Мцс̃а тогѡ́же, въ і҃ дн҃ь. ст҃ы́хъ мч҃нкъ
четы́редесяти и пятѝ, и́же в̾ никопо́ліи
арме́нстѣй пострада́вших̃, блгс̃вѝ ѻ́ч҃е.

Сі́и ст҃і́и мч҃нцы хрс̃то́вы, бы̑ша при ликіні́и
царѣ̀, и при лусі́и игѣ́монѣ. и сі́и старѣ́й­
шины бы̑ша в̾ни́хъ, леѡ́нтіи маври́кій
даніи́лъ и анто́ніи. и пред̾ста́ша лусі́ю,
и ѡбличи́ша ѝ, хрс̃та́ же исповѣ́давше.
тогѡ̀ ра́ди біе́на бы̑ша ка́меніемъ во уста̀,
и в̾ ве́ржени бы́ша в̾ темни́цу. и блюдо́ста
и́хъ тимо́ніи и валира́дъ, два̀ во́ина, я́же
и сама̀ вѣ́роваста хрс̃то́ви. из̾ве́дъже и́хъ
лусі́й, и избѝ всѣ́хъ го́лени, и о́ви
ѿни́хъ ту̀ умро́ша, о́виже бя́ху жи́ви
моля̑ще хрс̃та̀. и поси́хъ сконча́шася и ті́и
бл҃годаря́ще хрс̃та̀ бг҃а, а пре́же уме́ршихъ
тѣлеса̀ ѻгне́мъ сожго́ша.

Вто́йже де́нь стрс̃ть ст҃ы́хъ мч҃нкъ ви­
аро́на и лусі́я.
{#л. хк҃є}

Ст҃ы́й віаро́нъ бѣ̀ ѿ писиді́йскія єпа́рхіи
исповѣ́данія же ра́ди я́же во хрс̃та̀, я́тъ
бы́сть севиріа́номъ игѣ́мономъ иса́връскагѡ
гра́да и партисі́а. и пону́жен̃ бы́сть ѿврещи́­
ся хрс̃та̀, и не покори́ся, мече́мъ боде́нъ
бы́сть ѕлѣ̀. та́же повѣ́шенъ и стро́ганъ,
и млаты̀ желѣ́зными горя́щими жго́мь.
зу́быже єгѡ̀ искорени́ша, и у́ши посе́мъ
урѣ́заша. лусія́нъже нѣ́кто пред̃стоя̀ єму̀
и ви́дѣ терпѣ́ніе ст҃а́гѡ, и вѣ́рова хрс̃то́ви
и а́біе язы́къ урѣ́заша єму̀, посе́м̾же и
главу̀. ст҃о́му же віаро́ну провертѣ́шя
пя́тѣ, и десно́е ѻ́ко избодо́ша, и ко́жю гла­
вну́ю ѡдра́ша. и посе́мъ главу̀ єгѡ̀ усѣ́кну­
ша, ку́пнѡ с̾лусі́емъ сконча́стася, и
в̾ру́цѣ бж҃іи дш҃я своя̀ в̾ложи́ста;

Вто́йже дн҃ь стрс̃ть ст҃а́гѡ мч҃нка аполо́нія.

Аполо́ніи ст҃ы́й хрс̃то́въ мч҃нкъ, бѣ̀ ѿ́града
сарді́йскагѡ и́же в̾ лидіи. приведе́н̾ же бы́въ
к̾ перині́ю кня́ѕю иду́щу єму̀ во иконі́ю
и исповѣ́да себѐ хрс̃тіа́на су̑ща. и пону́жен̃
бы́въ кля́тися во́ имя царе́во. ѻ́н̾же речѐ
не обы́чно є́сть кля́тися во умира́ющаго царя̀,
но па́че в̾ творца̀ и созда́теля в̾ся́кой тва́ри.
посра́мленъ же бы́въ перині́й, и раз̾гнѣ́вався

повелѣ̀ на́ древѣ повѣ́сити му́ченика. то­
му́же повѣ́шену бы́вшу, и на до́лзѣ му́­
ченъ ст҃ы́й, в̾ ру́цѣ бж҃іи дх҃ъ сво́й пре­
дадѐ, моля́ся при́снѡ за вѣ́рныя, и всѣ́мъ
спасе́нія прося̀;

Вто́йже дн҃ь сло́во ѿ бесѣ́дъ ст҃а́гѡ григо́рія.

Сіе́ же слу́хом̃ прія́хъ ѡ нѣ́коемъ в̾ плѣне́ніи
ѿ ра́тныхъ су́щу, и вери́гами с̾ вяза́ну.
я́кѡ тогѡ̀ сожи́телница во́ днехъ уста́вле­
ныхъ же́ртву ѡне́мъ приноси́ти ѻбы́че. и́же
по лѣ́тѣхъ ѿ плѣне́нія къ свое́й возврати́­
ся сожи́телницѣ, и в̾ кі́ихъ днє́хъ вери́ги
єгѡ̀ не ви́димо разрѣша́хуся, я́вѣ сотворѝ.
ѻ́на же тѣ́мъ бы́ти днє́мъ речѐ, в̾ни́хъ же
ѡне́мъ приноше́ніе приноша́ше. ѡ друго́й же
ве́щи на́мъ сѐ и́стиннѡ бы́ти познава́ется.
пре́жде седми́хъ лѣ́тъ бы́вшіи, я́коже ми
вѣ́рніи и спѣ́шніи му́жіе мно́зи повѣ́даша,
и́же въ бл҃же́ннѣи па́мяти пред̃вари́вый мя̀
патріа́рхъ, агаѳо́ну гра́да пано́рма єпкс̃пу
в̾ ри́мъ пріитѝ повелѣ̀. въ мо́ри же гряды̀
ну́жду зѣ́лнѣйшу подъя́тъ, я́кѡ про́­
чее ѿча́ятися єму̀ ѿ бѣды̀ толи́кихъ вѡ́­
лнъ спасти́ся. кора́бленикъ же нѣ́кій ѿ
пла́вающыхъ с̾ни́мъ вара́ка и́менемъ, и́же
{#л. хк҃ѕ}

ны́нѣ тоя́жде цр҃кве приче́тникъ є́сть.
въ слѣ́дъ кора́бля в̾ ладіѝ влеком̃ ту̀ кормля́­
ше. у́жу же прето́ргъшуся, ку́пнѡ с̾ ладіе́ю
взя́тъ бы́въ волна́ми, не ви́димь бы́сть.
кора́бль же в̾не́мъ же бѣ̀ єпкс̃пъ, со мно́гою
ну́ждею въ ѻ́стровъ гл҃емый у́стика пріи́де,
сокруше́нъ ѿ ну́жды вѡ́лнъ. тре́тіему у́бѡ
дню̀ мимоше́дшу, и ни на єди́ной же странѣ̀
мо́ря ѿто́рженый корабле́цъ с̾кора́бленикомъ
ви́дѣвше, ѕѣлѡ̀ єпкс̃пъ скорбя̀, ме́ртва
того̀ бы́ти не пщева́ше. ра́ди же любо́вныя
слу́жбы, єдино є́же ме́ртвому до́лжно
є́сть сотвори́ти, ѡ упокое́ніи дш҃ѝ єгѡ̀,
всеси́лному бг҃у же́ртву спасе́ную принестѝ
повелѣ̀. Сему́же бы́вшу, ѡбно́вль­
шіи кора́бль во итталі́ю пріидо́ша, во́ градъ
же зово́мый тупо́рту дости́гше, и ту̀
кора́бленика ѡбрѣто́ша, єго́ же уме́рша
в̾мѣня́ху. ѡ неча́яннѣмъ же се́мъ видѣ́­
ніи возра́довася єпкс̃пъ, нача́тъ єго̀ вопро­
ша́ти, ка́кѡ в̾ толи́кѡ дні́й в̾ таковѣ́й бѣ­
дѣ̀ морьстѣ́й жи́въ бы́ти возъмо́же.
То́й же ѿвѣща́въ сказа̀ и́мъ, ка́кѡ во
ѻ́ной бу́ри волна́мъ на по́лнившем̃
єго́же кормля́ше, и держа̀ єго̀ пла́ваше.

и коли́жды из̾вра́щьшуся єму̀ го́рняя до́лу
корма̀ ѿгорѣ̀ бы́сть, в̾ нели́цѣже дні́ю и
но́щію сѐ непреста́ннѡ творя̑ше. про́чее си́ла
єгѡ̀ ѿтруда́ же и гла́да ѿ вну́трених̃ испадѐ.
кі́имъже ѻ́бразом̃ того̀ сохранѝ бж҃іе чл҃колю́біе
я́вѣ сотворѝ, є́же и да и́же до нн҃ѣ свидѣ́­
тельствуетъ гл҃я, я́кѡ в̾ волна́хъ тружда́я­
ся и подвиза́яся, напра́снѡ умо́мъ ѡтягчи́­
ся, ни въсо́нъ съ веде́нъ бы́въ, нижѐ па́ки
съ верше́нѣ бдѣ́ти могі́й. посредѣ́же мо́ря
су́щу єму̀, яви́ся нѣ́кій єму̀ хлѣ́бъ
въ сы́тость прине́съ. я́дъже и насы́тився
си́лу воспрія́тъ. не помно́зѣ же ми́мѡ хо­
дя̀ кора́бль, ѿ бѣды̀ о́ноя и во́лненыя ну́­
жды, того̀ взя́тъ, и к̾ землѝ наста́ви.
се́же єпкс̃пъ слы́шавъ поиска̀ дн҃ь, и ѡбрѣ́те
я́кѡ то́й бѣ̀, во́ньже презвѵ́теръ во ѻ́стровѣ
гл҃емѣмъ усти́ка, ѡ не́мъ же́ртву сщ҃е́нна­
гѡ приноше́нія всеси́лному бг҃у принесѐ;

Вто́йже дн҃ь па́мять ст҃ы́хъ оц҃ъ десятѝ
ты́сящъ, и́же сконча́вшихся в̾ ски́тѣ
огне́мъ и ды́момъ и́хъже повелѣ̀ запали́ти
ѳео́филъ архиєпкс̃пъ алекса́ндръскій, ища̀
иси́дора презви́тера.

Вто́йже дн҃ь сло́во
о велича́выхъ и вознося́щихся.
{#л. хк҃з}

Не возносися чл҃че, да не паде́шися в̾ неза́­
пу, на несе́ши душѝ свое́й па́губу.
ме́рзокъ предъ бг҃омъ и человѣ́ки вся́къ
велича́вый. начало бо чл҃ческагѡ грѣха̀,
велича́ніе, и держа́ися поне́мъ, мерзи́тъ
всѣ́мъ. коне́цъ же єгѡ̀ ѿпа́сти ѿ бг҃а.
срд̃це бо велича́вагѡ, не и́мать умиле́ніа;
Ѽ убо́гіи чл҃че, что̀ возно́сишася;
земля̀ сы́й и пепе́лъ. что́ бо є́сть ве­
лича́вагѡ безу́мнѣе. велича́вый го́рдо­
стію, надыма́яся, я́кѡ во́дный гово́ръ,
лицемѣ́рный износя̀ гла́съ; ѽ велича́вый,
позна́й своѐ єстество̀, и́же ве́щію сме́рь­
тенъ, высокоу́міемъ же мни́шися вѣ́ченъ
бы́ти. а́ще высо́ко пари́ши мы́слію я́кѡ
ѻре́лъ, ѿту́ду тя с̾ве́ргу гл҃етъ гдс̃ь.
то́й бо горды́мъ проти́вится. ѻ́чи велича́­
выхъ смири́тъ, и возда́стъ возда́ніе
горды́мъ. Тогда̀ реку́тъ в̾ себѣ̀ ка́юще­
ся, что́ ны успѣ̀ велича́ніе на́ше, и что̀
бога́тьство с̾ горды́нею помо́жетъ на́мъ, пре­
идо́ша о́на я́кѡ стѣ̑нь, и того̀ ра́ди му́цѣ
вѣ́чнѣ предади́мся, ѿнея́же да изба́витъ
ны̀ гдс̃ь бг҃ъ на́шъ. єму́же сла́ва,
ны́нѣ и при́снѡ и во́ вѣки вѣкѡ́мъ;

Мцс̃а тогѡ́же, въ а҃і дн҃ь, па́мять ст҃ы́я
великому́ченицы и добропобѣ́дныя и все­
хва́лныя єѵ̾фи́міи, ѻ́ч҃е.

Вѣ́доможе, я́кѡ добропобѣ́дная му́ченица
єѵ̾фи́мія, бя̑ше во времена̀ діоклитіа́на
и при́ска анѳѷпа́та єѵ̾ропі́и, гра́да халки­
до́на. дщѝ су́щи филофро́нова, и ѳе­
одѡрисіані́и. и хрс̃то́ва же ра́ди исповѣ́­
данія ѡклевета́на бы́вши, и съ колесе́мъ
и ѻгне́мъ бра́вшися. єще́ же козньмѝ
ины́хъ нѣ́которыхъ муче́ніи. и льво́мъ
въ снѣ́дь дана̀ бы́вши, и не вреди́ма пре­
бы́вши. и на то́мъ позо́рищи дш҃ю испу­
стѝ. и бы́сть в̾ ра́цѣ ѿ свои́хъ
єдиновѣ́рныхъ. По претече́ніи же мно́­
гихъ лѣ́тъ, внегда̀ бл҃гочести́вая раз̃шире́­
нія ѳеодѡ́сія сн҃а арка́діева, скѵ́петры пра́­
вящагѡ, бы́сть таково́е чю́до. єѵ̾тихі́й
нѣ́кто глаго́ла, гдс̃а на́шегѡ іс҃а хрс̃та̀, ѿ єди́­
ногѡ єстества̀ бы́ти, и єди́нѣмъ содѣ́лова­
ніемъ. и́же и низложе́нъ бы́сть флавіа́ном̃
архієпкс̃помъ констянти́ня гра́да, и про́чи­
ми правосла́вными. єѵ̾ти́хій же приѡбрѣ́тъ
помо́щники себѣ̀ цр҃е́вы безбо́жныя скопцы̀,
не преста́ше распрю̀ не истовле́нія творя̀,
{#л. хк҃и}

до́ндеже ѳеодѡ́сіи ѿ здѣ̀ су́щихъ преста́­
вися. пріе́мшу же црс̃тво маркіа́ну, пове­
лѣ̀ собѡ́ру бы́ти, и́же и собра́вшеся єпкс̃пъ
число́мъ ше́сть сѡ́тъ три́десять, ку́пнѡ
же правосла́вніи, и єресє́мъ нача́лницы. и́же
и сотвори́ша два̀ сви́тка, и ѿве́рзше ра́ку
всехва́лныя, и зна́менавше на пе́рсѣхъ єя̀
положи́ша. и по́три дні́й помоли́вшеся,
ѿве́рзше, ви́дѣша єрети́ческій сви́токъ
под̃ нога́ма ст҃ы́я, правосла́вный же в̾ руку̀
єя̀ держа́щь. тому́ же бы́вшу, удиви́ша­
ся всѝ ви́дѣвшіи таково́е чю́до. и на мно́­
жайшее по тверди́вшеся ѡ вѣ́рѣ, просла́ви­
ша бг҃а, творя́щагѡ по всегда̀ ве́лія чюде­
са̀, къ ѡбраще́нію мнѡ́гимъ. Соверша́етъ
же ся собѡ́ръ єя̀ во ст҃ѣ́мъ єя̀ муче́ніи,
су́щемъ во антіѡ́сѣ бли́зъ ла́вса.

Вто́й же дн҃ь па́мять ст҃а́гѡ му́ченика ки­
ндѣ́я презви́тера.

Се́й бя̑ше ѿ ве́си талменисіа́ды памѳилі́й­
скія, въ црс̃тво діоклитіа́ново, манаде́я­
нинъ ро́домъ. приведе́нъ же бы́въ къ стра­
то́нику игѣ́мону, и исповѣ́да хрс̃та̀.
тѣ́мъ ѡбуве́нъ бы́сть въ сапогѝ желѣ́зны
с̾ гвоздмѝ, и по течѐ сквозѣ̀ ієрапо́ль.

и усрѣ́те чл҃ка нося́ща бре́мя дрѡ́въ, и́же и
є́ллинѡмъ помы́слившымъ ту̑не похи́ти ти
дрова̀ є́же с̾жещѝ му́ченика. Ст҃ы́й
же изе́мъ три́десять мѣ́дницъ дадѐ цѣ́­
ну зани́хъ. ѻни́ же нача́шя иска́ти дру­
га́го человѣ́ка, и́же и понестѝ я, са́мъ
ст҃ы́й взе́мъ бре́мя нося̑ше на ра́мѣ. и
ѻгню̀ разгорѣ́вшуся, в̾ ни̑де та́мѡ. и
бя̑ше изъ ѻгня̀ наказу́я и движа̀ всѣ̑хъ
къ хрс̃то́вѣ вѣ́рѣ, и не вредим̃ бя̑ше ѻгне́мъ,
я́кѡ возду́ху с̾ мо́лніями и гро́мы несу́­
щымъ сту̑дь, и во́ды мно́ги и ту́­
чныя. и бы́вши тишинѣ̀, и помоли́ся пре­
дадѐ дх҃ъ. ієре́й же и́дольскій ви́дѣвъ
чю́до, вѣ́ровавъ во хрс̃та̀, и умоли́въ свою̀
жену̀, сотворѝ ю̀ вѣ́ровати. и посла̀ рабы́ню
свою̀ погреб̾стѝ тѣ́ло ст҃а́гѡ, со бл҃гоуха́ньми
же и поня́вами. и та́кѡ ѻ́ба прія́ста ст҃о́е
кр҃ще́ніе. ѻресті́й же нѣ́кто дія́конъ хри­
сто́въ, взе́мъ чс̃тны́я и́хъ мо́щи съ главо́ю
ст҃а́гѡ киндѣ́я, и дви́гся по авва́куму до́­
йде во єди́нъ дн҃ь, ѿ памѳилі́и въ єнума­
на́дь въ своѐ ѻте́чество, и поста́вль ра́ку,
положѝ ст҃ы́хъ мо́щи рука́ми ієре́йскими,
я́коже ѻ́браз̃ и подо́біе є́сть ст҃ы́я полага́ти;
{#л. хк҃ѳ}

Вто́й же дн҃ь успе́ніе бл҃же́нныя, и вели́­
кія кн҃ги́ни ѻ́льги, ба́бы вели́кагѡ кн҃ѕя
влади́мира.

Сія̀ бл҃же́нная ѻ́льга ро́дом̃ плескови́тинка.
жена́ же бѣ̀ и́горя кня́ѕя всея̀ ру́с̾скія зе­
млѝ, и́же сѣдя́ше в̾ кі́евѣ. и нача̀ княжи́­
ти свѣтосла́въ сы́нъєгѡ̀, бѣ́шя же у́бѡ
всѝ невѣ́дуще бг҃а, куми́рѡмъ служа́ще,
и дія́волу уго́дная творя́ху. Бл҃же́нная
же о́льга кн҃ги́ня мудра̀ су́щи и па́че всѣх̃,
не ма́лѡ печа́ловаше ви́дящи чл҃ки вся̀ дія́во­
ломъ прельще́нны, я́кѡ слы́шавши ѡ вѣ́рѣ
гре́честѣи, и и́де в̾ констянти́нь гра́дъ. то­
гда̀ црс̃твующу цр҃ю̀ ива́ну цымисхі́ю. испы­
та́вши же до́брѣ вѣ́ру хрс̃то́ву, и крс̃ти́ся
ѿ патріа́рха ѳѡті́я. просвѣщена́ же бы́вши
и ра́довашеся дш҃е́ю. поучи́в̾ же ю̀ патріа́рхъ
ѡ вѣ́рѣ и речѐ, бл҃же́на есѝ ты̀ в̾ женах̃ ру́с̾ских̃,
бл҃гословя́тъ бо тя̀ сн҃ове ру́с̾стіи в̾ послѣ́дніи
род̃ вну̑къ твоих̃. бѣ́ бо и́мя є́й на рече́но єле́­
на во ст҃о́мъ кр҃ще́ніи. посе́мъ пріе́мши крс̃тъ
и презвѵ́тера, и и́де въ свою̀ зе́млю. и то́й
крс̃тъ и до нн҃ѣ стои́тъ во ст҃ѣ́й соѳі́и въ ѻлта­
рѣ̀, на деснѣ́й странѣ̀ имѣ́яй пи́смена си́це.
ѡбнови́ся ру́с̾ская земля̀ ст҃ы́мъ кр҃ще́ніемъ,

єго́же прія́тъ ѻ́лга бл҃говѣ́рная кн҃ги́ня.
и ѡбходя́ше всю̀ ру́с̾скую зе́млю, да́ни
и уро́ки уставля́ющи, куми́ры сокруша́­
ющи, я́кѡ и́стинная учн҃ца хрс̃то́ва,
и дая́ше ми́лостыню убо́зѣи ча́ди мно́­
гу. а́ще и пога́нымъ дая́ше, но бг҃а
должника̀ себѣ̀ сотворѝ и́же ю̀ та́кѡ про­
сла́ви, я́кѡ нетлѣ́ніемъ бжс̃твеное тѣло
вѣнча́въ, є́же и до ны́нѣ ви́димо є́сть
всѣ́ми ру́с̾скими сы́нми. чю́дно же по­
жи́вши се́дмьдесять и пя̑ть лѣ́тъ. и на­
ча̀ болѣ́ти, призва̀ сн҃а своегѡ̀ свѣтосла́­
ва, и заповѣ́давъ єму̀ погребьстѝ с̾ земле́ю
ра́вно, а моги́лы несы́пати, нитри́знъ
твори́ти, ни годи́ны дѣ́яти. но посла̀
зла́то къ патріа́рху цр҃я̀ гра́да, и преста́­
вися мцс̃а ию́ля, въ а҃і дн҃ь. послѣди́
же въну́къ єя̀ влади́миръ крс̃тѝ всю̀
зе́млю, и созда̀ цр҃квь во́имя ст҃ы́я
бцд̃ы. и взе́мъ ѿ землѝ тѣ́ло ба́бы
своея̀ нетлѣ́ннѡ, в̾ ложѝ в̾ ра́ку
дре́вяну, и поста́ви въ цр҃кви
ст҃ы́я бцд̃ы. бг҃у на́шему
сла́ва, ны́нѣ и при́снѡ
и во́ вѣки вѣ­
кѡ́мъ;
{#л. хл҃}

Сіѐ сло́во чтѝ покаѳи́смахъ.

Мцс̃а ию́ля въ в҃і дн҃ь. житіѐ и по́двизи
прпд̃бнагѡ оц҃а на́шегѡ миха́ила, игу́ме­
на бы́вша кименьскія ѻби́тели, я́же є́сть
в̾ малеѡ́ньстѣи горѣ̀, в̾скра́й аѳѡ́на
вели́кія горы̀ ст҃ы́я, бл҃госл҃овѝ о́ч҃е.

