Мцс̃а того́же въ і҃, дн҃ь. па́мять ст҃а́гѡ
мч҃нка и архидіа́кона лавре́нтіа, и ѯі́ста
и ипполи́та, бл҃гословѝ о́ч҃е.

Сіѝ бя́ху во времена̀ декі́я царя̀. и у́же
ст҃ы́й ѯі́стъ ѿ аѳи́нъ бя̑ше, идѣ́же
мудролю́бное сло́во изве́дъ. прише́дъ
же в̾ ри́мъ поста́вленъ бы́сть єпкс̃помъ,
по муче́ніи ст҃а́гѡ стефа́на. болѣ́зно­
ваху же гоне́нія ра́ди и́же на христія́ны,
и повелѣ̀ ст҃ы́й ѯі́стъ лавре́нтію своему̀
архидіа́кону изнестѝ сосу́ды цр҃ко́вныя.
ѻ́нъ же прода́въ, раздадѐ цѣ́ну и́хъ
ни́щимъ. декі́ю же ѿ перси́ды возвра­
ти́вшуся, приведе́нъ бы́сть к̾нему̀
ст҃ы́й ѯі́стъ єпкс̃пъ, и не поко́рься ѿвре­
щи́ся хрс̃та̀, но дерзнове́ннѡ бг҃а и со­
дѣ́теля вся́ческимъ исповѣ́давъ, ме­
че́мъ главу̀ єму̀ ѿсѣко́ша. Приве­
де́нъ же бы́въ лавре́нтій архидіа́конъ,

и ѡ сщ҃е́нныхъ сосу́дѣхъ истя́жемъ.
и колє́са испроси́въ и наложи́въ слѣпы́хъ
и хромы́хъ и немощны́хъ, и привезѐ
и́хъ къ царю̀. и́хъ же ви́дѣвъ ца́рь,
и я́рости испо́лнься, повелѣ̀ ст҃а́го ла­
вре́нтіа вельмѝ би́ти. та́ же воврещѝ
єго̀ въ темни́цу. идѣ́же и прише́дъ
мнѡ́гихъ уврачева̀ єли́цы к̾нему̀ при­
хожда́ху, яцѣ́мъ же неду́гомъ ко́­
ждо ѡдержи́мь бя̑ше. Такова́я же
трі́унъ кали́нникъ ви́дѣвъ, и́же и
къ темни́цѣ приста́вленъ бя̑ше, вѣ́­
рова хрс̃то́ви и крести́ся. Посе́мъ же
предъ ста̀ ст҃ы́й лавре́нтіи царю̀, и
непоко́рься пожре́ти и́долѡмъ, на
сковрадѣ̀ просте́ртъ бы́сть подъжига́емь
огне́мъ, и вне́мъ бл҃года́рьствуя бг҃а
испустѝ дх҃ъ; И́же и погребе́ніе ѿ
ипполи́та пріи́мъ. Се́ же увѣ́дѣвъ
ца́рь, и приве́дъ повелѣ̀ па́лицами
желѣ́зными би́ти єго̀, и къ ди́віимъ
конє́мъ привяза́ти єго̀. и́же и на
мно́зѣ влачи́мь, бг҃у дх҃ъ предадѐ
Соверша́етъ же ся собо́ръ и́хъ въ триу́гле­
нѣмъ бли́зъ капетолі́и; глаго́летъжеся,
{#л. ѱо҃и}

я́кѡ в̾ седмы́й де́нь пострада́ніи бѣ̀ ст҃а́­
гѡ іпполѵ́та, декі́ю и валеріа́ну, сѣдя́­
щимъ на ко́нѣхъ свои́хъ, и иду́щымъ на
позо́рище, из̾дъхо́ша. возопи́ же декі́й
в̾ ча́съ сме́рти своея̀, ѽ іпполѵ́те, я́кѡ
плѣ́нника мя̀ та́кѡ свя́зана веде́ши.
возопи́ же и валеріа́нъ, о́гнеными мя̀
вери́гами свя́зана та́кѡ влече́ши. се́же
явле́но бы́сть по все́й вселе́ннѣи, и всѝ
по тверди́шася в̾ вѣ́ру гдс̃а на́шегѡ
іс҃а хрс̃та̀.

В то́й же де́нь сло́во ѿ житія̀ ст҃а́гѡ
ни́фонта ѡ сребролю́біи.

Ходя̀ ст҃ы́й ні́фонтъ, ви́дѣ человѣ́ка
єму́же моля́щеся мнѡ́жество маломо́щ̾­
ныхъ, прося́ще у него̀ ми́лостыни.
ѻ́нъ же ни ѡзрѣ́ся нани́хъ. Прибли́­
живъжеся ст҃ы́й ко а́гг҃лу храни́телю єгѡ̀
речѐ, рцы́ ми а́гг҃ле, мно́го ли и́мать
человѣ́къ се́й имѣ́нія. Глаго́ла а́гг҃лъ,
мнѡ́го и бесчи́сленое и́мать бога́тьство ѽ ни́­
фонте, но сребролю́бецъ є́сть, и ца́ты
ра́ди *у́нитъ {*во́лит̃} умре́ти. Біе́тъ же че́лядь
свою̀, гла́домъ моря̀ и нагото́ю, и дѣ́ло

усиля́я и́мъ. глаго́ла ні́фонтъ,
кото́рымъ смы́сломъ составля́етъся со́­
вѣсть єгѡ̀, є́же неподава́я убо́зѣй
бра́тіи. Глаго́ла єму̀ а́гг҃лъ, по­
слу́шай менѐ ні́фонте, да скажу́ ти.
прихо́дитъ к̾нему̀ те́мный бѣ́съ, воспо­
мина́я єму̀ глаго́ля, соста́рѣтися
и́маши, и пото́мъ в̾ болѣ́знь в̾паде́­
ши, и не да́ждь имѣ́нія своегѡ̀ ни­
кому́ же, єгда̀ не доста́токъ ти бу́­
детъ, и на́чнешь ка́ятися и глаго́ла­
ти, в̾ пу́стошь раздая́хъ имѣ́ніе своѐ
ни́щымъ, и не успѣ́еши ничто́же.
и та́кѡ прельстѝ єго̀ нечи́стый бѣ́съ,
ча́стѡ влага́я єму̀ въ се́рдце. ѻ́нъ же
повину́етъся по́мыслу тому̀, и пре­
быва́етъ помрача́емь, и не ми́луетъ ни́­
щихъ. и глаго́ла єму̀ ни́фонтъ,
смотрѝ я́коже вѣ́руетъ, бу́детъ єму̀.
бг҃ъ бо не искуси́тель є́сть ѕлу̀, и не
искуша́етъ никого́же. вся́къ бо иску­
ша́емь свои́ми грѣхѝ, поне́же послу́­
шаетъ дія́вола и воспомина́етъ єго̀.
и сѐ ре́къ, ѿи́де а́гг҃лъ ѿнегѡ̀. чело­
вѣ́къ же то́й пома́лѣ вре́мени в̾ болѣ́знь
{#л. ѱо҃ѳ}

в̾ падѐ, и бѣ̀ болѣ́знь єгѡ̀ люта̀ ѕѣ­
лѡ̀. єгда́ же в̾ падѐ человѣ́къ то́й в̾ лю́­
тую болѣ́знь, тогда̀ издая̀ сокро́вище
своѐ всѐ врачє́мъ, и нико́ея же по́льзы
ѡбрѣ́те ѿни́хъ, но бо́ле в̾ го́ршее в̾па́дъ.
и та́кѡ мнѡ́го дні́й му́чивъ ся, изы́де
ѿни́хъ душе́ю и тѣ́ломъ у́меръ. и сконча́­
ся ѡ не́мъ рече́нное про̃ро́комъ дв҃домъ,
се́й человѣ́къ и́же не положѝ бг҃а помо́щни­
ка себѣ̀, но упова̀ на мнѡ́жество бога́ть­
ства своегѡ̀. не мо́жемъ бра́тіе прель­
сти́тися ѿ бѣ́са, да не воспріи́мемъ безъ­
ми́лостивнаго суда ску́пости ра́ди, а имѣ́­
ніе имѣ́юще, да не то́йже су́дъ ѿ́ бг҃а
пріи́мемъ, и погуби́мъ ду́шю и тѣ́ло
и црс̃тво нбс̃ное. но є́же бы в̾ мѣ́сто
си́хъ бл҃га́я воспрія́ти.

Вто́йже де́нь поуче́ніе ст҃а́гѡ васи́лія
ѡ за́висти.

Бѣжи́мъ бра́тіе за́висти бѣсо́въскія сѣ́­
ти, да не увя́з̾ше въ ѕло́бѣ грѣхо́в̾­
нѣй, го́ршей му́цѣ пре́дани бу́демъ.
гдс̃ь бо горды́мъ проти́витъся, смире́­
ннымъ же бл҃года́ть дае́тъ. идѣ́же
у́бѡ за́висть и ре́вность, ту̀ нѣ́сть

посѣще́нія бж҃ія бл҃года́ти, но вся̀ ху́ль­
ная ве́щь и дія́воле ѕломы́сліе. Что̀
у́бѡ є́сть за́висти ѡкая́ннѣе; Зави́­
дитъ лѣни́вый ѿ страды̀ богатѣ́ющему,
а не пону́дит̾ ся пре́же са́мъ къ страдѣ̀ ѿнея́
же че́сть. зави́дитъ грѣ́шникъ чистотѣ̀
пра́ведничи, а не восхотѣ́въ са́мъ пре́же востя­
гну́тися ѿ грѣха̀. Зави́дитъ блудни́къ
цѣлому́дрію кро́ткагѡ, но нехо́щетъ у­
подо́битися житію̀ єгѡ̀. Зави́дитъ лу­
ка́вый властели́нъ другѡ́мъ свои́мъ и́же
тоя̀ доидо́ша че́сти, а не помя́нетъ хрс̃та̀
гл҃юща, дру́же не ѡби́жу тебѐ, возмѝ
своѐ и ѿи́ди, хощу́ же и послѣ́днему да́ти
я́кѡ и тебѣ̀; илѝ нѣ́сть ми лѣ́ть є́же
хощу̀ сотвори́ти во свои́хъ ми. А́ще ѻ́ко
твоѐ лука́во, но а́зъ бл҃гъ є́смь. Да
тѣ́мъ не высо́ко ходи́те, но за́висть ѡста́ви­
те. за́висть бо ско́рбь се́рдцу и тля̀ душѝ.
суши́ло тѣ́лу, разоре́ніе любвѝ. ко всѣ́мъ
вражда̀ ѿлуче́ніе ро́ду. спо́на добродѣ́тели,
зало́гъ муче́нію. лише́ніе бу́дущія жи́­
зни, гео́нѣ наслѣ́діе. да сѐ слы́шавше бра́­
тіе, не имѣ́емъ за́висти, но в̾ любвѝ пре­
бу́демъ. бг҃у на́шему сла́ва.
{#л. ѱп҃}

Мцс̃а того́же въ а҃і, дн҃ь. па́мять ст҃а́гѡ
мч҃нка єу́пла, бл҃гословѝ о́ч҃е.

Се́й бя̑ше придіоклитіа́нѣ царѣ̀, ѿ́ града
ката́нскагѡ, сикелі́йскіа єпа́рхіи.
ѡклевета́нъ же бы́сть ко́ князю каль­
сіа́ну, и хрс̃та̀ не ѿве́ргъся. пе́рвое
связа́шя єму̀ ру́цѣ подъ колѣ́нѣ.
та́же повѣ́шенъ на́ древо высо́ко, и желѣ́­
зными ноготьмѝ стро́ганъ. и гла́су
бж҃е́ственому к̾ нему̀ прише́дъшу, є́же
дерза́ти. поси́хъже мла́ты желѣ́зными
лы́ста єму̀ сокруши́ша, и в̾ темни́цу
в̾саже́нъ. и моли́твою исто́чникъ водны́й
истещѝ в̾ темни́цѣ сотворѝ. ис̾темни́­
цы же изведе́нъ, и а́біе ме́чную кончи́ну
воспріи́мъ сконча́ся.

Вто́й же де́нь сло́во ст҃а́гѡ васи́ліа вели́кагѡ.

Ка́кѡ бу́ду со і́ѡвомъ, и́же не при­
лу́чшую ско́рбь со бл҃годаре́ніемъ пріє́­
мый; ка́кѡ ли съ дв҃домъ, и́же не­
кра́тнику долготерпѣли́внѣ устро́ивый­
ся; ка́коже съ даніи́ломъ, и́же съ воз̾­
держа́ніемъ всегда́шнимъ, и моле́ніемъ
трудолю́бнымъ бг҃а не взыскавы́й;

ка́кѡ с̾ко́имъждо ѿ ст҃ы́хъ, и́же не по сто­
па́мъ и́хъ ходи́вый; Кто̀ си́це не раз̾суди́­
теленъ страстополо́жникъ, я́кѡ ра́внѣмъ
сподо́битися вѣнце́мъ побѣди́теля, и и́же
ника́коже подвиза́вшагося. кото́рый воинь­
ствоводецъ, нача́сть коры́стємъ ра́внѣ когда̀
побѣди́вшимъ, нижѐ я́вльшыяся на бранѝ
призва̀. Бл҃гъ ли є́сть бг҃ъ; по и пра́ве­
денъ. пра́веднаго же, є́же по досто́иньству
воздая́ніе, я́коже пи́сано є́сть, ублажѝ
гдс̃и бл҃ги́мъ. уклоня́ющыяжеся в̾ развра­
ще́ніе, поведе́тъ гдс̃ь съ дѣ́лающими без̾­
зако́ніе. Млс̃тивъ; но и судія̀. лю́­
битъ бо речѐ ми́лостыню и су́дъ. Тѣ́мъ
же гл҃етъ, млс̃ть и су́дъ пою̀ тебѣ̀ гдс̃и.
Увѣ́дѣ ли на кого̀ є́сть млс̃ть; бл҃же́ни
речѐ ми́лостивіи, я́кѡ ті́и поми́ловани
бу́дутъ. Зри́ши ли ка́кѡ усужде́нѣ
пріе́млетъ ми́лостыню. не безсу́днѣ ми́­
луя, ни не ми́лостивнѣ судя̀; Не ми́­
лостивъ бо су́дъ не сотво́ршему млс̃ти.
Млс̃тивъ бо гдс̃ь и пра́веденъ, да не у́бѡ
и́сполу гдс̃а познава́емъ, нижѐ вину̀
разлѣне́нія тогѡ̀ чл҃колю́біе пріе́млемъ.
сегѡ̀ ра́ди гро́мове, и сегѡ̀ ра́ди мо́лнія,
{#л. ѱп҃а}

я́кѡ да не преоби́дима быва́етъ бл҃гость.
и́же сл҃нце восіява́яи, и не видѣ́ніемъ
ѡсужа́етъ. и́же до́ждь дая́и, и о́гнь
дожди́тъ, ѻ́на бл҃гости, сія̀ ѿсѣче́нія;
илѝ ра́ди ѻ́ногѡ возлю́бимъ; илѝ ра́ди си́хъ
убои́мъся, я́кѡ да нерече́тъся и на́мъ;
илѝ бога́тьства бл҃гости єгѡ̀ и долготер̾­
пѣ́нія преоби́диши, не вѣ́дый я́кѡ
бл҃гость бж҃ія напокая́ніе тя̀ веде́тъ.
пожестоко́му же твоему̀ и не пока́янному
се́рдцу, щади́ши себѣ̀ гнѣ́въ въ де́нь гнѣ́­
ва; єльма̀ у́бѡ нижѐ мо́щно спасти́ся
не творя́щымъ я́же по за́повѣди бж҃іи
дѣ́ла, ни є́же прозрѣ́ти что̀ ѿповелѣ́­
нныхъ что̀ без̾бѣ́дно; лю́то бо є́сть
возноше́ніе. судіѝ на́мъ законополо́­
жнику сѣдѣ́ти, и о́вы у́бѡ в̾ чинѣва́­
ти ѿ закѡ́нъ, ѻ́вы же препуща́ти. при­
неси́же у́бѡ, и́же бл҃гоче́стія подви́жни­
цы, и́же безмо́лвное и без̾ве́щное житіѐ,
я́кѡ споспѣ́шника хране́нію єѵг̃а́льскихъ
за́повѣдєй поче́тшіи, ѻ́бщее попече́ніе и
совѣ́тъ предложи́мъ, я́кѡ да ничто́же на́съ
убѣжи́тъ ѿ заповѣ́данныхъ. А́ще бо
досто́итъ совершену бы́ти бж҃ію чл҃ку.

я́коже пи́сано є́сть и сло́во въ пре́жнихъ
показа̀. ну́жда вся́кѡ вся́кою за́повѣ­
дію соверши́тися, в̾ мѣ́ру во́зраста
исполне́нія хрс̃то́ва. єльма̀ и по бж҃е́­
ственому зако́ну, а́ще и чи́сто є́сть
врежде́ное, не прія́тнѡ є́сть на же́ртву
бг҃ови. єго́же у́бѡ ко́ждо имѣ́ти
ску́днѣ непщу́етъ, сіѐ во ѻ́бщее раз̾­
смотре́ніе да предлага́етъ; удо́бь бо
въ трудолю́бнѣмъ мно́жайшихъ испыто­
ва́ніи та́ющееся изъѡбря́щетъ ся. бг҃у
я́вѣ я́кѡ по ѡбѣтова́нію гдс̃а на́шегѡ іс҃а
хрс̃та̀, да́рующу на́мъ ѡбрѣ́теніе иско́­
магѡ, учи́тельствомъ и воспомина́ніемъ
ст҃а́гѡ дх҃а; я́кѡ у́бѡ мнѣ̀ ну́жда
належи́тъ, и го́ре мнѣ̀ є́сть а́ще не
бл҃говѣству́ю; Си̑це и ва́мъ по́двигъ
ра́венъ ѡб̾лѣни́вшимъся ко истяза́нію.
илѝ не́мощнѣ и раз̾сла́бленѣ ко хране́нію
пре́даныхъ, и и́же ра́ди дѣ́лъ исполне́­
ніи пребыва́ющымъ. Тѣ́мъ же речѐ гдс̃ь,
сло́во є́же гл҃ахъ, то̀ су́дитъ єму̀ в̾ по­
слѣ́дніи дн҃ь. и ра́бъ у́бѡ не увѣ́дѣвъ
во́лю гдс̃на своегѡ̀, сотвори́въ же досто́й­
ная ра́намъ, біе́нъ бу́детъ ма́лѡ
{#л. ѱп҃в}

увѣ́дѣвый же и не сотвори́въ, нижѐ угото́­
вавъ себѐ к̾ во́ли єгѡ̀, біе́нъ бу́детъ мнѡ́­
го. Потщи́мся у́бѡ нн҃ѣ на строи́тельство
сло́ва беспоро́ка, да пло́дно на́мъ учи́тель­
ство бу́детъ. вѣ́дяще у́бѡ я́кѡ про­
ти́ву лицу̀ на́мъ бг҃одохнове́ннагѡ писа́­
нія словеса̀ ста́нутъ насуди́щи хрс̃то́вѣ;
Ѡбличю́бо тя речѐ и предъста́влю предъли­
це́мъ твои́мъ грѣхѝ твоя̀. Си̑це и во́нь­
мемъ тре́звенѣ глаго́лемымъ, и в̾ дѣ́ло
произвестѝ бж҃е́ственая уче́нія спѣ́шнѣ
потщи́мъся, я́кѡ не вѣ́мы в̾ кі́й де́нь
илѝ ча́съ гдс̃ь на́шъ пріи́детъ.

Вто́йже де́нь поуче́ніе ст҃а́гѡ єфре́ма
ѡ по́льзѣ душе́внѣй.

Убо́йтеся бра́тіе душевре́дныя не поле́з̾­
ныя бесѣ́ды, да в̾ тишинѣ̀ бу́детъ
дш҃я ва́шя. у́не бо безума̀ ка́мень вре­
щѝ, не́же ли сло́во пра́здно изрещѝ. весе́­
ліе пра́ведныхъ су́дъ твори́тъ, и путіѐ
и́хъ твори́ти ми́лостыню. творя́и ми́­
лостыню ѡбря́щетъ живо́тъ. не имѣ́й
дру́жбы с̾ жено́ю, да не с̾ гори́ши огне́мъ
єя̀. не имѣ́и дру́жбы с̾ ма́лымъ дѣ́ти­
щемъ, да не в̾ паде́ши сни́мъ в̾ сѣть.

не имѣ́й дру́жбы со старѣ́йшиною мѣ́ста,
но послу́шай словє́съ єгѡ̀, а дѣ́лъ не творѝ.
не возлюбѝ итѝ во́ гра́дъ, и не рцы̀ я́кѡ
чи́сто ми є́сть ѻ́ко, сотвори́ши є̀ не прія́­
знено. не пі́й вина̀, да не сотвори́тъ ти
се́рд̾ца ѡскорбле́на в̾ сла́стѣхъ по́хотныхъ.
не я́ждь двокра́ты дне́мъ, да неутол̾стѣ́єт̃
ти мы́сль. не затворѝ двере́й свои́хъ ѿ стра́­
ннагѡ, да не затвори́тъ гдс̃ь двере́й свои́хъ
ѿ тебѐ. в̾ню́же мѣ́ру мѣ́рите, воз̾мѣ́ри­
тся ва́мъ. посѣща́й боля́щыя, да и бг҃ъ
посѣти́тъ тебѐ. не мнѡ́го спѝ, но молѝ бг҃а
на́ помощь сѝ прилѣ́жнѡ, да избѣ́гнеши
я́кѡ пти́ца ѿ сѣ́ти. пребыва́й при́снѡ
въ хра́мѣ бж҃іи. Гл҃етъ бо гдс̃ь, прославля́­
ющыя мя просла́влю. сѐ творя̀, са́мъ спа­
се́шися, и су́щыя с̾ тобо́ю. и єго́же про́­
сиши ѿ́ бг҃а, ско́рѡ пріи́меши, я́кѡ чи́стъ
дш҃е́ю. не сниска́й себѣ̀ па́че тре́бованія,
но живѝ в̾ житіѝ смире́нномъ. тружа́йся
рука́ма свои́ма, да и́маши пода́ти тре́бую­
щимъ. Сія̀ а́ще сотвори́те, да́стъ ва́мъ
бг҃ъ вѣ́чная бл҃га́я. єму́же сла́ва
че́сть и держа́ва нн҃ѣ и при́снѡ
и во́ вѣки вѣкѡ́мъ;
{#л. ѱп҃г}

Мцс̃а тогѡ́же, въ в҃і де́нь. па́мять ст҃у́ю
му́ченику фѡті́а и аники́ты,
бл҃гословѝ о́ч҃е.

