ны бра́нь в̾ ручена̀ бы́сть на того̀
ѿ царя̀, я́кѡ в̾ прилѣжа́щей но́щи ю́ношь­
ствуя. ѕло́бо бя̑ше ше́ствіе дню̀,
бу́дущагѡ ра́ди ва́ра смертоно́снагѡ.
да я́кѡ до три́десяти по́прищъ гра́да
апамі́йскагѡ бы́въ, послѣ́д̾ствующи­
ма, и ѻбои́ма нуме́рома. Бы́вшу же
тру́су и мо́лніямъ, и слы́ша гла́съ
съ нб҃сѐ призыва́ющь єго̀ на́ имя, не ані́є,

та́кѡ бо бя̑ше пе́рвіе єму̀ и́мя, и ше́­
ствію поноша́я, и сме́ртію претя̀, я́кѡ
бг҃обо́рнѣ єму̀ ше́ствовати. Ст҃о́му же
а́біе бл҃горазу́мною дш҃е́ю гдс̃а призва́вшу.
и помоли́вся извѣ́стнѣйше тому̀ яви́ти­
ся. яви́жеся єму̀ крс̃тъ, во ѻ́бразѣ
хруста́лнѣ. и гла́съ бы́сть єму̀ ѿ крс̃та̀
гл҃ющь, а́зъ є́смь распя́тый іс҃ъ сн҃ъ
бж҃іи. Тогда́ бо вся́когѡ управле́нія,
та́иньству научи́вся. извѣ́стнѣ в̾ ра́­
зумъ вѣ́ры воспріе́мъ. и возврати́вся
въ скѷѳопо́ль, повелѣ̀ сотвори́ти єму̀
крс̃тъ ѿ зла́та и сребра̀ ско́ванъ, во ѻ́бразъ
я́вльшіися єму̀, и на писа́ти нане́мъ,
трѝ во ѻбраже́нія, євре́йскими пи́сме­
ны; вы́шьше, єм̾ману́илъ; со ѻбѡю́ же
страну̀, ѿ єди́ну михаи́лъ, а ѿ дру­
гу́ю гавріи́лъ. и воспріє́мъ крс̃тъ, и
и́же нане́мъ во ѡбраже́ныя ѻ́бразы ѡбло­
быза́въ. а́біе ко ієросали́му ѡбрати́ся,
и на срацы́ны ѡполчи́ся, и мнѡ́ги побѣ́­
ды сотвори́въ нани́хъ, плѣня́я страны̀
и́хъ и гра́бя. Повелѣ́ же єму̀ мт҃и
єгѡ̀, же́ртвы побѣ́дныя бг҃ѡ́мъ прине­
стѝ. ѻ́номуже хрс̃то́вою си́лою на ра́тныя
{#л. хк҃}

со ѻдолѣ́нія на писова́ющу. и приведе́нъ
бы́сть къ царю̀, ма́терію ѡ клевета́нъ.
ца́рь же улкі́ю кесарі́йскому игѣ́мону пове­
лѣ̀ истяза́ти ст҃а́го, и́же и біє́нъ ѿ не­
гѡ̀ вельмѝ, и не поко́рься и́долѡмъ прине­
стѝ же́ртвы, в̾ве́рженъ бы́сть в̾ темни́цу
є́ле жи́въ. я́вльшужеся гдс̃у на́шему
іс҃у хрс̃ту̀, разрѣше́нъ ѿ у́зъ, и проко́­
піи нарече́нъ бы́сть, и є́же къ муче́нію
преспѣ́яніе, и сконча́нію явля́ющи и́мя,
и де́рзость на лю́тыя и прети́мыя му́ки
воспріе́мъ. Та́же приведе́нъ бы́сть въ це́­
рковь и́дольскую, и мл҃твою єгѡ̀ па́дше
и́доли сокруши́шася и иссы́пашася ѿ це­
рко́вныхъ вра́тъ. и я́кѡ ви́дѣвшимъ
во́инѡмъ двѣма̀ нуме́рома, со двѣма̀
трі́унома, никостра́тъ, и антіо́хъ,
вѣ́роваша и ті́и во хрс̃та̀. и леѡ́нтіемъ
єпкс̃помъ кр҃ще́ніе воспріе́мше. и повелѣ́­
ніемъ царе́вымъ ѿ сѣко́ша и́мъ главы̀.
я́ти же бы́ша, два́десять жє́нъ боля́рынь,
ку́пнѡ съ ѳеодѡ́сіею, мт҃рію ст҃а́гѡ вѣ́­
ровавшимъ и тѣ́мъ ѡ бы́вшемъ чюдесѝ,
и неща́днѡ му́чени бы́вше, и сосца̀
и́мъ ѿ рѣ́заша, и разже́ными млаты̀

