Но́вагѡ пресла́внагѡ и҆ превели́кагѡ во і҆ерс̃ли́мѣ хра́ма ѡ҆бновле́ніе дне́сь пра́зднꙋемъ, не є҆го́же ца́рь соломѡ́нъ на горѣ̀ а҆морі́а созда̀, но є҆го́же бл҃гочести́вый ца́рь кѡнстанті́нъ съ достохва́лною мт҃рію свое́ю є҆ле́ною на <#144> горѣ̀ голго́ѳѣ пречꙋ́днѣ ѹ҆стро́и, и҆ мѣ́сто ст҃о́е і҆́дѡлскимъ нече́стіемъ ѡ҆скверне́ное ѡ҆чи́сти и҆ ѡ҆бновѝ.
И҆́бо по во́лной хрс̃то́вой стрс̃ти, и҆ воскрс̃ніи, и҆ на нб҃са̀ вознесе́ніи, то̀ ст҃о́е мѣ́сто, на не́мже спасе́ніе на́ше соверши́сѧ, бѣ̀ ненави́димо и҆ ѡ҆сквернѧ́емо людмѝ хрс̃тоненави́стными: наипа́че же а҆дріа́нъ ца́рь нечести́вый всѧ̑ ст҃а́ѧ мѣста̀ бѣсо́вскими і҆́дѡлами и҆ же́ртвами ѡ҆сквернѝ.
Є҆гда́ бо вмѣ́стѡ прекра́снагѡ гра́да і҆ерс̃ли́ма, ті́томъ разоре́ннагѡ, созда̀ гра́дъ во и҆́мѧ своѐ нарица́емый є҆́ліа, ѻ҆́нъ бо та́кѡ и҆менова́шесѧ, є҆́лій а҆дріа́нъ: тогда̀ гро́бъ гдс̃нь повелѣ̀ пе́рстію и҆ ка́меніемъ мно́гимъ засы́пати.
На горѣ́ же то́й, и҆дѣ́же гдс̃ь распѧ́сѧ, созда̀ хра́мъ скве́рной свое́й боги́нѣ вене́рѣ, и҆ і҆́дѡла є҆ѧ̀ поста́ви.
а҆ надъ̃ гро́бомъ бж҃іимъ дрꙋга́го поста́ви і҆́дѡла бо́га ді́а.
и҆ и҆дѣ́же а҆́гнецъ бж҃ій принесѐ въ же́ртвꙋ бг҃ꙋ ѻ҆ц҃ꙋ̀ ѡ҆ грѣсѣ́хъ на́шихъ, та́мѡ приноша́хꙋсѧ сквє́рныѧ бѣсѡ́мъ жє́ртвы, и҆ нечи́стіи грѣсѝ соверша́хꙋсѧ.
Та́кожде и҆ въ виѳлее́мѣ, и҆дѣ́же пречс̃тый ѿ пречс̃тыѧ ѹ҆тро́бы роди́сѧ, і҆́дѡла а҆дѡ́на поста́ви, да ст҃о́е то̀ мѣ́сто стꙋ́дными ѡ҆сквернѧ́етсѧ дѣла́ми.
И҆ и҆дѣ́же бѣ̀ цр҃ковь соломѡ́нова, та́мѡ ка́пище і҆́дѡлское созда̀, и҆ заповѣ́да: да никто́же де́рзнетъ гра́да того̀ нарица́ти і҆ерс̃ли́момъ, но є҆́ліею да нарица́етъ.
Сіѧ̑ же всѧ̀ сотворѝ, хотѧ̀ и҆ па́мѧть и҆́мене і҆и҃съ хрс̃то́ва потреби́ти ѿ землѝ, тогѡ̀ ра́ди и҆ гра́дъ, въ не́мже хрс̃то́съ мнѡ́гаѧ сотворѝ зна́мєніѧ, преименова̀, и҆ на мѣ́стѣхъ, и҆дѣ́же рожде́нъ, и҆ и҆дѣ́же ра́спѧтъ и҆ погребе́нъ бы́сть, бѣсѡ́вскаѧ сотворѝ жили̑ща, да послѣ́дній ро́дъ всѧ́чески забꙋ́детъ хрс̃та̀, и҆ мѣ́стъ тѣ́хъ, на ни́хже хрс̃то́вы бѧ́хꙋ но́зѣ, да не воспомѧне́тъ ктомꙋ̀ никогда́же.
Ѻ҆ба́че са́мъ поги́бе съ шꙋ́момъ ѻ҆каѧ́нный, мѣ́сто же ст҃о́е цр҃ь сла́вы па́ки просла́ви.
Воздви́же бо царѧ̀ кѡнстанті́на, и҆ ма́терь є҆гѡ̀ є҆ле́нꙋ, и҆ тѣ́хъ просвѣти́въ свѣ́томъ ст҃ы́ѧ вѣ́ры, вложѝ и҆̀мъ въ се́рдце, ст҃ы́й гра́дъ і҆ерс̃ли́мъ ѡ҆бнови́ти, и҆ хра́мъ бж҃ій прекра́сный созда́ти на то́мъ мѣ́стѣ, на не́мже хра́мина тѣ́ла хрс̃то́ва разоре́ннаѧ тре́ми де́нми созда́сѧ: и҆ всѧ̑ ст҃а́ѧ мѣста̀ ѿ скве́рнъ бѣсо́вскихъ ѡ҆чи́стити и҆ ѡ҆ст҃и́ти.
Посла̀ ѹ҆́бо на то̀ дѣ́ло бл҃гочести́вый ца́рь кѡнстанті́нъ ст҃ꙋ́ю ма́терь свою̀ є҆ле́нꙋ со мно́жествомъ зла́та во і҆ерс̃ли́мъ, и҆ къ ст҃ѣ́йшемꙋ патріа́рхꙋ мака́рію писа̀, да ѡ҆ созда́ніи цр҃кве приложи́тъ тща́ніе.
Доше́дши ѹ҆́бѡ ст҃а́ѧ є҆ле́на во і҆ерс̃ли́мъ, разорѝ всѧ̀ і҆́дѡлскіѧ хра́мы, и҆ і҆́дѡлы сокрꙋшѝ, и҆ ст҃ы́й гра́дъ ѿ всѣ́хъ нечести́выхъ скве́рнъ ѡ҆чи́сти и҆ ѡ҆бновѝ.