Сія̀ бѣ́ста ѿ́ града родосто́ла, во времена̀
діоклитіа́на без̾зако́ннагѡ царя̀. бя́ше
же ст҃ы́й фѡті́й бра́тъ ст҃а́гѡ аники́­
ты. діоклитіа́ну же в̾ никомиді́и шата́­
вшуся на хрс̃тія́ны, предъ всѣ́мъ синъ­
кли́томъ. и мнѡ́жеству ѻру́дію муче́ніи
посредѣ̀ положену̀, я́кѡ устраши́ти хотя̀
нарица́ющихъ и́мя хрс̃то́во, и преще́ньми
по вся́кихъ концѣ́хъ на хрс̃тія́ны мечта́я­
ся. и мнѡ́гимъ хула́мъ на єдиноро́днаго
сн҃а бж҃ія изше́дъшимъ. прише́дъ же
ст҃ы́й мч҃нкъ хрс̃то́въ аники́тъ, не устра­
ши́ся преще́нія мучи́телева, но съ дерзно­
ве́ніемъ самого̀ хрс̃та̀ бг҃а исповѣ́да. и
ѡ пе́рвѣмъ и безнача́лнѣмъ рожествѣ̀ сн҃а
бж҃ія, и ѡ послѣ́днемъ воплоще́ніи єгѡ̀,
на́шегѡ ра́ди спасе́нія бг҃ослове́снѣ изъ­
яви́въ. поруга́въ же пре́лесть и́дольскую,
и прире́къ, я́кѡ глу́си и не чю́вьствени
су̑ть и чту́щіи и́хъ. тогѡ̀ ра́ди
біє́нъ бы́сть, волу́ями жи́лами, толи́кѡ,
я́кѡ костє́мъ єгѡ̀ сквозѣ̀ ко́жю єму̀

проитѝ. та́же пуще́нъ бы́сть ле́въ на́нь,
єго́же ви́дѣвъ ст҃ы́й вельмѝ убоя́ся, и́же
и велмѝ бя̑ше рыка́я. льву́же к̾ нему̀
прибли́жившуся, и па́че овча́те яви́ся
кротча́иши. и ѡми́ловавъ ст҃а́го, и ка́плю
су́щую на лицы̀ по́та єгѡ̀, ного́ю я́кѡ
игу́бою оте́ръ. Тогда̀ мч҃нкъ бл҃года́рь­
ствіе мл҃твою къ бг҃у воз̾сла̀. по моли́твѣ
же тру́су бы́вшу, и ка́пище ираклі́ево паде́ся
и в̾пра́хъ бы́сть. ича́сть нѣ́кая ѿ стѣны̀
гра́да ѡбвали́ся, и мно́ги ѿ є́ллинъ побѝ.
и повелѣ̀ ца́рь мече́мъ єму̀ главу̀ ѿсѣщѝ.
слуга́ же хотя̀ за махну́ти ме́чь, уя́ся
єму̀ рука̀. мучи́тель же преложи́въ ѡсу­
же́ніе, связа́въ ст҃а́го на колесѝ, и о́гнь
под̾стла̀ подни́мъ, из̾сѣца́емь на удеса̀
и поджига́емь, помоли́ся и разрѣши́шася
єму̀ у́зы, и ко́ло ста̀ и о́гнь погасѐ.
тогда̀ прите́къ бра́тъ єгѡ̀ фѡті́й. и при­
я́тъ єго̀, и оц҃а̀ и сп҃си́теля истри́ку того̀
нарица́я. свя́занъ же бы́сть со ст҃ы́мъ
аники́тою вери́гами желѣ́зными, и в̾те­
мни́цу ку́пнѡ в̾саже́ни бы́ша. та́же из̾­
веде́ни и стро́гани, и огне́мъ ѡпале́ни не­
вреди́ми, сохране́ни бы́ша. вели́кими
{#л. ѱп҃д}

древесы̀ привя́зана бы́ста, и ди́віими
ко́ньми влачи́ма. и па́ки вельмѝ біе́на
бы́ста, и со́лію оце́тъ размѣси́вше,
возлія́ша по ра́намъ єю̀, и за́ три лѣ́та
воузи́лницы пребы́ти ѡсуже́ни бы́ста.
и по утомле́ніи раз̾же́гъ мучи́тель ба́ню
анто́ніеву за́ три днѝ, и та́мѡ я̀ за­
творѝ. и мл҃твою ст҃ую раз̾сѣ́дшися
ба́ни, искипѣ̀ мнѡ́жество воды̀, и бы́сть
и́ма в̾росода́вное село̀. к̾ си́мъ ухи́тривъ
без̾зако́нный діоклитіа́нъ, сотворѝ пе́щь
четы́рьми столпы̀ желѣ́зными укрѣпля́е­
му, и ту̀ запали́въ, та́мѡ ст҃у́ю в̾ве́рже.
и́же и помоли́стася бг҃у, кончи́ну страда́­
нія, и побѣ́дныя вѣнца̀ воспрія́ста. Гла­
го́лет̃жеся ѡ нею̀. в̾ве́рженыма и́ма су́щима
въ пе́щь, за трѝ часы̀ и́ма дыха́ти. и из̾­
вле́кше тѣлеса̀ єю̀ желѣ́знымъ ѻру́жіемъ,
и не косну́тѣма я́вльшимася, я́кѡ ни
понѐ вла́су єю̀ єди́ному пла́меню косну́в̾­
шуся. Соверша́етъ же ся собѡ́ръ єю̀
во ст҃ѣ́мъ єю̀ муче́ніи су́щемъ
в̾ страти́гіи.

Вто́йже дн҃ь сло́во ѡ нѣ́коемъ блудницѣ̀,
и́же ми́лостыню творя̀, а блуда̀ не оста́ся.

Въ лѣ́та леѡ́на царя̀, бя̑ше в̾констянти́нѣ
градѣ человѣ́къ сла́венъ ѕѣлѡ̀ и бога́тъ, ми́­
луя ни́щыя. непрія́зненымъ же дѣ́й­
ствомъ творя́ше грѣ́хъ прелюбодѣ́йстве­
ный, в̾ не́мъже и до ста́рости пре́йде, зане́­
же устарѣ́лъся бѣ̀ ѕлы́й то́й обы́чай.
и та́кѡ непреста́ннѡ творя̀ ми́лостыню,
ни ѿ прелюбодѣя́нія неѿступа́ше. и
внеза́пу у́мре человѣ́къ то́й. стяза́­
ніюже ѡ не́мъ бы́вшу ге́рману патріа́рху
со ины́ми єпкс̃пы, ѻвѣ́мъ глаго́лющимъ
я́кѡ спасе́нъ є́сть; пи́сано бо є́сть,
избавле́ніе му́жу своѐ єму̀ бога́тьство.
инѣ́мъ же проти́ву глаго́лющимъ, я́кѡ
не поро́чну и не скве́рну подоба́етъ рабу̀
бж҃ію бы́ти; пи́сано бо є́сть а́ще и ве́сь
зако́нъ испо́лнитъ человѣ́къ, во єди́­
номъ же согрѣши́тъ, непомя́нетъся пра́вда
єгѡ̀. ре́кшу бг҃у, в̾че́мъ тя заста́ну,
в̾то́мъ ти и сужю̀. и повелѣ̀ патріа́рхъ
всѣ́мъ монасты́рємъ, и всѣ́мъ затво́рь­
никѡмъ, да помо́лятъся ѡ не́мъ къ бг҃у,
и яви́тъ и́мъ ѡ се́мъ. Сему́ же бы́вшу,
{#л. ѱп҃е}

ѿкры̀ бг҃ъ нѣ́коему затво́рнику, ка́кѡ
и гдѣ̀ пребыва́етъ человѣ́къ то́й. и при­
зва̀ патріа́рха исповѣ́да єму̀ предъвсѣ́­
ми людьмѝ глаго́ля, а́зъ бѣ́хъ в̾сію̀
но́щь моля́ся, и ви́дѣхъ нѣ́кое мѣ́сто,
ѡдесну́ю иму́що ра́й, испо́лнено не­
изрече́нныхъ бл҃гъ. ѡшу́юю же є́зеро
ѻ́гненое, єго́же пла́мень вохожда́ше до
ѻ́блакъ. между́ же бл҃же́ннагѡ рая̀, и
стра́шнагѡ пла́мене уме́ршіи му̑жь при­
вя́занъ стоя́ше и ѕлѣ̀ стоня̑ше и ча́сто
к̾ ра́еви взира́ше, и го́ркѡ рыда́ше. и
ви́дѣхъ свѣтоно́сна а́гг҃ла присту́пльша
к̾ нему̀ и глаго́люща, что̀ всу́е человѣ́че
сто́неши. се́ бо ми́лостыни твоея̀ ра́ди,
изба́вленъ єсѝ му́ки. а поне́же не ѡста́л̾­
ся єсѝ любодѣя́нія скве́рнагѡ, зато̀ ли­
ше́нъ єсѝ рая̀ бл҃же́ннаго. и сѐ слы́шавъ
патріа́рхъ ису́щіи сни́мъ, стра́хомъ ѡдержи́­
ми глаго́лаху, по и́стинѣ паве́лъ апс̃лъ пиша̀
гл҃аше, бѣ́гайте блуда̀. вся́къ бо грѣ́хъ
и́же а́ще сотвори́тъ человѣ́къ, кромѣ̀ тѣ́ла
є́сть, а блудя́й во своѐ тѣ́ло согрѣша́етъ.
гдѣ̀ у́бѡ су̑ть нѣ́цыи глаго́лющіи, а́ще
и любодѣя́ніе твори́мъ, но ми́лостынею

спасе́ни бу́демъ, и́бо а́ще ми́лостивецъ
єсѝ и́стиненъ, то̀ себѐ ти подоба́етъ пре́же
поми́ловати, и чистоту̀ тѣле́сную соблю­
стѝ; без̾нея́ же никто́же у́зритъ бг҃а.
ничто́же бо по́льзуетъ дае́мое сребро̀ изъ
рукѝ не чи́сты и душѝ не пока́янны.

Вто́йже дн҃ь поуче́ніе ст҃а́гѡ іѡ҃а́нна злато­
у́стагѡ ѡ умиле́ніи дш҃и.

Я́кѡ да напису́етъ ся всегда̀ въ твое́й
мы́сли втора́гѡ прише́ствія, стра́шная
ѻ́на та́йна. судіѝ го́рдъ на прс̃то́лѣ
сѣдя́и, и кни́ги разверза́емы, дѣ́­
ла та́йная ѡблича́ема, блуже́нія,
любодѣя́нія, татьбы̀, грабле́нія, лихо­
има́нія, хулы̀ клеветы̀, за́висти,
разбо́й и бесче́стіе. сѝ вся̀ помы́сли лю­
би́миче. к̾ си́мъ огня̀ не гаси́маго, рѣку̀
клоко́чющю, и тма́ми а́гг҃лъ ѻ́крестъ
прс̃то́ла предъстоя́щя, и человѣ́ческій ве́сь
ро́дъ испыта́емъ, и сло́во ѡ сотворе́ныхъ
ѿдаю́щь. ѿ пра́ведныхъ грѣ́шныхъ разлу­
ча́емыхъ напра́снѡ, испро́ста тогда̀ пра́ве­
дникѡмъ случа́ющаяся. я́кѡ кро́тость
пра́вда и му́дрость, ми́лостыня же и ти́­
хость, и и́же в̾ бѣда́хъ терпѣ́ніе, и про́чіи
{#л. ѱп҃ѕ}

ли́къ добродѣ́тели иму́щыя, си́хъ в̾ во́­
дитъ въ црс̃тво нбс̃ное. ко́рень же всѣ́мъ
си́мъ а́л̾чба. та́ко же ко́рень є́сть всѣ́мъ
си́мъ пи́ща. и я́кѡ не досто́итъ му̑жа
пра́ведна ѕлосло́вити. клеве́щущіи бо и
не нави́дящіи бж҃ія раба̀, во хрс̃та̀ согрѣ­
ша́ютъ. я́кѡ дш҃а̀ угожа́ющая человѣ́­
кѡмъ, и тѣ́хъ сла́вы жела́ющая, не
у́зритъ црс̃тва нбс̃наго, а́ще и до́брыя
дѣ́тели твори́тъ. Тремѝ вина́ми вся́ка
дш҃а̀ бг҃у прилѣпи́тися мо́жетъ. илѝ
теплото́ю вѣ́ры, илѝ стра́хомъ бж҃іимъ,
илѝ наказа́ніемъ гдс̃нимъ. я́кѡ добро­
дѣ́телємъ ве́рхъ є́сть, є́же терпѣ́ти
с̾ ра́достію лжѝ, и клеветы̀. я́кѡ во и́стинѣ
смиреному́дріе ѡби́димымъ, не возмуща́ет̾­
ся, ни вѣща́етъ ѡ се́мъ. зане́же ѡби́­
дѣнъ бы́сть, и не пріе́млетъ клеветы̀, я́кѡ
во и́стину пече́тъся препрѣ́ти человѣ́ки,
я́кѡ ѡклевета́нъ є́сть, но просты́ни про́­
ситъ. Нѣ́цыи бо и́мя ху́лно на ся̀ нало­
жи́ша, не су̑ще таковѝ. я́кѡ єгда̀ хо́ще­
ши твори́ти нача́токъ на дѣ́ло бж҃іе, пре́же
завѣ́тъ сотворѝ, я́кѡ не имѣ́я житія̀ на
се́мъ свѣ́тѣ. и я́кѡ нѣ́кто угото́витъся

на су́дъ, и ѿча́явъся житія̀ своегѡ̀ и всѐ
имѣ́я по и́стинѣ во умѣ̀ сѝ, є́же не
блазни́тися наде́жею житія̀ сегѡ̀, но
подви́гнутися и ѡдолѣ́ти. наде́жа бо
сея̀ жи́зни, сла́бъ сотвори́тъ по́мыслъ.
бг҃у на́шему сла́ва, ны́нѣ и при́снѡ
и во́вѣки вѣкѡ́мъ.
{#л. ѱп҃з}

Мцс̃а того́же въ г҃і, дн҃ь. па́мять прпд̃бнагѡ
оц҃а наше́гѡ макси́ма исповѣ́дника,
бл҃гословѝ о́ч҃е.

Маѯи́мъ ст҃ы́й бѣ̀ въ ца́рьство констянти́­
на брада́тагѡ. филосо́фъ до конца̀, жи­
тіе́мъ и смы́сломъ украси́ся. пе́рвое
асигкри́тъ бы́въ. и ѡста́ви всѐ имѣ́ніе
бра́ту своему̀ и бы́сть чернори́зецъ. ви́дѣвъ
же єдиново́лную є́ресь расту́щю, и по­
се́мъ ре́вностію бж҃іею разже́гъся, и при­
и́де в̾ри́мъ, повелѣ̀ ст҃о́му па́пѣ марті́ну
собра́ти собѡ́ръ, и єдиново́лпыхъ прокля́тъ
є́ресь, и нача́лника є́реси, и брада́таго.
с̾чини́ же кни́ги на є́ресь. увѣ́давъ ца́рь,
и посла́въ приведѐ ѝ в̾ констянти́нь гра́дъ,
и предъста́ви и на суди́щи свое́мъ. и при­
ше́дшимъ єрети́кѡмъ всѣ́мъ, и́стинным̾
сло́вомъ вся̀ препира́ше; ѿ со́ньмнща
{#л. ѱп҃з}

восхище́нъ бы́сть. посе́мъ поточе́нъ бы́сть
во ѳракі́ю. и посе́мъ ру́ку єгѡ̀ ѿсѣко́ша
десну́ю. та́же язы́къ єгѡ̀ урѣ́заша.
и со двѣма̀ ученико́ма заточе́нъ бы́сть
в̾лазу́нскую страну̀, но и та́мѡ дх҃омъ
бж҃іимъ гл҃аше и писа́ше. и въ ста́рости
глубо́цѣ ко́ гдс̃у ѿи́де.

Вто́й же дн҃ь
сло́во ѿ при́тчєй соло́монихъ. {*глв̃а к҃д}

Сн҃у мо́й не ревну́й ѕлы́мъ мужє́мъ,
ни воз̾желѣ́й бы́ти с̾ ни́ми. лжа́мъ бо
поуча́етъся се́рдце и́хъ, и болѣ́знь
устна́ми и́хъ глаго́лютъ. съ прему́­
дростію зи́ждетъся хра́мъ, и съ ра́зу­
момъ исправля́етъся. и съ чю́в̾ствіемъ
исполня́ютъся сокро́вища, ѿ всего̀ че́стна
бога́тьства и добра̀. лу́чши прему́дръ
крѣ́пкагѡ, и му́жь му́дрость имѣ́яи
тяжате́ля вели́ка. со управле́ніемъ бы­
ва́етъ бра́нь, по́мощь же се́рдцемъ совѣ́­
тнымъ. прему́дрость и мы́сль бл҃га,
вовратѣ́хъ прему́дрыхъ, смы́сленый же
не уклони́тъся ѿ зако́на гдс̃ня, но вмѣ­
ня́ется въ собо́рѣхъ. не наказа́ніи устрѣ­
та́ются въ сме́рти, умира́етъ же безу́­
мный во грѣсѣ́хъ. не чистота̀ му́жа

губи́теля ѡскверня́етъ. въ де́нь ѕо́лъ
и въ де́нь печа́ли до́ндеже ѡскудѣ́етъ.
избавля́яи ведо́мыя на сме́рть, и́скупу
прострѣ́ти нещадѝ. а́щели же рече́ши не
с̾вѣ́дѣ сего̀, разумѣ́й я́кѡ гдс̃ь всѣ́хъ
сердца̀ с̾вѣ́сть. и созда́вый дыха́ніе
всѣ́мъ се́й вѣ́сть вся́ческая, и́же возда́стъ
кому́ждо проти́ву дѣлѡ́мъ єгѡ̀. я́ждь
ме́дъ сн҃у, бл҃гъ бо є́сть со́тъ, да наслади́т̾
ся гортань тво́й. си́це бо разумѣетъ
промудроть твоя̀ дш҃а̀. а́ще бо ѡбря́ще­
ши бу́детъ добро̀ уме́ртвіе твоѐ, и упова́­
ніе твоѐ не ѡста́витъ тебѐ. не приведѝ
нечести́ваго въ жи́ръ пра́веднагѡ, ни прель­
ща́йся бес̾сы́тостію чре́ва.

Вто́йже де́нь сло́во ст҃а́гѡ сѷмеѡ́на,
но́вагѡ.

Мнѡ́зи у́бѡ ѿ пусты́нныхъ, друзі́и
же собѡ́рныхъ, си́рѣчь ѻ́бще живу́­
щихъ блажи́ша житіѐ. ѻ́віиже є́же
наста́вникомъ бы́ти, в̾разумля́ти же
и учи́ти, и составля́ти монасты́ри,
ѡ ни́хъ же разли́чнѡ восхотѣ́ша писа́ти
ся, тѣле́снѣ же и дх҃о́внѣ. а́зъ же
не друга́го ѡ си́хъ ино́го разсужда́ю
{#л. ѱп҃и}

нижѐ ѻ́вого хвалю̀, ѻ́вогоже уничиже́нію
досто́йна бы́ти реку̀; но всегда̀ и во всѣ́хъ
дѣ́лѣхъ, и́же бг҃а ра́ди и въ бз҃ѣ житіѐ
требл҃же́но є́сть. я́коже ѡ разли́чныхъ
хи́тростєй, худо́жество и человѣ́ческое
житіѐ составля́етъ ся, и друго́му и́но
дѣ́лающему, и ині́и, ина́я худо́же­
ствующе, си̑це преподаю́тъ дру́гъ ѿ́друга
пріє́млюще живу́тъ человѣ́цы, тѣле́сны­
ми потреба́ми єстеству̀ подаю́тъ. си̑це
є́сть ви́дѣти и при дх҃о́вныхъ, и ѻ́вому
сію̀ добродѣ́тель проходя́щу, ино́му же
и́ну, и си̑це житіѐ прехо́дятъ. во єди́нъ
же ра́зумъ ѿ си́хъ обои́хъ всѝ стека́ютъ
ся, во ѻ́бразъ гдс̃а на́шегѡ іс҃а хрс̃та̀
нбс̃нагѡ чл҃ка же и бг҃а, въ слове́снѣмъ и
у́мнѣмъ чл҃цѣ ѡблече́на, а́ще є́сть и пло́ть
и кро́вь имы́й. дх҃о́вныя же сла́вы чю́вь­
ство, не могу́щу сло́вомъ пости́гнути,
я́коже и и́же ѿ роже́нія слѣпі́и, сло́вомъ то́­
чію сл҃нчный свѣ́тъ разумѣ́ютъ зрѣ́ти же
не мо́гутъ. я́коже слы́шаи, си̑це и ви́дяи
и разумѣ́ваяи, вѣ́сть глаго́лемыхъ си́лу,
я́коже и ѻ́бразъ нося̀ нбс̃нагѡ и в̾ му́жа
с̾верше́на прише́дъ исполне́нія хрс̃то́ва.