Мно́зи у́бѡ ст҃і́и мч҃нцы многоразли́чны­
ми му́ками, да́же до сме́рти въ сп҃са
хрс̃та̀ исповѣ́даніи пребы́вше показа́ша­
ся, и без̾сме́ртнымъ и вѣ́чнымъ вѣ­
нцє́мъ сподо́бишася. и та́кѡ дн҃ь ѿ́
дне утвержа́ющеся, и возраста́ше
в̾ ни́хъ вѣ́ра. мно́зиже ѿ чл҃къ ст҃і́и
и пра́ведніи люботру́дное и по́стное є́же
по́ бз҃ѣ житіѐ возлюби́ша, и усе́рднѡ
на вся́кія добродѣ́тели подвиза́шася,
бдѣ́ніемъ же и слеза́ми и всено́щнымъ стоя́­
ніемъ въ своя̀ дш҃я бг҃а всели́шя, и ви­
дѣ́нія восхо́ду сподо́бишася. и сицевы́ми
у́бѡ ст҃ы́ми, повселе́ннѣи все́й цр҃кви
мно́ги, и моли́твеныя до́мы воздвиза́­
хуся, и вели́кія оби́тели составля́ху­
ся. и раз̾сѣ́яся въ ми́рѣ мно́гихъ
по́стникъ чистота̀ и воздержа́ніе ди́вно
ѕѣлѡ̀ и пресла́внѡ. не токможе сє̀,

но и имѣ́ніемъ ѿ рече́ніе и въ пусты́няхъ
пребыва́ніе. ѡни́хъ же речѐ апс̃лъ из̾бра́нный
сосу́дъ паве́лъ. лише́ни скорбя́ще, ѡ ѕло́­
блени, въ пусты́няхъ заблужда́юще, и въ
гора́хъ и въ пеще́рахъ, и въ пропастє́хъ зе­
мны́хъ, и́мъже не бѣ̀ достои́нъ ве́сь ми́ръ.
мно́ѕи же и инѣ́мъ ѻ́бразомъ, и́же по́
бз҃ѣ лу́чшая избира́ху исправле́нія, є́же
ѿлучи́тися вре́меннагѡ ми́ра, и съ бг҃омъ
при́снѡ бы́ти. Сегѡ̀ ра́ди всѣ̑хъ у́бѡ
земны́хъ и мимоходя́щыхъ себѐ ѡбнажа́­
юще, и беспло́тнымъ во́ плоти су̑ще жи­
тію̀ ревну́юще, и́же са́мися к̾ высотѣ̀
добродѣ́телєй, воздержа́ніемъ и бл҃гоговѣ́­
ніемъ, кро́тостію же и без̾гнѣ́віемъ пред̃­
вестѝ усе́рдъствоваша. и ничи́мъже у́бѡ
ме́ньши пре́жнихъ ст҃ы́хъ яви́шася, и
дости́гнуша по́двиги и по́ты, и́же и́ме­
не ра́ди гдс̃а на́шегѡ іс҃а хрс̃та̀ зако́ннѡ
пострада́вшыхъ. всегда́ бо къ неви́димымъ
борю́щеся врагѡ́мъ, до́блественѣ ѡполча́ху­
ся, побѣжда́юще не крѣ́пкую си́лу и́хъ.
по ре́кшему, я́кѡ нѣ́сть на́шя бра́нь къ кро́­
ви и пло́ти, но к̾ нача́лѡмъ и ко властє́мъ
и к̾ миродержи́телємъ тмы̀ вѣ́ка сегѡ̀,
{#л. хл҃а}

к̾ духовѡ́мъ ѕло́бы под̃ нбс̃нымъ. и́хъ же всѝ
пра́ведніи ѡдѣ́яшася въ броня̀ вѣ́ры, и сопро­
ти́въ ста́въ побѣ́ждьше, вѣ́чныхъ и без̃сме́­
ртныхъ бл҃гъ сподо́бишася. я́же самѣ́мъ
гдс̃емъ рече́на бы̑ша, и́хъ же ѻ́ко не ви́дѣ,
и у́хо не слы́ша, и на срд̃це чл҃ку не взы́де,
я́же угото́ва бг҃ъ лю́бящымъ єго̀. кто́
же су̑ть лю́бящіи єго; то́чію ст҃і́и пра́ве­
дніи, и́хъ же до́лжни єсмы̀ всѝ вѣ́рніи хва­
ла́ми вѣнчава́ти, по лѣ́потѣ и достоя́нію
и́хъ, и на дх҃о́вное весе́ліе и́хъ ра́ди на́мъ
достиза́ти по рече́нному, по хваля́ему пра́­
веднику возвеселя́тся лю́діе. но и ны́нѣ­
шняя у́бѡ по́вѣсть вино́вна є́сть на́ше­
му весе́лію, є́же правовѣ́рныхъ людє́й со­
бра́нію. дне́сь бо ѿ бг҃а прославля́емь є́сть,
и ѿ человѣ́къ похваля́емь пра́ведный, пра́­
веднагѡ ра́ди житія̀ єгѡ̀, и мнѡ́гихъ
добродѣ́телєй и трудолю́бія єгѡ̀. и́мъ
же во все́й жи́зни свое́й порабо́тая и послу­
жѝ я́кѡ вѣ́рный ра́бъ гдс̃ви своему̀.
Сегѡ̀ ра́ди и дне́шніи де́нь па́мяти єгѡ̀,
ра́вна святы́мъ пре́жнимъ показу́етъ
єго̀. и́хъже реку̀ ѻбщежи́телнагѡ на­
чалника ѳеодѡ́сія и іѡа́нна по́стника,

и кѷріака ѿше́лника. и єѵа́гріа бл҃же́нна­
гѡ, и́же ѕѣлѡ̀ бѣ̀ до́бръ и хи́тръ
бесѣ́довати, и мы́сли разлуча́ти на добро̀
и ѕло̀ веду́щыхъся, и дово́ленъ сказа́ти
и́хъже уклоня́тися, и я́же храни́ти.
Пото́мъ же и ам̾мѡ́нія чю́днаго оц҃а̀ воспо­
мяну́ти хощу̀, и́же и то́й гдс̃нею бл҃го­
да́тію, су́щымъ въ горѣ̀ нитрі́йстѣй
бра́тіямъ ѡсно́ва воз̾держа́нію. и про́чихъ
ст҃ы́хъ и бг҃оно́сныхъ оц҃ъ, и́же ѕѣлѡ̀
си́лнѡ и я́вьственѡ соверше́нною въ хрс̃та̀
вѣ́рою, и коне́чнымъ воздержа́ніемъ и
моли́твами, на многоѡбра́зныя врага̀
ко́зни подви́гшися, и́миже у́бѡ всю́ду
бж҃ія бога́тнѡ излія́ся бл҃года́ть. по
рече́нному про̃ро́комь, посѣти́лъ єсѝ
зе́млю и упоѝ єя̀. Си́це у́бѡ по­
всю́ду яви́шяся чю́дніи ст҃і́и и бг҃оно́сніи
оц҃ы̀ во єгѵ́птѣ же и виѳаи́дѣ, и во все́й
странѣ̀ палести́ны вели́кія, и́х̾же всѣ́хъ
именова́ти невозмо́жнѡ, исчита́тиже па́ки
реку̀ не возмо́жнѣйше є́сть. подо́бны бо
ѕвѣзда́мъ не чи́сленымъ, я́же сія́ніемъ
свои́мъ нбс̃ная лица̀ украша́ютъ, и вселе́­
нную всю̀ просвѣща́ютъ. и́хъже сочета́нія
{#л. хл҃в}

єди́нъ бг҃ъ вѣ́сть созида́яи и повелѣва́яи.
я́коже гл҃етъ дв҃дъ, то́й речѐ, и бы́ша;
то́й повелѣ̀, и созда́шася. си́це и ст҃ы́хъ
всѣ̑хъ свои́хъ єди́нъ вѣ́сть бг҃ъ имена̀,
я́же су̑ть написа́шася въ кни́зѣ жи́зне­
нѣй. ѿни́хъ же у́бѡ ны́нѣ наста́вшая
по́вѣсть ѡ єди́номъ бл҃же́ннѣйшемъ оц҃ѣ
миха́йлѣ повѣ́даетъ, ка́кѡ пожи́ве и гдс̃ви
своему̀ угодѝ. поне́же єму̀ єщѐ ю́ну
су́щу, роди́телю єгѡ̀ попече́ніемъ,
па́чеже досто́итъ рещѝ, и бжс̃твеною бл҃го­
да́тію навы́кшу єму̀ сщ҃е́ннаго писа́нія.
и ѿ сегѡ̀ уразумѣ̀, я́кѡ прехо́дитъ
ми́ръ се́й, и я́же в̾не́мъ су́етная дѣла̀
вся̀ и помышле́нія льстя́щая человѣ́ки.
Сегѡ̀ ра́ди бл҃же́нный миха́илъ, па́че
всея̀ ми́ра сегѡ̀ красоты̀, возлюбѝ хрс̃то́вы
зако́ны, и́хъ же не словесы̀ хитротво́рны
ми показа̀, но дѣ́лы досточю́дный и́ноче­
скагѡ пребыва́нія совершѝ. уступѝ
у́бѡ сро́дьства велехва́лнагѡ своегѡ̀,
са́наже и вели́чества ѡша́яся, и вся̀
тлѣ́нная бога́тьство и сла́ву ѿ ню́дъ во­
зненави́дѣ, и ни вочто́же в̾мѣнѝ; но
прс̃нѡ у́мныма очи́ма наєди́ну в̾зира́я

нестарѣ́емую жи́знь. сегѡ̀ ра́ди крс̃тъ
на ра́мо пріи́мъ, си́рѣчь єѵг̃а́льски послѣ́дова
подвигополо́жнику хрс̃ту̀ своему̀. ѿ­
и́де у́бѡ въ скра́й ст҃ы́я горы̀ аѳѡ́на;
Сія́ же и вели́кая имену́ема, є́же гл҃ютъ
осми́десяте по́прищъ длина̀, въ преки́ же
два́десяте. высота́ же три́десяте ве́р̾стъ.
Тогда́ бо не бѣ̀ єщѐ мно́го населена̀ ст҃о­
жи́телными и́ноки. ны́нѣ же сія̀ ст҃а́я
гора̀ я́кѡ доброкла́сная ни̑ва, плодя́­
щи до́брую пшени́цу, при́снѡ пло́дъ
стори́чественый принося̀. Прпд̃бный же
оц҃ъ миха́илъ, не въ го́рнюю ча́сть
аѳѡ́на горы̀ ѿи́де, но ѿ восто́чныя
страны̀ въ скра́й єя̀ въ сели́ся, на
мѣ́стѣ, идѣ́же малеѡ́нъ глаго́ле­
ма є́сть гора̀. бѣ́ бо аѳѡ́нъ и и́ны
мно́ги и́мать по себѣ̀ го́ры ка́менныя
и лѣ́сныя. идѣ́же у́бѡ и монасты́ри
мно́зи созда́шася, и́хъ же реку̀;
ст҃а́гѡ аѳана́сія ла́вра. бѣ́ бо то́й
аѳана́сіи учн҃къ прпд̃бнагѡ оц҃а̀ миха́ила,
ѡне́мъ же послѣдѝ повѣ́даємѡ бу́детъ.
Та́же и про́чыя ту̀ вели́кія ѡби́те­
ли бж҃іею бл҃года́тію населе́ни бы́шя.
{#л. хл҃г}

Сказу́ет̾ же у́бѡ сі́и ватопед̃ є́же є́сть ѡби́­
тель сла́вная, в̾ не́й же по́вѣсть ѡ чюдесѝ
прест҃ы́я бцд̃ы ди́вна пред̾лежи́тъ. та́ же
и хилан̾да́ръ, по ру́с̾ки уста̀ льво́ва с̾ ка­
зу́ется ѻби́тель, в̾ не́й же цр҃ковь пре­
чс̃тыя бцд̃ы чс̃тна́гѡ єя̀ в̾веде́нія. идѣ́же
повѣ́даютъ чс̃тна́я влд̃ки хрс̃та̀ бг҃а на́шегѡ
кро́вь въ ст̾кля́ничномъ крс̃тѣ̀, и ст҃ы́я
в̾ласы̀ брады̀ єгѡ̀, ю́же терза́ху без̃зако́­
нніи июдє́и, во́ время ст҃ы́я во́лныя стра́­
сти єгѡ̀, и ст҃ы́я пелены̀ єгѡ̀ и крс̃тъ.
ту̑же и честна́я ико́на прест҃ы́я бцд̃ы,
я́же глаго́лется троєру́чица. и мнс̃трь
и́вєръ нарица́емый, и́же є́сть в̾ скра́й
мо́ря, идѣ́же глаго́лютъ ико́ну прест҃ы́я
бцд̃ы саму̀ ѿ и́веръскія страны̀ по́морю
прише́дшу. и монасты́рь гл҃емый па́­
велъ, идѣ́же со́зданъ нѣ́кіимъ ѻц҃е́мъ
па́вломъ имену́емымъ, живу́щем̾ въ ѯи­
ропота́мѣ, ре́кше в̾ сухо́мъ пото́цѣ.
И ту̀ создана̀ бы́сть цє́рьковь во́имя
ст҃а́гѡ великому́ченика геѡ́ргія, въ
не́йже ѿ честны́хъ арама́тъ два́десять
и се́дмь зе́ренъ положено̀ бѣ̀ въ златѣ́й
арама́тницѣ, и подаю́тъ цє́рькви

ве́ліе бл҃гоуха́ніе. сіе́ же чс̃тно́е арама́то
принесе́ное ѿ ст҃ы́хъ жє́нъ мѷронѡ́сицъ ко́
гробу гдс̃ню, я́коже глаго́летъ бж҃е́стве­
ный лука̀ єѵг̃али́стъ, {*зач̃ рв҃і} во єди́ну же речѐ
ѿ субѡ́тъ, ѕѣлѡ̀ ра́нѡ пріидо́ша на́ гробъ
нося́ще я́же угото́вашя арама́ты.
су̑ть же и и́ни ѻби́тели *по {**во} святѣ́й горѣ̀ во
аѳѡ́нстѣй со́здани бы́шя. в̾ни́хъ же
и ки́мниская ѻби́тель нарица́шеся, на
мѣ́стѣ нарица́емѣмъ малеѡ́нская го­
ра̀, идѣ́же преподо́бный ѻц҃ъ миха́илъ
воспріи́мъ и́ночествующихъ житіѐ. и
та́кѡ н адобродѣ́телныя труды̀ єму̀ по­
двиза́тися, я́кѡ и благо́му єгѡ̀ ста́­
рцу диви́тися ѡне́мъ. но́щь бо и де́нь
бдя̀ на моли́твѣ, преклоня́я колѣ́ни
гдс̃ви своему̀. и въ поуче́ніи кни́жнагѡ
прочита́нія себѐ упраждня́я, и при́снѡ
бж҃е́ствеными словєсы̀ напитова́я дш҃ю
свою̀. по священносло́вію ѱало́мническо­
му є́же речѐ дв҃дъ, хлѣ́бъ а́гг҃льскій я́де
человѣ́къ. бра́шна же и ѻде́жды и вся́когѡ
любосла́стія ми́ра сегѡ̀ удаля́яся. и
вся́кимъ хране́ніемъ по пи́санному срд̃це
своѐ блюстѝ тща́шеся, и ко всѣ́мъ
{#л. хл҃д}

по́ бз҃ѣ любо́вію всегда̀ укра́шенъ быва́­
ше. и такова́гѡ ра́ди добродѣ́телнагѡ
житія̀ єгѡ̀, и благонра́внагѡ ѡбы́чая
поста́вленъ бы́сть ту̀ игу́меномъ. нѣ́­
цыи же у́бѡ ѿ бра́тіи монастыря̀ тогѡ̀,
плотьско́е иму́ще мудрова́ніе, вельмѝ
преподо́бнагѡ ѻц҃а ѡскорбля́ху, и не­
лѣ́потная на́нь глаго́лаху. ѻ́нъ же мно́­
жицею тѣ́мъ, и не преста́ннѡ дш҃епо­
ле́зная вѣща́я наказа́нія, и ничи́мъ
же ѡпеча́луя и́хъ, илѝ чи́мъ проти­
вля́яся и́мъ. но ѿходя̀ на єди́нѣ
моля́шеся бг҃ови ѡни́хъ глаго́ля, гдс̃и
бж҃е на́шъ, ты̀ заповѣ́дая на́мъ и́скре­
няго люби́ти я́кѡ себѐ. ты̀ влд̃ко по­
зна́лъ єсѝ усе́рдіе и предъложе́ніе, мо­
лю́тися не презрѣ́ти и спасе́нія дш҃я́мъ
и́хъ; но поми́луй тѣ́хъ, и да́ждь
стра́хъ тво́й въ срд̃ца̀ и́хъ є́же вѣ́дѣти
тя̀, и рабо́тати тебѣ̀ во и́стину, и
чистото́ю се́рдьца, да и ті́и на тя̀ наде́­
жду и́мутъ. и пото́мъ па́ки приходя̀
уча́ше и́хъ по ѻбы́чаю глаго́ля. бра́тіе
єли́ка є́сть крѣ́пость на́шя, подви́гне­
мся ѡ спасе́ніи свое́мъ, пре́жде да́же

не пріи́детъ вре́мя, в̾ не́же восхо́щемъ,
но ничто́ же возмо́жемъ. а́ще ны́нѣ
ѡблѣни́мся ѡ себѣ̀ пла́кати, дѣ́лаемъ
ны́нѣ усе́рднѡ добродѣ́тель. глаго́лю бо
ва́мъ, а́ще бы́сте вѣ́дали я́же на нб҃сѣ́хъ
угото́ванная бл҃га́я ст҃ы́мъ, и гряду́щее
ѡбѣтованіе и́мъ, и ка́кѡ ѿпа́дшіи ѿ́гдс̃а
му́читися и́мутъ, и томле́нія я́же
лѣни́вымъ угото́вашася, па́че же по­
зна́вшымъ и́стину, и не досто́йнѣ в̾ не́й
жи́вшыхъ, ни ѡчесо́мъ ино́мъ бы жела́­
ніе держа́ло на́съ. сегѡ̀ ра́ди ны́нѣ
пла́чемъ себѐ бра́тіе, єгда̀ вре́мя и́ма­
мы. да не когда̀ прише́дшу вре́мени,
є́же по́долгу єстества̀ на́шегѡ измѣ­
не́нію, и ѡбря́щемся тогда̀ прося̑ще
вре́мя къ пока́я́нію, въ не́же сему̀ вре́мя
я́вѣ ѿи́де. во а́дѣ бо речѐ нѣ́сть кто̀
исповѣ́сться тебѣ̀. не по пуща́емъ бра́­
тіє вѣ́ку сему̀ ма́лу су́щю и ху́ду,
восхи́тити бл҃же́нную ѻ́ну и без̾ сме́ртную
жи́знь ѿ на́съ. убои́мъся про́чее и
вострепе́щемъ, да не ка́кѡ и́же по́ пло­
ти оц҃ы̀ на́ши въ ми́рѣ живу́ще,
и жите́йскими ку́плями съ плета́еми,
{#л. хл҃е}

и мня́ще на́съ ѿсю́ду у́же бл҃же́нную о́ну
прія́ти жи́знь. тогда́ же ѡбря́щутъ ся
ѡсужда́юще на́съ си́це гл҃юще, ка́кѡ по­
страда́сте въ стезя́хъ ва́шихъ и не потре́­
бни бы́ша пло́дѡве трудѡ́въ ва́шихъ.
се́ бо возгорѣ́ся ѻ́гнь на вы̀. сегѡ̀ ра́ди
бра́тія ѿвсея̀ душѝ подви́гнемся сме́рть
по вся̀ часы̀ предъ очи́ма имѣ́ти,
и стра́шную му́ку при́снѡ помышля́­
ти. и́мъ же ѡбы́кну у́мъ на́шь в̾ чю́в̾­
ствіи води́тися, и мяту́щыяся в̾ себѣ̀
по́мыслы єле́ѡмъ умаща́ти, и з̾дра́­
вы твори́ти. смири́мъ себѐ и не тще­
сла́вныся яви́мъ, и вся́когѡ ми́ръскагѡ
мудрова́нія ѿ чюжди́мся. подви́гнемъ­
ся до́блественѣ и не лѣ́ностнѡ поклони́мъ­
ся гдс̃ви своему̀. а́ще у́бѡ си̑це
себѐ поучи́мъ, во и́стину хра́мъ бг҃ови
бу́демъ, и въ сели́тъ ся въ ны̀ дх҃ъ
ст҃ы́й, и пребу́детъ въ на́съ хрс̃то́съ.
и ни єди́но сатани́но кова́рьство возмо́­
жетъ на́съ прельсти́ти. и та́кѡ у́бѡ
преподо́бный оц҃ъ миха́илъ всегда̀ поуча́я
бра́тію свою̀, и на ставля́я къ позна́­
нію бж҃ію дш҃еспаси́телнагѡ путя̀.

По дне́хъ же нѣ́которыхъ изы́де преподо́­
бный ѻц҃ъ миха́илъ, ѿ ки́менскія ѻби́­
тели въ црс̃твующіи гра́дъ, ну́жныя ра́­
ди монасты́рьскія потре́бы. Воєво́да же
бѣ̀ тогда̀ въ црс̃твующемъ гра́дѣ зефина­
зе́ръ имену́емый. бѣ̀ унего̀ ѻ́трокъ
пребыва́я и́менемъ авра́міи, и́же послѣдѝ
бы́сть аѳана́сіи. тогда́ бо єму̀ су́щу
ю́ну єщѐ лѣ́ты, но сѣ́ду смы́сломъ.
я́ко же речѐ прему́дрый соло́мѡнъ, сѣди́­
на же є́сть му́дрость человѣ́ку, и во́­
зрастъ ста́рости єго̀ житіѐ не скве́рне­
нѡ. Слы́шавъ же у́бѡ ѻ́трокъ авра́­
міи ѡ преподо́бнѣмъ ѻц҃ѣ миха́илѣ,
я́кѡ пріи́де ту̀ ѡт ки́мен̾скагѡ монасты­
ря и ѕѣлѡ̀ ѡне́мъ возра́довася. слы́­
шавъ бо ѡне́мъ ѿ мно́гихъ, я́кѡ вели́къ
в̾ добродѣ́телехъ му́жь, и хвали́мь є́сть
ѿ мно́гихъ, я́кѡ ди́венъ наста́вникъ
и́ноческагѡ жи́тельства. сегѡ̀ ра́ди всѣ́мъ
срд̃цемъ жела́я єго̀ ви́дѣти, и наслади́ти­
ся ѿнегѡ̀ дш҃епита́телными словесы̀, мо­
ли́тву же и бл҃гослове́ніе получи́ти ѿнегѡ̀,
є́же и бы́сть. а́біе у́бѡ пріи́де, и в̾нима́я
прпд̃бнагѡ словесє́мъ и поуче́ніемъ єгѡ̀.
{#л. хл҃ѕ}

тогда́ же ѻ́трокъ авра́міи и ѡ себѣ̀ блаже́­
нному миха́илу повѣ́да, каковы́хъ ро­
ди́телей сн҃ъ, и что̀ вина̀ є́же послу́­
чаю пребыва́нія в̾ дому̀ воєво́ды ѻ́ного.
пото́мъ же преподо́бному и та́йну свою̀
ѿкры̀, зане́же ве́ліе промышле́ніе на­
лежи́тъ єму̀ сподо́битися ѻ́браза и жи­
тія̀ и́ноческагѡ. Преподо́бный же ѻц҃ъ
миха́илъ внегда̀ єму̀ слы́шати ѿ ѻ́тро­
ка жела́ніе єгѡ̀, а́біе проразумѣ̀ ѡне́мъ
я́кѡ хо́щетъ бы́ти сосу́дъ дх҃а ст҃а́гѡ,
и похвали́въ бг҃а ѡ ра́зумѣ, и ѡ до́­
бромъ совѣ́тѣ єгѡ̀, и ѕѣлѡ̀ возлюбѝ
ѻ́трока, и благословѝ єго̀. сіе́ же у́бѡ
всѐ бы́сть не бе́зъ бг҃а, но строе́ніем̾
всеси́лною єгѡ̀ десни́цею управля́емѡ є́сть
ст҃ы́хъ єгѡ̀ дѣ́ло и сло́во и у́мъ.
Во́ время же у́бѡ о́но, внегда̀ преподо́бно­
му бесѣ́дующу къ блаже́нному о́троку авра́­
мію, пріи́де тогда̀ къ преподо́бному оц҃у
миха́илу восто́чный воєво́да ники́форъ,
по сро́дьству у́бѡ а *не псе́й {**племя́­нник̃} єгѡ̀, и слы́­
шавъ бесѣ́ду стры́я своегѡ̀ миха́йла,
є́же со о́трокомъ авра́міемъ, и возрадо­
вася ѕѣлѡ̀. и ѿ ту́ду позна́нъ бы́сть

ѻ́трокъ авра́міи воєво́дѣ ники́фору, ви́­
дѣвъ бо єго̀ по́ бз҃ѣ бл҃горазу́мна и смы́­
слена. и хотя̀ увѣ́дати, вопроша́етъ
ѡне́мъ бл҃же́ннаго, кто̀ се́й ѻ́трокъ є́сть
и ѿку́ду, и чесѡ̀ ра́ди сѣ́мѡ пріи́де.
Преподо́бный же по́дробну вся̀ ѡ авра́міи
изречѐ. и повѣ́да ѡне́мъ, я́кѡ о́трокъ
се́й и́нокъ хо́щетъ бы́ти. к̾ нему́ же
ники́форъ глаго́ла, хотѣ́лъ бы́хъ о́ч҃е
и а́зъ стобо́ю вре́мя пребы́ти, и ѡ жи­
тіѝ и́ноческихъ нра̑въ навы́кнути, не́гли
и а́зъ твои́мъ хода́тайствомъ хрс̃то́ву ст҃о́­
му ста́ду сочта́нъ бу́ду. Бл҃же́нный же
миха́илъ ѿвѣща́въ єму̀ речѐ, бг҃ъ ча́до
да испра́витъ стопы̀ твоя̀ я́коже хо́щетъ.
ты́ же вѣ́рою утвержа́йся я́же во хрс̃та̀ бг҃а,
и въ за́повѣдехъ єгѡ̀ при́снѡ бо́дръствуя
пребыва́й. и къ бу́дущымъ наде́жамъ
в̾ зира́я, у́мъ сво́й ѿ су́етныхъ ми́ра
сегѡ̀ ѿвраща́й. Сія́ же слы́шавъ ники́­
форъ ѿ преподо́бнагѡ оц҃а̀ миха́ила, вся̀
помышле́нія своя̀ ѿ пли́щєвъ приводя̀ во­
утѣше́ніе сла́дкагѡ поко́я. и пото́мъ
ники́форъ в̾ до́мъ сво́й ѿи́де, помышля́я
ка́кѡ бы нелиши́тися прпд̃бнагѡ сожи́тія.
{#л. хл҃з}

Бл҃же́нный же миха́илъ ѿ црс̃твующагѡ гра́­
да в̾ ки́менскій монасты́рь возврати́ся.
Авра́міи же не потечѐ к̾ тому̀ на мирска́я му­
дрова́нія, нижѐ жите́йскія ве́щи соста­
вля́я, но пали́мь бы́сть преподо́бнагѡ
ѻц҃а любо́вію, и не пожида́я долготы̀ дне́й,
а́біе ѿи́де къ преподо́бному ѻц҃у миха́илу.
и приступи́въ мо́литъ, да ѡблече́тъ єго̀
во и́ноческую ѻде́жду, и бу́детъ при­
чте́нъ ко из̾бра́нному ста́ду словє́сныхъ
ѻвє́цъ хрс̃то́вы ѻгра́ды. Преподо́бный же
миха́илъ вѣ́дый сего̀, я́кѡ є́сть и́скра
в̾не́мъ бж҃е́ственагѡ у́гля, я́же согрѣ­
ва́ющи срд̃ца всѣ́хъ спасти́ся тре́бующихъ.
пре́жде бо єщѐ и въ црс̃твующемъ гра́дѣ
вся́кѡ соглаша́хуся ѡсе́мъ. сегѡ̀ ра́ди
не ѿсыла́ше того̀ вре́менному искуше́нію,
но в̾ ско́рѣ вся̀ узако́неная скончава́ше на
не́мъ, въ бж҃е́ственый и спаси́телный и́но­
ческагѡ священноѻдѣя́нія ѡблечѐ того̀
ѻ́бразъ. вре́мя у́бѡ мирска́гѡ по́прища
пре́йде, и ѡбновле́ніемъ восхо́да съ бг҃омъ
бы́ти пріе́млетъ. ри́зы бо измѣня́етъ,
и житіѐ бг҃оподража́телнѡ явля́етъ, и в̾ мѣ́­
стѡ авра́мія, аѳана́сіи пре именова́ся.

