<<--- 08aug/01.htm>>>

Мцс̃ъ а́вгустъ и́мать дне́й, л҃а. дн҃ь и́мать часов̃ г҃і
{*заголовок набран вязью}
а но́щь, а҃і.

Мцс̃а а́вгуста въ а҃, дн҃ь. па́мять ст҃ы́хъ
мч҃нкъ седмѝ бра́тіи по́ плоти, нарица́е­
мыхъ маккаве́й. антони́на, ави́ма,
гу́ріа, єлеаза́ра, єѵ̾сеѡ́на, али́ма
и марке́ла. и мт҃ре и́хъ соломѡні́и. и
учи́теля и́хъ єлеаза́ра, бл҃гословѝ о́ч҃е.

Антіо́ху сы́ну селе́вкову, пріи́мъшу ца́рь­
ство єгѵ́пет̾ское. и уби́вшу птоломѣ́я,
вознесе́ся се́рдцемъ, и по́йде в̾ зе́млю
июде́йскую, и плѣни́въшу єму̀ ве́сь
язы́къ єѵ̾ре́йскій. и в̾ ше́дъ во ієроса­
ли́мъ, всѐ бога́тьство и́хъ взя́тъ. и
заповѣ́да полифо́су воево́дѣ, да прину́­
дитъ ізра́йльтяны вкуси́ти свины́хъ
мя̑съ, и мѡѷсе́ѡва зако́на ѿврещи́ся,
{#л. ѱл҃а}

и ѻте́ческихъ ѻбы́чаевъ. не покоря́ющыя
же ся повелѣ̀ му́чити безъми́лости. и
сопроти́вившіися мучи́телю, и ѻте́ческія
держа́ще зако́ны, мно́зи убіе́ни бы̑­
ша ѿни́хъ. зане́ же єлеаза́ръ ста́рецъ
учи́тель сы́й зако́ну и наказа́тель, и́же
и пре́же бы́вый во єгѵ́птѣ, и єди́нъ бѣ̀
ѿ преписа́вшихъ зако́нъ мѡѷсе́ѡвъ, пто­
ломѣ́ю царю̀ єгѵ́пет̾скому. и се́дмь
о́трокъ ѿ негѡ̀ учи́ми. Се́й приведе́нъ
пре́жде предъ мучи́теля, и понужде́нъ
свина́я мяса̀ я́сти. рече́ бо єму̀, со­
творѝ во́лю царе́ву, и жи́въ бу́деши.
а́зъ бо си́це тя возлюби́ти восхотѣ́хъ,
я́коже себѐ. Тѣ́мъже ми́лую твою̀ ста́­
рость да не безума̀ погуби́ши себѐ. но
взе́мъ свина́я мяса̀ снѣ́ждь предъ всѣ́­
ми, да и про́чіи ви́дѣвше убоя́тъся,
и сотворя́тъ та́кожде. а́ще ли нѝ,
ѕлѣ̀ у́мреши. ѿвѣща́ же ста́рецъ и
речѐ, не подоба́етъ ми ѽ воево́до, и не
полезно є́сть є́же послу́шати земна́го
и тлѣ́ннаго царя̀, и́же дне́сь су̑ща, и
у́трѣ не су́ща, и по є́же ѿсю́ду исхо­
жде́ніи, червьмѝ снѣда́ема, и го́рцѣ

и бесконе́чнѡ му́чима; но па́че нбс̃наго
цр҃я̀, и́же єди́нъ имѣ́яи безъсм҃ртіе и во́
свѣтѣ живы́й не присту́пнѣ, и́же сло́вомъ
свои́мъ сотворѝ вся́ческая ви́димая же и
неви́димая. єго́ же не ви́дѣ никто́же
ѿ человѣ́къ, ни ви́дѣти мо́жетъ. и то́й
ѡблада́етъ живы́ми и ме́ртвыми. и в̾ по­
слѣ́дніи дн҃ь пріи́детъ со сла́вою, и́же и
просвѣти́тъ та́йная тмы̀, и ѿкры́етъ со­
вѣ́ты серде́чныя, и и́мать суди́ти жи­
вы́мъ и ме́ртвымъ, и возда́стъ кому́ждо
подѣ́лѡмъ єгѡ̀. єго́ же црс̃твію нѣ́сть
конца̀. єго́ же никто́ же ѿ человѣ́къ утаи́­
тися, илѝ изъ бѣжа́ти ѿ крѣ́пкія рукѝ
єгѡ̀ возмо́жетъ. и́же и всѣ́хъ нечести́­
выхъ и грѣ́шныхъ и престу́пники зако́на
єгѡ̀, и того̀ су̑ща и́стинна бг҃а ѿве́рг̾шихъ­
ся, ѕлѣ̀ и бесконе́чнѡ му́чити и́мать, и
ѿве́ржетъ тѣ́хъ предъ а́гг҃лы свои́ми, и
ѻ́гневи вѣ́чному въ снѣ́дь преда́стъ. пра́­
ведницы же сни́мъ водворя́тъся, въ
нбс̃нѣмъ црс̃твіи, в̾ ра́дости не изрече́ннѣй
в̾ бесконе́чныя вѣ́ки. и́хъ же бо ѻ́ко неви́­
дѣ, и у́хо не слы̑ша, и на́ срд̃це человѣ́ку не
взы́де, я́же угото́ва бг҃ъ лю́бящимъ єго̀.
{#л. ѱл҃в}

є́сть бо ми до ны́нѣ лѣ́тъ девятьдеся́тъ,
и пре́же сего̀ нѣ́смь николи́же соблазни́лъ
людє́й бж҃іихъ. кольмѝ па́че ны́нѣ по­
доба́етъ ми в̾ желѣ́нно и му́жески у́мре­
ти зако́на ра́ди бж҃ія, да ѻ́бразъ бу́ду
по́льзы зря́щимъ мя, да и ті́и укрѣ­
пят́ъ ся, и та́коже безъбоя́зни и му́­
жески постра́жутъ, и у́мрутъ в̾желѣ́нно
зако́на ра́ди бж҃ія. да и а́зъ сугу́бу
м̾зду̀ ѿ́ бг҃а воспріиму̀, и я́кѡ бл҃га
мя су̑ща и вѣ́рна своего̀ раба̀ поста́вивъ
надъ мно́гими, и сподо́битъ вни́ти в̾ ра́­
дость свою̀ не изрече́нную и бес̾коне́чную и
бл҃же́нную. и́же бо речѐ сотвори́тъ и на­
учи́тъ, се́й ве́ліи нарече́тъ ся въ црс̃твіи
нбс̃нѣмъ. сія̀ ре́къ во услы́шаніе всѣ́мъ
предъстоя́щимъ, ве́сь удивѝ и возвесе­
лѝ собѡ́ръ. мучи́теля же не ма́лы по­
дви̑же на гнѣ́въ, въ ско́рѣ бо повелѣ̀
му́чити ѝ безъ ми́лости. и́же и свя́­
занъ рука́ма и нога́ма крѣ́пкѡ біе́нъ
бы́сть. и въ но́здри єгѡ̀ оце́тъ лю́тъ
в̾лія́шя съ смра́домъ ѕлы́мъ. и во ѻ́гнь
въве́рженъ, и помоли́вся кро́ви єгѡ̀
и сме́рти, во измѣ́ну прія́тѣ бы́ти.

и́же и всегѡ̀ ра́ди язы́ка предъпосла̀. до́­
блественіи же ѻ́троцы приведе́ни бы̑ша
предъ царя̀, и с̾ма́терію и́хъ бл҃же́нною соло­
моні́ею, и пону́ждени ѿврещи́ся зако́­
на своегѡ̀, и вкусити свины́хъ мя̑съ.
глаго́лаше бо къ старѣ́йшему и́хъ, послу́­
шайте повелѣ́нія моегѡ̀, и сотвори̑те
во́лю мою̀, да пріи́мѣте ѿ менѐ че́сть
ве́лію. а́ще ли нѝ, разли́чными и лю́­
тыми му́ками уму́чивъ, ѕлѣ́й и
го́рцѣи сме́рти преда́мъ вы̀. Ѿвѣща́въ­
ше же всѝ я́кѡ єди́нѣми усты̀ рѣ́ша,
на́мъ антіо́ше єди́нъ цр҃ь и бг҃ъ, ѿнего́
же бы́хомъ, и к̾нему̀ воз̾враща́емъся.
Ѻте́чество же на́ше ієросали́мъ вы́шній
крѣ́пкій и не пребори́мый. Тѣ́мъ же
научи́хомъся ѿ отє́цъ презира́ти зем­
ну́ю че́сть. и сѐ гото́ви єсмы̀ постра­
да́ти со вся́цѣмъ усе́рдіемъ, и у́мрети
зако́на ра́ди бж҃ія, я́коже пострада̀
бл҃же́нный на́шъ ста́рецъ и учи́тель, и
сподо́битися ѿ́ бг҃а нбс̃нѣй и нетлѣ́ннѣй
и не преходи́мѣй че́сти же и сла́вѣ, и
ра́дости бесконе́чнѣй, єя́же с̾получѝ
о́нъ. Такова́я мучи́тель слы́шавъ,
{#л. ѱл҃г}

и раз̾гнѣ́вавъся, повелѣ̀ раз̾жещѝ ско­
враду̀. и ѡдра́въше главу̀ и ру́цѣ и
но́зѣ пре́же старѣ́йшему бра́ту и́хъ,
и въ верго́ша и вню̀ предъ очи́ма и́хъ и
мт҃ре єгѡ̀, устраша́я и́хъ. и та́­
кѡ сконча́ся пе́рвый ѡ́гдс̃ѣ. И втора́­
го та́коже неможа́ху при ну́дити, рече́
бо я́кѡ а́зъ нѣ́смь ху́ждьши. но
си́це до́лженъ є́смь пострада́ти я́коже
и бра́тъ мо́й, и тоя́ же сподо́битися
че́сти и сла́вѣ. и повелѣ̀ ца́рь срѣ́за­
ти ѝ на у́ды, и та́кѡ сконча́ся бл҃го­
даря̀ бг҃а. Тре́тіиже речѐ, не по­
мышля́й царю̀, и не заме́дли, не воз̾­
мо́жеши бо прельсти́ти ни єди́ного ѿ
на́съ. мы́ бо я́кѡ на́ бракъ, си̑це на
му́ку, по́ чину и житію̀ восхо́димъ.
и стро́гани бы́вше желѣ́зы, и поколе­
сѣ́хъ протяза́еми, и разсѣка́еми мечѝ,
и ѻгне́мъ сконча́ваеми. и разли́чны­
ми ору́діи по єди́ному кого́ждо и́хъ
мучи́тель, яково́ю же сме́ртію ѡсу­
дѝ. и́же и подви́гшеся, и въ му́кахъ
уме́рше. и и́стиненъ по́мыслъ, и
самодержа́венъ страстє́мъ показа́вше,

терпѣ́нію вѣне́цъ воспрі́я́ша. и ѡста̀
седмы́й юнѣ́йшіи, и́же бѣ̀ ма́лъ дѣ́­
тищь и предадѐ и ца́рь мт҃ри єгѡ̀,
ре́къ увѣща́й єго̀, да сотвори́тъ во́лю
мою̀, и да́мъ єму̀ зла́та мнѡ́го.
ѻна́же па́че укрѣпѝ ѝ ре́къ єму̀, ча́до
моѐ умрѝ гдс̃а ра́ди, и да не ѡста́неши
бра́тіи твоея̀, но пости́гни я̀ въ црс̃твіи
нбс̃нѣмъ. ра́достенъ бо мѝ дне́сь сі́й
дн҃ь. я́коже бо на́ бракъ си́це ва́съ на
муче́ніе приведо́хъ. Рече́ же дѣ́тищь
къ царю̀, ѕлочести́ве что̀ ра́ди ме́дли­
ши, и неда́си ми послѣ́д̾ствовати бра́тіи
мое́й; Раз̾гнѣ́вавъжеся ца́рь, и
уму́чи єго̀ па́че всѣ́хъ бра́тіи єгѡ̀, и
бл҃годаря̀ бг҃а сконча́ся. Мт҃и же и́хъ
соломоні́а, поне́же сконча́вшихся о́нѣхъ
ви́дѣ, и нестерпѣ́въши ру̑къ человѣ́че­
скихъ напада́нія, помоли́въшися, и
в̾ раз̾же́гшуюся сковраду̀ себѐ въве́рже,
и та́кѡ бг҃у дх҃ъ предадѐ. Соверша́етъ­
жеся собо́ръ и́хъ во свое́мъ и́хъ муче́ніи,
су́щемъ в̾ домни́новѣхъ предѣ́лѣхъ,
ѡбонъпо́лъ галилѣ́и.
{#л. ѱл҃д}

Вто́й же дн҃ь па́мять ст҃ы́хъ девятѝ му́­
ченикъ, и́же в̾ си́дѣ памфилі́йтѣй постра­
да́вшихъ, леѡ́нтіа, а́тта, алеѯа́ндра,
кинде́я, мнисиѳе́а, ки́рика, минео́на,
кату́на, и єѵ̾кле́я.

Сі́и бя́ху во времена̀ діокліті́ана царя̀,
игѣ́мона фла́віа, изо́ила памѳилі́йска­
гѡ. ѿ пра́дѣдъ су̑ще хрс̃тіа́не. минео́нъ
у́бѡ древодѣ́ль бя̑ше, про́чіи же земле­
дѣ́льцы. єди́нъ нра́въ всѝ иму́ще, и въ
до́бръ совѣ́тъ совѣща́вшеся, къ му́чени­
ческому по́двигу ѿлучи́шася, и вся̀ жи­
те́йская ѡста́вльше, и доше́дше въ же́р­
твище артеми́дино но́щію, и вся̀ я́же
в̾не́мъ почте́нія разориша. тогѡ̀ ра́ди
я́ти бы́вше и вопроше́ни. біе́ни бы́ша не­
ща́днѡ и огне́мъ по ра́намъ жго́ми, и но­
готмѝ тѣлеса̀ и́хъ, да́же и до костє́й содра́­
ша, и мы́шцы и́хъ свѣща́ми ѻ́гнеными
ѡпали́ша, и рожны̀ ѻчи и́хъ из̾бодоша.
и въ темни́цу в̾ве́ржени, мучи́телю пове­
лѣ́вшу, ни пи́щю ни во́ду пода́ти и́мъ.
Пото́мъ ѕвѣрє́мъ в̾даны̀ бы́ша, и си́хъ
укроти́ша. всѣ́мъ же ѡ се́мъ ужа́сшимся,
и возопи́вшимъ, вели́къ бг҃ъ хрс̃тіа́н̾скій.

а́біе же бы́шя гро́мове и мо́лніи и дожде́ве,
па́леже и гра́дове размѣше́ни снидо́ша на́
землю. и гла́съ нѣ́который слы́шимь
бя̑ше ст҃ы́я призыва́ющь. и́же и сла́дка­
гѡ ѻ́ногѡ гла́са слы́шавше, ѡб̾весели́ша­
ся. тогда̀ игѣ́мону повелѣ́вшу, и ѿ­
сѣко́ша и́мъ главы̀. и та́кѡ сконча́ся
муче́ніе и́хъ.

Вто́йже де́нь происхоже́ніе чс̃тна́гѡ и
животворя́щагѡ крс̃та̀ гдс̃ня.

Вто́йже дн҃ь пра́зднуемъ всемлс̃тивому
сп҃су хрс̃ту̀ бг҃у на́шему, и пречс̃тѣй бцд̃ѣ
мр҃і́и мт҃ри єгѡ̀.

Вѣ́дѣти є́сть на́мъ ѡсе́мъ возлю́бленная
бра́тія, є́же *пантокра́тный* {**вседер̾­жи́теля*} дн҃ь дне́сь
млс̃ти бж҃ія пра́зднуемъ. бл҃гочести́во­
му цр҃ю̀ и кн҃зю андре́ю уста́вльшу се́й
пра́здновати съ цр҃е́мъ ману́йломъ, по­
велѣ́ніемъ, патріа́рха лукѝ, и митропо­
ли́та костянти́на всея̀ русіи, и не́стора
єпкс̃па росто́въскагѡ. Ману́илу цр҃ю̀ въ
цр҃ѣгра́дѣ в̾ми́рѣ и въ любвѝ и в̾ братолю́­
біи живу́щу, со бл҃гочести́вымъ кн҃земъ на́­
шимъ андре́емъ. Случи́жеся и́мъ изы́ти
во єди́нъ дн҃ь на́ брань; ману́илу цр҃ю,
{#л. ѱл҃е}

изъ царя̀ гра́да на срацы́ны, а андре́ю кн҃зю
из̾ росто́ва на бо́лгары. обы́чай же имѣ́яше
кн҃зь андре́й єгда̀ къ бра́ни идя́ше, всегда̀
чи́стою дш҃е́ю ико́ну влд̃чцы на́шея бцд̃ы и
прс̃но дв҃ы мр҃і́и носи́ти, сни́мъ же и крс̃тъ
в̾ то̀ вре́мя два̀ презви́тера въ сщ҃е́нных̃ ри́зах̃
ноша́ста, и ту̀ пріи́мъ ѿ ст҃ы́хъ та́инъ
пло́ть и кро́вь гдс̃ню, и су́щіи сни́мъ. гл҃я
си̑це, ѽ влд̃чце бцд̃е роди́вшаа хрс̃та̀ бг҃а на́шегѡ
вся́къ упова́яи на тя̀ не поги́бнетъ. а́зъ же
ра́бъ тво́й имѣ́ю тя стѣ́ну и покро́въ, и
крс̃тъ сн҃а твоегѡ̀, ору́жіе на врагѝ ѡбою́ду
ѻстро̀, ѻ́гнь попаля́я лица̀ проти́вныхъ на́­
шихъ хотя́щихъ сна́ми бра́ни. и па́дъше
всѝ на колѣ́ну, прест҃ы́я бцд̃ы предъ ико́ною
со слеза́ми вопію́ще и цѣлу́юще. и ше́дше
на щи́тъ взя́ша четы́ре гра́ды бо́лгар̾скія,
а пя́тое бряхи́мовъ на ка́мени, и воз̾вра­
ти́шася ѿсѣчѝ пога́ныхъ. и всѝ ви́дѣша
лучѝ ѻ́гнены ѿ ико́ны сп҃са на́шегѡ влд̃ки и
бг҃а, и ве́сь по́лкъ єго̀ покры̀. о́нъ же возвра­
ти́ся въ спя́ть, и попалѝ гра́ды тѣ̀ огне́мъ,
и положѝ зе́млю ту̀ пу́сту. а на про́чія
гра́ды возложѝ да́нь плати́ти. То́же видѣ́­
ніе и ману́илъ цр҃ь ви́дѣ во свое́мъ полцѣ,

пе́рвый де́нь а́вгуста мѣ́сеца, пра́здно­
вати уста́виша де́нь млс̃ти бж҃ія и чело­
вѣколю́бія. я́коже речѐ проро́къ,
єго́ же хощу̀, поми́лую, и поми́лованъ бу́­
детъ. И ны́нѣ влд̃ко та́кѡ покры́й ру́сскія
землѝ цр҃я̀ и лю́ди твоя̀ вся̀ упова́ющыя
на тя̀. тѣ́мъ всѝ припа́даемъ тѝ глаго́­
люще, гдс̃и іс҃е хрс̃тѐ, что̀ возда́мы тебѣ̀;
но то́чію, ве́ліи єсѝ гдс̃и, и чю́дна
дѣла̀ твоя̀, и вели́чію твоему̀ нѣ́сть
конца̀; въ ро́дъ и ро́дъ восхва́лятъ
дѣла̀ твоя̀. Бл҃гослове́нъ єсѝ гдс̃и бж҃е
на́шъ, и́же не дадѐ на́съ въ плѣ́нъ
врагѡ́мъ на́шимъ, но са́мъ призрѣ̀ на ны̀ ­
ми́лостію свое́ю и человѣколю́біемъ свои́мъ
защити́ ны, и сла́вою вознесѐ десни́цу упо­
ва́ющихъ на тя̀. и мт҃ре моле́ніе услы́­
шавъ, и поми́лова лю́ди своя̀ ми́лостію
человѣколю́бія своегѡ̀. и цр҃кви испо́­
лнися сла́вы твоея̀ влд̃ко, ю́же я́кѡ
две́рь показа́лъ єсѝ нбс̃ную на землѝ. Тѣ́мъ же и ны́нѣ вне́й же ти ся мо́лимъ
глаго́люще, гдс̃и при́зри съ нб҃сѐ, и ви́ждь,
и посѣтѝ виногра́дъ сво́й єго́же совершѝ,
я́же насадѝ десни́ца твоя̀ ст҃а́я.
{#л. ѱл҃ѕ}

всѣ́хъ бо ѻ́чи влд̃ко на тя̀ упова́ютъ. и
твоея̀ млс̃ти ча́юще и щедрѡ́тъ, пѣ́нія
и похвалы̀ воз̾сыла́емъ сла́вѣ твое́й. и
просла́ви са́мъ упова́ющихъ натя̀, мно­
гоимени́таго бг҃а и сп҃са на́шего. ты́ бо
имѣ́я прс̃то́лъ нб҃о, подно́жіе зе́млю.
при́зри млс̃тивныма си очи́ма, на вся̀ лю́­
ди упова́ющыя на тя̀, мл҃твъ ра́ди
пречс̃тыя твоея̀ мт҃ре, и всѣ́хъ ст҃ы́хъ
твои́хъ, и́же пострада́ша за и́мя твоѐ ст҃о́е,
ѡна́съ грѣ́шныхъ тебѣ̀ моле́ніе принося́­
ще. а́зъ же написа́хъ сіѐ ма́лое писа́ніе
повелѣ́ніемъ цр҃я̀ ману́ила, и всегѡ̀ при́­
чта цр҃ковнагѡ, да пра́зднуемъ всѝ ѻ́бще
пра́здникъ се́й, мѣ́сеца а́вгуста въ пе́рвый
дн҃ь. въ сла́ву всемлс̃тивагѡ бг҃а и сп҃са на́­
шегѡ іс҃а хрс̃та̀, и пречс̃тыя єгѡ̀ мт҃ре пре­
бл҃гослове́нныя влд̃чцы на́шея бцд̃ы и прс̃нѡ
дв҃ы мр҃і́и, съ любо́вію, ми́ръ и любо́вь
между̀ собо́ю иму́ще, и ми́лостыню ко
убо́гимъ, ѿ всѣ́хъ дѣ́лъ удаля́ющеся
ѕлы́хъ, и стра́ху бж҃ію в̾нима́юще с̾ боя́­
знію. а́ще пребу́демъ в̾до́брыхъ дѣ́­
лѣхъ, то̀ и млс̃ти бж҃ія сподо́бимъся.