Ѡ҆брѣ́те же чс̃тны́й крс̃тъ гдс̃нь и҆ гро́бъ, размета́вши пе́рсть и҆ ка́меніе, и҆́мже бѣ̀ засы́панъ, и҆ ѡ҆снова̀ цр҃ковь на то́мъ мѣ́стѣ ѕѣлѡ̀ вели́кꙋ, и҆ ѡ҆градѝ є҆ди́нымъ ѡ҆гражде́ніемъ ѻ҆боѧ̀ та̀ мѣста̀, и҆дѣ́же распѧ́сѧ хрс̃то́съ, и҆ и҆дѣ́же погребе́сѧ, не дале́че бо ѿстоѧ́ше є҆ди́но ѿ дрꙋга́гѡ, гл҃го́лющꙋ і҆ѡа́ннꙋ: бѣ́ же на мѣ́стѣ, и҆дѣ́же распѧ́тсѧ, ве́ртъ, и҆ <#145> въ ве́ртѣ гро́бъ но́въ.
Тꙋ̀ ѹ҆̀бо пѧтка̀ ра́ди і҆ꙋде́йска, ꙗ҆́кѡ бли́зъ бѧ́ше гро́бъ, положи́ста і҆и҃са.
Є҆ди́ною ѹ҆́бѡ цр҃ковію, и҆ голго́ѳꙋ, и҆ гро́бъ гдс̃нь ѡ҆бъ̃ѧ̀, и҆ нарече́на бѣ̀ цр҃ковь та̀ мартѷріѡ́нъ, сі́есть свидѣ́телство.
Свидѣ́телство же воскрс̃ніѧ хрс̃то́ва, ꙗ҆́кѡ на то́мъ мѣ́стѣ хрс̃то́съ ѹ҆́мре и҆ воскр҃се.
Созда́ же є҆ле́на ст҃а́ѧ и҆ и҆́ныѧ цр҃кви: въ виѳлее́мѣ, и҆ на горѣ̀ є҆леѡ́нстѣй, и҆ въ геѳсима́ніи, и҆ на мно́гихъ ст҃ы́хъ мѣ́стѣхъ, и҆ всѧ́кимъ ѹ҆краше́ніемъ ѹ҆красѝ ꙗ҆̀.
Ѻ҆ба́че та̀, ꙗ҆́же надъ̃ гро́бомъ гдс̃нимъ цр҃ковь, па́че всѣ́хъ бѣ̀ краснѣ́йша и҆ бо́лша, но соверше́ніѧ є҆ѧ̀ сама̀ цр҃и́ца є҆ле́на не ви́дѣ: возврати́сѧ бо къ сы́нꙋ, и҆ почѝ ѡ҆ гдс̃ѣ, не соверши́вшейсѧ цр҃кви.
не возмо́жно бо бѣ̀ толи́кѡ пречꙋ́дномꙋ и҆ превели́комꙋ зда́нію въ ма́ломъ созда́тисѧ вре́мени, є҆́же є҆два̀ десѧтмѝ лѣ́ты созда́сѧ.
Соверши́вшейсѧ же цр҃кви, повелѣ̀ бл҃гочести́вый ца́рь собра́тисѧ є҆пс̃кпѡмъ ѿ всѣ́хъ стра́нъ во і҆ерс̃ли́мъ на ѡ҆сщ҃е́ніе хра́ма, и҆ бѣ̀ мно́гое мно́жество сше́дшихсѧ а҆рхіере́ѡвъ, ѿ віѳѷні́и, и҆ ѳракі́и, кіликі́и же, и҆ каппадокі́и, сѷрі́и, и҆ месопота́міи, фінікі́и, и҆ а҆ра́віи, и҆ палесті́ны, ѿ є҆гѵ́пта же, и҆ а҆́фріки, и҆ ѳіва́ніи, и҆ ѿ персі́ды є҆ди́нъ є҆пс̃кпъ.
Но и҆ наро́да безчи́сленное мно́жество ѿ всеѧ̀ вселе́нныѧ собра́шасѧ, ꙗ҆́кѡ и҆ предѣ́лѡмъ і҆ерс̃ли́мскимъ люде́й не вмѣща́ти.
И҆ ѡ҆сщ҃е́нъ бы́сть хра́мъ воскрс̃ніѧ хрс̃то́ва мцс̃а сегѡ̀ въ г҃і де́нь, и҆ ве́сь і҆ерс̃ли́мъ ѡ҆бновле́нъ въ тридесѧ́тое лѣ́то ца́рства кѡнстанті́на.
И҆ ѹ҆ста́виша ст҃і́и ѻ҆ц҃ы̀ та́мѡ собра́вшіисѧ пра́здновати де́нь ѡ҆бновле́ніѧ, по подо́бію соломѡ́новꙋ.
Ꙗ҆́коже бо соломѡ́нъ въ ве́тхомъ завѣ́тѣ созда́въ пресла́внꙋю цр҃ковь ст҃а̑ѧ ст҃ы́хъ, ѹ҆зако́ни по всѧ̀ лѣ́та въ се́й мѣ́сѧцъ септе́мврій, во́ньже ѡ҆сщ҃ена̀ бы́сть, пра́здновати ѡ҆бновлє́ніѧ є҆ѧ̀, ѡ҆ чесо́мъ въ є҆ѵг̃ліи воспомина́етсѧ:
Бы́ша же тогда̀ ѡ҆бновлє́ніѧ во і҆ерс̃ли́мѣхъ:
Та́кѡ и҆ ст҃ы́й равноапс̃лный цр҃ь кѡнстанті́нъ, въ но́вой бл҃года́ти созда́въ а҆́ки вторꙋ́ю ст҃а̑ѧ ст҃ы́хъ, ѹ҆ста́ви со ст҃ы́ми ѻ҆ц҃ы̀, да пра́зднꙋемо бꙋ́детъ по всѣ́мъ ꙗ҆̀же во вселе́ннѣй цр҃квамъ, ѡ҆бновле́ніе і҆ерс̃ли́мскіѧ вели́кіѧ цр҃кве, ꙗ҆́же є҆́сть всѣ́мъ цр҃квамъ мт҃и.
Пра́зднꙋимъ ѹ҆̀бо благодарѧ́ще хрс̃та̀ бг҃а, стрс̃тію свое́ю и҆ воскрс̃ніемъ всю̀ тва́рь ѡ҆бнови́вшаго, и҆ ѿ скве́рнъ і҆́дѡлскихъ ѡ҆чи́стившаго ст҃ꙋ́ю свою̀ цр҃ковь.
Да ѡ҆бновлѧ́емсѧ же и҆ мы̀, сꙋ́ще цр҃кви бг҃а жива́гѡ, ве́тхаго ѿлага́юще человѣ́ка, въ но́ваго же ѡ҆блека́ющесѧ.
