Є҆гда̀ маѯіміа́нъ и҆ге́мѡнъ кіликі́йскій по повелѣ́нію ца́рскомꙋ і҆́дѡлское безбо́жное многобо́жіе разширѧ́ѧ, вни́де въ помпеопо́ль гра́дъ, и҆ въ не́мъ бы́вшемꙋ і҆́дѡлꙋ злато́мꙋ пра́здникъ творѧ̀, мнѡ́гіѧ принесѐ жє́ртвы: тогда̀ бѣ̀ нѣ́кій ю́ноша, ро́домъ ѿ лікао́ніи, и҆́менемъ сѡзо́нтъ, хрс̃тіа́нинъ вѣ́рою, до́бръ нра́вомъ, и҆спо́лненъ бл҃ги́хъ дѣ́лъ: въ зако́нѣ бо гдс̃ни поꙋча́шесѧ де́нь и҆ но́щь.
то́й пасꙋ́щи безсловє́сныѧ ѻ҆́вцы, и҆ словє́сныѧ наставлѧ́ше на до́брꙋю па́жить: и҆дѣ́же бо со ѻ҆́вцы бѧ́ше, та́мѡ собира́хꙋсѧ къ немꙋ̀ дрꙋгі́и па́стыри, ю́нѡши же и҆ <#79> мꙋ́жи, и҆ ѹ҆ча́ше и҆̀хъ зна́ти є҆ди́наго бг҃а: и҆ мнѡ́гіѧ приведѐ къ ст҃о́мꙋ кр҃ще́нію, дх҃а бо ст҃а́гѡ блгд̃ть бѣ̀ въ не́мъ.
Є҆ди́ною же пасы́й ѻ҆́вцы при нѣ́коемъ и҆сто́чницѣ, при не́мже бѣ̀ стоѧ́щъ дꙋ́бъ вели́къ, ѹ҆снꙋ̀ сно́мъ сла́дкимъ, и҆ ви́дѣ нѣ́кое бжс̃твенное видѣ́ніе, къ по́двигꙋ мч҃нческомꙋ є҆го̀ зовꙋ́щее, и҆ возвѣща́ющее, ꙗ҆́кѡ то̀ мѣ́сто и҆́мать бы́ти мнѡ́гимъ поле́зно: ѡ҆ст҃и́тсѧ бо свы́ше сходѧ́щею бл҃года́тію, и҆ мно́зи ѡ҆брѧ́щꙋтъ на не́мъ спасе́ніе, и҆ просла́вѧтъ ст҃ꙋ́ю тро̃цꙋ.
воста́вши же ѿ сна̀ до́брый ѻ҆́ный па́стырь, ѻ҆́вцы и҆ны̑мъ врꙋчѝ, и҆ ѡ҆ста́ви на мѣ́стѣ то́мъ лꙋ́къ сво́й и҆ трѝ стрѣлы̀ на па́мѧть свою̀, а҆ са́мъ вни́де во гра́дъ помпеопо́ль.
и҆ ви́дѣ въ не́мъ ѹ҆мно́жившеесѧ нече́стіе, вѣ́рꙋ же ст҃ꙋ́ю попра́нꙋ, поболѣ̀ се́рдцемъ свои́мъ ѡ҆ се́мъ.
и҆ вше́дъ въ хра́мъ і҆́дѡлскій, и҆мꙋ́щій въ себѣ̀ і҆́дѡла зла́та, ѿѧ̀ ѿ негѡ̀ рꙋ́кꙋ, и҆ раздроби́въ ю̀ раздадѐ ни́щымъ.
бы́вшꙋ же вели́кꙋ смѧте́нію въ гра́дѣ ѡ҆ ѿѧ́той рꙋцѣ̀ злато́й ѿ і҆́дѡла, и҆ мнѡ́гимъ и҆стѧзꙋ́емымъ и҆ мꙋ́чимымъ, ст҃ы́й сѡзо́нтъ не хотѧ̀ да и҆́нъ кто̀ стра́ждетъ за є҆гѡ̀ дѣ́ло, са́мъ пріи́де ко и҆ге́мѡнꙋ маѯіміа́нꙋ, и҆ и҆сповѣ́да себѐ томꙋ̀ дѣ́лꙋ бы́ти вино́вна: а҆́зъ є҆́смь (речѐ) взѧ́вый рꙋ́кꙋ бо́га ва́шегѡ, ю́же раздроби́хъ, и҆ зла́то тре́бꙋющымъ разда́хъ.
и҆стѧ́занъ же бы́въ, почто̀ дерзнꙋ̀ сицево́е дѣ́ло сотвори́ти, и҆ нанестѝ безче́стіе бо́гꙋ и҆́хъ, ѿе́млѧ и҆ сокрꙋша́ѧ рꙋ́кꙋ є҆гѡ̀ ѿвѣща̀: тогѡ̀ ра́ди сіѐ сотвори́хъ, да ѹ҆вѣ́мъ бо́га ва́шегѡ немощнꙋ́ю си́лꙋ.
є҆гда́ бо ѿе́млѧхъ рꙋ́кꙋ ѿ негѡ̀, ѻ҆́нъ не_сопроти́висѧ мнѣ̀, нижѐ глаго́ла что̀, ни поболѣ̀, ни возстена̀.
ка́кѡ бо и҆ сопроти́витисѧ можа́ше нѣ́мъ сы́й и҆ бездꙋ́шенъ; и҆́бо, а҆́ще бы бо́гъ бы́лъ и҆́стиненъ и҆ жи́въ, сопротивоста́лъ бы мѝ, и҆ не да́лъ бы ѡ҆ѕло́бити себѐ.
а҆́зъ же ѹ҆разꙋмѣ́въ є҆го̀ бы́ти і҆́дѡла а҆ не бо́га, раздроби́хъ рꙋ́кꙋ є҆гѡ̀, но и҆ всего̀ хотѣ́хъ раздроби́ти, да не покланѧ́етсѧ дѣ́лꙋ рꙋ́къ человѣ́ческихъ, и҆́же а҆́ще и҆ ѻ҆́чи и҆́мать, и҆ ѹ҆́ши, и҆ ѹ҆ста̀, и҆ рꙋ́цѣ и҆ но́зѣ, ѻ҆ба́че нижѐ ви́дитъ, нижѐ слы́шитъ, ни глаго́летъ, ни ѡ҆сѧза́етъ, ни хо́дитъ, нижѐ мо́жетъ помощѝ себѣ̀ что̀, є҆гда̀ бію́тъ є҆го̀, и҆лѝ на ча́сти раздроблѧ́ютъ.
Сіѐ слы́шавъ и҆ге́мѡнъ, повелѣ̀ мꙋ́чити є҆го̀ безъ̃ поми́лованіѧ.
пе́рвѣе ѹ҆́бѡ повѣ́шенъ и҆ желѣ́зными ногтмѝ по ре́брамъ стро́ганъ бы́сть, та́же въ сапогѝ желѣ́зныѧ и҆мꙋ́щыѧ ѻ҆́строе въ себѣ̀ гво́здіе ѡ҆бꙋве́нъ, и҆ по гра́дꙋ гони́мъ бѣ̀, въ ни́хже ходѧ̀ ст҃ы́й сла́вѧше хрс̃та̀ бг҃а.
по се́мъ па́ки повѣ́шенъ бы́сть на дре́вѣ, и҆ желѣ́зными жезлы̀ вельмѝ біе́нъ, ꙗ҆́кѡ не то́чію тѣ́лꙋ, но и҆ косте́мъ є҆гѡ̀ сдроби́тисѧ.
въ тѣ́хъ мꙋ́кахъ ст҃ы́й предадѐ дꙋ́хъ сво́й въ рꙋ́цѣ бж҃іи.