а́ще вре́мя испу́стимъ, а друго́е не свѣ́­
даемъ, в̾ кото́рое вре́мя по́йдемъ ко всемо­
гу́щему судіѝ, и на́ша дѣла̀ вся̀ предъ­
ста́нутъ предъна́ми я́вѣ, и на пи́сана бу́­
дутъ, є́же кто̀ что̀ сотворилъ, то̀ и
воспріи́метъ ко́ждо подѣ́лѡмъ свои́мъ;
пра́ведніи жи́знь вѣ́чную; а грѣ́шніи
му́ку вѣ́чную. тогѡ̀ ра́ди бра́тіе вели́­
цыи и ма́ліи, пре́же того̀ дня су́днагѡ
потщи́мся сотвори́ти до́брая дѣ́ла, да
не посты́дни ѡбря́щемся на стра́шнѣмъ
суди́щи, и млс̃тивъ гла́съ услы́шимъ ѿ
всемлс̃тивагѡ бг҃а сп҃са на́шегѡ іс҃а хрс̃та̀,
спасе́нія жела́юща дш҃амъ на́шимъ;

Вто́йже де́нь сло́во ст҃а́гѡ васи́лія ѡ
воспомина́ніи єстества̀ человѣ́ческагѡ.

Не вели́кая му́дръствуемъ бра́тіе въ жи­
тіѝ се́мъ и пребыва́ніи, ни велича́ем̾­
ся си́лами, ни возно́симъся бога́ть­
ствомъ; но преѡби́димъ плотьскі́я
по́хоти, и попеце́мъся ѡ душа́хъ на́­
шихъ. Помяни́те гдѣ̀ су̑ть оц҃ы̀ на́­
ши; гдѣ́ ли про̃роцы и апс̃ли; что́ ли
ѿнесо́ша собира́ющіи на землѝ бога́тьство;
не на́зили роди́шася, та́кѡ и умро́ша,
{#л. ѱл҃з}

ничто́же въ рука́хъ держа́ще. но пра́вда
пра́веднагѡ нане́мъ є́сть. и па́мять и́хъ
с̾похвала́ми, и грѣсѝ грѣ́шнагѡ нане́мъ
су̑ть. вси́ же єсмы̀ ѿ пе́рьсти, и в̾пе́рсть
возврати́мъ ся. и вся́къ человѣ́къ я́кѡ
ри́за ѡбетша́етъ. нача́ло житія̀ єгѡ̀
хлѣ́бъ и вода̀, и дні́е єгѡ̀ изочте́ни
су̑ть, а́ки уча́стіе ѿ песка̀, и ско́рѡ
к̾ концу̀ а́ки пото́къ тече́тъ. Тѣ́мъ же
бра́тіе кончи́ну на́шю помяну́въше,
ѡста́немъся ѿ вся́когѡ ѕла̀ дѣ́ла; ни
кра́сная бо свѣ́та сегѡ̀ вѣ́чна, ни ско́р̾­
бная бесконца̀. смотри́те ка́кѡ верти́­
тся; дне́сь ты̀ зе́млю ѻре́ши, а у́трѣ
другі́й, а пото́мъ и́нъ, и ничто́ же бу́­
дущее, но а́ки путе́мъ теку́ще, ѻ́нъ
погубѝ, а и́нъ налѣ́зе. да а́ще погу­
би́хомъ дш҃я на́шя грѣхѝ, то̀ взы́­
щемъ ны́нѣ покая́ніемъ. на се́ бо
и са́мъ гдс̃ь поуща́етъ ны гл҃я,
ища́и ѡбря́щетъ, и тол̾­
ку́щему ѿверза́етъ­
ся.

<<--- 08aug/02.htm>>>

Мцс̃а того́же въ в҃, дн҃ь. пренесе́ніе
моще́мъ ст҃а́гѡ первомч҃нка архидія́кона
стефа́на, бл҃гословѝ о́ч҃е.

По претече́ніи мно́гихъ лѣ́тъ по вознесе́­
ніи хрс̃то́вѣ, ст҃а́гѡ ра́ди хрс̃то́ва му­
че́нія, мно́зѣмъ у́же самохо́тно въ
подвигѡ́хъ сконча́вшимъ ся, тишина̀
мяте́жь утоли́вши, и вся́кія темни́­
цы и ору́дія мучи́тельная преста́ша,
прише́ствіемъ и́же во ст҃ы́хъ кон̾стянти́на
христія́нина су̑ща, и пе́рвагѡ въ цр҃ѣ́хъ,
ми́ра и свободы̀ вселе́нную испо́лнивша,
тогда̀ мнѡгочс̃тно́е бога́тьство, си́рѣчь
первомч҃нка стефа́на тѣ́ло яви́ся. Му́жь
бо нѣ́кій живы́й в̾ ве́си, идѣ́же я́кѡ и
би́серъ подъ земле́ю кры́емь бя́ше, презви́­
теръ же во ѡбраже́ніем̃, и са́номъ и житіе́мъ
наро́читъ, лукі́анъ и́менемъ, не єди́ни­
цею, но и два́жды и три́жды, тому̀
я́влься первострада́лецъ, и себѐ ѡ по­
вѣ́да. Презвѵ́теръ же видѣ́ніе повѣ́да и
єпкс̃пу іѡ҃а́нну. о́нъ же ра́дости испо́л­
нився, и до мѣ́ста доше́дъ съ при́чтомъ
гра́д̾скимъ, и раскопа́въ ѡбрѣ́те ков̾­
че́гъ. напра́сно же тру́съ бы́сть вели́къ,
{#л. ѱл҃и}

и бл҃гоуха́нія испо́лни прише́дшихъ. и
гла́съ бѣ̀ съ нб҃сѐ, гл҃ющимъ а́гг҃лѡмъ
бж҃іимъ, сла́ва в̾вы́шнихъ бг҃у, и ми́ръ на
землѝ вопію́ще; не то́чію слы́шимо бя̑ше
зна́меніе, но и врачева́нія мно́гая разли́­
чнымъ страстє́мъ содѣ́ловахуся, и перво­
мч҃нкову бл҃года́ть проповѣ́дающе. А́біе
у́бѡ ієросали́м̾скій архієра́рхъ, со ѡбои́ми
инѣ́ми прилучи́вшимися єпкс̃пы, и кли́­
росомъ и всѣ́ми людьмѝ, ст҃о́е о́но тѣ́ло
с̾ весе́ліемъ и ра́достію поклони́вшеся,
со свѣща́ми и пѣ́ньми и бл҃гоуха́ньми,
и подо́бною че́стію въ ст҃ы́й положи́шя
сіѡ́нъ. Поси́хъ же цр҃ковь вели́ка в̾ та­
ковѣ́мъ гра́дѣ созда́ся, нѣ́кіимъ алеѯа́н̾­
дромъ синькли́тикомъ, и́же и мнѡ́го архи­
єре́ю помоли́вся, и в̾ не́й чс̃тно́е тѣ́ло со
все́ю че́стію положи́ша. не у́же мнѡ́го
ѿ пяти́хъ лѣ́тъ ми́мѡ идо́шя по прело­
же́ніи ономъ, то́й болѣ́въ до сме́рти, и
ковче́гъ сотвори́въ себѣ̀ подо́бенъ ковче́гу
ст҃а́гѡ, и у́спе, и положе́нъ бы́сть бли́зъ
ст҃а́гѡ. По осми́же лѣ́тѣхъ кончи́ны синь­
кли́тика алеѯа́ндра, цр҃ьствующу гре́­
кѡмъ ст҃о́му вели́кому кон̾стянти́ну,

и ст҃льствующу констянти́ню гра́ду ми­
трофа́ну. жена̀ алеѯа́ндра синькли́тика,
своегѡ̀ ра́ди єя̀ бога́тьства, и видѣ́нія
тѣле́снагѡ, ну́дима ѿ мнѡ́гихъ къ бра́­
честву, я́кѡ да не та́кѡ мно́гими ну́ди­
ма, и таково́е дѣ́ло содѣ́ловается, совѣ́тъ
совѣща̀ є́же взя́ти тѣ́ло му́жа своегѡ̀,
и къ своему̀ оте́честву констянти́ня гра́­
да поитѝ. Кѷри́лу же и́же во ст҃ы́хъ тогда̀
прс̃то́лъ ієросали́м̾скій пра́вящему, при­
и́де уліа́ні́я, та́кобо бя̑ше и́мя є́й, и
помоли́ся єму̀ є́же поя́ти тѣ́ло му́жа
своегѡ̀. ѻ́ному же не повелѣва́ющу. ѻна́
же писа́ніемъ пусти́вши ко оц҃у своему̀,
и пріи́мъши цр҃ьскій бѣле́гъ, архієре́ю не
могу́щу ничто́ же ѿвѣща́ти. Бж҃е́стве­
нымъ же про́мысломъ прельсти́вшися жена̀,
погрѣшѝ ра́ку му́жа своегѡ̀. и ѡбьє́мъши
ра́ку ст҃а́гѡ, и во́пленыя гла́сы со слеза́ми
испусти́вши, и коне́чнымъ безъстра́шіемъ
сщ҃е́нное о́но тѣ́ло, носи́ломъ на м̾скѝ возло­
жи́вши, и нача́тъ путе́мъ итѝ всено́щьным̃
и пѣ́сни а́гг҃льскія съ нб҃сѐ, и бг҃олѣ́пно
слы́шимо бя̑ше славосло́віе, и уха́нія бл҃го­
во́нная, я́кѡ мѵ́ра {*ми́ра} мно́га излія́шася,
{#л. ѱл҃ѳ}

и та́мошняя испо́лнишася. и лука́віи
ду́си рыка́юще, го́ре на́мъ что̀ взыва́ху,
я́кѡ стефа́нъ средѝ на́съ хо́дитъ бія́и на́съ.
дости́гъше же асколоньскій гра́дъ, и ѡбрѣ­
то́ша кора́бль, и уцѣни́вше єго̀ запя́ть
на́десять зла́тицъ, и устреми́шася.
ѽ коли́ка чюдеса̀ содѣ́яшася, на таково́е
путѝ ше́ствіе, не́мощнѡ є́сть писа́ти, пре­
краще́ніемъ содержи́ми. да я́кѡ цр҃ьствую­
щіи гра́дъ достиго́шя, и въ слу́хи цр҃е́вы
все́льшуся таково́му дѣ́лу. повѣ́дано же
бы́сть єму̀ и ѡженѣ̀, и́же а́біе и та̀ предъ­
ста́въши предъ цр҃е́мъ, извѣ́стнѡ ѡ при́­
тчи цр҃ю̀ из̾ речѐ, ѿ нача́ла да́же и до
конца̀ с̾бы́вшая ся. Тогда̀ добрѣ́йшіи
и любочестнѣ́йшіи цр҃ь такова́я слы́шавъ,
и ра́дости и весе́лія испо́лнивъся, повелѣ̀
архієре́ю со всѣ́мъ кли́росомъ и людьмѝ
твори́ти стрѣ́теніе, и с̾вели́кою че́стію и
бл҃гоче́стіемъ въ цр҃ьская въ нестѝ. вси́ же
у́бѡ ви́дѣшя ст҃а́гѡ чюдеса̀ єли́ка на тако­
вы́й дн҃ь соверши́шася, но не возмо́жнѡ
є́сть исказа́ти сія̀. оба́че м̾ска́мъ ра́ку
несу́щимъ идѣ́же бя̑ше сокро́вище ст҃о́е,
доне́лѣже доидо́ша до мѣ́ста, нарица́емое

кон̾стянтіа́не, идѣ́же и положе́нъ бы́въ.
и єди́нѣй ѿ мѡ́скъ человѣ́ческимъ гла́сомъ
проглаго́лавъши, коея̀ ра́ди вины̀ млатитѐ
на́съ, здѣ̀ изво́лися ст҃а́гѡ тѣ́лу пре­
быва́ти. Такова́гѡ гла́са архієре́й, и ве́сь
собѡ́ръ лю́д̾скій слы́шавше, вели́кими гла́сы
хвалу̀ бг҃у возда́ша. Сія́ же увѣ́дѣвъ
вѣ́рнѣйшіи цр҃ь, ужасе́ся, и на то́мъ
мѣ́стѣ а́біе мнѡгочестну́ю цр҃ковь му́­
ченику созда̀, въ сла́ву и хвалу̀ гдс̃а бг҃а
и сп҃са на́шегѡ іс҃а хрс̃та̀. Соверша́етъ­
жеся собѡръ єгѡ̀ во ст҃ѣ́мъ єгѡ̀
муче́ніи су́щемъ бли́зъ
кон̾стянтіа́нѣхъ.

Вто́й же де́нь стра́сть ст҃а́гѡ сщ҃енно­
му́ченика стефа́на па́пы ри́мскагѡ,
и и́же сни́мъ.

Ст҃ы́й сщ҃енному́ченикъ стефа́нъ, бѣ̀ у́бѡ
се́й при уліа́нѣ в̾ ри́мѣ, и кры́яшеся
гоне́нія ра́ди. креща́я же є́ллины прихо­
дящыя к̾нему̀, я́тъ бы́въ и въ темни́­
цѣ затворе́нъ бы́сть. и па́ки въ темни­
цѣ поставля́ше презви́теры и дія́коны
и четцы̀. и ѿтѣ́хъ нѣ́цыи я́ти бы́ша,
{#л. ѱм҃}

и со дерзнове́ніемъ исповѣ́даша хрс̃та̀ бг҃а
на́шего содѣ́теля и творца̀ всему̀, и му­
че́нія вѣнцы̀ прія́ша. Понѣ́коемъ же
вре́мени кры́яшеся стефа́нъ па́па спасе́­
нія ра́ди вѣ́рующихъ. я́томъже бы́в̾­
шимъ двуна́десятим̃ учн҃кѡмъ єгѡ̀, и
мече́мъ в̾ главы̀ усѣ́ченымъ. Стефа́нъ
же поста́ви себѐ я́вѣ, и приведе́нъ бы́сть
въ хра́мъ а́ріевъ, и мл҃твою подви́же єгѡ̀,
и ча́сть єгѡ̀ падѐ наземлѝ. и ѿбѣжа́в̾­
шимъ во́инѡмъ, са́мъ и́де на́ гробъ лу­
кіа́ны мч҃нцы, и бес̾кро́вную же́р̾тву
творя̑ше, я́тъ же бы́въ во́ины и усѣ́кну­
ша главу̀ єгѡ̀.

Вто́йже де́нь сло́во
ст҃а́гѡ іѡ҃а́нна ми́лостиваго ѡ любвѝ и
долготерпѣ́ніи бж҃іи.

Глаго́лаше іѡ҃а́ннъ ми́лостивый, я́кѡ
а́ще помы́сли ли бы́хомъ разу́мнѡ дол̾­
готерпѣ́ніе бж҃іе и бл҃гоче́стіе, то̀
ни на нб҃о возвелѝ бы́хомъ о́чію на́­
шею, но при́снѡ въ смире́нѣ о́бра­
зѣ ходи́ли бы́хомъ. Но да исповѣ́мъ
ва́мъ, ка́кѡ ѿ не бытія̀ в̾ бытіѐ со­
твори́ ны зижди́тель, и грѣхѡ́мъ пре­
слуша́нія заблу́ждьшихъ ны̀ взыска̀,

и свое́ю кро́вію искупи́ ны ѿ сме́рти. всю̀
зе́млю, и са́мое нб҃о на слу́жбу человѣ́­
кѡмъ учинѝ. но и ны́нѣ согрѣша́ю­
щихъ ка́кѡ не потреби́тъ; но долго­
терпѣ́ніе єгѡ̀ недви́жимо, и милосе́рдіе
єгѡ̀ не ѕло́биво. пре́зритъ и мно́га­
жды ху́лящихъ єго̀, утѣша́етъ сво­
и́мъ чл҃колю́біемъ. свы́ше до́ждь на
на́шъ живо́тъ испуща́етъ. Коли́кѡ
ѕлодѣ́євъ иду́щихъ уби́ти и крастѝ по­
крыва́етъ и заступа́етъ, и непреда́стъ и́хъ
я́тымъ бы́ти и му́ку прія́ти. Коли́­
кѡмъ же в̾ галѣя́хъ на разбо́й иду́щим̃,
и не вели́тъ глубинѣ̀ убі́йцъ тѣ́хъ пото­
пи́ти, но и мо́рю запреща́етъ не пото­
пи́ти и́хъ ѿ ѕлѡ́бъ. Коли́ки клену́тъ­
ся во лжю̀ ст҃о́ю єгѡ̀ пло́тію и кро́вію, и
долготерпи́тъ, не дая̀ и́мъ здѣ̀ нико́его,
лю̑та. Коли́цы на путє́хъ разбива́ютъ,
и не да́стъ и́хъ ѕвѣрє́мъ на растерза́ніе.
Коли́цы и́дутъ подъкопа́ти чюжи́хъ хра­
мѡ́въ, и не ѡста́витъ я́тымъ бы́ти и́мъ
ѿстрегу́щихъ пє́съ и человѣ́къ. Ині́и же со блудни́цами спя̑ще скверносло́вцы,
и про́чее преле́стію въ житіѝ се́мъ су̑ще,
{#л. ѱм҃а}

и ѡ все́мъ до́лготерпи́тъ, ѡжида́я к̾ себѣ̀
обраще́нія. во и́стину, не хо́щет̃ грѣ́шничи
сме́рти, тѣ́мъже ноєщѐ и сла́дость вся́ку
подава́етъ. пчела̀ ѡблета́ющи удо́лія и
поля̀, и́щущи собра́ти плоды̀, да услади́тъ
на́шь горта́нь. ѻво́щь вся́кій тщи́т̾ся
зно́емъ созрѣ́ти, да напо́лнит̃ на́ша уста̀,
и ѡбвесели́тъ срд̃ца. Тѣ́мъже бра́тіе посты­
ди́мся бл҃га́го влд̃ки бг҃а, толи̑ка бл҃га подаю́­
щаго на́мъ, и пока́емся ѡ свои́хъ согрѣше́­
ніихъ, и обрати́мся к̾ нему̀ хрс̃ту̀ бг҃у на́­
шему до́брыми дѣ́лы. єму́же сла́ва,
ны́нѣ и при́снѡ и во́вѣки вѣкѡ́мъ.

<<--- 08aug/03.htm>>>

Мцс̃а того́же въ г҃, дн҃ь. па́мять препо­
до́бныхъ оц҃ъ на́шихъ далма́та, фа́ѵ̾ста
и иса́кія, бл҃гословѝ о́ч҃е.

Се́й ст҃ы́й далма́тъ, бя̑ше ходя̀ во вто­
рѣмъ упражне́ніи при ѳео́дѡ́сіи цр҃ѣ,
живы́й бл҃гоче́стно и бг҃оуго́дно. и хрс̃та̀
ра́ди ѡста́вивъ жену̀ и ча́да, то́чію сн҃а
своегѡ̀ фа́ѵ̾ста пое́мъ с̾ собо́ю, пріи́де къ
прпд̃ному иса́кію, бы́вшему въ по́стни­
честѣмъ житіѝ. къ высотѣ̀ добродѣ́тель­
нѣй я́влься ве́ліи. ди́вный же се́й иса́­
кій, ѿ свои́хъ пеле́нъ в̾ пусты́ню всели́ся,

вся́кія ве́щи добродѣ́тельны проходя̀.
тѣ́мъ и сло́во єгѡ̀ свѣ́тлѡ бя̑ше, в̾ жи­
тіѝ красу́я. исходя́щу же царю̀ уале́­
нту на бо́лгары на́ брань, усрѣ́тъ єго̀
прпд̃бный речѐ, ѿве́рзи ѽ царю̀ правосла́­
внымъ цр҃кви, и со ѡдолѣ́еши. Ѻ́нъ
же неповину́ся, но на я́рость себѐ подви́гъ,
внегда̀ возвращу́ся речѐ, возда́мъ те­
бѣ̀ ѡ си́хъ. Рече́ же прпд̃бный, а́ще
возврати́шися, нѣ́сть во мнѣ̀ гдс̃а бг҃а.
срази́ши бо бра́нь, и побѣ́гнеши предъ свои́­
ми врагѝ, и жи́въ ѻгне́мъ с̾ гори́ши, є́же
и бы́сть. бѣжа́ бо ѿ свои́хъ вра́гъ, и всели́ся
въ пле́вницу, и ѻ́крестъ пле́вницу запа­
ли́вше, с̾ горѣ̀ весьма̀. Внегда́же восхотѣ̀
ѿжитія̀ ѿитѝ бл҃же́нный се́й, прпд̃бна­
го далма́тіа игу́меномъ въ себѐ мѣ́стѡ
поста́ви. атти́ку тогда̀ въ констя­
нти́нѣ гра́дѣ патріа́ршествующу, и
то́й пе́рвѣе просія̀ въ по́стничествѣ че­
ты́редесять дні́й а́лченъ пребы́сть.
цр҃ю́ же и синкли́ту всему̀, въ єфе́­
сѣ с̾ше́дшымъся и ѻц҃є́мъ, на ѕлоче­
сти́выя єретикѝ, наро́читъ я́влься
и́же и архи́марита того̀ поста́вльше,
{#л. ѱм҃в}

и є́же въ єгѡ̀ оби́тели су́щіи па́стыря
нареко́ша, да́же и до́вѣка бы́ти. ѡ
хрс̃тѣ́ же у́спе, положе́нъ бы́сть
въ свое́мъ монасты́ри.

В̾ то́й же де́нь па́мять прпд̃бнагѡ оц҃а
на́шегѡ козмы̀ скопца̀ и ѿше́лника.

Се́й бы́сть мни́хъ в̾ ла́врѣ фа́рѣ пода́лѣ
ієросали́ма, му́жь му́дръ ѕѣлѡ̀ и крѣ́­
покъ по́стникъ, я́кѡ въ четы́редесять
дне́й єди́ну то́кмѡ изъяда́ше просфи­
ру, а ино́го ничто́же вкуша́ше. имѣ́я­
ше же хи́трость бж҃е́ственныхъ кни̑гъ не
ма́лу. иды́й же єди́ною потре́бы ра́ди во
ієросали́мъ, и ма́лѡ поболѣ́въ у́мре. и по­
велѣ̀ патріа́рхъ чс̃тны́я мо́щи єгѡ̀ восвое́мъ
монастырѝ положи́ти, идѣ́же єпи́скопъ
лежа́ше. Въ єди́нъ же ѿ дне́й презви́теръ
васи́ліи свѣ́дый добродѣ́тель ста́рца, идо́хъ
речѐ, да бы́хъ целова́лъ гро́бъ єгѡ̀. бѣ́же
гро́ба верху̀ раз̃сла́бленъ лежа̀ убо́гіи про­
ся́ше ми́лостыни ѿ входя́щихъ въ цр҃квь,
и то́й я́кѡ узрѣ́ мя покло́ньшася три́­
жды, и сотво́рша мл҃тву ієре́йскую, и
глаго́лами, вели́къ є́сть о́ч҃е ста́рецъ єго́­
же погребо́сте здѣ̀ пре́же двою̀ мѣ́сецу.