си́цевъ сы́й мо́жетъ до́брѣ наставля́ти,
в̾ пу́ть бж҃е́ственыхъ за́повѣдєй, и па́­
ствѣ хрс̃то́вѣ. А и́же не вѣ́дый и́накѡ
сы́й, я́вѣ є́сть, я́кѡ ни чю́вьства ѡдебе­
лѣ́вша здра́ва и́мать, єму́же па́че добро̀
є́сть води́му бы́ти, не́же ли наставля́ти
ины́я в̾ поги́бель. и́же со усе́рдіемъ прихо­
дя́щихъ к̾ себѣ̀, бг҃ъ не ѡставля́етъ вся́кѡ
па́дати; но не́мощныхъ ви́дя и́хъ дѣ́й­
ствуетъ, и помога́етъ любя̀ и́хъ, и хотя̀
ру́ку си́лы да́ти и́мъ свы̑ше, и к̾себѣ̀ воз̾­
вестѝ и́хъ, дѣ́йствуетъ, явле́ннѣже и
та́йнѡ, разу́мнѣ и не разу́мнѣ, до́ндеже
на всю̀ в̾ зы́дутъ лѣ́ствицу, и тому̀ при­
бли́жатъся. и всѝ всему̀ при єдиня́тъся,
и всѣ́хъ землены́хъ в̾забве́ніе пріи́дутъ,
и того̀ єди́наго позна́ютъ, а́ще в̾ тѣ́лѣ,
а́щели кромѣ̀ тѣ́ла, невѣ́дѣ; И съжи́тель­
ствующе єму̀, и не изрече́нныхъ воспріе́­
млюще бл҃гъ. да не разори́ши своѐ жили́ще,
внегда̀ хотѣ́ти тебѣ̀ и́скреняго созида́­
ти. зри́ бо, я́кѡ лю́то є́сть дѣ́ло и
не удо́бно. да не́когда произволя́ющу
тебѣ̀ сіѐ, и своѐ разори́ши, и ѻ́ного сози­
да́ти, и цѣли́ти не возмо́жеши никакоже.
{#л. ѱп҃ѳ}

боя́ися бг҃а, бѣсо́вьскагѡ стремле́нія
бои́т̾ся, нижѐ немощны́хъ и́хъ нахо́дѡвъ
и́же человѣ́къ лука́выхъ преще́нія. я́ко­
же нѣ́кій пла́мень снѣда́яи ѻ́гнь вся́ко
сы́й, в̾незаходи́мыхъ мѣ́стѣхъ и не свѣ́­
тлыхъ, но́щію и дні́ю, в̾ ни́хъ же ѿганя́етъ
бѣ́сы. бѣжа́ще па́че ѻнѝ, да ѿнегѡ̀ не
ѡпаля́тъся, ѿ посыла́емыхъ ѿнегѡ̀ ѻгне­
ви́дныхъ лу̑чь бж҃е́ственагѡ огня̀; ѻ́ва
у́бѡ восприно́сятъ ся ѿ на́съ; ѻ́ва же
даю́тъся на́мъ свы́ше ѿ́ бг҃а; єли́кѡ
болѣ́зньми и по́ты сщ҃е́нными ѡчища́ем̾­
ся, толи́кѡ просвѣща́емся свѣ́томъ уми­
ле́нія. и єли́кѡ просвѣща́ємся, слеза́ми
ѡчища́емъся; ѻ́во у́бѡ во́лею приводя̑ще,
ѻ́воже дае́мое воспріе́млюще свы̑ше. идѣ́­
же глубо́кое смире́ніе, та́мѡ слеза̀ изо­
ѡби́лна. и идѣ́же сія̀, ту̀ и прише́ствіе
ст҃а́гѡ дх҃а. Сему́ же бы́вшу, вся́ка
чистота̀ и ст҃оть, во є́же ѿнегѡ̀ дѣ́й­
ствуемомъ быва́етъ. и зри́мь є́сть
тому̀ бг҃ъ, и бг҃ъ зри́тъ на́нь. на
кого̀ бо речѐ при́зрю; но на кро́ткаго
и безмо́лвнаго, и трепе́щущаго
мои́хъ словє́съ.

Вто́й же де́нь сло́во мни́шескагѡ житія̀
и ѡ єпитемія́хъ.

Повѣ́даше пе́тръ презвѵ́теръ, ѡ ст҃ѣ́мъ
григо́ріи па́пѣ ри́мстѣмъ. я́кѡ бы́въ
єгда̀ патріа́рхомъ, и созда̀ монасты́рь
вели́къ, и заповѣ́да игу́мену, да
никто́ же ѿ мни́хъ ничто̀ и́мать в̾ кѣ́­
ліи свое́й. мни́хъ же єди́нъ имѣ́я­
ше бра́та бѣлори́з̾ца, и просѝ унегѡ̀
глаго́ля, не имѣ́ю срачи́цы, но сотворѝ
любо́вь купи́ ми. и то́й дадѐ єму̀
трѝ златникѝ глаго́ля, купѝ себѣ̀
я́коже ти го́дѣ. взе́мъ же мни́хъ зла­
тникѝ держа́ше у себѐ. И́нъ же мни́хъ
уви́дѣвъ у бра́та златникѝ, и повѣ́да
игу́мену. игу́менъ же повѣ́да па́пѣ.
По трє́хъ же днє́хъ, ѿлучи́ша мни̑ха то­
го̀ ѿ причаще́нія, я́кѡ разо́рша за́повѣдь
мона́стырьскую. По ма́лѣхъ же днє́хъ,
у́мре бра́тъ ѿ луче́ный въ єпитеміѝ.
не вѣ́дущу же па́пѣ, я́кѡ бра́тъ ѻ́нъ
у́мре. И по трє́хъ днє́хъ повѣ́даша
па́пѣ, и бы́сть ѡне́мъ вельмѝ печа́ленъ
па́па, я́кѡ не разрѣшѝ єго̀ пре́жде ѿше́­
ствія єгѡ̀, ѿжитія̀ сегѡ̀ ѿ єпитеміѝ.
{#л. ѱч҃}

и написа̀ моли́тву на хартіѝ ѡ разрѣше́ніи
и дадѐ архидія́кону, и повелѣ̀ в̾зы́ти
верху̀ гро́ба бра́тня, и прочестѝ ю̀. и ше́дъ
архидія́конъ, и прочтѐ хартію̀ верху̀ гро́ба
бра́тня, в̾не́йже на пи́сана моли́тва разрѣ­
ше́нію. и в̾ ту̀ но́щь ви́дѣ игу́менъ
бра́та уме́ршаго, и глаго́ла єму̀, бра́те
нѣ́сили у́мерлъ. и ѿвѣща̀ єму̀, є́й.
И па́ки воспросѝ єго̀ игу́менъ, то̀ гдѣ̀
бы́лъ єсѝ досе́лѣ. и речѐ черне́цъ, в̾темни́­
цѣ бы́хъ до вчера́шнягѡ днє̀. по девя́­
томъ же часѣ̀, бы́хъ пуще́нъ. И увѣ́дано
бы́сть всѣ́ми, я́кѡ во́ньже ча́съ архидія́кон̃
моли́тву глаго́ла на́д̾ гробомъ бра́тнимъ,
в̾ то́й ча́съ и разрѣше́нъ бы́сть ѿ єпите­
міѝ, и пущена̀ бы́сть дш҃а̀ єгѡ̀ ѿ ѡсуже́­
нія темни́цы. бг҃у на́шему сла́ва,
ны́нѣ и при́снѡ и во́ вѣки вѣкѡ́мъ;

Мцс̃а того́же въ д҃і дн҃ь. пред̾пра́зднество
успе́нія прест҃ы́я бцд̃ы. и па́мять ст҃а́гѡ
прорѡ́ка михѣ́я, бл҃гословѝ о́ч҃е.

Се́й бя́ше єди́нъ ѿ шестѝ на́десятихъ
про̃ро́къ, пле́мене єфре́мова. ѡблича́я
бя́ше царя̀ аха́ва, за мно́гая и разли́чная
без̾зако́нія, поне́же не нави́дяше єго̀

ѿхожа́ше про̃ро́къ, и хожда́ше сквозѣ̀ го́ры
мнѡ́жайшая лѣ́та, да нена́частѣ царю̀
явля́ася, и того̀ ѡблича́я, на гнѣ́въ
того̀ воѡружи́тъ. По сконча́ніи же аха́во­
вѣ, таковы́ми подо́бными без̾зако́ніи,
ѡбличѝ сы́на єгѡ̀ ю́на су̑ща. и не стерпѣ́въ
ѡбличе́нія убіе́нъ бы́сть, низъстѣны̀
низве́рженъ. и ѿсро́дникъ свои́хъ
погребе́нъ бы́сть че́стнѣ.

Вто́йже де́нь ст҃а́гѡ мч҃нка марке́ла
єпкс̃па апамі́йскагѡ.

Се́й бя̑ше при ѳеодѡ́сіи цр҃ѣ, ѿ ки́пръ­
скагѡ нарица́емь о́строва, во́нь же и въ
мѵ́рстѣй о́бласти бы́въ, и добле́стію єгѡ̀
вруче́нъ. вся́кая ужа́снувъ, бл҃гоче́стіе
па́че бога́тьства стяжа́въ. на архієре́йскій
чи́нъ в̾ ше́дъ, и апамі́и сѵ́рстѣй єпкс̃пъ
бы́въ, и́же и та́мѡ пра́веднѡ и преподо­
бнѡ пожи́въ. Бы́сть же те́плый ревни́­
тель на хрс̃то́ву вѣ́ру. цр҃кви воставля́я
въ сла́ву бг҃у, а и́дольскія це́ркви руша̀,
я́кѡ ни єди́ныя ѡставля́ти ѿитѝ, но
та́мѡ с̾горѣ́тися я́коже, глаго́летъ ся.
пріє́мъ ст҃ы́й во́ду и бл҃гослови́въ, и
на изва́яная покропи́въ тѣлеса̀ ді́ева,
{#л. ѱч҃а}

и́же и запали́тіемъ из̾горѣ́ти сотвори́въ.
я́тъ же бы́сть ѡ се́мъ ѿ идолослужи́тель,
и во ѻ́гнь в̾ве́рженъ, и вѣне́цъ муче́нію
воспрія́тъ. Соверша́етъжеся собо́ръ
єгѡ̀ въ про̃ро́чествіи ст҃а́гѡ
іѡ҃а́нна крс̃ти́теля
в̾ форакі́и.

Вто́йже де́нь сло́во ѿ патерика̀.

Повѣ́да на́мъ нѣ́кій оц҃ъ глаго́ля, я́кѡ
купца̀ речѐ два̀ ѿ єди́ноя ве́си. бѣ́ста
бо любо́вь иму́ща к̾ себѣ̀. єди́нъ же єю̀
бога́тъ ѕѣлѡ̀, другі́й же не потоли́ку.
се́й у́бѡ жену̀ имѣ́яше ѕѣлѡ̀ краснѣ́и­
шю и цѣлому́дрену, я́коже ве́щь по́слѣжде
показа́ти хо́щетъ. Уме́ршу бо му́жу
єя̀ ѡста̀ вдо́в̾ствующи. купе́цъ же о́нъ
другі́й вѣ́дый добродѣ́тель єя̀, и цѣло­
му́дріе, восхотѣ̀ поя́ти ю̀ себѣ̀ в̾жену̀.
срамля́шежеся рещѝ є́й, єда̀ ка́кѡ не
восхо́щетъ, имѣ́яше же всегда̀ помышле́нія
наню̀. ѻна́ же разу́мна су́щи, разумѣ̀
что̀ хо́щетъ сотвори́ти. и єди́ною гла­
го́ла єму̀, бра́те и господи́не сѷмеѡ́­
не, ви́жю тя̀ ѿ помышле́ній смуща́ема,

но рцы́ ми безовся́когѡ сумнѣ́нія, я́же
хо́щеши, и а́ще мо́щно бу́детъ, извѣщу̀
тѝ. ѻ́нъ же пе́рвѣе стыдя́шеся повѣ́­
дати ве́щь, по́слѣжде же исповѣ́да. и
моля́ше сію̀ є́же бы єму̀ поя́ти ю̀ себѣ̀
жену̀. ѻна́же ѿвѣща̀ єму̀, а́ще сотво­
ри́ши я́же заповѣ́даю ти, и а́зъ сотворю̀
во́лю твою̀. И глаго́ла є́й, и́же а́ще запо­
вѣ́даеши мѝ, сотворю̀ въ ско́рѣ. Рече́ же
єму̀, идѝ в̾ до́мъ сво́й, и ничто́же вкусѝ,
до́ндеже призову̀ тя̀. ѻ́нъ же с̾ ра́достію
обѣща́ся сѐ сотвори́ти, не да́стъ же єму̀
днѝ урече́нна когда̀ призове́тъ єго̀. ми­
ну́вшу же пе́рвому и второ́му и тре́тіему
днѝ, и не призва̀ єго̀. ѻ́нъ же любвѐ
ра́ди єя̀ терпя́ше крѣ́пкѡ; бг҃у сія̀ по
смотре́нію сотво́ршу, вѣ́дящему гдѣ̀
хо́щетъ призва́ти єго̀. в̾ четве́ртый же
де́нь посла̀ к̾нему̀. ѻ́нъ же в̾ ма́лѣ не
исчезѐ гла́домъ, и не возмо́же нога́ма
свои́ма пріитѝ ѿ изнеможе́нія. ѻба́че
носи́мъ нѣ́кіими пріи́де. ѻна́же у­
гото́вивъши трапе́зу, и посте́лю тако­
же. и глаго́ла єму̀, сѐ трапе́за и
о́дръ, что̀ повелѣва́еши пре́же сотвори́ти.
{#л. ѱч҃в}

и речѐ є́й, поми́луй мя, да́ждь ми пре́жде
вкусити, поне́же исчеза́ю, нижѐ по́мысла
и́мамъ что̀ є́сть жена̀, ѿ ѡдержа́щаго мя̀
гла́да. Тогда̀ глаго́ла єму̀ ѻна̀, сѐ
єгда̀ в̾залка̀, и менѐ и вся́кія по́хоти
забы̀, то́чію да хлѣ́ба насы́тишися.
єгда́ же пріи́дутъ тѝ сицеві́и по́мысли,
такову̀ лѣчбу̀ поста̀ воспріимѝ, и изба́­
вишися вся́когѡ по́мысла лука́ва. вѣ́ру
же ми имѝ бра́те, я́кѡ по сме́рти му́жа
моегѡ̀, нижѐ тебѣ̀, нижѐ ино́му совоку­
плю́ся; но по́мощію хрс̃та̀ моегѡ̀, си̑це
пребу́ду в̾ чистотѣ̀. Тогда̀ умили́ся
му̑жь, и почюди́ся чистотѣ̀ єя̀ и цѣло­
му́дрію. И глаго́ла є́й, поне́же бл҃говолѝ
бг҃ъ спасти́ мя твоегѡ̀ ра́ди ра́зума, что̀
совѣща́еши мѝ сотвори́ти. ѻна́ же боя́­
щися ю́ности ра́ди, и су́щія єя̀ красоты̀,
да не ка́кѡ и сама̀ вре́мени зову́щу, сице­
ва́я постра́жетъ, и гл҃а єму̀, мню̀ я́кѡ не лю́­
биши никого̀ бг҃а ра́ди я́коже менѐ, я́коже
и а́зъ во и́стину бг҃а ра́ди люблю́ тя. но
поне́же за́повѣдь и́мамы, влд̃ки на́шегѡ
гл҃юща. а́ще кто̀ хо́щетъ по мнѣ̀ итѝ,
и не возненави́дитъ отца̀ и ма́тере своея̀,

и жену̀ свою̀ и чя́да, и бра́тію свою̀ и
сестры̀, и єще́ же и свою̀ дш҃ю, не мо́жетъ
бы́ти мо́й учн҃къ. И а́ще хо́щеши,
совѣща́ю тѝ, уда́лимъ себѐ дру́гъ
ѿ́ друга бг҃а ра́ди, я́кѡ да вмѣни́тъ и
тебѣ̀ гдс̃ь, я́кѡ ѿрече́ся жены̀ своея̀
єгѡ̀ ра́ди. мнѣ́ же та́ко же да вмѣни́т̾­
ся, я́кѡ ѿреко́хъся му́жа моего.
и сѐ у́же монасты́рь є́сть въ странѣ̀ на́­
шей. и а́ще вся́кѡ жела́еши ѿрещи́ся
ми́ра, та́мѡ ше́дъ ѿрецы́ся, и угоди́­
ши во и́стину бг҃у. ѻ́нъже а́біе расточѝ
бога́тьство своѐ ни́щимъ, и и́де в̾ мона­
сты́рь о́нъ, и пребы́сть ту̀ до сме́рти
своея̀, и бы́сть иску́сенъ и́нокъ. По­
до́бно же и бл҃же́нная ѻ́на жена̀ и цѣло­
му́дреная, ѿи́де в̾монасты́рь же́ньскій,
и угоди́въ бг҃у, преста́вися в̾ вѣ́чную
жи́знь. Сія́ же вся̀ са́мъ то́й оц҃ъ
сѷмеѡ́нъ исповѣ́да на́мъ,
и просла́вихомъ
бг҃а.
{#л. ѱч҃г}

Вто́йже де́нь по́вѣсть на предъпра́здне­
ство преставле́нія прест҃ы́я бцд̃ы.

Да є́сте вѣ́дуще бра́тіе, я́кѡ дне́сь предъ­
пра́зднество є́сть успе́нія прест҃ы́я бцд̃ы,
по́ плоти мт҃ре гдс̃а на́шегѡ іс҃а хрс̃та̀,
да собере́мъся всѝ въ цр҃квь на моли́тву;
дне́сь бо мт҃и хрс̃та̀ бг҃а на́шегѡ, ѡста́вивъ
многопреле́стный свѣ́тъ се́й и в̾ вѣ́чныя оби́­
тели на нбс̃ная жили́ща хо́щетъ преитѝ.
Сегѡ̀ ра́ди ра́дуютъся а́гг҃ли на нб҃сѣ́хъ, и
человѣ́цы веселя́тъся на землѝ, зане́же
херуви́мъ ѿступа́етъ с̾ пла́меннымъ ѻру́­
жіємъ ѿ вра́тъ ра́йскихъ. Мт҃и бо гдс̃ня
в̾ше́дъши всѣ́хъ пріє́млетъ, чту́щихъ пре­
ст҃о́е єя̀ успе́ніе. да никто́же ва́съ возлю́­
бленніи ѡб̾лѣни́тъся пріитѝ на похвалу̀
бцд̃ы. да не ѕло́бы ра́ди и лѣ́ности лишите́­
ся тоя̀ поро́ды; но препоя́савъше крѣ́пкѡ
чресла̀ своя̀ воздержа́ніемъ, и вся̀ ѕлы́я
стра́сти ѿве́ржемъ ѿ себѐ, я́рость клевету̀
блу́дъ татьбу̀, ѡбьяде́ніе и пія́нство, и
про́чая вся̀, я́же здра́вому смы́слу сопроти­
вля́ющаяся. воспріи́мемъ же вмѣ́стѡ
си́хъ, кро́тость и братолю́біе, чистоту̀ и
цѣлому́дріе, ми́лостыню и страннолю́біе,

смире́ніе и любо́вь дру́гъ ко́ другу иму́­
ще. та́ бо є́сть сконча́ніе зако́ну и
про̃ро́кѡмъ, и си́хъ ра́ди сн҃ове бж҃іи на­
рече́мъся, и наслѣ́дницы црс̃твія єгѡ̀.
и вся̀ я́же воспро́симъ, пріи́мемъ ѿнегѡ̀,
в̾сі́й вѣ́къ и в̾ бу́дущіи, я́кѡ за́повѣ­
демъ єгѡ̀ сохра́нницы. єму́же сла́ва,
ны́нѣ и при́снѡ и во́ вѣки
вѣкѡ́мъ.
{#л. ѱч҃д}

Сіѐ сло́во чтѝ по каѳи́смахъ.

Мцс̃а а́вгуста въ е҃і, дн҃ь. и́же во ст҃ы́хъ
оц҃а̀ на́шегѡ андре́я архієпкс̃па ієросали́м̾­
скагѡ, сло́во на пречс̃тно́е и ст҃о́е успе́ніе
прест҃ы́я бцд̃ы, бл҃гословѝ о́ч҃е.

Созыва́етъ па́ки на́съ ѡбы́чное сло́во
к̾ торжеству̀, и подоба́етъ на́мъ па́че
к̾ про́чимъ приложи́ти недоста́ткомъ,
я́кѡ да не ску́днѡ сло́во бу́детъ, и
не рѣши́мо в̾пряже́ному всю́ду не при­
ча́стное. и та́кѡ у́бѡ в̾ вари́вшихъ,
я́коже бя̑ше в̾ видѣ́ніи, живонача́ль­
ныя пло́ти, глаго́лю же дв҃ческагѡ
бг҃оматере тѣлесѐ, к̾на́мъ рече́на бы̑ша.
недоста́етъ же что̀ пѣснь рещѝ, и я́же
воспѣва́ема якова̀. и да никто́же мѝ
{#л. ѿч҃д}

ны́нѣ горды́ни, илѝ свирѣ́пію прило­
жи́тъ поро́къ, дерза́ющу я́же па́че
си́лы; занѐ по словесѝ си́лѣ мл҃твою,
па́че ве́щь сложи́въ, си́це сло́во соста́вихъ
ѿ худа́гѡ и смире́ннагѡ ума̀, всю́дуже
попеку́ся по си́лѣ. но не ѡсе́мъ ума́ли
сло́во своему̀ созда́нію, вседѣ́телнагѡ
бг҃а приобще́нію, и соглаше́нію сѝ бж҃е́­
ственагѡ примире́нія; ѡбѣ́тованна по­
ру́чница; пресу́щественагѡ словесѐ лѣ́­
пота, бг҃оизва́янное тѣ́ло; бг҃о­
начерта́нный бж҃е́ственагѡ первообра́зія
о́бразъ; вся́кагѡ видѣ́нія и восхожде́­
нія утверже́ніе; преди́вная вседѣ́те­
ля сѣ̑нь; бг҃опрія́тныя не излива́е­
мыя му́дрости держа́лище; не кра́до­
мый живота̀ хра́мъ; не ис̾черпа́емый
бж҃е́ственыхъ лу̑чь исто́чникъ; не­
побѣди́мая держа́ва, ни єли́кѡ стра́сть
ми не удержа́ся, но всѣ́хъ преше́дъ­
ши чс̃тото́ю; тоя̀ ра́ди и на́мъ смири́­
шася, сп҃се́нію ѡбѣща́нія. и доча́сти
є́же по на́съ прише́дъ, та́кѡ чюди́­
мую, и ѻ́бщіи истяза́ти до́лгъ єсте­
ству̀ сво́й; а є́же та́кѡ не бы́ти