ви́дѧще же мꙋчи́тели є҆го̀ ѹ҆жѐ ѹ҆ме́рша, сне́мше съ дре́ва по повелѣ́нію и҆ге́мѡновꙋ, ѻ҆́гнь наложи́ша вели́къ, во є҆́же сожещѝ тѣ́ло є҆гѡ̀, тогѡ̀ ра́ди, да не бꙋ́детъ вѣ́рными почита́емо.
и҆ є҆гда̀ вверго́ша во ѻ҆́гнь многострада́лное то̀ тѣ́ло, внеза́пꙋ бы́ша блиста̑ніѧ и҆ <#80> гро́мы, и҆ до́ждь съ гра́домъ спадѐ вели́къ, ꙗ҆́кѡ а҆́біе ѻ҆гню̀ ѹ҆га́снꙋти.
лю́діе же бы́вшіи та́мѡ бѣжа́ша ѿ стра́ха, и҆ ѡ҆ста́сѧ тѣ́ло ст҃а́гѡ цѣ́ло.
Но́щи же прише́дшей, восхотѣ́ша вѣ́рніи взѧ́ти ст҃ы́ѧ є҆гѡ̀ мо́щы, и҆ не_можа́хꙋ, тмѣ̀ вели́кой належа́щей: и҆ ско́рбнымъ и҆̀мъ сꙋ́щымъ ѡ҆ се́мъ ѕѣлѡ̀, сѐ въ полꙋ́нощи свѣ́тъ съ небесѐ ѡ҆блиста̀ надъ̃ мощмѝ, ꙗ҆́же взе́мше вѣ́рніи погребо́ша чс̃тнѡ.
ѿ гро́ба же є҆гѡ̀ мно́гаѧ творѧ́хꙋсѧ чꙋдеса̀, и҆ не то́чію ѿ гро́ба, но и҆ ѿ и҆сто́чника ѻ҆́нагѡ и҆́же подъ̃ дꙋ́бомъ, и҆дѣ́же ст҃ы́й спѧ̀ видѣ́ніе ви́дѣ, та́кожде разли́чнаѧ и҆сцѣлє́ніѧ болѧ́щымъ подава́хꙋсѧ бл҃года́тію хрс̃то́вою и҆ мл҃твами ст҃а́гѡ страда́лца.
тогѡ̀ ра́ди по́слѣжде цр҃ковь во и҆́мѧ є҆гѡ̀ бѣ̀ создана̀, къ хвале́нію въ не́й и҆́стиннагѡ бг҃а въ тро̃цѣ є҆ди́нагѡ: є҆мꙋ́же сла́ва во вѣ́ки, а҆ми́нь.
Є҆ѵо́дъ ст҃ы́й бѣ̀ є҆ди́нъ ѿ седми́десѧти а҆пс̃лъ въ вели́цѣй а҆нтіохі́и, по ст҃о́мъ а҆пс̃лѣ петрѣ̀ пе́рвый бы́сть є҆пс̃кпъ, вели́кій словесѐ бж҃іѧ проповѣ́дникъ: є҆го́же ст҃ы́й и҆гна́тій бг҃оно́сецъ въ посла́ніи свое́мъ ко а҆нтіохі́анѡмъ помина́етъ гл҃го́лѧ: помина́йте бл҃же́ннаго є҆ѵо́да ѻ҆ц҃а̀ ва́шего, и҆́же пе́рвый ва́мъ ѿ а҆пс̃лѡвъ па́стырь поста́вленъ бы́сть, ѹ҆̀бо да не постыди́тсѧ ва́съ ра́ди ѻ҆ц҃ъ, и҆́стинніи бꙋ́дите сы́нове а҆ не прелюбодѣ́йчищѧ.
Се́й ст҃ы́й є҆ѵо́дъ ѡ҆ пречс̃тѣй дв҃ѣ написа̀, ꙗ҆́кѡ въ пѧтьнадесѧ́тое лѣ́то житіѧ̀ своегѡ̀ ѿ ржс̃тва̀ родѝ сп҃са мі́рꙋ: въ тріе́хъ, речѐ, лѣ́тѣхъ введена̀ бы́сть въ цр҃ковь гдс̃ню, и҆дѣ́же пребы́сть є҆динона́десѧть лѣ́тъ: та́же дванадесѧ́томꙋ наста́вшꙋ лѣ́тꙋ сщ҃е́нническими рꙋка́ми і҆ѡ́сифꙋ въ сохране́ніе дана̀ бы́сть, ѹ҆ негѡ́же пребыва́ющи четы́ре мцс̃а ѿ а҆́гг҃ла ра́достное пріѧ̀ бл҃говѣ́щеніе, и҆ породѝ свѣ́тъ мі́рꙋ хрс̃та̀, пѧтьнадесѧ́тое лѣ́то провожда́ѧ житіѧ̀ своегѡ̀.
и҆ и҆́на мнѡ́га пи́смена ст҃ы́й є҆ѵо́дъ на по́лзꙋ ѡ҆ста́ви, но лю́таѧ времена̀, въ нѧ́же гони́ма бѣ̀ цр҃ковь, не попꙋсти́ша послѣ́днемꙋ на́шемꙋ вѣ́кꙋ ви́дѣти и҆̀хъ.
написа̀ бо нѣ́кꙋю кни́гꙋ, и҆мꙋ́щꙋю надписа́ніе: свѣти́ло.
є҆ѧ́же то́чію воспомина́ніе ѹ҆ ніки́фора дре́внѧгѡ і҆сторіогра́фа ѡ҆брѣта́етсѧ.
Пи́шетсѧ же ѡ҆ не́мъ въ ри́мстѣмъ мч҃никосло́віи: ꙗ҆́кѡ проліѧ̀ кро́вь свою̀ хрс̃та̀ ра́ди, и҆ мꙋче́ніѧ вѣне́цъ пріе́мъ сконча́сѧ.
Повѣствꙋ́ютъ же нѣ́цыи, ꙗ҆́кѡ тогда̀ пострада̀ ст҃ы́й, є҆гда̀ веспасіа́нъ во а҆нтіохі́и бы́сть: въ то́ бо вре́мѧ сотво́ршꙋсѧ смꙋще́нію во гра́дѣ нѣ́кіимъ а҆нтіо́хомъ і҆ꙋде́аниномъ, и҆́же ѡ҆ста́вивъ сво́й зако́нъ, пожрѐ і҆́дѡлѡмъ, мно́зи ѿ і҆ꙋде́й ѹ҆біе́ни бы́ша ра́ди не поклоне́ніѧ і҆́дѡлѡмъ.
тогда́ же мно́жайшіи і҆ꙋде́и ѹ҆жѐ хрс̃тіа́нскꙋю пріѧ́ша вѣ́рꙋ, и҆ и҆мѣ́ѧхꙋ ст҃и́телѧ своего̀ є҆ѵо́да: ѹ҆̀бо съ ни́ми и҆ є҆ѵо́дъ ст҃ы́й, ꙗ҆́кѡ нача́лникъ и҆́хъ и҆ па́стырь, ѹ҆біе́нъ бы́сть.
Ѻ҆нисі́форъ же ст҃ы́й та́кожде бѣ̀ ѿ седми́десѧти а҆пс̃лъ, є҆го́же па́ѵелъ въ посла́ніи къ тімоѳе́ю помина́етъ глаго́лѧ: да да́стъ млс̃ть гдс̃ь ѻ҆нисі́форовꙋ до́мꙋ, ꙗ҆́кѡ мно́гажды мѧ̀ ѹ҆поко́и, и҆ вери́гъ мои́хъ не постыдѣ́сѧ: Но прише́дъ въ ри́мъ, то́щнѣе взыска́ мѧ и҆ ѡ҆брѣ́те.
Да да́стъ є҆мꙋ̀ гдс̃ь ѡ҆брѣстѝ млс̃ть ѿ гдс̃а въ де́нь ѻ҆́нъ: и҆ є҆ли́кѡ во є҆фе́сѣ послꙋжи́ ми, до́брѣе ты̀ вѣ́си.