ѹ҆клони́мсѧ ѿ ѡ҆бветша́вшихъ въ на́съ ѕѡ́лъ на́шихъ, и҆ сотвори́мъ бл҃га́ѧ дѣла̀, въ но́вости жи́зни ходи́ти наче́нше, да ꙗ҆́коже человѣ́цы рꙋкотворе́ннагѡ, си́це а҆́гг҃ли нерꙋкотворе́ннагѡ дꙋше́внагѡ на́шегѡ хра́ма пра́зднꙋютъ ѡ҆бновле́ніе, ра́дость бо быва́етъ на нб҃сѝ а҆́гг҃лѡмъ ѡ҆ грѣ́шницѣ покаѧ́ніемъ ѡ҆бновлѧ́ющемсѧ, съ ни́миже ѡ҆ не́мъ и҆ са́мъ не хотѧ́й сме́рти грѣ́шныхъ ра́дꙋетсѧ а҆́гг҃лѡвъ творе́цъ хрс̃то́съ гдс̃ь на́шъ, є҆мꙋ́же сла́ва во вѣ́ки, а҆ми́нь.
По страда́ніи во́лномъ гдс̃а на́шегѡ і҆и҃са хрс̃та̀, и҆ по воскрс̃ніи є҆гѡ̀ и҆ на нб҃са̀ вознесе́ніи, бѣ̀ въ кесарі́и палесті́нской со́тникъ, и҆́менемъ корни́лій, ро́домъ ѿ і҆та́ліи ѳра́ческіѧ:
то́й во тмѣ̀ невѣ́ріѧ сꙋ́щи, дѣла̀ свѣ́та и҆мѣ̀, и҆ є҆́ллинъ сы́й житіе́мъ, хрс̃тіа́нинꙋ бы́сть подо́бенъ: и҆ є҆гѡ́же не зна́ѧше хрс̃та̀, сего̀ млс̃тынѧми не вѣ́дый почита́ше: посредѣ̀ ѕла́гѡ мі́ра живꙋ́щи, бы́сть добродѣ́теленъ, ꙗ҆́коже свидѣ́телствꙋетъ ѡ҆ не́мъ ст҃ы́й лꙋка̀ въ дѣѧ́ніихъ глаго́лѧ:
мꙋ́жъ нѣ́кій бѣ̀ въ кесарі́и, и҆́менемъ корни́лій, со́тникъ ѿ спі́ры нарица́ющіѧсѧ і҆талі́йскіѧ, бл҃гоговѣ́инъ и҆ боѧ́йсѧ бг҃а со всѣ́мъ до́момъ свои́мъ, творѧ́й ми̑лостыни мнѡ́ги лю́демъ, и҆ молѧ́йсѧ бг҃ꙋ всегда̀: не презрѣ́ же бг҃ъ таковы́хъ є҆гѡ̀ добродѣ́телей, бл҃говолѝ просвѣти́ти є҆го̀ свѣ́томъ вѣ́ры, и҆ въ позна́ніе и҆́стины привестѝ, да дѡ́браѧ є҆гѡ̀ дѣла̀ не покрыва́ютсѧ невѣ́ріѧ тмо́ю.
Се́й ѹ҆́бѡ бг҃обоѧ́знивый мꙋ́жъ во є҆ди́нъ ѿ дне́й молѧ́сѧ бг҃ꙋ въ домꙋ̀ свое́мъ, ви́дѣ ꙗ҆́влшагосѧ є҆мꙋ̀ а҆́гг҃ла бж҃іѧ, возвѣща́юща, ꙗ҆́кѡ мл҃твы є҆гѡ̀ и҆ млс̃тыни взыдо́ша предъ̃ бг҃а: и҆ повелѣва́юща, да по́слетъ во і҆ѡппі́ю по сі́мѡна нарица́емаго петра̀, и҆ ѿ негѡ̀ є҆́же ѹ҆слы́шитъ, то̀ да сотвори́тъ.
ѻ҆́нъ же а҆́біе посла̀ съ моле́ніемъ призва́ти петра̀.
Грѧдꙋ́щымъ же посла́нникѡмъ ко і҆ѡппі́и, взы́де пе́тръ на го́рницꙋ помоли́тисѧ въ шесты́й ча́съ днѐ, бы́сть же приа́лченъ.
и҆ ви́дѣ видѣ́ніе ѹ҆вѣщава́ющее є҆го̀, да не возгнꙋша́етсѧ и҆тѝ ко и҆ноплеме́нномꙋ ѿ неѡбрѣ́занныхъ сꙋ́щемꙋ мꙋ́жꙋ: не ѡ҆бща́хꙋсѧ бо і҆ꙋде́и съ ꙗ҆зы́ки, и҆ гнꙋша́хꙋсѧ и҆́хъ.
Видѣ́ніе же петрꙋ̀ бы́сть сицево́е: сосꙋ́дъ нѣ́кій ꙗ҆́кѡ плащани́ца, по четы́ремъ кра́емъ привѧ́занъ, съ нб҃сѐ схожда́ше трикра́ты, и҆ гла́съ повелѣва́ющъ петрꙋ̀: ѡ҆брѣта̑ющаѧсѧ въ сосꙋ́дѣ четверонѡ́гаѧ земна̑ѧ, и҆ ѕвѣ́ри, и҆ га́ды, и҆ пти̑цы, закла́ти и҆ ꙗ҆́сти.
ѿрица́ющꙋсѧ же петрꙋ̀ и҆ глаго́лющꙋ: ꙗ҆́кѡ николи́же ꙗ҆дѐ всѧ́ко нечи́сто: па́ки гла́съ съ нб҃сѐ глаго́лѧ: ꙗ҆́же бг҃ъ ѡ҆чи́стилъ є҆́сть, ты̀ не сквернѝ.
то̀ видѣ́ніе зна́меніемъ бѣ̀ ѻ҆браще́ніѧ корни́ліева и҆ про́чихъ ꙗ҆зы́кѡвъ.
А҆́лчба петро́ва зна́менова гла́дъ ѡ҆пи́санный а҆мѡ́сомъ про̃ро́комъ: не гла́дъ хлѣ́ба, ни жа́жда воды̀, но гла́дъ слы́шаніѧ сло́ва гдс̃нѧ.
гла́дъ же таковы́й бѣ̀ въ домꙋ̀ корни́ліевомъ, и҆ во всѣ́хъ ꙗ҆зы́цѣхъ: ꙗ҆́коже бо пе́тръ тѣле́снагѡ хлѣ́ба жела́ше, си́це ті́и дꙋше́внагѡ.