а́зъ же рѣ́хъ єму̀, а ты̀ чи́мъ вѣ́си. о́нъ
же речѐ, гдс̃не а́вво, а́зъ расла́бленъ є́смь
лѣ́тъ два́надесять, и єгѡ̀ ра́ди исцѣли́ мя
бг҃ъ. и єгда̀ въ ско́рби и въ бѣда́хъ пребы­
ва́хъ, прихожда́ше и утѣша́ше мя, и поко́й
подава́ше ми. но и сѐ и́маши слы́шати пре­
сла́внѡ ѡ не́мъ. ѿне́лѣже погребо́сте, и до
дне́сь слы́шю по вся̀ но́щи гл҃юща ѝ къєпи́­
скопу, не прикони́ся ни прибли́жися мнѣ̀
єретичѐ, вра́гъ бо єсѝ собо́рнѣй и апс̃льстѣй
цр҃кви ст҃ѣ́й. И сѐ слы́шавъ а́зъ у исцѣ­
лѣ́вшаго, идо́хъ и вся̀ исповѣ́дахъ патри­
а́рху, и моли́хъ єго̀, да возметъ тѣ́ло ста́­
рцево, и воино́мъ гро́бѣ положи́тъ ѝ. И гл҃а
ми григо́ріи патріа́рхъ, вѣ́ру ими́ ми ча́до,
ничи́мъ же врежа́етъся ѿ єретика̀ а́вва ко­
зма̀. но и сѐ бы́сть, да вѣ́ра и ре́вность ст҃а́­
гѡ вѣ́дома да бу́детъ на́мъ. та́коже и
сла́ва єпи́скопа да ѡбличи́тся, да не мни́мъ
єго̀ правосло́вивша ;

Вто́й же де́нь сло́во
ѡ чернори́зцу, и ѡ блудни́цѣ.

Во́ градѣ у́бѡ нѣ́коемъ бѣ́ста два̀ черно­
ри́зца, и идо́ста на слу́жбу, и я́кѡ
минова́ше єди́нъ єю̀ мѣ́сто, и возва̀
єди́наго блудни́ца нѣ́кая глаго́лющи,
{#л. ѱм҃г}

спаси́ мя ѻ́ч҃е я́кѡ хрс̃то́съ блудни́цу,
ѻ́нъже человѣ́ческагѡ студа̀ небре́гъ ѿню́дъ,
глаго́ла є́й, грядѝ въ слѣ́дъ менѐ. и є́мъ
за́руку єя̀, и изы́де сквозѣ̀ наро́дъ и́зъ
града всѣ́мъ ви́дящимъ. Бы́сть же про­
слы́тіе, я́кѡ чернори́зецъ поя́тъ жену̀
порфи́рію, та́кобо зва́ху ю̀. иду́щима же
и́ма, да ю̀ в̾пуститъ въмонасты́рь, и
ѡбрѣ́те жена̀ уєди́ныя цр҃кве отроча̀ по­
ве́ржено, и взя́тъ єго̀ да въско́рмитъ.
По лѣ́тѣ же єди́номъ пріидо́ша в̾ зе́млю
є́тери, идѣ́же бѣ̀ блудни́ца, и ви́дѣвше
ю̀ иму́щу дѣ́тище, и глаго́лаша є́й до́брѣ
черни́це черни́чищь родила̀ єсѝ. ше́дъше
же *в̾тѵ́ръ {*в̾ти́ръ} ви́дѣвъшіи ю̀, ѿу́ду бо поя́лъ
ю̀ бя̑ше черне́цъ, и повѣ́даша та́мѡ я́кѡ
родила̀ є́сть жена̀ порфи́ріа ѿ ста́рца, и мы̀
ви́дѣхомъ отроча̀ ѻчи́ма свои́ма подо́бнѡ
єму̀. єгда́ же увѣ́да чернори́зецъ ѿ́ бг҃а
сме́рть свою̀, и глаго́ла чернори́зицы пелагі́и,
та́ко бо проименова̀ ю̀, єгда̀ дадѐ є́й ѻ́бразъ
ст҃ы́й, по́йдема *в̾тѵ́ръ {*в̾ти́ръ}, я́кѡ ору́діе ми
та́мѡ є́сть, хощу̀ да и́деши сомно́ю.
ѻна́же немо́жеся єго̀ ѿпре́ти, и́де во­
слѣ́дъ єгѡ̀. и пріидо́ста иму́ща отроча̀

седмѝ лѣ́тъ су̑що. и я́кѡ разболѣ́ся
чернори́зецъ болѣ́знію сме́ртною; и взы­
до́ша на посѣще́ніе єгѡ̀ изъ гра́да сто̀
человѣ́къ. и глаго́ла принесе́те о́гнь. и
я́кѡ принесо́ша кади́лницу, и взе́мъ
у́гліе горя́щеє ста́рецъ, и в̾сы́па в̾ стиха́рь
сво́й, и речѐ, извѣ́сто вы̀ бу́ди бра́тіе,
занѐ я́коже бг҃ъ сохрани́въ купину̀ ѻгне́мъ
не ѡпали́му, и я́коже и стихарю̀ моему̀ не
прикосну́шася у́глія сія̀, та́кѡ и а́зъ не
позна́хъ грѣха̀ же́ньска ѿне́лѣже роже́нъ
є́смь. И всѝ диви́шася я́кѡ не с̾ горѣ̀
стиха́рь єгѡ̀ ѿ огня̀, и просла́виша бг҃а
иму́щаго та́йныя рабы̀. ѿвины́ же
ма́тере пелагі́и бы́вшія иногда̀ блудни́цы
мно́зи ше́дъше поне́й ѡре́кшеся ми́ра,
и ше́дъше въмонасты́рь и постриго́шася.
Сегѡ̀ ра́ди рече́но бы́сть ва́мъ, ѽ ча́да,
не бу́дите гото́ви на ѡсуже́ніе и ѡхуле́­
ніе чюжи́хъ грѣхѡ́въ. Мно́жицею
бо блудника̀ согрѣша́юща ви́дѣхомъ,
покая́нія же творя́ща не ви́дѣхомъ.
илѝ кра́дуща нѣ́коего ви́дѣхомъ, а
воздыха́нія и слє́зъ я́же принесѐ гдс̃ви,
не свѣ́мы, я́кѡ ѿ́ бг҃а прія́тъ бы́сть
{#л. ѱм҃д}

в̾ та́йнѣ покая́ніи єгѡ̀ и исповѣ́даніи.
и всѝ дивля́хуся ѡ уче́ніи дѣ́тельнагѡ
пастуха̀ и учи́теля.

Вто́й же дн҃ь сло́во сира́хово ѡ ми́лостыни.

Ча́дъца послу́шайте моегѡ̀ наказа́нія и бу́­
дите ми́лостиви. ѻ́гнь бо паля́щь пога́­
ситъ вода̀, а милостыня ѡчи́ститъ грѣхѝ
не ѿвраща́йте о́чію ѿ ску́дна и ни́ща, и
дш҃я а́лъчных̃ не ѡскор̾бля́йте. не мину́й­
те не да́вше прося́щему. пи́сано бо є́сть
избавле́ніе му́жу дш҃ѝ свое́й бога́тьство.
и па́ки ми́луяи поми́лованъ бу́детъ. му́­
жа бо ми́лостива лю́битъ гдс̃ь. Тѣ́мъже
при́зрите убо́гаго, добро̀ твори́те не́мощь­
ному, и ѡбря́щете ѿда́ніе не ѿтогѡ̀, но ѿ
вы́шнягѡ. Ми́лостыня бо му́жу, а́ки
печа́ть сни́мъ. творя́и бо ми́лостыпю,
взае́мъ дае́тъ бг҃у, и то́й изба́витъ єго̀
ѿвся́кагѡ ѕла̀, и проти́ву врагѡ́мъ ста́­
нетъ борю́щимъ тебѐ. вѣ́сть бо гдс̃ь добро­
чести́выя ѿ напа́сти избавля́ти, непра́­
ведныя же въ дн҃ь су́дный му́чимы блю­
стѝ. сокрушитъ гдс̃ь чре́сла нечести́выхъ,
и не бу́детъ добра̀ не даю́щему хлѣ́ба про­
сящимъ. Гл҃етъ бо влд̃ка хрс̃то́съ,

бл҃же́ни ми́лостивіи я́кѡ ті́и поми́ловани
бу́дутъ. су́дъ бо безъ ми́лостивенъ не­
сотво́ршимъ ми́лости.

Вто́й же дн҃ь па́мять прпд̃бнагѡ оц҃а̀ на́­
шегѡ анто́нія ри́млянина, и́же в̾вели́­
комъ но́вѣ гра́дѣ но́вагѡ чюдотво́рца.

Се́й у́бѡ прпд̃бный ѻц҃ъ на́шъ анто́ніи ро­
ди́ся во́ градѣ ри́мѣ, ѿ хрс̃тія́ну роди́­
телю. єго́же роди́теля держа́ста в̾ та́й­
нѣ, кры́юще в̾ домѣ́хъ свои́хъ, понеже
ри́мъ ѿпадѐ вѣ́ры хрс̃тія́нскія. и на­
вы́че кни́жному уче́нію, и ѡблече́ся во
и́ноческій ѻ́бразъ. и раздая̀ имѣ́ніе своѐ
ни́щимъ. и ѡста́вшаго имѣ́нія, сосу́­
дѡвъ цр҃ко́вныхъ, и зла́та и сребра̀, и
ины́хъ вещє́й положѝ *в̾де́льву {*в̾бо́чку}, и о́бручи
желѣ́зными утверди́въ, в̾ве́рже в̾мо́ре.
са́мъ же ѿи́де в̾ пусты́ню, и ѡбрѣ́те мни́­
хѡвъ кры́ющихъся ѿ єрети́къ в̾пусты́ни,
в̾ ни́хъ же бѣ̀ єди́нъ презви́теръ. и єдва̀
и́хъ прпд̃бный умолѝ, є́же постри́щи єго̀.
боя́хубося искуше́нія ѿ єрети́къ, зане́же
ви́дяху ѝ ю́на су̑ща, бѣ́бо тогда̀ о́сми на́
десяти лѣ́тъ, и ѡблеко́ша єго̀ во и́ноче­
скій о́бразъ. и пожи́ве ту̀ два́десят̃ лѣ́тъ,
{#л. ѱм҃е}

во вся́комъ послуша́ніи. Бы́вшу же го­
не́нію коне́чному ѿ латы́нь. тоя́ же пу­
сты́ни и́ноцы ѿ гоне́нія разыдо́шася,
и не позна́шя дру́гъ дру́га. Прпд̃бный
же анто́ніи нача̀ жи́тельствовати при́ мори
в̾ непрохо́дныхъ мѣ́стѣхъ, наєди́номъ
ка́мени во́ дни и в̾ но́щи беспреста́ни мо­
ля́ся бг҃у, не имѣ́я ни покро́ва ни хи́­
жи. ма́ложе и пи́щи в̾куша́я ѿ недѣ́ли
до недѣ́ли, принесе́ныя ѿ пусты́ни.
и ту̀ пребы́сть на ка́мени го́дъ, и два̀
мѣ́сеца. Бы́сть же въ л̑ѣто шестьты́­
сящь шестьсѡ́тъ четве́ртое на́десять, мѣ́­
сеца сентября̀ въ пя́тый де́нь, на па́­
мять ст҃а́гѡ про̃ро́ка заха́ріи оц҃а̀ прд̃тчева,
воста́ша вѣ́три вели́цы, и мо́ре вельмѝ
восколеба́ся, и восхожда́ху во́лны до ка́­
мене, нане́мъ же прпд̃бный стоя́ше. и
а́біе в̾неза́пу єди́на волна̀ подъя́тъ ка́мень
и съ прпд̃бнымъ. и несѐ єго̀ на ка́мени,
я́коже на кора́бли ле́гцѣ. Бы́сть же ше́­
ствіе єгѡ̀ ѿри́м̾скія страны̀ по окія́ну
мо́рю, и порѣцѣ̀ невѣ̀, и по є́зеру ла́дожь­
скому, да́же и до вели́кагѡ но́ва гра́да.
и ста̀ ка́мень, идѣ́же ны́нѣ оби́тель.

бѣ́же в̾то̀ вре́мя тре́тія стра́жа но́щи;
услы́ша же прпд̃бный зво́нъ у́треннягѡ
пѣ́нія, и ужасе́ся, мня́ше бо я́кѡ
па́ки єго̀ вода̀ в̾ри́мъ принесѐ; не вѣ́да­
ше бо, ка́мѡ єго̀ бж҃іе велѣ́ніе принесѐ.
Нау́тріе же стеко́шася лю́діе и диви́ша­
ся. вопроша́ху же єго̀, ѿ ко́ея страны̀
пріи́де. о́нъ же ни ма́лѡ и́мъ не ѿвѣ­
ща̀, незна́яше бо язы́ка слове́нска,
но то́кмѡ кла́няяся и́мъ. и пребы́сть
на ка́мени ту̀ трѝ днѝ, ни ка́може
с̾ходя. моля́ же бг҃а, да ѿкры́етъ єму̀
ѡ́градѣ и людє́хъ и ѡ язы́цѣ. Въ четве́­
ртый же де́нь ѡбрѣ́те умѣ́юща гре́чески
и ри́м̾ски и ру́сски бесѣ́довати, и вопросѝ
ѡ́градѣ и ѡ вѣ́рѣ и ѡ́людєхъ; Гре́чинъ
же повѣ́да єму̀; гра́дъ речѐ сі́й є́сть
вели́кій но́въ гра́дъ. лю́діе же в̾не́мъ
правосла́вную вѣ́ру хрс̃тія́нскую и́мутъ;
Собо́рная же цр҃квь софі́я, си́рѣчь пре­
му́дрость бж҃ія; Ст҃ль же ники́та; Вла­
дѣ́ющіи же гра́домъ си́мъ, бл҃гочести́вый
вели́кій кн҃зь мстисла́въ влади́мирь мана­
ма́шь, вну́къ все́воложь; Слы́шавъ
же сія̀ прпд̃бный, ѕѣлѡ̀ возра́довася,
{#л. ѱм҃ѕ}

и бл҃годаря̀ бг҃а. Па́ки же речѐ єму̀
прпд̃бный, єще́ми дру́же повѣ́ждь,
коли́кѡ у́бѡ разстоя́ніє ѿ́ града ри́ма,
до гра́да сего̀. о́нъ же єму̀ повѣ́да,
дале́къ о́ч҃е и ну́женъ пу́ть по́ суху и
по́ морю, єдва̀ прехо́дятъ в̾ полгоди́щное
вре́мя. Прпд̃бному же дивя́щуся ѡ
вели́чіи бж҃іи, ка́кѡ в̾ два̀ днѝ, и въ
двѣ̀ но́щи, толи́ку долготу̀ путѝ пре́й­
де. в̾ то́ же у́бѡ вре́мя не яви́ся ст҃лю,
занѐ не навы́че язы́ка слове́нска, и
ѿи́де на мѣ́сто своѐ. и не помно́зѣ
вре́мени навы́че ру́сскому язы́ку, ѿ
приходя́щихъ к̾нему̀. Ст҃ль же ни­
ки́та слы́шавъ ѡ не́мъ, и посла̀ понего̀,
и пріе́мъ єго̀ любе́зно и бесѣ́доваста
на єди́нѣ. и сказа̀ вся̀ ст҃лю я́же ѡ
себѣ̀. и ѿпустѝ єго̀ ѿсебѐ на своѐ єму̀
мѣ́сто. По́времени же и са́мъ ст҃ль
подви́гъ себѐ є́же ви́дѣти прпд̃бнаго, и
ви́дѣвъ, почюди́ся бж҃ію про́мыслу.
Ст҃ль же ники́та с̾ первыми гра́да да́ша
єму̀ сельцо̀, идѣ́же єго̀ бг҃ъ принесѐ
на ка́мени. и поста́виша єму̀ цр҃ковь
древя́ну ма́лу, во́ имя пречс̃тыя бцд̃ы,

чс̃тна́гѡ єя̀ ржс̃тва̀. проти́ву бо тогѡ̀
пра́здника, бг҃ъ єго̀ приведѐ в̾ вели́кій
но́въ гра́дъ. Полѣ́тѣ же єди́номъ при­
ше́ствія прпд̃бнагѡ бли́зъ ка́мене, рыбо­
ло́вцы лови́тву дѣ́юще. Прпд̃бный же
моля̑ше и́хъ глаго́ля, и́мамъ речѐ
єди́нъ сли́токъ сребра̀, сіѐ взе́мъше,
ве́рзите мре́жи ва́шя в̾ лови́тву. и а́ще
что̀ ѡбря́щете, сѐ да бу́детъ в̾ до́мъ
пречс̃тыя бцд̃ы. ѻни́ же в̾верго́ша мре́жи
своя̀, и єдва̀ привлеко́ша ко́ брегу ѿ мнѡ́­
жества ры́бъ, в̾ ма́лѣ не прото́ржеся
мре́жа. из̾влеко́ша же с̾ ры́бами де́льву {*бо́чку}
вели́ку ѕѣлѡ̀, иму́щу желѣ́зныя
о́бручи. Прпд̃бный же ры́бою бл҃головля́етъ
ловєцъ. а де́лву речѐ мнѣ̀ бг҃ъ дарова́лъ
на созда́ніе монасты́ря. Ловцы́ же
де́львы не восхотѣ́ша да́ти, глаго́люще,
мы̀ ная́хомъся ры́бы лови́ти, а де́льва
на́ша, са́ми бо єя̀ в̾верго́хомъ в̾ во́ду
на соблюде́ніе. Прпд̃бный же речѐ и́мъ,
а́зъ с̾ ва́ми не прю́ся, но и́демъ к̾ судіѝ
и уго́дно и́мъ бы́сть; и ста́ша предъ су­
діе́ю. Судія́ же вопросѝ ловцы̀. ѻни́же
єму̀ ѿвѣща́ша, я́коже и ста́рцу рѣ́ша.
{#л. ѱм҃з}

Рече́ же прпд̃бный к̾ судіѝ, господи́не судіѐ
вопросѝ и́хъ, а́ще и́хъ є́сть де́льва, что̀
в̾не́й и́мутъ положе́ное. вопроше́номъ же
бы́вшимъ, и не вѣ́дяху сказа́ти что̀.
Прпд̃бный же речѐ, сія̀ бо́чка на́шея ху́­
дости є́сть, в̾дана̀ морстѣ́и водѣ̀ въ
ри́мѣ, ѿ на́шихъ грѣ́шныхъ ру̑къ.
вложе́ное же в̾ бо́чку, сосу́ды цр҃ко́вныя
зла́ты и сре́брены, и ина́я мнѡ́га ѿ
сщ҃е́нныхъ вещє́й зла́то же и сребро̀ ѿ
имѣ́ніа роди́телєй мои́хъ. Судія́ же
повелѣ̀ бо́чку разби́ти, и ѡбрѣто́ша
по словесѝ прпд̃бнагѡ, и да́ша прпд̃бному
бо́чку, и ѿ пусти́ша єго̀ с̾ ми́ромъ.
Прпд̃бный же возвѣсти сія̀ ст҃лю. Ст҃ль
же просла́ви бг҃а ѡ се́мъ. По́времени же
прпд̃бный монасты́рь созда̀, и бра́тію
собра̀. и игу́меномъ бы́въ ѻби́тели тоя̀
и мнѡ́га исправле́нія ѡ вѣ́рѣ показа̀.
и ѻ́бразъ бы́въ свои́мъ ученикѡ́мъ.
и преста́вися в̾ вѣ́чную жи́знь,
ѿи́де къ бг҃у єго́ же возлюбѝ.
єму́же сла́ва, ны́нѣ
и при́снѡ и во́ вѣки
вѣкѡ́мъ.

<<--- 08aug/04.htm>>>

Мцс̃а того́же въ д҃, дн҃ь. па́мять ст҃ы́хъ
седмѝ о́трѡкъ и́же воєѳе́сѣ, маѯи́ма,
и амбли́ха, мартиніа́на, діѡни́сіа,
іѡ҃а́нна, єѯакустодіа́на, и антони́на,
бл҃гословѝ о́ч҃е.