ѡбы́чаю же не су́щу ту̀ въ ки́мен̾стѣй
ѻби́тели, є́жебы власяни́цами ѡдѣ́яти­
ся мни́хѡмъ. бл҃же́нный же миха́илъ
усмотри́въ побо́рнѣйшаго на супоста́та рато­
бо́рца аѳана́сія, тяжча́йшее ѻру́жіе
возлага́етъ на́нь, во власяни́цу того̀ ѡбле­
чѐ, и хрс̃то́ва во́ина храброду́шна предъ­
успѣ̀. моля́щужеся аѳана́сію, ста́рцу
блаже́нному миха́йлу, дабы̀ єму̀ за́­
повѣдь положи́лъ єди́ною я́сти чре́зъ всю̀
седми́цу. Бл҃же́нный же миха́илъ ѿ­
сѣка́я во́лю ча́да и ученика̀ своегѡ̀ аѳана́­
сія, чрезъ трѝ днѝ повелѣ̀ єму̀ я́сти.
и па́ки и́но моля̀ ста́рца аѳана́сіи,
да повели́тъ єму̀ воз̾лещѝ на одрѣ̀ и на
рогози́нѣ. ѻ́нъ же на землѝ повелѣ̀
воз̾лещѝ єму̀. не то́кмо же сіѐ єди́но
творя̑ше аѳана́сіи, но и въ цр҃ковныхъ
чи́нѣхъ всѣ́мъ служа́ше по повелѣ́нію оц҃а̀
своегѡ̀ прпд̃бнагѡ миха́ила. въ про́чая
же вре́менная упражне́нія, сщ҃е́нныя
кни́ги писа́ше, по за́повѣди же ста́рца
и оц҃а̀ своегѡ̀ миха́ила. и такова́гѡ
ра́ди єгѡ̀ трудолю́бія, ѿ всегѡ̀ ли́ка
бра́тіею бл҃гословля́емь и чюди́мь быва́ше.
{#л. хл҃и}

и за четы́ре лѣ́та всѐ и́ноческое житіѐ испра́­
ви, и вся́къ ви́дъ преподо́бныя дѣ́тели
пре проводѝ. и нака́занъ бы́сть ѿ бл҃же́­
ннагѡ ста́рца бдѣ́нію и посту̀ и всено́щно­
му стоя́нію, и про́чимъ всѣ́мъ соверше́­
нымъ трудѡ́мъ и́ноческагѡ по́двига.
и пото́мъ въ без̾мо́лвіє ѿ преподо́бнагѡ
оц҃а̀ миха́ила ѿрѣше́нъ бы́сть, на мѣ́­
сто, идѣ́же ѿстоя́ше ки́мин̾скія
ѡби́тели по́прище єди́но. и дадѐбл҃же́­
нный ста́рецъ заповѣ́даніе и́но, не кто­
му̀ у́бѡ въ тре́тіи де́нь я́сти повелѣ̀
я́кѡ навы́че, но во в̾торы́й де́нь хлѣ́бъ
су́хъ, и ма́лѡ воды̀ въ куша́ти. въ тріе́хъ
же постѣ́хъ в̾ пя́тый дн҃ь я́сти повелѣ̀.
спа́ти же не на землѝ к̾ тому̀, но на рогози́­
ницѣ и одрѣ̀ я́коже пе́рвѣє. вся́же
гдс̃ьскія пра́здники и в̾ тѣ̀ са́мыя седме­
ри́чныя недѣ́ли, ре́къше воскрс̃ныя,
ѿ ве́чера да́же до тре́тіягѡ часа̀ днѐ,
пребдѣ́ти въ моли́твахъ и славословле́ніихъ
повелѣ̀. Сія́же єму̀ заповѣ́да пре­
подо́бный оц҃ъ миха́илъ, па́ки ѿлуча́­
ше єго̀ ѿ во́ли своея̀, є́же да и бы́ти
єму̀ предъ успѣва́ше вы́шъшу я́рости

и похоти вся́кія и стра́сти; илѝ да
тогѡ̀ добле́стію и про́чыя мни́хи воста­
вля́ше на по́двиги; илѝ да и всѝ чело­
вѣ́цы въ наказа́ніе и сла́дость прии́мутъ
въ добродѣ́тели веду́щимъся. идѣ́же бо
плодѡ́мъ прозяба́ющымъ благи́мъ, ту̑
же и сосу́дѡмъ уготовля́ющимся мнѡ́­
гимъ. По́ времени же нѣ́коемъ ѿ црс̃твую­
щагѡ гра́да в̾ ки́менскій монасты́рь пріи́­
де преждерече́нный, и́же бесѣ́довавый
съ преподо́бнымъ миха́йломъ, и со авра́­
міемъ ѻ́трокомъ бы́вшемъ, восто́чный
воєво́да ники́форъ анеѱе́й єгѡ̀. и по
ѻбы́чаю в̾ ше́дъ къ стры́еви своему̀ препо­
до́бному миха́илу, и бесѣ́дова с̾ни́мъ.
ту́же и ѡ ѻ́троцѣ увѣ́дѣти хотя̀,
вопроша́ше преподо́бнагѡ си̑це глаго́ля,
гдѣ̀ є́сть ѻ́ч҃е ѻ́трокъ авра́міи, єго́ же
ви́дѣхъ с̾ тобо́ю въ црс̃твующемъ гра́дѣ на́­
шемъ, и слы́шахомъ собесѣ́дьствующа
тѝ к̾на́мъ. Преподо́бный же ѿвѣща́въ
речѐ к̾ нему̀, ѡ авра́міи ли вопроша́еши,
и́же мо́литъ бг҃а за спасе́ніе ва́ше, у́же
бо ны́нѣ и́нокъ є́сть, преименова́вый­
ся ѿ мир̾ски́хъ аѳана́сіи. и пото́мъ вся̀
{#л. хл҃ѳ}

по́двиги я́же су̑ть в̾ чину̀ и́ноческагѡ
пребыва́нія изречѐ ѡне́мъ. Ники́форъ
же слы́шавъ сія̀, па́че к̾ нему̀ любо́вію
возгорѣ́ся, мо́литъ стры́я своегѡ̀ бла­
же́ннаго миха́ила, да повели́тъ єму̀
итѝ ко аѳана́сію. бѣ́ бо єго̀ ѕѣлѡ̀ ви­
дѣ́ти жела́я, поне́же са́мъ єго̀ зна́яше.
та́же и ѿ блаже́ннагѡ миха́ила ублажа́ема
и похваля́ема єго̀ слы́шаше. Прилучи́­
жеся тогда̀ къ блаже́нному миха́илу при­
итѝ и бра́ту ники́форову льву̀ патри­
кі́ю, и се́й та́коже возжелѣ̀ ви́дѣти
аѳана́сія. Бл҃же́нный же миха́илъ речѐ
и́ма, благовре́меннѡ у́бѡ проше́ніе ва́ю
ѽ возлю́бленая, є́же вы̀ про́сита ви́дѣ­
ти аѳана́сіа, сѐ ны́нѣ покажу̀ ва́ма.
ѻ́наже ско́рѡ тща́щася итѝ. преподо́­
бный же па́ки кни̑ма речѐ, не та́кѡ,
но ѻ́нъ па́че да пріи́детъ къ ва́ма. ѻна́
же блаже́ннаго ста́рца умоли́ста, и
усе́рднѡ ко аѳана́сію идо́ста. Слы́шавъ
же аѳана́сіи къ себѣ̀ иду́щя и́хъ, ѿ
безмо́лвія из̾ше́дъ, и к̾ни́ма бесѣ́дова,
многому́дрыми словесы̀ напая́я и́хъ,

и сѣ́я в̾ ни́хъ сѣ́мя бл҃гочести́выя вѣ́­
ры. ѻни́же ѿ сла́дости ѻ́ногѡ словє́съ
тольма̀ уловле́ни бы́ша на дх҃о́вную лю­
бо́вь єгѡ̀, я́кѡ помы́слити и́мъ и
при́снѡ бы́ти с̾ ни́мъ, и съ водвори́тися
я́кѡ ѿбу́ри в̾ зати́шіє без̾ мо́лвія и
мл҃твы єгѡ̀. но оба́че съ крати́ста бе­
сѣ́ду, и къ прпд̃бному миха́илу воз̾вра­
ти́стася у́бѡ, си́це гл҃аху к̾ нему̀,
бл҃года́ть исповѣ́дуем̾ тѝ ѻ́ч҃е, я́кѡ пока­
за́лъ єсѝ на́мъ сокро́вище сокрове́нное насе­
лѣ̀ ст҃ы́я ни́вы па́ствы своея̀. А́біе же
прпд̃бный оц҃ъ миха́илъ, к̾ себѣ̀ бы́ти
повелѣ̀ бл҃же́нному аѳана́сію. ѻ́нъ же
с̾ко́рѡ пришед̃, и всѐ по́чину и́ноческагѡ
наказа́нія, прпд̃бному миха́йлу оц҃у сво­
ему̀ и ста́рцу обы́чное поклоне́ніє сотво­
рѝ, и прѡ́чимъ. и мл҃тву ѿ бл҃же́ннагѡ
прія́тъ. и повелѣ́вшу прпд̃бному па́ки
бесѣ́довати к̾ ники́форуже и льву̀.
Словеса́ бо бѣ́ша єму̀ цѣлому́дрена су̑ть
и уче́нія дх҃о́вна, ѿ ни́хъ же и ча́дѡмъ
поражда́тися є́сть возмо́жно. я́ко­
же и бж҃е́ственый апо́столъ к̾ нѣ́кимъ глаго́­
летъ, ѡ хрс̃тѣ́ бо іс҃ѣ бл҃говѣствова́ніемъ
{#л. хм҃}

а́зъ бо вы̀ роди́хъ. и ничто́же у́бѡ
и́но, но є́же ѡ бл҃гоче́стіи и слы́шати и
гл҃ати. я́коже бо чиста̀ нѣ́кая вода̀
и сладка̀ всѣ́мъ присѣдя́щымъ потре́бна
су̑ть ко напое́нію же и ко умове́нію, икъ
про́чымъ ну́ждамъ. та́кѡ и аѳана́сіево
бесѣ́дованіе ко ники́фору же и льву̀
толи́кѡ у́бѡ удо́бнѡ и поле́знѡ, я́кѡ
и самому̀ блаже́нному оц҃у чюди́тися
сему̀. сегѡ̀ ра́ди прпд̃бный оц҃ъ миха́илъ
къ ники́фору же и льву̀ си́це речѐ.
внима́йте ча́да ѡ благо́мъ словесѝ, и ѡ
мое́мъ се́мъ наказа́ніи. ѿсе́лѣ у́бѡ
возложи́те вся̀ своя̀ помышле́нія сему̀
и́ноку аѳана́сію, и повину́йтеся єму̀
во все́мъ я́кѡ оц҃у своему̀. єму́же
и а́зъ предаю̀ и поруча́ю соста́вити сло́во,
є́же ко исправле́нію ва́шегѡ спасе́нія.
ѻна́ же бл҃же́ннаго миха́йла удо́бнѡ по­
слу́шаста, и аѳана́сію и́ноку я́кѡ
оц҃у повину́стася, и па́че с̾ любо́вію
вѣ́ру смѣси́въша къ нему̀ прилѣжа́ста.
а́лчющая бо и́хъ бл҃горо́дная язы́ка,
бл҃го язы́чіемъ испо́лни, и словесы̀ душе­
спаси́телными срд̃ца̀ єю̀ на пита̀.

и дивля́стася ѡ уче́ніи єгѡ̀, па́чеже
ѡ смире́ніи и покоре́ніи, є́же къ ста́рцу
и оц҃у своему̀ преподо́бному миха́илу.
сл҃нца бо сія́юща съ крыва́тися єго̀ нари­
ца́етъ. себе́ же ѕвѣзду̀ пока́зовати­
ся прети́тъ. Бл҃же́нный же миха́илъ,
я́кѡ при́снагѡ ча́да своегѡ̀ ти́хостію на­
казу́я глаго́летъ. ча́до аѳана́сіе, оц҃у
своему̀ и ста́рцу мнѣ̀ проти́венъ не бу́­
ди, да не плод̃ преслуша́нія го́ркую сме́рть
по жа́ти себѣ̀ и́маши. Аѳана́сіи же
преще́нія оц҃а̀ своегѡ̀ убоя́ся, и по­
велѣ́нію преподо́бнагѡ повину́ся, и
па́ки нача̀ слове́сную постира́ти трапе́зу
ка́кѡ у́бѡ коре́нія ѕло́бы єрети́ческагѡ
прозябе́нія ѿсѣка́ти, и правовѣ́рнѡ
христія́нскую вѣ́ру всегда̀ соблюда́ти,
и разумѣ́ти си́лу и высоту̀ и сла́ву ст҃ы́я
собо́рныя и апс̃льскія цр҃кве. И ѿто́лѣ
у́бѡ ники́форъ же и ле́въ патрикі́й,
че́сть и вѣ́ру ве́лію ко аѳана́сію стяжа́­
ста. къ стры́еви же своему̀ преподо́­
бному оц҃у миха́илу к̾ тому̀ ни ѡче́мъже
про́чее стужа́юща, но ѡвсе́мъ прихожда́ста
вопроша́стася, и моли́твы пріима́ста
{#л. хм҃а}

ѿ аѳана́сія. сіе́ же всѐ бы́сть, не
зае́же несмы́слящу, илѝ не хотя́щу
бл҃же́нному миха́илу учи́ти лю́ди бж҃ія,
но зае́же ста́рости у́же ѡдолѣва́ющи,
не не высо́къ у́бѡ дѣ́лы и се́й преподо́бный
миха́илъ, но смире́нъ мы́слію, бесѣ́­
доюже ѕѣлѡ̀ добропрія́тенъ, кро́токъ
не гнѣвли́въ, милосе́рдъ, сла́докъ в̾ сло­
весѣ́хъ, сладча́йши же во бл҃гонра́віи.
ти́хъ по прети́ти, наказа́емъ хвали́­
ти. и что́ми исчита́ти сія̀. мно́га
бо ѿ дре́внихъ оц҃ъ увѣ́дѣхъ, я́же
и́мъ добродѣ́тели созида́еми къ по́льзѣ
дш҃е́внѣй, но немощи ра́ди на́шея писа́­
нію преда́ти не мо́жемъ, ни бо̀ єсмы̀
дово́лни къ по́вѣсти таковы́хъ себѐ в̾да́­
ти исправле́нію. посе́мъ же у́бѡ ни­
ки́форъ воєво́да, и ле́въ патрикі́й ѿ
кими́нскагѡ монастыря̀ въ цр҃ьствующіи
гра́дъ возъврати́стася. Се́й у́бѡ ни­
ки́форъ єго́ же ны́нѣ гл҃етъ, и́же ане­
ѱе́й бл҃же́ннагѡ миха́йла восто́чный воєво́­
да, и́же послѣдѝ цр҃ь бы́сть гре́кѡмъ
въ констянти́нѣ гра́дѣ, по рома́нѣ бы́вшем̃
цр҃ѣ, сн҃ѣ констянти́на багряноро́днагѡ

и́же и фо́ка въ црс̃твеныхъ гранесе́хъ име­
нова́шеся. не се́й у́бѡ здѣ̀ глаго́лется,
и́же маврикі́я цр҃я̀ уму́чи, и црс̃тво
єгѡ̀ восхи́ти. и поне́мъ црс̃твова мучи́­
тель нарица́шеся да́же и до ны́нѣ во
исторі́яхъ црс̃твеныхъ, и́же за мно́гѡ
вре́мя бы́сть до сегѡ̀ ники́фора фо́ки.
а́ще у́бѡ и ѻбои́мъ єдино є́сть пре имено­
ва́ніе, но ро́да ино́гѡ и дѣ́тельми разли́­
чными в̾ жи́зни свое́й показу́ющеся.
є́й у́бѡ ники́форъ фо́ка, єго́ же ре­
че́мъ анеѱе́й блаже́ннагѡ миха́ила, вѣ́­
рою благочести́въ сы́й, и полѣ́потѣ є́сть
ве́сь бла́гъ, я́коже повѣ́даютъ ѡне́мъ
кни́ги црс̃твеныя. ѻ́ныйже фо́ка му­
чи́тель именова́ся, и ца́рьствова по ма­
врикі́и цр҃ѣ̀. ники́форъ же фо́ка бла­
гочести́въ именова́ся, и црс̃твова по ро­
ма́нѣ констянти́новѣ сн҃ѣ багряноро́­
днагѡ. въ тѣле́сныхъ же добро́тахъ
и душе́вныхъ нра́вѣхъ благода́тьми вся́­
кѡ укра́шенъ, не то́чію же, но и въ по­
бѣ́дахъ си́ленъ по правовѣ́ріи цвѣтя́­
ше. сегѡ̀ ра́ди и восто́чный воєво́да
пре́жде именова́шеся. ѕѣлѡ́ бо хра́бръ
{#л. хм҃в}

и крѣпкѡду́шенъ на сопроти́вныя показа́­
ся. Глаго́летъ бо ся ѡне́мъ и́же кри́тъскій
ѻ́стровъ ѿ ага́рянъскихъ ру̑къ исхи́ти.
и антіо́ховъ гра́дъ, и́же пре́жде изма́­
ильтескимъ ѻру́жіемъ лѣтоплѣне́ніемъ
в̾зя́тый, се́й ники́форъ фо́ка къ ма́те­
ри градовѡ́мъ констянти́ню гра́ду воз̾­
вратѝ, и а́ки преудобря́емую ѻтроко­
ви́цу, чю́дною красото́ю добро́тами пе́­
рвагѡ благолѣ́пія украсѝ. та́же и всю̀
асѷрі́ю ѿ сопроти́вныхъ ру̑къ, пресла́внѡ
воєво́дьствова́въ свободѝ. єще́ бо єму̀
на́ брани су́щу, сме́рть рома́на цр҃я̀ во­
схи́ти. и тогда̀ у́бѡ єго̀ все наро́­
днымъ любоче́стіемъ по рома́нѣ црс̃кимъ
вѣнце́мъ вѣнча́шя. Сія́же вся̀ испо­
вѣ́даю, не воєво́ду ники́фора велича́ю,
но бл҃же́ннаго миха́ила сро́дьство напису́я
явля́ю. обы́чай у́бѡ ст҃ы́хъ оц҃ъ,
є́же писа́нію житія̀ и́хъ предава́ти.
пону́жди же и роди́тели и́хъ воспомина́­
ти, илѝ сро́дьства и́хъ явля́ти. я́ко­
же здѣ̀ и ѡ ники́форѣ фо́цѣ гре́честѣмъ
цр҃ѣ, сро́дницѣ блаже́ннагѡ миха́ила

написа́шеся. поне́же бл҃же́нный ѻц҃ъ ст҃ы́й
миха́илъ, єщѐ ѿ младе́нческа во́зраста
и́ночествовати ѡбы́че, и пусты́нное
лобыза́ти жи́тельство я́ко же пи́шетъ,
вся̀ тлѣ́нная бога́тьства и сла́ву ми́ра
сегѡ̀ возненави́дѣ, и я́кѡ уме́ты ни
вочто́же въмѣнѝ, да єди́наго би́сера
хрс̃та̀ приѡбря́щетъ. и та́кѡ у́бѡ по­
си́хъ, и́хъже бєсѣ́доваху ники́форъ
и ле́въ со бл҃же́ннымъ аѳана́сіемъ, препо­
до́бный ѻц҃ъ миха́илъ, вся̀ приходя́щыя
к̾нему̀ лю́ди, мл҃твы ра́ди ю́же при­
има́ху ѿ негѡ̀ и бл҃гослове́нія, ко аѳона́­
сію ѿ сыла́ше и́хъ. си́це глаго́ла и́мъ,
ѿсе́лє ча́да внима́йте себѣ̀ словеса̀ моя̀
въня́тнѡ и разу́мнѡ, и́же у́бѡ
приходя́щіи къ смире́нію моему̀ бл҃го­
слове́нія ра́ди. ны́нѣ же въ мѣ́стѡ
менѐ, к̾ сему̀ и́ноку аѳана́сію прихо­
ди́те, и ни въче́мъ же єго̀ преслу́шай­
те, я́кѡ въне́мъ хо́щетъ яви́ти бг҃ъ па́­
ству лю́дємъ свои́мъ па́че менѐ, но
не насе́мъ мѣ́стѣ. поне́же преподо́бный
ѻц҃ъ миха́илъ ѿ просія́вшія въне́мъ дх҃а
бл҃года́ти, проразумѣ́въ аѳана́сія
{#л. хм҃г}

я́кѡ вели́къ нарещи́ся хо́щетъ, не ѿче­
ловѣ́къ то́чію но и ѿ́ бг҃а. во все́мъ бо
подража́я бг҃ому́дрымъ ѻц҃є́мъ, и при­
тяжава́я ѿ ю́на во́зраста ста́рческій
ра́зумъ. Преподо́бный же миха́илъ у́же
въ ста́рость глубо́ку в̾ни̑де, и болѣ́­
зньми ча́стыми ѡтягче́нъ быва́ше,
па́стыря у́бѡ въ себѐ мѣ́стѡ въ ки́минъ
ст҃ѣ́й ѻби́тели по ста́вити хотя̑ше
аѳана́сія. ѻ́нъ же сіѐ ѿ нѣ́коегѡ бра́та
увѣ́дѣвъ, себѐ са́мъ не досто́йна
суди́въ, па́стыря бы́ти душя́мъ,
бѣгу́нъ ѿ ту́ду яви́ся, и къ дре́­
вле люби́мому аѳѡ́ну ѿхо́дитъ.
изъслѣ́дивъ жесточа́йшеє пребыва́ніе,
є́же жела́ше. ста́рцу себѐ нѣ́коему
под̾ нача́ло въруча́етъ. та́же умо­
ля́етъ єго̀ и кни́гамъ ѿ негѡ̀ научи́­
тися. творя̀ себѐ ничто́же вѣ́ду­
ща, и писа́нія ѿ ню́дъ не разумѣ́юща,
къ тому́ же и и́мя въ мѣ́стѡ аѳана́сія,
варна́ву себѐ пре именова̀. все́же у́бѡ
сіѐ сегѡ̀ ра́ди бы́сть, я́кѡ да не бу́­
детъ позна́нъ ѿ преже рече́ннагѡ льва̀
маги́стра, ники́форова бра́та.