желѣ́зными мы́шцы и́хъ ѡ пали́ша,
и мече́мъ главы̀ и́мъ ѿсѣко́ша. По­
се́мъ флавіа́ну, игѣ́моньство пріе́мшу,
поста́ви ст҃а́гѡ на испыта́ніе, и тому̀
непоко́ршуся, повелѣ̀ архела́ю нѣ́коему
уда́рити єго̀ мече́мъ. и́же и просте́ръ
ру́ку, а́біе па́дъ на́ землю и́здъше.
та́же растя́женъ ужьмѝ ст҃ы́й, и жи́­
лами суровы́ми біе́нъ. и у́гліемъ ѡпа­
ле́нъ, и на ѡпале́ныя ра́ны ѻ́цетъ во­
злія́ша. пріи́мъ же в̾ ру́цѣ ѻ́гнь и ли­
ва́нъ, претерпѣ̀ жго́мь, да не в̾мѣни́­
тся нечести́вымъ, а́ще в̾ ве́ржетъ ѻ́гнь,
же́ртву и́долѡмъ принестѝ. к̾ си́мъ по­
вѣ́шенъ и стро́ганъ. и в̾ пе́щь раз̾же́ну
хотя̀ в̾ ве́рженъ бы́ти, и зна́меніемъ
хрс̃то́вымъ ту́ю устудѝ. и ме́чное ѡсу­
же́ніе воспріе́мъ. и ѿсѣ́кше главу̀
єму̀, и в̾зы́де ко гдс̃у. Соверша́етъже­
ся собѡ́ръ єгѡ̀ во ст҃ѣ́мъ єгѡ̀ муче́­
ніи, су́щемъ бли́зъ хе­
ло́на и в̾ конъ­
дипі́и
;
{#л. хк҃а}

Вто́йже дн҃ь сло́во ѡ печа́ли свѣ́та сегѡ̀.

Нѣ́сть добро̀ в̾ безмѣ́рную печа́ль преда́вши­
ся и изнемога́ти, но смири́тися пре́дъ
бг҃омъ прише́дшія ра́ди печа́ли, поре́кшему,
возве́рзи речѐ на гдс̃а печа́ль свою̀, и то́й
тя̀ препита́етъ. не да́ждь печа́ли дш҃ѝ
свое́й, мно́ги бо погубѝ печа́ль, и нѣ́сть
в̾ не́й успѣ́ха. ѿ печа́ли бо исхо́дитъ
сме́рть. печа́ль бо врежа́етъ срд̃цу крѣ́­
пость. я́коже бо мо́ль в̾ ри́зѣ, и че́рвіе
во́ древѣ, си́це печа́ль му́жу врежа́етъ
срд̃це. тѣ́мъже са́ми ѡ себѣ̀ не скорби́мъ,
но к̾ бг҃у въ слеза́хъ и в̾ воздыха́ніихъ любо­
тру́днѣй мл҃твѣ, и крѣ́пкимъ бдѣ́ніемъ.
и та́кѡ приимемъ ѿ́ бг҃а по́мощь и избавле́­
ніе;

Вто́й же дн҃ь сло́во іѡ҃а́нна златоу­
ст҃а́гѡ, я́кѡ подоба́етъ уча́щему та́кѡ
твори́ти, я́коже и учи́ти.

Речѐ гдс̃ь, вся́къ кни́жникъ на учи́вся
црс̃твію нбс̃ному, подо́бенъ є́сть чл҃ку до­
мови́ту, и́же изно́ситъ ѿ сокро́вища
своего̀ но́вая и ве́тхая. кни́жникъ бо
є́сть, и́же трудо́мъ и прилѣжа́ніемъ по­
чита́ніе твори́тъ бжс̃твеныхъ писа́ніи, се́
бо сокро́вище прилага́етъ ра́зума ве́тхагѡ