Се́й въ колофо́ніи и҆ въ кѷріні́и є҆пс̃кпъ бы́сть, и҆ да́же до кро́ве пострада̀ за вѣ́рꙋ: свидѣ́телствꙋетъ бо ѡ҆ не́мъ мꙋченикосло́віе, ꙗ҆́кѡ по мно́гихъ ра́нахъ конмѝ ди́віими расте́рзанъ, дꙋ́хъ сво́й въ рꙋ́цѣ бг҃ꙋ предадѐ, и҆ въ ли́цѣ и҆сповѣ́дникѡвъ со є҆ѵо́домъ водворѧ́етсѧ въ нбс̃ныхъ селе́ніихъ.
Є҆ѵѱи́хій ст҃ы́й рожде́нъ бѣ̀ и҆ воспи́танъ въ кесарі́и каппадокі́йстѣй, въ ца́рство же а҆дріа́на ѡ҆клеве́танъ бы́сть, ꙗ҆́кѡ не почита́етъ є҆́ллинскихъ богѡ́въ, но хрс̃та̀ чте́тъ.
ꙗ҆́тъ ѹ҆́бѡ бѣ̀ каппадокі́йскимъ кнѧ́земъ, и҆ протѧже́нъ, по ре́брѡмъ стрꙋ́жемь, и҆ въ темни́цꙋ вве́рженъ.
и҆дѣ́же є҆́ле жи́вꙋ є҆мꙋ̀ лежа́щꙋ и҆ молѧ́щꙋсѧ, а҆́гг҃лъ гдс̃нь ꙗ҆ви́сѧ, и҆ прикоснове́ніемъ свои́мъ и҆сцѣлѝ є҆го̀ ѿ ра́нъ, та́же пꙋще́нъ бѣ̀ и҆зъ̃ темни́цы на свобо́дꙋ.
сіе́ же є҆гѡ̀ пꙋще́ніе по смотре́нію бж҃ію бы́сть, тогѡ̀ ра́ди, да и҆мѣ́ніе , є҆гѡ́же мно́жество и҆мѣ̀, не ѡ҆ста́нетсѧ въ рꙋка́хъ безбо́жныхъ, но да до́брѣ расточи́тсѧ на потре́бꙋ ни́щихъ, є҆́же и҆ бы́сть:
всѧ̑ бо стѧжа́ніѧ є҆щѐ ѿ пра́ѻтєцъ є҆гѡ̀ сѡ́браннаѧ раздадѐ ѹ҆бѡ́гимъ, нѣ̑каѧ же дарова̀ врагѡ́мъ свои́мъ тѣ̑мъ, и҆̀же ѡ҆клевета́ша є҆го̀, си́хъ почтѐ дара́ми ꙗ҆́кѡ бл҃годѣ́телей свои́хъ вино́вныхъ страда́ніѧ є҆гѡ̀.
Та́же є҆гда̀ ѡ҆блада́ше кесарі́ею сапре́кій кнѧ́зь, па́ки ꙗ҆́тъ бы́сть ст҃ы́й є҆ѵѱи́хій, и҆ повѣ́шенный вельмѝ стрꙋ́ганъ , и҆ посе́мъ пріѧ̀ ме́чнꙋю кончи́нꙋ.
глаго́лютъ же, ꙗ҆́кѡ вмѣ́стѡ кро́ве млеко̀ и҆ вода̀ и҆стечѐ ѿ ꙗ҆́звы тѣ́ла є҆гѡ̀.
Но́вый чꙋдотво́рецъ рѡссі́йскій ст҃ы́й і҆ѡа́ннъ роди́сѧ въ вели́цѣмъ новѣгра́дѣ ѿ бл҃говѣ́рныхъ роди́телей, ѻ҆тца̀ и҆́менемъ нікола́а, ма́тере же хрісті́ны.
и҆мѣ́ же и҆ бра́та по пло́ти и҆́менемъ гавріи́ла, съ ни́мже воспи́танъ бы́сть въ до́бромъ наказа́ніи, и҆ стра́хꙋ бж҃ію наꙋче́нъ, ѿ ю́ности въ добродѣ́тели себѐ ѹ҆пра́ви:
въ во́зрастъ же соверше́нный є҆мꙋ̀ прише́дшꙋ, поста́вленъ бы́сть пресвѵ́теромъ къ цр҃кви ст҃а́гѡ сщ҃енномч҃нка вла́сіа, и҆ рабо́таше гдс̃ꙋ со всѣ́мъ ѹ҆се́рдіемъ.
ходѧ̀ безъ̃ поро́ка во всѣ́хъ є҆гѡ̀ за́повѣдехъ.
<#82>
любѧ́ же безмо́лвное и҆ безмѧте́жное житіѐ, и҆мѣ̀ жела́ніе во и҆́ноческій ѡ҆блещи́сѧ ѻ҆́бразъ, тогѡ̀ ра́ди и҆ мнс̃ты́рь но́въ ѿ и҆мѣ́ніѧ по роди́телехъ ѡ҆ста́вшагѡсѧ созда́ти ѹ҆мы́сли.
ѡ҆ то́мъ совѣща́вшесѧ съ бра́томъ свои́мъ гавріи́ломъ, пе́рвѣе цр҃ковь древѧ́нꙋ во и҆́мѧ пречс̃тыѧ бг҃омт҃ре, въ па́мѧть чс̃тна́гѡ є҆ѧ̀ бл҃говѣ́щеніѧ созда́ша, и҆ мнс̃ты́рь согради́ша, и҆ всѧ̀ потрє́бнаѧ мнс̃тырю̀ промы́слиша: та́же потща́шасѧ ка́меннꙋю цр҃ковь соѻрꙋжи́ти.
наче́ншꙋсѧ ѹ҆́бѡ бл҃го́мꙋ томꙋ̀ дѣ́лꙋ, и҆ до́брѣ зи́ждꙋщейсѧ ка́менной цр҃кви, и҆ ѹ҆жѐ до ра́менъ доспѣ́вшей, ѡ҆скꙋдѣ̀ сребро̀ на соверше́ніе: чесѡ̀ ра́ди бл҃же́нный і҆ѡа́ннъ и҆ бра́тъ є҆гѡ̀ гавріи́лъ въ вели́цѣй печа́ли бы́ша.
И҆мꙋ́ще же вели́кꙋю вѣ́рꙋ и҆ ѹ҆се́рдіе къ пречс̃тѣй бцд̃ѣ, къ не́й въ печа́ли свое́й ꙗ҆́кѡ къ ско́рой помо́щницѣ и҆ ско́рбныхъ ѹ҆тѣ́шительницѣ со слеза́ми притеко́ша, молѧ́щесѧ и҆ гл҃го́люще: ты̀ влд̃чце вѣ́си вѣ́рꙋ на́шꙋ и҆ любо́вь, ю́же и҆́мамы къ сн҃ꙋ твоемꙋ̀ и҆ бг҃ꙋ на́шемꙋ, и҆ къ тебѣ̀ гпс̃жѣ̀ на́шей всѣ́мъ ѹ҆се́рдіемъ и҆ вѣ́рою на созида́ніе пречс̃тна́гѡ твоегѡ̀ хра́ма подвиго́хомсѧ, и҆ на твою̀ по́мощь бг҃ом҃ти возложи́хомъ наде́ждꙋ на́шꙋ, помозѝ ѹ҆̀бо на́мъ соверши́ти хра́мъ тво́й, послѝ по́мощь твою̀ влд̃чце, и҆ не посрамѝ на́съ рабѡ́въ твои́хъ: се́ бо нача́хомъ зда́ти, и҆ не мо́жемъ соверши́ти безъ̃ твоеѧ̀ по́мощи.