то́й ѡ все́мъ, занѐ ѡбрѣ́те ѻбра́знѡ,
я́коже и на на́съ сво́йства. свое́ бо є́же
къ бг҃у приближе́ніе. ѻба́че є́же въ
коне́цъ безъстра́стія, показа́ніе вѣ́домо.
и что́ бо; не ѕѣло́ ли вели́кихъ, є́же
сомно́гими добродѣ́тельми нане́й пріи́де
гдс̃ь. что́ ли є́же напоказа́ніе чюде­
сє́мъ, и́мъ же когда̀ приведе́нѡмъ,
илѝ дѣ́емомъ жили́ще, и́хъ же че́сть
послѣ́дня, и ны́нѣшнее настоя́щее,
и всегѡ̀ пронарече́ся лѣ́пота, бж҃е́стве­
нымъ та́кѡ гла́сомъ и совѣ́томъ,
свы̑ше кому́ждо на́съ пронарече́нному житію̀
сконча́ніе. ѽле промышле́нію, єму́
же никто́ же ѡста́ви извѣ́стнѡ в̾ послѣ́­
дняя, илѝ слѣда̀ изъ ѡбрѣстѝ воз̃­
мо́же, єгѡ́же дѣ́ло ны́нѣшнее твори́­
моѐ дв҃ѣ́й. та́иньство бо, и є́же
ѡ на́съ позо́руетъ ся конча́ніе. и сѐ
є́сть из̾нача́ла ѿлучена̀ человѣ́ческому
єстеству̀ че́сть. но ка́кѡ пресѣче́­
ся; прегражде́ніе сложено̀ грѣхо́мъ.
ка́кѡ исто́ржеся; соу́зъ с̾плеты́йся
преступле́ніемъ. что̀ я́кѡ преѡби́­
дѣся сме́рть; я́кѡ дневны́й со́нъ
{#л. ѿч҃е}

ѿбѣга́етъ сме́рть, не страши́лище к̾то­
му̀, є́же ѡ хрс̃тѣ̀ младе́нствующимъ.
илѝ а́ще не́ было у́мрети бж҃е́ственому
селу̀, не бы̀ тля̀ разруши́лася преслуша́­
ніемъ соста́вившаяся; є́й разруши́ся.
хрс̃ту̀ у́бѡ уме́ршу, то́й бо єстество́мъ
возва̀, є́же в̾ тлѣ́ннѣмъ ѡсужде́ніи
не тлѣ́ніемъ изво́ливши уста́въ; ѽле
но́выхъ зда́ніи; ѽле бж҃е́ственыхъ
смире́ніи; прозябѐ тва́рь, черно́вно
изволе́ніемъ, совозрастѝ єстество̀ са́мо
испо́лнителя бж҃е́ственагѡ хотѣ́нія. болѣ̀
єстество́мъ є́вва ѿ преслуша́нія, напра́сну
сме́рть прія̀. в̾ мѣ́сто же ѻ́ноя болѣ̀
сія̀, и послуша́ніемъ убѝ сме́рть. єди́­
на бо па́че єстества̀ ко ѡбновле́нію изъ­
бра́нная єстеству̀. єди́на созда́телю
своему̀ послужи́вши єстество́мъ. Поне́­
же у́бѡ предълежи́тъ ны́нѣ бг҃осокро́­
вищьный се́й гро́бъ, бг҃опрія́тнагѡ
тѣ́ла, я́кѡ нѣ́кій бг҃ода́вецъ бл҃голю́­
бныя призыва́я; ни кто́ же да нели­
ши́тъ ся зва́нія. не тре́буетъ бо труда̀
бл҃годѣя́ніе, то́кмѡ єди́нагѡ изъ­
воле́нія. у́бѡ да прихо́дитъ бо́дро

вся́къ, и́же и́мать вѣ́ру несумѣ́нну.
да прихо́дитъ к̾ бога́тому дв҃ьственому со­
кро́вищу, и да разумѣ́етъ иску́сомъ
своегѡ̀ жела́нія ѡбрѣ́теніе, ѻ́бщее бо
смире́ніе предълежи́тъ. притецы́те у́бѡ
къ бг҃у, сѐ не ис̾черпа́емый безъсм҃ртія
исто́чникъ; Пріиди́те умерщве́ніи
почерпи́те, сѐ живо́тная прс̃нѡтеку́­
щая рѣка̀; Пріиди́те всѝ, умертви́­
теся ѿ грѣ́хъ; и ѡ дще́ри ада́мли,
и мт҃ри бж҃іей воспое́мъ си̑це; ѽ безъ­
му́жная мт҃и ѻтрокови́це мр҃і́е; ѽ тва́ре
чс̃тна́я чс̃тно́му созда́вшемуся ѿ тебѐ
подъ лѣ́ты, и не ѿсту́пльшему сво­
егѡ̀ сво́йства. ѡ тебѣ̀ всѝ прозвѣ­
сти́шя; Мѡѷсе́й пе́рвіе купину̀ ви́­
дѣвъ тя̀ предъгл҃аше прише́дъ, у́зрѣ
видѣ́ніе сѐ ве́ликое. ѡ тебѣ́ бо оц҃ъ
дв҃дъ хрс̃та̀ моля́ше, воста́ни гл҃я,
гдс̃и в̾ поко́й тво́й. ты̀ и киѡ́те ст҃ы́­
ни твоея̀; ѡ тебѣ̀ па́ки то́й же твоѐ
проѡбразу́я исхожде́ніе. лицу̀ твоему̀
помо́лятъся, бога́тіи лю́діе предъвоспѣ­
ва́юще. се́й бо речѐ, сла́ва дще́ре цр҃е́вы
вну́трь у́ду. ря́сны златы́ми ѡдѣ́яна
{#л. ѿч҃ѕ}

и преукраше́на. тебѐ пѣ́ніемъ, ст҃опи́са­
нныя кни́ги пропису́ющи прореко́ша; кто̀
сѝ; восходя́щая ѿпусты́ни, я́кѡ сте́бль
ды́ма кади́ма; змѵ́рна и лѷва́нъ, ѿ
вся́кагѡ пра́ха мѷропода́телна; ѡтебѣ̀
па́ки тоже прописа́ша кни́ги; сѐ о́дръ
гл҃юще соло́монѡвъ, столпѝ єму̀ сотво­
рени сре́брени, и въсклоне́ніе єгѡ̀ зла́то,
восхожде́ніе єго̀ багро̀, в̾ну́трь ка́мень
блиста́ющься, любвѐ ѿ дще́рєй ієроса­
ли́мьскихъ; И па́ки изы́дите дще́ри
сіѡ́ньскія къ цр҃ю̀ соло́мѡну в̾ вѣнцѣ́хъ,
и́мъ же вѣнча̀ єго̀ мт҃и єгѡ̀, въ де́нь
жени́шества єгѡ̀, въ дн҃ь весе́лія срд̃ца̀
єгѡ̀. Ви́дите ту̀ дще́ри сіѡ́ньскія.
бл҃жи́те ю̀ цр҃цы, и поса́дницы похва­
ли́те ю̀, я́кѡ воня̀ ри́зъ єя̀, па́че вся́­
кагѡ бл҃гоуха́нія; Тебѐ прозря̀ иса́ія
вопія́ше, сѐ дв҃ая во́ чревѣ пріи́метъ,
и бу́детъ ко́рень ієссе́ѡвъ; и изы́детъ
же́злъ ѿ ко́рене ієссе́ѡва; и цвѣ́тъ ѿ
ко́рене взы́детъ. тебѐ ра́ди вели́кій
ієзекі́иль провозвѣстѝ; сѐ врата̀
речѐ восто́ку, и бу́дутъ врата̀ затворе́­
на, и никто́же вни́детъ сквоѕѣ̀ ня̀;

но гдс̃ь бг҃ъ єди́нъ вни́детъ, и бу́дутъ
врата̀ затворе́на. тебѐ жела́нія му̑жь
проречѐ. го́ру тя̀ наречѐ вели́кую, и ка́­
мень не рука́ма му́жескима ѿ тебѐ ѿсѣ­
ка́емь, не ѿ́емлемь то́кмѡ, ни раздѣ­
ля́емь прія́тіемь є́же ѿ на́съ человѣ́че­
ствомъ; ты̀ єсѝ вели́чество стра́шнагѡ
смотре́нія, вне́же жела́ютъ а́гг҃ли при­
ни́кнути; ты̀ єсѝ прекра́сное бж҃іагѡ
схожде́нія жили́ще, су́щая вожделѣ́­
нная земля̀. вожделѣ́ бо цр҃ь добро́тѣ
твое́й. и возлюбѝ бога́тьство дв҃ьства
твоегѡ̀, и пожи́тъ в̾тебѣ̀ и всели́ся вны̀,
и примирѝ на́съ тобо́ю бг҃у и оц҃у. ты̀
утае́ннагѡ та́иньства пре́жде вѣ́къ єсѝ
сокро́вище; ты̀ єсѝ во и́стину живо́­
тная кни́га, в̾пи́саннагѡ в̾тебѣ̀ бе́з̾
вѣсти ѻч҃ьскагѡ сло́ва, живо́тнымъ
пе́рстомъ ст҃а́гѡ дх҃а. ты̀ єди́на не­
ло́жный но́вагѡ завѣ́та бг҃онапи́саный
сви́токъ, и ю́же къ чл҃кѡмъ завѣща̀
пре́жде бг҃ъ; ты̀ єсѝ тма́ми сугу́бная
колесни́ца бж҃ія, ты́сящя гобзу́ющихъ
тому вопло́щьшемуся приве́дши; ты̀
єсѝ гора̀ сіѡ́ня ту́чная, и усыре́ная,
{#л. ѿч҃з}

в̾не́й же изво́ли бг҃ъ жи́ти; ѿтебѐ
въ пло́ть ѡгустѣ́въ усы́рися, є́же
ѿ на́съ у́мну и ѡдш҃евле́нну пресу́щь­
ный; ѽ хра́ме бж҃е́ственый, ѽ чл҃че
земны́й; ѽ тѣ́ло ме́ртвеное, и
сто́лпе животвори́вый; не пло́тнаго
иіл҃я просвѣща́ющи бѣ́гающа, но
дх҃о́внаго к̾ ра́зуму не бла́зно наставля́я
свѣ́томъ бж҃е́ственымъ просвѣща́ющи;
ѽ о́блаче всесвѣ́тлый, и горѡ̀ при­
сѣ́нная, не безъ бл҃года́тная, не
жидо́в̾скія лю́ди ѡ сѣня́ющи, но
избра́нныя бж҃ія лю́ди язы́къ ст҃ы́й
свои́ми просвѣща́ющи мт҃рьними сія́нь­
ми. ѽ зла́та вся́кагѡ, и вся́коя
веще́ственыя тва́ри, и не веще́ственыя
чс̃тнѣ́йшая; ѽ землѐ дв҃ьственая,
из̾нея́ же вторы́й ве́тхагѡ пе́рвѣйшіи
ада́мъ произы́де; Кото́рый тя̀ гро́бъ
покрыва́етъ; земля́ же ка́я тя̀ при­
и́метъ, нб҃сѐ небесє́мъ єстество̀ пре­
ше́дъшую чс̃тото́ю. ка́я же ли тѝ погре­
ба́льная, и кото́рыя пелены̀, кото́рая
при угото́ванія, ма́сти же кі́я пома́­
жутъ твоѐ тѣ́ло бл҃гоуха́нное и чи́стое

испо́лнено ст҃ы́ни кипя́щее ѡставле́ніе,
источа́ющее не тлѣ́ніе, из̾него́ же ѡбо­
же́ніе, ѡне́мъ же с̾верше́ніе, и́мъ же и
спасе́ніе. ты́ бо єсѝ во и́стину вся̀ до­
бра̀, и поро́ка в̾тебѣ̀ нѣ́сть; да воспѣ­
ва́етъ тѝ в̾ма́лѣ и соло́мѡнъ бж҃е́ственый,
красна̀ єсѝ я́кѡ ієросали́мъ, и воня̀ ри̑зъ
твои́хъ, я́кѡ воня̀ лѷва́нова. ты̀
не излива́ємагѡ мѵ̑ра но́вая мирохрани́­
тельница. ты̀ ма́сло пома́занія ра́­
дости. ты̀ мы́сленыхъ мастє́й кади́­
ло. ты̀ єсѝ цвѣ́тъ нетлѣ́нія, масто­
араматоно́сная земля̀, живоно́сная
кра́бія. свѣтоно́сный свѣти́льникъ,
зарено́сная трапе́за. бг҃отка́нная порѳи́­
ра, црс̃кая ѻде́жда. бл҃горазли́чная
сви́та, златозра́чная плащани́ца. не­
изрече́нная мы́сленная багряни́ца, сло́­
ва ка́пля, не рукоплете́нный цр҃ьствія
вѣне́цъ. прс̃то́лъ высо́кій, превзя́­
тая нб҃се́мъ две́рь. цр҃ца вся́кагѡ чл҃че­
скагѡ єстества̀. не премѣ́нное зва́ніе
с̾ потре́бою иму́щи, *свѣ́не {*кромѣ̀} бг҃а всѣ́хъ
вы́шьша єсѝ. ко́и тя̀ ру́цѣ погре­
бу́тъ. ко́имъ ѡбъя́тіємъ понесе́мъ тя̀,
{#л. ѿч҃и}

поне́сшую не вмѣсти́маго. кою̀ ѡ тебѣ̀
сотвори́мъ моли́тву погреба́льную. ко́и
мили тя̀ прово́димъ пѣ́сньми. устна́­
ми же ко́ими твоѐ воспое́мъ ѿхожде́ніе.
коли́цѣмъ гла́сомъ кі́ими словесы̀, є́же
ѡтебѣ̀ вели́чія бл҃га сотвори́мъ. Тѣ́мъ
же в̾ мѣ́стѡ всѣ́хъ сія̀ тѝ прино́симъ
гла́сы; Бл҃же́нна єсѝ в̾жена́хъ, и въ
рѡ́ды и рѡ́ды бл҃гослове́на, на́ нб҃си и на
землѝ сла́вима. тебе́ бо бл҃голюбе́зно
вся́къ язы́къ славосло́витъ, мт҃рь
живота̀ проповѣ́дающе. Испо́лнися
вся̀ тва́рь сла́вы твоея̀. ѡ ст҃и́шабо
ся вся̀ мѵ́ра бл҃гоуха́нія твоегѡ̀. по­
треби́ся тобо́ю грѣхо́вная при́тча, пре­
ложи́ся на ра́дость кля́тва пра́бабы є́ввы.
всѝ пою́тъ тобо́ю сна́ми, сла́ва на́
нб҃си, ми́ръ на землѝ. тебѐ гро́бъ
имѣ́ти не мо́жетъ, тѣ́ло бо влд̃чне не
бя́ше тлѣ́емо. а́дъ держа́ти тя̀ не мо́­
жетъ. дш҃и́ бо цр҃ьстѣй не прикаса́ются
порабоще́нная. идѝ у́бѡ идѝ с̾ми́ромъ,
превита́й ѿземлены́хъ ѻби́телєй. мо­
лѝ гдс̃а ѡ о́бщемъ созда́ніи, и доне́­
лѣ же бо съ землены́ми веселя́щися.

єди́на тя̀ страна̀ имя́ше землѝ, но
ѿне́лѣ же преложи́ся ѿ землѝ, ве́сь
и́мать тя̀ ми́ръ ѻ́бщее ѡчисти́лище.
Па́че єнѡ́ха возвели́чися. Па́че иліѝ
превзы́де, в̾ весе́ліи и ра́дости не изре­
че́ннѣи, въ прс̃носу́щномъ свѣ́тѣ, идѣ́­
же є́сть и́стинное житіѐ, всесвѣ́тлое
црс̃тво, непреста́емо а́гг҃льское ликова́ніе.
к̾ си́мъ же воспріимѝ красоту̀ сн҃а своегѡ̀,
наслажда́йся неистощи́мыя ра́дости,
и не старѣ́ющагося бл҃женьства. та́мѡ
пото́къ вѣ́чныя пи́щи, идѣ́же цвѣ́­
ти не тлѣ́нніи, исто́чницы прс̃ноте­
ку́щагѡ живота̀, струя̀ бл҃готочи́вагѡ
уче́нія. та́мѡ конча́ніе вся́кія на­
де́жди. и ны́нѣ надѣ́ющимъся ѡбъ­
явле́ніе, утае́мыхъ содержа́ніе всѣ́хъ
бл҃гъ, послѣ́дніи коне́цъ, єму́ же
вы̑ше ника́коже ничесѡ̀. та́мѡ ѻц҃ъ
покланя́емь є́сть, и сн҃ъ сла́вимь, и
дх҃ъ ст҃ы́й поє́мь, єди́но єди́наго въ
тро̃чнѣмъ бжс̃твѣ̀ єстество̀. Такова́я
мни́тъмися тогда̀ бг҃осло́въцы, и бг҃о­
пріє́мныя ѻ́ны му́жы, и рещѝ и
воспѣ́ти, и єли́ка си̑хъ преидо́ша,
{#л. ѿч҃ѳ}

не вѣ́мъ бо а́ще и вя́щьше реку̀, земля̀
и пе́пелъ сы́й, ве́сь смра́дъ сы́й, и ра́внѡ
змія́мъ на́ чревѣ по́лзая. и не сло́ву
до́лгъ по си́лѣ дово́лно ѡчи́стися, ни­
ка́коже мню̀ презрѣ́нну, к̾ настоя́щей
простира́ющи ве́щь, и є́же к̾ си́мъ прине́­
сетъ кто̀ высоча́йшее, и на́ми сѐ со́бранно
бу́детъ, и торжеству̀ ра́внѡ, ма́ла же
реку̀ того̀ здѣ̀ труды̀ поко́ю слову, є́же
по достоя́нію подо́бно всѝ воспріи́мемъ.
а є́же свою̀ показа́ти си́лу ра́внѡ вся́кому
бо́дрое. Пріи́метъ бо и сѐ на́ше ма́лое
сло́во до́брѣ всѣ́мъ, и возда́стъ, не
єли́ка же у́бѡ пр́осимъ, єли́ка же па́че
прія́ти єсмы̀ досто́йни. Лю́битъ бо
прест҃а́я, я́кѡ мнѡ́го дарова̀ на́мъ, и
зама́лы возда́ти бо́льшая. и здѣ̀ у́бѡ
сѝ да бу́дутъ; Вы́ же кра́сное и пресвѣ́­
тлое торжество̀, призыва́ю бо и ны́нѣ къ
слове́сному конча́нію, пріиди́те ѡсщ҃е́нна­
гѡ провожде́нія, дв҃ческагѡ сокро́вища
предъиду́ще воспое́мъ погреба́льная, и
по си́лѣ честьмѝ да вѣнча́ємъ пра́здни­
ку нача́ло, я́коже сѐ свѣтлѣ́йшіи бу́­
детъ. да пріидутъ нбс̃ныхъ и земны́хъ,

да испо́лнятъ мѝ исхо́дную хвалу̀,
в̾ си́хъ слага́еми гл҃ы. Пре́йде по́лкъ бж҃іи
ѿ се́лъ кѷда́рьскихъ на невеще́ственая,
и всеживо́тная се́ла воспрія́тъ сѣ̑нь за­
ко́нную. первоѻбра́зная къ преми́рному
ковче́гу, єю́же о́бразъ зако́нный,
взя́тъся вы́шнихъ вра́тъ предъдве́ріе,
я́кѡ да вы́шьшая бж҃ія две́рь, нбс̃ное
црс̃тво црс̃ки пріи́метъ; воспріими́те
сію̀ свѣтоно́сніи а́гг҃ли; воспо́йте земле­
ні́и, вознеси́те гра́дъ бж҃іи цр҃я̀ вели́­
кагѡ; землѐ восплещѝ, восхвалѝ, воз̾­
вѣстѝ, дв҃цы сла́вныя, ржс̃тву̀ пелены̀,
гро́бу чюдеса̀, ка́кѡ погребе́ся, ка́кѡ пре­
ложи́ся, ка́кѡ гро́бъ ви́дится то́щь
покланя́емь; июде́я соберѝ сн҃ы своя̀,
проповѣ́дай ѿ июде́й цр҃я. дерза́й, не
бо́йся ієросали́ме, возопѝ воскли́кни,
проводѝ бж҃ію митропо́лію, по́й дв҃дъски
глаго́ли я́снѡ, во исхо́дѣ ізра́илевѣ ѿ
єгѵ́пта. мт҃и сіѡ́нъ, изво́ли гдс̃ь,
ю́же избра̀. призыва́й сѝ дще́ря
и́же ѿ язы́къ цр҃кве. воспо́й что̀
плаче́вно, а не коѕлогла́снѡ крича́щи.
сла́дко бо, а не бѣ́днѡ торжество̀;
{#л. ѿ҃}

гепсима́ніе вопріимѝ но́вую цр҃цу. гото́ви
гро́бъ, преложѝ погреба́льная; съ мѵ́ры
гро́бъ, украсѝ ковче́гъ, да бу́детъ тѝ
храни́лище сокро́вищу, да стреже́тъся
с̾ тве́рдостію ст҃о́е. а́ще бо соблюде́тъся
пребыва́ющее, в̾ не́мъ бу́детъ ѻ́бще
а́гг҃лѡмъ и человѣ́кѡ́мъ стяжа́ніе покла­
ня́емое; А́ще ли что̀ пресла́внѡ слу­
чи́тъся, и преста́витъся чс̃тая, да
бу́детъ бл҃года́ть проповѣ́данна. испо­
вѣ́дуи послѣ́днимъ родѡ́мъ преложе́ніе,
к̾ го́рнимъ дх҃ѡмъ, дш҃ю возсыла́ющи,
бж҃ія мт҃ре. на́мъ же ст҃ы́ню, я́кѡ
ѿ исто́чника прс̃нѡтеку̑ща, мѵ̑ро даю́­
щи ѿ́тѣла. всѝ ку́пнѡ къ бцд̃ѣ при­
тѣце́мъ; ли́цы ѡч҃естіи с̾патріа́рхи;
дс҃и про̃ро́честіи, и ст҃льстіи соста́вы;
апс̃льстіи со́ньми, и мч҃нче́стіи полцы̀;
учи́тельстіи собо́ри, и пра́ведныхъ ду́­
ши; прпд̃бныхъ чи́ни, и са́нъ вся́кій
во́зрастъ, цр҃іе бл҃гочести́віи и кн҃зи; и
подъ вла́стію, ю́ноши и дв҃ы, ста́рцы
съ ю́нотами, восхвали́те и по́йте; рцы́­
те мт҃ри бж҃іей рцы́те, я́кѡ бл҃же́нъ
до́мъ, ѿнего́же чре́слъ бг҃у мт҃и возрастѐ;