но ника́кѡ же та́мѡ утаи́тися возмо́­
же. я́коже ѡ не́мъ повѣ́даетъ в̾ кни́­
зѣ житія̀ єгѡ̀, ка́кѡ позна́нъ бы́сть,
и ка́кѡ бесѣ́дова с̾ ники́форомъ, у́же
воцр҃и́вшемся тогда̀ надъ гре́ки. Ст҃ы́й
же преподо́бный ѻц҃ъ миха́илъ, пожи­
вѐ лѣ́та дово́лна в̾ до́бромъ исповѣ́да­
ніи, и въ трудѣ́хъ и поще́ніихъ,
и до́йде ста́рости глубо́кія, ѿ бж҃е́стве­
нагѡ славосло́вія. пѣ́сней же и пѣ́нія
дх҃о́внагѡ ника́ко же преста́яше. єли́­
кѡ состарѣ́ся многѡвре́меннымъ жи­
тіемъ, толи́кѡ па́че крѣпля́шеся и
растя́ше усе́рдіемъ, и вели́кихъ тру­
дѡ́въ и по́двигъ му́жественѣ и те́плѣ
каса́шеся. и ника́коже ста́ростію по­
бѣжда́шеся, но не укло́ненъ тѣ́ломъ
и дѣя́ніемъ и мы́слію. при́снѡ бо те­
ку̑щь бѣ̀ исто́чникъ вся́кія добродѣ́те­
ли, и вѣ́ры не усыпа́емое храни́ло.
По́ времени же мно́ѕѣ єгда̀ уразумѣ́въ
своѐ преставле́ніе, и увѣ́дѣвъ коне́чное
своѐ є́же къ бг҃у ѿше́ствіе, и єсте­
ства̀ вре́меннагѡ до́лгъ ѿда́ти хотя̑ше,
{#л. хм҃д}

пло́ть у́бѡ ѿ землѝ в̾зя́тую, в̾ зе́­
млю воз̾врати́ти, дх҃ъ же к̾ жела́емо­
му хрс̃ту̀ преда́ти хотя̀. сегѡ̀ ра́ди
призыва́етъ свято́е своѐ исполне́ніе хрс̃то́­
вы ѡгра́ды ста́до, и со мнѡ́гимъ уми­
ле́ніемъ прилага́етъ, къ пре́жнимъ на­
каза́ніемъ послѣ́днее приказа́ніе. про­
стира́етъ к̾ ни́мъ па́ки бесѣ́ду, ю́же
к̾ по́льзѣ подоба́ющую, ка́кѡ в̾ возде­
ржа́ніи и моли́твахъ, и во вся́кихъ
до́брыхъ дѣ́лѣхъ, не претъкнове́ннѡ пре­
быва́ти, и тве́рдѡ соблюда́тися ѿ со­
проти́внагѡ борца̀. Глаго́летъ ѡ се́мъ
бж҃е́ственый апс̃лъ пе́тръ. трезви́теся
речѐ и бо́дръствуйте, занѐ супоста́тъ
ва́шъ дія́волъ я́кѡ ле́въ рыка́я хо́дитъ,
искі́й кого̀ поглоти́ти. єму́ же проти́­
витися тве́рдою вѣ́рою. любо́вь же не­
лицемѣ́рну дру̑гъ ко́ другу имѣ́ти,
и єди́номы́сліе къ бг҃у завѣща̀ храни́ти,
и блюстѝ чистоту̀ душе́вную же и тѣ­
ле́сную. и ѿ всѣ̑хъ скве́рныхъ похо­
тє́й и дѣ́лъ, уклоня́тися и ѿлуча́ти­
ся. пи́щю же и питіѐ имѣ́ти не мяте́­
жнѡ, на ипа́че же смире́ніемъ украша́тися

страннолю́біе имѣ́ти, и со противосло́віе
не нави́дѣти. сла́ву же и че́сть ми́ра
сегѡ̀ ни вочто́ же в̾мѣня́ти. но ѿ́бг҃а
м̾здовоздая́нія всѣ́хъ, вѣ́чныхъ бл҃гъ
наслажде́нія ѡжида́ти. и посе́мъ до­
во́лнѡ поучи́въ речѐ и́мъ. а́зъ у́бѡ
бра́тія в̾ пу́ть ѻц҃ъ мои́хъ иду̀, ви́­
жю бо себѐ зово́ма ѿ́ гдс̃а. вы́ же вни­
ма́йте себѣ̀, и слы́шанная ѿ менѐ вну­
ши́те. ѿ ны́нѣ у́бѡ предаю̀ ва́съ в̾ ру́­
цѣ всемогу́щему бг҃у, и пречс̃тѣй єгѡ̀
мт҃ри мр҃і́и, я́же бу́детъ ва́мъ прибѣ́­
жище и стѣна̀ ѿ вся́кихъ сѣтє́й вра́жи­
ихъ, и тогѡ̀ ла́янія, и кознє́й єгѡ̀.
И та́кѡ бл҃же́нный ѻц҃ъ миха́илъ, вся̀
сія̀ изречѐ и́мъ коне́чнѡ показу́я себѐ,
вся́кихъ страсте́й и ласка́нія, дш҃ю свою̀
вы́шшю имы́й. посе́мъ изнемо́же ѕѣ­
лѡ̀, пречс̃тагѡ же и животворя́щагѡ
влд̃чня чс̃тна́гѡ тѣ́ла, и пречс̃тыя кро́ве
хрс̃та̀ бг҃а на́шегѡ причасти́ся. и воз̾­
дви́ же ру́цѣ на нб҃о, со слеза́ми мно́ги­
ми, моля́ся глаго́ля. гдс̃и ісе хрс̃тѐ
сн҃е бж҃іи, пріимѝ дш҃ю мою̀ с̾ ми́ромъ,
и изба́ви єя̀ ѿ возду́шныхъ мыта́рствъ.
{#л. хм҃є}

та́же и пречс̃тѣй бцд̃ѣ моля́шеся глаго́­
ля. гжс̃ѐ моя̀ прест҃а́я влд̃чце бцд̃е,
помо́щнице всему̀ ро́ду хрс̃тія́нъскому,
умолѝ сн҃а своегѡ̀ хрс̃та̀ бг҃а на́шегѡ,
да пріи́метъ с̾ ми́ромъ дш҃ю мою̀, и да
не предана̀ бу́детъ мироде́ржьцу тмы̀ вѣ́­
ка сегѡ̀. та́же и ѡ все́мъ бра́тьствѣ мо­
ля́шеся на мно́гъ ча́съ. и пото́мъ да́въ
и́мъ ми́ръ и бл҃гослове́ніе, и та́кѡ ст҃у́ю
и чс̃тну́ю дш҃ю свою̀ съ мл҃твою гдс̃ви пре­
дадѐ, мцс̃а ию́лія, во вторы́й на́десять
де́нь. в̾зе́мше же ст҃о́е тѣ́ло єгѡ̀ че́­
стнѡ во́ гробъ положи́ша. всѣ́мъ же
ту̀ предъ стоя́щымъ бра́тіямъ, ви́дя­
ще бл҃же́ннагѡ красото́ю сія́юща. ли­
це́ бо єгѡ̀ свѣ́тлѡ вельмѝ явля́шеся.
се́же у́бѡ я́вѣ є́сть, я́кѡ чи́стую
дш҃ѝ со́вѣсть назнамену́я зря́щымъ на́­
нь. ѻни́ же лише́нія пла́чюще блага́го
наста́вника своегѡ̀, и потре́бная вся̀
къ погребе́нію єгѡ̀ устро́ивше, ѱа­
лмы̀ воспѣва́ху, и надъ гро́бная пѣ́нія
возъглаша́ху, со свѣща́ми мнѡ́ги­
ми, и со благоуха́нными ѳѷмія́ны

прово́ждьше всѝ погребо́ша трудолю́бное ст҃о́е
єгѡ̀ тѣ́ло, въ то́йже ки́мин̾стѣй ѻби́­
тели, идѣ́же хрс̃то́во ста́до упасѐ.
ст҃а́я же и непоро́чная дш҃а̀ єгѡ̀, в̾ нбс̃ныхъ
ѻби́телех̃ с̾ ли́ки ст҃ы́хъ прс̃то́лу содѣ́теля
всѣ́хъ бг҃а пред̾ста̀, єго́же и́з̾млада во­
злюбѝ. ѿ него́же и возме́здіе пріе́млетъ
трудѡ́въ свои́хъ, непреста́нное бж҃ія
сла́вы наслажде́ніе. ѿню́ду же всѣ́мъ вѣ́­
рнѡ моля́щимъся пода́етъ є́же къ поле́­
зному проше́нію. Сегѡ̀ ра́ди вѣ́рніи и́же
торжеству́ющіи ст҃у́ю єгѡ̀ па́мять,
си̑це моля́щеся вопіе́мъ єму̀. ѽ любе́­
зная и сщ҃е́нная главо̀, преподо́бне ѻ́ч҃е
на́шь миха́йле назира́й съ вы́ше ми́лости­
внѡ, и моли́ся влд̃цѣ всѣ́хъ ми́лости­
вому и всеще́дрому и всѣ́хъ бл҃гъ пода́­
телю бг҃у, ѡ соблюде́ніи держа́вы бл҃го­
вѣ́рнагѡ цр҃я̀ и вели́кагѡ кн҃зя імр҃къ,
всея̀ русі́и, да пода́стъ єму̀ многѡ­
лѣ́тное з̾дра́віе, ст҃ы́я хрс̃тія́нскія вѣ́ры
въ снабдѣ́ніе и утверже́ніе. и сохрани́тъ
црс̃тво єгѡ̀ ѿвсѣ́хъ сопроти́вныхъ вра­
гѡ́въ цѣ́лѡ и неврежде́нѡ всегда̀, в̾ ти­
шинѣ́ же и воупокое́ніи, и воумире́ніи
{#л. хм҃ѕ}

въ сегѡ̀ ми́ра подъ наста́вникомъ и прави́­
телемъ, тѣ́мъ самѣ́мъ гдс̃емъ на́шимъ
іс҃омъ хрс̃то́мъ. єго́ же сла́вяще при́­
снѡ покланя́емся и почита́емъ, собе­
знача́лнымъ єгѡ̀ ѻц҃е́мъ и с̾ пре­
ст҃ы́мъ и бл҃ги́мъ и животворя́­
щимъ єгѡ̀ дх҃омъ, нн҃ѣ и при́снѡ и вѡ́вѣки
вѣкѡ́мъ.

Мцс̃а тогѡ́же, во в҃і дн҃ь, па́мять ст҃ы́хъ
мч҃нкъ про́кла ила́рія, бл҃гословѝ ѻ́ч҃е.

Сі́и бя́ху при троя́нѣ царѣ̀, имаксиміа́нѣ
игѣ́монѣ, ѿ страны̀ кали́пты, бли́зъ
анкѵ́ры. я́тъ же бы́сть пе́рвѣе ст҃ы́й
про́клъ, и пред̃ царе́мъ хрс̃та̀ исповѣ́давъ.
пре́данъ же бы́сть макси́му игѣ́мону. по­
вѣ́шенъ бы́сть на́ древѣ и стро́ганъ. и
ка́мень тя́жекъ на́ ноѕѣ єму̀ привяза́ша.
посе́м̾ же ведо́мъ на стрѣля́ніе, та́ко бо
на речена̀ бы́сть єму̀ сме́рть. срѣ́те єго̀
а*неѱе́й {**племя́­нник̃} єму̀ ила́ріи, и́же и ѡблобыза́въ
єго, я́тъ бы́въ є́ллины. и у́же ст҃ы́й
про́клъ стрѣла́ми съ стрѣ́лянъ ко́ гдс̃у ѿ­
и́де. Ст҃ы́й же ила́ріи вопроше́нъ и христія́­
нина себѐ на ре́къ, и повѣ́шенъ бы́въ и би­
е́нъ. и на́ три по́прища влачи́мь. пото́мъ
главу̀ єму̀ ѿсѣко́ша, и положе́нъ бы́сть
со ст҃ы́мъ про́кломъ. соверша́етъжеся со­
бѡ́ръ и́хъ во ѻби́тели папі́йстѣй, бли́зу
матро́ны;

Вто́йже дн҃ь па́мять прпд̃бнагѡ
ѻц҃а на́шегѡ миха́ила мале́ина.

Се́й преподо́бный ѻц҃ъ миха́илъ, ро́да
бя̑ше вели́ка и сла́вна. ѻте́чествомъ
же ко́егѡ гра́да, илѝ ве́си ѿку́ду бѣ̀,
{#л. хм҃з}

не изъ ѡбрѣ́тенѡ бы́сть. но я́коже по­
вѣ́даетъ ѡне́мъ во исторі́яхъ гре́ческихъ,
я́кѡ гре́ческому цр҃ю̀ ники́фору фо́цѣ
стры́й бя̑ше. в̾да́нъ быва́етъ ѿ роди́­
телю своею̀, в̾ науче́ніе бж҃е́ственыхъ пи­
са́ніи, и в̾ ско́рѣ извы́че. уразумѣ̀
блаже́нный ми́ра сегѡ̀ не стоя́щее житіѐ.
сегѡ̀ ра́ди вся̀ ѿве́рже, ѿи́де къ свя­
тѣ́й горѣ̀ аѳѡ́ну, и в̾ сели́ся въ скра́й
єя̀ ѿ восто́чныя страны̀ на мѣ́стѣ идѣ́­
же малеѡ́нъ гора̀ глаго́лема є́сть, на
не́й же ки́менская ѻби́тель. и ту̀ во­
спріи́мъ и́ночествующихъ житіѐ. и та́­
кѡ єму̀ на добродѣ́телныя труды̀ по­
дви́гшуся, я́кѡ и ста́рцу диви́тися
ѡ не́мъ. и такова́гѡ ра́ди добродѣ́телна­
гѡ житія̀ єгѡ̀, поста́вленъ бы́сть ту̀
игу́меномъ. мно́гѡ же ѡ бра́тіи мона­
стыря̀ тогѡ̀ ропта́нія и хулы̀ пріе́мъ,
и не смути́ся ѿ сегѡ̀. но сопроти́вное па́­
че показа̀, не преста́ннѡ бо душеполе́­
зная вѣща́я наказа́нія к̾ни́мъ. По нѣ́­
которыхъ же днє́хъ, изы́де ѿ ки́менскія
ѻби́тели въцрс̃твующіи гра́дъ ра́ди потре́­
бы. в̾ то́ же вре́мя, бя̑ше тогда̀

во црс̃твующемъ гра́дѣ воєво́да ѕефиназе́ръ
имяну́емый. и ѡбрѣ́тъ та́мѡ о́трока
нѣ́коєгѡ и́менемъ авра́міа, и́же по́слѣжде
бы́сть аѳана́сій, имену́емый аѳѡ́нскій
и похвали́въ бг҃а ѡ ра́зумѣ єгѡ̀. проразу­
мѣ́ бо ѡ не́мъ, я́кѡ сосу́дъ хо́щетъ
бы́ти ст҃а́гѡ дх҃а, ѕѣлѡ̀ возлюбѝ ѻтро­
ка и бл҃гословѝ єгѡ̀, и́же не помно́зѣ
вре́мени и пріи́де к̾нему̀ и постриже́­
ся ѿ негѡ̀. и вмѣ́стѡ авра́міа,
аѳана́сіи именова́ся. Преподо́бный же ѻц҃ъ
миха́илъ пожи́ве лѣ́та дово́лна в̾ до́бромъ
исповѣ́даніи въ трудѣ́хъ и поще́ніихъ,
и до́йде ста́рости глубо́кія, и ни ка́ко­
же изнемо́же ста́рости ра́ди ѿдо́брагѡ тече́­
ніа своегѡ̀, вси́хъ и преста́вися.
ѿи́де же ко́ гдс̃у в̾ вѣ́чную жи́знь;

Вто́йже де́нь ст҃ы́я мч҃нцы голенду́хи,
и́же ѿ перси́ды послѣди́же нарече́ннѣй
ма́ріи.

Та̀ бя̑ше ѿ перьси́ды, пое́мши му̑жа
волхвонача́лника, прихоздро́и царѣ̀
пе́рсстѣм̃. при цр҃ѣ́же гре́честѣмъ маврикі́и.
бы́вшиже во у́жасѣ, ви́дѣ а́гг҃ла бж҃ія
показу́юща є́й мѣ́сто те́мно и ѻ́гненно
{#л. хм҃и}

идѣ́же бя́ху предѝ єя̀ вѣ́ровавшіи и́долѡм̃.
и друго́е мѣ́сто свѣ́тлѡ, идѣ́же лико­
ва́ху и ра́довахуся служа́щіи хрс̃ту̀.
хотя́щи же є́й та́мѡ вни́ти, прети́ма
бя̑ше ѿ я́вльшагося а́гг҃ла, не вхо́дно
є́смь глаго́ля не вѣ́рнымъ сіѐ мѣ́сто.
Сія̀ у́бѡ воз̾бну́вши, крс̃ти́ся, и ма́рія
наречена̀ бы́сть. тогѡ̀ ра́ди ѡсуже́на
бы́сть царе́мъже и свои́мъ му́жем̃, и по́сла­
на бы́сть въ ка́менную темни́цу. и́же и
пребы́вши та́мѡ лѣ́тъ и҃і, и не поко́рши­
ся, въ ве́ржена бы́сть въ про́пасть идѣ́­
же бя̑ше ѕмі́й у́жасъ творя̀ приходя́­
щымъ. и сотво́рши въ про́пасти вре́мя
четверомѣ́сячнѡ доне́лѣже укротѝ єго̀,
я́кѡ тому̀ лежа́ти и почива́ти. и а́лчна
пребы́вши, прія́тъ да́ръ ѿ́ бг҃а, и́же
ни ка́кѡ ни ки́мъ ѡ крамоле́нѣ бы́ти є́й,
ни жѐ прикаса́тися чл҃честѣй пи́щи. та́же
ѿту́ду приведена̀ и предана̀ бы́сть сы́ну
хоздро́еву на истяза́ніе, и́же ѿ негѡ̀
біе́на бы́сть до ра́нъ, я́кѡ и сосцу̀ єя̀ ра­
с̾сѣ́стися. пото́мъ вре́тищемъ главу̀
єя̀ растя́гнуша, и в̾ нѣ́кое мѣ́сто ѡсо́бно
в̾ве́ржена, и́же и без̃вреда̀ сохранена̀ бы́сть

и положена̀ въ хра́минѣ, идѣ́же повелѣ́о
бы́сть мужє́мъ прокудли́вымъ вни́ти и ѡ­
скверни́ти тѣ́ло єя̀. они́же ходя̑ще не
можа́ху єя̀ ви́дѣти, сокрове́на бо бя̑ше пре­
сла́внѡ нѣ́ким̃ невидѣ́ніем̃, назна́менана бы́въ­
ши печа́тію ші́я єя̀, и ведо́ма на посѣче́­
ніе, и изба́влена бы́сть а́гг҃ломъ, и́же и не­
ви́димѡ печа́ть цѣ́лу ѿ ші́и єя̀ извле́къ,
и веду́щему ю̀ слузѣ̀ подадѐ ѿпусти́ти
ю̀. ѻ́нойже ѡѕло́бившися ка́кѡ не по­
страда̀ хрс̃та̀ ра́ди. предста́въ же є́й
а́гг҃лъ, и держа̀ ме́чь уда́ри ю̀ потылу̀,
я́кѡ мнѣ́тися посѣ́ченѣ є́й бы́ти и ѿ
посѣче́нія кро́ви истещѝ. и ѿнея́ же и
носи́мыя сею̀ оде́жи ѡкровави́шася, и́же
и цѣлбы̀ мно́ги содѣ́ловани бы́ша тою̀ кро́­
вію. ст҃а́яже ше́дши во ієрс̃лим̃, и покло́нь­
шися ст҃ы́мъ мѣ́стом̃. пріи́де въ мнс̃ты́рь
нѣ́кій, идѣ́же ѕлочести́ваго северіа́на
є́ресь живя́ше. и испроси́вши ѿ бг҃а є́же
ѿ кры́тися є́й, а́ще подо́бнѡ є́сть пріитѝ
къ причаще́нію и́хъ, и ви́дѣ а́гг҃ла держа́­
ща два̀ потиря̀, єди́нъ по́лнъ тмы̀,
другі́й же свѣ́та. явля́я є́й, я́кѡ свѣ́та
по́лный, собо́рныя ст҃ы́я цр҃кве є́сть.
{#л. хм҃ѳ}

и повелѣ̀ є́й итѝ въ констянти́нь гра́дъ,
и помоли́тися и бл҃гослови́ти цр҃я̀, зане́
же бли́зъ є́сть преставле́ніе твоѐ. при­
ше́дши же є́й в̾мѣсто зово́мо веанда́ра
въ хра́мъ ст҃а́гѡ геѡ́ргія, и бл҃года́рьство­
вавши бг҃а. и въ ма́лъ неду́гъ в̾па́дши,
и хотя́щи є́й ѿ житія̀ ѿ итѝ, помоли́­
ся спасе́нія ра́ди всегѡ̀ ми́ра, и та́кѡ
бг҃у дх҃ъ предадѐ. Соверша́етъ же ся собо́ръ
єя̀ въ муче́ніи ст҃а́гѡ три́фѡна, су́щем̃
бли́зъ ст҃ы́я ири́ны ста́рыя и но́выя.

Вто́йже де́нь бл҃же́нную мч҃нку варя́га, и
сн҃а єгѡ̀ іѡ҃а́нна убіе́нную въ кі́евѣ.

Влади́миръ вели́кій єщѐ поганъ сы́й побѣдѝ
ятвя́ги, и пріи́де къ кі́еву творя́ше
же́ртвы куми́рѡмъ ѡ побѣ́дѣ зболя́ры
свои́ми. и рѣ́ша ста́рцы, ме́тнемъ
жре́біа на́ сыны и на дще́ри на́шя, да за­
рѣ́жемъ богѡ́мъ на́шимъ на же́ртву.
Бя́ше же чл҃къ бж҃іи нѣ́кто варя́гъ ро́дом̃
прише́лъ изъ царя̀ гра́да съ сы́ном̃ свои́мъ
іѡ҃а́нном̃ живу́щи в̾ кі́евѣ, держа́щи вѣ́ру
хрс̃тіа́нъскую. и сего̀ нетерпя̀ дія́волъ, на
устѝ на́нь кі́евлян̃, и рѣ́ша по́слем̃ кнему̀.

и реко́ша по́сланніи кнему̀, падѐ жре́біи на́
сн҃а твоего̀, возлюби́ша бо єго̀ бо́зи на́ши,
да єго̀ сотвори́мъ тре́бу богѡ́мъ. о́н̾же речѐ,
не су́ть то̀ бо́зи, но дре́во здѣ́лано безъ­
ду́шно, и пома́лѣ согніе́тъ, не ядя́тъ бо
ни пію́тъ ни глаго́лютъ. но бг҃ъ є́сть єди́нъ
на нб҃сѣ́хъ, єму́ же слу́жатъ гре́цы.
та́ко же и мы̀ во́ имя іс҃а хрс̃та̀ сн҃а бж҃ія
кр҃ще́на єсма̀. то́й бо сотвори́лъ нб҃о и зе́млю,
а ва́ши бо́зи ни что́же сотвори́ли, но са́ми
содѣ́лани ва́ми су̑ть. тогѡ̀ ра́ди не да́мъ
бѣсѡ́мъ сн҃а своегѡ̀. и ті́и ше́дше повѣ́даша
лю́дєм̃. кі́євля́неже взе́м̾ше ѻру́жія и при­
идо́ша на ня̀, и рѣ́ша, да́й на́мъ сн҃а на
тре́бу богѡ́мъ. ѻ́н̾же речѐ, а́ще су̑ть бо́­
зи, да пришли́те єди́наго по́ сн҃а моегѡ̀ се­
бѣ̀, а вы̀ чему̀ тре́буете єго̀. и кли́кнуша
кієвля́не, и би́ша я̀, и та́кѡ сконча́стася;

Вто́йже де́нь сло́во ѡпе́рвыхъ мни́сѣхъ
и ѡны́нѣшнихъ, и ѡпослѣ́днихъ.