Та́кѡ и҆̀мъ молѧ́щымсѧ и҆ сѣ́тꙋющымъ, ꙗ҆ви́сѧ пречс̃таѧ бг҃омт҃рь, нбс̃наѧ цр҃и́ца, но́щію въ со́нномъ видѣ́ніи гл҃ѧ и҆̀мъ: что̀ въ толи́кꙋ печа́ль и҆ сѣ́тованіе вда́ли себѐ ѡ҆ созда́ніи хра́ма моегѡ̀ люби́міи мно́ю бж҃іи рабѝ, не пре́зрю моле́ніѧ ва́шегѡ и҆ вѣ́ры и҆ любвѐ, но вско́рѣ послю̀ ва́мъ ꙗ҆́же къ соверше́нію, ꙗ҆́кѡ и҆ на и҆нꙋ́ю потре́бꙋ преизбꙋ́детъ, то́кмѡ потщи́тесѧ въ дѣ́лꙋ, и҆ не ѡ҆скꙋдѣва́йте въ вѣ́рѣ.
то̀ видѣ́ніе ѻ҆́ба бра́та ви́дѣша, и҆ воспрѧнꙋ́вше и҆спо́лнишасѧ ра́дости мно́гіѧ: по ѹ҆́треннѣмъ же пѣ́ніи дрꙋгъ_дрꙋ́гꙋ повѣ́даша, и҆ наде́ждею ѹ҆крѣпи́шасѧ.
и҆ тогѡ́же днѐ ра́нѡ по бж҃ію строе́нію и҆зше́дше внѣ̀ мнс̃тырѧ̀, ѹ҆зрѣ́ша конѧ̀ велмѝ чꙋ́дна предъ̃ враты̀ стоѧ́ща ѡ҆бꙋ́здана позлаще́ною ѹ҆здо́ю, и҆ сѣдло̀ на не́мъ ѡ҆ко́вано зла́томъ, ѣ҆́здѧщаго же на не́мъ не бѣ̀: стоѧ́ше же ко́нь кро́тцѣ и҆ недви́жимѡ:
ѻ҆ни́ же дивѧ́щесѧ красотѣ̀ и҆ вели́чествꙋ конѧ̀, жда́ша на до́лзѣ, не пріи́детъ ли ѿкꙋ́дꙋ ѣ҆́здѧй на конѣ̀ то́мъ: и҆ є҆гда̀ не бѣ̀ никогѡ́же приходѧ́щагѡ, а҆ ко́нь на є҆ди́номъ мѣ́стѣ стоѧ́ше недви́жимѡ, пристꙋпи́ша къ немꙋ̀, и҆ ѹ҆зрѣ́ша два̀ мѣшца̀ по ѻ҆́бѣ страны̀ сѣдла̀ ви́сѧщыѧ по́лны сꙋ́ще.
Разꙋмѣ́вше же, ꙗ҆́кѡ ѿ бг҃а то̀ и҆̀мъ по́слано, снѧ́ша съ конѧ̀ мѣшцы̀ ѻ҆́ныѧ, и҆ а҆́біе ко́нь неви́димъ бы́сть ѿ ѻ҆че́съ и҆́хъ.
разрѣ́шше же мѣшцы̀, ѡ҆брѣто́ша є҆ди́нъ по́лнъ зла́та, дрꙋгі́й же сребра̀.
и҆ ѹ҆ди́влшесѧ таково́мꙋ ѡ҆ ни́хъ про́мыслꙋ бж҃ію и҆ є҆гѡ̀ пречс̃тыѧ бг҃омт҃ре, вели́кое бл҃годаре́ніе возсыла́хꙋ, и҆ вско́рѣ соверши́ша цр҃ковь, и҆ всѧ́кимъ ю̀ бл҃голѣ́піемъ ѹ҆краси́ша.
та́кожде и҆ се́лъ мно́жество мнс̃тырю̀ кꙋпи́ша, а҆ ѻ҆ста́нокъ зла́та и҆ сребра̀ и҆гꙋ́менꙋ и҆ бра́тіи ѿда́ша, и҆ са́ми та́можде <#83> ѡ҆блеко́шасѧ во и҆́ноческій ѻ҆́бразъ, и҆ преименова́нъ бы́сть і҆ѡа́ннъ и҆ліе́ю, гавріи́лъ григо́ріемъ, и҆ жи́ша въ монастырѣ̀ то́мъ бг҃оꙋго́днѡ въ постѣ̀ и҆ моли́твахъ и҆ во всѣ́хъ и҆́ноческихъ по́двизѣхъ и҆ трꙋдѣ́хъ.
Ѹ҆ме́ршꙋ же преѡсщ҃е́нномꙋ а҆рхіепс̃кпꙋ новогоро́дскомꙋ а҆рка́дію, взѧ́тъ бы́сть бл҃же́нный и҆ліа̀ и҆зъ̃ мнс̃тырѧ̀ своегѡ̀, и҆ на а҆рхіепс̃кпскій прс̃то́лъ нꙋ́ждею возведе́нъ: ѿрица́шесѧ бо, недосто́йна себѐ творѧ̀ такова́гѡ са́на, но бг҃ъ досто́йна є҆го̀ сотворѝ.
Кн҃зь же и҆ всѝ нача́лницы дх҃о́вніи же и҆ мірсті́и и҆ всѝ лю́діе гра́да тогѡ̀ є҆диногла́снѡ и҆збра́ша є҆го̀, возлю́бленъ бо бы́сть бг҃ꙋ и҆ человѣ́кѡмъ, и҆ моле́ніемъ ѹ҆бѣди́ша є҆го̀ воспріѧ́ти прс̃то́лъ а҆рхіепс̃кпскій.
и҆ не хотѧ̀ ѹ҆́бѡ повинꙋ́сѧ, и҆ поста́вленъ бы́сть а҆рхіепс̃кпомъ новгоро́дскимъ ѿ ст҃ѣ́йшагѡ і҆ѡа́нна митрополі́та кі́евскагѡ и҆ всеѧ̀ рѡссі́и, и҆ до́брѣ пасѧ́ше ста́до хрс̃то́выхъ ѻ҆ве́цъ живꙋ́щи въ прпд̃біи и҆ пра́вдѣ.
Въ то̀ вре́мѧ кн҃зь сꙋ́ждалскій рѡма́нъ, и҆ и҆ні́и тоѧ́жде землѝ рѡссі́йскіѧ кн҃зи мно́зи число́мъ се́дмьдесѧтъ два̀ воста́ша на вели́кій но́въградъ, хотѧ́ще разори́ти є҆го̀, и҆ сро́дныхъ себѣ̀ люде́й и҆ є҆диновѣ́рныхъ плѣни́ти, и҆ напра́сной сме́рти преда́ти.
тогѡ̀ ра́ди съ вели́кимъ мно́жествомъ во́инства своегѡ̀ пріидо́ша ко гра́дꙋ, и҆ ѡ҆бсѣ́дше, ве́ліе наси́ліе трѝ днѝ творѧ́хꙋ є҆мꙋ̀.
Гра́ждане же вели́кꙋю сопроти́вныхъ си́лꙋ ви́дѧще, и҆ и҆знемога́юще ѿ бра́ни, бы́ша въ ско́рби и҆ въ недоꙋмѣ́ніи вели́цѣмъ, ни ѿкꙋ́дꙋ по́мощи ненадѣ́ющесѧ, то́кмѡ ѿ бг҃а просѧ́хꙋ млс̃ти, и҆ на мл҃твы ст҃а́гѡ па́стырѧ своегѡ̀ ѹ҆пова́хꙋ.
до́брый же па́стырь ви́дѧ волкѡ́въ наше́дшихъ, и҆ ста́до є҆гѡ̀ расхи́тити и҆́щꙋщихъ, ста̀ на стра́жи, неꙋсыпа́ющимъ ѻ҆́комъ къ бг҃ꙋ взира́ѧ, и҆ мл҃твами свои́ми ꙗ҆́кѡ стѣна́ми гра́дъ ѡ҆гражда́ѧ.
