Живы́й на нб҃сѝ гдс̃ь, хотѧ̀ на землѝ ꙗ҆ви́тисѧ и҆ съ человѣ́ки пожи́ти, ѹ҆гото́ва пе́рвѣе на не́й мѣ́сто селе́ніѧ сла́вы своеѧ̀ пречс̃тꙋю мт҃рь свою̀: ѻ҆бы́чно бо є҆́сть царє́мъ, въ кото́рый гра́дъ сво́й пріитѝ хотѧ́щымъ, предъ̃ꙋготовлѧ́ти себѣ̀ въ не́мъ пала́тꙋ къ пребыва́нію.
А҆ ꙗ҆́кѡ пала́ты земны́хъ царе́й, созида́ютсѧ премꙋ́дрѣйшими дѣ́лателѧми, ѿ веще́й дража́йшихъ, на мѣ́стѣ высоча́йшемъ, кра́снѣе и҆ простра́ннѣе па́че и҆ны́хъ жили́щъ человѣ́ческихъ: та́кѡ и҆ нбс̃нагѡ царѧ̀ сла́вы пала́та и҆мѣ̀ созда́тисѧ.
Въ ве́тхомъ завѣ́тѣ, є҆гда̀ восхотѣ̀ бг҃ъ жи́ти во і҆ерс̃ли́мѣ, созда̀ є҆мꙋ̀ соломѡ́нъ хра́мъ премꙋ́дрѣйшимъ дѣ́лателемъ хіра́момъ, и҆́же бѣ̀ и҆спо́лнь хꙋдо́жества, и҆ ра́зꙋма, и҆ вѣ́дѣніѧ, є҆́же дѣ́лати всѧ́ко дѣ́ло.
Созда́ же ѿ веще́й дража́йшихъ, ѿ ка́меней и҆зрѧ́дныхъ, ѿ древе́съ бл҃гово́нныхъ, ке́дра и҆ кѷпари́са, приноси́мыхъ и҆зъ̃ ліва́на, и҆ ѿ зла́та чи́ста, на мѣ́стѣ высоча́йшемъ, на горѣ̀ а҆морі́а, кра́снѣе: и҆́бо и҆зваѧ̀ херꙋві́мы на стѣна́хъ, древеса́ же разли́чнаѧ и҆ цвѣ́ты.
И҆мѣ́ же и҆ простра́нство хра́мъ то́й, ꙗ҆́кѡ нетѣсновмѣща́тисѧ въ не́мъ мно́жествꙋ люде́й і҆и҃лскихъ, и҆ пріи́де въ него̀ сла́ва гдс̃нѧ во ѻ҆гнѝ и҆ ѻ҆́блацѣ.
ѻ҆ба́че не дово́ленъ бѣ̀ хра́мъ то́й ко вмѣще́нію въ себѐ невмѣсти́магѡ бг҃а: соломѡ́нъ созда̀ є҆мꙋ̀ хра́мъ: Но вы́шній не въ рꙋкотворе́нныхъ цр҃квахъ живе́тъ.
Кі́й хра́мъ сози́ждете мѝ, гл҃етъ гдс̃ь; и҆лѝ ко́е мѣ́сто поко́ищꙋ моемꙋ̀; Бл҃гоизво́ли ѹ҆̀бо въ нача́лѣ но́выѧ бл҃года́ти, нерꙋкотворе́нномꙋ созда́тисѧ хра́мꙋ, пречс̃той пребл҃гослове́нной дв҃ѣ мр҃і́и.
Кото́рымъ же дѣ́лателемъ хра́мъ то́й созда́сѧ; вои́стинꙋ премꙋ́дрѣйшимъ: и҆́бо са́мою премꙋ́дростію бж҃іею, глаго́лющꙋ писа́нію: премꙋ́дрость созда̀ себѣ̀ до́мъ.