Повѣ́даше іѡ҃а́ннъ си́ринъ а́ки ѡнѣ́коемъ
мни́сѣ, са́мъже бѣ̀ сему̀ ви́децъ, я́кѡ
нѣ́кто гл҃я старец̃ бѣ̀ воу́жасѣ, и ви́дѣ сѐ,
я́кѡ трѝ мни́си стоя́ху чрезъ мо́ре. и сѐ
бы́сть гла́съ кни́мъ со о́ноя страны̀ гл҃ющь,
{#л. хн҃}

пріимѣ́те крилѣ̀ ѻ́гнени, и пріидѣ́те
ко мнѣ̀. два́же прія́ста, и прелетѣ́ста
на ѻ́нъ по́лъ. а тре́тіи ѡста̀ пла́чася и во­
пія̀. послѣди́же да́стася и єму̀ крилѣ̀,
но нео́гнени и не́мощни и неси́лни, но стру­
дѡм̃ потопля́яся, и с̾печа́лію мно́гою пре́йде
на ѻ́нъ по́лъ. та́кѡ и ро́дъ се́й послѣ́дній,
а́ще пріи́метъ крилѣ̀, но нео́гнени, и не́­
мощни и неси́лни; пе́рвіиже су̑ть мни́си
пріи́мшіи ѻ́гнени крилѣ̀, єдиномы́сліе
иму́ще к̾ бг҃у, и без̾имѣ́ніе вѣ́ка сегѡ̀.
вторі́и же пони́хъ, иму́ще в̾ монастырѣх̃
притяжа́ніе. а и́же прія́ша крилѣ̀, но не
ѻ́гнени и не́мощни, и́же ну́жею спасо́­
шася. ро́дъ нн҃ѣшнягѡ вре́мене ѡпле́­
тшіися жите́йскими су́етами, и́же нико­
ли́же возлетя́тъ умо́мъ к̾ бг҃у, а́ще не
напа́стьми спасу́тся. бг҃у на́шему
сла́ва нн҃ѣ и прс̃нѡ и во́ вѣки
вѣкѡ́мъ.

Мцс̃а тогѡ́же въ г҃і дн҃ь, собо́ръ арха́гг҃ла
гавріи́ла. сти́хъ. Я́кѡ изнача́ла и
вы́ше предано̀, и́же бж҃е́ственое и неизрече́­
нное и преєсте́ственое та́иньство услугова́­
вшему. тебѣ̀ провозвѣсти́вшему, вопло­
ще́ніе ума̀, че́стію подо́бною вся́ка
пло́ть чте́тъ сло́ве. въ г҃і, собра́ніе
гавріи́ла чту́тъ земні́и.

Вто́йже дн҃ь прпд̃бнагѡ оц҃а̀ на́шегѡ стефа́­
на саваи́та, бл҃гословѝ о́ч҃е.

Се́й бя̑ше во времена̀ севи́ра царя̀, му́жь
бл҃гочести́въ сы́й и нра́вомъ бл҃гъ. я́тъ
же бы́сть аки́лою кня́ѕем̃, и вопроше́нъ
тѣ́мъ коея̀ слу́жбы єсѝ. и исповѣ́да
себѐ хрс̃тія́на. и содерзнове́ніем̃ речѐ х҃а
чту̀ и́стиннаго бг҃а, тѣ́мъ ѻгню̀ пре́дан̃
бы́сть, и муче́нію вѣне́цъ воспрія́тъ.

Вто́йже дн҃ь стра́сть ст҃а́гѡ му́ченіка
серапіѡ́на.

Серапіѡ́нъ хв҃ъ мч҃нкъ, бѣ̀ в̾ лѣ́та севи́ра
царя̀, му́жь бл҃гочести́въ ѻ́бразомъ и
бл҃гъ. я́тъ же бы́сть анки́ромъ кня́ѕем̃,
и вопроше́нъ бы́сть коея̀ вѣ́ры є́сть. и
исповѣ́да неѡбину́яся бг҃а іс҃а х҃а вѣ́рою.
тѣ́мъ в̾ разли́чныя єго̀ му́ки вложи́ша.
{#л. хн҃а}

и па́ки ви́дѣ єго̀ непокаря́ющася, повелѣ̀
преда́ти єго̀ огню̀. и въ ве́рженъ бы́сть
во́нь, и та́кѡ муче́нію коне́цъ воспрія́тъ.

Вто́йже дн҃ь ст҃а́гѡ мч҃нка маркія́на.

Маркіа́нъ ст҃ы́й мч҃нкъ ю́нъ сы́й, я́тъ
бы́сть и му́ченъ во иконі́йстѣм̃ гра́дѣ,
и посе́мъ приведе́нъ к̾ перині́ю кня́зю
и стро́ганъ бы́сть по жи́ламъ и полани́там̃,
ѡбличи́ бо и му́жески ѡнече́стіи є́ллиньстѣм̃.
х҃а же бг҃а и влд̃ку исповѣ́да дерзновеннѡ.
тѣ́мъ недово́ленъ бы́сть ѡ пе́рвых̃ му́кахъ,
но порече́ніи то́мъ, на сковрадѣ̀ раз̃же́нѣ по­
велѣ̀ возложи́ти. та́же язы́къ єгѡ̀ избо­
де́нъ бы́сть. си́м̾ же бы́вшим̃ не ѡсла́бнѡ
ст҃о́му пребыва́ющу и х҃а исповѣ́дающу. и
дадѐ кня́ѕь на́нь ѡсужде́ніе. пое́м̾ше же ѝ во́и­
ни бл҃годаря́ща бг҃а и моля́щася и усѣ́кну­
ша єго̀.

Вто́йже де́нь поуче́ніе ст҃а́гѡ
васи́лія ѡ вся́кой дободѣ́тели.

Бра́тіе бу́дите бл҃готво́рцы и ми́лостиви.
подража́емъ своего̀ влд̃ку, да несгори́мъ
въ пла́мени о́номъ вѣ́чномъ. не пріи́мем̃
бога́тества ѕлѣ̀, и́мже ині́и убо́зи
быва́ютъ. не смѣша́емъ своего̀ имѣ́нія
со слеза́ми убо́гих̃, да вѣ́чная бл҃га́я пріи́мем̃.

да та́кѡ получим̃ бг҃а гл҃авшаго, поми́луй,
поми́лован̃ бу́деши. вню́же мѣ́ру мѣ́рите,
возмѣ́рится ва́мъ. во́зрим̃ на ст҃ы́я му́жи
и жены̀, и́же бж҃ія любвѐ дѣ́ля єди́на тѣле­
са̀ имѣ́ша, но и та̀ тѣлеса̀ ис̾ся́кла, и уме­
рщве́на посто́мъ и бдѣ́ніем̃ и жа́ждею, в̾ пред̃­
стоя́ніи нощнѣ́мъ и въ мл҃твахъ, кла́ня­
ніемъ со слеза́ми вседаю́щему бг҃у; ре́къ­
ше уста̀ на мл҃тву. ѻ́чи на бдѣ́ніе и
сле́зы. ру́цѣ на воздѣя́ніе к̾ бг҃у. но́зѣ
на пред̃стоя́ніе де́нь и но́щь. пло́ть попра́­
ти изво́ли, да дш҃ю на́ нб҃о возвы́симъ;
согрѣша́ющіи к̾ покая́нію притецы́те,
теку́щіи поспѣши́те. бога́тіи подава́йте
убо́гимъ. санови́тіи смире́ніем̃, украси́­
теся. ни́щіи бл҃годаре́ніемъ и покоре́ніем̃.
попо́ве ѡблецы́теся въ кро́тость и въ пра́­
вду. судіѝ праведе́нъ су́дъ твори̑те,
изба́вите убо́га, и вдови́цу и сироту̀.
ѻби́димаго искупи́те, плѣ́нныя изба́ви­
те ѿ сме́рти. и немини́те лежа́щаго пред̃
враты̀ ва́шими. ѻ́бщаго въ слѣ́дъ
и́демъ бл҃га́гѡ влд̃ки. бѣжи́мъ лестьца̀
врага̀ губя́щаго дш҃ю на́шю. потщи́мся
на бж҃ію жи́знь вню́же ны приступи́ти
{#л. хн҃в}

ма́лѡ поме́дливше въ вѣ́цѣ се́мъ. а́ще ли
лѣни́мся, то̀ помя́нем̃ заны̀ пострада́вша­
го, и́мже ѿрѣши́тися и́мамы ѿ у́зъ грѣ­
хо́вных̃. преложи́мъ печа́ль пло́тную и мало­
го́дную на дх҃о́вную и приснобу́дущую.

Вто́йже дн҃ь сло́во ст҃а́гѡ ѳео́дѡра студі́й­
скагѡ ѡ я́рости.

Бра́тія и оц҃ы̀ ма́лѡ ѿступи́хом̃ ѿва́съ, и па́­
ки а́біе прише́дше ѡбрѣтѡ́хом̃ в̾ ва́съ бесчи́­
ніе. подоба́етъ бо пред̃ собо́ром̃ яви́ти сѐ; и
толи́кѡ бесчи́ніе, я́кѡ нѣ́цыи ру́цѣ про­
сте́рше, дру́гъ дру̑га похвати́ша со́гнѣвом̃
и я́ростію и крича́ніем̃. и ѡеди́номъ у́бѡ не
многостра́нно, зане́же миряни́нъ є́сть,
и єщѐ не сочта́нъ бра́тіи. ѡ друго́мъ же
вся̑ко стра́нно и ѿчюжде́нно, я́кѡ и́нокую­
щіи и ми́рови распя́тый пригвожде́нныя
у́ды, сѐ сотвори́лъ є́сть. когда̀ у́бѡ во­
проша́ю тя, бра́те съ крс̃та̀ съ ше́лъ єсѝ,
когда́ же свобожде́нія свободи́вся возложи́лъ
єсѝ ру́цѣ на іс҃а июде́йски. сотвори́вый речѐ
єди́ному ѿ бра́тіи си́хъ мои́хъ послѣ́дних̃
мнѣ̀ сотворѝ; не убоя́лися лица̀ сія̀
гл҃ющаго; не усрами́лися жи́зни твоея̀
храни́теля а́гг҃ла не усрами́лися зря́щыя тя̀

бра́тіи и дивя́щыхся. та́кѡ да просія́етъ
речѐ свѣ́тъ ва́шъ предъ чл҃ки, я́кѡ да
ви́дятъ до́брая ва́шя дѣла̀, и просла́­
вятъ оц҃а ва́шего и́же на нб҃сѣ́хъ. тебе́
же сопроти́вно помрачѝ толи́кое ѕло̀ дѣ́ло,
я́кѡ и поху́литися и́мени бж҃ію тебѐ
ра́ди. увы̀ мнѣ̀ грѣ́шному, въ како­
ву́ю высоту̀ житія̀ зва́ни бы́хомъ, и
гдѣ̀ снидо́хомъ, ра́вно ѕлонра́вных̃ чл҃къ
мирски́хъ бесчи́ньствующе. но я́кѡ ѻ́нъ
нача́тъ пре́же сва́ду речѐ. та́же не услы́­
шали гдс̃а гл҃юща, къ зауши́вшему єго̀
слузѣ̀; а́ще ѕлѣ̀ реко́хъ, свидѣ́тель­
ствуй; а́ще ли же ѡ добрѣ̀, что́ мя
біе́ши; и па́ки на крс̃тѣ̀, ѻ́ч҃е ѡста́ви
и́мъ грѣ́хъ се́й, не вѣдятъ бо что̀
творя́тъ. тѣ́м̾же до́лженъ єсѝ, ѡ­
клевета́емь бл҃гословля́ти. и біе́мь ѡ бію́­
щыхъ тя̀ моли́тися, и ху́лимь не гнѣ́­
ватися. ты́же бл҃го́му влд̃цѣ не подо́бя­
ся, зри́мъ кому̀ подо́бишися. тѣ́мъ
же у́бѡ нѣ́си и́нокъ, но ра́тникъ.
нижѐ по́стник̃, но разбо́йник̃. нижѐ сн҃ъ
ми́ра, но ча́до гнѣ́ва. єда́ бо не ѿ досад̃ изы́­
до́шя ра́ны, и ра́нам̃ послѣ́довашя сме́рти.
{#л. хн҃г}

и́же у́бѡ си́це творя́щіи, да положа́тъ­
ся прили́чному запреще́нію, я́кѡ да
не въ го́ршая пріи́дутъ. гдѣ́ бо и апс̃льско
пра́вило положи́мъ гл҃юще. єпкс̃пъ, илѝ
презви́теръ, илѝ дія́конъ, бія̀ вѣ́­
рныя согрѣша́ющыя, илѝ невѣ́рныя
ѻби́ды творя́щыя, да изве́ржется. ни­
ка́коже на́съ гдс̃ь сему̀ научѝ. сопро­
ти́вное же, са́мъ біе́мь не бія́ше. ѡкле­
ветава́емъ не вос̾клеветава́ше. стражда̀
не въспреща́ше. єму́ же сла́ва,
нн҃ѣ и при́снѡ и во́ вѣки
вѣкѡ́мъ;

Мцс̃а тогѡ́же в̾ д҃і дн҃ь, па́мять ст҃а́гѡ апс̃ла
акѵ́лы, {*аки́лы} єди́наго ѿ о҃ ти, бл҃гословѝ о́ч҃е.

Се́й ст҃ы́й апс̃лъ, бы́сть учн҃къ ст҃а́гѡ апс̃ла
па́вла, и ѿ негѡ̀ поста́влен̃ бы́сть єпкс̃пъ
и́же мно́гое мнѡ́жество ѿ и́дольскаго
ѡбратѝ не и́стовьства къ бг҃оразу́мію.
и сквозѣ̀ разли́чная мѣ́ста проше́дъ про­
сія̀ добродѣ́телію я́кѡ и сл҃нце. ѡбрѣ́те же
и аполлѡ́са не с̾верше́на, и того̀ на вѣ́ру по­
тверди́въ извѣстѝ. и мнѡ́ги ѡгласи́въ и
поучи́въ и крс̃тѝ. и и́долы раз̃вратив̃, и цр҃кви
воз̃дви́гъ, и сщ҃е́нники поста́вивъ, и напа́сти
мно́ги претерпѣ́въ, убіен̃ бы́сть ѿ невѣ́рных̃.

Вто́йже дн҃ь ст҃а́гѡ му́ченика іуста̀.

То́й бѣ̀ ѿ́ града ри́мска, внуме́рех̃ вою́я под̃
трі́уномъ клавді́емъ. воз̃вра́щьжеся ѿ­
сѣ́чи иноплеме́нник̃, и ви́дѣвъ крс̃тъ хруста­
лоѡбра́зен̃, и ѿ негѡ̀ гла́съ исходя́щь, си́мъ
побѣжда́й, ѿ него́ же и навы́че бл҃гочс̃тія та́й­
нѣ. доше́дъже ри́ма, разда̀ имѣ́ніе своѐ
ни́щим̃. и бѣ̀ свобо́дь сегѡ̀, и в̾ вѣ́рѣ хв҃ѣ ра́ду­
яся. и я́кѡ увѣ́дано бы́сть я́же ѡнем̃, при­
веде́нъ бы́сть к̾ тріу́ну, и моле́нъ бы́сть ѿ­
ступи́ти вѣ́ры хв҃ы, и непоко́рся по́сланъ
бы́сть с̾ кни́гами къ игѣ́мону магне́нтію.
{#л. хн҃д}

ѻ́нъ же вопроси́въ, ѡбрѣ́те и в̾ вѣ́рѣ хв҃ѣ
пребыва́юща, и протя́гши повелѣ̀ би́ти
єго̀ жи́лами говя́жіими. та́же шело́мъ
раз̃же́нъ возложи́ша на главу̀ єгѡ̀, и и́ны
мно́ги му́ки претерпѣ́въ. наконе́цъ ѻгню̀
пре́данъ бы́сть. и та́кѡ житію̀ коне́цъ
воспрія́тъ.

Вто́йже дн҃ь па́мять прпд̃бнагѡ
оц҃а на́шегѡ ани́сима чюдотво́рца.

Прпд̃бный ѻц҃ъ на́шь ани́симъ, бѣ̀ ѿ кеса­
рі́и палести́нскія, ѿ ве́си кари́ны при
діоклитіа́нѣ царѣ̀. гл҃ютъ же тогѡ̀
роди́телема прія́ти ѿ а́гг҃ла ст҃о́е креще́­
ніе, и проповѣ́дати тогѡ̀ ржс̃тво̀, и и́мя
нарещѝ єму̀. се́йже ѕѣлѡ̀ во мла́дѣ
во́зрастѣ ѡста́ви роди́теля, пріи́де въ
єфе́съ в̾нѣ́кій мнс̃ты́рь, вне́м̾же живя́ше
сто̀ му́жъ черньцє́въ. роди́телема же пла́чю­
щимася ѿше́ствія єгѡ̀ ра́ди, и погуби́ста
видѣ́ніе ѻ́чное. за належа́щее же тогда̀ гоне́­
ніе на хрс̃тія́ны, всѣ́мъ тогда̀ мнс̃ты́рь
ѡста́вившим̃, ѿи́де и то́й в̾до́мъ сво́й.
не сказа́жеся роди́телема свои́ма, но нахартіѝ
ма́лѡ написа́въ я́же ѡ себѣ̀ и ѡста́ви во две́­
рцахъ, са́м̾же в̾ магниті́ю ѿи́де, и та́мѡ
мнс̃ты́рь поста́ви. и посла̀ по роди́теля своя̀,

и мл҃твою прозрѣ́ніе и́ма дарова̀. и ту̀ про́­
чее лѣ́то пожи́вша, и ко́ гдс̃у ѿидо́ша.

Вто́йже дн҃ь па́мять прпд̃бнагѡ оц҃а̀ на́шегѡ
єллі́я мни́ха.

Прпд̃бный ѻц҃ъ на́шъ єллі́й, ѡне́мъже повѣ́­
даху свѣ́дущіи оц҃ы, я́кѡ издѣ́тьска
ѡтрудѣ́хъ дх҃о́вных̃ прилѣжа́ше. и поучаше
бра́тію на труды̀ подвиза́тися на показа́ніе
зна́менія гдс̃ня. а́ще речѐ по и́стиннѣ тру­
ди́теся, и то̀ зна́меніе пока́жете, бл҃же́ни
єстѐ. иногда́же єму̀ в̾пусты́ни бы́вшу
и восхотѣ̀ ме́дови, и а́біе ѡбрѣ́те, и речѐ, ѿ­
ступѝ ѿменѐ ѕло́е похотѣ́ніе. пи́шет̃бося,
дх҃омъ живи́те по́хоти плот̾скі́я не твори́те.
и ѡста́вивъ єго̀ ѿи́де. и па́ки єму̀ пости́­
вшуся трѝ нлд̃и, в̾ пусты́ни ѡбрѣ́те ѻ́вощь
пове́рженъ, и речѐ, не и́мамъ єго̀ я́сти ни
прикосну́ти ся кнему̀, да небра́та своего̀
соблажню̀. пи́шебося, непи́щею то́кмѡ жи́въ
бу́детъ чл҃къ. моля́ше же єго̀ нѣ́кто ѿ бра́­
тіи, хотя́ше сни́мъ жи́ти во єди́ной
пусты́ни. сему́ же гл҃ющу, я́кѡ немо́жеши
терпѣ́ти па́кости бѣсо́въскія. ѻ́нъже при­
лѣжа́ше гл҃я, я́кѡ всѐ терплю̀ па́че. о́нъже
пріим̃ єго̀, повелѣ̀ єму̀ в̾ друго́й пеще́рѣ жи́ти.
{#л. хн҃е}

и пришед̃ше бѣ́си но́щію давля́ху єго̀. и потом̃
скве́рными по́мыслы мяту́ще. ѻ́нъ же
те́къ, бы́вшее повѣ́даше прпд̃бному єл̾лі́ю.
оче́ртъже ст҃ы́й мѣ́сто, повелѣ̀ єму̀ без̃стра­
ха жи́ти. са́мъ же мнѡ́га чюдеса̀ сотворѝ,
и преста́вися къ бг҃у.

Вто́йже дн҃ь сло́во ѡпокая́ніи я́кѡ не то́кмѡ
бг҃ъ исповѣ́давши грѣхѝ своя̀ пріе́млетъ,
но и ѡбрати́вшихся ѿгрѣ́хъ к̾ покая́нію.

Повѣ́даше нѣ́кто ѿ оц҃ъ гл҃я, я́кѡ все­
лу́ни є́сть мнс̃ты́рь дв҃и́ческъ. єди́на же
ѿних̃ ѿ дѣ́йства вра́жія поуще́на бы́сть ѿ­
итѝ ѿ мнс̃тыря̀, и шед̃ши в̾падѐ в̾блу́дъ,
та́ко бо ю̀ прельстѝ вра́гъ. и в̾ то̀ в̾пад̃ши,
нѣ́коликѡ лѣ́тъ сотворѝ блудя́щи, и помя­
ну́вся к̾ бг҃у, па́ки умо́мъ мы́сляше на по­
кая́ніе. и прише́д̾ши к̾ мнс̃тырю̀ своему̀
в̾не́мже бѣ̀ хотя̑ше ка́ятися, и па́д̾ши пред̾
враты̀ и у́мре. и явѝ бг҃ъ єди́ному єпкс̃пу
сме́рть єя̀, и ви́дѣ ст҃ы́я а́гг҃лы прише́д̾ша
и пріи́мша дш҃ю єя̀, и бѣ́сы в̾слѣд̃ и́хъ иду́ща
и пря́щася сни́ми. ст҃ы́м̾ же а́гг҃лом̃ гл҃ющим̃,
на́мъ рабо́та толи́кѡ лѣ́тъ, на́ша є́сть дш҃а̀.
до́лго же пря́щимъся ѡ то́мъ. и реко́ша
бѣсове, я́кѡ и́де и в̾ мнс̃ты́рь в̾ лѣ́ности,

да ка́кѡ гл҃ете пока́ялася є́сть. и ѿвѣща́­
ша а́гг҃ли гл҃юще, поне́же бг҃ъ ви́дѣвъ ра́­
зумъ єя̀ на то̀ у́же прекло́ншься, прія̀
єя̀ покая́ніе. да покая́ніем̃ она̀ владѣ́яше,
є́же на у́мъ наложѝ сіѐ, живото́мъ же влд̃ка
бг҃ъ владѣ́етъ. и та́кѡ посрами́шася бѣ́си
ѿбѣго́ша. тогѡ̀ ра́ди блюду́щеся хо́дим̃
и живе́мъ. не вѣ́мы бо в̾ кі́й ча́съ сме́рть
на́съ во́зметъ.

Вто́йже де́нь ѿгла́въ
ст҃а́гѡ ни́ла, ѡ о́сми по́мыслѣхъ.