Въ тре́тію же но́щь стоѧ́щꙋ є҆мꙋ̀ по ѻ҆бы́чаю на мл҃твѣ предъ̃ і҆кѡ́ною і҆и҃съ хрс̃то́вою, и҆ со слеза́ми ѡ҆ и҆збавле́ніи гра́да вопію́щꙋ ко влд̃цѣ, слы́ша гла́съ гл҃ющій къ немꙋ̀: и҆дѝ въ цр҃ковь гдс̃а на́шегѡ і҆и҃са хрс̃та̀, ꙗ҆́же на и҆ліинѣ̀ ѹ҆́лицѣ, и҆ та́мѡ взе́мши ѻ҆́бразъ пречс̃тыѧ бцд̃ы, вознесѝ на стѣ́ны гра́да проти́вꙋ сꙋпоста́тѡвъ, и҆ а҆́біе ѹ҆́зриши спасе́ніе гра́дꙋ.
ѻ҆́нъ же ꙗ҆́кѡ ѹ҆слы́ша сицевы́й гла́съ, неизрече́нныѧ ра́дости и҆спо́лнисѧ, и҆ пребы́сть безъ̃ сна̀ но́щь тꙋ́ю.
Ѹ҆́трꙋ же бы́вшꙋ, созва̀ собо́ръ ве́сь, и҆ повѣ́да и҆̀мъ бы́вшіи къ немꙋ̀ гла́съ.
лю́діе же то̀ слы́шавше, прославлѧ́хꙋ бг҃а и҆ пречс̃тꙋю є҆гѡ̀ бг҃омт҃рь, и҆ ꙗ҆́коже нѣ́кꙋю воспріе́млюще си́лꙋ, дерза́хꙋ.
А҆рхіепс̃кпъ же посла̀ прѡтодіа́кона своего̀ съ кли́ромъ, повелѣ́въ честнꙋ́ю ѻ҆́нꙋ і҆кѡ́нꙋ на собо́ръ принестѝ.
са́мъ же со ѡ҆сщ҃е́ннымъ собо́ромъ въ вели́цѣй цр҃кви премд̃рости бж҃іѧ нача̀ молє́бнаѧ соверша́ти пѣ̑ніѧ.
доше́дше же по́сланніи до цр҃кве сп҃совы, въ не́йже чꙋдотво́рнаѧ і҆кѡ́на прест҃ы́ѧ бцд̃ы стоѧ́ше, и҆ покло́ншесѧ ꙗ҆́коже бѣ̀ лѣ́по, когда̀ хотѧ́хꙋ взѧ́ти ю̀, не возмого́ша нижѐ ѿ мѣ́ста дви́гнꙋти.
<#84>
и҆ є҆ли́кѡ покꙋша́хꙋсѧ дерза́юще, толи́кѡ ника́коже возмого́ша: и҆ возврати́вшесѧ возвѣсти́ша ст҃о́мꙋ.
ѻ҆́нъ же пое́мъ ве́сь собо́ръ, и҆́де со тща́ніемъ, и҆ прише́дъ въ цр҃ковь падѐ предъ̃ і҆кѡ́ною влд̃чцы на́шеѧ молѧ́щисѧ и҆ гл҃го́лющи: ѽ премлс̃тиваѧ гпс̃жѐ дв҃о бцд̃е, ты́ є҆си ѹ҆пова́ніе и҆ наде́жда и҆ застꙋ́пница гра́дꙋ на́шемꙋ, стѣна́ же и҆ покро́въ и҆ прибѣ́жище всѣ́мъ хрс̃тіа́нѡмъ:
тѣ́мъ и҆ мы̀ грѣ́шніи на тѧ̀ надѣ́емсѧ, моли́сѧ гпс̃жѐ сн҃ꙋ своемꙋ̀ и҆ бг҃ꙋ на́шемꙋ за гра́дъ на́шъ, и҆ не преда́ждь на́съ врагѡ́мъ на́шимъ грѣ́хъ ра́ди на́шихъ, но ѹ҆слы́ши пла́чь и҆ воздыха́ніе люде́й твои́хъ, и҆ пощадѝ, ꙗ҆́коже и҆ногда̀ ніневѵ́тѧны сн҃ъ тво́й пощадѣ̀ покаѧ́ніѧ ра́ди, та́кожде и҆ здѣ̀ млс̃ть твою̀ покажѝ влд̃чце.
си́це ст҃ы́й помоли́всѧ, нача̀ пѣ́ти моле́бенъ.
И҆ є҆гда̀ кли́ріцы воспѣ́ша конда́къ по шесто́й пѣ́сни, предста́тельство хрс̃тіа́нъ непосты́дное: внеза́пꙋ честна́ѧ пречс̃тыѧ бцд̃ы і҆кѡ́на сама̀ ѡ҆ себѣ̀ подви́жесѧ.
Лю́діе же ви́дѣвше стра́нное то̀ чꙋ́до, всѝ ꙗ҆́кѡ є҆ди́ными ѹ҆сты̀ взыва́хꙋ: гдс̃и поми́лꙋй.
Ст҃ѣ́йшій же а҆рхіепс̃кпъ честнꙋ́ю ѻ҆́нꙋ і҆кѡ́нꙋ въ рꙋ́цѣ пріе́мъ, любе́знѡ лобыза̀, и҆ ше́дъ съ наро́домъ, молє́бнаѧ соверша́юще пѣ̑ніѧ, и҆ вознесѐ ю̀ на стѣ́нꙋ гра́дскꙋ, и҆ поста́ви проти́вꙋ ра́тныхъ.
И҆ бы́сть ꙗ҆́кѡ ча́съ шесты́й, нача́ша сопроти́вніи крѣпча́е налега́ти на гра́дъ, и҆ пꙋсти́ша стрѣ́лы на него̀ ꙗ҆́кѡ до́ждь мно́гъ.
И҆ а҆́біе честна́ѧ прест҃ы́ѧ бцд̃ы і҆кѡ́на ѿвра́щши лицѐ своѐ ѿ сопроти́вныхъ, ѡ҆братѝ є҆̀ на гра́дъ, є҆́же бѣ̀ и҆звѣ́стнымъ зна́меніемъ превели́кагѡ влд̃чцы на́шеѧ млс̃рдіѧ, ꙗ҆влѧ́емагѡ лю́демъ во ѡ҆бстоѧ́ніи бѣ́дствꙋющымъ.
Воззрѣ́въ же а҆рхіепс̃кпъ на ст҃ꙋ́ю і҆кѡ́нꙋ, ѹ҆зрѣ̀ сле́зы ѿ ѻ҆че́съ є҆ѧ̀ ꙗ҆́кѡ нѣ́кій є҆де́мскій и҆сто́чникъ и҆стека́ющыѧ: и҆ взе́мъ фело́нь сво́й, собира́ше ѻ҆́ныѧ въ него̀ ка́плющыѧ ѿ і҆кѡ́ны, и҆ гл҃го́лѧ:
ѽ чꙋ́до пресла́вно! ка́кѡ ѿ сꙋ́ха дре́ва сле́зы и҆стека́ютъ, сѐ цр҃це ꙗ҆влѧ́еши на́мъ и҆звѣ́стное зна́меніе, ꙗ҆́кѡ со слеза́ми мо́лишисѧ сн҃ꙋ твоемꙋ̀ и҆ бг҃ꙋ на́шемꙋ ѡ҆ и҆збавле́ніи гра́да.
И҆ ве́сь наро́дъ ви́дѣвъ і҆кѡ́нꙋ прест҃ы́ѧ бцд̃ы пла́чꙋщꙋю, возопѝ къ бг҃ꙋ со слеза́ми и҆ воздыха́ніемъ: и҆ внеза́пꙋ падѐ стра́хъ на сопроти́вныѧ, и҆ покры̀ и҆̀хъ тма̀, и҆ гнѣ́въ бж҃ій смѧтѐ и҆̀хъ, и҆ нача́ша є҆ди́нъ дрꙋга́го ѹ҆бива́ти.