Сосꙋ́дъ по четы́ремъ кра́емъ привѧ́заный ѡ҆бразова̀ цр҃ковь хрс̃то́вꙋ, четы́рми є҆ѵг̃лі́сты ѹ҆твержда́ющꙋюсѧ въ вѣ́рѣ.
въ сосꙋ́дѣ разли̑чнаѧ нечи́стаѧ <#147> живѡ́тнаѧ, ѕвѣ́ри, га́ды, пти̑цы, ꙗ҆зы́кѡвъ зна́меновахꙋ, и҆̀же земны́мъ свои́мъ мꙋдрова́ніемъ бѧ́хꙋ четверонѡ́жнаѧ живѡ́тнаѧ, въ зе́млю ѹ҆мо́мъ смотрѧ̑щаѧ, мꙋ́дрствовати же гѡ́рнѧѧ и҆ вы́шнихъ и҆ска́ти, не ѹ҆мѣ̑ющаѧ: ѕвѣ́ри же бѧ́хꙋ лю́тостію, и҆ га́ды ꙗ҆дови́тіи нече́стіемъ дꙋшевре́днымъ: пти̑цы же высокопарѧ́щіи бѧ́хꙋ высокоꙋ́мною горды́нею.
закла́ти же та̑ повелѣ́но и҆ ꙗ҆́сти, сі́есть, ѻ҆́стрымъ сло́ва бж҃іѧ мече́мъ ѹ҆би́ти дрє́вніѧ ꙗ҆зы́ческіѧ безслове́сныѧ стра̑сти и҆ ѕвѣри́ныѧ нра́вы: сотвори́ти же ѡ҆чищє́нныѧ кр҃ще́ніемъ дꙋ́ши и҆́хъ и҆ тѣлеса̀ же́ртвꙋ жи́вꙋ бл҃гопріѧ́тнꙋ бг҃ꙋ.
трикра́тное сосꙋ́да съ нб҃сѐ схожде́ніе, зна́менова трикра́тное въ кр҃ще́ніи погрꙋже́ніе.
ѡ҆чище́на же та̑ бг҃омъ бы́ти гла́съ нбс̃ный сказа̀, и҆звѣща́ѧ, ꙗ҆́кѡ не то́чію за і҆и҃лтѧны, но и҆ за ꙗ҆зы́ки хрс̃то́съ и҆зліѧ̀ кро́вь свою̀ ѡ҆мыва́ющꙋю грѣхо́вныѧ сквє́рны.
Размышлѧ́ющꙋ ѹ҆́бѡ петрꙋ̀ то̀ видѣ́ніе и҆ недоꙋмѣва́ющꙋсѧ, сѐ по́сланніи ѿ корни́ліа доше́дше, ѡ҆ не́мъ вопроша́хꙋ.
дх҃ъ же повелѣ̀ є҆мꙋ̀ и҆тѝ съ ни́ми ничто́же разсꙋжда́ющи, да пе́рваго ѿ ꙗ҆зы́къ человѣ́ка ко хрс̃тꙋ̀ да пріи́дꙋтъ.
Вше́дшꙋ же петрꙋ̀ въ корни́ліевъ до́мъ, срѣ́те є҆го̀ корни́лій че́стнѡ со всѣ́ми сро́дники свои́ми и҆ любо́вными дрꙋ́ги, и҆ па́дъ на но́зѣ є҆го̀ поклони́сѧ.
Пе́тръ же воздви́гъ є҆го̀, гл҃ѧ: вы̀ вѣ́сте, ꙗ҆́кѡ не лѣ́по є҆́сть мꙋ́жꙋ і҆ꙋде́анинꙋ входи́ти ко и҆ноплеме́нникѡмъ, и҆ ѡ҆бще́ніе съ ни́ми и҆мѣ́ти: ѻ҆ба́че ѿкры̀ мнѣ̀ бг҃ъ, ꙗ҆́кѡ не подоба́етъ нарица́ти скве́рна и҆лѝ нечи́ста ни є҆ди́наго человѣ́ка.
Пріидо́хъ ѹ҆̀бо къ ва́мъ безъ̃ сомнѣ́ніѧ, и҆ вопроша́ю, ко́имъ ѹ҆мышле́ніемъ призва́сте мѧ̀ къ себѣ̀; Корни́лій же сказа̀ є҆мꙋ̀ подро́бнꙋ, ка́кѡ ви́дѣ а҆́гг҃ла, и҆ что̀ слы́ша ѿ негѡ̀, и҆ молѝ петра̀, да рече́тъ є҆мꙋ̀ спасе́ніѧ сло́во.
Пе́тръ же ѿве́рзъ ѹ҆ста̀ своѧ̀, нача̀ проповѣ́дати є҆мꙋ̀ і҆и҃са, ꙗ҆́кѡ бг҃ъ бѣ̀ во пло́ти, съ человѣ́ки на землѝ живы́й, ѹ҆ча̀ и҆ наставлѧ́ѧ лю́ди на пꙋ́ть въ нбс̃ное ведꙋ́щій црс̃тво, и҆ сотворѝ зна̑меніѧ мнѡ́га и҆ чꙋдеса̀, врачꙋ́ѧ всѧ́кꙋю болѣ́знь, и҆ воскреша́ѧ сло́вомъ, и҆ то́й во́лею пострада̀, ѹ҆́мре, и҆ воскре́се, да человѣ́ка свободи́тъ ѿ страсте́й, и҆ воскреси́тъ ѿ сме́рти, и҆ да́рꙋетъ є҆мꙋ̀ живо́тъ вѣ́чный: и҆ то́й и҆́мать сꙋди́ти живы̑мъ и҆ мє́ртвымъ, ѡ҆ не́мже всѝ про̃ро́цы свидѣ́телствꙋютъ, и҆ всѧ́къ вѣ́рꙋѧй во и҆́мѧ є҆гѡ̀ грѣхѡ́въ ѡ҆ставле́ніе пріи́метъ.
Сіѧ̑ гл҃ющꙋ петрꙋ̀, Дх҃ъ ст҃ы́й гл҃ы є҆гѡ̀ въ срд̃ца̀ слы́шащихъ вселѧ́ющи, ко ѹ҆вѣре́нію и҆̀хъ приведѐ, и҆ крс̃ти́сѧ корни́лій со всѣ́мъ до́момъ свои́мъ.