мт҃ри и дв҃ы, просла́вите єди́ну єди́­
ному мт҃рь и прс̃нѡ дв҃у; ѻтрокови́цы
и невѣ́сты варя́йте неневѣ́стную во отро­
кови́цахъ, и нетлѣ́нную, и єди́ну бо­
лѣ́зни кромѣ̀ ро́ждьшую не постижи́ма­
го; не пло́ды и вдови́цы восплещи́те и
восхвали́те, иску́са не позна́вшю му́­
жеска, и не пло́дія соу́зы изба́вльшю;
дще́ри взыгра́йте, ѻтрокотво́рное не­
тлѣ́ніе, ѻтрокоро́дію предъпосыла́юще.
Бл҃гослови́те племена̀, бл҃жи́те язы́цы,
воспо́йте мт҃ри бж҃іи, вся̀ колѣ́на зе­
млена́я воспо́йте, простри́те спѣ́сньми
и кѷмва́лы, воскли́кните возвели́чите
воспо́йте; Возмѝ возмѝ мр҃іа́мъ тѷм­
па́нъ, и предъдв҃ами превзы́ди; дви́жи
цѣвни́цу дв҃де, возмѝ гла́съ, воспо́й
цр҃цу, ликотву́й, возвы́си гу́слямъ
бряца́ла, съзовѝ дв҃ы, соберѝ ли́ки пою́­
щихъ, да въ слѣ́дъ одра̀ теку́тъ,
ѡ́крестъ гро́ба да лику́ютъ; Се́ бо
но́вый сла́вѣ ковче́гъ, вне́мъ же все­
злата́я ру́чка, и же́злъ ааро́нь прозя́б̾­
шіи, и скрижа́ли завѣ́та; Сѐ соверше́­
ніе ѡ не́мъ же про̃ро́че́стіи ли́цы возопи́ша;
{#л. ѿа҃}

сѐ лѣ́ствица, ю́же бж҃е́ствено мечта́яся
ия́ковъ ви́дѣ, поне́й же ви́дѣ и а́гг҃лы
бж҃ія восходя́щя и низ̃сходя́щя, я́же бя̑ше
ѻ́бразъ такова́гѡ восхожде́нія. сѝ нбс̃нагѡ
восхожде́нія две́рь, ѡ не́й же речѐ ѻ́нъ,
я́кѡ стр́ашно мѣ́сто сѐ; нѣ́сть сѐ; но
до́мъ бж҃іи, и сѝ врата̀ нбс̃ная; сѐ ѡчи­
сти́лище є́же во ст҃ы́хъ ст҃о́е, возложе́но
бг҃ота́йныя сѣ́ни, и не в̾ходи́мыхъ;
ѻвогда̀ серафи́м̾скими ѡсѣня́емо кри́лы;
овогда́же на́ша грѣхѝ іс҃овѣмъ та́йнымь
бг҃овидѣ́ніемъ ѡчища́емо; к̾ тому̀ не­
зако́ннагѡ порабоще́нія, яре́мъ и́сти­
нному иіл҃ю возлага́етъся, но хрс̃то́во
свобожде́ніе на́мъ, є́же дх҃о́вную слу́жбу
я́кѡ бл҃года́тію пло́тію, є́же ѿ бцд̃ы
рукописа́въ; ктому̀ архієре́ѡмъ єди́ною
лѣ́та пу̑ть ко ст҃ы́мъ не тре́тъся; са́мъ
бо вели́кій архієре́й хрс̃то́съ іс҃ъ проше́дый
нб҃са̀ прія́тною пло́тію, дш҃ю иму́щю
слове́сну и мы́слену, я́кѡ въ хра́мѣ
дв҃честѣмъ та́йно сщ҃е́ніемъ, всегда̀
на́мъ вовхо́дѣ кади́тъ, и жре́нъ, и
жре́тъся, и всепло́дія вознеся̀, прино́­
ситъся, и на́съ ѡсщ҃а́я того̀ ст҃я́щя;

та́кѡ твоя̀ бцд̃е преми́рнагѡ успе́нія та­
и́ньства; сѝ чс̃тагѡ провожде́нія, бг҃опогре­
ба́льнагѡ тѝ тѣ́ла пригро́бія, я́же пре́жде
погребе́нія, и я́же по погребе́ніи воспомина́­
нія, преневѣ́жьственагѡ преложе́нія прев̾сы­
ла́нія; сѝ є́же ѡ тебѣ̀ и бж҃е́ственыхъ та́инъ
просвѣще́ніи, мечта́ніемъ разумѣ́нія, не
мо́жетъ что̀ вя́щьше у́мъ на́шь речѐ­
нны́хъ смы́слити. си̑це ма́лое ѡ твое́мъ
на́ми утверди́ся сло́во, бл҃года́рьственомъ
же и моле́бномъ пра́здньствѣ. а́ще бо
твоегѡ̀ имѣ́нія и вели́чества досто́йнѡ,
сѐ тебѣ̀ бл҃года́ть да́вше, и ра́дующеся
бо́дрости. а́ще ли є́же вся̀ пострада́ти
напа́сть, ѡ тебѣ̀ что̀ глаго́лати начи­
на́ющимъ, послѣ́днее ѡбрѣта́етъся
по́чести, поми́луеши вѣ́мъ; сама́ бо
млс̃тивно єстество́мъ иму́щи, є́же
къ сн҃у попече́ніе при́снагѡ приближе́нія.
пріи́мешиже сѐ вѣ́мъ да́ръ, я́кѡ до́брѣй­
шіи ѿ худы́хъ сложе́ныхъ мѝ трудѡ́въ;
не имѣ́хъ бо что̀ превя́щьше всѣ́мъ пре­
иму́щимъ мт҃ри сло́ва. ѻба́че я́кѡ
сло́во ѿ самоисто́чныхъ студенє́цъ, на
тебѣ̀ бг҃ора́дованная, излива́емо бл҃года́ти,
{#л. ѿв҃}

в̾ бж҃е́ственѣмъ же в̾ нестарѣ́ющемъ пребыва́ю­
щи, стра́шное же и пренеразумѣ́ваемое
твоѐ уче́ніе, я́кѡ не свѣ́домо всѣ́ми и не
сказа́ннѡ, молча́ніемъ да почита́етъся.
пра́ведно бо я́кѡ не прилага́тися к̾ бо́лшимъ
на́съ иму́щимъ, и непости́жному всѐ за­
гражда́ти испыта́ніе. Ты́же ѽ пребл҃же́­
нная, тресугу́бная цр҃це, бг҃ороди́тельни­
це, я́коже ѡна́съ до́лжна бя́ху, к̾тебѣ̀
и є́же къ бг҃у бл҃годерзнове́нными мольба́­
ми, є́же ѡтебѣ̀ та́йная сложе́нная словеса̀
сі́и ны́нѣ ху́дѣ по си́лѣ возглаша́хуся.
на́мъ же вы́ше слову́щи высото́ю и вели́че­
ствомъ, пресла́вныхъ ѡ тебѣ̀ ра́зумъ,
в̾да́си гла́съ разуми́въ, є́же гл҃ати крѣ́­
пость; Но ѽ влд̃чце всѣ́мъ человѣ́кѡмъ
са́мое прему́дрости соста́внагѡ сло́ва в̾мѣ­
сти́лище, пе́рвагѡ и нача́лнагѡ всея̀
вины̀; ѽ живота̀ да́телнице, и жи­
вы́мъ животѐ, и животу̀ пови́ннице;
ѽ ст҃а́я, и ст҃ы́хъ ст҃ѣ́йшая, вся́когѡ
сщ҃е́нія прест҃о́е сокро́вище; ѽ ча́­
сти не рѣши́мо ни раздѣля́емо, сово­
купи́вши бг҃у чл҃чество. ѽ црс̃тво ѿ
землѝ пе́рстнымъ ѿвы́шнія сла́вы,

держа́ву не побѣди́му иму́щи. ѽ хрс̃ти­
я́н̾скія вѣ́ры забра́ло, и натя̀ упова́ніе
возлага́ющымъ побо́рнице, пріимѝ ѿ на́съ
и́стиннагѡ свѣ́та, тобо́ю пріи́мшимъ,
є́же не явле́нныхъ ѻ́бразъ на́мъ єли́кѡ
мо́щьно, та́йно у́зрима славнослове́сія.
на́мъ же тобо́ю бг҃омт҃и крася́щи, сіѐ
возда́й малому́дру сему̀ возда́нія.
и́мамы бо сокро́вища и бога́тьство мнѡго­
цѣ́нно чс̃тнѣ́йшую твою̀, и къ твоему̀
сн҃у, ина́шему влд̃цѣ и цр҃ю̀ и бг҃у и гдс̃у,
моли́твену мольбу̀. єю́же и согрѣша́ю­
ще, въ бг҃а ѡчища́емъ исправля́юще, и
бл҃года́тно себѣ̀ пріе́млемъ. єю́же ору́­
жія ва́рварьская, стрелы̀ младе́нцємъ
вмѣня́емъ и шле́мъ, и лу́ку стрѣля́­
нія не́мощна пребыва́ютъ и бездѣ́лна.
и коне́чнѣе єю́же христія́нѡмъ всѣ́мъ
бл҃го́е исправля́етъся. и є́же къ бг҃у
подо́біе, и́маши люби́миче по та́иньству
сло́ва, а́ще и во мно́зѣ наде́жди не до­
ста́тно к̾ на́шей бо́дрости, но не ску́дно
чс̃тно́е та́иньство, є́же и высо́кое испроси́­
ти у́бѡ ѿ тебѐ, ра́ди с̾ше́дшаго съ нб҃сѐ
ѿ оц҃а̀ сло́ва, и пло́тію ѡдебелѣ́вша,
{#л. ѿг҃}

и всего̀ тебѐ чл҃колю́бія ра́ди со єдини́вша
себѣ̀, илѝ рещѝ вочл҃чившася, я́кѡ да
всего̀ тя̀ дх҃омъ ѡчи́ститъ. потреби́тъ
же ѕло́бльшихъ, и ѿ землѝ с̾ собо́ю возне­
се́тъ, и на оч҃ескомъ поса́дитъ прс̃то́лѣ.
к̾ нему́ же прс̃нѡ житіє́мъ и вѣ́дѣніемъ
восходѝ, бж҃е́ствеными пребыва́яи слове­
сы̀ и ѻ́бразы. бг҃а же ви́дя єли́кѡ
пости́женъ и ви́димь, єго́ же у яшня́­
тися, є́же к̾ видѣ́нію свѣ́томъ тща́­
щися, и добродѣ́тельными восхо́ды,
ѿ дѣ́йства же глаго́лю и видѣ́нія, цѣ­
ле́бнѣйшіи кро́токъ в̾ му́жа с̾ верше́на,
испо́лнена, в̾число̀ во́зраста исполне́нія
хрс̃то́ва. сни́мъже оц҃у сла́ва
и че́сть и держа́ва, ку́пнѡ
и ст҃о́му дху, ны́нѣ
и при́снѡ и во́ вѣки
вѣкѡ́мъ.

Мцс̃а того́же въ е҃і, дн҃ь. успе́ніе прест҃ы́я
влд̃чцы на́шея бцд̃ы, и прс̃нѡ дв҃ы мр҃і́и,
бл҃гословѝ о́ч҃е.

Єгда̀ к̾ себѣ̀ хрс̃то́съ и бг҃ъ на́шъ, прія́ти
бл҃гоизво́ли свою̀ мт҃рь, тогда̀ пре́жде
трі́єхъ днє́й, а́гг҃ломь є́же ѿ землѝ
преставле́ніе возвѣща́я то́й, вре́мя
речѐ мою̀ мт҃рь прія́ти мѝ к̾ себѣ̀. Ничто́
же у́бѡ ѡ се́мъ да смути́шися, но с̾ весе́­
ліемъ пріимѝ сло́во, и́бо къ без̾см҃ртнѣй
гряде́тъ жи́зни. и у́бѡ жела́ніемъ є́же
къ сн҃у преставле́нія, на́ гору єлеѡ́н̾скую
восхо́дитъ моля́щися сотща́ніемъ. ѻбы́­
чай бо имѣ́яше на́частѣ наню̀ восходя̑щи
моли́тися, нане́й же и нѣ́что пресла́внѡ
тогда̀ случи́ся бы́ти. прекланя́ютъ бо ся
ѿ себѐ я́же на горѣ̀ *садо́вія {*древа̀}, и я́коже ѡдш҃е­
вле́нная рабо́тна, подоба́ющую че́сть
влд̃чцѣ исполня́ютъ. по мл҃твѣ же, воз̾­
враща́етъся в̾ до́мъ, и а́біе потрясо́ша­
ся вся̀. ѻна́ же мнѡ́ги свѣщѝ сотво́рши
и бл҃годари́въши бг҃а, созыва́етъ своя̀ сро́­
дники и сосѣ́ды, украша́етъ всю̀ хра́ми­
ну, уготовля́етъ о́дръ, и вся̀ я́же къ
погребе́нію прили́чна, явле́нна твори́тъ,
{#л. ѿд҃}

я́же ѿ а́гг҃ла к̾ не́й гл҃анная, ѡ є́же на нб҃са̀
свое́мъ преставле́ніи. и во увѣре́ніе гл҃е­
мыхъ, да́ное себѣ̀ вра́віе показу́етъ, є́же
бѣ̀ фи́никовы вѣ́тви. Созва́нныя же
жены̀ сія̀ слы́шавше, рыда́ньми себѐ со
слеза́ми измыва́ху, и съ во́племъ воскли­
ца́ху, ку́пнѡ є́же би́тися ѡ ѡста́вльшей,
є́же си́рымъ не ѡста́тися сея̀ моля́хуся.
ѻ́на же, не то́кмѡ тѣ̑хъ, но и ве́сь ми́ръ
преста́вльшися, посѣща́ти и назира́ти
извѣ́ствоваше. и мно́гое печа́ли ѿє́мля­
ше, утѣ́шителными глаго́лы, и́ми же
ко ѡ́крестъ стоя́щымъ гл҃аше. Посе́мъ
ѡ свое́ю двою̀ ри́зу завѣщава́етъ, я́коже
та̀, двѣма̀ ни́щетныма вдови́цама,
єди́ну ри́зу взя́ти, я́же ѡбы́чна є́й
бѣ́стѣ и зна́емѣ, и я́же къ препита́нію
ѿ тоя̀ взима́стѣ. сія̀ та́кѡ заповѣ́даю­
щи є́й изавѣща́вающи; Бы́сть в̾неза́пу
гро́ма ѕѣ́лна шу́мъ, и мно́жайшихъ предъ­
ставле́ніе ѻ́блакъ, ѿ и́же по́ миру хрс̃то́­
вымъ учн҃кѡ́мъ напра́снѡ въ хра́мину бг҃о­
мт҃ре нося́щимъ; в̾ ни́хъ же бы́ша бг҃ому́­
дріи сщ҃еннонача́льницы. діѡнѵ́сіи ареѡ­
паги́тъ. ієроѳе́й же в̾ку́пѣ и тимоѳе́й

и́же поне́же навыко́ша вину̀ своегѡ̀ напра́­
снагѡ прише́ствія, такова́я к̾не́й вѣща́ютъ
глаго́люще, тебѐ влд̃чце пребыва́ющю в̾ми́рѣ,
я́коже самого̀ влд̃ку на́шего и учт҃ля зря́­
ще, утѣша́хомъся. ны́нѣже ка́кѡ сте­
рпи́мъ стра́сть; Но поне́же сн҃а и бг҃а тво­
егѡ̀ совѣ́томъ, преставля́ешися къ преми́­
рнымъ, ра́дуемъся и́же ѡтебѣ̀ устроя́е­
мымъ. сія̀ глаго́люще, слеза́ми себѐ
ѡблива́ху. ѻна́же к̾ни́мъ, нѝ дру́зи
и учн҃цы̀ моегѡ̀ сн҃а и бг҃а, не сѣ́тованіе со­
дѣ́ловайте моея̀ ра́дости; но моѐ тѣ́ло я́ко­
же а́зъ укра́шу на одрѣ̀, погреби́те. Си́мъ
та́кѡ испо́лненѡмъ, приспѣ̀ и паве́лъ бж҃е́­
ственый, сосу́дъ избра́нный, и́же и па́дъ
к̾ нога́ма бг҃омт҃ре, поклони́ся, ѿве́рзъ же
уста̀ своя̀, и мно́гими похваля́етъ ю̀,
ра́дуйся глаго́ля мт҃и жи́зни, и моея̀ про́­
повѣди изложе́ніе. а́ще бо и хрс̃та̀ не ви́­
дѣхъ, тебѐ зря̀, о́наго мнѣ́хъ ви́дѣти.
та́же завѣщава́етъ всѣ́мъ дв҃ца, воскла­
ня́етъся на одрѣ̀ украша́етъ пречс̃тое своѐ
я́коже хотя̑ше тѣ́ло. ѡ состоя́ніи ми́ра,
и ми́рнѣмъ житіѝ, мл҃твы твори́тъ, бл҃го­
слове́нія єя̀ ра́ди да испо́лнитъ и тѣ́хъ.
{#л. ѿе҃}

и та́кѡ в̾ ру́цѣ своегѡ̀ сн҃а и бг҃а дх҃ъ испу­
стѝ; и а́біе слѣпы́мъ очеса̀ просвѣща́хуся,
глухи́мъ слу́ха ѿверза́хуся, хромы́мъ
стопы̀ нѡ́гъ утвержда́хуся, и вся́ческая
какова̀ любостра́сть, и болѣ́знєй рѡ́дъ,
удо́бь разрѣша́шеся. поси́хъ начина́етъ
исхо́дная пѣ́нія пе́тръ. и воспріе́млютъ про́­
чіи ѿ апс̃лъ, ѻ́ви у́бѡ ѻ́дръ, ѻ́виже предъ­
иду́ще со свѣща́ми и пѣ́сньми, бг҃опрія́тное
тѣ́ло ко́ гробу предъсыла́юще. тогда̀ у́бѡ
и а́гг҃ли пою́ще слы́шахуся, и гла́сы преми́р­
ныхъ чинѡ́въ возду́ха исполня́ху. тогда́
же июде́истіи нача́лницы нѣ́кіихъ ѿнаро́да
поощри́вше, и въз̾яри́вше, увѣще­
ва́ютъ ѡкуси́тися, ѻ́дръ ѡ проврещѝ
на́ землю, нане́мъ же живонача́льное лежа̑­
ше тѣ́ло, и то̀ низъри́нути; но у́бѡ
дерза́теля су́дъ пости́гъ, ѡчє́съ слѣпо­
то́ю всѣ́хъ молча́ше. єди́нагоже си̑хъ,
и ру́ку лиша́етъ обою̀, не и́стовѣйше
устреми́вшася, и сщ҃е́ннагѡ о́нагѡ
одра̀ прикосну́вшася. и́же и при одрѣ̀
де́рзыя ру́цѣ ѿя́тѣ мече́мъ ѿмще́нія,
и ви́сящя ѡста́вль пребыва́ше бѣ́дно ви­
дѣ́ніе, до́ндеже вѣ́ровавъ ѿвсея̀ душѝ,

и исцѣле́нія получи́въ, устраби́ся я́коже
пре́жде здра́въ. та́коже ѡслѣ́пльшимъ
вѣ́ровавшимъ, ча́сть нѣ́кая покро́ва одру̀
возложена̀, исцѣле́ніе дарова̀. Апс̃ли же
доше́дъше ве́си гепсима́ніи, положи́ша во́
гробѣ живонача́лное тѣ́ло. и трѝ днѝ про­
быва́ху та́мѡ быва́еміи не преста́нно а́гг҃ль­
скія гла́сы слы́шаще. внегда́же по бж҃е́­
ственному смотре́нію, єди́нъ ѿ апс̃лъ
лише́нъ погребе́нія, живонача́льнагѡ
тѣ̑ла, въ тре́тіи приспѣ̀ дн҃ь, малоду́ше­
ствоваше ѕѣлѡ̀ и тужа́ше, за є́же и тому̀
не сподо́битися тѣ́хъ же, и́хъ же сподо́­
бишася всѝ со апс̃лы. я́коже у́бѡ
о́бщимъ совѣ́томъ ра́ди ѡста́вльшагося
апс̃ла, гро́бъ ѿверзо́ша, та́кѡ я́вльшуся
и́мъ всѣ́мъ, во є́же поклони́тися єму̀
прест҃о́му и пренепоро́чному о́ному селе́нію,
и ви́дѣвъше ужасо́шася, ѡбрѣто́ша
бо и то́щь ст҃а́гѡ тѣлесѐ, єди́ну бо
плащани́цу ѡста́вльшю взе́млютъ нау­
тѣше́ніе скорбѣ́ти хотя́щимъ, и всѣ́мъ
вѣ́рнымъ. и преложе́нія, не ло́жно
свидѣ́тельство. ниже́ бо достоя́ше ски́­
ніи живота̀ сме́ртію держи́мѣй бы́ти,
{#л. ѿѕ҃}

и ро́ждьшей зижди́теля тва́ри в̾ неистлѣ́­
ннѣмъ тѣлесѝ ѡста́вленнѣ бы́ти сътва́­
рію в̾землѝ истлѣ́ти. Вѣ́стьбо вѣ́сть
и́же зако́нъ по́чести роди́телємъ проуста́­
вивъ ѿ сн҃ѡвъ, мт҃рь свою̀ я́коже воля́ше
поче́ствовати. и єго́же самогѡ̀ тѣ́ло во́
гробѣ истлѣ́нія не уви́дѣ, та́жде и
роди́телницѣ свое́й дарова́ти. ѡ се́мъ
бо увѣщава́етъ и бж҃е́ственный дв҃дъ веле­
гла́снѡ мт҃рь съ сн҃омъ взыва́я ѿ уме́ршихъ
глаго́ля, воскс̃рнѝ гдс̃и в̾поко́й тво́й, ты̀
и кіѡ́тъ ст҃ы́ни твоея̀. и я́коже у́бѡ
сн҃ѡ́вень, та́кѡ и бг҃омт҃ре да́же до ны́нѣ
в̾ ка́мени изъсѣ́ченъ гро́бъ зри́тъся и по­
кланя́етъся, пребыва́я тѣлесѐ то́щь, въ
сла́ву и чс̃ть хрс̃ту̀ бг҃у на́шему, и пре­
бл҃гослове́нѣй влд̃цѣ на́шей бцд̃ѣ, и
прс̃нѡ дв҃ѣ мр҃іи. єя́же мл҃твами и предъ­
ста́тельствомъ, и не усы́пнымъ хода́тай­
ствомъ, бж҃е поми́луй и спасѝ на́съ, я́кѡ
бл҃гъ и чл҃колю́бецъ.

Вто́й же де́нь сло́во григо́рія двоесло́вца
ѡ ка́рпѣ єпкс̃пѣ.