Гра́ждане же ви́дѣвше таково́е и҆́хъ смѧте́ніе, ѿверзо́ша врата̀ гра́да, и҆ и҆зше́дше воорꙋже́нни, ѹ҆стреми́шасѧ на врагѡ́въ, ѻ҆́выѧ сѣкꙋ́ще, ѻ҆́выѧ же жи́вы плѣнѧ́юще, и҆ та́кѡ побѣди́ша всѧ̀ полкѝ и҆́хъ по́мощію прест҃ы́ѧ бцд̃ы.
Ѿ тогѡ̀ вре́мени ст҃и́тель и҆ліѧ̀ ѹ҆ста́ви пра́здникъ свѣ́телъ пра́здновати преди́вное зна́меніе прест҃ы́ѧ бцд̃ы въ вели́комъ новѣ́градѣ, и҆ наречѐ де́нь то́й, де́нь и҆збавле́ніѧ и҆ де́нь наказа́ніѧ:
и҆́бо мл҃твами прест҃ы́ѧ бцд̃ы, посла̀ бг҃ъ и҆збавле́ніе гра́жданѡмъ, наказа́ніе же тѣ̑мъ, и҆̀же на сро́дныхъ себѣ̀ и҆ є҆диновѣ́рныхъ бра́тій воста́вше, междоꙋсо́бнꙋю бра́нь сотвори́ша.
<#85>
и҆ ѿ тогѡ̀ вре́мене вели́кій но́въградъ бѣ̀ въ ми́рѣ и҆ тишинѣ̀ глꙋбо́цѣ, правле́ніемъ до́брагѡ па́стырѧ своегѡ̀.
Сѣдѧ́ же на престо́лѣ свое́мъ бл҃же́нный лѣ́та довѡ́лна, во ѹ҆множе́ніе хвалы̀ бж҃іѧ созда̀ цр҃кви ст҃ы́ѧ нарѡ́читы, ꙗ҆́кѡ бы́ти всѣ́мъ ѿ негѡ̀ сѡ́зданнымъ цр҃квамъ число́мъ седми́мъ.
Пе́рваѧ цр҃ковь, ю́же пре́жде и҆́ночества своегѡ̀ созда̀, бѣ̀ бл҃говѣ́щеніѧ прест҃ы́ѧ бцд̃ы.
Втора́ѧ, ю́же во вре́мѧ ст҃лства своегѡ̀ созда̀ въ па́мѧть бг҃оѧвле́ніѧ гдс̃нѧ.
Тре́тіѧ во и҆́мѧ ст҃а́гѡ про̃ро́ка и҆ліѝ.
Четве́ртаѧ прпд̃бнагѡ ѳео́дѡра и҆гꙋ́мена стꙋді́йскагѡ.
Пѧ́таѧ ст҃ы́хъ тріе́хъ ѻ҆трокѡ́въ, а҆на́ніи, а҆за́ріи, місаи́ла, и҆ ст҃а́гѡ даніи́ла про̃ро́ка.
Шеста́ѧ ст҃а́гѡ првд̃нагѡ ла́зарѧ четверодне́внагѡ.
Седма́ѧ ст҃а́гѡ чꙋдотво́рца нікола́а.
Млс̃тивъ же бѣ̀ ст҃ы́й велмѝ ко всѣ́мъ, и҆ кро́тость ве́лію и҆мѣ́ѧй, и҆ любо́вь нелицемѣ́рнꙋю, и҆ бѧ́ше ꙗ҆́кѡ сл҃нце въ цр҃кви хрс̃то́вой свѣтѧ̀ до́брыми дѣ́лы, и҆ прогонѧ́ѧ тмꙋ̀ ѕлодѣѧ́ніѧ, и҆ сокрꙋша́ѧ главꙋ̀ кнѧ́зѧ тмы̀ діа́вола, враждꙋ́ющагѡ всегда̀ и҆ зави́дѧщагѡ спасе́нію человѣ́ческомꙋ.
и҆мѣ́ѧше бо ст҃ы́й вла́сть надъ̃ дꙋ́хи нечи́стыми, ꙗ҆́кѡ свѧ́зывати и҆̀хъ сло́вомъ, ѡ҆ чесо́мъ ди́внꙋю предло́жимъ по́вѣсть:
Стоѧ́щꙋ и҆ногда̀ ст҃о́мꙋ по ѻ҆бы́чаю своемꙋ̀ на моли́твѣ въ ке́лліи свое́й въ полꙋ́нощи, пріи́де бѣ́съ хотѧ̀ мечта́нми ѹ҆страши́ти ст҃а́го, и҆ вни́де въ рꙋкомо́йницꙋ стоѧ́щꙋю въ ло́жницѣ є҆гѡ̀, и҆ нача̀ возмꙋща́ющи во́дꙋ трепета́ти.
ст҃ы́й же ѹ҆разꙋмѣ́въ бѣсо́вское мечта́ніе, пристꙋпѝ въ сосꙋ́дꙋ, и҆ ѡ҆градѝ є҆го̀ крс̃то́мъ, и҆ запреще́ніемъ свѧза̀ во ѹ҆мыва́лницѣ бѣ́са, ꙗ҆́кѡ не и҆зы́ти є҆мꙋ̀ на мно́гъ ча́съ.
не могі́й же терпѣ́ти бѣ́съ, си́лою крс̃тною пали́мый, нача̀ а҆́ки человѣ́къ вопи́ти: ѽ лю́тѣ мнѣ̀, ꙗ҆́кѡ пали́мъ є҆́смь, и҆ не могꙋ̀ терпѣ́ти, ско́рѡ ѿпꙋсти́ мѧ ст҃че бж҃ій.
Ст҃ы́й же речѐ: кто̀ є҆сѝ ты̀; и҆ ка́кѡ сѣ́мѡ вше́лъ є҆сѝ; ѿвѣща̀ діа́волъ: а҆́зъ є҆́смь бѣ́съ лꙋка́вый, и҆ пріидо́хъ смꙋти́ти тѧ̀, мнѣ́хъ бо, ꙗ҆́кѡ ѹ҆страши́шисѧ а҆́ки человѣ́къ, и҆ ѿ мл҃твы ѹ҆праздни́шисѧ, ты́ же мѧ̀ заключи́лъ є҆сѝ въ сосꙋ́дѣ се́мъ, и҆ мꙋ́чꙋсѧ велмѝ, го́ре мнѣ̀ ꙗ҆́кѡ прелсти́хсѧ, и҆ внидо́хъ сѣ́мѡ, пꙋсти́ мѧ ра́бе бж҃ій, и҆ ѿсе́лѣ не и҆́мамъ сѣ́мѡ приходи́ти.
Та́кѡ вопію́щꙋ бѣ́сꙋ надо́лзѣ, ст҃ы́й речѐ: сѐ за твою̀ безстꙋ́днꙋю де́рзость повелѣва́ю тѝ, да но́щи сеѧ̀ несе́ши мѧ̀ во і҆ерс̃ли́мъ, и҆ поста́виши мѧ̀ ѹ҆ цр҃кве, и҆дѣ́же гро́бъ гдс̃нь: и҆зъ̃ і҆ерс̃ли́ма же па́ки сѣ́мѡ въ ке́ллію мою̀ сеѧ̀ же но́щи да пренесе́ши, и҆ а҆́зъ пꙋщꙋ́ тѧ: бѣ́съ же всѧ́чески ѡ҆бѣща́сѧ сотвори́ти во́лю ст҃а́гѡ, то́кмѡ да и҆спꙋще́нъ бꙋ́детъ и҆зъ̃ сосꙋ́да.
Ст҃ы́й же запрети́въ бѣ́сꙋ, и҆спꙋстѝ є҆го̀, ре́къ: бꙋ́ди а҆́ки ко́нь ѹ҆гото́вленъ стоѧ́й предъ̃ ке́ллію мое́ю, ꙗ҆́кѡ да всѣ́дъ на тѧ̀ совершꙋ̀ жела́ніе моѐ.