Сі́и ст҃і́и бя́ху во времена̀ декі́а царя̀,
сн҃ове старѣ́йшинъ гра́д̾скихъ, всѝ
бѣ́шя въ хрс̃то́вѣ вѣ́рѣ. Слы́шавъ
же де́кій ѡ ни́хъ, повелѣ̀ и́хъ при­
вестѝ предъ ся̀, и мнѡ́го ну́дивъ я̀
жре́ти су́етнымъ богѡ́мъ. и ви́дѣвъ
и́хъ непоко́ршяся, и́де во и́нъ гра́дъ
сотвори́ти хотѣ́ніе своѐ, и па́ки воз̃­
врати́въся да́ти на ня̀ ѿвѣ́тъ. Сі́и
же ст҃і́и о́трѡцы пріи́мъше зла̑то и
сребро̀ на пи́щю себѣ̀, изыдо́ша въ
пеще́ру бли́зъ су́щу гра́да, глаго́лемую
ѻ́хли, и ту̀ пребы́ша днѝ мно́ги мо­
ля́щеся бг҃у. амбли́хъ же бѣ̀ мні́й,
и то́й в̾хожда́ше во́ градъ купи́ти и́мъ
бра́шна. Єди́ною же єму̀ ше́дъшу,
слы́ша декі́я возврати́вшася въєфе́съ,
и ше́дъ в̾ верте́пъ повѣ́да другѡ́мъ сво­
и́мъ. И та́кѡ помоли́вшеся бг҃у,
усну́ша чс̃тны́мъ и непоро́чнымъ сно́мъ.
{#л. ѱм҃и}

декі́й же сотворѝ взыка́ніе ѡ ни́хъ, и при­
зва́въ роди́теля и́хъ вопроша́ше ѡ ни́хъ.
и повѣ́даша и́хъ в̾ горѣ̀ то́й, о́хли су́­
щя. декі́й же мнѣ́въ и́хъ жи́вы, посла̀
и наложи ка́мень вели́къ на у́стіе пеще́ры
тоя̀. Се́ же бы́сть чл҃колю́бца бг҃а про́­
мысломъ. Посе́мъ декі́й ца́рь у́мре,
и и́нѣхъ мнѡ́го царє́й измѣни́ся до
ѳео́досіа цр҃я. И подви́жено бы́сть
ѿ єрети́къ є́же глаго́лати и́мъ не бы́ти
воскресе́нію; и цр҃е́ви ѡси́хъ пеку́щу­
ся. Хотя́й же бг҃ъ извѣсти́ти всѣ́мъ
я́кѡ є́сть воскресе́ніе ме́ртвымъ, изво́­
ли ѿве́рьсти пеще́ру, и воскреси́ти си̑хъ
изме́ртвыхъ. и воста́ша сі́и ст҃і́и при
ѳео́дѡ́сіи цр҃ѣ; спа́в̾ше три́ста лѣ́тъ
и се́дмьдесять два̀; и сѣдо́ша всѝ
в̾ку́пѣ, мня́щеся с̾ ве́чера ле́гше. и
посла́ша амбли́ха во́ градъ потре́бы ра́ди,
со зла́томъ и сребро́мъ. иду́щу же
єму̀ ко́ граду, ви́дѣ ѻ́бразъ чс̃тна́гѡ
крс̃та̀ пригвожде́нъ на вратѣ́хъ, и дивля́­
шеся въ себѣ̀. в̾ ше́дъ же во́ гра́дъ, слы́­
ша клену́щася и́менемъ гдс̃нимъ, и
мы́сляше въ себѣ̀, глаго́ля, єда̀ несѐ

є́сть єфе́съ. и изе́мъ зла́то нача̀ ку­
пи́ти хлѣ́бы. продаю́щіи же до несо́ша
анѳѷпа́ту, я́кѡ бя̑ше пре́жнихъ царе́й
сребро̀, и декі́ево зна́меніе бя̑ше на ца́­
тахъ тѣ́хъ. мно́гоже испыта́емь, по­
вѣ́да дружи́ну свою̀ въ пеще́рѣ. и и́де
єпкс̃пъ и анѳѷпа́тъ к̾ пеще́рѣ, и ѡбрѣ­
то́ша пре́же на у́стіи пеще́ры ковче́гъ оло­
вя́нъ, и ѿве́рзъше вы́няша двѣ̀ дщи́цѣ
оловя́нѣ, на пи́сано у́бѡ нанею̀ муче́ніе
ст҃ы́хъ. и в̾ ше́дъше въ пеще́ру, ѡбрѣ­
то́ша ст҃ы́я сѣдя́щя, и та́кѡ просла́виша
бг҃а. Бы́сть же явле́ніе си́хъ въ д҃ де́нь
а́вгуста. Посла́шаже вѣ́сть въ цр҃ь гра́дъ,
къ цр҃ю ѳео́дѡ́сію; с̾ра́достію же пріи́де
цр҃ь во єфе́съ, и вни́де въ пеще́ру идѣ́же
бя́ху ст҃і́и, и покло́нься и́мъ до землѝ,
и ѡблобыза̀ вы́я и́хъ, прославля́я чл҃ко­
лю́бца бг҃а. мно́гоже поучи́въше цр҃я̀
ѡ вѣ́рѣ бж҃іей, и преда́шя дш҃я своя̀
въ ру́цѣ бж҃іи, мѣ́сеца октября̀
въ два́десять вторы́й де́нь.
{#л. ѱм҃ѳ҃}

Вто́йже де́нь стра́сть ст҃аго му́ченика
єлеѵ̾ѳе́рія.

Єлеѵ̾ѳе́ріи ст҃ы́й му́ченикъ бѣ̀ ѿ́града
византі́и, єди́нъ ѿ сѷгкли́тикъ совѣ́­
тникъ, и сказа́тель цр҃ко́вныхъ глагѡ́лъ,
творе́ніемъ же бѣ̀ скопе́цъ, и люби́мь и
че́стенъ всѣ́ми, и тому̀ са́мому царе́ви
маѯиміа́ну усвое́нъ. и зане́же бѣ̀ уго́­
денъ бг҃у, и соверши́тель бж҃е́ственыхъ
за́повѣдеи єгѡ̀, не прича́стенъ же бж҃е́­
ственагѡ и ст҃а́гѡ кр҃ще́нія, и премы́сли
царя̀ му́дростію, испроси́ся на созда́ніе
села̀ твори́ти, глумле́нія ра́ди честна́гѡ
возду́ха. и а́біе получи́въ проше́ніе и
ше́дъ поста́ви до́мъ при сага́рѣ рѣцѣ̀,
и созда̀ вну́трь до́мъ низ́окъ, хра́мъ
до́му бж҃ія. и украси́въ я́коже подо­
ба́ше, и ѡ ст҃ѝ олта́рь рука́ма честны́хъ
ієре́й. и са́мъ ѡ ст҃ѝ себѐ бж҃е́ственымъ
кр҃ще́ніемъ, и мѵ́ромъ {*и́} помазанъ бы́въ,
и ст҃ы́хъ та́инъ прича́стникъ бы́сть, и
к̾тому̀ ѿто́лѣ не исходя̀ бѣ̀. И при­
зва́нъ бы́сть царе́мь, и нача́тъ вопро­
ша́емь бы́ти. о́нъ же глаго́лаше предъ
царе́мъ, неду́гъ до ше́дшъ до себѐ.

и ра́зумѣ ца́рь маѯимія́нъ, я́кѡ у́же
крести́лъ ся є́сть єлеѵ̾ѳе́ріи, и мнѡ́го
му́чивъ єго̀, ѡсуди́въ мече́мъ усѣ́­
кнути. и та́кѡ за хрс̃та̀ пострада̀.

Вто́й же де́нь преподо́бныя му́ченицы
євдокі́и.

Вто́йже де́нь успе́ніе ст҃а́гѡ сісѡ́я пу­
сты́нника в̾ горѣ̀ нитри́йстѣй.

Се́й у́бѡ вели́кій ѻц҃ъ на́шь сісѡ́й пу­
сты́нникъ, ѿ ю́ности пріи́мъ мни́ше­
скій о́бразъ. и всели́ся въ пусты́ню
нитрі́йскую, и мнѡ́ги труды̀ показа̀ къ бг҃у. иєгда̀ хотѣ̀ преста́витися сѣдя́­
щимъ у негѡ̀ бра́тіи, и просвѣти́ся лицѐ
єгѡ̀ я́кѡ сл҃нце. и глаго́ла, сѐ ѻц҃ъ афѳо́­
ніи пріи́де. и ма́лѡ помолча́въ па́ки речѐ
и́мъ, сѐ ли́къ про̃ро́ческій пріи́де. и больмѝ
просвѣти́ся, и речѐ, сѐ ли́къ апс̃льскій при­
и́де. и сугу́бо просвѣти́ся лицѐ єгѡ̀ па́ки,
и сѐ то́й я́кѡ съ инѣ́ми бесѣ́доваше. и мо­
ли́ша и ста́рцы гл҃юще, рцы̀ на́мъ, с̾ ки́мъ
бесѣ́дуеши о́ч҃е; о́нъже речѐ, сѐ а́гг҃ли
пріидо́ша поя́ти менѐ, и молю́ся, да
ѡста́вятъ менѐ ма́лѡ, хощу̀ пока́ятися.
{#л. ѱн҃}

и реко́ша єму̀ ста́рцы, не тре́буеши пока́я­
нія о́ч҃е. Рече́ же и́мъ ста́рецъ, во и́стину
не вѣ́дѣ я́кѡ є́сть ли ми нача́токъ. ви́­
дѣша же всѝ я́кѡ соверше́нъ є́сть. И па́­
ки внеза́пу бы́сть лицѐ єгѡ̀ я́кѡ сл҃нце,
и убоя́шася всѝ. и речѐ, принеси́те мѝ со­
судъ избра́нный пусты́нный. и а́біе пре­
дадѐ дх҃ъ сво́й. и бы́сть мо́лніа,
и испо́лнися хра́мъ
бл҃гоуха́нія.

Вто́й же де́нь слово̀ ѿ патерика̀ ѡ яду́­
щихъ мни́сѣхъ на трапе́зѣ.

Повѣ́даше єди́нъ ѿ ста́рецъ, я́кѡ трѝ
су̑ть ве́щи черньцє́мъ че́стны. к̾ ни́мъ
же подоба́етъ на́мъ со стра́хомъ и тре́пе­
томъ и ра́достію дх҃о́вною приступа́ти;
ѡбще́ніе ст҃ы́хъ та́инъ. и трапе́за бра́­
тіи. и умове́ніе. приноша́ше же и
при́тчю глаго́ля. я́кѡ бѣ̀ єди́нъ ста́­
рецъ прозорли́въ въ бра́тіи, и ви́дяше
дхомъ яду́щихъ сѣдя́щихъ на трапе́зѣ,
яковы̀ су̑ть, ѻ́выхъ яду́щя ме́дъ,
а ѻ́выхъ хлѣ́бъ, а ины́хъ моты́лу,
и диви́ся ста́рецъ в̾ себѣ̀. и моля́ше­
ся бг҃у глаго́ля, гдс̃и яви́ ми та́йну сію̀,

я́кѡ у́бѡ єди́на бра́шна предъложе́на
су̑ть всѣ́мъ на трапе́зѣ въ снѣ́дь, но
почто̀ измѣне́ны су̑ть, о́ви у́бѡ
ядя́тъ ме́дъ, о́ви же хлѣ́бъ, а ині́и
моты́лу. и пріи́де єму̀ гла́съ свы́ше
глаго́ля, я́кѡ яду́щіи ме́дъ, сі́и
су̑ть со стра́хомъ и тре́петомъ и ра́достію
дх҃о́вною сѣдя́тъ на трапе́зѣ, и непре­
ста́ннѡ мо́лятъся, и моли́тва и́хъ
а́ки кади́ло восхо́дитъ къ бг҃у, тѣ́мъ
же ме́дъ ядя́тъ. А яду́щіи хлѣ́бъ,
сі́и су̑ть хва́лящіи вкуше́ніе да́ное и́мъ
ѿ́ бг҃а. А яду́щіи моты́лу, сі́и су̑ть
ро́пщущіи, и глаго́люще, сѐ добро̀, а сѐ
гни̑ло. Тогѡ̀ ра́ди не подоба́етъ си̑хъ
мы́слити, но па́че воспѣва́ти бг҃а и сла́вити
пѣ́сньми єгѡ̀. да в̾ на́съ сконча́ется
рече́нное, а́ще я́сте а́ще піе́те,
а́ще ли и́но что̀ творитѐ,
всѐ въ сла́ву бж҃ію
твори̑те.
{#л. ѱн҃а}

<<--- 08aug/05.htm>>>

Мцс̃а того́же въ е҃, дн҃ь. предъпра́здне­
ство влд̃чнягѡ преображе́ніа гдс̃а бг҃а и сп҃са
на́шегѡ іс҃а хрс̃та̀. Вто́йже дн҃ь па́мять
ст҃а́гѡ мч҃нка єѵ̾сігні́а, бл҃гословѝ о́ч҃е.

Се́й бя̑ше ро́домъ антіохі́анинъ, во́инъ
бы́въ при ко́н̾стѣ зеле́номъ, отцѣ̀
ст҃а́гѡ и вели́кагѡ цр҃я̀ констянти́на. ­
пребы́сть в̾ во́иньствѣ да́же и до іуліа́на
престу́пника, сто̀ и де́сять лѣ́тъ
жи́въ. во́иньствовавъ же лѣ́тъ шесть­
деся́тъ. предъста́въ же іуліа́ну на во­
про́съ, и ѡбличи́въ єго̀ я́кѡ оте́ческое
преступи́въша бл҃гоче́стіе, и бж҃ію че́сть
преложи́вша на и́долы. и воспомяну́въ
єму̀ добродѣ́тель вели́кагѡ констянти́­
на, и ка́кѡ ѡбъявле́ніемъ пріи́де къ вѣ́рѣ
хрс̃то́вѣ. про́чимъ же разу́миченъ по­
каза́въ ся, и да́льними времены̀ и вещь­
мѝ и писа́ніи иску́сенъ. іуліа́нъ же
ѡб̾руга́въ єго̀, повелѣ̀ мече́мъ главу̀
єму̀ ѿсѣщѝ. и та́кѡ соверши́ся
ѡ хрс̃тѣ̀ муче́ніе єгѡ̀.

Вто́йже дн҃ь сло́во ст҃а́гѡ ни́ла ѡ добро­
дѣ́телєхъ тѣлє́сныхъ.

Добродѣ́тели же тѣле́сныя сія̀, па́че же
дѣ́ланія. добродѣ́тели же в̾ ра́зумѣ
и́же по́ бз҃ѣ быва́емы, внѣ̀ вся́когѡ
лицемѣ́рія и человѣкоуго́дія; Впредъ­
спѣ́яніе смире́нія, и безъстра́стіе приво­
дя́щая человѣ́ки, су̑ть сія̀; воздержа́­
ніе, поще́ніе, моле́ніе, жа́жда, бдѣ́ніе,
стоя́ніе всено́щьное, кланя́ніе колѣ́нѡмъ
ча́стое, не умове́ніе, єдинори́зіе. су̑хо
у́бѡ в̾ве́черъ яде́ніе и ма́лѡ. водопи́тіе
и на землѝ лега́ніе. нищета̀, не стяжа́­
ніе не доброутворе́ніе не самолю́бное усе́р̾­
дну пребыва́ти, не исхо́дное. молча́нное.
свои́ма рука́ма рукодѣ́ліе проходи́ти. и
вся́ко ѕлострада́ніе, и поще́ніе тѣле́сное,
и вся̀ я́же тѣ́ло удруча́ющая, и́же
ѿ плотьски́хъ страстє́й смуща́емая ну́­
жнѣйша и поле́знѣйша; не мощьну́ю­
щу же, и бж҃іею по́мощію в̾ си́хъ пребы­
ва́ющу, не по толи́ку и́на потре́бна и
ну́жна, єли́кѡ ст҃о́е смире́ніе и бл҃го­
даре́ніе, вся̀ наполня́ющее. сія̀
у́бѡ ѿ тѣлє́сныхъ добродѣ́телєхъ.
{#л. ѱн҃в}

Ѡ дш҃е́вныхъ страстє́хъ. Должнѝ
у́бѡ єсмы̀ рещѝ, и ѡ дш҃е́вныхъ ѕло́бахъ,
си́рѣчь страстє́хъ; Страстѝ у́бѡ дш҃е́­
вныя су̑ть; забы́тіе, уны́ніе, и не­
разумѣ́ніе. ѿ си́хъ я́вѣ трє́хъ, о́ко
дш҃е́вное, є́же є́сть у́мъ помрача́емь.
ѡблада́емь быва́етъ ѿ всѣ́хъ страстє́й.
ѿ ни́хъ же су̑ть сія̀; нече́стіе, ѕлосла́віе,
и просто вся́ка є́ресь; хула̀, гнѣ́въ,
я́рость, остроже́лчіе, чл҃коненавидѣ́ніе.
памятоѕло́біе, ѡглаго́ланіе, ѡсужде́ніе,
ско́рбь безъслове́сная, стра́хъ, у́жасъ, рве́­
ніе, за́висть, не́нависть. тщесла́віе,
презо́рьство, лицемѣ́рство. лжа̀, невѣ́­
ріе, безу́міе. не разсужде́ніе, сплете́ніе
льсти́вно. лихоима́ніе, мшелолю́біе. при­
стра́стіе, мудрова́ніе земно́е. уны́ніе,
малоду́шіе, не благода́рьствіе, ропта́ніе.
свирѣ́пьство, мнѣ́ніе. не чю́вьство,
бу́есть. любонача́льство, человѣкоуго́­
діе; иєли́ка а́ще кто̀ рече́тъ, и пе́рвѣй­
шая, сластолю́біе славолю́біе, и сребролю́­
біе, ѿ ни́хъ же ражда́ется вся́ко ѕло̀. не
согрѣша́етъ же человѣ́къ ни єди́но согрѣше́­
ніе, а́ще не пре́жде сі́и крѣ́пцыи исполи́ни,

я́коже речѐ и́же въ по́стницѣхъ му́дрѣй­
шіи ма́рко, пріи́дутъ и раздѣля́тъ
єго̀, илѝ забве́ніемъ, илѝ я́ростію,
илѝ невѣ́дѣніемъ. сія́ бо ражда́ютъ
сла́сть и ѡсла́бу, є́же люби́ти сла́ву
человѣ́ческую и молву̀. Пе́рвая же вина̀
всѣ́хъ си̑хъ, и ма́ти всѣ́хъ ѕлы́хъ предъ­
рече́ся, самолю́біе, си́рѣчь безъслове́сная
любо́вь тѣлесѐ, и стра́стное пристра́стіе.
разлія́ніе же и уклоне́ніе ума̀ с̾ буесло́­
віемъ, и скверносло́віемъ мно́гимъ ѕлы́мъ
согрѣше́ніемъ хода́тае су̑ть, де́рзость
и смѣ́хъ. Ѡ тѣле́сныхъ страстє́хъ;
Тѣле́сныя же стра́сти; чревобѣ́сіе, горта́­
нное бѣ́шеніе. та́йно яде́ніе, сластолю́­
бія разли́чная. блу́дъства, прелюбо­
дѣ́йства. скве́рньства, нечистота̀,
мужело́жьства. дѣторастлѣ́нія, студо­
ло́жьства, жела́нія ѕла́я вся̀ чре́зъ
єсте́ственая скверно́вныя стра́сти. тать­
ба̀, святота́тьство, разбо́йничество.
убі́йство по досажде́нію, илѝ по безъ
слове́сному гнѣ́ву, и вся́ко тѣле́сное
ѡслабле́ніе, и наслажде́ніе во́лямъ плоть­
ски́мъ, прибыва́ющимъ па́че тѣлесѐ.
{#л. ѱн҃г}

ѻбая́нія, вол̾хвова́нія, чародѣ́йства.
любоми́рьства, па́кости. доброукраше́­
нія натира́нія лица́мъ. ѡсужде́­
нная пра́здность, высокопа́рство, ве́щи
пристра́стныя, любо́вь тѣлесѐ. жи́знь
утол̾стѣва́ющая у́мъ, зе́мна и ско́­
тна того̀ содѣва́юща, и никогда́же къ
бг҃у, и добродѣ́тельному дѣ́ланію
воста́ти ѡставля́юща.
ко́рень же всѣ́мъ
ѕлы́мъ сребро­
лю́біе.

Вто́й же де́нь поуче́ніе напредъпра́зднь­
ство преображе́нія гдс̃ня.

Да є́сте вѣ́дуще бра́тіе, я́кѡ в̾ сі́й дн҃ь
предъпра́здньство преображе́нія гдс̃а на́­
шегѡ іс҃а хрс̃та̀, собере́мъся въ цр҃ковь на
всю̀ слу́жбу цр҃ко́вную, и ми́лостынею
ѡчи́стимъся. в̾ то́й бо шесты́й дн҃ь а́вгу­
ста ѿкры̀ гдс̃ь бж҃ества̀ своегѡ̀ свѣ́тлость.
и показа̀ учн҃кѡмъ сла́ву своегѡ̀ бж҃ества̀,
готовы я̀ творя̀ тѣ́мъ на послушество̀
въ дн҃ь воск҃рсе́ніа. Тѣ́мъ чю́домъ извѣ­
ще́ніе быва́ше ѿ́ бг҃а, оц҃у ѡне́мъ гл҃ю­
щу, се́й є́сть сн҃ъ мо́й возлю́бленный,

ѡ не́мъ же бл҃гоизво́лихъ, того̀ полу́шай­
те, да вѣ́ру и́мутъ воск҃рсе́нію хрс̃то́ву,
я́коже и бы́сть. в̾ то́й де́нь показа̀
бж҃ію си́лу и сла́ву и че́сть и вла́сть.
в̾ то́й дн҃ь возвѣще́ніе бы́сть ра́дости.
доше́дъше же того̀ бра́тіе, с̾ похвала́ми
бж҃е́ствеными пра́зднуемъ во́нь, чисто­
то́ю украси́вшеся, и дх҃о́внаго бра́шна
насы́тимъся. и́мъ же пита́ющеся, дш҃а̀
не умира́етъ. а́ще бо словє́съ ст҃ы́хъ
кни̑гъ не послу́шаете, ни сотворитѐ во́ли
бж҃іи, ѡсуже́ни бу́дете в̾ му́ку вѣ́чную.
а́ще сотвори́те во́лю бж҃ію, наслѣ́дницы
бу́дете вѣ́чныя жи́зни. за́висть же
и я́рость ѿве́рзите ѿ себѐ, и та́кѡ в̾ до́­
брыхъ дѣ́лѣхъ угодитѐ хрс̃ту̀ бг҃у, ча́ю­
ще бл҃же́ннагѡ упова́нія, и црс̃твія
хрс̃то́ва насладите́ся в̾не́же призыва́я ны,
сни̑де сн҃ъ бж҃іи безнача́лный бг҃ъ на́шь,
сла́вимый въ тро̃цѣ ѿ всея̀ тва́ри
поклоня́емый во єди́номъ
бж҃ествѣ̀. єму́ же
сла́ва, ны́нѣ и
прс̃нѡ и во́вѣки
вѣкѡ́мъ;
{#л. ѱн҃д}

<<--- 08aug/06.htm>>>

Сіѐ сло́во чтѝ покаѳи́смахъ.

Мцс̃а а́вгуста въ ѕ҃, дн҃ь. прпд̃бнагѡ
оц҃а̀ на́шегѡ єфре́ма сѵ́рина, сло́во на
преображе́ніе гдс̃а бг҃а и сп҃са на́шегѡ іс҃а
хрс̃та̀, бл҃гословѝ о́ч҃е.