Ка́рпъ єпкс̃пъ бѣ̀ ѿ європі́йска гра́да
му̑жь вельмѝ бл҃же́нъ житіе́мъ. по
вся̀ днѝ служа́ше бг҃у творя́ше литоргі́ю
ст҃у́ю, и свою̀ возноша́ше же́р̾тву со
мно́гими слеза́ми. єди́ною же ст҃ы́я
пріима́я та́йны в̾ну́трь сы́й во ст҃ѣ́мъ
ѻлтарѝ, ѿвѣ́тъ ѿ́ бг҃а прія̀ явле́ніемъ
нѣ́коего єму̀ попа̀ своего̀ глаго́люща,
творѝ у́бѡ єпкс̃пе є́же твори́ши служа̀
мѝ не уста́нетъ тѝ нога̀, и не ѡслабѣ́етъ
тѝ рука̀; но въ бцд̃ынъ бо дн҃ь успе́нія
пріи́деши ко мнѣ̀, и ѿда́мъ тѝ м̾зду̀
въ црс̃твіи нбс̃нѣмъ, со всѣ́ми ѡ ни́хъ же
мѝ мл҃тву приноси́лъ єсѝ. По єди́номъ
же лѣ́тѣ въ дн҃ь преставле́нія прест҃ы́я
бцд̃ы сконча́вшу єму̀ та́йны ст҃ы́я ли­
торгі́и, и пріи́мъ и́хъ и ѡблобыза̀ кли́­
рики своя̀ вся̀, и ѿ тѣле́сныхъ разрѣ­
ши́ся соу́зъ, в̾ ру́цѣ бж҃іи предадѐ
дш҃ю свою̀. и тогда̀ просвѣти́ся
лицѐ єгѡ̀ я́кѡ сл҃нце.
{#л. ѿз҃}

Вто́йже де́нь поуче́ніе на преста́вленіе
прест҃ы́я бцд̃ы.

Дне́сь бра́тіе мт҃и гдс̃а на́шегѡ іс҃а хрс̃та̀,
преста́вльшися ѿ житія̀ сегѡ̀ в̾вы́шнее
црс̃тво, и во ѻби́тель вѣ́чную вселя́етъ­
ся, в̾ ра́дость и в̾ весе́ліе не изрече́нное,
идѣ́же жела́ютъ а́гг҃ли прини́кнути. дне́сь
пра́дѣду ада́му вну̑ка и гс̃жа, ѿ землѝ
на нб҃са со сла́вою восхо́дитъ, в̾ жили́ща
во и́стину возлю́бленная и жела́емая.
дне́сь свобожда́етъся чл҃ческое єстество̀
пра́дѣднія кля́твы. дне́сь и бг҃опроти́­
вніи июде́е посрами́шася. Дв҃ая бо
и бцд̃а на нб҃са в̾ше́дъши, свое́ю ми́лостію
и мл҃твами, я́кѡ сл҃нце просвѣща́ющи
всего̀ ми̑ра. сла́вою и чс̃тію вѣ́рныя вѣнча­
ва́ющи, исповѣ́дающихъ ту̀ и́стинную
бцд̃у чс̃тую. та́бо яви́ся ѡби́димымъ
помо́щница, печа́льнымъ заступле́ніе,
скорбя́щымъ утѣше́ніе, боля́щымъ цѣ­
ли́тельница, вѣ́рнымъ утверже́ніе,
апс̃лѡмъ похвала̀, мч҃нкѡмъ крѣ́пость,
ст҃лємъ не тлѣ́нный вѣне́цъ. к̾ то́й
и мы̀ бра́тіе припаде́мъ с̾вѣ́рою те́плою,
къ пречс̃тѣй гс̃жи на́шей влд̃чцѣ и бцд̃ѣ,

всѣ́мъ се́рдцемъ и все́ю дш҃е́ю, во ст҃у́ю
цр҃ковь єя̀ ско́рѡ притеце́мъ. и тоя̀
пра́здникъ чс̃тны́й, с̾ любо́вію и свѣ́тлѡ
пра́зднуемъ, и с̾ весе́ліемъ и ра́достію и
похвала́ми пѣ́снь, по єли́ку мо́щьнѡ сію̀
убл҃жимъ, стра́нныя и ни́щыя в̾ до́мъ
сво́й пріе́млюще, и ми́ръ и любо́вь дру́гъ
ко́ другу иму́ще, и дш҃я на́шя и тѣлеса̀
ѡчище́на ѿ грѣ́хъ иму́ще. и та́кѡ чи́­
сти и непоро́чни, и соверше́ни с̾дѣ́лы до́­
брыми, досто́йнѣ присту́пимъ къ стра́­
шнѣй бж҃іей трапе́зѣ. и причасти́мъся
пречс̃тому тѣ́лу бж҃ію, и чс̃тнѣ́й кро́ви
єгѡ̀, со стра́хомъ бж҃іимъ и вѣ́рою. а не
я́коже ию́да не достои́нъ сы́й, и ѕло́бы
испо́лнь и сребролю́бія, неду́гомъ помра­
че́нъ, дерзну́въ к̾ таковѣ́й стра́шнѣй,
и ст҃ѣ́й бж҃іи та́йнѣ, и а́біе тогда̀ по хлѣ́­
бѣ вни̑де во́нь сатана̀, и удавле́нію в̾ да́въ
ся поги́бе. яды́й бо и пія̀ не досто́йнѣ,
в̾ су́дъ себѣ̀ я́стъ и піе́тъ, речѐ бж҃е́стве­
нный апс̃лъ, не раз̾сужа́яи тѣ́ла гдс̃ня.
Но мы̀ бра́тіе не та́цы бу́демъ, но бу́демъ
хрс̃толюби́ви, и братолюби́ви, и добродѣ́­
тельни. бж҃ія рабы̀ ст҃ли чс̃тнѣ имѣ́емъ.
{#л. ѿи҃}

тѣ́ми бо креща́емъся, и бл҃года́ть бж҃ію
вѣ́рою въ гдс̃а на́шегѡ іс҃а хрс̃та̀, и́хъ ра́ди
пріє́млемъ. и ѿ ни́хъ причаща́емъся пре­
чс̃тому тѣ́лу бж҃ію, и мл҃твами и́хъ ѿ
грѣ́хъ избавля́емъся. и́хъже моле́ніемъ,
и ст҃ы́й дх҃ъ схо́дитъ, на приноси́мую ст҃у́ю
просѳѷру̀, и претворя́етъ ю̀ тѣ́ломъ
бж҃іимъ, и вино́мъ ст҃о́ю кро́вію хрс̃то́вою.
и с̾ вѣ́рою пріє́млющимъ, быва́етъ во ѡста­
вле́ніе грѣхѡ́въ и жи́знь вѣ́чную. Сі́и бо
имену́ютъся земні́и а́гг҃ли, и нбс̃ніи
чл҃цы. Повину́йтебося речѐ апс̃лъ, наста́­
вникѡмъ ва́шимъ и покаря́йтеся, ті́и бо
бдя́тъ ѡ дш҃яхъ ва́шихъ, я́кѡ сло́во воз̾­
да́ти хотя́ще. да с̾ра́достію сѐ твори́те, а не
воздыха́юще. Помо́лимъ же пречс̃тую бг҃о­
мт҃рь, и и́же изнея̀ ро́ждьшагося, гдс̃а бг҃а
и сп҃са на́шегѡ іс҃а хрс̃та̀, я́кѡ да мл҃твами
єя̀ изба́витъ на́съ му́ки вѣ́чныя, и да́­
руетъ на́мъ ѡставле́ніе грѣхѡ́въ, и жи́знь
вѣ́чную, соверша́ющымъ тоя̀ пра́зднество,
и па́мять єя̀ че́стнѣ почита́ющымъ.
я́коже и въ мл҃твѣ свое́й речѐ, я́кѡ при­
зыва́ющихъ и́мя моѐ, нижѐ из̾менѐ
рожде́ннаго сн҃а и бг҃а моегѡ̀, ст҃ѝ мѣ́сто то̀,

и вся̀ я́же ко спасе́нію поле́зная проше́нія
тѣ́хъ испо́лни. и я́кѡ да сохрани́тъ на́съ
ѿ ѕлонача́льнагѡ врага̀, при́снѡ борю́щагѡ
на́съ, и тогѡ̀ сѣ́ти и ко́зни запина́ющагѡ
по́ бз҃ѣ стопы̀ на́шя. и да сподо́битъ на́съ
про́чее вре́мя живота̀ на́шегѡ, ми́рнѡ и
не мяте́жнѡ прейтѝ. и покая́ніемъ и сле­
за́ми и про́чими бл҃ги́ми дѣ́лы угоди́ти
єму̀. я́кѡ тоя̀ ра́ди ѿ здѣ̀ су́щихъ
не исцѣли́мыхъ измѣ́ньшеся, и та́мѡ
су́щихъ бл҃гъ получи́мъ, бл҃года́тію и
чл҃колю́біемъ гдс̃а на́шегѡ іс҃а хрс̃та̀. сни́мъ
же оц҃у ку́пнѡ сла́ва, че́сть и
держа́ва и покланя́ніе, и со ст҃ы́мъ
дх҃омъ, ны́нѣ и при́снѡ
и въ бесконе́чныя вѣ́ки
вѣкѡ́мъ.
{#л. ѿѳ҃}

Мцс̃а того́же въ ѕ҃і, дн҃ь. пренесе́ніе
нерукотворе́ннагѡ ѻ́браза, гдс̃а бг҃а и сп҃са
на́шегѡ іс҃а хрс̃та̀, ѿ єде́са въ цр҃ь гра́дъ,
бл҃гословѝ о́ч҃е.

Подоба́етъ на́мъ ѡ то́мъ ма́лѡ по бесѣ́до­
вати ѡ са́мой бл҃года́ти гдс̃а на́шегѡ іс҃а
хрс̃та̀, мно́га чюдеса̀ бл҃голѣ́пнѣ со­
дѣ́явшеи, и во всѣ́хъ устѣ́хъ повѣ́­
даемѣй. А́вгарь єде́сскій кня̑зь, и́же
ѿ си́нія прока́зы и раз̾слабле́нія томи́мь
бѣ̀, и жела́ше свои́ми ѻчесы̀ таковы́хъ
чюдє́съ дѣ́лателя ви́дѣти. и писа̀
к̾ нему̀ писа́ніе моле́бно ана́ніею, и́же бѣ̀
иконопи́сецъ, посла̀ и заповѣ́давъ, ѻ́бразъ
лица̀ єгѡ̀ преписа́въ принестѝ. и до­
ше́дъ ієросали́ма ана́ніа, дадѐ посла́­
ніе хрс̃то́ви. и ѡкуша́шеся бж҃е́стве­
ный ѻ́бразъ єгѡ̀ ва́пы на хартіѝ на пи­
са́ти, и не до умѣва́ше; небо̀ можа́­
ше бж҃ію сло́ву пости́гнути ѻ́бразъ.
Та́йнымъ же разумѣ́тель, и сокрове́­
нымъ ви́децъ, та́й быва́ющее явѝ,
во́ду испроси́въ іс҃ъ, умы̀ пречс̃тое лицѐ,
и плащани́цею отрѐ; ѽ чю́до, проста́я
вода̀, на ва́пное преложи́ся устроє́ніе.

и ++гбе́жи и соста́вы на плащани́цѣ иму́щи.
и в̾дадѐ ю̀ хрс̃то́съ ана́ніи, с̾ ни́мъ же и по­
сла́ніе ко а́вгарю, ре́къ, да́ждь посла́вше­
му тя̀. И сіѐ пріє́мъ а́вгарь, и проче́тъ
посла́ніе. плащани́цу же ту̀, на не́й же
бѣ̀ во ображе́ніе лица̀ хрс̃то́ва ѡблобыза́въ
и любе́знѡ поклони́въся, не исцѣ́лныхъ
ѻ́нѣхъ страстє́й свободи́ся. ѳадде́ю
же апс̃лу, по сп҃се́нѣй стра́сти к̾ нему̀
прише́дъшу, не пожда̀ а́вгарь, но со всѣ́мъ
до́момъ свои́мъ приступѝ къ бж҃е́ственно­
му кр҃ще́нію. ѿ то́лѣ нача́тъ а́вгарь
чти́ти бж҃е́ственую ико́ну хрс̃то́ву. и пред̾
лю́дскими враты̀ гра́да є́ллинскій ку­
ми́ръ стоя́щь разорѝ, и нерукотворе́нный
ѻ́бразъ в̾ тогѡ̀ мѣ́стѡ поста́ви. и запо­
вѣ́давъ си̑це, вся́кому входя́щему и исхо­
дя́щему, пе́рвѣе бж҃е́ственѣй ико́нѣ по­
кланя́тися, и та́кѡ входи́ти и исходи́ти.
написа́въ си̑це, хрс̃тѐ бж҃е на́шъ, вся́къ на­
дѣ́яися на тя̀, не постыди́тъся. Вре́мя же
пре́иде мнѡ́го. и нѣ́кто идолослужи́тель
пріи́мъ вла́сть гра́да того̀, восхотѣ̀ разори́ти
бж҃е́ственую ико́ну хрс̃то́ву, бѣсо́въское же
тѣ́ло в̾нея̀ мѣ́стѡ поста́вити на мѣ́стѣ.
{#л. ѿі҃}

разумѣ́въ же сѐ єпкс̃пъ гра́да, ча́емое
помышле́ніе сотворѝ свѣти́лникъ бж҃е́стве­
нѣй ико́нѣ в̾же́гъ, и кереми́дою за
ло́жь, пли́тами из̾ вну̀ в̾хо́ды за­
градѝ. и на ра́вное ѡбавле́ніе стѣ́ну
упра́ви. и єгда̀ неви́дима бы́сть, ѡста́­
ся нечести́вый начина́нія, и речѐ что̀
сѐ неви́димо бы́сть вре́менно сокро́вище.
Посе́мъ пріидо́ша пе́рси, хотя́ще взя́ти
гра́дъ єде́съ, и на недомы́сліе воста́ша
граждане ѡ ве́щи, и бг҃у моля́щеся, раз̾­
рѣше́ніе скорбє́мъ ѡбрѣто́ша. Во
єди́ну у́бѡ но́щь ула́лію єпкс̃пу, то­
гѡ́же гра́да жена̀ сла́вна я́вльшися речѐ,
верху̀ си́хъ вра́тъ гра́да сокрове́нъ бж҃е́­
ственый ѻ́бразъ нерукотворе́ный сп҃са хрс̃та̀,
возмѝ сего̀ и до́брѣ содѣ́еши. Ѻ́нъ же
пока́занагѡ мѣ́ста до ше́дъ, и ѡ ко­
павъ ѡбрѣ́те бж҃е́ственую ико́ну невре­
же́ну, и свѣти́лникъ за толи́кѡ вре́­
мя не уга́сшь, и положѝ на сохране́ніе
кереми́ду. Друго́е бо подо́біе не измѣ́­
ннѡ пе́рвому, воѻбрази́лъся бѣ̀ нане́й и
видѣ́нію послѣ́дуя єпкс̃пъ на разли́чныхъ
мѣ́стєхъ явля́я бж҃е́ственую ико́ну,

и я́кѡ огне́мъ прогони́ми бя́ху. и́же
бо надѣ́яхуся гра́дъ прія́ти пе́рси,
пострада́вше безъуспѣ́ха ѿступи́ша. и
поне́мъ же ѿ всю́ду цр҃кви до́брая при­
хожда́ху. бѣ́же у́бѡ бж҃іе хотѣ́ніе,
и бж҃е́ственому ѻ́бразу, со нн҃ѣми до́бры­
ми сокрове́ну бы́вшу въ цр҃ьстѣмъ гра́дѣ,
гре́ческую вла́сть держа́щу рома́ну, и́де
со тмо́ю наро́читыхъ вѡ́й, и да́въ, двѣ
ты́сящи сре́бреникъ, и удержа́щаго тогда̀
єде́сскій гра́дъ ами́ра, взя́тъ неруко­
творенный о́бразъ хрс̃то́въ, и тѣ́мъ ѡбо­
гатися. и из̾ше́дъше єпкс̃пи воспрія́ша
ѝ, и къ цр҃ю̀ гра́ду несу́ще вся̀ неду́ги
ѿгоня́ху. бѣ́си устраша́ющеся ѿ чл҃къ
ѿбѣга́ху глаго́люще, константи́нь гра́дъ
сла́ву и ра́дость ѡбрѣ́те. сего́же принесѐ
рома́нъ въ цр҃ьство своѐ, въ шесты́й на́де­
сять дн҃ь а́вгуста. єго́же цр҃ь и ст҃ль
со мнѡ́жествомъ нарѡ́да ра́достію пріи́мшє,
и вѣ́рою покло́ньшеся цѣлова́ша ѝ. и ѿто́­
лѣ пра́зднуетъ свѣ́тлѡ цр҃кви бж҃е́ствено­
му ѻ́бразу, бг҃ому́жнагѡ зра́ка хрс̃то́ва,
и́стиннагѡ бг҃а на́шегѡ.
{#л. ѿа҃і}

Вто́йже дн҃ь па́мять твори́мъ чл҃ко­
лю́бія бж҃ія, єгда̀ возвратѝ со студо́мъ
безбо́жныя ага́ряны при львѣ̀ царѣ̀ и­
са́врянинѣ.

Вбезбо́жныхъ у́бѡ ага́рянѣхъ си̑це є́сть
раз̾си́лнѣвъ срацы́ньскій язы́къ, и
мно́га мѣ́ста и страны̀ ѿє́м̾шимъ при
царѣ̀ львѣ̀ нарица́емѣмъ ко́нанѣ, по
земли́ же и по́ морю ѡбступи́ша кон­
стянти́нь гра́дъ, и взя́ти хотя́щимъ,
и христія́нъскую вѣ́ру преврати́ти на
свою̀ ле́сть мы́сляще, є́й же научи́шася
ѿ нѣ́коегѡ лжеучи́теля аріа́нина, ю́же
пріи́мъ мааме́дъ во єди́но нача́ло со­
ста́ви. Царе́виже льву̀ ѡбѣща́вшуся да́нь
дая́ти и́мъ. Ѻни́же восхотѣ́ша стра­
жє́й поста́вити у вра́тъ гра́да. но
ѡба́че христія́ньскихъ ра́ди моли́твъ,
в̾су́е труди́шася. Гдс̃ь бо бѣ̀ сохра­
ня́я и́хъ гра́дъ; Ви́дя же сіѐ сели́мъ
старѣ́йшина и́хъ, я́кѡ ничто́же успѣ́­
ша, и помоли́ся понѐ в̾ни́ти во́ градъ и
ви́дѣти; и получи́въ проше́ніе. и
в̾ни́де во врата̀ к̾ волу́ю торгу̀ на конѣ̀. и
пре́жде єго̀ в̾ше́дшимъ ины́мъ без̾вреда̀,

того́ же ко́нь не вхожда́ше. и возрѣ́въ
сели́мъ, и ви́дѣвъ ико́ну бцд̃ы верху̀
вра́тъ, и разумѣ̀ я́кѡ тоя̀ ра́ди в̾ни́ти
неда́стъся єму̀, я́кѡ ѕлу̀ рѣ̑чь гла­
го́ла наню̀. и вни́де пѣ̑щь, зазира́я
мно́гому ѕлоче́стію своему̀. Посе́мъ
возврати́шася безъ успѣ́ха, воєва́ни
бы́вше ѿ́ бг҃а мо́ромъ и гла́домъ погуби́вше
во́и мно́гія. на морстѣ́йже пучи́нѣ
бы́вше су́щіи в̾кораблѝ, ѿ гра́да ѻ́гне­
нагѡ погибо́ша. На успе́ніевъ бо дн҃ь
ст҃ы́я бцд̃ы ѡбступи́ша гра́дъ,
и па́ки в̾то́же успе́ніе ѿсту­
пи́ша посра́млени
на друго́е
лѣ́то
.

Вто́йже дн҃ь сло́во ѿ про̃ро́ческагѡ указа́­
нія ко епкс̃пѡмъ, и всему̀ сщ҃е́нному
чи́ну, я́кѡ учи́ти лю́ди
бе́зъстра́ха.