бѣ́съ же и҆зы́де а҆́ки тма̀ и҆зъ̃ сосꙋ́да, и҆ ста̀ по повелѣ́нію ст҃а́гѡ а҆́ки ко́нь.
Ст҃ы́й же и҆зше́дъ и҆зъ̃ ке́лліи, воорꙋжѝ себѐ крс̃то́мъ, и҆ всѣ́де на бѣ́са, и҆ ѡ҆брѣ́тесѧ тоѧ̀ но́щи <#86> во ст҃ѣ́мъ гра́дѣ і҆ерс̃ли́мѣ бли́зъ цр҃кве ст҃а́гѡ воскр҃се́ніѧ, и҆дѣ́же гро́бъ гдс̃нь.
бѣ́сꙋ же запретѝ, да не ѿи́детъ ѿ мѣ́ста тогѡ̀, и҆ стоѧ́ше бѣ́съ не могі́й ника́коже подви́гнꙋтисѧ съ мѣ́ста, до́ндеже ст҃ы́й сотворѝ поклоне́ніе гро́бꙋ гдс̃ню, и҆ честно́мꙋ крс̃та̀ ст҃а́гѡ дре́вꙋ.
ше́дъ бо къ цр҃кви, преклонѝ колѣ̑на предъ̃ две́рми и҆ помоли́сѧ, и҆ а҆́біе ѿверзо́шасѧ двє́ри цр҃ко́вныѧ са́ми ѡ҆ себѣ̀, и҆ свѣщы̀ и҆ лампа́ды ѹ҆ гро́ба гдс̃нѧ возжго́шасѧ.
Ст҃ы́й же бл҃года́рственнѣ молѧ̀ бг҃а, проліѧ̀ сле́зы, и҆ поклони́сѧ гро́бꙋ гдс̃ню, и҆ ѡ҆блобыза̀ є҆го̀, та́кожде и҆ животворѧ́щемꙋ дре́вꙋ, и҆ всѣ́мъ ст҃ы́мъ і҆кѡ́намъ и҆ мѣста́мъ, ꙗ҆̀же въ цр҃кви.
и҆ соверши́въ жела́емое и҆зы́де, и҆ па́ки двє́ри цр҃ко́вныѧ ѡ҆ себѣ̀ затвори́шасѧ.
и҆ ѡ҆брѣ́тъ бѣ́са на то́мъ мѣ́стѣ, и҆дѣ́же є҆мꙋ̀ повелѣ́лъ, стоѧ́ща а҆́ки конѧ̀ ѹ҆гото́влена, всѣ́де на него̀, и҆ ѡ҆брѣ́тесѧ тоѧ́жде но́щи въ вели́комъ новѣ́градѣ въ ке́лліи свое́й.
Ѿходѧ́ же бѣ́съ ѿ ст҃а́гѡ, молѝ є҆го̀, да не повѣ́даетъ никомꙋ̀, ꙗ҆́же ѡ҆ не́мъ, ꙗ҆́кѡ свѧ́занъ бы́въ запреще́ніемъ, слꙋжа́ше а҆́ки плѣ́нникъ.
а҆́ще же, речѐ, комꙋ̀ и҆сповѣ́си, ꙗ҆́кѡ на мнѣ̀ ѣ҆́здилъ є҆сѝ, то̀ не почі́ю творѧ̀ па́кѡсти тебѣ̀, до́ндеже наведꙋ̀ на тѧ̀ и҆скꙋше́ніе ве́ліе.
Сіѧ̑ бѣ́сꙋ блѧдосло́вѧщꙋ, сотворѝ ст҃ы́й зна́меніе крс̃тное на себѣ̀, и҆ а҆́біе и҆счезѐ бѣ́съ ꙗ҆́коже ды́мъ ѿ негѡ̀.
Нѣ́когда же ст҃о́мꙋ съ честны́ми мꙋ́жи, со и҆гꙋ́мены, и҆ і҆ере́и, и҆ съ бг҃обоѧ́знивыми гра́жданы въ дꙋхо́вной бесѣ́дѣ ѹ҆пражднѧ́ющꙋсѧ, и҆ ст҃ы́хъ житіѧ̑ сказꙋ́ющꙋ, и҆ мнѡ́гаѧ на по́льзꙋ вѣща́ющꙋ, прилꙋчи́сѧ сказа́ти є҆мꙋ̀ и҆ тꙋ̀ ве́щь, ѡ҆ не́йже повѣ́дахомъ.
сказꙋ́ѧ же а҆́ки ѡ҆ и҆но́мъ нѣ́коемъ глаго́лаше: а҆́зъ же (речѐ) вѣ́мъ такова́го человѣ́ка, и҆́же є҆ди́ныѧ но́щи и҆зъ̃ вели́ка нова́града бѣ̀ во і҆ерс̃ли́мѣ: и҆ поклони́всѧ гро́бꙋ гдс̃ню, и҆ животворѧ́щемꙋ крс̃та̀ ст҃а́гѡ дре́вꙋ, па́ки возврати́сѧ тоѧ́жде но́щи въ вели́кій но́въградъ ѣ҆́здѧ на бѣ́сѣ, є҆го́же запреще́ніемъ свѧза́лъ а҆́ки плѣ́нника.
Слы́шащіи же ѹ҆дивлѧ́хꙋсѧ ѡ҆ се́мъ ѕѣлѡ̀.
а҆ діа́волъ поскрежета̀ зꙋбы̀ на ст҃а́го, глаго́лѧ: поне́же сказа́лъ є҆сѝ та́йнꙋ сію̀, наведꙋ̀ ѹ҆̀бо на тѧ̀ таково̀ и҆скꙋше́ніе, да ѡ҆сꙋжде́нъ бꙋ́деши ѿ всѣ́хъ гра́жданъ а҆́ки блꙋдни́къ.
И҆ ѿ тогѡ̀ вре́мене попꙋще́ніемъ бж҃іимъ нача̀ бѣ́съ и҆скꙋше́ніе наводи́ти на ст҃а́го сицево́е: приходѧ́щимъ ко ст҃о́мꙋ мно́гимъ лю́демъ бл҃гослове́ніѧ ра́ди, пока́зываше діа́волъ въ ке́лліи є҆гѡ̀ разли̑чнаѧ привидѣ̑ніѧ, ѻ҆вогда̀ ѻ҆́бꙋвь же́нскꙋю, ѻ҆вогда̀ мони̑ста, ѻ҆вогда́ же и҆ны́ѧ ѹ҆́твари и҆ ѻ҆дє́жды, и҆́миже жє́ны ѹ҆краша́ютсѧ.
Приходѧ́щіи же лю́діе то̀ ви́дѧще, соблазнѧ́хꙋсѧ, и҆ ѕлѣ̀ ѡ҆ ст҃о́мъ помышлѧ́хꙋ: мнѧ́щи ꙗ҆́кѡ блꙋдни́цꙋ въ ке́лліи свое́й де́ржитъ, и҆ смꙋща́хꙋсѧ ѡ҆ не́мъ ѕѣлѡ̀, и҆ совѣ́тꙋюще съ собо́ю глаго́лахꙋ: не пра́ведно є҆́сть таково́мꙋ ст҃и́телю на а҆пс̃толстѣмъ прс̃то́лѣ бы́ти, блꙋдникꙋ̀ сꙋ́щꙋ.
Є҆ди́ною же собра́вшымсѧ лю́демъ, и҆ къ ке́лліи ст҃а́гѡ грѧдꙋ́щымъ, преѻбрази́сѧ бѣ́съ въ дѣви́цꙋ, и҆ <#87> потечѐ предъ̃ наро́домъ а҆́ки и҆зъ̃ ке́лліи ст҃а́гѡ бѣжа́щи, лю́діе же ви́дѣвше воскли́кнꙋша, и҆ нача́ша гони́ти хотѧ́ще ꙗ҆́ти дѣви́цꙋ тꙋ́ю: бѣ́съ же ѹ҆бѣжѐ за ке́ллію ст҃а́гѡ, и҆ неви́димь бы́сть.