Всѧ́ же премꙋ́дростію бж҃іею твори̑маѧ, сꙋ́ть добра̑ и҆ совершє́нна: а҆ поне́же пала́тꙋ сло́ва ѡ҆дꙋшевле́ннꙋю бж҃іѧ созда̀ премꙋ́дрость, тогѡ̀ ра́ди соверше́нномꙋ бг҃ꙋ соверше́нный хра́мъ, пресвѣ́тломꙋ цр҃ю̀, пресвѣ́тлаѧ пала́та, пречи́стомꙋ и҆ нескве́рномꙋ женихꙋ̀ пречс̃тый и҆ нескве́рный черто́гъ, <#89> непоро́чномꙋ а҆́гнцꙋ непоро́чное созда́сѧ селе́ніе: чесомꙋ̀ є҆́сть свидѣ́тель на нб҃сѝ вѣ́ренъ гл҃ѧй къ не́й: всѧ̀ добра̀ є҆сѝ бли́жнѧѧ моѧ̀, и҆ поро́ка нѣ́сть въ тебѣ̀.
и҆ дамаски́нъ ст҃ы́й глаго́летъ: всѧ̀ черто́гъ дх҃а, всѧ̀ гра́дъ бж҃ій, бл҃года́тей мо́ре, всѧ̀ добра̀, всѧ̀ бли́зъ бг҃а.
Ѿ ко́ихже веще́й сіѧ̀ созда́сѧ пала́та; ѿ дража́йшихъ вои́стиннꙋ: и҆́бо а҆́ки ѿ ка́мене чс̃тна ѿ ро́да црс̃ка, ѿ дв҃да, и҆́же ка́менемъ, хрс̃та̀ ка́менѧ проѻбразова́вшимъ, въ пра́щꙋ вложе́ннымъ, побѣдѝ голіа́ѳа: и҆ а҆́ки ѿ древе́съ бл҃гово́нныхъ ке́дра и҆ кѷпари́са, ѿ ро́да а҆рхіере́йска, приносѧ́щагѡ бл҃гово́нныѧ бг҃ꙋ жє́ртвы дв҃а бцд̃а роди́сѧ.
ѻ҆те́цъ є҆ѧ̀ ст҃ы́й првд̃ный і҆ѡакі́мъ, сы́нъ бѣ̀ варпафи́ра ведꙋ́щагѡ пле́мѧ своѐ ѿ наѳа́на сы́на дв҃дова, ма́терь же є҆ѧ̀ ст҃а́ѧ првд̃наѧ а҆́нна, дще́рь бѣ̀ матѳа́на і҆ере́а ѿ ро́да а҆арѡ́нова: и҆ бѣ̀ пречс̃таѧ дв҃а по ѻ҆тцѣ̀ ро́да црс̃ка, по ма́тери же ро́да а҆рхіере́йска.
ѽ ко́ль ѿ дража́йшихъ веще́й, ѿ пречс̃тнѣ́йшихъ гл҃го́лю родѡ́въ, ѡ҆дш҃евле́ннаѧ цр҃ю̀ сла́вы, ѹ҆стро́исѧ пала́та.
а҆ ꙗ҆́кѡ въ соломѡ́новомъ хра́мѣ ка́мєннаѧ и҆ древѧ̑наѧ зда̑ніѧ мно́жайшꙋю че́сть и҆мѣ́ѧхꙋ ѿ чи́стагѡ зла́та, и҆́мже бы́ша позлащє́на: та́кѡ въ ржс̃твѣ̀ прест҃ы́ѧ бцд̃ы, бл҃горо́дство ца́рское и҆ а҆рхіере́йское мно́жае почте́сѧ цѣломꙋ́дріемъ ст҃ы́хъ є҆ѧ̀ роди́телей, є҆́же па́че ты́сѧщъ зла́та и҆ сребра̀ є҆́сть дража́йшее, и҆ чс̃тнѣ́йшее є҆́сть ка́меніе многоцѣ́нныхъ: всѧ́ко же честно́е недосто́йно є҆ѧ̀ є҆́сть:
ѿ цѣломꙋ́дріѧ бо роди́телей, є҆́же вы́ше всѧ́кагѡ є҆́сть бл҃горо́дства, прест҃а́ѧ дв҃а роди́сѧ, ѡ҆ чесо́мъ свидѣ́телствꙋетъ дамаски́нъ ст҃ы́й, ко ст҃ы́мъ првд̃нымъ бг҃оѻц҃є́мъ бесѣ́дꙋѧ си́це: ѽ бл҃же́нныѧ сꙋпрꙋ̑ги і҆ѡакі́ме и҆ а҆́нно, вои́стиннꙋ ѿ плода̀ чре́ва ва́шегѡ непорѡ́чни позна́стесѧ по словесѝ гдс̃ню: ѿ плѡ́дъ и҆́хъ позна́ете и҆́хъ.