ѻ҆́нъ пе́рвый ѿ ꙗ҆зы́къ вѣ́рꙋѧй въ гдс̃а на́шего і҆и҃са хрс̃та̀, по кр҃ще́ніи же свое́мъ всѧ̑ ѡ҆ста́ви, и҆ въ слѣ́дъ петра̀ и҆́де, и҆ ѿ негѡ̀ є҆пс̃кпомъ поста́вленъ бы́сть: ѡ҆бходѧ́ же съ ни́мъ и҆ съ и҆ны́ми мно́гими разли́чныѧ страны̑, трꙋжда́шесѧ въ проповѣ́даніи хрс̃та̀.
<#148>
Бы́вшꙋ же петрꙋ̀ съ тімоѳе́емъ и҆ съ корни́ліемъ си́мъ во є҆фе́сѣ, и҆звѣ́стно и҆̀мъ сотвори́сѧ ѡ҆ скиѱеѡсе́йстѣмъ гра́дѣ, ꙗ҆́кѡ прилѣжи́тъ ѕѣлѡ̀ і҆дѡлопоклоне́нію, и҆ совѣ́товахꙋ комꙋ́ бы ѿ ни́хъ та́мѡ и҆тѝ на про́повѣдь.
метнꙋ́ша же жрє́біѧ, и҆ падѐ жре́бій на корни́ліа: ѻ҆́нъ же призыва́ѧ бг҃а въ по́мощь, и҆́де во гра́дъ то́й спѣ́шнѡ.
Бѣ́ же та́мѡ нѣ́кій кнѧ́зь и҆́менемъ дими́трій, въ є҆́ллинской премꙋ́дрости и҆скꙋ́сный філосо́фъ, и҆́же ненави́дѧше ѕѣлѡ̀ хрс̃тіа́нскагѡ бл҃гоче́стіѧ, почита́ше же ꙗ҆зы́ческіѧ бо́ги, а҆ наипа́че а҆поллі́на и҆ ді́а.
То́й ѹ҆вѣ́давъ ѡ҆ корни́ліи вше́дшемъ во гра́дъ, а҆́біе призва̀ є҆го̀ предъ̃ себѐ, и҆ вопросѝ: ѿкꙋ́дꙋ, и҆ чесѡ̀ ра́ди пріи́де.
Корни́лій же ѿвѣща̀: ра́бъ є҆́смь бг҃а жива́гѡ, пріидо́хъ же здѣ̀ по́сланъ, да тебѐ воззовꙋ̀ ѿ глꙋбоча́йшіѧ тмы̀ невѣ́дѣніѧ, и҆ и҆зведꙋ̀ къ свѣ́тꙋ и҆́стины, и҆ чи́стꙋю лꙋчꙋ̀ позна́ніѧ вложꙋ̀ въ твою̀ дꙋ́шꙋ.
Ѻ҆́нъ же ничесо́же ѿ глаго́лемыхъ разꙋмѣ́въ, разгнѣ́васѧ, и҆ съ ꙗ҆́ростію речѐ: а҆́зъ и҆́наѧ вопроси́хъ, ты́ же мѝ и҆́наѧ ѿвѣщава́еши: та́кѡ мѝ бо́зи, ꙗ҆́кѡ а҆́ще на ко́еждо вопроше́ніе не ѿвѣщава́еши мѝ, то̀ не пощажꙋ̀ ста́рости твоеѧ̀, ни ѹ҆стыждꙋ́сѧ сѣди́нъ твои́хъ.
Рцы̀ ѹ҆̀бо мѝ: комꙋ̀ во́инствꙋеши, и҆ ко́еѧ ра́ди вины̀ сѣ́мѡ прише́лъ є҆сѝ; корни́лій же речѐ: а҆́ще хо́щеши ѹ҆вѣ́дати во́инствованіе моѐ, то̀ вѣ́ждь, ꙗ҆́кѡ со́тникъ є҆́смь са́номъ.
и҆ є҆гда̀ ѹ҆слы́шахъ ѡ҆ тебѣ̀, ꙗ҆́кѡ ты̀, и҆ жена̀ твоѧ̀, и҆ всѝ и҆̀же во ѻ҆́бласти твое́й въ вели́кое заблꙋжде́ніе впадо́сте: пріидо́хъ и҆зба́вити ва́съ ѿ бѣсо́вскіѧ пре́лести, и҆ наста́вити на пꙋ́ть и҆́стинный, и҆ є҆ди́номꙋ живо́мꙋ бг҃ꙋ примири́ти, и҆́же сотворѝ нб҃о и҆ зе́млю, и҆ всѧ̀ ꙗ҆̀же въ ни́хъ сꙋ́ть.
На сіѧ̀ дими́трій речѐ: ви́ждꙋ тѧ̀ ста́ростію преклоне́нна, и҆ ми́лꙋю тѧ̀ мно́гихъ ра́ди лѣ́тъ твои́хъ.
преста́ни ѹ҆̀бо продолжа́ти словесы̀ лжꙋ̀ твою̀, и҆ пристꙋпѝ къ богѡ́мъ на́шымъ, и҆ поклони́сѧ и҆̀мъ: а҆́ще же не восхо́щеши сегѡ̀ сотвори́ти, то вѣ́ждь, ꙗ҆́кѡ тѧ́жкимъ тѧ преда́мъ мꙋ́камъ, и҆ ни є҆ди́нъ бг҃ъ кромѣ̀ мои́хъ богѡ́въ и҆́зметъ тѧ̀ ѿ рꙋ́къ мои́хъ.
Корни́лій же речѐ: си́ленъ є҆́сть бг҃ъ мо́й, не то́чію сохрани́ти мѧ̀ ѿ всѣ́хъ ѕѡ́лъ цѣ́ла и҆ неврежде́нна, и҆ и҆зба́вити ѿ рꙋ́къ человѣ́ческихъ, но и҆ бо́ги твоѧ̀ сте́рти, и҆ сокрꙋши́ти въ пра́хъ і҆́дѡлы и҆́хъ, и҆ тебѐ всꙋ́е на нѧ̀ ѹ҆пова́ющаго къ своемꙋ̀ привестѝ позна́нію: а҆́зъ же бѣсѡ́мъ и҆ бездꙋ́шнымъ и҆́хъ і҆́дѡлѡмъ никогда̀ не поклоню́сѧ.
Пи́сано бо є҆́сть: бо́зи, и҆̀же нб҃сѝ и҆ землѝ не сотвори́ша, да поги́бнꙋтъ.