Слы́шавъ же ст҃ы́й молвꙋ̀ наро́да, и҆зы́де и҆зъ̃ ке́лліи, и҆ речѐ къ лю́демъ: что̀ є҆́сть ча̑да; почто̀ молва̀ є҆́сть въ ва́съ; ѻ҆ни́ же возопи́вше на него̀ а҆́ки на блꙋдника̀, досажда́юще и҆ ѹ҆карѧ́юще, ꙗ҆́ша є҆го̀, и҆ нача́ша рꙋга́тисѧ є҆мꙋ̀.
недоꙋмѣ́юще же что̀ є҆мꙋ̀ бо́лѣе твори́ти, рѣ́ша къ себѣ̀: веде́мъ є҆го̀ на рѣкꙋ̀, и҆ поса́димъ на пло́тъ, да вы́пловетъ и҆зъ̃ гра́да на́шегѡ въ ни́зъ по рѣцѣ̀.
и҆ ве́дше ст҃а́го и҆ цѣломꙋ́дреннаго а҆рхіере́а бж҃іѧ на вели́кій мо́стъ, и҆́же є҆́сть на рѣцѣ̀ во́лховѣ, низвѣ́сиша є҆го̀ на пло́тъ.
и҆ сбы́стсѧ лꙋка́вагѡ діа́вола сло́во, є҆́же речѐ хвалѧ́сѧ: наведꙋ̀ (глаго́лаше) на тѧ̀ таково̀ и҆скꙋше́ніе, да ѡ҆сꙋжде́нъ бꙋ́деши ѿ всѣ́хъ а҆́ки блꙋдни́къ: и҆ ра́довашесѧ лꙋка́вый, зрѧ̀ ст҃а́го порꙋга́ема.
Но непови́нность првд̃нагѡ, поспѣшествꙋ́ющей бл҃года́ти бж҃іей, премо́же и҆ посрамѝ врага̀: и҆́бо ст҃о́мꙋ на пло́тъ посажде́нꙋ бы́вшꙋ, попловѐ пло́тъ то́й, въ ве́рхъ рѣкѝ, проти́вꙋ вели́кіѧ быстрины̀ водно́й, ꙗ҆́же є҆́сть ѹ҆ вели́кагѡ мо́стꙋ, ники́мже влеко́мый, то́чію си́лою бж҃іею, и҆ пловѧ́ше къ мнс̃тырю̀ ст҃а́гѡ геѡ́ргіа, ѿстоѧ́щемꙋ ѿ гра́да за трѝ по́прища.
Лю́діе же ви́дѧще таково́е чꙋ́до: ѹ҆жаса́хꙋсѧ, и҆ премѣ́ншесѧ ѿ ѕло́бы, растерза́хꙋ ри̑зы своѧ̀, и҆ рыда́хꙋ глаго́люще: согрѣши́хомъ и҆ непра́ведное содѣ́ѧхомъ, ѻ҆́вцы сꙋ́ще па́стырѧ ѡ҆сꙋди́хомъ.
и҆ теча́хꙋ по бре́гꙋ молѧ́ще ст҃а́го, да прости́тъ и҆̀мъ грѣ́хъ и҆́хъ, и҆ да возврати́тсѧ на прс̃то́лъ сво́й, простѝ на́мъ ѻ҆́ч҃е, глаго́лахꙋ, въ невѣ́дѣніи согрѣши́хомъ къ тебѣ̀, не помѧнѝ ѕло́бы на́шеѧ, и҆ не ѡ҆ставлѧ́й на́съ ча́дъ свои́хъ.
та́кожде и҆ кли́ръ ве́сь, предварѧ́юще ст҃а́го, и҆ прекланѧ́юще главы̑ своѧ̀ до землѝ, со слеза́ми молѧ́хꙋ, да возврати́тсѧ на прс̃то́лъ сво́й.
Ѻ҆́нъ же а҆́ки дрꙋгі́й стефа́нъ первомч҃нкъ, молѧ́шесѧ къ бг҃ꙋ за ѡ҆би́дѣвшыѧ є҆го̀ гл҃го́лѧ: гдс̃и не поста́ви и҆̀мъ грѣха̀ сегѡ̀.
и҆ приста̀ ко бре́гꙋ бли́зъ предрече́ннагѡ мнс̃тырѧ̀ ꙗ҆́кѡ полпо́прища, и҆ воста́въ съ пло́та и҆зы́де на бре́гъ.
Наро́ди же съ пла́чемъ припа́дающе къ немꙋ̀ проще́ніѧ просѧ́хꙋ, и҆ ра́довахꙋсѧ, ꙗ҆́кѡ ѹ҆моли́ша ст҃а́го, и҆ ꙗ҆́кѡ ѿкры̀ гдс̃ь непови́нное и҆ чи́стое житіѐ є҆гѡ̀.
ѻ҆́нъ же неѕло́бивъ сы́й, всѣ̑мъ проще́ніе подаѧ̀, ска́зываше, ка́кѡ ѣ҆́здѧ на бѣ́сѣ бы́сть во і҆ерс̃ли́мѣ, и҆ ка́кѡ діа́волъ похвали́сѧ на него̀: вси́ же слы́шавшіи то̀, прославлѧ́хꙋ бг҃а.
И҆ та́кѡ возврати́сѧ ст҃ы́й на прс̃то́лъ сво́й съ вели́кою че́стію и҆ сла́вою, и҆ ѹ҆ча́ше лю́ди гл҃го́лѧ: ча̑да, со и҆спыта́ніемъ всѧ́кое дѣ́ло твори́те, да не прелще́ни бꙋ́дете діа́воломъ, и҆ да не когда̀ съ добродѣ́телію ѕло́бꙋ приплете́нꙋ ѡ҆брѧ́щете, и҆ сꙋдꙋ̀ бж҃ію пови́нни бꙋ́дете.
По се́мъ ма́лѡ поживѐ ст҃ы́й, и҆ ѹ҆вѣ́давъ ѿше́ствіе своѐ къ бг҃ꙋ, положѝ ѡ҆мофо́ръ сво́й, ѹ҆жѐ сы́й въ ста́рости глꙋбо́цѣй, и҆ постриже́сѧ въ схи́мꙋ: нарече́нно же є҆мꙋ̀ бы́сть въ схи́мѣ пе́рвое и҆́мѧ є҆гѡ̀ і҆ѡа́ннъ, и҆ преста́висѧ съ ми́ромъ ко гдс̃ꙋ.
<#88>
Тѣ́ло же є҆го̀ положено̀ бы́сть въ вели́цѣй цр҃кви, въ мона́шескомъ ѻ҆́бразѣ: а҆ по не́мъ возведе́нъ бы́сть на прс̃то́лъ бра́тъ є҆гѡ̀ григо́рій, и҆ пасѧ́ше до́брѣ слове́сное ста́до.
Бг҃ꙋ на́шемꙋ сла́ва, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Въ то́йже де́нь соверша́етсѧ па́мѧть ст҃а́гѡ лꙋкѝ, и҆́же ѿ лѷкаѡ́нскіѧ є҆па́рхіи бы́вшагѡ, тре́тіѧгѡ и҆гꙋ́мена ѻ҆би́тели сп҃совы, глаго́лемыѧ глꙋбо́кіѧ рѣкѝ.
Въ то́йже де́нь въ про́логѣ положена̀ па́мѧть ст҃а́гѡ мч҃нка стефа́на па́пы ри́мскагѡ, но та̀ бꙋ́детъ а҆́ѵгꙋста мцс̃а во в҃ де́нь.