ꙗ҆́коже бг҃ꙋ бы́сть бл҃гоꙋго́дно, и҆ рожде́нныѧ ѿ ва́съ досто́йно, ѹ҆пра́висте своѐ житіѐ.
цѣломꙋ́дреннѣ бо и҆ прпд̃бнѣ живꙋ́ще, двс̃тва сокро́вище произнесо́сте, дв҃ꙋ гл҃го́лю: пре́жде ржс̃тва̀ дв҃ꙋ, въ ржс̃твѣ̀ дв҃ꙋ, и҆ по ржс̃твѣ̀ дв҃ꙋ, и҆ всегда̀ дв҃ꙋ, є҆ди́нꙋ ѹ҆мо́мъ и҆ дꙋше́ю и҆ тѣ́ломъ приснодѣ́вствꙋющꙋю.
Подоба́ше же, да двс̃тво ѿ цѣломꙋ́дріѧ рожде́нное, самомꙋ̀ є҆диноро́дномꙋ свѣ́тꙋ, пло́тски принесе́тсѧ.
ѽ дво́ице чс̃тѣ́йшихъ слове́сныхъ го́рлицъ і҆ѡакі́ме и҆ а҆́нно, вы̀ є҆стества̀ зако́нъ цѣломꙋ́дреннѣ соблю́дше, па́че є҆сте́ственныхъ бжс̃твеннѣ сподо́битесѧ, дв҃ꙋ бо бж҃ію мт҃рь мі́рꙋ породи́сте.
Вы̀ бл҃гоче́стнѡ и҆ прпд̃бнѡ въ человѣ́честѣмъ є҆стествѣ̀ пожи́вше, вы́шшꙋю а҆́гг҃лъ, и҆ а҆́гг҃лы ны́нѣ ѡ҆блада́ющꙋю дще́рь произведо́сте.
ѽ краснѣ́йшаѧ и҆ сладча́йшаѧ дщѝ: ѽ крі́не посредѣ̀ те́рніѧ ѿ бл҃горо́днѣйшагѡ црс̃кагѡ ко́рене и҆зра́стшій: тобо́ю црс̃тво сщ҃е́нства ѡ҆богати́сѧ.
си́ми словесы̀ дамаски́нъ ст҃ы́й ꙗ҆́вѣ показꙋ́етъ, ѿ каковы́хъ роди́телей бж҃іѧ мт҃рь рожде́на, ѿ коли́кѡ дража́йшихъ веще́й пала́та цр҃ѧ̀ нбс̃нагѡ ѹ҆стро́ена.
На ко́емже мѣ́стѣ сіѧ̀ ѡ҆дꙋшевле́ннаѧ ѹ҆стро́исѧ пала́та; вои́стиннꙋ на высоча́йшемъ.
<#90>
дае́тъ бо свидѣ́тельство ѡ҆ не́й цр҃ковь сицево́е: и҆́стиннѡ вы́шши всѣ́хъ є҆сѝ дв҃о чи́стаѧ.
ѻ҆ба́че не мѣ́ста, но добродѣ́тели и҆ бж҃іихъ дарова́ній высото́ю.