Ѿ ни́вы жа́тва ира́дованіе. ѿ виногра́да ­
плодѝ снѣ́дніи, ѿ писа́нія поуче́ніе
животво́рное. ни́ва во єди́но вре́мя
и́мать собра́нія, писа́ніе же всегда̀ иста­
ча́етъ поуче́ніе живода́телное. ни́ва єгда̀
пожа́та бу́детъ, истощи́тся, и лоза̀
ви́нная єгда̀ ѡбрѣ́зана бу́детъ, сми­
ри́тся; писа́ніе же на вся́къ дн҃ь пожи­
на́емо, кла́сове сказу́ющимъ єго̀ не
ѡскудѣва́ютъ. и на вся́къ де́нь ѡби­
ра́ется, и гро́здіе и́же в̾ не́мъ упова́нія
не истощева́етъся. Присту́пимъ у́бѡ
к̾ се́й ни́вѣ, и тоя̀ бразды̀ животво́рныя
воспріи́мемъ, и по́жнемъ ѿнея̀ кла́сы
живота̀, словеса̀ гдс̃а на́шегѡ іс҃а хрс̃та̀,
ре́кшагѡ къ свои́мъ учн҃кѡ́мъ, су̑ть
нѣ́цыи ѿ здѣ̀ стоя́щихъ, и́же не вку́­
сятъ сме́рти, до́ндеже у́зрятъ сн҃а
чл҃ческаго гряду́ща въ сла́вѣ свое́й. и
по шестѝ днє́хъ поя́тъ сѵ́мѡна петра̀,

и ия́кова и іѡ҃а́нна бра́та єгѡ̀ на́ гору вы­
соку̀ ѕѣлѡ̀, и преѡбрази́ся предъни́ми,
и просвѣти́ся лицѐ єгѡ̀ я́кѡ сл҃нце. ри́зы
же єгѡ̀ бы́ша бѣлы̀ я́кѡ свѣ́тъ. му́жіе
же речѐ и́же не вку́сятъ сме́рти, до́ндеже
ви́дятъ о́бразъ прише́ствія єгѡ̀, су̑ть
сі́и тріѐ апс̃ли. и́хъ же пои́мъ возведѐ
на́ гору, и показа̀ и́мъ ка́кѡ хо́щетъ при­
итѝ въ дн҃ь послѣ́дніи, въ сла́вѣ бж҃ества̀
єгѡ̀, и во́ плоти чл҃чества єгѡ̀. возведѐ
на́ гору, да пока́жетъ и́мъ кто̀ сн҃ъ, и ко­
то́рагѡ. єгда́ бо вопросѝ и́хъ, кого́ мя
глаго́лютъ человѣ́цы бы́ти сн҃а чл҃ческагѡ;
глаго́лаша єму̀, ѻ́ви илію̀. друзі́и же
ієремі́ю, илѝ єди́наго ѿ про̃ро́къ. сегѡ̀
ра́ди возво́дитъ я̀ на́ гору, и показу́етъ,
я́кѡ нѣ́сть иліа̀, но бг҃ъ иліи́нъ. нижѐ
па́ки ієремі́а, но ѡ ст҃и́вый ієремі́ю ѿ́ чрева
ма́терня; нижѐ єди́нъ ѿ про̃ро́къ, но гдс̃ь
про̃ро́кѡмъ. и то́й є́сть посла́вый я̀ про­
повѣ́дати. И па́ки показу́етъ и́мъ,
я́кѡ то́й є́сть творе́цъ нб҃у и землѝ, и
то́й є́сть гдс̃ь живы́мъ и ме́ртвымъ. По­
велѣ̀ не́бу, и сведѐ илію; и помаа̀ землѝ,
и воста́ви мѡѷсе́я. и возведѐ я̀ на́ гору,
{#л. ѱн҃е}

да пока́жетъ и́мъ я́кѡ то́й є́сть сн҃ъ бж҃іи,
и́же пре́жде вѣ́къ рожде́йся ѿ оц҃а. и въ
послѣ́докъ ѿ дв҃ы воплоти́выйся, я́коже
вѣ́сть са́мъ без̾сѣ́менно роди́въся и не
изрече́нно, и не тлѣ́нно соблю́дъ дв҃ь­
ство. идѣ́же бо хо́щетъ бг҃ъ, побѣ­
жда́ютъся єстества̀ чи́ни. всели́ бо ся
в̾ложесна̀ дв҃чя бг҃ъ сло́во, и не ѡпалѝ
ѻ́гнь бж҃ества̀ єгѡ̀ у́ды дв҃ча тѣлесѐ, но
оба́че и сохрани́въ утро́бу дв҃чю, не
скве́рно соблюдѐ єсте́ственое. и ѿ нея̀
про́йде бг҃ъ воплоща́емь, да на́съ сп҃се́тъ.
возведѐ я̀ на́ гору, да яви́тъ и́мъ
сла́ву бж҃ества̀, и пока́жетъ и́мъ я́кѡ
то́й є́сть избавля́яи ізра́иля, я́коже
и про̃ро́къ ми показа̀. и да не соблазня́тъ­
ся ѡне́мъ, ви́дяще во́льныя єгѡ̀ стрс̃ти,
и́же хотя́ше пострада́ти на́съ ра́ди чл҃чески.
Ви́дяху бо ѝ чл҃ка, и не вѣ́дяху я́кѡ
бг҃ъ є́сть. Вѣ́дяху бо и сн҃а мр҃і́ина,
чл҃ка живу́ща сни́ми въ ми́рѣ, пока­
за̀ и́мъ на горѣ̀, я́кѡ то́й є́сть сн҃ъ
бж҃іи и бг҃ъ. Вѣ́дяху єго̀, я́кѡ ядя́­
ше и пія́ше и тружда́шеся, и почива́ше
и усыпа́ше, и боя́шеся и потя́шеся,

я́же єстеству̀ бж҃ества̀ єгѡ̀ не подобля́ху­
ся, но то́кмѡ чл҃честву. и сегѡ̀ ра́ди
возво́дитъ и́хъ на́ гору, да оц҃ъ пригла­
си́тъ сн҃а, и яви́тъ и́мъ я́кѡ сн҃ъ єгѡ̀
є́сть во и́стину и бг҃ъ. возведѐ я̀ на́ гору,
и показа̀ и́мъ црс̃твіе своѐ пре́жде см҃рти
своея̀. и си́лу свою̀ и сла́ву свою̀, пре́жде
хулы̀ єгѡ̀. и че́сть свою̀, пре́жде бесче́стія
своегѡ̀. да внегда̀ ѡдержи́мь бу́детъ,
и ра́спнетъся жи́дъми, разумѣ́ютъ я́кѡ
не не́мощи дѣ́ля распя́тъся, но во́лею бл҃го­
воле́ніа єгѡ̀ на сп҃се́ніе ми́ру. возведѐ я̀
на́ гору, и показа̀ и́мъ сла́ву бж҃ества̀ сво­
егѡ̀, пре́жде воста́ніа своегѡ̀. да внегда̀ из̾
мр҃твыхъ воста́нетъ, сла́ву єстества̀ и бж҃е­
ства̀ єгѡ̀, разумѣ́ютъ всѝ, я́кѡ не тру­
ды̀ прія́тъ сла́ву я́кѡ проси́тель, но бя̑ше
сла́ва єгѡ̀ пре́жде вѣ́къ со ѻц҃е́мь и ст҃ы́мь
дх҃омь. я́коже речѐ гряды́й на во́льную
стрс̃ть, ѻ́ч҃е посла́ви мя сла́вою ю́же имѣ́хъ
у тебѐ пре́жде да́же ми́ръ не бы́сть; ту̀
у́бѡ сла́ву бж҃ества̀ єгѡ̀, не вѣ́дому въ чл҃че­
ствѣ єгѡ̀, соверше́нну показа̀ апс̃лѡмъ на
горѣ̀. Ви́дѣша бо лицѐ єгѡ̀, я́кѡ мо́лнію
сія́ющю, и ри́зы єгѡ̀ бѣлы̀ я́кѡ свѣ́тъ.
{#л. ѱн҃ѕ}

два̀ сл҃нца учн҃цы̀ єгѡ̀ зря́ху, єди́но
на́ нб҃си по обы́чаю, иєди́но па́че обы́чая.
єди́наго свѣ́та свѣтя́ща и́мъ, и ми́ру все­
му̀ въ тве́рди, иєди́наго тѣ́мъ єди́нѣмъ
я́вльша лицѐ своѐ, явѝ я́кѡ изъ всегѡ̀
тѣлесѐ єгѡ̀ кипя́ше сла́ва бж҃ества̀ єгѡ̀, и
ѿ всѣ́хъ у́дъ єгѡ̀ просвѣти́ся свѣ́тъ єгѡ̀.
не я́кѡ бо мѡѷсе́ю внѣ̀ пло́ти єгѡ̀,
сія́ше бл҃голѣ́піе; но ѿ самого̀ кипя́ше
сла́ва бж҃ества̀ єгѡ̀. восія̀ свѣ́тъ єгѡ̀, и
вне́мъ собра́ся. небо̀ во и́ну страну̀ ѿи́де
и ѡста́ви єго̀, и я́кѡ не пріи́де ѿ страны̀ и
принесѐ єму̀. не в̾ пома́заніи бо єму̀ бѣ̀,
нижѐ всю̀ бе́здну {*глубину̀} сла́вы своея̀ показа̀,
но єли́кѡ вмѣстѝ мѣ́ра зѣ́ницъ о́чію
и́хъ. и яви́шася и́мъ мѡѷсе́й и илія̀
гл҃юща сни́мъ. сія̀ бя́ста бл҃года́ть исповѣ́­
дающа єму̀, я́кѡ испо́лнишася рѣ́чи и́хъ,
и всѣ́хъ и́же сни́ма про̃рѡ́къ, поклоне́ніе при­
ноша́ху єму̀ ѡ сп҃се́ніи, я́же сотворѝ в̾ ми́рѣ
ро́ду чл҃ческому. и та́иньство є́же ті́и про­
ѡбразова́ху, то́й дѣ́ломъ испо́лни. ра́­
дость про̃ро́кѡмъ и апс̃лѡмъ, в̾ восхожде́ніе
горы̀ тоя̀ бы́сть. ра́довахуся про̃ро́цы,
ви́дяще чл҃чество єгѡ̀, є́же неви́дѣша.

ра́довахуся и апс̃ли ви́дѣвъше сла́ву бж҃е­
ства̀ єгѡ̀, є́же не свѣ́дяху и услы́ша­
ша гла́съ оч҃ь свидѣ́тельствующь сн҃ови,
и тогѡ̀ ра́ди позна́ша во чл҃ченіе єгѡ̀,
є́же бѣ̀ нельсти́внѡ в̾ ни́хъ. и увѣ́ри
и́хъ со ѻ́ч҃имъ гла́сомъ я́вльшаяся сла́ва
пло́ти єгѡ̀ ѿ совоку́пльшіяся єму̀ не­
смуще́ннѡ бж҃еству̀. и на зна́мена сви­
дѣ́тельство трє́мъ. ѻ́во о́ч҃имъ гла́­
сомъ. а о́во мѡѷсе́ѡмъ и иліе́ю, и́же
и предъстоя́ху я́кѡ и рабѝ, и на єди́наго
зря́ху про̃ро́цы и апс̃ли. и про̃ро́ки ви́­
дѣша ту̀ єди́нъ друга́го, нача́льницы
ве́тхагѡ зако́на, нача́льникѡвъ но́вагѡ.
ви́дѣ мѡѷсе́й ст҃ы́й сѵ́мѡна ѡст҃и́вша­
гося. ви́дѣ строи́тель оч҃ь с̾поспѣ́шни­
ка сн҃о́вня. ѻ́въ раздѣлѝ мо́ре, ходи́­
ти посредѝ вѡ̑лнъ. ѻ́въ же воздви́же
сѣ́нь, созда́ти цр҃ковь. ви́дѣ дѣ́вь­
ственикъ ве́тхагѡ зако́на, дѣ́вьствени­
ка но́выя бл҃года́ти, илія̀ іѡ҃а́нна, в̾ше́­
дый на колесни́цѣ о́гненѣй, возле́гшаго
на пла́менныя пе́рси. и бы́сть гора̀ во
ѻ́бразъ цр҃кве. и совокупѝ себѣ̀ іс҃ъ
обоя̀ за́повѣди, я́же прія́тъ цр҃кви.
{#л. ѱн҃з}

и показа̀ на́мъ, я́кѡ то́й є́сть да́вецъ
ѡбои́хъ зако́нѡвъ. єди́нъ пое́тъ таи́нь­
ствія єгѡ̀, а другі́й явѝ сла́ву дѣ́лъ єгѡ̀.
речѐ сѵ́монъ, добро̀ є́сть на́мъ здѣ̀ бы́ти
гдс̃и; ѽ сѵ́моне, что̀ глаго́леши; а́ще
здѣ̀ пребу́демъ, словеса̀ про̃ро́ческая кто̀
испо́лнитъ; рѣ́чи же проповѣ́дникъ, кто̀
зна́менаетъ; таи́ньства же пра́ведникъ,
кто̀ с̾верши́тъ. а́ще у́бѡ здѣ̀ пребу́­
демъ, то̀ что̀ є́сть предърече́нно, иско­
па́ша ру́цѣ моѝ и но́ѕѣ моѝ, нако́мъ
испо́лнится; и о́ное, раздѣли́ша себѣ̀
ри́зы моя̀, и ѡ *мати́смѣ {*оде́жди} мое́й мета́ша
жре́бія, кому̀ є́сть подо́бно. И па́ки
о́ное, да́ша въя́дь мою̀ же́лчь, и в̾ жа́жду
мою̀ напои́ша мя оцта̀, кому̀ приключи́­
тся. и о́ное, в̾ ме́ртвыхъ свобо́дь, кто̀
извѣсти́тъ; А́ще здѣ̀ пребу́демъ
рукописа́ніе ада́мле, кто̀ растерза́етъ
до́лгъ єгѡ̀ кто̀ истя́жетъ. и одѣя́ніе
сла́вы єгѡ̀, кто̀ ѡбнови́тъ. а́ще же пре­
бу́демъ я́же ти рѣ́хъ, ка́кѡ сози́жде­
тся; цр҃квь ка́ко ся ѡст҃и́тъ; ключа̀
црс̃твія нбс̃нагѡ, ка́кѡ пріи́меши ѿменѐ;
кого̀ свя́жеши, кого́ ли разрѣши́ши

а́ще здѣ̀ пребу́демъ, ис̾празня́тся вся̀
гл҃емая про̃ро́ки. И речѐ па́ки, сотворим̃ трѝ
сѣ́ни, тебѣ̀ єди́ну, и мѡѷсе́ю єди́ну, и
иліѝ єди́ну. *сѵ́мѡнъ {*си́мо­нъ} посла́ся созда́ти цр҃кви
на землѝ, и то́й ста̀ сѣ́ни творя̀ в̾ горѣ̀.
и єще́ бо человѣ́чески внима́ше хрс̃та̀, и
с̾мѡѷсе́ѡмъ и иліе́ю с̾чєта́ше єго̀. И а́біе
же хрс̃то́съ показа̀ єму̀, я́кѡ не тре́буетъ
сѣ́ни єгѡ̀, то́й бо бѣ̀ сотворя́я оц҃є́мъ
єгѡ̀ сѣ́ни о́блакомъ в̾ пусты́ни, четы́ре­
десять лѣ́тъ. єще́ же глаго́лющимъ
и́мъ, и сѐ ѻ́блакъ ѡсѣня́я и́хъ; зрѝ
сѵ́мѡне сѣ̑нь кромѣ̀ труда̀. и сѣ̑нь возбра­
ня́ющую зно́ю, и не иму́щу тму̀. сѣ́нь
блиста́ющю и свѣтя́щю. и учн҃кѡ́мъ
дивя́щимъся. сѐ гла́съ услы́шася ѿ
оц҃а̀ изъ о́блака гл҃я, се́й є́сть сн҃ъ мо́й
возлю́бленный, ѡ не́мъ же бл҃гоизво́­
лихъ, того̀ послу́шайте. По гла́сѣ же
о́ч҃и мѡѷсе́й воз̾врати́ся в̾ мѣ́сто своѐ.
и апс̃ли на лица̀ падо́ша на землѝ. Іс҃ъ
же ста̀ єди́нъ, занѐ гла́съ о́нъ, на того̀
єди́наго исполня́шеся. Бѣжа́ша про̃ро́­
цы, и апс̃ли падо́ша на зе́млю, занѐ ѡ
тѣ́хъ исполня́шеся свидѣ́тельство о́ч҃еє.
{#л. ѱн҃и}

се́й є́сть сн҃ъ мо́й возлю́бленный, ѡ не́мъ
же бл҃гоизво́лихъ, того̀ послу́шайте; пока­
за́лъ и́мъ оц҃ъ, я́кѡ сконча́ся про̃ро́чество
мѡѷсе́ово, и да сн҃о́внее смотре́ніе услы́­
шатъ. ѻ́нъ бо я́кѡ ра́бъ, є́же повелѣ́ся
єму̀ речѐ. и я́коже гл҃ашеся єму̀ проповѣ́­
да. и всѝ про̃ро́цы до́ндеже пріи́де єму́ же
щадя́шеся, си́рѣчь іс҃ъ, є́же є́сть сн҃ъ
а не домоча́децъ. гдс̃ь, а не ра́бъ. владя́и,
а не ѡблада́емь. законоложи́тель, а не
зако́ну подлежа́щіи єстество́мь бж҃е́стве­
нымь. и се́й є́сть сн҃ъ мой возлю́бленный.
сн҃о́внее бжс̃тво̀ ѿ апс̃лъ не вѣ́домое, ѻц҃ъ
явѝ в̾ горѣ̀. се́й возвѣща́єтъ су́щая,
ѻц҃ъ явля́етъ сн҃а. тѣ́мъ гла́сомъ апс̃ли
падо́ша на лицѐ землѝ. гро́мъ бо бѣ̀ стра́­
шенъ, я́кѡ ѿ́ гласа єгѡ̀ земля̀ вострепе­
та̀, и ті́и падо́ша на землѝ. и призва̀ сн҃ъ
гла́сомъ свои́мъ, и воздви́же я̀. я́коже бо
стра́шный гла́съ оч҃ь пове́рже я̀, та́кѡ и
гла́съ сн҃о́вніи, въ крѣ́пости бжс̃тва̀ єгѡ̀ во­
здви́же я̀ и́же всели́вшіися во́ плоти єгѡ̀,
и совоку́пльшіися в̾ не́й непрело́жно обои́мь
въ єди́ной ѵпоста́си, и єди́нѣмъ ѻ́бразомъ
нераздѣли́мо, и несмуще́нно пребыва́я

не я́кѡ мѡѷсе́й въни́хъ бл҃голѣ́пенъ бы́сть,
но я́кѡ бг҃ъ въ сла́вѣ блиста́ше. мѡѷсе́й
бо явле́ніемъ лица̀ єгѡ̀ пома́завъся въ
бл҃голѣ́піе, іс҃ъ же всѣ́мъ тѣ́ломъ сво­
и́мъ, я́кѡ сл҃нце в̾ луча́хъ єгѡ̀ блиста́ше
сла́вою бж҃ества̀ єгѡ̀, и оц҃ъ взыва́ше,
се́й є́сть сн҃ъ мо́й возлю́бленный, ѡ не́мъ
же бл҃гоизво́лихъ, не ѿлуча́емый ѿ сла́­
вы бж҃ества̀ сн҃о́вня. єди́но бо єстество̀
оц҃а и сн҃а и ст҃а́гѡ дх҃а, єди̑на си̑ла,
єди́но существо̀, єди́но црс̃тво. и на
єди́ного зовя̑ше гла́сомъ, на и́мени сми­
ре́номъ, и въ сла́вѣ стра́шнѣ. и мр҃і́а
сн҃а єго̀ зовя̑ше. не ѿлучи́мь тѣлесе́мъ
чл҃ческимъ, ѿ сла́вы єгѡ̀ бж҃е́ственыя.
єди́нъ бо є́сть бг҃ъ въ пло́ти, явле́ися въ
ми́рѣ. сла́ва єгѡ̀ провозвѣстѝ єстество̀
бж҃ества̀, є́же ѿ оц҃а, а пло́ть єгѡ̀ возвѣ­
стѝ чл҃чество, є́же ѿ мр҃і́и. ѿ обоя́ бо
єстества̀ съ прише́дъша, и совоку́пльша­
ся во єди́ной ѵпоста́си, си́рѣчь лице́мъ
не прело́жнымъ, и не смуще́нымъ. єди́нъ
то́йжде єдиноро́денъ ѿ оц҃а, и изъ
мр҃і́и єдиноча́денъ. и раздѣля́яи єго̀,
раздѣле́нъ бу́детъ ѿ цр҃ьства єгѡ̀.
{#л. ѱн҃ѳ}

и смуща́я єго̀ єстествѣ̀, да поги́бнетъ
ѿ живота̀ єгѡ̀. *ѿрица́яйся {*наєрети­кѝ аріа́­ны и по­до́бныя и́мъ}, я́кѡ не
родѝ бг҃а мр҃і́а, да неви́дитъ сла́вы бжс̃тва̀ ­
єгѡ̀. и ѿрица́яися, я́кѡ не ѡблече́ся
въ пло́ть безъгрѣ́шну, бу́детъ изъ­
ве́рженъ ѿ сп҃се́ніа и живота̀ дае́магѡ ра́ди
пло́ти єгѡ̀. са́мыя ве́щи свидѣ́тель­
ствуютъ, и си́лы єгѡ̀ бж҃е́ственыя раз̾­
сужа́емыя, я́кѡ бг҃ъ є́сть и́стиненъ;
и стрс̃ти єгѡ̀ явля́ютъ, я́кѡ є́сть чл҃къ
и́стиненъ. и а́ще не увѣря́ется вре́дный
совѣ́стію, возда́стъ и́мъ ме́сть въ дн҃ь
стра́шный; А́ще не бѣ̀ пло́ть, мр҃і́а
посредѝ почто̀ в̾веде́ся; и а́ще не бѣ̀
бг҃ъ, гавріи́лъ кого̀ наречѐ гдс̃емь; а́ще
не бѣ̀ пло́ть, въ я́слѣхъ кто̀ возлежа̀;
и а́ще не бѣ̀ бг҃ъ, а́гг҃ли с̾ше́дше кого̀
славосло́вляху; а́ще не бѣ̀ пло́ть, пелена́­
ми кто̀ ѡбвива́емь бя̑ше; и а́ще не бѣ̀
бг҃ъ, па́стыріе кому̀ поклони́шася; а́ще
не бѣ̀ пло́ть, іѡ́сифъ кого̀ ѡбрѣ́за; и
а́ще не бѣ̀ бг҃ъ, звѣзда̀ на́ нб҃си въ че́сть
кому̀ теча́ше; а́ще не бѣ̀ пло́ть, мр҃і́а
млеко́мъ кого̀ воздоѝ; и а́ще не бѣ̀
бг҃ъ, волсвѝ да́ры кому̀ принесо́ша;

а́ще небѣ̀ пло́ть, сѷмеѡ́нъ на руку̀
кого̀ ноша́ше; и а́ще небѣ̀ бг҃ъ, кому̀
гл҃аше, ѿпусти́ мя вл҃ко по гл҃у твоему̀
с̾ ми́ромъ; а́ще небѣ̀ пло́ть, іѡ́сифъ
кого̀ пріи́мъ бѣжа̀ въ єгѵ́петъ; и а́ще
небѣ̀ бг҃ъ, изъєгѵ́пта призва́хъ сн҃а
моегѡ̀, ка́кося испо́лни; а́ще небѣ̀
пло́ть, іѡ҃а́ннъ кого̀ крс̃ти́лъ; и а́ще
небѣ̀ бг҃ъ, ѻц҃ъ кому̀ гл҃аше, се́й є́сть
сн҃ъ мо́й возлю́бленный, ѡне́мъ же бл҃го­
изво́лихъ; а́ще небѣ̀ пло́ть, кто̀
пости́ся и взалка̀ въ пусты́ни; и а́ще
небѣ̀ бг҃ъ, а́гг҃ли с̾ ше́дъше кому̀служи́­
ша; а́ще не бѣ̀ пло́ть, кто̀ призва́нъ
бы́сть на́бракъ в̾канагалилѣ́и; и а́ще небѣ̀
бг҃ъ, во́ду в̾ вино̀ кто̀ преложѝ; а́ще
небѣ̀ пло́ть, хлѣ́бы в̾ руку̀ кому̀ лежа́­
ху; и а́ще небѣ̀ б҃гъ, пятьты́сящъ лю­
дє́й, кромѣ̀ жє́нъ и дѣтє́й, кто̀ напита̀
пятію̀ хлѣ́бы, и двѣма̀ ры́бы; а́ще
небѣ̀ пло́ть, в̾ кора́бли кто̀ спа́ше;
и а́ще небѣ̀ бг҃ъ, вѣ́тромъ и мо́рю кто̀
запретѝ; а́ще небѣ̀ пло́ть, си́монъ
фарисе́й ски́мъ ядя́ше; и а́ще небѣ̀
бг҃ъ, согрѣше́нія грѣ́шницы кто̀ простѝ;
{#л. ѱѯ҃}

а́ще небѣ̀ пло́ть, надъ студенце́мъ пу­
те́мъ утру́ждься, кто̀ сѣдя́ше;
и а́ще небѣ̀ бг҃ъ, во́ду жи́ву самаря­
ны́ни кто̀ дая́ше, и ѡблича́ше я́кѡ
пя̑ть му̑жь имѣ̀; а́ще не бѣ̀ пло́ть,
ѻдѣя́ніе чл҃ческо кто̀ ноша́ше; и а́ще
небѣ̀ бг҃ъ, си́лы кто̀ творя́ше и чюдеса̀;
а́ще не бѣ̀ пло́ть, кто̀ плю́ну на зе́млю
и бре́ніе сотворѝ; и а́ще не бѣ̀ бг҃ъ, очеса̀
слѣпы́мъ кто̀ зрѣ́ти пону́дилъ є́сть;
а́ще небѣ̀ пло́ть, на́ гробѣ ла́заревѣ кто̀
пла́каше; и а́ще небѣ̀ бг҃ъ, ме́ртва че­
тверодне́вна, кто̀ воста́ви; а́ще небѣ̀
пло́ть, на жребя́ти ско́тіи кто̀ сѣдя́ше;
и а́ще не бѣ̀ бг҃ъ, нарѡ́ди со сла́вою на
стрѣ́теніе кому̀ исхожа́ху. а́ще небѣ̀
пло́ть, июде́и кого̀ удержа́ша; и а́ще
небѣ̀ бг҃ъ, кто̀ повелѣ̀ на землѝ и на
травѣ̀ возлещѝ наро́дѡмъ пятѝ ты́ся­
щамъ, и насы́ти и́хъ пятію̀ хлѣ́бы;
а́ще небѣ̀ пло́ть, кто̀ по лани́тѣ за­
уша́шеся; и а́ще небѣ̀ бг҃ъ, у́хо
урѣ́занное петро́мъ кто̀ исцѣлѝ, и
устро́и є̀ па́ки в̾мѣ́сто єгѡ̀; а́ще небѣ̀
пло́ть, чі́й ѻ́бразъ пріима́ше ѡплева́ніе.