и҆ па́ки: гдс̃ꙋ бг҃ꙋ твоемꙋ̀ поклони́шисѧ, и҆ томꙋ̀ є҆ди́номꙋ послꙋ́жиши.
Пріидо́хъ же сѣ́мѡ тогѡ̀ ра́ди, да наста́влю вы̀ къ покаѧ́нію, и҆ возни́кнете ѿ діа́волскіѧ сѣ́ти, жи́ви сꙋ́ще ѹ҆ловле́ни ѿ негѡ̀ въ свою̀ є҆гѡ̀ во́лю.
Кнѧ́зь же речѐ: клѧ́хсѧ бога́ми мои́ми, ꙗ҆́кѡ не пощажꙋ́ тѧ, но тѧ́жкимъ преда́мъ мꙋ́камъ, а҆́ще богѡ́мъ не пожре́ши.
Корни́лій же вопросѝ, котѡ́рымъ вели́ши богѡ́мъ пожре́ти; <#149> и҆ глаго́ла кнѧ́зь: пожрѝ а҆поллі́нꙋ и҆ ді́ю.
рече́ же корни́лій: покажѝ ѹ҆̀бо мѝ ты́ѧ бо́ги твоѧ̀.
и҆ ра́дъ бы́сть кнѧ́зь, мнѧ̀ ꙗ҆́кѡ хо́щетъ поклони́тисѧ и҆̀мъ, и҆ ведѐ є҆го̀ къ хра́мꙋ ді́евꙋ.
Послѣ́дствоваше же и҆̀мъ наро́дъ, хотѧ̀ ви́дѣти кла́нѧющасѧ і҆́дѡлѡмъ корни́ліа, и҆ доше́дше хра́ма, вни́де въ него̀ кнѧ́зь съ корни́ліемъ, и҆ со всѣ́ми съ ни́мъ прише́дшими, въ ни́хже бѣ̀ и҆ жена̀ кнѧ́жаѧ и҆́менемъ є҆ѵа́нѳіа, и҆ сы́нъ дими́трій, та́кѡ бо нарица́шесѧ, и҆́менемъ ѻ҆тца̀ своегѡ̀.
Корни́лій же ст҃ы́й въ хра́мѣ і҆́дѡлстѣмъ сꙋ́щи, ѡ҆брати́сѧ къ восто́кꙋ, и҆ преклони́въ колѣ́на своѧ̀ на зе́млю, молѧ́шесѧ глаго́лѧ:
бж҃е смꙋща́ѧй зе́млю, и҆ прелага́ѧй го́ры въ срд̃ца̀ морска́ѧ, и҆́же даніи́ловою рꙋко́ю сокрꙋши́лъ є҆сѝ ві́ла, и҆ ѹ҆мертви́лъ є҆сѝ ѕмі́ѧ, и҆ ѹ҆ста̀ львѡ́въ загради́въ, сохрани́лъ є҆сѝ цѣ́ла раба̀ твоего̀: ты̀ и҆ ны́нѣ и҆спрове́ржи і҆́дѡлы сіѧ̀, и҆ да́ждь позна́ніе лю́демъ твои́мъ, да ѹ҆вѣ́дѧтъ, ꙗ҆́кѡ твоѧ̀ мы́шца съ си́лою.
Та́кѡ ст҃ы́й помоли́всѧ, и҆зы́де и҆зъ̃ хра́ма, вкꙋ́пѣ съ ни́мъ и҆зы́де и҆ дими́трій кнѧ́зь, и҆ всѐ мно́жество прише́дшагѡ наро́да: є҆ѵа́нѳіа же съ сы́номъ дими́тріемъ є҆щѐ ѡ҆ста́сѧ внꙋ́трь хра́ма, и҆ внеза́пꙋ бы́сть трꙋ́съ, и҆ паде́сѧ хра́мъ со і҆́дѡлы, и҆ сокрꙋши́шасѧ въ пра́хъ бо́ги и҆́хъ, на ни́хже ѹ҆пова́хꙋ: ѹ҆де́ржана же бы́сть та́можде и҆ жена̀ кнѧ́жаѧ съ сы́номъ междꙋ̀ па́дшими стѣна́ми жива̀: и҆ всѝ лю́діе ви́дѣвше паде́ніе хра́ма, ѹ҆боѧ́шасѧ.
невѣ́дѧше же кнѧ́зь, ꙗ҆́кѡ жена̀ и҆ сы́нъ є҆гѡ̀ стѣна́ми привалє́ны, а҆ корни́лій веселѧ́сѧ ѡ҆ си́лѣ бг҃а жива́гѡ, речѐ ко кнѧ́зю: гдѣ̀ ны́нѣ сꙋ́ть ѽ кнѧ́же, вели́кіи бо́ги твоѝ;
ѻ҆́нъ же и҆спо́лнивсѧ ꙗ҆́рости речѐ: рцы̀ на́мъ волше́бниче, ко́ими волхвова́ніи сотвори́лъ є҆сѝ па́стисѧ хра́мꙋ съ бога́ми на́шими; и҆ совѣ́товаше кнѧ́зь съ свои́ми, ко́ими мꙋ́ками корни́ліа погꙋби́ти.
Преклони́сѧ же ѹ҆жѐ де́нь, и҆ захожда́ше со́лнце, того̀ ра́ди не бѣ̀ вре́мене мꙋ́чити корни́ліа.
повелѣ̀ ѹ҆̀бо кнѧ́зь свѧза́ти є҆мꙋ̀ рꙋ́цѣ и҆ но́зѣ, и҆ та́кѡ повѣ́сити є҆го̀ въ темни́цѣ, да чрезъ̃ всю̀ но́щь висѧ̀ стра́ждетъ до ѹ҆́тра, а҆ ѹ҆́трѡ хотѧ́ше є҆го̀ лю́тѣ мꙋ́чити и҆ ѹ҆би́ти.
Ѿведе́нꙋ же бы́вшꙋ ст҃о́мꙋ въ темни́цꙋ, рꙋ́цѣ же и҆ но́зѣ свѧ́заны и҆мꙋ́щꙋ и҆ повѣ́шенꙋ, ꙗ҆́кѡ повелѣ̀ мꙋчи́тель, а҆́біе притечѐ ко кнѧ́зю є҆ди́нъ ѿ рабѡ́въ є҆гѡ̀ и҆́менемъ телеѳѡ́нъ глаго́лѧ: господи́не, госпожа̀ моѧ̀ и҆ є҆диноро́дный сы́нъ тво́й погибо́ша въ хра́мѣ па́дшемъ ѿ трꙋ́са.