Мѣ́сто бо, и҆дѣ́же пребл҃гослове́ннаѧ дв҃а роди́сѧ, бѣ̀ ма́лъ гра́дъ въ землѝ галіле́йстѣй, нарица́емый назаре́тъ, капернаꙋ́мꙋ гра́дꙋ вели́комꙋ подлежа́щій, несла́венъ и҆ нече́стенъ, и҆ жи́тели є҆гѡ̀ бѧ́хꙋ презира́еми, ꙗ҆́коже ѡ҆ хрс̃тѣ̀ рече́но бѣ̀: ѿ назаре́та мо́жетъ ли что̀ добро̀ бы́ти;
гдс̃ь же въ высо́кихъ живы́й и҆ на смире́нныѧ призира́ѧй, не въ капернаꙋ́мѣ горды́нею до нб҃съ возне́сшемсѧ, но въ смире́нномъ назаре́тѣ бл҃гоизво́ли рожде́нѣй бы́ти пречс̃тѣй свое́й мт҃ри, ꙗ҆влѧ́ѧ, ꙗ҆́кѡ всѐ є҆́же є҆́сть въ человѣ́цѣхъ высоко̀, ме́рзость є҆́сть предъ̃ бг҃омъ: а҆ є҆́же ѿ ни́хъ презира́емое и҆ ѹ҆ничижа́емое, то̀ ѹ҆ негѡ̀ высо́ко и҆ че́стно.
къ семꙋ́же да ѿ са́магѡ и҆́мене тогѡ̀ назаре́тъ, пока́жетъ высотꙋ̀ добродѣ́телей пречс̃тыѧ дв҃ы: ꙗ҆́коже бо въ свое́мъ ржс̃твѣ̀ виѳлее́момъ, и҆́же сказꙋ́етсѧ до́мъ хлѣ́ба, та́йнѡ ѡ҆бразова̀ то̀, ꙗ҆́кѡ ѻ҆́нъ є҆́сть хлѣ́бъ сше́дый съ нб҃сѐ на ѡ҆живле́ніе и҆ ѹ҆крѣпле́ніе человѣ́кѡвъ: си́це и҆ въ ржс̃твѣ̀ мт҃ре своеѧ̀ пречс̃тыѧ, назаре́томъ высѡ́каѧ и҆зъ̃ѧвлѧ́етъ, назаре́тъ бо сказꙋ́етсѧ цвѣтна̀, и҆ сщ҃е́нна, и҆ ѿлꙋче́нна ѿ земны́хъ и҆ вѣнча́нна и҆ стрего́ма.
всѧ̑ же та̀ въ пречс̃тѣй дв҃ѣ и҆зъ̃ѧвлѧ́ютсѧ ꙗ҆́снѡ: ѻ҆на́ бо є҆́сть цвѣ́тъ, ѿ сꙋха́гѡ дре́ва, непло́дныѧ и҆ заматорѣ́лыѧ ѹ҆тро́бы прозѧ́бшій, и҆ ѡ҆бнови́вый и҆зсо́хшее є҆стество̀ на́ше.
Цвѣ́тъ неꙋвѧда́емый, двс̃твомъ присноцвѣтꙋ́щій.
цвѣ́тъ бл҃гово́нный, родѧ́щій бл҃гоꙋха́ніе є҆ди́наго цр҃ѧ̀.
цвѣ́тъ приносѧ́щій пло́дъ хрс̃та̀ гдс̃а: є҆ди́на прозѧ́бшаѧ ꙗ҆́блоко бл҃гово́нное.
Ѻ҆на̀ є҆́сть сщ҃е́нна блгд̃тію наше́дшагѡ на ню̀ и҆ ѡ҆сѣни́вшагѡ ю̀ ст҃а́гѡ дх҃а, и҆ є҆́сть всѣ́хъ ст҃ы́хъ ст҃ѣ́йшаѧ, ꙗ҆́кѡ ро́ждшаѧ всѣ́хъ ст҃ы́хъ ст҃ѣ́йшее сло́во.
Ѻ҆на̀ ѿлꙋче́на ѿ земны́хъ грѣ́шныхъ, и҆́бо грѣха̀ во все́й жи́зни свое́й ни є҆ди́нагѡ же позна̀.
всѝ съ дв҃домъ гл҃го́лютъ: беззако́ніе моѐ а҆́зъ зна́ю, и҆ грѣ́хъ мо́й предо мно́ю є҆́сть вы́нꙋ.
та̀ є҆ди́на гл҃го́летъ: безъ̃ беззако́ніѧ теко́хъ и҆ и҆спра́вихъ.