и а́ще небѣ̀ бг҃ъ дх҃ъ ст҃ы́й, кто̀ ду́ну
на лица̀ апс̃лѡмъ; а́ще небѣ̀ пло́ть,
на суди́щи пила́товѣ кто̀ предъстоя́ше;
и а́ще не бѣ̀ бг҃ъ, во снѣ̀ пила́тову же­
ну̀ кто̀ устрашѝ; а́ще небѣ̀ пло́ть,
чія̀ ри́зы совлеко́ша во́ини и раздѣли́ша
сѝ; и а́ще небѣ̀ бг҃ъ, сл҃нце ка́кѡ
ѡмрачи́ся; а́ще небѣ̀ пло́ть, на крс̃тѣ̀
кто̀ ви́сяше; и а́ще небѣ̀ бг҃ъ, землѝ
ѡснова́нія кто̀ потрясѐ; а́ще не бѣ̀
пло́ть, гвоздьмѝ кому̀ ру́цѣ и но́зѣ при­
гвозди́шася; и а́ще небѣ̀ бг҃ъ, цр҃ко́вная
опо́на ка́кѡ раздра́ся, и ка́меніе разся́­
деся, и грѡ́би ѿверзо́шася; а́ще небѣ̀
пло́ть, бж҃е бж҃е мо́й въску́ю мя ѡста́­
ви, кто̀ зовя̑ше; и а́ще небѣ̀ бг҃ъ,
ѻ́ч҃е простѝ и́мъ грѣ́хъ се́й, кто̀ речѐ;
а́ще небѣ̀ пло́ть, на крс̃тѣ̀ с̾разбо́йнико­
ма кто̀ ви́сяше; и а́ще небѣ̀ бг҃ъ, разбо́й­
нику кто̀ гл҃аше, дне́сь со мно́ю бу́деши
в̾ раѝ; а́ще небѣ̀ пло́ть, оцта̀ и же́лчи
кому̀ принесо́ша; и а́ще небѣ̀ бг҃ъ, а́дъ
чі́й гла́съ услы́ша и вострепета̀; а́ще
небѣ̀ пло́ть, копіе́мъ ре́бра кому̀ про­
бодо́ша, и изы́де а́біе кро́вь и вода̀;
{#л. ѱѯ҃а}

и а́ще небѣ̀ бг҃ъ, врата̀ а́дова кто̀ сокрушѝ,
и чі́имъ повелѣ́ніемъ ме́ртвіи затворе́ніи
хожда́ху; а́ще небѣ̀ т̑ѣло, іѡ́сифъ
с̾ никоди́момъ кого̀ пома́заша и погребо́ша;
и а́ще небѣ̀ бг҃ъ, въ тре́тіи де́нь кто̀ воста̀
изъ ме́ртвыхъ; а́ще небѣ̀ пло́ть, апс̃ли
на го́рницѣ кого̀ ви́дѣша; и а́ще небѣ̀
бг҃ъ, две́ремъ затворе́нымъ кто̀ вни̑де;
а́ще небѣ̀ пло́ть, чія̀ я́звы гвозди́нныя,
и ре́бра копіе́мъ прободе́ная ѡсяза̀ рука́ма
ѳѡма̀; и а́ще небѣ̀ бг҃ъ, кому̀ зовя̑ше
гдс̃ь мо́й и бг҃ъ мо́й; а́ще небѣ̀ пло́ть,
на́ мори тивиріа́дъстѣмъ кто̀ ядѐ; и
а́ще небѣ̀ бг҃ъ, когѡ̀ повелѣ́ніемъ мре́жа
испо́лнися ры́бъ; а́ще небѣ̀ пло́ть,
кто̀ пріи́де в̾галилѣ́и на́ гору къєди́но
на́десятимъ апс̃лѡмъ; и а́ще небѣ̀ бг҃ъ,
кто̀ ре́клъ ше́дъше научи́те вся̀ язы́ки
крс̃тя́ще я̀ во́ имя оц҃а̀ и сн҃а и ст҃а́гѡ
дх҃а; а́ще небѣ̀ пло́ть, апс̃ли и а́гг҃ли
кого̀ ви́дѣша возноси́ма на́ нб҃о; и а́ще
небѣ̀ бг҃ъ, нб҃о кому̀ ѿве́рзеся. Си́лы же
нбс̃ныя кому̀ поклони́шася с̾ тре́петомъ.
И оц҃ъ кому̀ провозвѣстѝ, ся́ди ѡдесну́ю
менѐ и про́чая. И первомч҃никъ стефа́нъ

кого̀ ви́дѣ во ѿве́рзеномъ нб҃сѝ стоя́ща
ѡдесну́ю бг҃а. А́ще небѣ̀ бг҃ъ и чл҃къ,
ло́жно є́сть спасе́ніе на́ше. лжі́и и гла́си
пророче́стіи; но ѻба́че истиньствуютъ
про̃ро́цы, иистинна су̑ть свидѣ́тельства
и́хъ я́коже повелѣ́шася, и тѣ́ми дх҃ъ
ст҃ы́й гл҃аше. Тѣ́мъ же чс̃тны́й іѡ҃а́ннъ,
и́же на пла́меннѣ пе́рси возле́гъ, исполня́я
про̃ро́ческія гла́сы, бг҃осло́вствуя въ
єѵг̃а́ліи, и показа̀ на́мъ гл҃я, в̾ нача́лѣ
бѣ̀ сло́во, и сло́во бѣ̀ въ бз҃ѣ, и бг҃ъ
бѣ̀ сло́во. и вся̀ тѣ́мъ бы́шя, и без̾ тогѡ̀
ничто́же бы́сть, є́же бы́сть. и сло́во
пло́ть бы́сть, ивсели́ся в̾ ны̀. и́же ѿ́ бг҃а
бг҃ъ сло́во, и ѿ оц҃а сн҃ъ єдиноро́денъ,
и єдиносу́щенъ оц҃е́ви. сы́й ѿ су́ща­
гѡ пре́жде вѣ́къ сло́во. неизрече́нно
то́йжде в̾ послѣ́докъ ражда́етъся и́зъ
чрева дще́ре чл҃чи, прс̃нѡ дв҃ы мр҃і́и
безъ оц҃а. бг҃ъ воплоща́емь, ѡболкі́й­
ся ѿнея̀ въ пло́ть, и бы́въ из̾ нея̀
чл҃къ, є́же небѣ̀. пребы́въ бг҃ъ,
є́же бѣ̀, да ми́ръ спасе́тъ. И то́й
є́сть хрс̃то́съ сн҃ъ бж҃іи, єдиноро́денъ ѿ
оц҃а. и ѿ мт҃ре єдиноча́денъ. исповѣ́дую
{#л. ѱѯ҃в}

того́ же бг҃а соверше́на во обою̀ єстеству̀
совокупля́ема, во єди́ной ѵпота́си разу­
мѣва́ема, си́рѣчь лице́мъ не раздѣ́лно ни
смуще́нно, не премѣ́нно в̾ пло́ть ѡбо́лкъ­
шася, и во ѡдш҃евле́нную дш҃ю слове́сную
и разу́мную по всему̀ бы́вшую на́мъ по­
до́бну, кромѣ̀ єди́наго грѣха̀. То́й­
жде земны́й и нбс̃ный, вре́менный и прс̃нѡ
су́щіи, безлѣ́тенъ, и под̾лѣ́тенъ,
со́зданъ и несо́зданъ, стра́стенъ и безъ­
стрс̃тенъ, бг҃ъ и чл҃къ, во обѡи́хъ сове­
рше́нъ. єди́нъ во двою̀, и во обѡи́хъ
єди́нъ. єди́но лицѐ ѻ́ч҃о, и єди́но лицѐ
сн҃о́вне, и єди́но лицѐ ст҃а́гѡ дх҃а.
єди́на си́ла, єди́но бж҃ество̀, єди́но
црс̃тво въ тре́хъ ли́цєхъ, си́рѣчь ѵпоста́­
сѣхъ. Та́кѡ сла́вимъ ст҃у́ю тро̃цу,
єди́ницу въ тро̃цѣ, и тро̃цу во єди́ницѣ.
ѡ́ сн҃ѣ же зовя̑ше оц҃ъ съ нб҃сѐ, се́й є́сть
сн҃ъ мо́й возлю́бленный, ѡ не́мъ же бл҃го­
изво́лихъ, того̀ послу́шайте. Сѝ при­
я́тъ ст҃а́я бж҃ія собо́рная цр҃кви. в̾ то́й
ст҃ѣ́й цр҃кви кр҃ща́емся в̾ живо́тъ вѣ́чный,
и ѡсщ҃а́емся ра́вно бл҃гоче́стіемъ, и вне́й
исповѣ́даемъ не раздѣ́лно и не разлу́чно

ст҃у́ю тро̃цу, и то́й покланя́ющеся не
согрѣша́емъ, и исповѣ́дуемъ и сла́вимъ.
то́й же трисоста́внѣй єди́ницѣ
подоба́етъ сла́ва и бл҃годаре́ніе,
че́сть и держа́ва во́ вѣки
вѣкѡ́мъ.

Мцс̃а того́же въ ѕ҃, дн҃ь. ст҃о́е преобра­
же́ніе гдс̃а бг҃а и сп҃са на́шегѡ іс҃а хрс̃та̀,
бл҃гословѝ о́ч҃е.

Въ шесты́й мѣ́сеца а́вгуста, воспомина́­
ніе бж҃е́ственагѡ преображе́нія, гдс̃а бг҃а
на́шегѡ іс҃а хрс̃та̀, ст҃а́я бж҃ія
цр҃ковь ра́достнѡ пра́зднуетъ. вина́же
є́сть сія̀. поне́же мно́га ѡ бѣда́хъ
хрс̃то́съ бесѣ́доваше ко учн҃кѡ́мъ, и
ѡ см҃рти и ѡ стрс̃ти свое́й, и ѡ учн҃къ
свои́хъ закла́ніи. и о́ва у́бѡ бя́ху
в̾ настоя́щемъ житіѝ и в̾ рука́хъ. ѻ́ва
же бл҃га́я в̾наде́жди. хотя́и же и о́бразъ
тѣ́хъ извѣсти́ти и показа́ти, кото́рая
когда̀ є́сть сла́ва о́на, с̾ не́ю же хо́щетъ
пріитѝ, возво́дитъ и́хъ на́ гору высо́ку
на єди́нѣ, и преѡбрази́ся предъни́ми,
и просвѣти́ся лицѐ єгѡ̀ я́кѡ сл҃нце.
{#л. ѱѯ҃г}

ри́зы же єгѡ̀ бы́ша бѣлы̀ я́кѡ свѣ́тъ. и
яви́стася и́мъ мѡѷсе́й и иліа̀ с̾ни́мъ гл҃ю­
ща. Поя́тъже и ины́хъ трє́хъ єди́нѣхъ
я́кѡ преиму́щихъ. петра̀ у́бѡ, за
є́же ѕѣлѡ̀ люби́ти тому̀ хрс̃та̀. іѡ҃а́нна
же за є́же ѕѣлѡ̀ люби́мому бы́ти
хрс̃то́мъ. ия́кова же за є́же мощѝ пи́ти
ча́шю ю́же и гдс̃ь пія́ше. мѡѷсе́а же и
илію̀ посредѣ̀ приво́дитъ, не пра́выя мы́­
сли я́же ѡ не́мъ, у мно́гихъ бы́вшія
исправля́я. поне́жебо нѣ́цыи того̀ илію̀
гл҃аху, ині́и же ієремі́ю. Сегѡ̀ ра́ди верхо́­
вныхъ приво́дитъ, да посре́дьственое
ѿту́ду увѣ́дятъ, раба̀ и влд̃ки. и да
навы́кнутъ, я́кѡ и сме́рти и живота̀
то́й є́сть имѣ́яи вся́ку вла́сть.

В то́йже дн҃ь поуче́ніе ст҃а́гѡ кли́мента,
на преѡбраже́ніе гдс̃не.

Послу́шайте бра́тіе да скажу̀ ва́мъ си́лу
и вели́чество чс̃тна́гѡ сегѡ̀ днѐ, и ка́ко
бл҃га́я во́нь яви́шася. в̾сі́й бо дн҃ь
гдс̃ь на́шь іс҃ъ хрс̃то́съ свои́мъ учн҃кѡ́мъ
ѿкры̀ сла́ву своегѡ̀ бж҃ества̀, пока­
зу́я я́кѡ то́й ѡблада́етъ живы́ми

и ме́ртвыми. мно́гимъ бо ѿнегѡ̀ чю­
десє́мъ бы́вшимъ, не имя́ше єму̀
вѣ́ры, каменосерде́чный ро́дъ июде́й­
скій. ѻ́ви у́бѡ илію̀ глаго́лаху того̀
бы́ти. ині́и же мѡѷсе́я. друзі́и
же ієремі́ю илѝ я́кѡ єди́нъ ѿ дре́внихъ
воста̀. а́ще бы рѣ́ша сн҃ъ бж҃іи бы́лъ
се́й, то̀ небы̀ зако́на мѡѷсе́ѡва раз̾­
руши́лъ и попра́лъ, єго́ же прія́хомъ
ѿ́ бг҃а. но сопроти́венъ є́сть зако́­
ну. Сегѡ̀ ра́ди учн҃цы̀ єгѡ̀ смуща́­
хуся умо́мъ, вѣ́дяху я́кѡ илія̀
на́ нб҃о возше́лъ є́сть, и мѡѷсе́я за­
конода́вца пре́же почи́вша. и сумня́­
хуся, а́ще по и́стинѣ то́й є́сть съ ше́­
дый, и в̾ нашъ о́бразъ ѡболкі́йся, и
распря̀ бѣ̀ в̾ ни́хъ со июде́и. Сегѡ̀
ра́ди потре́бнѡ бѣ̀ показа́ти сла́ву бж҃е­
ства̀ своегѡ̀ учн҃кѡ́мъ, да и ті́и не
смуща́ютъся помышля́ющи су́етная.
И пое́мъ с̾собо́ю петра̀ и ия́кова и іѡ҃а́нна,
извѣ́стнѡ и́мъ творя̀, я́кѡ є́сть сн҃ъ
бж҃іи. и возведѐ и́хъ на́ гору высо́ку
єди́ны, и преѻбрази́ся предъни́ми,
и просвѣти́ся лицѐ єгѡ̀ я́кѡ сл҃нце.
{#л. ѱѯ҃д}

ри́зы же єгѡ̀ бы̑ша бѣлы̀ я́кѡ свѣ́тъ
и сѐ яви́стася и́мъ мѡѷсе́й и иліа̀ сни́мъ
гл҃юща. Гл҃аху же исхо́дъ єгѡ̀ и́же хо­
тя̑ше пострада́ти во ієросали́мѣ. ѻ́въ
бо стра́сть єгѡ̀ провозвѣсту́я. ѻ́въ
же явля́я я́кѡ то́й є́сть законода́вецъ,
и зако́ну испо́лнитель. ѿнего́ же и
дре́вле прія́тъ зако́нъ на горѣ̀ сина́й­
стѣй на скрижа́лѣхъ ка́менныхъ, на­
пи́санъ пе́р̾стомъ о́ч҃имь, си́рѣчь ст҃ы́мь
дх҃омь. и пре́жде бо воплоще́нія, и по
воплоще́ніи то́йже є́сть. єго́же не
разумѣ́въше беззако́нніи июде́и са́ми
преступа́юще зако́нъ, ѡсужа́ютъ законо­
да́вца бес̾пра́вды у́мрети. Не пріи́де
бо разори́ти зако́на, но испо́лнити.
Па́ки же ѡбрати́мъ сло́во на сказа́ніе єѵг̃а́ль­
ское. внегда́ же ви́дѣша бж҃е́ственую сла́ву
єгѡ̀, падо́ша ни́цъ немог̑уще зрѣ́ти,
не стерпи́мыя зарѝ свѣ́тлости лица̀ єгѡ̀.
И а́біе гла́съ бы́сть съ нб҃сѐ гл҃я, се́й
є́сть сн҃ъ мо́й возлю́бленный, ѡ не́мъ
же бл҃гоизво́лихъ, того̀ послу́шайте.
єгда̀ бы́сть гла́съ, ѡбрѣ́теся іс҃ъ
єди́нъ, и ті́и умолко́ша, и никому́же

ничто́же возвѣсти́ша в̾ ты́я днѝ, ѡ
тѣ́хъ, я́же ви́дѣша. показа̀ бо и́мъ
не всѐ соверше́но, но єли́кѡ можа́ху вмѣ­
сти́ти тѣле́сныма очи́ма. ѻ́во ми́луя
и́хъ, ку́пно же и щадя̀, да не ка́кѡ съ
зра́комъ и є́же жи́ти погубя́тъ, и из̾­
вѣсту́я тѣ́мъ воск҃рсе́ніе. Сегѡ̀ ра́ди
мѡѷсе́я ѿ ме́ртвыхъ предъста́ви, илію́
же ѿ живы́хъ. явля́я я́кѡ то́й є́сть
судіа̀ живы́мъ и ме́ртвымъ, и я́кѡ вся̀
воскреси́тъ. изы́дутъ бо речѐ бл҃га́я со­
тво́ршіи в̾ воскр҃ше́ніе живота̀, а сотво́­
ршіи ѕла́я в̾ воскрешеніе суда̀. И а́ще
ме́ртвіи не воста́нутъ, то̀ ни хрс̃то́съ
воста̀. А́ще ли хрс̃то́съ не воста̀, су́е­
тна вѣ́ра ва́ша, тще́ же и на́ше пропо­
вѣ́даніе. Да сѐ слы́шаще бра́тіе, воста́­
немъ я́коже ѿ сна̀ ѿ́ гроба лѣ́ности, и
потщи́мъ ся сохрани́ти за́повѣди бж҃ія,
и угоди́ти єму̀ бл҃ги́ми дѣ́лы, пока́я­
ніемъ и моли́твами и слеза́ми и ми́лосты­
нею, любо́вію и смире́ніемъ. ми́лосты­
нями бо и вѣ́рою ѡчища́ютъ ся грѣсѝ.
любо́вь же и смире́ніе, ѻ́ва бо при́снѡ
воздвиза́етъ на́съ и приво́дитъ къ бг҃у.
{#л. ѱѯ҃е}

ѻ́важе укрѣпля́етъ и соверша́етъ. возлю́­
бимъ дру́гъ дру́га я́коже и хрс̃то́съ возлю­
бѝ на́съ, и предадѐ себѐ заны̀. и на́шегѡ
ра́ди спасе́нія на́гъ на крс̃тѣ̀ пригвожде́нъ
бы́сть, да на́съ ѡблече́тъ во оде́жду не­
тлѣ́нія. и в̾залка́ся и в̾жада́ся, да
на́съ насы́титъ пи́щи вѣ́чныя, и на
пои́тъ водо́ю безъ сме́ртія. Си̑це и
мы̀ сотвори́мъ, а́л̾чныхъ на пита́емъ,
жа́дныхъ напои́мъ, наги́хъ ѡблецє́мъ.
єли́ко бо речѐ сотвори́сте єди́ному ѿ си́хъ,
мнѣ̀ сотвори́сте. и я́кѡ вре́мя сокра­
ще́но є́сть, потщи́мъ ся гото́ви ѡбрѣ­
стися пре́же сме́ртнагѡ днѐ, да не
в̾неза́пу ѡбря́щетъ ны̀ въ ѕло́бѣ и бес̾ по­
кая́нія, и восхи́титъ я́кѡ ле́въ душя̀
на́шя. Во а́дѣ бо речѐ нѣ́сть пока́я­
нія ни исповѣ́данія, нижѐ мо́щнѡ
ми́лостыня сотвори́ти, то́ржищу раз̾­
ше́дъшуся, и свѣщѝ на́ши уга́снутъ
я́кѡ безъ ма́слены. Блюдѣ́те бо речѐ,
да некогда̀ ѡтягча́ютъ сердца̀ ва́шя.
И па́ки, бди́те и моли́теся, я́кѡ не
вѣ́сте днѐ и часа̀. И кто̀ у́бѡ є́сть
речѐ вѣ́рный и му́дрый ра́бъ, и про́чая.