Си̑це глаго́летъ гдс̃ь, сн҃е человѣ́чь идѝ
и рцы̀ сн҃овѡ́мъ ізра́йлевымъ, и гла­
го́ли словеса̀ моя̀ к̾ни́мъ. не убо́йся
и́хъ, ни ужаса́йся лица̀ и́хъ, зане́же
{#л. ѿв҃і}

до́мъ раз̾гнѣ́ваяи є́сть. занѐ стра́­
жа да́хъ тя̀ до́му изра́йлеву. да
слы́шиши сло́во ѿ устє́нъ мои́хъ, и
воспрети́ши и́мъ ѿ менѐ. в̾негда̀ гла­
го́лю без̾зако́ннику, сме́ртію у́мре­
ши, и не возвѣсти́ши єму̀ ни со гла­
го́леши, я́кѡ ѡста́тися без̾зако́­
ннику, и ѡбрати́тися ѿ путѝ єгѡ̀,
я́коже жи́ву бы́ти єму̀. без̾зако́­
нникъ же то́й въ беззако́ніи свое́мъ
у́мретъ. кро́ви же єгѡ̀ ѿ рукѝ твоея̀
взыщу̀. и ты́ же а́ще возвѣсти́ши
без̾зако́ннику, и не ѡбрати́тъся ѿ
без̾зако́нія своегѡ̀, и ѿ путѝ своегѡ̀
без̾зако́ннагѡ, то́й без̾зако́нникъ въ
без̾зако́ніи свое́мъ у́мретъ, а ты̀
дш҃ю свою̀ изба́виши. и єгда̀ совра­
ти́тъся правди́вый ѿ пра́вдъ свои́хъ, и
сотвори́тъ согрѣше́ніе, и да́мъ му́ку
предни́мъ, то́й у́мретъ, я́кѡ ты̀
ѡста́ви єго̀ во грѣсѣ́хъ свои́хъ у́мре­
ти, занѐ не помяну́тъся пра́вды єгѡ̀
я́же сотворѝ. кро́ви же єгѡ̀ ѿ рукѝ
твоея̀ взыщу̀. ты́ же а́ще возвѣсти́­
ши правди́вому, я́коже не согрѣши́ти,

и то́й не согрѣши́тъ, правди́вый же жи́­
знію ѡживе́тъ, и ты̀ свою̀ ду́шю изба́­
виши. Па́ки же рече́мъ и ѿдѣя́ніи ст҃ы́хъ
апс̃лъ, я́коже речѐ паве́лъ, вы̀ вѣ́сте,
я́кѡ ѿ пе́рвагѡ днѐ ѿне́лиже пріидо́хъ
во асі́ю, ка́кѡ с̾ ва́ми всѐ вре́мя бы́хъ
рабо́тая гдс̃ви со всѣ́мъ смиреному́дріемъ,
и мно́гими слеза́ми и напа́стьми прилу­
чи́вшихъмися ѿ июде́йскихъ навѣтъ, я́кѡ
ничто́же ѡбину́хъся ѿ поле́зныхъ, є́же
несказа́ти ва́мъ, и научи́ти ва́съ предъ
людьмѝ и по домо́мъ, за свидѣ́тельствуя
июде́ѡмъже и є́ллинѡмъ, є́же къ бг҃у
покая́ніе, и вѣ́ру я́же къ гдс̃у на́шему
іс҃у хрс̃ту̀. Тѣ́мъ же свидѣ́тельствую
ва́мъ во дне́шніи де́нь, я́кѡ чи́стъ
а́зъ ѿ́ крове всѣ́хъ. не ѡбину́хъбося
є́же не сказа́ти ва́мъ всю̀ во́лю бж҃ію.
внима́йте у́бѡ себѣ̀, и всему̀ ста́ду.
а́зъ бо вѣ́мъ сѐ, я́кѡ по ѿше́ствіи
мое́мъ вни́дутъ во́лцы тя́жцы в̾ва́съ,
не щадя́ще ста́да. То́й же паве́лъ речѐ
в̾ посла́ніи к̾ тимоѳе́ю, а́ще кто̀ єпкс̃пь­
ству хо́щетъ, добру̀ дѣ́лу жела́етъ.
подоба́етъ бо єпкс̃пу не зазо́рну бы́ти,
{#л. ѿг҃і}

єди́ныя жены̀ му́жу, тре́зву странно­
люби́ву наказа́телну, не пія́ницы, не
сребролюби́ву, сво́й до́мъ до́брѣ стро́я­
щу. А́ще кто̀ своегѡ̀ до́му стро́ити
не мо́жетъ, то̀ ка́кѡ цр҃ковію бж҃іею
попече́тъся. и па́ки то́йже речѐ апс̃лъ,
проповѣ́дуй сло́во, насто́й, пону́ди
бл҃говре́меннѣ и безъ вре́меннѣ. ѡбличѝ
запрѣтѝ умолѝ, со вся́кимъ долготерпѣ́­
ніемъ и уче́ніемъ. бу́детъ бо вре́мя,
єгда̀ здра́ваго уче́нія не послу́шаютъ,
но по свои́хъ по́хотєхъ изберу́тъ себѣ̀
учи́телєй, че́шеми слу́хомъ, и ѿ и́стины
слу́хъ ѿвратя́тъ, и къ ба́снємъ укло́­
нятъся. Тѣ́мъ же бра́тіе сѐ слы́шавше,
попеце́мъся ѡ свое́мъ и ѡ людьско́мъ спа­
се́ніи, о́во моле́ніемъ, о́во преще́ніємъ
наказу́емъ лю́ди бж҃ія чи́стѡ житіѐ сна­
бдѣ́ти, и бг҃а млс̃тива себѣ̀ сотвори́ти.
и та́кѡ спасе́мъ себѐ и о́нѣхъ.
єму́же сла́ва ны́нѣ и при́снѡ
и во́вѣки вѣкѡ́мъ.

Мцс̃а того́же въ з҃і, дн҃ь. па́мять ст҃а́гѡ
мч҃нка мѷро́на, бл҃гословѝ о́ч҃е.

Се́й бя̑ше при декі́и царѣ̀, и антипа́трѣ
кня́зѣ аха́йстѣмъ, презвѵ́теръ цр҃ко́в̾­
ный, нра́вомъ бл҃гъ, ро́да че́стна и бога́­
та, къ бг҃у и человѣ́кѡ́мъ любо́венъ.
въ дн҃ь же хрс̃то́ва ржс̃тва̀, антипа́тру
въ цр҃квь в̾ше́дъшу, є́же я́ти хрс̃тія́ны
и му́чити. Ст҃ы́й же мѷрѡ́нъ ре́вностію
испо́лнься, досадѝ и поруга́ся єму̀.
тѣ́мъ повѣ́шенъ и стро́ганъ бы́сть. и
пе́щи разжже́нѣ бы́вши, я́кѡ шумѣ́ти
и исходи́ти пла́меню на мно́зѣ, в̾ню́же
в̾ ве́рженъ бы́сть. пе́щь же пріе́мъши
ст҃а́го, сохранѝ єго̀ невреди́ма. ѻ́гнь же
исше́дъ ѡпалѝ ѿ слу́гъ сто̀ и пятьде­
ся́тъ. Ст҃ы́й же пону́женъ є́же пожре́ти
непослу́шавъ, крое́нъ бы́сть на реме́ніе
ѿра́ма доногу̀. ѿни́хъ же исто́ргъ ст҃ы́й
єди́нъ реме́нь ве́рже на лицѐ антипа́трово.
к̾си́мъ же стро́ганъ бы́сть по дра́ному тѣ­
лесѝ. и посе́мъ в̾да́нъ бы́сть ѕвѣрє́мъ,
єму́же ѿ ни́хъ цѣ́лу и не вреди́му соблю­
де́ну бы́вшу. ви́дѣвъ же антипа́тръ
испо́лнься студа̀, убѝ себѐ свои́ма рука́ма.
{#л. ѿд҃і}

ст҃ы́й же в̾ кѵ́зикъ веде́нъ. и антипа́тромъ
ме́чное ѡсуже́ніе воспріе́мъ, ѿсѣко́ша
єму̀ главу̀. и та́кѡ вѣне́цъ муче́нію
воспрія́тъ.

Вто́йже дн҃ь ст҃ы́хъ мч҃нкъ, страто́на
фили́ппа и єѵ̾тихіа́на.

Сі́и в̾ никомиді́и проходя̑ще, наро́читіи
чл҃цы, на позо́рище восходя́ще, я́кѡ
собра́вшыяся лю́ди ѡ себѣ̀ учи́ти и ѿ
идолослуже́нія ѿступи́ти, и къ хрс̃то́вѣ
вѣ́рѣ приходи́ти. Нѣ́когдаже кня̑зь
позо́рище пра́здно безъчеловѣ́къ ви́дѣвъ,
и вину̀ увѣ́дѣвъ, я́кѡ ст҃ы́ми мч҃нки
наро́ди учи́ми су̑ть, и позо́рныя толпы̀
ѡста́виша, и но́вое нѣ́кое проходя̑ще жи­
тіѐ. оте́ческія обы́чаи преѡби́дяще. и́же
и на́скорѣ ст҃ы́я предъста́вити повелѣ̀. и
у́же предъста́вшымъ, и хрс̃то́ву вѣ́ру в̾себѣ̀
имѣ́ти исповѣ́даша, и ины́хъ учи́ти.
Приведе́ни же бы́вше на позо́рище, и ѕвѣ­
рє́мъ в̾да́ни бы̑ша, и́же безъвреда̀ ѿ ни́хъ со­
хране́ни бы̑ша. и вся́кими разли́чными
му́ками искуше́ни бы́вше. коне́чное во о́гнь
в̾ве́ржени бы́вше. и хрс̃та̀ ра́ди по́прище пре­
идо́ша, и со ѡдолѣ́вше вѣнцы̀ воспрія́ша.

Вто́йже де́нь по́вѣсть ст҃а́гѡ васи́лія
вели́кагѡ.

Ны́нѣже мно́зи ѿчеловѣ́къ, за́повѣдємъ
у́бѡ сп҃совымъ я́вѣ не радя́тъ, преда́нію
же человѣ́ческому повину́ютъся па́че, є́же
бо в̾ гора́хъ жи́ти и пусты́няхъ, и́же въ
клѣ́ти себѐ затворя́ти, и є́же єди́ною
дне́мъ я́сти. и є́же вся́чески ѡсвѣня́ти­
ся хлѣ́ба и воды̀. вре́тище же носи́ти,
и желѣ́зомъ свя́зовати сѝ тѣ́ло. и є́же
безъобу́щи ходи́ти. на земли́ же лега́ти,
и бѣ́гати мно́гія бесѣ́ды, преда́ніе є́сть
ст҃ы́хъ мужє́й до́брѣ умы́шлено. но
до́лжни су̑ть сія̀ творя́щіи, пре́жде хра­
ни́ти за́повѣди гдс̃ни; долготерпѣ́ніе
глаго́лю и и́стину, смиреному́дріе, и
воздержа́ніе, ѕлы́хъ не помина́ніе, и
настоя́щихъ безъ пристра́стіе. вѣ́ру
же и терпѣ́ніе, и любо́вь не лицемѣ́­
рну, єя́же кромѣ̀ не возмо́жно уго­
ди́ти бг҃у. Подоба́етъ бо во и́стину и
та́я храни́ти, и ѻ́на не ѡставля́ти, и
ѕлы́хъ ѡ свѣня́тися дѣя́ніи по гдс̃ню
преда́нію. бѣ́гаємъ у́бѡ гнѣ́ва и
памятоѕло́бія, и кля́твы и укоре́нія,
{#л. ѿе҃і}

жела́нія є́же к̾ жена́мъ. дме́нія же и
тщесла́вія, лжѝ и клеветы̀, вражды̀
и за́висти, и вся́кія ѕло́бы. а́зъ у́бѡ не
храня́щаго сія̀ рече́нныя за́повѣди гдс̃ня,
клену́щажеся и лжу́ща и укоря́юща,
и ра́дующася ѡ чу́ждихъ ѕлы́хъ, не при­
е́млю, нижѐ а́ще всѐ житіѐ своѐ во
вре́тище и по́пелѣ живе́тъ, и ни єди́­
ну же воспріє́млетъ пи́щю; но зане́­
же лу́чьшее бы́ти мню̀, є́же бл҃го­
да́рнѣ просты́хъ браше́нъ причаща́тися,
и и́же по си́лѣ по́стничество умѣ́рити
себѣ̀, не́же человѣ́ческихъ преда́ніи держа́­
тися, не неради́ти же ѡ за́повѣдєхъ
гдс̃нихъ. а́зъ у́бѡ мно́гихъ ви́дѣвъ,
коне́чное воздержа́ніе иму́щя, и мертво̀
тѣ́ло ѡбнося́щя, мно́гагѡ ра́ди по́стни­
ческагѡ презмѣ́рія, ѕѣлѡ̀ тѣ́хъ пріє́­
мляхъ. зане́же вѣ́мъ воз̾держа́ніе, и
бѣ́сы изгоня́ще, єгда̀ и́мать ѡсно­
ва́ніе за́повѣди гдс̃ни, и ѕлы́хъ ѡ свѣ­
не́ніе. я́коже пото́мъ ви́дѣхъ и́хъ клену́­
щихъ ся, и лжу́щихъ и укоря́ющихъ,
моли́хъ тѣ̑хъ глаго́ля, ѽ бра́тіе, єль­
ма̀ ст҃ы́хъ мужє́й преда́нія твори́те,

прилежи́те и за́повѣдємъ гдс̃нимъ. и
ѡсвѣня́йтеся совѣща́ній лука́выхъ
кля́твы и хулы̀, лжѝ и памятоѕло́бія,
и про́чихъ. ѻни́же не прія́ша совѣ́тъ, и
ѡсегѡ яви́шася я́кѡ і онѝ я́же творя́ху,
сла́вы ра́ди человѣ́ческія та́кѡ дѣ́яху, и вя́­
ще ничто́же. воздержа́ніе бо болѣ́знь
и́мать пло́тьску. А є́же ѡ свѣни́тися,
лжѝ и укоре́нія и кля́твы, внима́нія
тре́буетъ єди́наго. Сія́ бо законополо́­
жникъ хрс̃то́съ в̾зако́нилъ є́сть. ѡ ни́хъ
же и му́читъ, и прети́тъ преступа́ющыя.

Вто́йже дн҃ь сказа́ніе григо́рія двоесло́ва
ѡ просѳирѣ̀ є́юже за усо́пшихъ дш҃я
в̾ сорокоу́стіи слу́жатъ.

Мнѡ́го мо́жетъ дш҃ямъ прест҃а́я же́ртва
помощѝ, в̾ не́й же за усо́пшія дш҃я
просѳѷры̀ прино́сятъ, сея́ бо и са́ми
ду́ши уме́ршихъ ѿ на́съ тре́буютъ,
я́коже сказа́ ми фили́ѯъ єпкс̃пъ, слы́­
шавъ ѿ нѣ́коегѡ че́стна презвѵ́тера,
и́же бѣ̀ в̾пе́рсстѣмъ гра́дѣ в̾кенту́лѣ,
служа́и въ цр҃кви ст҃а́гѡ іѡ҃а́нна. то́й же
по́пъ имѣ́яше обы́чай в̾ ба́ни мы́тися.
{#л. ѿѕ҃і}

прише́дъшу же єму̀ в̾ нѣ́кій де́нь на
умове́ніе в̾ ба́ню, и ѡбрѣ́те нѣ́коегѡ
му̑жа не зна́ема, гото́ва на послуже́ніе
єму̀, и́же изу̀ єго̀, и ри́зы єгѡ̀
пріи́мъ, и положѝ я̀ в̾ ба́нѣ, и служа́ше
єму̀. и из̾лѣ́зъшу єму̀ из̾ ба́ни,
и поня́вы єму̀ в̾да̀, и всѐ послуша́ніе со­
вершѝ. мно́гажды же сему̀ быва́ему
и задо́лгѡ вре́мя. То́й же презвѵ́теръ
па́ки в̾ нѣ́кій де́нь в̾ ба́ню идя̀, по­
мы́сли глаго́ля въ себѣ̀, не лѣ́пѡ бы́сть
мнѣ̀ тщи̑ма рука́ма итѝ в̾ ба́ню мы́ти­
ся къ о́ному му́жу служа́щему мѝ с̾по­
пече́ніемъ. двѣ́ же у́бѡ просѳѷры̀ взе́мъ
и и́де в̾ ба́ню, и па́ки ѡбрѣ́те о́ного му̑жа
ту̀. и по ѻбы́чаю па́ки всѐ соверши́въшу
єму̀ послуже́ніе. мы́въшужеся єму̀,
и па́ки ѿходя́щу єму̀ в̾ до́мъ сво́й, и
послужи́вшему му́жу в̾дадѐ двѣ̀ просѳѷ­
рѣ̀, моля̀ ѝ, да пріи́метъ я̀. ѻ́нъ же
пла́чася речѐ, сі́й хлѣ́бъ ст҃ъ є́сть, и
ѿрече́ся єго̀ глаго́ля, не могу̀ я́сти
єго̀. и ѿвѣща́въ по́пъ, чесѡ̀ ра́ди.
ѻ́нъ же ѿвѣща́въ, мене́ бо сѐ єго́же
ви́диши, а́зъ є́смь бы́лъ господи́нъ

мѣ́ста сегѡ̀, но грѣ́хъ мои́хъ ра́ди ѡсу­
ди́хъся здѣ̀ служи́ти мы́ющимъся.
а́щели хо́щеши пода́ти ми хлѣ́бъ се́й,
то̀ пода́й менѐ ра́ди ко всемогу́щему бг҃у
и молѝ ѡ мнѣ̀ о́ч҃е, и тогда̀ увѣ́мъ а́ще
тебѐ послу́шаетъ бг҃ъ, єгда̀ сѣ́мѡ при­
ше́дъ и не ѡбря́щеши менѐ в̾ се́мъ мѣ́­
стѣ. се́же ре́къ, и неви́димъ бы́сть
чл҃вкъ то́й, и показа́ся я́кѡ дх҃ъ
бя̑ше. по́пъ же о́нъ недѣ лю єгѡ̀ ра́ди
алъка́ше, со слеза́ми бг҃а моля̀ ѡ не́мъ,
и сп҃сеныя же́ртвы творя̀. пото́мъ же
ше́дъ въ ба́ню, и не ѡбрѣ́те ктому̀
чл҃вка того̀. ѿ сего́ же є́сть разумѣ́­
ти, ко́ль поле́зно ст҃а́я литургі́а на́помощь
уме́рьшимъ, и сея̀ и са́ми ду́ши
ѿ на́съ пріе́млютъ си̑хъ. и ѡ се́мъ вѣ́до­
мо вы̀ бу́ди, я́кѡ о́ноя дѣ́ля
сп҃се́ныя слу́жбы, грѣсѝ проща́­
ютъся. бг҃у на́шему сла́ва
нн҃ѣ и прс̃нѡ и во́ вѣки
вѣкѡ́мъ.
{#л. ѿз҃і}

Мцс̃а того́же въ и҃і, дн҃ь. па́мять ст҃ы́хъ
мч҃нкъ флора̀ и ла́вра бл҃гословѝ о́ч҃е.

Сі́я ст҃а́я бра́тія бѣ́ста, близнеца̀ су̑ща,
каменостру́жца же худо́жествомъ, и́же
нака́зана бы́вша про́кломъ и маѯи́момъ.
поучи́тели же за хрс̃та̀ муче́нію. и ѡста́ви­
ста византі́йская прохоже́нія, и идо́ста
во иллири́къ, в̾ ве́сь дардані́йскую, и во́
градъ улпиа́нскій, идѣ́же повелѣ́ніемъ
ликіо́на игѣ́мона, съ други́ми нѣ́которыми
ѡбходя́ща, своѐ худо́жество дѣ́ласта.
та́же ѿ негѡ̀ по́слана бы́ста к̾ ликині́ю сы́ну
єлпиді́и цр҃цы. и́ма же ликині́й по дадѐ
стяжа́нія, и рукоположе́ніе. и повелѣ̀ со­
зда́ти и́ма цр҃ковь и́дольскую, начерта́въ
ю̀ и написа́въ воѡбраже́ніе. Ст҃а́я же стя­
жа́нія тре́бующымъ разда́ста. но́щію же
къ бж҃е́ственѣй упражня́стася моли́твѣ.
дні́юже дѣ́лу каса́хуся, воспѣва́юща це́рковь
дѣ́ласта и прилѣжа́ста. и я́кѡ пома́лѣ съ­
верше́нѣ є́й бы́вши, а́гг҃лу с̾ помога́ющу
и́ма и укрѣпля́ющу. а́біе меренти́нъ
ієре́й вѣ́рова во хрс̃та̀. у́же пе́рвѣє вѣ́­
ровавъшу сы́ну єгѡ̀ анаста́сію, зане́ же
ѿве́рзъшуся о́ку єгѡ̀ слѣпому ст҃ы́ма.

и ни́щихъ собра́вша хрс̃то́ва мч҃нка, и́мъ
же подава́ста имѣ́нія, и связа́ста за ші́я
истука́нныя, и на́ землю о́на низло­
жи́ста. Та́же запа́льша свѣщѝ мно́ги,
и цр҃ковь ѡст҃и́ста. да єгда̀ нача́ста пѣ́­
ти, сла́ва ти хрс̃тѐ бж҃е апс̃лѡмъ похва­
ла̀, предъидя́шеже предъни́ми ѻ́бразъ
чс̃тна́гѡ крс̃та̀. сѐ всѐ увѣ́давъ ликині́й,
повелѣ̀ за жещѝ пе́щь, и та́мѡ ни́щихъ
воврещѝ. и та́кѡ в̾ве́ржени преда́ша дх҃и.
Ст҃ы́й же фло́ръ и ла́връ ко о́си колесє́мъ
привя́зана, біе́на бы́ста. Та́же по́слана
бы́ста ли́кону. и́хъ же пріе́мъ ли́конъ,
в̾ве́рже я̀ в̾ студене́цъ глубо́къ, идѣ́же
с̾ше́дъше мольбы̀ бг҃у приноша́ху ѡ воспо­
мина́ющихъ тѣ́хъ, и ѡ бл҃гостоя́ніи ми́­
ру, и є́же преста́ти гоне́нію, и испусти́ста
дш҃я. в̾ нѣ́каяже лѣ́та пренесе́на бы́ста
тѣлеса̀ єю̀ в̾констянти́нь гра́дъ, и по­
ложе́на чс̃тнѡ в̾ ра́цѣ, точа́ще уха́нія
цѣльба́мъ притѣка́ющимъ с̾ вѣ́рою. со­
верша́етъжеся собо́ръ єю̀ во ст҃ѣ́мъ и́хъ
муче́ніи, бли́зъ цр҃кве
ст҃а́гѡ апс̃ла
фили́ппа.
{#л. ѿи҃і}

Вто́йже дн҃ь стра́сть ст҃ы́хъ мч҃нкъ єрма
и серапиѡ́на и полие́кта и́же в̾ ри́мѣ.

Сі́и ѡклевета́ни бы́ша ѿ невѣ́рныхъ, я́кѡ
хрс̃та̀ чту́тъ, а и́дѡлъ ѿвраща́ютъся и
гнуша́ютъся, я́ти бы́вше и предъста́ша
ри́мскому єпа́рху, и исповѣ́даша хрс̃то́­
ву вѣ́ру со дерзнове́ніемъ. и пе́рвое же
въ смра́днѣй темни́цѣ и́хъ затвори́ша
и па́ки изведе́ни бы́ша ѿто́лѣ, и пожре́ти
и́долѡмъ невосхотѣ́ша. того̀ ра́ди скво́зѣ
тѣ́сная и не проходи́мая мѣ́ста влачи́ми
бы́ша. и та́кѡ ѡ ка́меніе ударя́еми,
чс̃тны́я своя̀ дш҃я бг҃у преда́ша, воспріе́мъ­
ше та́мѡ присносу́щее бл҃же́ньство, идѣ́­
же всѣ́мъ веселя́щимъ ся жили́ще.

Вто́йже дн҃ь поуче́ніе ѡ у́сцѣмъ путѝ
веду́щемъ в̾ жи́знь вѣ́чную, и ѡ ши­
ро́цѣмъ веду́щемъ ны̀ в̾ поги́бель и въ
му́ку вѣ́чную.