зако́на и но́вагѡ завѣ́та, и во́ время
ѿ тогѡ̀ износя̀ уче́ніе. а єли́цы не
прилѣжа́тъ кни́жнагѡ уче́нія, то̀ не су̑ть
домови́тіи, ни са́ми иму́ще, ни инѣ́мъ
подаю́ще, но презря́ще себѐ гла́домъ не­
разу́мія истлѣ́нномъ. я́коже бо землѝ
не ѡдождя́емѣ, а́ще кто̀ и мно́жицею
в̾ве́ржетъ сѣ́мя, возрасти́ти не мо́жет̃.
та́кѡ и дш҃а, а́ще не писа́ніи на поє́на
бу́детъ пе́рвіе, не мо́жетъ плода̀ добра̀ со­
твори́ти. вели́кѡ у́бѡ ѕло̀ є́же не разу­
мѣ́ти писа́нія, и я́кѡ без̾слове́снымъ
ходи́ти. ѿ того̀ бо прозяба́ютъ мно́га
ѕла́я. в̾ то́мъ бо лѣ́ностное житіѐ є́сть,
и душе́вная слѣпота̀. я́коже бо свѣ́та сегѡ̀
лише́ный не пра́вѡ хо́дитъ, та́кѡ и не почи­
та́ющіи бж҃е́ственыхъ писа́ніи, во мно́зѣ
претыка́ются. Сегѡ̀ ра́ди поуча́етъ апс̃лъ
гл҃я, внима́йте чте́нію, уче́нію,
утѣше́нію. тѣ́м̾ же не лѣни́теся,
но почита́йте кни́ги, и инѣ́хъ по­
уча́йте, да сугу́бу м̾зду̀
пріи́мѣте ѿ́ бг҃а. єму́ же
сла́ва, ны́нѣ и прс̃нѡ и во́
вѣки вѣкѡ́мъ;
{#л. хк҃в}

<<--- 07jul/09.htm>>>

Мцс̃а того́же въ ѳ҃ дн҃ь, па́мять ст҃а́го
сщ҃енно мч҃нка, пагкра́тія, єпкс̃па та­
вромені́йскагѡ, бл҃гословѝ о́ч҃е.

Се́й ст҃ы́й бя̑ше во времена̀ ст҃ы́хъ апс̃лъ.
бы́въ родомъ ѿ предѣ́лъ антіохі́йскихъ.
се́й ст҃о́е кр҃ще́ніе прія́тъ во ст҃ѣ́мъ сіѡ́нѣ,
ку́пнѡ со оц҃е́мъ и съ мт҃рію. и по ѿше́­
ствіи о́нѣхъ оста́вивъ вся̀ су́щая своя̀,
и и́де в̾ го́ры понті́йскія. и внѣ́кій верте́пъ
в̾ ше́дъ, ѡсо́бнѡ бя̑ше, и себѣ̀ внима́я,
и єди́ному бг҃у пріѡбща́яся. верхо́вный же
апс̃лѡмъ пе́тръ, проходя̀ гра́ды и поуча́я,
ѡбрѣ́те му́жа на мѣ́стѣ, и воспріє́мъ
єго̀ по́йде во антіохі́ю. та́же в̾ кіликі́й­
скія страны̀. и внегда̀ вели́кагѡ апс̃ла
па́вла изъ ѡбрѣ́тъ, а́біе поста́ви криске́нта
єпкс̃па в̾ галаті́и. та́же маркіа́на в̾ сира­
ку́сѣ. Ст҃а́го же пагкра́тія в̾ тавроменіи.
пагкра́тіи же в̾ ше́дъ в̾ кора́бль, ликаони́­
да и роми́ла, су́щымъ кора́бленикѡмъ,
дости́же въ страну̀, идѣ́же по́сланъ
бя̑ше. зна́меніемъже мно́гимъ и чю­
десє́мъ ѿ ст҃а́гѡ съ быва́ющимъся,
къ хрс̃то́вѣ вѣ́рѣ и кора́бленицы прише́дше
и почита́еми и́мъ повсѣ́хъ стра́нахъ.

фалка́на же и лисо́на, и про́чихъ бѣсѡ́въ
потреби́ша. мѣ́ста же тогѡ̀ игѣ́монъ вни­
ѳа́нтіи, ви́дѣвъ быва́емая ипочюди́вся,
вѣ́ровавъ и то́й хрс̃то́ви. и тща́ніе мно́­
го положѝ, созда̀ цр҃квь за три́десять
дні́й. пагкра́тіи же бя̑ше врачю́я вся́къ не­
ду́гъ, и вся́ку болѣ́знь хрс̃то́вою бл҃года́­
тію. тогѡ̀ ра́ди по всегда̀ прихожда́ху мнѡ́­
жество к̾ бг҃у и кр҃ща́хуся, то́чію же єди́ни
монта́не пребы́вше в̾ невѣ́ріи, и́же и вре́мя++ и́щуще, и ле́стію напа́дше, ст҃а́гѡ со артага́­
ломъ кня́ѕемъ свои́мъ того̀ уби́ша, и к̾ во­
злю́бленому єго̀ посла́ша гдс̃у. и та́кѡ
ѡбрѣ́те мнѡ́гимъ болѣ́знемъ воздаяніе ;

Вто́йже дн҃ь ст҃ы́хъ прпд̃бнѡ му́ченикъ
патермуѳі́я, копрі́а и алеѯа́ндра.