и па́ки бл҃же́нъ ра́бъ тои, єго́же при­
ше́дъ гдс̃ь ѡбря́щетъ творя́ща та́кѡ,
и про́чая. А́ще ли рече́тъ ѕлы́й ра́бъ
то́й въ се́рдцы свое́мъ, ме́длитъ гдс̃нъ
мо́й пріитѝ, и про́чая стра́шнѣйша.
Сегѡ̀ ра́ди потщи́мъся пре́же сме́ртнагѡ
днѐ гото́ви ѡбрѣсти́ся, и получи́ти
ча́сти ми́лостивыхъ и спаса́емыхъ. да
и к̾на́мъ рече́тъ гдс̃ь, бл҃гі́й ра́бе вѣ́рный,
в̾ма́лѣ бы́сть вѣ́ренъ надъ мно́гими тя̀
поста́влю вни́ди в̾ ра́дость гдс̃а своегѡ̀.
єму́ же сла́ва, ны́нѣ и при́снѡ
и во́ вѣки вѣкѡ́мъ.
{#л. ѱѯ҃ѕ}

<<--- 08aug/07.htm>>>

Мцс̃а того́же въ з҃, дн҃ь. па́мять ст҃а́гѡ
прпд̃бному́ченика дометіа́на персяни́на и
двою̀ учн҃къ єгѡ̀, бл҃гословѝ о́ч҃е.

Се́й бя̑ше во времена̀ вели́кагѡ цр҃я̀ кон̾­
стянти́на, пе́рсянинъ ро́домъ. на­
ста́вленъ же бы́сть ава́ромъ нѣ́кимъ хри­
стіани́номъ, ѡ христія́ньствѣ извѣ́­
стовавшу єму̀. и из̾ ѡста́вль ѻте́че­
ское нече́стіе, и сро́дную любо́вь, до́йде
к̾ предѣ́лѡмъ гре́ческимъ и пе́рсьскимъ,
во́ градъ глаго́лемый нисиві́а. и в̾ ше́дъ
{#л. ѱѯ҃ѕ}

в̾ монасты́рь прія́тъ ст҃о́е кр҃ще́ніе, нало­
жи́въ на ся̀ мни́шескій о́бразъ. показа́въ
же вся́ко тща́ніе и по́стъ. за́вистію же и
навѣ́томъ лука́вагѡ бѣ́са, возненави́дѣнъ
бы́сть ѿта́мѡ су́щихъ мни̑хъ, бѣжа̀ ѿту́­
ду, и до́йде въ монасты́рь ст҃ы́хъ мч҃нкъ
се́ргіа и ва́кха, в̾ ѳео́досіевъ гра́дъ, и по­
слѣ́дъствоваше житію̀ архи́марита нурве́ла.
єго́же глаго́лютъ за шестьдеся́тъ лѣ́тъ ва­
ре́нія не вкуси́въ, нижѐ лещѝ, нижѐ сѣ́­
сти, но на тоя́гу {*по́сохъ} налега́я, соверша́ше єсте́­
ственыя ну́жды. и́же ѿ него̀ свидѣ́тель­
ствованъ, поста́вленъ бы́сть діа́конъ.
Хотя́щу же архи́мариту того̀ пону́дити
на сщ҃е́ньство, и сѐ увѣ́дѣвъ ст҃ы́й
дометіа́нъ ѿи́де, и на нѣ́кую го́ру въ­
ше́дъ, ва́ромъ сл҃нечнымъ и сту́денію, и
вся́кія быва́ющія ѕло́бы терпя̀. Та́же
в̾ нѣ́кій в̾ рукотворе́ный верте́пъ в̾ни̑де,
и та́мѡ нѣ́коликѡ вре́мя пребы́въ,
мно́гая чюдеса̀ хрс̃то́вымъ и́менемъ к̾не­
му̀ приходя́щимъ подава́ше, и ѿ и́доль­
скія пре́лести къ хрс̃то́вѣ вѣ́рѣ приводя́­
ше. прише́дъшу же та́мѡ іуліа́ну, и
я́же ѡ не́мъ увѣ́дѣвъ престу́пникъ,

повелѣ̀ того̀ ка́меніемъ поби́ти. ше́дъ­
ше же по́сланіи, и ѡбрѣто́ша єго̀ со
ученикѝ свои́ми, въ тре́тіи ча́съ пою́ща
пѣ́ніе. и ка́меніемъ ча́стѡ нани́хъ па́дъ­
ше поби́ша и́хъ. Соверша́етъжеся собѡ́ръ
и́хъ во ст҃ѣ́мъ єгѡ̀ муче́ніи, су́щемъ
ѡбо́нъ по́лъ воустіа́нѣхъ.

Вто́йже дн҃ь сло́во іѡ҃а́нна златоу́стагѡ,
я́кѡ потре́бны су̑ть напа́сти. и я́кѡ
не при́снѡ на́мъ бѣ́съ ѕло́бы вино́венъ
быва́етъ.

Є́же бо чюде́сно, сіѐ є́сть, я́кѡ не то́кмѡ
мня́щымися бы́ти къ извѣ́стію, но
и съ проти́вными, вся̀ ѡ на́съ быва́ютъ.
и да навы́кнеши, смотрѝ ѿсю́ду. По­
велѣ̀ фараѡ́нъ в̾верга́емѡмъ бы́ти въ
рѣку̀ младе́нцємъ. и а́ще не в̾верга́е­
ми бы́ли бы младе́нцы, и повелѣ́ніе фара­
ѡ́ново не́ было бы, не бы̀ сохране́нъ бы́лъ
мѡѷсе́й, не бы̀ въ ца́рьскихъ пола́тахъ
воспита́въся. и єгда̀ соблюда́шеся, не бѣ̀
въ честѝ. єгда́ же изве́рженъ бы́въ,
тогда̀ въ честѝ бѣ̀. Сіе́ же творя̑ше
бг҃ъ, из̾ѡби́ліе си́лы своея̀, и удо́бь
хи́тростное показу́я. Преща́ше єму̀
{#л. ѱѯ҃з}

июде́анинъ глаго́ля, єда̀ уби́ти мя ты̀
хо́щеши; и сіѐ єго̀ по́льзова. Тѣ́мъ
же по смотре́нію сіѐ бы́сть, да́же видѣ́ніе
єму̀ о́но ви́дѣти є́же в̾ пусты́ни. да́же
подоба́ющему вре́мени испо́лнитися. да́же
єму̀ филосо́фствовати в̾ пусты́ни, и во
извѣ́стіи жи́ти. и во всѣ́хъ я́же на́нь
ѿ июдє́и навѣ́тєхъ, то́жде быва́етъ.
тогда̀ свѣтлѣ́йшіи устроева́етъся, єгда̀
проти́ву єму̀ воста́ютъ, яково́же, и при
ааро́нѣ. воста́ша на́нь, и свѣтлѣ́йша
єго̀ сотвори́ша. ѿсю́ду бо єму̀ и ст҃и́­
тельская испещре́нна быва́етъ оде́жда, и
кида́рь возложе́нъ є́сть, и про́чее по́чину
оде́жды украшеніе, да́же не сумни́тельной
бы́ти хирото́ніи. да́же и въ про́чемъ чюди́­
му бы́ти, ѿ *бля́хъ {**пета́лѡв̾ ¬ илѝ ¬ до́скъ} мѣ́дяныхъ. вѣ́сте
илѝ вся́кѡ я́коже мню̀ історі́ю сію̀. Тѣ́мъ
же и претека́ю по́вѣсть. И а́ще хо́ще­
те, па́ки свы́ше на та́яжде да пріи́демъ.
Ка́инъ бра́та уби́въ, но си́мь ѻ́бразомь
па́че по́льзова. Послу́шай бо что̀ глаго́­
летъ; гла́съ кро́ве бра́та твоегѡ̀ вопіе́тъ
ко мнѣ̀. И па́ки и́ндѣ. кро́вію речѐ,
лу́чше глаго́лющею над̃ а́веля. свободѝ ѝ

ѿ не явле́нія бу́дущагѡ, м̾зду̀ возра­
стѝ. Любвѝ научи́хомъ ся всѝ, ю́же бг҃ъ
имя́ше к̾ нему̀. Чи́мъ бо ѡби́дѣнъ
бы́въ, пріе́мый въ ско́рѣ кончи́ну; Ни­
чи́мъ же. Что́ бо, рцы́ ми, и́же ко́снѣе
умира́юще при ѡбрѣта́ютъ; Ничто́ же.
ниже́ бо ѿ є́же мно́гая жи́ти лѣ́та, илѝ
ма́лая, є́сть бл҃же́ньство. но ѿ є́же
въ потре́бное дѣ́йствовати живото́мъ.
Тріѐ ѻ́троцы, в̾ве́ржени бы̑ша в̾пе́щь,
и сегѡ̀ ра́ди свѣтлѣ́йши бы̑ша. Даніи́лъ
же в̾ ро́въ, и ѿту́ду па́че яснѣ́йшъ у­
стро́ися. Ви́диши ли вездѣ̀ напа́сти
вели́кая ражда́ющихъ бл҃га́я, и здѣ̀,
а не то́кмѡ та́мѡ; въ ѕло́бѣ же то́жде
быва́етъ, яково́же, а́ще кто̀ тро́сть
имѣ́я ѡполча́лъ бы ся проти́ву огне́ви,
таковы́й бо, мни́тъ ся у́бѡ ураня́ти
ѻ́гнь, но того̀ свѣтлѣ́йша твори́тъ,
себе́ же изнуря́етъ. Пи́ща бо быва́етъ
ѕло́ба, и вина̀ свѣ́тлости добродѣ́тели.
не пра́вдованіемъ бо в̾ потре́бное бг҃у дѣ́й­
ствующу, на́ша сія́ютъ па́че. Па́ки,
дія́волъ єгда̀ содѣ́ловаетъ что̀ таково̀,
свѣтлѣ́йшихъ твори́тъ претерпѣ́вающихъ.
{#л. ѱѯ҃и}

и почто̀, речѐ, ѡ ада́мѣ не бы́сть что̀ тако­
во̀, но безчес́тнѣйшъ бы́сть; на ипа́че
у́бѡ, и о́ному бг҃ъ в̾ потре́бное дѣ́йствова­
ше. а́ще же нѣ́гдѣ что̀ пострада̀, са́мъ себѐ
оби́дѣлъ є́сть. я́же бо ѿ други́хъ проти́­
ву на́мъ быва́емая, вели́кихъ на́мъ бл҃ги́хъ
вино́вна быва́ютъ. а я́же ѡна́съ самѣ́хъ,
не ктому̀. поне́же бо, оби́дими у́бѡ ѿ
други́хъ болѣ́знуемъ, ѿ на́съ же самѣ́хъ
не ктому̀, показу́етъ бг҃ъ, я́кѡ и́же
у́бѡ ѿ друга́гѡ не пра́веднѣ стражда̀, бл҃го­
слове́нъ быва́етъ. а и́же са́мъ себѐ оби́­
дяи, са́мъ ся врежда́етъ. и па́че в̾ лѣ­
поту̀, да́же о́ное у́бѡ до́блественнѣ те­
рпи́мъ, сіе́ же не ктому̀. и́накоже, всѐ
та́мѡ ада́мово бы́сть. По что́ бо послу́­
шалъ єсѝ жены̀; По что́ бо проти́вная
совѣ́тующую, не ѿрази́лъ єсѝ; Ты̀
весма̀ вино́венъ бы́лъ єсѝ. єльма̀ а́ще
дія́волъ бы́лъ бы, подоба́ше по сему̀
искушя́емымъ всѣ́мъ погиба́ти. а́ще
же не погиба́ютъ, ѿ на́съ вина̀. Но по­
доба́ше, речѐ, всѣ́мъ напа́ствуемымъ,
испра́вленѡмъ бы́ти. илѝ а́ще ѿ на́съ
вина̀, подоба́ше и кромѣ̀ дія́вола погиба́ти.

сіѐ и быва́етъ. и́бо мнѡ́зи и кромѣ̀ діа́­
вола погиба́ютъ. небо̀ вся̀ то́й устрое­
ва́етъ, но мнѡ́гая и ѿ са́могѡ на́шегѡ бы­
ва́ютъ гну́сства. а́ще же нѣ́гдѣ и о́ный
вино́венъ, на́мъ нача́ло подаю́щимъ.
рцы́ бо ми, когда̀ возмо́же дія́волъ надъ
ию́дою; єгда̀ вни́де, речѐ, во́нь сатана̀.
Но послуша́и ѡ винѣ̀, я́кѡ та́ть бѣ̀ и
влага́емая ноша́ше. са́мъ то́й дадѐ єму̀
мѣ́сто простра́ннѡ в̾хо́да. Тѣ́мъ же не
дія́волъ нача́ло в̾лага́етъ, но мы̀ того̀
пріе́млемъ и призыва́емъ. но а́ще не о́нъ
речѐ бы́лъ бы, небы̀ ве́лія была̀ лю́тая,
но не ѿрече́нна на́мъ хотя̑ше бы́ти му̑ка.
ны́нѣ бо, возлю́блєнне, я́же су̑ть муче́­
нія, кротча́йша на́мъ су̑ть. а́ще же
са́ми собо́ю содѣ́яли бы́хомъ лю́тая, не
с̾терпи́мо бы́ло бы томле́ніе. рцы́ бо
ми, а́ще сія̀, я́же согрѣшѝ ада́мъ,
кромѣ̀ совѣ́та согрѣши́лъ бы, кто́ бы єго̀
восхи́тилъ ѿ бѣ́дъ; но небы̀ согрѣши́лъ,
речѐ. ѿку́ду ми сіѐ глаго́леши; И́же бо
си́це сла́бъ и уны́лъ, и к̾ безу́мію го­
то́въ, я́коже прія́ти сицевы́й совѣ́тъ,
мнѡ́го па́че и кромѣ̀ сегѡ̀, сіѐ бы́ло бы.
{#л. ѱѯ҃ѳ}

кі́й бо дія́волъ бра́тіи іѡ́сифовыхъ къ
за́висти приведѐ; тѣ́мъ же а́ще тре­
зви́мъся, возлю́бленніи, и бл҃гоиску́с­
ства на́мъ вино́венъ дія́волъ быва́етъ.
Что́ бо повредѝ і́ѡва толи́кое єгѡ̀ ѕло­
ко́зньство; Да не глаго́леши, речѐ, сего̀,
но не́мощный врежда́етъся. Но не́мощь­
ный, а́ще и дія́волъ не бу́детъ, врежда́етъ­
ся. но бо́льше, речѐ, со о́нагѡ дѣ́й­
ствомъ; Но ме́нше, єгда̀ со о́нагѡ дѣ́й­
ствомъ согрѣши́въ, му́читъся. небо̀
всѣ́хъ согрѣше́ніи та́яжде томле́нія. да
не прельща́емъ себѐ, нѣ́сть на́мъ дія́­
волъ вино́венъ, а́ще трезви́мъся. ѻ́нъ
на́съ па́че возбужда́етъ, ѻ́нъ на́съ воздви­
за́етъ. рцы́ бо ми пре́жде сія̀ да истя́­
жемъ, да не бу́дутъ ѕвѣ́ріе, да не бу́дутъ
ѕлорастворе́нія возду́хѡвъ, ни неду́ги,
ни ско́рби, ни ту́ги серде́чныя, ни друго́е
что̀ ѿ таковы́хъ. Что̀ небы̀ содѣ́лалъ чело­
вѣ́къ; Свинія̀ па́че, не́жели человѣ́къ,
мни́тъмися, бы́лъ бы, ѡбъяда́яся и упи­
ва́яся, и ни ѿ єди́нагоже си̑хъ стужа́емъ.
ны́нѣ же, попече́нія и печа́ли, ѡбу­
че́ніемъ су̑ть филосо́фіи и учи́лищємъ,

и приведе́ніемъ къ наказа́нію изря́дному.
смотри́же и и́накѡ. да пита́етъся кто̀
въ дворѣ́хъ ца́рьскихъ, нижѐ скорбя̀
чи́мъ, нижѐ троску имѣ́я, нижѐ
пекі́йся, и нижѐ гнѣ́ва имѣ́я вы́ну,
нижѐ не получе́нія. но вся̀, я́же а́ще
жела́етъ, да твори́тъ, и да получа́етъ,
и всѣ́хъ да и́мать послу́шающихъ. а́ще
не вся́каго ѕвѣ́ря без̾слове́снѣишъ бу́­
детъ таковы́й; ны́нѣ же, я́коже ѻсла̀
су̑ть ве́щи ѡбъстоя́ніи и скорбє́й, исти­
ра́ющи на́съ. Сегѡ̀ ра́ди ѿ богатѣ́ю­
щихъ ни́щіи, мно́жайше су̑ть разу́­
мнѣйшіи. а́ки мнѡ́гими ѻ́крестъ при­
ража́еми и понуря́еми волна́ми. и́бо
тѣ́ло, пра́здное у́бѡ и недви́жимо
собо́ю, болѣ́знено и ме́рзостно є́сть.
дви́жащеєжеся и тружда́ющеєся и ѡѕло­
бля́емое, краснѣ́йшее є́сть и здра́вѣй­
шее. сіе́же и въ дш҃и ѡбрѣ́лъ бы кто̀.
и желѣ́зо лежа́щее у́бѡ растлѣва́етъ,
дѣ́лаемое же сія́етъ. и дш҃а̀ та́кожде
дви́жима. движе́ніе же дш҃е́вное, сама̀ та̀
ѡбъстоя́нія, и хи́трости погиба́ютъ,
не дви́жимой су́щи дш҃и. дви́жима же
{#л. ѱо҃}

быва́етъ, єгда̀ не вся̀ пра́ва бу́дутъ.
дви́жетъ бо ся ѿ сопроти́вныхъ. и а́ще
бы не была̀ сопроти́вная, ничто́ же бы́ло
бы дви́жущее. яково́же, а́ще вся̀ была́
бы до́брѣ содѣ́ланна, не бы̀ ѡбрѣла̀ хи́­
трость дви́жима бы́ти. Си́це и а́ще вся̀
была́ бы по мы́сли на́мъ, не бы̀ ѡбрѣ́ла
дш҃а̀ дви́жима бы́ти. а́ще вездѣ̀ держа̀
на была́ бы, не сладка̀ была́ бы. Не зри́­
ши ли, я́кѡ и дои́лицамъ повелѣва́емъ
не всегда̀ носи́ти дѣтє́й, да́же не въ обы́­
чай та̀ устроева́ти, нижѐ не́мощна та̀
твори́ти; Сегѡ̀ ра́ди я́же предъ очи́ма
воспитова́емая роди́телєй, немощнѣ́иша
быва́ютъ, щадѣ́нію без̾вре́менному же
и безмѣ́рному растлѣва́ющу тѣ́хъ здра́­
віе. Добро̀ и ско́рбь помѣ́рѣ быва́ющая.
добро̀ и печа́ль. добро̀ и ску́дость. крѣ́­
пкихъ бо на́съ твори́тъ, добра̀ и сопро­
ти́вная. Ко́еждо бо ѿ си́хъ без̾мѣ́ры
быва́емое, погубля́етъ. и о́во у́бѡ раз̾­
слабѣва́етъ. о́во же растерза́етъ. не
зри́ши ли, я́кѡ и учн҃кѝ своя̀ хрс̃то́съ,
си̑це наставля́етъ; А́ще же ѻнѝ си́хъ
тре́боваху, мнѡ́го па́че мы̀. а́ще же

тре́буемъ, да не негоду́емъ, но да и ра́­
дуемъ ся в̾ печа́лѣхъ. лѣчьбы́ бо сія̀
су̑ть, прили́чныя на́шимъ ра́намъ. о́ва
у́бѡ го́рка, о́ва же сла́дка. ко́ждоже
ѿ си́хъ ѡ себѣ̀ са́мо, непотре́бно бы́ло бы.
Тѣ́мъже бл҃года́ть да и́мамы бг҃у ѡси́хъ
всѣ́хъ. небо̀ простѣ си́мъ попуща́етъ
быва́ти, но ѡ поле́зномъ ду́шъ на́шихъ.
Тѣ́мъже на́ше бл҃года́рьство показу́юще,
да бл҃годари́мъ, да сла́вимъ, до́блественнѣ
да держи́мъся, привре́менное тѣ́хъ по­
мышля́юще. на бу́дущая же простира́ю­
ще свою̀ мы́сль, да и настоя́щая до́бле­
ственнѣ понесе́мъ, и бу́дущихъ получи́ти
бл҃гъ да сподо́бимъя, бл҃года́тію гдс̃а
на́шегѡ іс҃а хрс̃та̀, єму́же сла́ва,
и держа́ва, во́ вѣки
вѣкѡ́мъ.
{#л. ѱо҃а}

<<--- 08aug/08.htm>>>

Мцс̃а тогѡ́же въ и҃, дн҃ь. и́же во ст҃ы́хъ
оц҃а̀ на́шегѡ ємеліа́на исповѣ́дникаєпкс̃па
ки́зическагѡ, бл҃гословѝ о́ч҃е.

Ємеліа́нъ иповѣ́дникъ хрс̃то́въ, бы́сть въ
ца́рьство льва̀ иконобо́рца, єпкс̃пъ сы́й ки́­
зическій. и мно́гажды ну́женъ бы́сть
ѿврещи́ся поклоне́нія чс̃тны́хъ и ст҃ы́хъ
икѡ́нъ, и непокори́ся, но пребыва́ше во испра­
вле́ніи ст҃ы́хъ оц҃ъ, и мнѡ́га ѡѕлобле́нія
и заточе́нія претерпѣ̀. ра́дуяся в̾ку́пѣ и
поспѣшеству́я, є́же бы вре́менныхъ ра́ди
скорбє́й вѣ́чная прія́ти бл҃га́я. и та́кѡ
у́бѡ в̾тѣ́хъ потружа́въся ѡѕлобле́ніихъ,
в̾ заточе́ніи почѝ ѡ́гдс̃ѣ, и вѣнце́мъ
исповѣ́данія увязе́ся.

Вто́й же де́нь па́мять ст҃а́гѡ мирѡ́на
чюдотво́рца, єпкс̃па кри́т̾скагѡ.