Є҆́сть бо и҆справле́ніе человѣ́кѡвъ, не то́чію сама̀ грѣха̀ не сотво́рши, но и҆ грѣ́шникѡвъ ѿ дѣ́лъ грѣхо́вныхъ ѿводѧ́щи, ꙗ҆́коже гл҃етъ къ не́й цр҃ковь: Ра́дꙋйсѧ, скве́рныхъ и҆зима́ющаѧ дѣ́лъ.
Ѻ҆на̀ є҆́сть вѣнча́нна сла́вою и҆ че́стію: вѣнча́нна сла́вою, ꙗ҆́кѡ ѿ црс̃кагѡ ко́рене прозѧ́бшаѧ: вѣнча́нна че́стію, ꙗ҆́кѡ ѿ а҆рхіере́йскагѡ пле́мене и҆зра́стшаѧ.
вѣнча́нна сла́вою, ꙗ҆́кѡ ѿ цѣломꙋ́дренныхъ и҆ првд̃ныхъ роди́телей произше́дшаѧ: вѣнча́нна че́стію, ꙗ҆́кѡ а҆рха́гг҃лскимъ бл҃говѣ́щеніемъ и҆ слꙋже́ніемъ почте́ннаѧ.
вѣнча́нна сла́вою, ꙗ҆́кѡ мт҃рь бж҃іѧ: что́ бо сегѡ̀ сла́внѣе є҆́же роди́ти бг҃а; вѣнча́нна че́стію, ꙗ҆́кѡ прс̃нодв҃а: что́ бо сегѡ̀ честнѣ́е є҆́же и҆ по ржс̃твѣ̀ дв҃ою бы́ти; вѣнча́нна сла́вою, сла́внѣйшаѧ серафі̑мъ, ꙗ҆́кѡ серафі́мски бг҃а возлюби́вшаѧ: вѣнча́нна че́стію, чс̃тнѣ́йшаѧ херꙋві̑мъ, ꙗ҆́кѡ херꙋві́мѡвъ мꙋ́дростію и҆ позна́ніемъ бжс̃тва̀ превозше́дшаѧ: <#91> сла́ва и҆ че́сть и҆ ми́ръ всѧ́комꙋ дѣ́лающемꙋ бл҃го́е гл҃етъ а҆пс̃лъ: и҆ кто̀ ѿ земны́хъ ѡ҆брѣ́тесѧ бл҃ги́хъ дѣ́латель лꙋ́чшій, ꙗ҆́кѡ пречс̃таѧ дв҃а; всѧ̑ за́пѡвѣди гдс̃ни сохранѝ, всю̀ во́лю є҆гѡ̀ сотворѝ, всѧ̑ гл҃ы є҆гѡ̀ соблюдѐ, всѧ̑ словеса̀ є҆гѡ̀ въ срд̃цѣ свое́мъ сокры̀, всѧ̀ милосе́рднаѧ дѣла̀ бли̑жнимъ и҆зъ̃ѧвѝ: досто́йнѣ ѹ҆̀бо вѣнча́нна ꙗ҆́кѡ всѣ́хъ бл҃гъ дѣ́лателница.
Є҆́сть же и҆ стрего́ма: сокро́вище бо цѣломꙋ́дріѧ своегѡ̀ дв҃ческагѡ си́це ѻ҆па́снѡ стрежа́ше, ꙗ҆́кѡ нижѐ а҆́гг҃лꙋ хотѣ̀ ѻ҆́ное ввѣ́рити: ви́дѣвши бо а҆́гг҃ла смѧте́сѧ ѡ҆ словесѝ є҆гѡ̀, и҆ помышлѧ́ше, каково̀ бꙋ́детъ цѣлова́ніе.
Сіѧ̀ всѧ̑ въ пречс̃тѣй дв҃ѣ бы́ти, назаре́тъ и҆менова́ніемъ свои́мъ и҆зъ̃ѧвѝ: и҆ кто̀ не рече́тъ, ꙗ҆́кѡ высо́каѧ та̀ пала́та хрс̃то́ва добродѣ́телми и҆ бж҃іими дарова́ніи ѕѣлѡ̀ возвы́шена.
Высока̀, и҆́бо ѿ нб҃сѐ дарова́сѧ, а҆́ще и҆ на землѝ ѿ земноро́дныхъ роди́сѧ.