Кнѧ́зь же дими́трій сіѧ̑ слы́шавъ, растерза̀ ри̑зы своѧ̀, и҆ рыда́ше го́рцѣ, рыда́хꙋ же съ ни́мъ и҆ нача́лницы гра́дстіи, и҆ні́и же є҆го̀ ѹ҆тѣша́хꙋ: но кто̀ можа́ше ѹ҆тѣ́шити таковꙋ̀ се́рдца жа́лость, ꙗ҆́же внеза́пꙋ на́йде, ѡ҆ неча́ѧнной сме́рти жены̀ вкꙋ́пѣ и҆ сы́на.
Та́же къ предстоѧ́щымъ речѐ: и҆ди́те, размещи́те ка́меніе па́дшагѡ хра́ма, до́ндеже ѡ҆брѧ́щете кѡ́сти возлю́бленныѧ сꙋпрꙋ́ги моеѧ̀ и҆ сла́дкагѡ моего̀ сы́на, и҆ ѡ҆брѣ́тше принеси́те мѝ на рꙋ́цѣ моѝ.
Сіѧ̑ глаго́лѧ, воздви́же гла́съ и҆ пла́касѧ пла́чемъ вели́кимъ.
рыда́ющꙋ же є҆мꙋ̀, пріи́де спѣ́шнѡ и҆́же надъ̃ <#150> жерца́ми нача́лникъ, и҆́менемъ варва́тъ, глаго́лѧ: слы́шахъ гла́съ жены̀ твоеѧ̀ и҆ сы́на, ѿ среды̀ па́дшихъ стѣ́нъ вопію́щихъ и҆ глаго́лющихъ си́це: вели́къ бг҃ъ хрс̃тіа́нскій, и҆́же сохранѝ на́съ жи́вы ѿ го́ркіѧ сеѧ̀ сме́рти чрезъ̃ раба̀ своего̀ корни́ліа: моли́те ѹ҆̀бо ст҃а́го того̀ мꙋ́жа, да и҆зведе́тъ ны̀ ѿсю́дꙋ, да не доконца̀ поги́бнемъ.
ви́димъ бо ди́внаѧ чꙋдеса̀ бг҃а є҆гѡ̀, и҆ слы́шимъ гла́съ пою́щихъ а҆́гг҃лѡвъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́ніе.
Сіѧ̑ слы́шавъ кнѧ́зь ѿ варва́та, а҆́біе течѐ ско́рѡ съ свои́ми всѣ́ми къ рабꙋ̀ бж҃ію въ темни́цꙋ, и҆ ѡ҆брѣ́те є҆го̀ ходѧ́ща, а҆́гг҃лъ бо гдс̃нь ѿ ѹ҆́зъ разрѣшѝ є҆го̀.
и҆ припадѐ кнѧ́зь къ нога́мъ корни́ліевымъ глаго́лѧ: вели́къ бг҃ъ тво́й корни́ліе, и҆́же храни́тъ сꙋпрꙋ́гꙋ мою̀, и҆ сы́на моего̀ въ па́дшемъ хра́мѣ.
молю̀ ѹ҆̀бо тѧ̀ ра́бе бг҃а вы́шнѧгѡ, пріидѝ и҆ и҆зведѝ и҆̀хъ ѿтꙋ́дꙋ, и҆ сѐ а҆́зъ и҆ всѝ и҆̀же со мно́ю, вѣ́рꙋемъ въ проповѣ́дꙋемаго тобо́ю хрс̃та̀ распѧ́таго.
Ше́дъ же ст҃ы́й корни́лій съ ни́ми къ па́дшемꙋсѧ і҆́дѡлскомꙋ хра́мꙋ, и҆ возве́дъ на нб҃о ѻ҆чеса̀ своѧ̀, речѐ: гдс̃и бж҃е си́лъ, призира́ѧй на зе́млю и҆ творѧ́й ю̀ трѧсти́сѧ, ѿ є҆гѡ́же лица̀ растаѧва́ютсѧ го́ры, и҆ и҆зсꙋша́ютсѧ бє́здны, са́мъ сы́й гдс̃ь, са́мъ ѹ҆слы́ши воздыха̑ніѧ свѧ́занныхъ, и҆ и҆зведѝ ѿ землѝ є҆ѵа́нѳію, и҆ не ѿвратѝ лица̀ твоегѡ̀ ѿ сы́на є҆ѧ̀, но вонмѝ дꙋшѝ и҆́хъ и҆́мене твоегѡ̀ ра́ди.
Та́кѡ є҆мꙋ̀ молѧ́щꙋсѧ, внеза́пꙋ разве́рзесѧ мѣ́сто, и҆дѣ́же междꙋ̀ па́дшимисѧ стѣна́ми ѹ҆де́ржана бѣ̀ є҆ѵа́нѳіа съ сы́номъ, и҆зыдо́ша ѿтꙋ́дꙋ ѻ҆́ба здра́вы хва́лѧще бг҃а.
Вси́ же та́мѡ бы́вшіи, и҆ пресла́вное то̀ чꙋ́до ви́дѣвшіи вопіѧ́хꙋ: вели́къ бг҃ъ хрс̃тіа́нскій.
и҆ крс̃ти́сѧ дими́трій съ жено́ю, и҆ сы́номъ, и҆ со всѣ́мъ до́момъ свои́мъ, крс̃ти́шасѧ же съ ни́мъ и҆ про́чіи лю́діе число́мъ двѣ́сти се́дмьдесѧтъ и҆ се́дмь.
Поживе́ же ст҃ы́й корни́лій въ то́мъ гра́дѣ вре́мѧ дово́лно, те́рніе невѣ́ріѧ ѿ срд̃цъ человѣ́ческихъ и҆скоренѧ́ѧ, и҆ сѣ́ѧ бл҃гоче́стіѧ сѣ́мѧ, и҆ въ ско́ромъ вре́мени ве́сь гра́дъ приведѐ хрс̃тꙋ̀, и҆ нѣ́коего мꙋ́жа че́стна и҆́менемъ є҆ѵно́міа пресвѵ́теромъ поста́ви.
И҆спо́лненъ же бы́въ дне́й, приспѣ̀ къ бл҃же́ннѣй кончи́нѣ свое́й, ѡ҆ не́йже пре́жде вре́мене ѹ҆вѣ́давъ, ѹ҆се́рдной прилѣжа́ше моли́твѣ, приꙋготовлѧ́ѧсѧ на пꙋ́ть, и҆́мже и҆мѣ̀ ѿитѝ ко гдс̃ꙋ своемꙋ̀.