Вѣ́ждь ча́до, я́кѡ о́смь є́сть по́мыслъ и́же
вся̀ ѕла́я содѣва́ющіи; чревобѣ́сіе, блу́дъ,
сребролю́біе, я́рость, печа́ль без̃вре́менная,
уны́ніе, тщесла́віе, горды́ня. сія̀ су̑ть
боря́щая вся́каго чл҃ка. {*а҃} Ты́же ча́до а́ще
хо́щеши побѣди́ти чревобѣ́сіе, возлюбѝ
воздержа́ніе, и имѣ́й стра́хъ бж҃іи, и побѣ­
ди́ши. {*в҃} А́ще хо́щеши побѣди́ти блу́дъ, воз̃­
любѝ а́лъчбу и жа́жду и бдѣ́ніе, и воспомянѝ
сме́рть, и николи́же бесѣ́дуй съ жено́ю,
и побѣди́ши. {*г҃} А́ще хо́щеши побѣди́ти сребро­
лю́біе, воз̃любѝ нестяжа́ніе и ху́дость. {*д҃} А́ще
хо́щеши побѣди́ти я́рость, стяжѝ кро́тость
и долготерпѣ́ніе. и помина́й коли́кѡ ѕла́я
сотвори́ша июде́и гдс̃у на́шему іс҃у хрс̃ту̀,
{#л. хн҃ѕ}

и чл҃колюби́вый не прогнѣ́вася наня̀ но па́че мо­
ля́шеся ѡни́хъ гл҃аше, о́ч҃е оста́ви им̃ грѣ́хъ
се́й, невѣ́дят̃бо что̀ творя́тъ. {*е҃} А́ще хо́щеши
побѣди́ти без̃вре́менную печа́ль неѡпеча́лися ни­
когда́ же за ку́ю любовре́менную ве́щь. и а́ще
біе́нъ бу́деши, илѝ ѡ бесче́стен̃, илѝ ѿгна́нъ,
не ѡпеча́лися, но па́че ра́дуйся. тогда̀ то́­
кмѡ ѡпеча́лися, єгда̀ согрѣши́ши, но и тогда̀
в̾ мѣ́ру, да не в̾паде́ши во ѿча́яніе, и поги́бне­
ши. {*ѕ҃} А́ще хо́щеши побѣди́ти уны́ніе, творѝ
что̀ лю́бо ма́ло рукодѣ́ліе. и прочита́й и моли́ся
ча́стѡ. {*з҃} А́ще хо́щеши побѣди́ти тщесла́віе, не
любѝ похвалы̀. нижѐ по́чести, нижѐ до́брыя
ри́зы, нижѐ пред̃почита́ніе. нижѐ пред̃сѣда́ніе.
но па́че возлюбѝ датя̀ укаря́ютъ, и ѡхужда́ют̃,
и бесче́стят̃ лжу́ще. и держѝ себѐ вся́кого грѣ́­
шника грѣ́шнѣйша. {*и҃} А́ще хо́щеши побѣди́ти
горды́ню, что̀ лю́бо а́ще твори́ши, не гл҃и я́кѡ
ѿ своегѡ̀ труда̀ илѝ ѿ своегѡ̀ му́жества быва́ет̃.
но лю́бо пости́ши, лю́бо бди́ши, лю́бо мо́лиши­
ся, лю́бо ни́зу лега́еши, лю́бо пое́ши лю́бо слу́­
жиши, лю́бо мета́нія мно́го твори́ши, гл҃и,
я́кѡ не ѿ твоего̀ тща́нія, но ѡ бж҃ія по́мо­
щи и заступле́нія быва́ютъ. єму́же сла́ва,
нн҃ѣ и при́снѡ и во́вѣки вѣкѡ́мъ.

Мцс̃а тогѡ́же въ е҃і де́нь, па́мять ст҃ы́хъ
мч҃нкъ кѵ́рика {*ки́рика}, и ма́тере єгѡ̀ ули́ты,
бл҃гословѝ о́ч҃е.

Ст҃а́я ули́та бя̑ше придіоклитіа́нѣ царѣ̀,
ѿ́града иконі́и. и ѡбдержа́щагѡ ра́ди
та́мѡ гоне́нія, пое́мши прс̃нопомина́емаго
кѵ́рика {*ки́рика}, тре́мъ лѣ́тѡм̃ су̑ща, и́де в̾ се­
левкі́ю. ѡбрѣ́те же и та́мѡ таково́ же
гоне́ніе на хрс̃тіа́ны, до́йде в̾ та́рсъ кили­
кі́йскій, идѣ́же алеѯа́ндръ игѣ́мон̃, су́ровъ
и звѣроѡбра́зенъ нра́вом̃, х҃а призыва́ющых̃
му́чаше. идѣ́же и та̀ я́та бы́вши и му́­
чена. исто́ржену же бы́вшу младе́нцу изру­
ку̀ єя̀, и́же и мно́гими ласка́ньми к̾ себѣ̀
хотя́ше привлещѝ ѝ, и невозмо́же, но
всегда̀ бя̑ше младе́нецъ взира́я и погляда́я
къ мт҃ри, грубоязы́чествуя гла́сомъ, и
хв҃о и́мя призыва́я. ного́ю пъхну̀ в̾ ре́бра
отроча̀, и ни́зъ въ сходи́мыя степе́ни при­
ража́емо, сокруши́ся глава̀ єму̀, и испу­
стѝ чс̃тну́ю свою̀ дш҃ю. бл҃же́нная же ули́та
помно́гих̃ му́ках̃ не повину́вшися, мече́мъ
главу̀ є́й ѿсѣко́ша. соверша́етжеся собо́ръ
єю̀ въ бл҃госозда́ннѣмъ до́мѣ єю̀ бли́зъ
арха́гг҃ла миха́йла во а́ддахъ;
{#л. хн҃з}

Вто́йже дн҃ь ст҃а́гѡ мч҃нка авді́я.

Мчн҃къ хрс̃то́въ авді́й бѣ̀ придіоклитіа́нѣ
царѣ̀, ѿ о́строва тидана. я́тъ же
бы́сть и мнѡ́го му́ченъ ѿврещи́ся х҃а,
и непокори́ся, но па́че исповѣ́даше х҃а.
та́же покольцу̀ растяго́ша єго̀, и біе́нъ
бы́сть девятію̀ вѡ́инъ. ви́дѣвшимъ же
слуга́мъ я́кѡ невосхотѣ̀ в̾куси́ти нечи́стых̃
же́ртвъ, стро́ганъ бы́сть ногты̀ желѣ́­
зными. и поинѣ́хъ му́кахъ непокори́­
ся, усѣ́куша ѝ в̾ по́лъ день. и яви́­
ся мч҃нкъ діоклитіа́ну со а́гг҃лы ору́жіе
держа̀, и стра́хомъ нбс̃нымъ устраша́я
речѐ, сѐ а́зъ авді́й нбс̃нагѡ бг҃а чл҃къ,
єго́ же ты̀ уме́рша мни́ши. но бг҃ъ по́мо­
щію свое́ю показа́ти мо́жетъ одолѣ́ніе на
поспѣ́шники твоя̀ бѣ́сы, и́же тя̀ без̃зако́­
нникѡмъ до́лженъ бѣ̀ приложи́ти. тѣ́ло
же му́ченика окая́нный огню̀ предадѐ;

Вто́йже де́нь сло́во ѿ патерика̀ ѡ хи́трости
кни́жнѣй, и ѡѕло́бѣ.

Бра́тъ вопросѝ ста́рца ѡ кни́жномъ слове­
сѝ; гл҃а єму̀ ста́рецъ, тѣ́хъ не
пыта́й, и ѿженѝ ѿ себѐ ѕло́бу, и
бг҃ъ тебѣ̀ ѿкры́етъ вы́шняя и ни́жняя;

Вто́йже дн҃ь сло́во ѡ мл҃твѣ, я́кѡ досто́ит̃
въ цр҃кви стоя́ти моля́щися со́страхом̃.

Цр҃кви бж҃ія зову́щи на мл҃тву, ѡста́ви­
те земна́я дѣ́ла, и взы́дите на земно́е
нб҃о сотща́ніем̃. идѝ на дш҃е́вную пи́щю
а́ки пе́тръ и иѡ҃а́ннъ ко гробу гдс̃ню.
иду́щу же тѝ во ст҃ы́й хра́мъ, помы́­
сли єда̀ кого̀ прогнѣ́валъ єсѝ в̾ ко́емъ у́бѡ
дѣ́лѣ, то̀ вся́кѡ потщи́ся гнѣ́вный мра́къ
ѿгна́ти, и та́кѡ я́кѡ сл҃нце ѡст҃и́тъ
дш҃ю твою̀ моли́твеная добро́та. не рцы̀
мнѡ́го согрѣши́хъ и без̃зако́нновах̃ и немогу̀
припа́сти к̾ бг҃у, ни ѿча́йся у́бѡ и неприла­
га́й ѿ се́лѣ согрѣша́ти, и си́лою всеми́лости­
ваго бг҃а не и́маши посра́мленъ бы́ти. А́ще
и́стинное покая́ніе хо́щеши имѣ́ти, то̀
явѝ є̀ дѣ́лом̃. А́ще го́рдости ка́ешися, по­
кажѝ смире́ніе. А́ще пія́нства ка́ешися,
покажѝ тре́звость. А́ще любодѣ́йства ка́е­
шися, покажѝ цѣлому́дріе. уклони́бося
речѐ ѿ ѕла̀, и сотворѝ добро̀. Презви́терѡм̃
ієре́ѡм̃ хрс̃то́вым̃ проповѣ́дателем̃ та́йныя єгѡ̀
трапе́зы, и дроби́телем̃ тѣ́ла єгѡ̀, єпкс̃помъ
и па́стырем̃ хв҃а ста́да слове́сных̃ ѻве́цъ, главу̀
свою̀ поклоня́й, и припадѝ к̾ нога́мъ и́хъ,
{#л. хн҃и}

и молѝ и́хъ да да́стътися бл҃гослове́ніе и́хъ.
возлюбѝ гдс̃а своего̀ ѿвсея̀ дш҃ѝ, и стра́хъ
єгѡ̀ да пріи́детъ тѝ в̾ срд̃це. пра́въ бу́ди и
и́стиненъ, кро́токъ и смире́нъ, покори́въ,
до́лу пони́къ зря̀, у́мъ же къ нб҃сѝ прости­
ра́я, уми́лен̃ к̾ бг҃у, и чл҃комъ привѣ́тлив̃.
печа́лному утѣ́шитель, и терпѣли́въ бу́ди
в̾ напа́стѣх̃, в̾ нищетѣ̀ ще́дръ и ми́лостивъ.
корми́тель и страннопріи́мникъ, ско́рбенъ
ѡ́бз҃ѣ, а́лченъ и жа́денъ, и кро́токъ, не
славохо́тенъ, ни златолю́бецъ ни го́рдъ, но
бг҃обоя́знивъ. пред̃ цр҃е́мъ гото́въ в̾ повелѣ́ніих̃
єгѡ̀, во ѿвѣ́техъ сла́докъ. ча́стѡ моли́тве­
никъ к̾ бг҃у, и разу́менъ тру́дникъ. не
ѡсуди́тель вся́кому чл҃ку, побо́рникъ ѡби́ди­
мымъ, и нелицемѣ́ренъ. и та́кѡ бу́деши
ча́до єѵг̃а́лія, и сн҃ъ воскрс̃нія, и наслѣ́дникъ
бу́дущія жи́зни;

Вто́йже дн҃ь успе́ніе
вели́кагѡ кн҃зя влади́мира кі́евскагѡ,
крс̃ти́вшагѡ зе́млю русі́йскую.

Се́й вели́кій цр҃ь влади́миръ, бя̑ше сн҃ъ ст҃о­
сла́вль, ѿ пле́мене варя́ж̾скагѡ пе́рвѣе же
къ и́долѡм̃ мнѡ́го тща́ніе творя̀ поо́тчю пре­
да́нію. даєгда̀ восхотѣ̀ бг҃ъ избра́ти себѣ̀
лю́ди но́вы, в̾дохну̀ в̾сего̀ бл҃года́ть ст҃а́гѡ дх҃а,

воз̃бну̀ я́кѡ ѿ сна̀ ѿ лю́тагѡ идолослуже́нія.
и посла̀ по всѣ́мъ язы́кѡм̃, испыта́я зако́ны
и́хъ ка́кѡ вѣ́руют̃. нувѣ́давъ ст҃у́ю вѣ́ру
гре́ческую, я́кѡ свѣщю̀ на свѣти́лѣ, и речѐ
в̾ себѣ̀, си́це да сотворю̀, пойду̀ в̾ зе́млю их̃,
и плѣню̀ гра́ды и́хъ, и ѡбря́щу ту̀ учт҃ля.
и є́же умы́сли, то̀ и сотворѝ, шед̃ взя̀ ко­
рсу́нь град̃; и посла̀ к̾ цр҃е́ма гре́ческима, гл҃я,
да́йта замя̀ сестру̀ свою̀. а́ще ли недади́та,
то̀ сотворю̀ гра́ду ва́ю, я́коже и сему̀ со­
творих̃. ѻна́ же ѿвѣща́ста, нѣ́сть здѣ̀ та­
кова́го ѡбы́чая, є́же хрс̃тіа́нѡм̃ дая́ти запога́­
ныя. а́щели крс̃ти́шися, тогда̀ и то̀ получи́­
ши, и вя́щьше сего̀ црс̃тво нбс̃ное. и речѐ
влади́миръ, та́кѡ сотворю̀. прише́дшіи же
ѿтебѐ съ цр҃цею, ті́и да мя̀ крс̃тя́тъ. и
вто̀ вре́мя в̾падѐ влади́миръ в̾ неду́гъ очи́­
ма. и речѐ цр҃ца посла́вши к̾ нему̀, а́ще не
крс̃ти́шися не избу́деши болѣ́зни сея̀. ѻ́нъ
же речѐ, крс̃ти́те мя, и́бо на то̀ и́стое вы̀
призвах̃. єгда́же крс̃ти́ся, бы́сть чю̑до ве́ліе.
в̾шед̃шу бо єму̀ во ст҃у́ю купѣ́ль, ѿпадо́ша
я́коже чешуя̀ ѿ о́чію, и ѿверзо́стася єму̀
о́чи. и бы́сть я́кѡ николи́ же имѣ́въ болѣ́­
зни. и прозрѣ́въ, похвалѝ всѣ́хъ бг҃а;
{#л. хн҃ѳ}

и просвѣще́нъ бы́сть дш҃е́ю и тѣ́ломъ,
ра́довашеся. И прише́дъ къ кі́еву избѝ
вся̀ и́долы, перу́на и хо́рса, да́жба и
м́окша, и про́чія куми́ры. Посе́мъ во­
зва̀ всѐ мно́жество людє́й, и заповѣ́да и́мъ
крс̃ти́тися. и наре́къ и́мъ де́нь, си́це
гл҃я, а́ще кто̀ не ѡбря́щется у́тро на рѣ­
цѣ̀, то́й бу́детъ проти́венъ мнѣ̀.
Тогда̀ сни́деся ве́сь во́зрастъ мужє́й и
жє́нъ, на поча́йну рѣку̀, и съ су́щими мла­
де́нцы. и соверше́ніи у́бѡ в̾ водѣ̀ стоя́ху,
ѻ́віи до́ пояса, ѻ́ви до вы́й, друзі́и же
бродя́ху. а презви́тери по́ брегу стоя́ху,
мл҃тву творя̑ще на крс̃ти́мыми. и ѿто́лѣ
нарече́ся мѣ́сто то̀ ст҃о, идѣ́же нн҃ѣ
цр҃квь є́сть ст҃у́ю мч҃нку бори́са и глѣ́ба.
То́й у́бѡ бы́сть пе́рвый хода́тай на́шему
сп҃се́нію ст҃ы́й влади́миръ. и́же ивозрѣ́въ
на нб҃о, помоли́ся за хрс̃тіа́ны гл҃я.
Бж҃е сотвори́вый нб҃о и зе́млю, при́зри
на новопросвѣще́нныя лю́ди сія̀. да́ждь
и́мъ гдс̃и увѣ́дѣти тебѐ бг҃а и́стиннаго,
и утвердѝ и́хъ въ пра́вую вѣ́ру. и мнѣ̀
помозѝ влд̃ко на сопроти́вныя врагѝ, и надѣ́я­
ся на твою̀ держа́ву, поперу̀ ко́зни єгѡ̀.

Повелѣ́ же лю́демъ ста́вити цр҃кви по
всѣ́мъ градѡ́мъ, а са́мъ созда̀ цр҃ковь
ст҃ы́я бцд̃ы уди́вовъ. пребы́сть же нѣ́ко­
ликѡ лѣ́тъ, нача̀ болѣ́ти, и преста́ви­
ся ко́ гдс̃у, мцс̃а ию́лія въ е҃і де́нь.
Тѣ́ло же єгѡ̀ положи́ша, всѐ мно́жество,
всея̀ русі́йскія землѝ, боля́ръ же и
люде́й, пла́чющеся я́кѡ оц҃а, и засту́­
пника своегѡ̀, въ цр҃кви ст҃ы́я бцд̃ы,
ю́же са́мъ созда̀. бг҃у на́шему
сла́ва, нн҃ѣ и при́снѡ и во́
вѣки вѣкѡ́мъ;
{#л. хѯ҃}

Мцс̃а того́же въ ѕ҃і дн҃ь. па́мять ст҃а́гѡ
сщ҃е́нно мч҃нка анфиноге́на, єпкс̃па бы́вшагѡ
въ пидахто́и, и десятѝ учн҃къ єгѡ̀.

Ст҃ы́й мч҃нкъ анѳиноге́нъ бя̑ше ѿсевасті́и,
придіоклитіа́нѣ царѣ̀. и прилѣ́жныя
єгѡ̀ ра́ди добродѣ́тели и ра́зума, бы́сть
єпкс̃пъ пидахтои́тскій. я́тъ же бы́сть
филима́хом̃ игѣ́моном̃, съ десятію̀ свои́хъ
учн҃къ, и мно́гія сме́ртныя му́ки прете­
рпѣ́въ сни́ми. на конецъ же мече́мъ прія́тъ
кончи́ну. гл҃етъжеся ѡне́мъ я́кѡ пре́же я́тія
своегѡ̀, прише́дъ въ мнс̃ты́рь учн҃кѝ своя̀
не ѡбрѣ́те, я́ти бо бы̑ша пе́рвѣе. усрѣ́тъ
же кошу́ту, ю́же воспита́лъ бя̑ше во ѡби́­
тели. и́же и мл҃твовавъ бл҃гословѝ ю̀, да
не уловле́но бу́детъ сѣ́мя єя̀ ловцы̀. но на
ко́еждо лѣ́то приводи́ти в̾ па́мять єгѡ̀ себѐ,
и є́же ѿнея̀ ража́емаго телца̀ єди́наго, є́же
и бы́сть. ви́дима бо бя̑ше по чте́ніи ст҃а́гѡ
єѵг̃а́лія въ ходя́щи кошу́та, и ла́нь водя́­
щи, веселя́хуся въ сла́ву и чс̃ть ст҃а́гѡ
мч҃нка. учн҃цы́ же єгѡ̀ не послу́шашя пожре́­
ти и́долѡмъ, и ѿсѣко́ша и́мъ главы̀.
соверша́етжеся собѡ́ръ и́хъ в̾ муче́ніи ст҃а́гѡ
геѡ́ргія, су́щемъ въ кипари́сіи;

Вто́йже дн҃ь ст҃ы́хъ мч҃нкъ па́вла и и́же
сни́мъ мч҃нцъ алевти́ны и хіѡні́и.

Ті́и бѣ́ша ро́домъ єгѵ́птяне, я́ти бы̑ша,
и во́ градъ в̾ кесарі́ю приведе́ни, пред̃ста́ша
кня́ѕю, и вопроше́ни бы́вше, исповѣ́даша
хрс̃та̀ бг҃а и́стиннаго, и сожго́ша но́ги
лѣ́выя и́хъ, и десна́я очеса̀ избодо́ша
мечѝ. Посе́мъ ѻгне́мъ сконча́шася. и
про́чіи сни́ми му́жи и жены̀ вѣ́роваша
хрс̃то́ви. ст҃а́я же хіѡні́я на́древѣ повѣ́ше­
на бы́сть и стро́гана. и сестра̀ єя̀ єленьті́я
на судію̀ напа́дши разорѝ тре́бище нога́ми, и
му́чена бы́сть неща́днѡ. Па́велъ же ст҃ы́й
мч҃нкъ ста́въ, помоли́ся за хрс̃тія́ны и зався̀
язы́ки, я́кѡ да в̾ра́зум̃ бж҃іи пріидут̃ ѡ преста́­
тіи гоне́нія хрс̃тіа́ньска, и на сле́зы подви́же
пред̃стоя́щыя. посих̃ главу̀ єгѡ̀ ѿсѣко́ша.

Вто́йже дн҃ь ст҃а́гѡ мч҃нка антіѡ́ха.

Антіо́хъ хрс̃то́въ мч҃нкъ, бѣ̀ ѿ севасті́и
вра́чь хи́тростію, похожда́ше по вся̀ гра́­
ды, врачю́я хи́тростію су́щыя в̾ не́мощех̃.
и я́тъ бы́сть андреа́ном̃ игѣ́моном̃, и мно́­
га мч҃нія претерпѣ́въ. послѣди́же в̾ве́ржен̃
бы́сть в̾ коно́бъ, и ѿ тогѡ̀ сохране́нъ бы́сть.
та́же пре́данъ бы́сть со ѕвѣрмѝ бра́тися,
{#л. хѯ҃а}

єму́ же ра́довахуся преднога́ми па́дающе
звѣ́ріе лобыза́ху. и єди́нъ звѣ́рь па́рдусъ
прогл҃а чл҃ческим̃ гла́сомъ, ѡбличѝ игѣ́мона.
и посе́мъ помоли́ся бг҃у ст҃ы́й, и распадо́ша­
ся всѝ и́доли я́кѡ песо́къ. тогда̀ главу̀ єгѡ̀
усѣ́кнуша, и истечѐ кро́вь со млеко́мъ.
кѷріа́къ {*киріа́къ} же усѣ́кнувый ст҃а́го, содерзнове́­
ніемъ хрс̃тіа́на себѐ наречѐ, ана́ѳема и́долѡм̃
ре́къ. и повелѣ́ніемъ андреа́новым̃ и тому̀
ѿсѣко́ша главу̀. и погребе́нъ бы́сть со
ст҃ы́мъ антіо́хомъ.

Вто́йже де́нь по́ бз҃ѣ зна́меніе бы́вшеє
ѿ ико́ны пречс̃тыя влд̃чцы на́шея бцд̃ы и
при́снѡ дв҃ы мр҃і́и и́же бы́сть въ ве́си псковь­
ской в̾ че́рскахъ.

Бы́сть сицево̀ зна́меніе в̾ лѣ́та, ҂ѕцк҃и.
при держа́вѣ бл҃говѣ́рнагѡ и бл҃гочс̃ти́ва­
гѡ и бл҃горо́днагѡ самоде́ржца вели́кагѡ
кн҃ѕя васи́лія, сы́на дими́тріева, донъ­
ска́гѡ имену́ема. и при архієпкс̃пѣ вели́­
кагѡ но́ва гра́да и пско́ва сѷмеѡ́нѣ.
И при́ кн҃ѕѣ п̾сковско́мъ ѳео́дѡрѣ, сн҃ѣ
алеѯа́ндровѣ, во ѻ́бласти псковско́й
нарица́емѣй че́рьска. вне́й же бы́сть цр҃квь
ржс̃тва̀ гдс̃а бг҃а и сп҃са на́шегѡ іс҃а хрс̃та̀

в̾ то́йже бѣ̀ ико́на пречс̃тыя влд̃чцы на́шея
бцд̃ы и прс̃нѡ дв҃ы мр҃і́и. и а́біе внеза́пу
бы́сть зна́меніе стра́шнѡ и у́жаса испо́лне­
но показа́ся, ѿ ико́ны пречс̃тыя бг҃омт҃ре
изъ обою̀ о́ку сле́зы исходя́ща я́кѡ струя̀.
Чл҃цы же мѣ́ста тогѡ̀ ви́дѣвше сіѐ изря́­
дное чю́до, в̾ ско́рѣ посла́ша во́ градъ
пско́въ, и возвѣсти́ша собѡ́ру ст҃ы́я живо­
нача́лныя тро̃цы, и всему̀ ієре́йскому
чи́ну. ѻни́ же возвѣсти́ша сія̀ кн҃ѕю, и
всѣ́мъ хрс̃тоимени́тымъ лю́дємъ. сі́и же
слы́шавше, в̾ ско́рѣ посла́ша сщ҃е́нникѡвъ
со бл҃гоговѣ́йными му́жи по ико́ну прс̃тыя
бцд̃ы. ѻни́же шед̃ше и взя́ша ико́ну бж҃ія
мт҃ре, и несо́ша ю̀ во град̃. єгда́ же пріидо́­
ша бли́зъ гра́да, и сія̀ слы́шавъ кн҃ѕь и
ве́сь сщ҃е́нный собо́ръ съ бг҃олюби́вымъ на­
ро́домъ, изыдо́ша со крс̃ты̀ проти́ву ико́ны
пречс̃тыя бг҃омт҃ре, и срѣто́ша ю̀ внѣ̀ гра́да.
ви́дѣвше же кн҃ѕь и ве́сь сщ҃е́нный собѡ́ръ
ико́ну пречс̃тыя бцд̃ы, и узрѣ́вше зна́меніе
ѿ ѻ́браза пречс̃тыя бг҃омт҃ре, изъобою̀ о́ку
сле́зы я́кѡ струя̀ исходя́щи, всѝ
стра́ха испо́лнившеся, и ве́сь наро́дъ му́жи
и жены̀, ру́цѣ воздѣ́вше на высоту̀,
{#л. хѯ҃в}

и сослеза́ми всѝ нача́ша зва́ти, гдс̃и поми́луй.
и къ бцд̃ѣ вопія́ху, ѽ пречс̃тая влады́чице
бцд̃е, не ѡста́ви на́съ, но помозѝ на́мъ грѣ́­
шным̃ и недосто́йным̃ рабѡ́мъ твои́мъ. сщ҃е́­
нницы же пѣ́вше моле́бен̃ и кано́нъ прест҃ѣ́й
бцд̃ѣ, а́біе тогда̀ ве́сь сщ҃е́нный собо́ръ со́
страхом̃ и вели́кою чс̃тію взе́мше чс̃тну́ю ико́­
ну бг҃омт҃ре, на ра́мѣх̃ понесо́ша ю̀ во́ градъ. и
ве́сь наро́дъ в̾ слѣд̃ идя́ху моля́щеся со́страхом̃
прест҃ѣ́й бцд̃ѣ, и внесо́ша ю̀ в̾ цр҃ковь ст҃ы́я
тро̃цы, на соблюде́ніе и утверже́ніе гра́ду пско́­
ву. и та́кѡ пѣ́вше моле́бныя пѣ́сни пре­
ст҃ѣ́й бцд̃ѣ, му́жіе и жены̀ нача́ша млс̃тыни
твори́ти мно́ги, моля́щеся ст҃ѣ́й бцд̃ѣ ѡ
свои́хъ согрѣше́ніих̃. и пра́здникъ чс̃тнѡ про­
води́вше, разыдо́шася в̾ до́мы своя̀ ко́ждо
во своя̀ сѝ;

Вто́йже де́нь сло́во ѡ послуша́­
ніи нѣ́коегѡ ста́рца.