ѿ нб҃сѐ, и҆́бо, ꙗ҆́коже ѿ бг҃мы́сленныхъ нѣ́цыи глаго́лютъ, а҆рха́гг҃лъ гавріи́лъ бл҃говѣсти́вый заха́ріи і҆ѡа́нново, то́йже бл҃говѣстѝ і҆ѡакі́мꙋ и҆ а҆́ннѣ прест҃ы́ѧ бцд̃ы зача́тіе, то́й и҆ и҆́мѧ є҆́й пребл҃гослове́нное ѿ нб҃сѐ принесѐ, гл҃ѧ къ непло́днѣй ма́тери: а҆́нно, а҆́нно, роди́ши дще́рь пребл҃гослове́ннꙋю, нарече́тсѧ же и҆́мѧ є҆́й мр҃і́а.
Несꙋмнѣ́ннѡ ѹ҆́бѡ нарещи́сѧ мо́жетъ гра́домъ ст҃ы́мъ і҆ерс̃ли́момъ но́вымъ съ нб҃сѐ ѿ бг҃а сходѧ́щимъ, и҆ ски́ніею бж҃іею съ чл҃вѣ́ки.
Высока̀ бж҃іѧ ски́ніѧ, и҆́бо па́че серафі̑мъ возвы́сисѧ ро́ждши цр҃ѧ̀ хрс̃та̀.
ѽ высото̀ неꙋдобовосходи́маѧ человѣ́ческими по́мыслы.
Ка́ѧ же красота̀ мы́сленныѧ тоѧ̀ хрс̃то́вы пала́ты; слы́ши того́жде сладкоглаго́ливаго і҆ѡа́нна дамаскина̀ вѣща́ющаго ѡ҆ не́й си́це: принесе́сѧ бг҃ꙋ всѣ́хъ цр҃ю̀, ꙗ҆́коже ри́зою злато́ю добродѣ́телей бл҃голѣ́піемъ ѡ҆дѣ́ѧна, и҆ ѹ҆кра́шена дх҃а ст҃а́гѡ блгд̃тію, є҆ѧ́же сла́ва внꙋ́трь, ꙗ҆́коже бо женѣ̀ всѧ́кой сла́ва мꙋ́жъ ѿ внѣ̀ приходѧ́й, та́кѡ бцд̃ѣ сла́ва внꙋ́трь, сі́есть, пло́дъ чре́ва є҆ѧ̀.
И҆ па́ки то́йже: ѽ дв҃о бг҃облагода́тнаѧ, цр҃ковь бж҃іѧ ст҃а́ѧ, ю́же ѻ҆́ный міронача́лный соломѡ́нъ дх҃о́внѣ созда̀, и҆ въ не́й поживѐ: ни зла́томъ, ни бездꙋ́шнымъ ка́меніемъ ѹ҆кра́шена, но вмѣ́стѡ зла́та дх҃омъ сіѧ́ѧ, вмѣ́стѡ же ка́меней че́стныхъ, многоцѣ́нный би́серъ хрс̃та̀ и҆мѣ́ѧ.
Сицево̀ ѹ҆краше́ніе тоѧ̀ пала́ты, мно́гѡ краснѣ́йшее па́че бы́вшагѡ въ соломѡ́новой цр҃кви, въ не́йже подѡ́біѧ херꙋві́мѡвъ, древе́съ же и҆ цвѣтѡ́въ и҆зъ̃ѻбражє́на зрѧ́хꙋсѧ.
Но и҆ въ се́й ѡ҆дш҃евле́нной цр҃кви въ пречс̃тѣй дв҃ѣ, херꙋві́мскій ꙗ҆́вѣ зри́тсѧ ѻ҆́бразъ: херꙋві́мскимъ бо свои́мъ житіе́мъ, не то́чію херꙋві́мѡвъ соравни́сѧ, но и҆ превзы́де.