Сі́и бя́ху вовремена̀ іулія́на престу́пника,
въ єгѵ́петьстѣи пусты́ни безмо́лвное жи­
тіѐ проходя́ще. на пе́рскую же ра́ть иды́й
престу́пникъ, увѣ́дѣ ѡ ст҃ы́хъ, и по­
сла́въ приведѐ и́хъ. и вопросѝ патермуѳі́я
коли́кими лѣ́ты єсѝ. ѻ́номуже ре́кшу,
ое҃. вопроси́же и копрі́я, и тому̀ ре́кшу,
ме҃. повелѣ́же известѝ старѣ́йшаго во́нъ.
ну́дяше же копрі́я, вся́кими ласка́ньми

{#л. хк҃г}

ѿврещи́ся хрс̃та̀. воспомяну́въ же патерму­
ѳі́евы пе́рвыя труды̀, и бдѣ́нія и посты̀,
и не покори́ся єму̀. и́же а́біе повелѣ̀ мучи́­
тель язы́къ єму̀ урѣ́зати. та́же на ско­
враду̀ ѻ́гненую повелѣ̀ того̀ поврещѝ, к̾не́й
же ведо́мъ препаде́ся. укрѣпле́нъ же бы́въ
ст҃ы́мъ патермуѳі́емъ, и́же и с̾ни́мъ в̾зы́­
де на сковраду̀, и изыдо́шя без̃вреда̀. Потом̃
въ пе́щь ѻ́гненую в̾ве́ржени бы́ста, сни́ми же
в̾ни̑де и алеѯа́ндръ, хрс̃та̀ съ дерзнове́ніемъ
исповѣ́давъ. и́же и тріѐ изыдо́шя без̃вреда̀.
и повелѣ́ніемъ мучи́телевым̃ главы̀ и́мъ ѿсѣ­
ко́ша;

Вто́йже дн҃ь сло́во ѿ патерика̀.

Речѐ а́вва іѡ҃а́ннъ ко́ловъ, а́зъ хощу̀ прія́ти
чл҃ка ѿвсѣ́хъ дѣ́телєй, и́же у́бѡ по вся̀
днѝ въстава́я за у́тра, воспріи́метъ нача́ло
на вся́ку дѣ́тель, и за́повѣдь бж҃ію в̾ вели́­
цѣ терпѣ́ніи испо́лнитъ, со́ страхомъ и до­
лготерпѣ́ніемъ, въ любвѝ бж҃іи, со всѣ́мъ
прилѣжа́ніем̃, дш҃е́ю и тѣ́ломъ, и смире́ніемъ
мно́гимъ, въ терпѣ́ніи и печа́лнѣ срд̃цѣ, в̾ мо­
ли́твѣ мно́ѕѣ, и по́стъ с̾ воз̃дыха́ніем̃, въ чс̃то­
тѣ тѣле́снѣй, стрегі́й язы́ка, укаря́яся
и не погнѣ́ваяся, смиря́яся, и не воздая̀
ѕла̀ за ѕло̀. не внима́я собла́знъ чюжы́хъ,