Подвиза́йтеся бра́тіе тѣ́снымъ путе́мъ
в̾ ходя́щимъ в̾ жи́знь вѣ́чную; є́же
є́сть ско́рбный пу̑ть веду́щіи въ црс̃тво
нбс̃ное, вѣ́ра любы̀ ми́лостыня, послу­
ша́ніе бдѣ́ніе воздержа́ніе. ни упи­
ва́йтеся ни ѡ клеветава́йте, ни зави́дите

ни лжи́те и не свари́теся, ни убі́йте,
ни кра́дите, и не гнѣ́вайтеся ни яри́те­
ся ни горди́те ни велича́йтеся, ни тще­
сла́вія жела́йте; но смире́нѡ и сокруше́­
нѡ срд̃це имѣ́йте, пла́читеся грѣхѡ́въ
свои́хъ, тужи́те и пецы́теся ѡ свое́мъ
спасе́ніи. па́че вся́кого человѣ́ка смири́­
теся, ни ѡсуди́те никогоже. всего́ бо
є́сть ѕлѣ́е, є́же инѣ́хъ ѡсужа́ти.
Рече́ бо гдс̃ь, не ѡсужа́йте, да не ѡсу­
же́ни бу́дете. но сѐ є́сть спасе́ніе,
є́же ѡсужа́ему терпѣ́ти, и укоря́юще­
му смири́тися, и грѣшнѣ́йша себѐ
всѣ́хъ твори́ти предъбг҃омъ и человѣ́ки.
сі́й тру́дъ предъна́ми є́сть. ѡне́мъ же
речѐ дв҃дъ, смири́хъся и сп҃се́ мя. ѡбра­
ти́ся дш҃е моя̀ в̾поко́й тво́й, я́кѡ гдс̃ь
бл҃го сотворѝ тебѣ̀. А сѐ простра́нный
пу̑ть и широ́кій веды́й в̾ поги́бель; не­
вѣ́ріе не поко́рство, не послуша́ніе, горды́­
ня, велича́ніе, тщесла́віе и лѣ́ность,
пія́ньство и ѡбъяде́ніе, блу́дъ, за́­
висть, клевета̀ и не́нависть. ропта́ніе
и хула̀, дш҃егу́бная я́рость, и є́же
ѡсужа́ти бли́жняго. и к̾ си́мъ грѣ́хъ
{#л. ѿѳ҃і}

на грѣ́хъ прилага́ти, и без̾зако́ніе къ
без̾зако́нію. всего́ бо ѕлѣ́е є́сть,
є́же инѣ́хъ ѡсужда́ти. но єгда̀ на́съ
похва́лятъ человѣ́цы, илѝ бѣсо́въ­
скія по́мыслы велича́ти на́чнутъ, тогда̀
мы̀ грѣхѝ своя̀ помы́слимъ. Тѣ́мъ
же за́зримъ себѣ̀, да ст҃о́е смире́ніе
пребу́детъ в̾на́съ, и дх҃о́вная бл҃года́ть
покры́етъ ны̀. а́ще ли возвелича́емъся
илѝ возвы́симъся, послу́шающе бѣсо́в̾­
скихъ помышле́ніи, и бу́демъ велича́­
вы, то̀ дх҃ъ ст҃ы́й ѿсту́питъ ѿ на́съ,
и бу́демъ безом̾зды̀; тѣ́мъ же бра́тіе
со вся́цѣмъ тща́ніемъ рабо́таемъ бг҃у въ
та́йнѣ, и то́й возда́стъ на́мъ явѣ.

Вто́йже де́нь поуче́ніе ст҃а́гѡ васи́лія
вели́кагѡ.

По́стъ у́бѡ, и бдѣ́ніе, и на землѝ лега́­
ніе, и вся̀ я́же кромѣ̀ зако́на влд̃чня
соверша́ема, пріє́млетъ хрс̃то́съ, и
не́же преда́нія су̑ть ст҃ы́хъ мужє́й.
не му́читъ же и́же не́мощи ра́ди не бре­
гу́щихъ та̀. ѡ свои́хъ же за́повѣдєхъ со
ѿрече́ніемъ ре́клъ є́сть, му́чити лѣ́ности
ра́ди преступа́ющихъ. а́зъ у́бѡ и́ноки

хощу̀ ѡсвѣня́тися за́висти и клеветы̀,
украше́нія и смѣ́ха бесчи́ннагѡ, ку́пли
без̾мѣ́рныя, и праздносло́вія, лжѝ и
укори́зны, кля́твы же и льстѝ, и любона­
ча́лія, пія́нства ѡбъяде́нія и суди́щъ,
не́нависти же и непокоре́нія, и про́чихъ. {*зрѝ}
А́ще купу́етъ кто̀ что̀, без̾лжѝ и кля́твы
твори́ти до́лженъ є́сть купова́ніе. а́ще
преспѣва́етъ в̾ слу́жбѣ, без̾дме́нія и тще­
сла́вія то̀ твори́ти. покаря́тися у́бѡ боль­
ши́мъ, люби́ти же ме́ншихъ. не печа́ловати­
ся ѡ чюжи́хъ бл҃ги́хъ. се́ бо за́висть є́сть.
нижѐ ра́доватися ѡ чюжи́хъ ѕлы́хъ, се́ бо
не́нависть є́сть. ни в̾ бесѣ́дахъ скверносло́­
вія пріима́ти. не хотѣ́ти никому́ же ѕло̀,
нижѐ ле́сть сострая́ти накого̀. нижѐ уничи­
жа́ти кого̀, я́кѡ стра́стна и лѣни́ва, но прс̃нѡ
всѣ́хъ надѣ́ятися исправле́нію. нижѐ поми­
на́ющаго ѕло́бу тща́тися ѿмща́ти, но не
помина́ніемъ печа́льных̃ побѣжда́ти ѕло́бу
оби́дящагѡ. такова́го по́стника пріє́млет̃
бг҃ъ, бл҃га и бл҃гочести́ва, и смотрели́ва и
кро́тка, предъпочита́юща всегда̀ па́че сво­
егѡ̀ успѣ́ха, є́же є́сть инѣ́мъ на по́льзу.
єму́же ѿ у́стъ не исхо́дитъ ле́сть;
{#л. ѿк҃}

Вто́йже дн҃ь поуче́ніе ѡ́ мирѣ и ѡ любвѝ
я́кѡ всего̀ лу́чши є́сть.

Смиря́йтеся бра́тіе и люби́те дру́гъ
дру̑га, и бг҃ъ ми́ра и любвѐ да бу́­
детъ с̾ ва́ми. ничто́же бо є́сть
ми́ра и любвѝ до́брѣе. тѣ́ми бо
ра́ть и вся́ка ѕло́ба разруша́етъся.
бу́дите дру́гъ дру́гу милосе́рди и бла́­
зи. я́коже ѡ се́мъ и хрс̃то́съ речѐ, сѐ
за́повѣдь но́ву даю̀ ва́мъ, да лю́би­
те дру́гъ дру̑га. и ѿ сегѡ̀ разу­
мѣ́ютъ всѝ, я́кѡ моѝ єстѐ учн҃цы,
а́ще любо́вь между̀ собо́ю и́мате.
да идѣ́же а́зъ є́смь, ту̀ и вы̀ со
мно́ю бу́дете. И па́ки речѐ, бл҃же́ни
смиря́ющіися, я́кѡ ті́и сн҃ове бж҃іи
нареку́тъся. да что̀ є́сть сего̀ бл҃же́­
ннѣйше, є́же въ црс̃твіи нбс̃нѣмъ с̾ бг҃омъ
бы́ти. всегда́ бо хрс̃то́мь зово́ми єсмы̀
в̾нѐ. Тогѡ̀ ра́ди не мози́те бра́тіе ѕло́­
бою ѿлучи́тися ѿ́ бг҃а возлю́бльшаго ны̀,
и преда́вшаго себѐ за ны̀, и искупи́вшаго
ны̀ свое́ю кро́вію, и ѡста́нитеся ѿ
ѕлѡ́бъ ва́шихъ. и во все́мъ любо́вь
гони̑те, є́же є́сть соу́зъ соверше́нія.

я́кѡ любы̀ покрыва́етъ мно́жество грѣ­
хо́въ, и гнію́щыя у́ды дш҃е́вныя исцѣ­
ля́етъ. любя́и бо бра́та своего̀, во свѣ́­
тѣ пребыва́етъ. поне́же бг҃ъ любы̀ є́сть,
и стра́ха нѣ́сть в̾ любвѝ; но соверше́ная
любо́вь, во́нъ изме́щетъ стра́ха. Тѣ́мъ
же а́ще кто̀ хо́щетъ без̾ труда̀ спасти́ся,
да имѣ́етъ ко всѣ́мъ любо́вь к̾ ма́лымъ
и к̾ вели́кимъ. любы̀ бли́жнему ѕла̀ не
твори́тъ. хотя́щіи бо ми́ра, возве­
селя́тъся в̾ любвѝ. лу́чше є́сть я́сти
хлѣ́бъ с̾ зе́ліемъ су́хъ с̾ любо́вію, не́же
ли теле́цъ упита́нный со враждо́ю
бг҃у на́шему сла́ва, ны́нѣ и при́снѡ
и во́ вѣки вѣкѡ́мъ.
{#л. ѿк҃а}

Мцс̃а того́же въ ѳ҃і, дн҃ь. па́мять ст҃а́гѡ
мч҃нка андре́а стратила́та, и и́же сни́мъ
сконча́вшихъ ся дву̀ ты́сящу девяти́­
десяти и трє́хъ, бл҃гословѝ о́ч҃е.

Се́й бя̑ше во времена̀, нечести́вагѡ царя̀
макси́міа́на, вои́ньствуя на восто́чнѣй
странѣ̀ подъ антіо́хомъ, всегѡ̀ чи́на
воєво́д̾ствующи, по́сланъ бы́сть ѿнегѡ̀
съ инѣ́ми воєво́дами. пе́рстѣй же си́лѣ
ми́мѡ ходя́щи по гре́ческихъ предѣ́лѣхъ,
{#л. ѿк҃а}

и та́мѡ быва́ющыя ѡ погубля́юще. при­
зва́въ хрс̃та̀ и научи́въ и́же сни́мъ, та́ко
же призыва́ти, и побѣди́въ пе́рсы, и по­
гна̀, и раз̾гна̀. и ѡбезнаде́жнѣй побѣ́­
дѣ су́щихъ сни́мъ, и ѡ хрс̃то́вѣ вѣ́рѣ
прито́рже, за єго́же бра́нь со ѡдолѣ́на
бы́сть. ѡклевета́нъ же бы́въ то́й, и
и́же сни́мъ ко антіѻ́ху, предъста̀ єму̀
я́кѡ ѡсуже́нъ. и а́біе же по желѣ́зну
одру̀ раз̾же́ну простертъ бы́въ. а ині́и
же сни́мъ во́ини начетвероуго́лныхъ древе­
сѣ́хъ, ру́цѣ и́мъ пригвозди́ша. та́же
ѿ ины́хъ ты́сяща во́инъ, антіо́оху пове­
лѣ́вшу в̾подъго́ріе ве́си тоя̀, гна́ни бы́­
ша. и́хъже ѡгласи́въ ст҃ы́й мч҃нкъ, къ
хрс̃то́вѣ вѣ́рѣ приведѐ. се́же увѣ́дѣвъ
антіо́хъ, и и́же сни́мъ мч҃нки, и того̀
пресла́внаго мч҃нка, мече́мъ посѣщѝ
повелѣ̀.

В то́йже де́нь стра́сть ст҃ы́хъ мч҃нкъ
тимоѳе́я ага́пія и ѳе́клы.

Сла́вный мч҃нкъ тимоѳе́й, бы́сть
ѿ палести́ны га́з̾скагѡ гра́да, и
занѐ житіе́мъ и сло́вомъ чю́денъ,
учи́тель бл҃гоче́стію устрое́нъ бы́въ

и я́тъ бы́въ в̾ га́зѣ, и предъста̀ кня́ѕю
урва́ну и вопроше́нъ бы́въ, и исповѣ́да
себѐ христія́на, хрс̃то́во же смотре́ніе, и
є́же к̾ на́мъ прише́ствіе и воплоще́ніе извѣ­
сти́въ, и тогѡ̀ ра́ди вся́кими ѻ́бразы
му́къ искуше́нъ бы́въ, и ника́коже пре­
клони́ся. Посе́мъ о́гневи преда́нъ сконча́­
ся. Тогда́же во гра́дѣ то́мъ ага́піи и
ѳе́кла му́ками ѕлы́ми испы́тана бы́вша.
и єще́ же хрс̃то́ву вѣ́ру держа́ща, в̾ве́рже­
на бы́ста ѕвѣрє́мъ, и та́кѡ муче́нія
коне́цъ прія́ста, и бг҃опобѣ́дный
воспрія́ста вѣне́цъ.

Вто́йже де́нь поуче́ніе ѡ мл҃твѣ, я́кѡ
тою̀ всея̀ напа́сти из̾бу́демъ, и млс̃ть
получи́мъ.

Добро̀ є́сть моли́тися бра́тіе мл҃твою всегда̀,
и бесѣ́довати къ бг҃у. у́тренюющаго бо
речѐ къ бг҃у вседержи́телю въ мл҃твѣ, ско́­
рѡ услы́шатся моле́нія. Са́мъ бо речѐ
гдс̃ь, призови́ мя въ дн҃ь печа́ли твоея̀,
и изба́влю тя. моли́темися, и услы́шу
вы̀. взыщи́те менѐ всѣ́мъ срд̃цемъ ва́­
шимъ, и явлю́ся ва́мъ. не заме́дли ѿ­
да́ти моли́твы твоея̀ во́ время подо́бно.
{#л. ѿк҃в}

єгда́же ста́нете моли́тися, ѡставля́йте
а́ще что̀ и́мате накого̀, да и оц҃ъ ва́шь
нбс̃ный млс̃тивый ѡста́витъ ва́мъ. вели́­
ка бо є́сть си́ла мл҃твеная. та́ бо іѡ́нѣ
ки̑та до́мъ сотворѝ. Мл҃тва ієзекі́ю ѿ
сме́ртныхъ вра́тъ воз̾вратѝ. и трє́мъ
отрокѡ́мъ на́росу ѻ́гнь претворѝ. и а́нна
не пло́ды су́щи, мл҃твою самѡ́йла породѝ.
мл҃твою даніи́лъ рыка́ющыя львы̀ укротѝ.
и са́мъ же гдс̃ь учн҃кѡ́мъ гл҃аше, бди̑те
и моли́теся, да не вни́дете в̾ напа́сть.
свы̑ше ѿ́ бг҃а по́мощи ча́юще, и в̾ са́мой
бѣдѣ̀ не из̾немога́ти, но в̾ терпѣ́ніи
моли́теся. да бу́детъ во мнѣ̀ гдс̃и хотѣ́­
ніе твоѐ, и да ѿ и́метъся ѿ менѐ хотѣ́ніе
дія́воле. я́коже бо въ мра́чнѣй пеще́рѣ
свѣща̀ просвѣща́етъ, та́кѡ и мл҃тва въ
дш҃ю в̾ ше́дъши, всю̀ ѕло́бу грѣхо́вную
ѿ го́нитъ, и тѣ́ло чи́сто соблюде́тъ.

Вто́йже дн҃ь сло́во ѡ нѣ́коемъ єпи́скопѣ
престу́пницѣ, с̾пи́сано по́льзы ра́ди
слы́шащимъ.

Вселу́нѣ гра́дѣ, бѣ̀ єпи́скопъ нѣ́кто,
и́менемъ ѳалелѣ́й. се́й бг҃а не боя́ся
ни угото́ваннагѡ воздая́нія разумѣ́въ,

попра́въ же и сло́во христія́нское, и
ни вочто́ же положи́въ сщ҃е́нный са́нъ,
но и лише́нъ єго̀ бы́въ, и ѡбрѣ́те­
ся въ па́стыря мѣ́стѡ са́мъ во́лкъ.
се́й бо ѿве́ргъся поклоня́тися єдиносу́щь­
нѣй тро̃цѣ ст҃ѣ́й оц҃у и сн҃у и ст҃о́му
дх҃у, и куми́рѡмъ поклоня́шеся.
во́ время же то̀ держа́щіи цр҃ковь ст҃у́ю,
сего̀ по пра́виломъ зако́ннымъ изверго́ша
во́нъ. ма́лу же вре́мени мину́вшу,
па́ки вся́когѡ без̾зако́нія и нече́стія
испо́лненый восхотѣ̀ сщ҃е́нный са́нъ взя́­
ти, поне́же по прему́дрому соло́мѡну
всѝ послу́шаху зла́та предержа́щіи вла́сть
цр҃кве. воз̾врати́жеся въ сво́й гра́дъ и
хотѣ̀ итѝ, бѣ́ бо в̾ констянти́нѣ гра́­
дѣ живы́й; но бг҃ъ не презрѣ́въ ст҃ы́я
своея̀ цр҃кве. во єди́нъ же у́бѡ де́нь
ѡбо́лкъся ѡкая́нный в̾ кра́сныя ри́зы,
и хотѣ̀ изы́ти к̾ держа́щимъ цр҃квь, да
па́ки по числу̀ во́зметъ сщ҃е́нный са́нъ.
хотя́щу же єму̀ изы́ти изъ дому̀ сво­
егѡ̀, а́біе ѡтечѐ єму̀ чре́во. и из̾­
ше́дъшу єму̀ на прохо́дъ, и пребы́въ­
шу єму̀ я́кѡ два̀ часа̀ не из̾лѣ́зъшу,
{#л. ѿк҃г}

и внидо́ша ѿ пред̾стоя́щихъ внѣ̀ хотя̑ще
рещѝ, да и́детъ, и ѡбрѣто́ша главу̀ єгѡ̀
в̾со́пли прохо́днѣмъ, и но́ѕѣ єгѡ̀ горѣ̀
торча́щя. и воз̾дви́гъше єгѡ̀, и ѡбрѣ­
то́ша и у́же уме́рша вѣ́чною сме́ртію.
и та́кѡ изба́ви бг҃ъ цр҃квь свою̀
ѿ кумирослуже́нія.

Вто́йже де́нь сло́во ст҃а́гѡ ни́ла, ѡ без̾­
стра́стіи дш҃ѝ и тѣ́ла.

Бра́тіе угото́вимъ себѐ ко є́же порабо́та­
ти гдс̃ви, ѿ всея̀ дш҃ѝ и крѣ́пости и
си́лы. помы́слимъ ка́кѡ цр҃и и кн҃зи и
влд̃ки, бога́тіи па́чеже и ни́щіи, ка́кѡ ко́­
ждо и́хъ подвиза́етъся, и труди́тся є́же
украси́ти своя̀ жены̀. и жены̀ подви­
за́ютъ ся угоди́ти свои́мъ мужє́мъ.
Си́це и мы̀ сотвори́мъ, ду́ши бо на́ши
уневѣ́щены су̑ть нбс̃ному цр҃ю̀. услы́­
шимъ па́вла апс̃ла ѡ на́съ глаго́люща,
ѡбручи́хъ бо ва́съ речѐ, єди́ному му́жеви
дв҃у чи́сту предъста́вити хрс̃то́ви. тѣ́ло
бо на́ше до́мъ и пола́та є́сть, в̾ не́мъ же
нбс̃ный цр҃ь живе́тъ. дш҃а́ же, невѣ́ста
хрс̃то́ва. у́мъ же, посте́лникъ. срд̃це же,
прс̃то́лъ бж҃іи. смы́слъ же, две́рникъ.

со́вѣсть же, ри́зничарь. по́мысли же, слу­
жи́теліе. предъста́ бо речѐ про̃ро́къ дв҃дъ
цр҃ца ѡ десну́ю тебѐ в̾ ри́захъ по злаще́­
ннахъ, ѡдѣя́нна и преиспещре́нна, ѡ
чи́стѣй дш҃ѝ глаго́ла. вся̀ сла́ва дще́ри
цр҃е́вы вну́трь. да у́бѡ соблюде́мъ ѡпа́снѡ
невѣ́сту цр҃е́ву. покры́емъ сію̀, сохрани́мъ
сію̀, ѡде́ждемъ сію̀, ѻде́ждею весе́лія.
и укра́симъ сію̀ ри́зами златопря́дными,
ка́меніємъ чс̃тнымъ, и би́серомъ бл҃голѣ́­
пнымъ, є́же су̑ть добродѣ́тельми. про­
свѣтли́мъ сію̀ бл҃ги́ми дѣ́лы; в̾мѣ́стѡ
порфи́ры, вѣ́рою въ бг҃а. в̾мѣ́стѡ діади́­
мы, наде́ждею бл҃го́ю. в̾мѣ́стѡ ви́сса, лю­
бо́вію въ бг҃а. в̾ мѣ́стѡ ѵаки́нѳа, дв҃ь­
ствомъ. в̾мѣ́стѡ червлени́цы, чс̃тото́ю.
в̾мѣ́стѡ гри́венъ, цѣлому́дріемъ. в̾мѣ́­
стѡ ѻго́ръліи, воздержа́ніемъ. в̾мѣ́стѡ
ушн̑икъ, послуша́ніемъ. в̾мѣ́стѡ пе́р̾­
стєнь, млс̃тынею. в̾мѣ́стѡ сре́днія
порѳи́ры, посто́мъ. в̾мѣ́стѡ ря́съ и
ободє́цъ, мл҃твою и моле́ніемъ. в̾мѣ́стѡ
служе́ніа и утва́ріа мони́стна, сухояде́­
ніемъ, и низулега́ніемъ. в̾мѣ́стѡ мѵ̑ра
и мосхо́са, пѣ́ніемъ и удруче́ніемъ.
{#л. ѿк҃д}

в̾мѣ́стѡ златострое́ннагѡ носи́ла, смирено­
му́дріемъ. в̾мѣ́стѡ же́ртвеныхъ разли́­
чіи, хлѣ́ба ску́достію. в̾мѣ́стѡ вина̀,
воды̀ жела́ніемъ. А́ще бо си̑це на́шихъ
дш҃ъ укра́симъ, и ѡде́ждемъ и просвѣ­
ти́мъ и соблюде́мъ, до́брѣ вѣ́дѣ, и
я́в̾ственѣ зна́ю, я́кѡ вожделѣ́етъ нбс̃ный
цр҃ь добро́тѣ дш҃ъ на́шихъ, и прише́дъ
всели́тъся в̾ны̀. и тогда̀ бу́демъ єму̀
нб҃о, и прс̃то́лъ и пола́та, и тогда̀ сни́мъ с̾цр҃ь­
ствуемъ. в̾мѣ́стѡ сл҃нца чю́вьственагѡ,
иму́ще сл҃нце пра́вды. в̾мѣ́стѡ діади́­
мы, свѣ́томъ ѡдѣ́яни. в̾мѣ́стѡ луча̀,
безъстра́стіе. в̾мѣ́стѡ ѕвѣ́здъ, добродѣ́­
тели. в̾мѣ́стѡ багряни́цы, свѣ́тлость.
в̾ мѣ́стѡ луны̀, бж҃е́ственая исправле́нія.
ѡ хрс̃тѣ̀ іс҃ѣ гдс̃ѣ на́шемъ. єму́же сла́ва,
ны́нѣ и при́снѡ и во́ вѣки вѣкѡ́мъ.