А҆́ще и҆нѣ́хъ ст҃ы́хъ ѻ҆бы́че цр҃ковь нарица́ти херꙋві́мы, пою́щи: что̀ ва́съ нарече́мъ ст҃і́и; херꙋві́мы, ꙗ҆́кѡ на ва́съ почи́лъ є҆́сть хрс̃то́съ: кольмѝ па́че дв҃а бцд̃а херꙋві́мъ є҆́сть, въ не́йже почѝ хрс̃то́съ тѣле́снѣ, и҆ на пречс̃тыхъ є҆ѧ̀ рꙋка́хъ бг҃ъ сѣ́де ꙗ҆́кѡ на прс̃то́лѣ: прс̃то́лъ херꙋві́мскій дв҃ца.
И҆зъ̃ѻбрази́ же въ себѣ̀ и҆ древе́съ бл҃гоплодови́тыхъ подѡ́біѧ, сотво́ршеесѧ дх҃о́внѣ ма́слиною плодови́тою въ домꙋ̀ <#92> бж҃іи, и҆ фі́нікомъ цвѣтꙋ́щимъ, чесѡ̀ ра́ди са́домъ живоно́снымъ ны́нѣ и҆менꙋ́етсѧ, си́це пою́щей цр҃кви: ѿ непло́днагѡ ко́рене, са́дъ живоно́сенъ, и҆зрастѝ на́мъ мт҃рь свою̀, и҆́же чꙋде́съ бг҃ъ.
сіѧ̑ же всѧ̑ гл҃го́лютъ ѡ҆ красотѣ̀ є҆ѧ̀ дх҃о́внѣй.
Но и҆ тѣле́сныѧ не лише́на бѣ̀, и҆звѣствꙋ́ющымъ мнѡ́гимъ ѹ҆чи́телємъ цр҃кѡ́внымъ, ꙗ҆́кѡ во все́й подсолне́чной не бѣ̀, и҆ не бꙋ́детъ таковы́ѧ дв҃цы кра́сныѧ, ꙗ҆́коже бѣ̀ дв҃а бцд̃а.
Ю́же ѹ҆зрѣ́въ ст҃ы́й діонѵ́сій а҆реопагі́тъ, бг҃омъ нарещѝ хотѧ́ще, а҆́ще не бы̀ вѣ́далъ бг҃а рожде́ннагѡ ѿ неѧ̀.
Бж҃е́ственнаѧ бо блгд̃ть, є҆ѧ́же полна̀ бѣ̀ внꙋ́трь, сіѧ́ше ѿ пресвѣ́тлагѡ лица̀ є҆ѧ̀.
Таковꙋ̀ себѣ̀ пала́тꙋ цр҃ь нбс̃ный на землѝ предꙋгото́ва, дꙋше́ю и҆ тѣ́ломъ кра́снꙋ, ꙗ҆́кѡ невѣ́стꙋ ѹ҆кра́шенꙋ мꙋ́жꙋ своемꙋ̀.
Є҆ще́ же и҆ простра́ннꙋ: чре́во є҆ѧ̀ простра́ннѣе нб҃съ содѣ́ла, и҆ вмѣсти́сѧ въ не́й невмѣсти́мый хрс̃то́съ бг҃ъ.
Ѻ҆бы́чнѡ пала̑ты зи́ждꙋтсѧ простра́нны, могꙋ́щіѧ не то́чію царѧ̀, но и҆ мно́жество предстоѧ́щихъ слꙋ́гъ, и҆ ѿ всеѧ̀ землѝ приходѧ́щихъ къ царю̀ люде́й въ себѣ̀ вмѣсти́ти.
Простра́нное селе́ніе сло́ва, пречс̃таѧ дв҃а, не то́чію бг҃ꙋ сло́вꙋ ꙗ҆́кѡ цр҃ю̀, но и҆ на́мъ рабѡ́мъ, къ бг҃ꙋ въ не́й вселѧ́ющемꙋсѧ притека́ющымъ, є҆́сть простра́нна.
Бг҃а во ѹ҆тро́бѣ, на́съ же въ свое́мъ бл҃гоꙋтро́біи вмѣща́етъ.
И҆збра́нный сосꙋ́дъ ст҃ы́й а҆пс̃лъ па́ѵелъ бл҃гоꙋтро́біемъ подвиза́емый, гл҃го́лаше къ свои́мъ возлю́бленнымъ: срд̃це на́ше распространи́сѧ: не тѣ́снѡ вмѣща́етесѧ въ на́съ.