Се́й роди́ся в̾лаврикі́йстѣмъ гра́дѣ, и́же
в̾ кри́тѣ бли́зъ кно́са. и ро́дъ сво́й уча̀
бж҃е́ственому бл҃гоче́стію. изънача́ла же
своегѡ̀ житія̀ и жену̀ поя́тъ и зе́млю
дѣ́лаше, и ѿпрозяба́ющихъ плодѡ́въ по­
дава́ше убо́гимъ. єли́коже ѿ плодѡ́въ по­
дава́ше, толи́кѡ гобзя́хуся; ми́лостыня
єму̀ па́че человѣ́къ бя̑ше; глаго́лютъ у́бѡ

ѡ не́мъ, я́кѡ на свое́мъ єму̀ гумнѣ̀ є́мъ­
шу кра́дущихъ мужє́й де́сять, и́же на­
по́лниша вре́тища своя̀ жи̑та, и немогу́ще
подъя́ти; и в̾ мѣ́стѡ є́же бы ра́ны и́мъ
наложи́ти, илѝ ѕло̀ нѣ́кое сотвори́ти, при­
ше́дъ подъима́ше и́мъ бремена̀, и свои́ма
рука́ма возлага́ше и́мъ на ра́мо, и запору­
чи́въ никому̀ ве́щь повѣ́дати. поста́вленъ
же бы́сть презви́теръ во ст҃ѣ́й бж҃е́ственѣй
цр҃кви; пото́мъ по є́же преста́ти гоне́нію,
наєпкс̃пскій прс̃то́лъ возведе́нъ бы́сть, и
мно́гихъ чюдє́съ и си́лъ содѣ́ловавъ. тече́­
ніе рѣкѝ уста́вивъ, зане́же рѣцѣ̀ наводни́в̾­
шися; и нѣ́коему трито́ну и́менемъ хотя́­
щу рѣку̀ преитѝ, не ѡста́ви ст҃ы́й тещѝ ю̀,
доне́лѣже ше́дъ во своя̀; и ѻ́ному преше́дъ­
шу, же́злъ сво́й посла̀. сни́мъже по́сланніи
ше́дъше, и во́ду возмути́въше ѡбрати́ша
рѣку̀ тещѝ путе́мъ свои́мъ. такова́я же
у́бѡ и и́на мно́гая сотвори́въ. и про́чее
житіѐ бг҃олюбе́знѣ и преподо́бнѣ препрово­
ди́въ, и му́ченическія па́мяти свѣ́тлѣ
поче́тъ. и ст҃о́мъ лѣ́томъ бы́въ,
къ гдс̃у ѿи́де;
{#л. ѱо҃в}

Вто́йже дн҃ь сло́во ст҃а́гѡ васи́ліа вели́кагѡ.

Ны́нѣ вре́мя бл҃гопрія́тно речѐ апс̃лъ, ны́­
нѣ де́нь спасе́нія. се́й вѣ́къ покая́нія,
о́нъ воздая́нія. се́й дѣ́ланія, о́нъ м̾здо­
воздая́нія. се́й терпѣ́нія, о́нъ утѣше́­
нія. ны́нѣ помо́щникъ ѡбраща́ющимъся
ѿ путѝ ѕла́гѡ бг҃ъ, тогда́же стра́шенъ и не
премы́слимъ человѣ́ческимъ вещє́мъ же и
глаго́лѡмъ, и помышле́ніемъ истяза́тель.
ны́нѣ долготерпѣ́ніе воспріе́млемъ, тогда́ же
правдосу́діе позна́емъ, єгда̀ воскре́снемъ,
ѻ́ви в̾му́ку вѣ́чную, ѻ́ви же в̾жи́знь вѣ́­
чную, и вопріи́метъ ко́ждо по дѣя́нію єгѡ̀.
к̾ кото́рому вре́мени ѿлага́емъ послуша́ніе
хрс̃то́во, позва́вшаго на́съ въ нбс̃ное єгѡ̀
црс̃твіе. не истрезви́мълися, не в̾зове́мъ
ли себѐ ѿи́же по ѻбы́чаю житія̀ ко ѡпа́ству
єѵг̃а́лія. не ѻчи́мали пріи́мемъ де́нь гдс̃нь
стра́шный о́нъ и ѡбъявле́нный, во́нь­
же и́же у́бѡ к̾ десни́цѣ гдс̃ни, ра́ди дѣя́­
ніи приближа́ющіи ся, црс̃твіе нбс̃ное
вопріи́мемъ. а я́же к̾лѣ́вѣй ра́ди пусто­
ты̀ бл҃ги́хъ д̑ѣлъ ѿри́нутыя, геє́на
о́гненоя и тма̀ вѣ́чная с̾кры́етъ. ту̀
бу́детъ речѐ, пла́чь и скре́жетъ зубѡ́мъ.

мы́ же црс̃твіе у́бѡ нбс̃ное жела́ти гл҃емъ, а
ѡ ни́хъ же є́сть то̀ получи́ти, не пече́мъся.
но ни єди́нуже болѣ́знь ѿ за́повѣди бж҃іи
пріе́млюще, ра́вныхъ че́стєй получи́ти и́же
да́же до сме́рти къ грѣху̀ проти́ву ста́вшим̃,
в̾суетѣ̀ ума̀ на́шегѡ помышля́емъ; кто̀
во́ время сѣ́ятвѣ в̾ дому̀ сѣдя̀ илѝ спя̀,
наста́вши жа́твѣ ло́но испо́лни рукоя́ти;
кто̀ ѡбыма̀ виногра́дъ, и́же не ѿнегѡ̀
насажде́ный и сотворе́ный. ѻ́нѣхъ у́бѡ
су̑ть плоды̀ и́хъ же тру́дѡве; че́сти
и вѣнцы̀, побѣди́вшихъ су̑ть; кто̀
когда̀ вѣнчава́етъ и́же не совле́кшагося къ
сопротивубо́рцу, внегда̀ не побѣди́ти до­
сто́итъ то́кмѡ, но и зако́ннѡ пострада́­
ти по па́влу. се́ же є́сть є́же ни ма́лѡ
у́бѡ ѡста́вити что̀ ѿ заповѣ́данныхъ,
си́це коеждо сотвори́ти я́коже повелѣ́ни
бы́хомъ. бл҃же́нъ бо речѐ ра́бъ о́нъ, єго́
же прише́дъ гдс̃ь ѡбря́щетъ не творя́ща
я́кѡ прилучи́ся, но творя́ща та́кѡ;
и а́ще пра́вѣ у́бѡ принесе́ши, пра́вѣ же не
раздѣли́ши, согрѣши́лъ єсѝ. мы́ же єди́­
ну нѣ́гдѣ ѿ за́повѣдєй сотвори́ти в̾мѣ­
ни́вше, нибо̀ реку̀ я́кѡ сотвори́вше.
{#л. ѱо҃г}

вся́ бо дру́гъ дру́зѣ держа́тъся по здра́во­
му ра́зума сло́ву, я́кѡ в̾ разоре́ніи єди́ныя,
и про́чимъ пону́жди с̾разоря́тися. не
ѡста́вленыхъ гнѣ́въ ѡжида́емъ, но ѡ испра́­
вленѣмъ, я́коже се́й че́сти надѣ́емъся.

Вто́йже дн҃ь сло́во іѡ҃а́нна златоу́стагѡ
ѡ похвалѣ̀ ми́лостивымъ.

Тѣ́мъ во и́стину вели́къ человѣ́къ и че́стенъ
му̑жь ми́лостив̃ ми́лостынябо є́сть єгда̀
с̾любо́вію быва́етъ и до́брымъ изволе́ніемъ,
немнѝ дая̀, но бл҃года́ть пріе́мля, и а́ки при­
ѡбрѣта́я, а не погубля́я; у́не бо не тво­
ри́ти добра̀, не́же ли сотво́рши уныва́ти
на́чнеши. почто̀ скорби́ши человѣ́че. єда̀
у́бѡ не надѣ́ешися воздая́нія ѿ́ бг҃а. во
и́стину мно́жит̾ ся на нб҃сѣ́хъ. но здѣ́ ли
хо́щеши воздая́нія; Почто̀ ѡста́ви ми́­
лостыню; Ми́лостынею ѡчи́стити грѣхѝ,
а не ку́плею. мнѡ́зи бо здѣ̀ воспрія́ша,
но воспріе́мшихъ здѣ̀ не блажи́тъ писа́ніе,
лише́ни бо м̾зды̀ о́ноя, здѣ́ бо всѝ ра́дуют̾­
ся воспрія́тію. хрс̃то́съ же не такову̀ та́мѡ
воздае́тъ бл҃года́ть, но я́кѡ и пострада́в̾­
шимъ занего̀ до́ крове. єму́ же сла́ва,
ны́нѣ и при́снѡ и во́вѣки вѣкѡ́мъ.

<<--- 08aug/09.htm>>>

Мцс̃а того́же въ ѳ҃, дн҃ь. ст҃а́гѡ апс̃ла
матѳе́я, бл҃гословѝ о́ч҃е.

То́й ст҃ы́й апс̃лъ матѳе́й бѣ̀ єди́нъ ѿседми́­
десять учн҃къ хрс̃то́выхъ, и́же и при­
чте́нъ бѣ̀ ко єди́ному на́десяте апс̃лѡмъ,
во ию́ды мѣ́стѡ искаріо́т̾скагѡ. пропо­
вѣ́да єѵг̃а́ліе вовнѣ́шнеи єфіѡ́піи. и
мнѡ́го ѿ ни́хъ томле́нъ бы́въ, и мнѡ́ги пре­
терпѣ́въ му́ки; ѻвогда̀ влачимь бѣ̀ и
біе́нъ и стру́жемь и пожига́емь, ѡклеве­
та́емь и уничижа́емь, ѻба́че укрѣпля́ющу
єго̀ хрс̃ту̀, с̾ра́достію му́ки пріима́ше и
терпя́ше. и с̾ ми́ромъ у́спе ѡ́гдс̃ѣ, в̾ ру́­
цѣ бг҃у дш҃ю свою̀ предадѐ. воспріи́мъ црс̃тво
угото́ванное єму̀ ѿ сложе́нія ми́ра.

Вто́йже де́нь ст҃а́гѡ мч҃нка анто́нія.

То́й бѣ̀ алеѯа́ндрянинъ ро́домъ бл҃говѣ́­
ренъ и боя́ся бг҃а. я́тъ же бы́въ и приве­
де́нъ ко́ княѕю, и вопроше́нъ бы́въ,
и исповѣ́да себѐ хрс̃тіа́на су̑ща, и хрс̃та̀
и́стиннаго бг҃а со дерзнове́ніемъ проповѣ́­
да. тѣ́мъ же и на́древѣ повѣ́шенъ и
стро́ганъ бы́сть, и не ѿве́ржеся, но со­
противля́шеся и терпя́ше въ му́кахъ.
тѣ́мъ и огне́мъ коне́цъ воспрія́тъ.
{#л. ѱо҃д}

и предъстоя́щыя уча́ше си́це. бра́тіе
моя̀ возлю́бленная, не всегда̀ тѣ́лу
рабо́тайте, но па́че душѝ. и помина́й­
те я́кѡ ѿ́ бг҃а ва́мъ дана̀ є́сть, и
сро́дна є́сть разу́мнымъ и бж҃е́ственымъ
си́ламъ, да ту̀ чи́сту влд̃цѣ принесе́мъ.
Сконча́ же ся ст҃ы́й, и ѡбрѣ́тенъ бы́сть
посредѝ огня̀, ника́коже вреже́нъ.

Вто́йже дн҃ь па́мять ст҃ы́хъ мч҃нкъ, и́же
ст҃ы́я ра́ди ико́ны гдс̃а бг҃а и сп҃са на́шегѡ
іс҃а хрс̃та̀, пострада́вшихъ въ цр҃ѣ гра́дѣ
в̾ мѣ́дныхъ вратѣ́хъ.

Сі́и ст҃і́и бя́ху при львѣ̀ ѕвѣроимени́т̾­
нѣмъ царѣ̀, и́же ѿвраща́яся бя̑ше
ст҃ыхъ икѡ́нъ, и огне́мъ тѣ́хъ с̾жи­
га́ше. за и́хъ же и бл҃же́нный ге́рманъ
патріа́рхъ мнѡ́ги ско́рби подъя́тъ, ѡбли­
ча́я нечести́ваго без̾зако́нника. тѣ́мъ
и пречс̃тую ико́ну гдс̃а бг҃а и сп҃са на́шегѡ
іс҃а хрс̃та̀, что́мую на мѣ́дныхъ вра­
тѣ́хъ, и́же и *с̾бори́ти {**низ̾ло­жи́ти} ю̀ хотя̀. и у́же
лѣ́ствицамъ гото́вящимъ ся, и высо́­
кая древеса̀ воскланя́хуся и слуга́мъ по
лѣ́ствицамъ в̾ ше́дшимъ, и дѣ́лу каса́ющим̃­
ся. Тогда́ же дости́гъше до́бліи сіѝ,

и єди́ну ѿ лѣ́ствицъ то́рг̾ше, и къ сѐ
бѣ̀ привле́кше, низложи́теля спафа́ріа
до́лу низъве́ргше и сме́рти преда́шя, и
нечести́ваго царя̀ кля́твами прокля́шя.
ца́рь же такова́я увѣ́дѣвъ, и я́рости
испо́лнься, повелѣ̀ єли́цы та́мѡ сте­
ко́шася, мече́мъ посѣщѝ. и́хъже число̀
то́чію єди́нъ гдс̃ь вѣ́сть. То́чію же
девятѝ же́ѕліємъ би́ти, и в̾ темни́цу
во врещѝ, повелѣ̀ на вся́кій де́нь по пятѝ
сѡ̑тъ ра́нъ дая́ти и́мъ. и та́кѡ пре­
терпѣ́шя томи́ми за о́смь мѣ́сецъ. да
я́кѡ ви́дѣ и́хъ терпя́щихъ, повелѣ̀ раз̾­
жещѝ рожны̀ желѣ́зны и съжещѝ лица̀
и́хъ. та́ же на лови́щи мече́мъ по би́ти
и́хъ, со ст҃о́ю ма́ріею патрикі́ею, и
поврещѝ тѣлеса̀ и́хъ в̾ пучи́ну.

Вто́йже де́нь сло́во ст҃а́гѡ васи́ліа
вели́кагѡ.

И́же ѿ десяти́хъ тала́нтъ пре́данъ, и
єди́нъ нѣ́гдѣ илѝ два̀ удержа́вый,
про́чая же ѿда́въ, не бл҃горазу́менъ
ра́ди ѿдая́нія мнѡ́жайшихъ позна­
ва́етъся. но не пра́веденъ и лихои́мецъ
ѡ малѣ́йшихъ лише́ніи ѡблича́етъ ся.
{#л. ѱо҃е}

что́же глаго́лю ѡ лише́ніи; внегда̀ и́же
єди́нъ тала́нтъ в̾вѣ́реный. та́ же ѿ­
да́въ ѻ́но са́мое соверше́нно и цѣ́ло є́же
прія́лъ бѣ̀, занѐ не притяжа̀ к̾да́но­
му, ѡсужда́етъся; и́же де́сять лѣ́тъ
ѻц҃а почты́й, єди́ну же я́зву по́слѣ­
жде возложи́въ єму̀ то́чію, не я́кѡ
бл҃года́тель почита́етъся, но я́кѡ ѻтце­
убі́йца ѡсужда́етъся; ше́дъше у́бѡ
речѐ гдс̃ь, научи́те вся̀ язы́ки, уча́­
ще и́хъ, не ѻ́ва у́бѡ блюстѝ, ѡ ѻ́вѣхъ
же не ради́ти, но блюстѝ вся̀ єли́ка за­
повѣ́дахъ ва́мъ. И апс̃лъ послѣ́дованнѣ
пи́шетъ, ни єди́ного же ни в̾чесо́мъ же даю́­
ще претыка́ніе, я́кѡ да непоро́чно бу́­
детъ служе́ніе; но вовсе́мъ составля́ю­
ще себѐ я́кѡ бж҃ія слугѝ. А́ще бо не
вся̀ на́мъ ко спасе́нія ра́зуму ну́ждна
бы̑ша, нижѐ на пи́саны бы́ли бы́ша вся̀
за́повѣди, нижѐ вся̀ храни́мы бы́ти
рече́нны бы̑ша; Что́ ми по́льза ѿ
и́нѣхъ исправле́ніи, а́ще хощу̀ уро́да
наре́къ бра́та пови́ненъ бы́ти геє́ннѣ;
что́ же по́льза и́же ѡп̃ мно́гихъ свобо́­
ды, и́же ѿєди́наго держи́му в̾ рабо́ту.

творя́и бо речѐ грѣ́хъ, ра́бъ є́сть грѣху̀;
что́же ли прибы́токъ ѿ мнѡ́гихъ безъстра́­
стія, и́же єди́ною стра́стію растлѣва́ю­
щему тѣ́ло. да у́бѡ речѐ мнѡ́жествія
хрс̃тія́ньская не храня́ща вся̀ за́повѣди,
безъуспѣ́ха ли и́мутъ хране́ніе; к̾сему̀
бл҃же́ннаго петра̀ воспомяну́ти добро̀, и́же
потоли́цѣхъ у́бѡ исправле́ніихъ, таковѣ́хъ
же бл҃же́ньствіихъ, ѡ єди́номъ то́кмѡ слы́­
шащу. а́ще не умы́ю тебѐ, не и́маши ча́­
сти со мно́ю. ѡставля́ю глаго́лати я́кѡ
нижѐ о́но са́мое, разлѣне́нія и преобидѣ́­
нія имя́ше указа́ніе, но че́сти и бл҃го­
говѣ́иньства явле́ніе. но у́бѡ єгда̀ рече́тъ
кто̀. пи́сано є́сть, вся́къ и́же а́ще призо­
ве́тъ и́мя гдс̃не, спасе́тъся; Тѣ́мъже
довлѣ́етъ и са́мое призыва́ніе и́мене гдс̃ня
спастѝ призыва́ющаго; но да слы́шитъ и
то́й апс̃ла гл҃юща, ка́кѡ у́бѡ призову́тъ,
в̾него́же невѣ́роваша; А́ще ли вѣ́руеши,
слы́ши гдс̃а зову́ща. не вся́къ глаго́ляи
ми, гдс̃и гдс̃и, вни́детъ въ црс̃тво нбс̃ное;
но творя́и во́лю оц҃а̀ моегѡ̀, и́же є́сть на́
нб҃сѣ́хъ, идѣ́же и во́лю бж҃ію дѣ́лаяи.
и не я́коже хо́щетъ бг҃ъ, нижѐ в̾ ра́зумѣ
{#л. ѱо҃ѕ}

ю́же къ бг҃у любо́вь сію̀ творя̀, не
успѣ́шнѡ и́мать и́же ѡ се́й тща́ніе.
по гла́су самогѡ̀ гдс̃а ре́кшаго, я́кѡ тво­
ря́тъ за є́же ви́дѣтися ѿ человѣ́къ,
ами́нь гл҃ю ва́мъ, я́кѡ вопріе́млютъ
м̾зду̀ свою̀.

Вто́йже де́нь поуче́ніе ка́кѡ подоба́етъ
дѣ́темъ чти́ти родителя своя̀.

Послу́шайте бра́тіе за́повѣди гдс̃ни, є́же
речѐ къ зако́ннику. сія̀ є́сть пе́рвая
за́повѣдь вели́кая; да лю́биши оц҃а
своего̀ и ма́терь, да бл҃го тебѣ̀ бу́детъ,
и бу́деши долголѣ́тенъ на землѝ. и́же
бо чте́тъ роди́теля своя̀ и слу́шаетъ по­
велѣ́нія єю̀, се́й ѡчи́ститъ грѣхѝ своя̀,
и ѿ́ бг҃а просла́витъся. а́ще кто̀ ѡѕло́­
битъ роди́теля своя̀, се́й пре́дъбг҃омъ
грѣши́лъ, и ѿ людє́й про́клятъ. и́же
біе́тъ оц҃а̀ илѝ ма́терь, ѿ цр҃кви да ѿлу­
чи́тъся, и сме́ртію да у́мретъ. Пи́сано
бо є́сть, о́ч҃а кля́тва, не покорли́ва сы́на
суши́тъ, а ма́терня искорени́тъ. сы́нъ
бо речѐ не покори́въ, в̾ па́губу бу́детъ.
и́же бо гнѣви́тъ отца̀, илѝ досажда́етъ
ма́тери, и мни́тъся не согрѣша́я бг҃у,

се́й соѻ́б̾щникъ є́сть нечести́вымъ. ѡ ни́хъ
же речѐ иса́ія, да во́зметъся нечести́вый
и не у́зритъ сла́вы гдс̃ни. И па́ки, о́ко
намиза́ющееся отцу̀, и укоря́ющагѡ ста́­
рость ма́терню, да исклюю́тъ вра́нове, и
ско́рѡ изъяде́нъ бу́детъ орлы̀. Чтя́и
ѿца̀, возвесели́тъся ѡ ча́дѣхъ, и въ де́нь
печа́ли изба́витъ єго̀ гдс̃ь, и моли́тву єгѡ̀
пода́стъ єму̀. Послу́шаяи бг҃а, поко́итъ
ма́терь свою̀ до́брѣ. Угожа́яи своему̀
ѿцу̀, мнѡ́го в̾ бл҃ги́хъ пожи́ветъ. Тѣ́мъ
же бра́тіе, дѣ́ломъ и сло́вомъ угожа́йте
роди́телємъ, да на́йдетъ на вы̀ бл҃гослове́­
ніе ѿ ни́хъ. Бл҃гослове́ніе бо о́тчее утве­
ржа́етъ до́мы ча́домъ, и моли́тва ма́терня
спасе́тъ ѿ напа́сти. Бра́тіе заступа́йте
ста́рость отца̀ ва́шегѡ, а́ще и ѡскудѣ́етъ
ра́зумомъ, не бес̾че́ствуйте єго̀ въ се́рдцы
свое́мъ. Ми́луй ѿца̀, моли́тва о́ч҃а не
забу́детъся предъбг҃омъ. и не забыва́йте
труда̀ ма́терня, я́же ѡ ча́дѣхъ печа́ль и
болѣ́знь. Не глаго́ли у́же мнѡ́го сотво­
ри́хъ и́мъ ѡде́жею и пи́щею, но не мо́жеши
и́хъ роди́ти, и та́кѡ ѡ ни́хъ болѣ́ти я́ко
же онѝ ѡ тебѣ̀. Тѣ́мъ же со́ страхомъ
{#л. ѱо҃з}

и раболѣ́пно служи́те и́ма, да здѣ̀ до́брѣ
пожи́вете, и в̾ бу́дущемъ вѣ́цѣ
наслади́теся. бг҃у на́шему
сла́ва, ны́нѣ и при́снѡ
и во́вѣки вѣкѡ́мъ.