Ста́рецъ {*нѣ́кій} є́теръ бѣ̀ в̾ виѳаи́дѣ, имѣ́яше
усебѐ учн҃ка̀ иску́сна, ѻбы́чаи же бѣ̀
ста́рцу тому̀ по вся̀ днѝ и ве́черы учи́ти
я́же ѡ по́лзѣ. и по поуче́ніи творя́ше
мл҃тву, и ѿпуща́ше ѝ спа́ти. прилучи́же­
ся иногда̀ простѣ́й ча́ди є́терѣ говѣ́йнѣ
пріитѝ, вѣ́дуще вели́кое поще́ніе ста́рца,

и сотворѝ и́ма вкуше́ніе. и по ѿше́ствіи
тѣ́хъ па́ки сѣ̑де ста́рецъ ве́черъ по слу́­
жбѣ свое́й, по ѡбы́чаю уча̀ бра́та и бесѣ́­
дуя єму̀, и бы́сть со́ненъ, и пребыва́­
ше бра́тъ до́ндеже воспря́нетъ ста́рецъ,
и нужа́шеся мы́сльми ѿитѝ спа́ти безъ
ѿпуще́нія, и ну́жею проти́вися мы́слєм̃,
и пребы́сть па́ки до́ндеже возбуди́тся. и
та́кѡ до седми́жды ну́дяся ѿитѝ и не
ѿи́де, проти́вяся мы́слєм̃. Пото́мъже у́же
но́щи мимѡше́дши, возбну́въ ста́рецъ и
ѡбрѣ́те и присѣдя́ща, и гл҃а досе́лѣ ли не
ѿи́де. ѻ́нъже речѐ, не ѿпусти́ бо менѐ о́ч҃е.
рече́ же ста́рецъ, да почто̀ менѐ не возбудѝ.
ѻ́нъже речѐ, не смѣ́хъ тебѐ ни дви́гнути,
да тебѐ не ѡсла́блю. Воста́вше же нача́ста
у́треницу. и по ѿпѣ́ніи ѿпустѝ бра́та ста́­
рецъ. и єгда̀ сѣдя́ше ста́рец̃ ѡсо́бь, и бы́сть
во у́жасѣ. и сѐ нѣ́кое мѣ́сто сла́внѡ показа́­
ся єму̀, и прс̃то́лъ нанем̃, и верху̀ прс̃то́ла,
з҃ вѣне́цъ лежа́ще. вопроша́ше же ста́рецъ
показа́ющаго єму̀, кому̀ сія̀ вѣнцы̀.
ѻ́нъже речѐ, учн҃ку̀ твоему̀, мѣ́сто у́бѡ
и прс̃то́лъ, ѿне́леже не ѿи́де дадѐ єму̀
бг҃ъ, и се́дмь вѣне́цъ в̾ сію̀ но́щь прія́ти.
{#л. хѯ҃г}

и слы́шавъ сія̀ ста́рецъ, диви́ся, и при­
стра́шенъ бы́въ, призва́въ бра́та, и речѐ
єму̀, что̀ сотвори́лъ, рцы́ ми, илѝ что̀
єсѝ помы́слилъ в̾ сію̀ но́щь. ѻ́нъже речѐ,
ѿ да́ждь ми а́вво, я́кѡ несотвори́хъ ничто́­
же. ста́рецъ же непщева́ше я́кѡ смиря́я­
ся неисповѣ́да єму̀. рече́ же єму̀ ста́­
рецъ, не ѡсла́блю ти а́ще не исповѣ́си.
рече́ же єму̀, что̀ єсѝ сотвори́лъ въ сію̀
но́щь. Бра́тъ же ничто́же себѐ рещѝ и ѿ­
вѣща́ти умѣ́яше, но то́кмѡ речѐ прости́
мя ѻ́ч҃е, сѐ сотвори́хъ, я́кѡ пону́дихся
помышле́ньми мои́ми седми́жды ѿитѝ без̃
твоегѡ̀ ѿпуще́нія спа́ти, и не ѿ идо́хъ.
слы́шавши же ста́рецъ, и уразумѣ̀,
я́кѡ ко́ль кра́ты проти́вяшеся помышле́ніем̃
бра́тъ, толи́кѡ и вѣнча́шеся ѿ́бг҃а, и ни
что́ же бра́ту неречѐ ѡ си́хъ; но по́льзы
ра́ди повѣ́даше къ дх҃о́внымъ мужє́мъ,
да навы́кнутъ, я́кѡ ма́лыми помышле́ніи
бг҃ъ дае́тъ на́мъ вѣнцы̀. добрѡ̀ ну́дити­
ся гдс̃а ра́ди ѡ все́мъ. ну́жно бо
є́сть црс̃тво нбс̃ное, и ну́жни­
цы восхища́ютъ є̀;

Вто́йже де́нь сло́во ст҃а́гѡ єѳре́ма ѡ долго­
терпѣ́ніи.

Бл҃же́нъ пои́стинѣ чл҃къ, и́же долго­
терпѣ́ніе стя́жетъ, я́кѡ такова́го
ст҃ы́я кни́ги похваля́ютъ. долготерпѣ­
ли́въ у́бѡ му́жь му́дръ и мно́гъ
в̾ ра́зумѣ; и что̀ бл҃же́ннѣе сего̀.
долготерпѣли́вый же николи́ же побѣ­
жде́нъ быва́етъ. долготерпѣли́вый бо
всегда̀ в̾ ра́дости и въ весе́ліи є́сть, в̾ до­
саже́ніи упова́етъ на гдс̃а. долготерпѣли́­
вый кромѣ̀ грѣха̀ є́сть, все́ бо терпи́тъ.
долготерпѣли́вый накото́ре неразждиза́етъ­
ся, на досаже́ніе не гото́вится, словесѐ
тща̀ небреже́тъ, ѡби́димь не печа́луетъ,
проти́вящимся не проти́вится, во вся́кой
ве́щи утверже́нъ є́сть. в̾ ско́рбѣх̃ ра́дуетъ­
ся, во вся́комъ дѣ́лѣ бла́зѣ водворя́етъ­
ся. запреща́емь, не пререку́етъ.
гнѣ́ваемь, не дря́хлуетъ, долго­
терпѣ́ніе бо цѣли́тъ єго;
{#л. хѯ҃д}

Сіѐ честѝ мцс̃а ию́ліа въ прилучи́вшуюся
нлд̃ю по ѕ҃і числѣ̀, а́щели же прилучи́тся
сія̀ нлд̃я в̾ ѕ҃і дн҃ь, и ты̀ чтѝ и в̾ ѕ҃і дн҃ь.

Вто́йже дн҃ь па́мять соверша́ем̃ ст҃ы́хъ оц҃ъ
шестѝ со́тъ и три́десяти, и́же в̾ халкидо́нѣ
ст҃а́гѡ и вселе́нскагѡ четве́ртаго собо́ра.

Се́й ст҃ы́й вселе́нскій собѡ́ръ, бы́сть во́
время маркіа́на и пелхері́и, бл҃гочс̃ти́вых̃
цр҃е́й, съ ше́дшихся ст҃ы́хъ ѻц҃ъ бл҃го­
да́тію ст҃а́гѡ дх҃а, въ преимени́тый
хра́мъ ст҃ы́я єѵ̾фи́міи. и утвержа́ю­
ще ст҃о́е изъѡбраже́ніе, трє́хъ сѡ́тъ и
ѻсмѝ на́десяте ст҃ы́хъ ѻц҃ъ, съ ше́дшихся
внике́и, є́же проповѣ́даша и запечатлѣ́ша,
и про́чія ст҃ы́я собѡ́ры. пра́вящу бо ски́­
петры црс̃твіа ѳеодѡ́сію сн҃у арка́діеву.
бы́сть си́цево зна́меніе. Нѣ́кій єѵ̾тіхій
мни́хъ и презви́теръ, нача́лникъ бы́сть
є́реси, глаго́лющи, я́кѡ гдс̃ь на́шъ іс҃ъ
хрс̃то́съ, єди́ногѡ бы́сть єстества̀, и єди́на­
гѡ дѣ́йства. и́же низложе́нъ ѿ флавіа́на
констянти́ня гра́да старѣ́йшины, и ѿ
про́чих̃ правосла́вных̃. се́йже дѣ́йствуя помо́­
щники безбо́жными, царе́выми євну́хи

непреста̀ творя̀ воз̃муще́нія и напа́сти, до́нде­
же у́мре ѳео́досіи. єгда́ же прія́тъ црс̃тво
маркіа́нъ, повелѣ̀ бы́ти великому собѡ́ру, и
собра́шася єпкс̃пи число́мъ шестьсѡ́тъ три́­
десять. сотво́рше же правосла́вніи, и иносла́­
вніи два̀ сви́тка. и ѿве́рзше гро́бъ все­
хва́лныя мч҃нцы єѵ̾фи́міи запечатлѣ́вше
и́хъ, положи́ша на ве́рхъ єя̀. и пома́лѣхъ
днє́хъ моли́вшеся и ѿве́рзше, ви́дѣша
и ужасо́шася. ви́дѣша бо сви́токъ єрети́­
ческій, пове́рженъ до́лѣ поднога́ма ст҃ы́я.
правосла́вных̃ же держа́щи в̾ чс̃тны́хъ рука́хъ.
сему́ же бы́вшу удиви́шася всѝ, ви́дяще
сицево́е чю́до. и утверди́шася па́че в̾ вѣ́­
рѣ, и просла́виша бг҃а, творя́щаго всегда̀
чю́дныя и ужа́сныя ве́щи, на ѡбраще́ніе
мно́гимъ и по́лзу. быва́етъ же таковы́й
собѡ́ръ во ст҃ѣ́й вели́цѣи цр҃кви. тѣ́хъ
ст҃ы́хъ оц҃ъ мл҃твами хрс̃тѐ бж҃е
поми́луй и спасѝ
на́съ;
{#л. хѯ҃е}

Мцс̃а того́ же въ з҃і дн҃ь, стрс̃ть ст҃ы́я
велико мч҃нцы мари́ны, бл҃гословѝ о́ч҃е.

Та́ бя̑ше ѿантіохі́и писѷді́йскія. дщѝ
єдесі́я ієре́я и́долскагѡ. приведена́ же
бы́сть олимѷрі́ю єпа́рху пожре́ти и́долѡм̃,
и хрс̃та̀ ѿврещи́ся не восхотѣ́вши, мнѡ́­
гія му́ки под̃я́тъ. и в̾саже́на в̾ темни́цу,
и воста́вшаго наню̀ ѕмія̀ расто́рже. Пото́мъ
приведена̀ и вопроше́на, и непоколе́блемо испо­
вѣ́даніе хрс̃то́во сохра́ньши, ѿсѣко́ша
главу̀ єя̀. соверша́етъжеся собѡ́ръ єя̀
у ст҃а́гѡ мч҃нка ми́ны;

Вто́йже дн҃ь сло́во
ст҃а́гѡ ѳео́дѡра студі́йскагѡ.

Въснѣ́дех̃ и винопи́тіих̃ иску́сни су̑ще и бл҃го­
ра́достни, в̾ дѣ́ланіи же за́повѣдей бж҃іих̃
не иску́сни. то́й бо са́мъ апс̃лъ речѐ, вся́ко
сло́во гни̑ло ѿ у́стъ ва́шым̃ да неисхо́дит̃. но
а́ще что̀ бл҃го к̾ созда́нію потре́бы, я́кѡ да
да́стъ бл҃года́ть слы́шащым̃. и не ѡскорбля́й­
те дх҃а ст҃а́го бж҃ія, и́м̾же зна́менани
бы́сте въ де́нь избавле́нія. и па́ки гл҃етъ,
вся́ка го́ресть и я́рость и гнѣ́въ и во́пль и
хула̀, да во́змется ѿ ва́съ со вся́кою ѕло́бою.
Быва́йте же дру́гъ дру́гу бла́зи, милосе́­
рди, угожда́юще дру́гъ дру́гу, я́коже

и бг҃ъ ѡ хрс̃тѣ̀ угоди́лъ є́сть ва́мъ. зри́те
ли что̀ завѣщава́етъ, коли́кѡ є́сть ѡпа́сь­
ство за́повѣдное, и сія̀ кі́имъ бесѣ́доваше.
не и́ночествующым̃; но про́стѡ всѣ́мъ жите́й­
скимъ. ѡ и́ноцѣхъ же о́но є́сть гл҃ати.
о́ви же хрс̃то́ви пло́ть распя́ша со стрс̃тьмѝ и
похотьмѝ, я́кѡ недѣ́йствени су̑ще грѣхо́­
внагѡ дѣя́нія. а́ще сія̀ та́кѡ и́мать, да
смо́трятъ и́же нн҃ѣ сва́ршіися, кото́рагѡ
су̑ть ѡсужде́нія досто́йни, и́же не то́чію
свари́вшіися, но дру́гъ на́ друга ру́цѣ возло­
жи́ша. простира́еши у́бѡ вся́кѡ ру́ку на и́но­
чествующаго, и́же иєщѐ в̾ просты́хъ лю́дехъ
причита́емый. ты́ же и́ночествуяи, смѣ́еши
жеѕло́мъ уда́рити, новоприводи́маго к̾ пови­
нова́нію. Тѣ́мже нѣ́си и́нок̃, но самобо́рецъ;
ни по́стни, но разбо́йникъ. нижѐ сн҃ъ ми́ра,
но ча́до гнѣ́ва. єгда́ бо ѿ доса́дъ пріидо́ша
ра́ны, и ра́нам̃ послѣ́доваша сме́рти. сотво́­
ршіи у́бѡ сѐ, в̾ложе́ни бу́дут̃ в̾ подоба́ющеє
запреще́ніе, я́кѡ да нев̾го́ршеє пріи́дут̃. вы́же
ѽ возлю́бленніи, я́кѡ учн҃цы̀ кро́ткагѡ и
мирода́рнагѡ влд̃ки, кро́тцѣ и ми́рнѣ жи́тель­
ствуйте. ми́ръ гоня̑ще со всѣ́ми и ст҃ы́­
ню. без̾нею́ же ни кто́ же у́зритъ бг҃а.
{#л. хѯ҃ѕ}

є́сть же не то́чію стрс̃ть сія̀ смуща́юща и
измѣня́юща дш҃ю, но и я́рость на и па́че воз̃­
дви́жюща. смути́бося речѐ ѿ я́рости о́ко моѐ,
и я́рость и́хъ по подо́бію ѕміину̀, и я́рость
в̾ на́дрѣх̃ {*???} не смы́сленных̃ водвори́тся. и уклоне́­
ніе я́рости єгѡ̀, паде́ніе тому̀. ѿку́ду бо
такова́я стра́сть ража́ется; ѿ го́рдостнагѡ
и презо́ривагѡ мудрова́нія, мня́щуся єму̀
бы́ти что̀, и в̾стаю́ща на под̃ру́чныя;

Вто́йже дн҃ь сло́во ѿпатерика̀ ѡ нѣ́коємъ
ста́рцѣ добродѣ́телнѣ.

Є́сть послу́шьство во алеѯандрі́йстѣмъ гра́­
дѣ ст҃а́гѡ сарапамво́на, в̾ну́трь со́лне­
чныхъ вра́тъ, нѣ́кій мни́хъ во о́бразѣ
ни́щагѡ, в̾ну́трь сѣдя́ше въ крс̃ти́лни­
цѣ, пріє́мля ми́лостыню. и ѻвогда̀
у́бѡ ѿхожда́ше въ г҃ ча́съ. ѻвогда́ же
въ пя́тый ча́съ. иногда́ же и коснѣ́йше.
на мно́го же вре́мя зря̀ єго̀ парамона́рь,
и по́льзу пріє́мъ ѡ устроє́ніи єгѡ̀, по­
мы́сли въ слѣ́дъ єгѡ̀ итѝ, и увѣ́дѣти
ка́мѡ ѿхо́дитъ, и что̀ твори́тъ, по­
слѣ́дова у́бѡ єму̀, тому́ же невѣ́дя­
щу. и ви́дѣ я́кѡ купѝ єди́нъ хлѣ́бъ
за в҃і, нумі́й, и за д҃ нумі́й сы́ръ,

и изы́де внѣ̀ гра́да на мѣ́сто нѣ́кое,
вне́мъ же бя́ху гро́бища. и вхожда́ше въ
єди́нъ пра́зден̃ гро́бъ. и пре́жде да́же у́бѡ
не вни́ти єму̀, прибли́жився кнему̀
парамона́рь, и падѐ на́ нозѣ єму̀ гл҃я,
рцы́ ми хрс̃та̀ ра́ди, кто̀ єсѝ, и что̀
твори́ши; ста́рецъ же ви́дѣвъ я́кѡ не
ѡставля́етъ єго̀, гл҃а єму̀, сѣжю̀
во ст҃ѣ́мъ сарапамво́нѣ, и взима́ю я́же
на пи́щю мою̀, ѕ҃і, нумі́й. и а́біе
ѿхожю̀, во́нь же ча́съ пріиму̀ та̀, и
купу́ю єди́нъ хлѣ́бъ, и єди́нъ сы́ръ, и
прихожю̀ въ гро́бъ се́й, и упражня́юся
про́чая днѝ пла́чася грѣхѡ́въ свои́хъ.
Тогда̀ припа́дъ кнему̀ парамона́рь,
моля́шеся гл҃а єму̀, гдс̃а ра́ди сѣдѝ
въ кѣ́ліи свое́й и молѝ ѡ мнѣ̀. и а́зъ
приношу́ ти на кі́йждо де́нь дневну́ю
пи́щю. гл҃а єму̀ ста́рецъ, а́ще твори́­
ши я́коже ре́клъ єсѝ, и полага́еши та̀
внѣ̀ вра́тъ, и толкну́въ ѿхо́диши,
сотворю̀. ѻ́нъже ѡбѣща́ся. я́кѡ у́бѡ
сотворѝ ма́лѡ вре́мя парамона́рь творя̀ посло­
весѝ ста́рца. во єди́нъ ѿ дні́й толкну́въ
предъ враты̀ до́ндеже изы́де ста́рецъ,
{#л. хѯ҃з}

припадѐ кнему̀ гл҃а, гдс̃а ра́ди сотвори́
мя и́нока. ста́рецъ же в̾ве́дъ єго̀ вну́трь,
прочтѐ єму̀ я́же су̑ть и́ноческагѡ о́браза,
и я́коже подоба́ше ѡгласи́въ єго̀. и бя́ше
про́чеє уста́рца. то́йже изше́дъ па́ки попе́­
рвому обы́чаю сѣдя́ше въ крс̃ти́лницѣ, до́­
ндеже пріима́ше, л҃ и в҃, нумі́й, бл҃готворе́­
нія, и купу́яше два̀ хлѣ́ба, и два̀ сы̑ра
себѣ́ же и бра́ту. Во́инъ же нѣ́кто хрс̃то­
люби́въ ча́стѡ вхожда́ше въ цр҃ковь, и зря̀
устрое́ніе ста́рца и по́льзу пріе́мъ, послѣ́­
дова єму̀ увѣ́дѣти хотя̀, ка́мѡ ѿхо́дит̃,
и гдѣ̀ пребыва́етъ. и увѣ́дѣ, моля́ше єго̀
гл҃я, я́кѡ да без̾мо́лвствует̃ в̾ кѣ́ліи свое́й,
моля́ся ѡне́мъ и ѡ дому̀ єгѡ̀, то́йже да
твори́тъ єму̀ послуже́ніе. ста́рецъ же речѐ
єму̀, два̀ хлѣ́ба тре́бую, идва̀ сы̑ра на ко́й­
ждо де́нь, и невозвѣстѝ єму̀ ѡ храни́тели
цр҃ко́внѣм̃, я́кѡ унегѡ̀ є́сть и́ночествуя.
я́кѡ у́бѡ сотворѝ вре́мя, подая̀ єму̀ потре́­
бу, случи́ся умре́ти ста́рцу. и гл҃а уч҃нку̀
своему̀, и́же иногда̀ цр҃ко́вному храни́те­
лю, сѣдѝ в̾ мѣ́стѣ се́мъ, и ника́коже ѿ­
ходѝ. и єгда̀ принесе́тъ во́инъ то́й два̀ хлѣ́­
ба, и два̀ сы̑ра, рцы̀ єму̀, єди́наго хлѣ́ба,

и єди́наго сы̑ра потре́ба ми є́сть. и сѣдѝ
внима́я себѣ̀. и а́ще сохрани́ши ми за́по­
вѣдь, и́маши мя̀ пою́ща с̾ тобо́ю по ѻбы́­
чаю. я́кѡ у́бѡ сконча́ся ста́рецъ, и погребѐ
єго̀ учн҃къ єгѡ̀, пою́щу єму̀, и я́коже
ѡбѣща́ся ста́рецъ, поя́ше сни́мъ. и сѐ на
мно́ги днѝ творя̑ше. ненави́дяиже добра̀,
и прс̃нѡ зави́дяи сп҃се́нію чл҃ческому дія́волъ,
в̾ложѝ єму̀ по́мыслъ гл҃я, нн҃ѣ роди́тели
твоѝ что̀ гл҃ютъ ѡ тебѣ̀, у́мерлъ ли
є́сть, илѝ жи́въ. а́ще у́бѡ бы ше́лъ
єди́ною поу́треніи, и ви́дѣлъ и́хъ, а́біе воз̃­
врати́лся бы в̾ мѣ́сто своѐ, и про́чеє сѣ­
дѣ́лъ бы беспеча́ленъ. ѻ́нъ же прельсти́­
вся по́йде. возврати́вшу жеся єму̀ ѿ­
ону́ду, бы́сть вре́мя пѣ́тію, гла́са же
ста́рча ктому̀ не слы́ша. и ѡста́вивъ пѣ́­
ніе, нача́тъ пла́кати на́дъ гробом̃ єгѡ̀ гл҃я,
ѡста́вилъ мя̀ єсѝ гдс̃и а́вво. пріи́де же
єму̀ гла́съ ѿ́ гроба гл҃я, єда̀ а́зъ ѡста́вихъ
тя̀, ты̀ преступи́лъ єсѝ за́повѣдь, ю́же да́хъ
тебѣ̀. єда́ бо а́зъ бѣ́хъ поя́й с̾тобо́ю; но
бг҃ъ чл҃колю́бецъ, и́же прс̃нѡ пекі́йся ѡ́родѣ
чл҃честѣм̃, и спасе́ніе и́хъ щадя̀, посыла́я
ст҃а́го а́гг҃ла своего̀ во ѻ́бразѣ мое́мъ,
{#л. хѯ҃и}

є́же пѣ́ти с̾ тобо́ю. а́зъ бо в̾ мѣ́стѣ се́мъ,
идѣ́же бг҃ъ повелѣ́ ми бы́ти. а́гг҃лъ же бж҃іи
запреслуша́ніе твоѐ ѿступи́лъ є́сть ѿтебѐ.
сѣдѝ у́бѡ про́чее пла́чася грѣхѡв̃ своих̃, и вни­
ма́я себѣ̀, и́бо бл҃гі́й бг҃ъ помо́жетъ тѝ.