ни себѐ чты́й; но бы́ти под̾все́ю тва́рію, во
ѿмета́ніи скве́рны; іє́же по́ плоти, распя́­
тися я́кѡ на крс̃тѣ̀, в̾ по́двизѣ, в̾ нищетѣ̀
дх҃о́внѣй, в̾ постѣ̀, и в̾ пока́я́ніи, въ пла́чи,
и въ подвиза́ніи бра́нємъ, въ раз̾суже́ніи,
въ чистотѣ̀ дш҃е́внѣи, въ прія́тіи бла́зѣ;
въ безмо́лвіи дѣ́ло ручно́е да бу́детъ ти̑.
в̾ нощны́хъ бдѣ́ніихъ, во а́лчи и в̾ жа́жди,
въ студенѣ̀ и въ наготѣ̀, и въ трудѣ́хъ,
покрыва́яся во гробѣ́хъ, я́коже у́же сконче­
ва́яся, є́же мнѣ́ти бы́ти бли́зъ сме́рти
на всяк̃ дн҃ь. Речѐ а́вва іѡ́сифъ ѳивѣ́й, {*ѿ ста́р̾­чества}
я́кѡ тріѐ су̑ть чи́нове пре́дъ гдс̃емъ єгда́ бо
ви́дитъ чл҃къ прижитіѝ єму̀ напа́сти, и
с̾ похвало́ю пріє́млет̃ я̀. Второ́е же є́сть, єгда̀
кто̀ дѣла̀ своя̀ чи́ста сотвори́тъ пред̃ гдс̃емъ,
и ничто́же чл҃ческо иму́щя, тре́тіе же, єгда̀
кто̀ в̾ покоре́ніи оц҃а̀ своегѡ̀ дх҃о́внагѡ сѣдит̃,
и всѣ́хъ вѡ̑ль свои́хъ ѿве́ржется;

Вто́йже дн҃ь сло́во ѡ двою̀ сосѣ́ду, я́кѡ
добро̀ ходи́ти въ цр҃квь и моли́тися.

Бѣ́ста два̀ кли́рика су̑ща швеца̀, бли́зъ
себѐ живя́ста. єди́нъже имѣ́яше дѣ́ти
мно́ги, и жену̀ и оц҃а̀ и ма́терь. ходя́ше
же въ цр҃квь прс̃нѡ по вся̀ днѝ, и вся̀
{#л. хк҃д}

по́ бѕ҃ѣ кормя́ше ѿремества̀ своегѡ̀. другі́й
же хи́тръ сы́й, но зане́же не ходя̑ше в̾ цр҃квь
но и внедѣ́лю дѣ́лаше, но ни себѐ корми́ти
можа́ше. воз̾ревнова́въ же сосѣ́ду своему̀
и не терпя̀ за́вистію, гл҃а єму̀ со́ гнѣвомъ,
ѿку́ду ты̀ и ка́кѡ ѡбогатѣ̀, а́зъ бо
прилѣжа́хъ реместву̀ своему̀ па́че тебѐ,
и ѡбнища́хъ. ѻ́нъже гл҃а єму̀ хотя̀ ѝ
сотвори́ти, дабы̀ ходи́лъ и о́нъ въ цр҃квь;
сѐ а́зъ хожю̀ по вся̀ днѝ къ цр҃кви, и ѡбрѣ­
та́ю зла́то ходя̀ пове́ржено на путѝ, и ѿто́лѣ
пома́лу ѡбога́тѣхъ. но а́ще хо́щеши прс̃нѡ
со мно́ю ходи́ти, датя̀ в̾зыва́ю, и є́же
ѡбря́щеши, илѝ а́зъ, в̾зима́єма по по­
лу̀. и я́кѡ о́нъ вѣ́ру є́мъ, ходи́ти нача̀
въ слѣ́дъ єгѡ̀. и ходя́щу єму̀ в̾ цр҃квь
при́снѡ, и бл҃гословѝ ѝ бг҃ъ, и ѡбогатѣ̀.
Тогда̀ гл҃а єму̀ до́брый то́й совѣ́тникъ,
вѣ́сили бра́те, єди́на лжа̀ бг҃а ра́ди, коли́кѡ
по́льзова душѝ твое́й и имѣ́нію твоему̀.
но ими́ми вѣ́ру ничто́же ѡбрѣто́хъ на зе­
млѝ, я́кѡ зла́та ра́ди мнѣ́лъ єсѝ ходи́лъ
а́зъ; но поне́же бг҃ъ речѐ, ищи́те пре́жде
црс̃тва нбс̃нагѡ, и сія̀ вся̀ приложа́тся вам̃
сегѡ̀ ра́ди гл҃ахъ тѝ. и а́ще то́чію и солга́хъ,

и сѐ не погрѣших̃, ѡбрѣ́те бо и приѡбрѣ́те.
се́же увѣ́давъ прпд̃бный іѡ҃а́ннъ млс̃тивый
па́па, сотворѝ ѝ до́браго совѣ́тника и пре­
зви́тера, я́кѡ
досто́инъ бя̑ше и бг҃о­
чте́цъ. бг҃у на́шему сла́ва нн҃ѣ и прс̃нѡ
и во́ вѣки вѣкѡ́мъ;
{#л. хк҃є}