но чіѐ ѿ ст҃ы́хъ ко вмѣще́нію всѣ́хъ си́це простра́нное бл҃гоꙋтро́біе ѡ҆брѣсти́сѧ мо́жетъ, ꙗ҆́коже по бз҃ѣ мр҃і́ино; вмѣща́етсѧ здѣ̀ цѣломꙋ́дренный, и҆ грѣ́шномꙋ здѣ́ же не тѣ́сно.
Тꙋ̀ и҆́мать ка́ющійсѧ своѐ мѣ́сто, и҆ ѿча́ѧнномꙋ съ не_ка́ющимсѧ, ꙗ҆́кѡ къ нѡ́евꙋ ковче́гꙋ не то́чію чи̑стымъ, но и҆ нечи̑стымъ живо́тнымъ прибѣ́жище невозбра́нно.
Въ є҆ѧ̀ бл҃гоꙋтро́біе всѝ скорбѧ́щіи, ѡ҆би́диміи, а҆́лчꙋщіи, стра́нніи, ѡ҆бꙋрева́еміи, болні́и, не тѣ́снѡ вмѣща́ютсѧ, не вѣ́сть бо та́ѧ не бл҃гоꙋтро́бна бы́ти, є҆ѧ́же ѹ҆тро́ба бл҃га́го на́мъ родѝ бг҃а.
Пала́тъ царе́й земны́хъ мно́ги стрегꙋ́тъ стра́жіе воѡрꙋже́нніи, и҆ не всѧ́комꙋ въ ѻ҆́ныѧ вни́ти хотѧ́щемꙋ пропꙋска́ютъ, но ѹ҆де́рживаютъ, ѡ҆па́снѡ же, ѿкꙋ́дꙋ и҆ почто̀ грѧде́тъ; и҆спытꙋ́ютъ:
Пала́та же хрс̃то́ва ѡ҆дꙋшевле́ннаѧ, а҆́ще и҆ ѡ҆бстои́ма є҆́сть херꙋві̑мы и҆ серафі̑мы, и҆ безчи́сленными а҆́гг҃лѡвъ же и҆ всѣ́хъ ст҃ы́хъ ли́ки: ѻ҆ба́че въ две́ри бл҃гоꙋтро́бнагѡ є҆ѧ̀ млс̃рдіѧ вни́ти хотѧ́щемꙋ никто́же возбранѧ́етъ.
не ѿрѣва́ютъ стра́жіе, ни прогонѧ́ютъ во́и, нижѐ почто̀ грѧде́тъ и҆спытꙋ́ютъ, но невозбра́ннѡ съ моле́ніемъ вхо́дитъ, и҆ пріе́млетъ да́ръ къ поле́зномꙋ проше́нію.
Да притека́емъ ѹ҆̀бо къ бл҃гоꙋтро́бію ѿ непло́дныѧ ѹ҆тро́бы рожде́нныѧ, даю́ще є҆́й цѣлова́ніе сицево́е: Ра́дꙋйсѧ всенепоро́чнаѧ пала́то всѣ́хъ цр҃ѧ̀.
ра́дꙋйсѧ селе́ніе бг҃а и҆ сло́ва.
Є҆мꙋ́же со ѻ҆ц҃е́мъ и҆ ст҃ы́мъ дх҃омъ, и҆ тебѣ̀ дще́ри ѻ҆́ч҃ей, мт҃ри сн҃о́вней, невѣ́стѣ ст҃а́гѡ дх҃а, ѿ на́съ бре́нныхъ, бꙋ́ди че́сть и҆ сла́ва во вѣ́ки, а҆ми́нь.
Въ се́й же де́нь въ про́логѣ воспомина́етсѧ нѣ́кій потае́нный ѹ҆го́дникъ бж҃ій ніки́та, гл҃го́лемый хартꙋла́рій, положе́нный въ по́вѣсти ѡ҆ і҆ере́и и҆мѣ́вшемъ враждꙋ̀ съ созѡ́нтомъ діа́кономъ.
Мы́ же настоѧ́щагѡ ра́ди пра́здника на ѹ҆́тріе ѿложи́хомъ.