Вто́йже де́нь сло́во ѡ согрѣша́ющихъ, и
нехотя́щихъ ка́ятися.

Мно́зи ѿ согрѣша́ющихъ прс̃нѡ глаго́лютъ
смра́да испо́лненъ є́смь, ка́кѡ могу̀
прибли́житися къ бг҃у, и ка́кѡ могу̀
умоли́ти ѝ, діа́вольским̃ ѡдержи́мь со­
грѣше́ніем̃. ѽ бра́те, без̃дерзнове́нія
ли єсѝ, сегѡ̀ дѣ́ля пріидѝ, да ѡбря́ще­
ши дерзнове́ніе вели́кѡ; єда́ бо чл҃къ є́сть
хотя́и истяза́тися с̾ тобо́ю, да́ся єго̀ по­
стыди́ши; бг҃ъ є́сть па́че чл҃ка хотя̀ изба́ви­
ти тя ѿ грѣхѡ́въ. не та́кѡ ты̀ сп҃се́нія сво­
егѡ̀ жела́еши, я́коже ѻ́нъ хо́щетъ твоему̀
сп҃се́нію. да не глаго́ли, погибо́хъ, что̀ со­
творю̀; врача̀ и́маши вы̑ше врачбы̀, хотя́­
ща исцѣли́ти тя̀ грѣхо́внагѡ неду́га,
а́ще ты̀ са́мъ ѡба́виши, ре́кше предѝ
исповѣ́си своя̀ согрѣше́нія. грѣхо́вное пока­
я́ніе чи́ста твори́тъ ка́ющагося умо́мъ.
добро̀ у́бѡ є́же не согрѣша́ти. бл҃гоже є́сть

є́же согрѣша́емы ка́ятися. я́коже ѿ болѣ́­
зни боля́щему премѣни́тися и здра́вѣйше­
му бы́ти поя́звѣ, не є́же бо па́сти лю́то,
но є́же па́дши невоста́ти, но лежа́ти. а́ще
гл҃еши чрез̃ єстество̀ согрѣши́хъ; то̀ кто̀
є́сть без̃грѣха̀ на землѝ; довлѣ́етъ тѝ сѐ на
па́мять; гл҃и ты̀ пре́же без̾зако́нія своя̀,
да ѡправди́шися. пла́чи пре́же вре́мене покая́­
нія, да неуслы́ши єгда̀ нѣ́сть вре́мене
покая́нія. содѣ́лаем̃ бл҃го́е, до́ндеже мо́жем̃.
не толми́ бо оц҃ъ лю́битъ сн҃а, я́коже бг҃ъ
ка́ющагося дш҃ю. та́кобо є́сть влд̃чне чл҃ко­
лю́біе, ни єди́наго ѿ прири́щущихъ кнему̀
ѿвраща́ется. нѣ́сть потре́бна вре́мени на
поиска́ніе спасе́нія хотя́щему. разбо́йникъ
у́бѡ не во́время сп҃се́ся, но то́чію вѣ́ровав̃,
и себѐ ѡсудѝ подѣ́лѡм̃ пріи́мша, не истощи́­
мое сокро́вище црс̃тва нбс̃нагѡ ѡбрѣ́те. нача́ло
бо сп҃се́нію, себѐ ѡсуди́ти ка́ющуся, покры­
ва́я же своя̀ согрѣше́нія, не ѡправди́тся.
ка́яижеся ѡ ѕлы́хъ я́же содѣ́я, а́ще грѣ­
хѡ́мъ досто́йна не сотвори́тъ покая́нія во
єпитемія́хъ исправле́ніемъ, то̀ ѿвѣща́­
ти єму̀ на судѣ̀. бг҃у на́шему сла́ва,
нн҃ѣ и прс̃нѡ и во́ вѣки вѣкѡ́мъ;
{#л. хѯ҃ѳ}

Мцс̃а того́же въ и҃і де́нь, стрс̃ть ст҃а́гѡ
мч҃нка ємеліа́на, бл҃гословѝ о́ч҃е.

Ємеліа́нъ хрс̃то́въ мч҃нкъ бѣ̀ ѿ́града родо­
сто́ла амасі́йскія єпа́рхіи, приуліа́нѣ
престу́пницѣ, ра́бъ нѣ́коегѡ є́ллина.
са́мъ же бѣ̀ хрс̃тіа́нинъ. и ѡбрѣ́тши
вре́мя взе́мши мла́тъ, и и́де в̾ хра́мъ
и́дольскій, и сокрушѝ вся̀ ка́пища, и же́­
ртвы раз̾сы́па. не вѣ́дуще же идолослу­
жи́тели, я́ша нѣ́коего ра́тая, и нача́ша
єго̀ би́ти, влеку́ще єго̀ къ игѣ́мону,
тогда̀ ст҃ы́й ви́дѣвъ сѐ, предадѐ себѐ гл҃я,
а́зъ є́смь сотвори́лъ сѐ. и приведо́ша ѝ къ
игѣ́мону, и ѡбличѝ єгѡ̀ безу́міе, я́кѡ
на су́етныя и́долы упова́юща, біе́нъ бы́сть
ѕлѣ̀ жи́лами говя́жіими. и до́брѣ му́ки при­
и́мъ, во ѻ́гнь в̾ ве́ржен̃ бы́сть, и неѡпали́мь
пребы́сть. и в̾ ру́цѣ бж҃іи дх҃ъ сво́й предадѐ.

Вто́йже дн҃ь стрс̃ть ст҃а́гѡ мч҃нка иакі́нѳа.

Се́й прозябѐ ѿ роди́телю бл҃гочести́ву ѳеѡ­
клі́та и ѳеоні́лы. иракли́ду же въ
єнамастриді́и цр҃ковь составля́ющу,
тогда̀ явле́ніемъ а́гг҃льскимъ и́мя воспри­
я́тъ. и трилѣ́тенъ бы́въ, призва́ніемъ
хрс̃то́вымъ ѻтроча̀ уме́ршеє воск҃рси́въ.

съ пребыва́ющи єму̀ и совозраста́ющи добро­
дѣ́тели. да внегда̀ къ ста́рости дости́­
же, мно́ги чюдесє́мъ содѣлова́нія сотво­
ри́въ. ви́дѣ идолослужи́тели не разу́­
мичны, дре́ву бре́стову служа́щя, и́же
бя̑ше оби́тъ и хралу́пъ. и́же ст҃о́му дре́­
ва того̀ посѣ́кшу, я́тъ бы́въ и приведе́нъ
къ кавьстрисі́ю игѣ́мону. и доше́дъ до ама­
стри́нскагѡ гра́да, біе́нъ бы́сть вельмѝ, и
искорени́ша зу́бы єгѡ̀, и у́жи влачи́мь,
и в̾темни́цу в̾саже́нъ, бг҃у дх҃ъ предадѐ;

Вто́йже де́нь поуче́ніе къ покая́нію є́же
не ѡста́вити моли́твы.

Не ѿча́йся чл҃че, ни ѿступа́й мл҃твы, и при­
идѝ къ цр҃кви грѣ́шенъ сы́й. съ возды­
ха́ніемъ помоли́ся къ бг҃у, и да́стъ ти
чл҃колю́біе своѐ и просты́ню грѣхѡ́въ тво­
и́хъ. а́ще ѿча́явся у́бѡ не хо́ще­
ши пріитѝ, то̀ воѻ́бласть сатанѣ̀ дае́ши
себѐ. а́ще ли сумня́ся не́йдеши, то̀
спо́ну твори́ши бж҃іей блгд̃ти, хотя́щей тя̀
поми́ловати, и вся̀ приходя́щыя кнему̀ пока­
я́ніем̃. нн҃ѣ из̾берѝ у́ньшеє. а́ще у́бѡ добро̀
грѣх̃, то̀ хранѝ єго̀, и пребыва́й в̾не́мъ до
конца̀. а́ще ли разумѣ́еши ѿнегѡ̀ му́ку
{#л. хо҃}

то̀ почто̀ пребыва́еши в̾ па́губных̃ дѣ́лех̃. пи́са­
нобо є́сть, в̾че́м̾тя заста́ну в̾том̃ и сужу̀.

Вто́йже де́нь сло́во ѡ ѕлоязы́чнѣмъ чл҃цѣ.

Чл҃къ я́ръ раз̃жиза́етъ сва́ры, и му̑жь дво­
язы́ченъ возмяте́тъ дру́ги, и средѝ
ми́рныхъ вложи́тъ клеветы̀ и сва́ръ.
напра́сенъ сва́ръ пролива́етъ кро́вь. шепо­
тника̀, и двоязы́чника подоба́етъ кля́­
ти, мно́ги бо ми́рны су̑ще погубѝ
язы́къ тро́й мно́ги потря́слъ и разлучи́лъ,
я́кѡ ѿязы́къ и гра́ды тве́рды разори́ли­
ся, и до́мы бога́тыхъ разврати́лися.
язы́къ тро́й жены̀ добры̀ изгна́лъ издо­
мѡ́въ свои́хъ, и лиши́лъ и́хъ трудѡ́въ
свои́хъ. послу́шаяи єго̀, не и́мать ѡбрѣ­
стѝ поко́я, ни и́мать усели́тися безъ­
мо́лвнѡ. мно́зи падо́шя ѻ́стріемъ меча̀,
но не я́кѡ па́дшіи язы́комъ. Бл҃же́нъ и́же
укры́ется ѿ негѡ̀, и и́же не про́йдетъ
въ я́рости єгѡ̀, и́же не взя́тъ и́го
єгѡ̀. и́го бо єгѡ̀ желѣ́зно, и у́зы єгѡ̀
мѣ́дяны. язы́къ ѕо́лъ, и люта̀ сме́рть
єгѡ̀, и да не ѡблада́етъ вѣ́рными, и не
сгоря́тъ в̾ пла́мени єгѡ̀. ѡста́вившіи у́бѡ
бг҃а в̾ паду́тся во́нь, и нани́хъ возгори́тся

язы́къ ѕо́лъ и не уга́снетъ, по́сланъ
бу́детъ наня̀ я́кѡ ле́въ язы́ченъ о́стръ.
сло́вомъ свои́мъ сотворѝ мѣ́ру, и строе́­
ніемъ свои́мъ сотворѝ две́рь и затворѝ,
и устнѣ̀ твоѝ, не гл҃юта лстѝ. внима́й
да непоползне́шися и́ми. бг҃у
на́шему сла́ва, нн҃ѣ
и при́снѡ и во́ вѣки
вѣкѡ́мъ
;
{#л. хо҃а}

Мцс̃а того́же в̾ ѳ҃і дн҃ь, па́мять прпд̃бныя
ма́тере на́шея макри́ны, сестры̀ вели́ка
васи́лія, бл҃гословѝ о́ч҃е.

Сія̀ ст҃а́я макри́на, добро́тою тѣле́сною и
нра́вы бл҃ги́ми украша́ющи себѐ. та́же удо́­
бному с̾пряже́на бы́сть жениху̀. бра́ку же
и єщѐ лежа́щу во ѡбруче́ніи, и внегда̀ у́бѡ
таков́ая с̾дѣ́лавъ, во ѿхоже́ніи лю́тѣ бы́въ
и у́меръ. и изы́де ѿ чл҃къ бл҃же́нная макри́­
на. други́м̾же мно́гим̃ тѣ́шащым̃ ю̀, и приве­
стѝ хотя́ще є́й му́жа. ѻна́ же ѡ вдовьствѣ̀
и ѡпро́чих̃ прилѣжа́ше, внегда̀ ѡбра́чной красо­
тѣ̀ нерадя́щи, вся́когѡ примѣ́са мирска́гѡ
себѐ ѿча́явши, бя́ше же съ ма́терію къ бж҃е́­
ственым̃ кни́гамъ упражня́ющися. и уче́­
ніе вторы́я ма́тере, и и́же сне́ю роди́вшимся
воспита́тися. десяти́мъ су́щым̃ отрокѡ́мъ
сія̀ наказа́телница бы́вши. посто́м̾ же и
прпд̃бьствіем̃ пожи́вши. и бра́ту григо́рію ѡ
дш҃и побесѣ́довавши, и в̾ таковы́хъ к̾ра́йних̃
добродѣ́телех̃ ѿи́де къ гдс̃у, єго́ же возлюбѝ;

Вто́йже дн҃ь прпд̃бнаго оц҃а̀ на́шего ді́я.

Се́й бя̑ше во времена̀ ѳео́досія вели́кагѡ воан­
тіохі́и сѵ́рстѣй. мно́гое показа́въ страда́­
ніе, и навели́кое пода́ніе добродѣ́телєй прошед̃.

прише́д̾ же въ констянти́нь град̃, ѿкрове́­
ніем̃ бж҃іимъ ѡбрѣ́те мѣ́сто, идѣ́же нн҃ѣ
бл҃гочс̃ти́вый єгѡ̀ поста́влен̃ бы́сть мнс̃ты́рь,
и ѡчи́стивъ єгѡ̀, и своегѡ̀ жезла̀ су̑ха
су̑ща на то́мъ мѣ́стѣ водрузѝ, и́же и на­
рече́ніем̃ ст҃ы́я тро̃цы въ корени́ся, бы́сть
в̾ ду́бъ вели́къ, я́кѡ и досе́лѣ стоя̀ и при­
нося̀ плоды̀ гобзова́нны. пріи́де же кнему̀
цр҃ь ѳеодѡ́сіи, и почюди́в̾ся єму̀, и дово́­
лнѡ бога́тьство по́давъ єму̀, ѿнего́ же и
соста́въ мнс̃ты́рьскій бы́сть. но бл҃же́нный
патріа́рхъ ат̾ти́къ пону́дивъ єго̀, и презви́­
тера поста́ви. мно́га же чюдеса̀ си́лою и со­
дѣ́йствіем̃ хрс̃то́вым̃ содѣ́лавъ. и ѿбоку̀ земле́­
ною повели́кіму мѡѷсе́ю во́ду из̃ведѐ, и вне́й
поневѣ́рію уди́вльшагося̀ воск҃рси́въ. и
внегда̀ хотя̑ше умре́ти, у́же безду́шен̃ и
недви́жим̃ ви́димь бя̑ше. и приходя́щим̃ сле­
за́ми пригро́бными ѡмыва́ющым̃ себѐ, и є́же
къ и погребе́нію єгѡ̀ гото́вающым̃. во́ньже при­
шед̃ и ст҃ѣ́йшіи патріа́рхъ ат̾ти́къ, и анти­
охі́йскій алеѯа́ндръ, и воспомяну́всяя я́кѡ
ѿ сна̀ прпд̃бный речѐ, дарова́лъ ми є́сть бг҃ъ и
єщѐ пя̑ть на́десять лѣ́тъ. и въста́въ
и препроводи́въ и́хъ ѿи́де къ гдс̃у;
{#л. хо҃в}

Вто́йже де́нь сло́во и́нока петра̀.

Подража́тели у́бѡ бу́дем̃ ст҃ы́мъ, я́коже
ѻнѝ преидо́ша воа́лчбѣ и жа́ждѣ в̾ зимѣ̀
и наготѣ̀, огне́мъ и мече́мъ, и вся́ки­
ми скорбьмѝ усе́рднѡ. та́кѡ и мы̀ до
сме́рти уподобимся и́мъ. а́ще хо́щете,
прс̃нѡ без̃сра́мнѡ проси̑те. се́ бо є́сть во́ля
бж҃ія, непреста́ннѡ моли́тися, без̃гнѣ́ва и
помышле́нія. вся́къ бо по́мыслъ ѿлуча́етъ
у́мъ ѿ бг҃а. ве́сь бо є́сть по́двигъ дія́во­
лу, ѿлучи́ти и ѿри́нути у́мъ ѿ бг҃а, и сово­
купля́тися и соглаша́ти со скве́рными по́мы­
слы, ни внима́ти я́же напису́етъ в̾ну́трь
въ срд̃цы. ко всѣ́мъ бо скомра́хъ. творя́ся
ве́тхіи писе́цъ дія́волъ, овогда̀ у́бѡ бле́­
ски, овогда́ же зра́ки, и ли́ца не лѣ́потна,
и ве́щи. Поси́хъ же всѣх̃ дія́волъ, яко́в̾же
є́сть вообража́ется, и окая́нный чл҃къ на
єди́ном̃ мѣ́стѣ стоя̀ мни́тъ и́ндѣ нѣ́гдѣ
бы̑ти прельща́ем̃ и надѣ́ется зрѣ́ти нѣ́кія,
и к̾ли́цемъ бесѣ́довати, и управля́ти ве́щи
я́же су̑ть вся̀ пре́лесть дія́воля. до́лжнѡ
у́бѡ є́сть утвержа́ти и ѡпасова́ти у́мъ, и
ѡбуздова́ти єго̀, и вся́къ по́мыслъ и вся́ко
дѣ́ланіе истяза́ти и́менем̃ гдс̃а на́шегѡ іс҃а х҃а,

взе́млющагѡ грѣхѝ ми́ра. да идѣ́же
тѣ́ло стои́тъ, ту̀ и у́мъ є́сть.
да посредѣ̀ срд̃ца и бг҃а, ничто́ же и́но да
не ѡбрѣта́ется, я́коже средогра́діе илѝ
пло́ть помрача́юще срд̃це; но къ єди́ному
да бесѣ́дуетъ то́кмѡ гдс̃ви. а́ще ли же во­
схища́ется у́мъ, нѣ́сть до́лжнѡ уко­
снѣва́ти въ помыслѣ́хъ, да не сло́гъ мы́­
слєй въ дѣ́ло вмѣни́тся єму̀ пред̃ гдс̃емъ
в̾ де́нь су́дный, єгда̀ су́дитъ бг҃ъ та́й­
намъ чл҃ческим̃, и єгда̀ помышле́ніе чл҃че­
ское исповѣ́сться. не возмо́жно бо є́сть
кому̀ получи́ти црс̃твіе нбс̃ное, а́ще не
пре́жде ѿве́ржется во́ли своея̀, и повелѣ́­
нная єму̀ сотвори́тъ со стра́хомъ бж҃іим̃;
я́коже хрс̃то́съ гл҃етъ, не пріидо́хъ твори́­
ти во́лю мою̀, но во́лю посла́вшаго мя
ѻц҃а. єму́ же кто̀ жела́етъ и стра́ждет̃,
стерпѣва́етъ, распя́тіе єму̀ вмѣня́етъ­
ся, и быва́етъ ча́до воскрс̃нія, и жи́­
зни вѣ́чныя. бл҃же́нъ бо є́сть чл҃къ
и́же претерпи́тъ напа́сть, я́кѡ иску­
ше́нъ бы́въ, пріи́метъ не увяда́емый
вѣне́цъ сла́вы. такова́я у́бѡ слы́ша­
вше ѻбѣтованія, упразнитеся прс̃нѡ,
{#л. хо҃г}

и прилежи̑те гдс̃ви бг҃у на́шему, до́ндеже
уще́дритъ ны̀. и ничто́ же и́но не проси́­
те, то́кмѡ ми́лость ѿгдс̃а сла́вы, и до­
влѣ́етъ на́мъ. и́щуще же млс̃ть, смире́ным̃
срд̃цемъ проси́те. про́чеє вопі́йте ѿ у́тра,
да́же до́вечера, а́ще ли є́сть мо́щно и всю̀
но́щь гл҃ати непреста́ннѡ, гдс̃и іс҃е хрс̃тѐ сн҃е
бж҃іи поми́луй мя;

Вто́йже дн҃ь сло́во
іѡ҃а́нна златоу́стаго ѡ ми́лостыни я́кѡ и
посме́рти ми́лостыни добро̀ є́сть.

Є́сть же и в̾ послѣ́днемъ издыха́ніи ми́ло­
стынею бг҃у угоди́ти, но нета́кѡ я́кѡ
жи́ву су́щу. но а́ще вои́стину є́сть,
и ка́кѡ и ко́имъ о́бразом̃; а́ще и ту́ же
напи́шеши хрс̃та̀ со всѣ́ми наслѣ́дники сво­
и́ми, и да́си ча́сть єму̀ ѿ своегѡ̀ имѣ́­
нія, нѣ́си єго̀ накорми́лъ, не жи́въ бо єсѝ,
но неѿходя̀ то̀ сотворѝ тому̀ имѣ́нія вручи́­
ти. єгда́ же у́же нѣ́си гдс̃нъ, да́й єму̀ свою̀
ча́сть понѐ тогда̀, и раз̃рѣши́ши пред̃нече́стіе.
ку́ю бо получи́ши млс̃ть, поне́же єго̀ жив̃ єсѝ
некормил̃, и хотя̀ у́же ѿитѝ кнему̀, не хо́­
щеши ли нима́лыми подари́ти єго̀, но вра́гъ
єму̀ хо́щеши бы́ти и супоста́тъ, я́кѡ и тѣх̃
не да́си, я́же ти су̑ть нѣ́сть у́же напотре́бу.

мно́зи бо чл҃цы внеза́пу умро́ша, тебѣ́
же дарова̀ бг҃ъ разъстро́ити имѣ́ніе своѐ,
и ѡдому̀ свое́мъ вовсе́мъ не нерадѣ́ти,
кі́й пріи́меши ѿвѣ́тъ, поне́же и сію̀
пріи́меши ѿ негѡ̀ блгд̃ть, но пону́жи хо­
тѣвъ бы́ти чл҃колю́бецъ. а́ще бо нѣ́си
сотвори́лъ в̾ животѣ̀ по́лзы свое́й дш҃ѝ,
но не уме́рши сотворѝ сѐ добро̀. а́ще ли
тогда̀ несотвори́ши, то̀ кто̀ мо́жетъ ти
суди́му бы́вшу помощѝ. єгда́ бо жи́въ
бы́сть, я́кѡ без̃сме́ртенъ держа́шеся имѣ́­
ніа, понѐ нн҃ѣ ѕлонра́вія ѿве́рзися, я́кѡ
сме́ртенъ єсѝ. Хощу́ же рещѝ, а́ще
и тя́жкѡ вы̀ слы́шати и по́лнѡ тре́пета,
но оба́че ну́жда є́сть рещѝ, не с̾рабы̀ сво­
и́ми причтѝ влд̃ку. єгда̀ нн҃ѣ хо́щеши
прости́ти рабы̀, простѝ и хрс̃та̀, ѿ
гла́да же и ну́жи и темни́цы и ѿ наготы̀
свободѝ. не ужаса́етелися, слы́шавше
здѣ̀ рече́нная у́же. а єгда̀ та́мѡ ѿи́­
деши, велмѝ сего̀ го́рши услы́шиши,
и нестерпи́мое пріи́меши муче́ніе. что̀
и́маши рещѝ, и к̾ кому̀ прибѣ́гнеши,
и кого̀ призове́ши помо́щника себѣ̀. авраа́­
мали; но непослу́шает̃. дѣ́да ли, илѝ оц҃а;
{#л. хо҃д}

но и си́мъ у́бѡ не́мощно изба́вити тебѐ,
а́ще и вельмѝ су̑ть ст҃и, ко́ждобо ѿних̃
подѣ́лѡмъ свои́мъ пріи́метъ. а́ще до­
се́лѣ єсѝ жи́въ бы́лъ су́ровъ, и неми́ло­
стивъ, то̀ нн҃ѣ съжа́лися ѡ чи́нѣ про­
ся́щихъ и умо́лятъ ѡтебѣ̀, и ми́лость
получи́ши ѿ бг҃а. а́ще ли ѡтѣх̃ несъжа́­
лишися, ѡбѣща́нныхъ ра́ди бл҃гъ,
ку́ю пріи́меши млс̃ть, и́же толи́цемъ
увѣ́томъ презрѣ̀ тре́бующихъ.
но вся́кѡ гл҃ю ти, поми́луи, да сам̃
поми́лованъ бу́деши ѿ бг҃а.
єму́же сла́ва нн҃ѣ и прс̃нѡ и вѡ́ вѣки
вѣкѡм̃
;