Собра́въ же всѧ̑, и҆̀же ѿ безбо́жіѧ ѡ҆братѝ, хрс̃тіа́ны, наказа̀ и҆̀хъ пребыва́ти въ вѣ́рѣ и҆ любвѝ, и҆ во всѧ́кіѧ ѹ҆правлѧ́ти себѐ добродѣ́тели, преспѣва́юще въ за́повѣдехъ гдс̃нихъ.
Поꙋчи́въ же и҆̀хъ дово́лнѣ, ѹ҆слы́ша гла́съ съ нб҃сѐ гл҃юще къ немꙋ̀: корни́ліе, грѧдѝ ко мнѣ̀, се́ бо ѹ҆гото́васѧ тебѣ̀ вѣне́цъ пра́вды.
То̀ слы́шавъ корни́лій, а҆́біе ѡ҆брати́сѧ къ мл҃твѣ, и҆ прекло́нь колѣ̑на, речѐ: Гдс̃и бж҃е на́шъ сподо́бивый мѧ̀ вѣ́рꙋ соблюстѝ, по́двигъ соверши́ти, и҆ побѣди́ти сопроти́внаго, бл҃годарю́ тѧ ѡ҆ все́мъ: молю́ же тѧ̀ гдс̃и, при́зри на рабы̀ твоѧ̀ съ высоты̀ <#151> ст҃ы́ѧ твоеѧ̀, и҆ млс̃тивъ бꙋ́ди и҆̀мъ, ѹ҆твердѝ и҆̀хъ въ вѣ́рѣ, ѹ҆крѣпѝ въ по́двизѣхъ, поспѣшѝ и҆̀мъ въ соблюде́ніи ст҃ы́хъ твои́хъ за́повѣдей, да непреста́ннѡ сла́вѧтъ прест҃о́е и҆́мѧ твоѐ ны́нѣ и҆ во вѣ́ки вѣкѡ́въ.
и҆ всѣ́мъ ре́кшымъ, а҆ми́нь, предадѐ съ ра́достію дх҃ъ сво́й въ рꙋ́цѣ къ нб҃сѝ зовꙋ́щагѡ є҆го̀ гдс̃а.
Кнѧ́зь же дими́трій со є҆ѵа́нѳіею сꙋпрꙋ́гою свое́ю, и҆ съ сы́номъ дими́тріемъ, и҆ со є҆ѵно́міемъ пресвѵ́теромъ и҆ всѣ́ми вѣ́рными, пла́кавше мно́гѡ надъ̃ ѻ҆ц҃е́мъ и҆ ѹ҆чи́телемъ свои́мъ, и҆ свѣщы̑ вже́гше, и҆ пѣ́вше надгро́бныѧ пѣ̑сни, погребо́ша є҆го̀ че́стнѡ близъ̃ па́дшагѡсѧ хра́ма ді́ева.
и҆ по всѧ̀ днѝ вѣ́рніи на гро́бъ є҆гѡ̀ приходѧ́ще, кадѧ́хꙋ лѷва́номъ и҆ молѧ́хꙋсѧ, и҆ мнѡ́гаѧ ѿ гро́ба є҆гѡ̀ подава́хꙋсѧ и҆сцѣлє́ніѧ болѧ́щымъ.
Мнѡ́гимъ же лѣ́тѡмъ минꙋ́вшимъ, и҆ всѣ́мъ преше́дшымъ ко гдс̃ꙋ, не свѣ́домо ѡ҆ста́сѧ послѣ́днемꙋ ро́дꙋ то̀ мѣ́сто, и҆дѣ́же погребены̀ бы́ша ст҃а́гѡ корни́ліа мо́щы: возрасте́ бо ѻ҆́крестъ є҆гѡ̀ кꙋпина̀ и҆ хвра́стіе мно́гое, и҆ никто́же ѡ҆ многоцѣ́нномъ то́мъ сокро́вищи вѣ́дѧше.
Слꙋчи́сѧ же нѣ́когда пріитѝ та́мѡ є҆пс̃кпꙋ сілꙋа́нꙋ ѿ гра́да, и҆́же нарица́шесѧ трѡа́да, и҆ ꙗ҆ви́сѧ є҆мꙋ̀ въ видѣ́ніи нощно́мъ ст҃ы́й корни́лій гл҃го́лѧ: мно́гѡ вре́мѧ здѣ̀ живꙋ̀, и҆ никто́же посѣти́ мѧ.
Є҆пс̃кпъ же воста́въ ѿ сна̀ дивѧ́шесѧ ви́дѣнномꙋ, и҆ недоꙋмѣва́шесѧ, кто̀ ꙗ҆ви́сѧ є҆мꙋ̀.
Въ грѧдꙋ́щꙋю же но́щь па́ки ꙗ҆ви́сѧ ст҃ы́й гл҃го́лѧ: а҆́зъ є҆́смь корни́лій со́тникъ, мо́щы же моѧ̀ лежа́тъ въ кꙋпинѣ̀ сꙋ́щей бли́зъ ѻ҆́нагѡ мѣ́ста, и҆дѣ́же бѣ̀ и҆ногда̀ хра́мъ ді́евъ: ты̀ ѹ҆́бѡ сози́жди мѝ цр҃ковь бли́зъ мѣ́ста дими́тріева, мѣ́стꙋ же томꙋ̀ и҆́мѧ пандо́хіꙋмъ, на не́мже мнѡ́гаѧ тѣлеса̀ вѣ́рныхъ и҆ ст҃ы́хъ бра́тій погребє́на сꙋ́ть.
Во ѹ҆́тріе же возвѣстѝ є҆пс̃кпъ видѣ́ніе кли́рꙋ своемꙋ̀, и҆ по́йде со всѣ́ми къ кꙋпинѣ̀ то́й, ю́же въ видѣ́ніи є҆мꙋ̀ показа̀ ст҃ы́й.
и҆ помоли́вшесѧ прилѣ́жнѡ, нача́ша копа́ти, и҆ ѡ҆брѣто́ша ковче́гъ и҆мꙋ́щь въ себѣ̀ цѣ́лы и҆ нетлѣ́нны ст҃а́гѡ корни́ліа мо́щы, ѿ ни́хже неизрече́нное и҆схожда́ше бл҃гоꙋха́ніе, и҆ веселѧ́хꙋсѧ ѕѣлѡ̀ ѡ҆ ѡ҆брѣ́теніи такова́гѡ вели́кагѡ сокро́вища.
Бы́сть же въ недоꙋмѣ́ніи є҆пс̃кпъ ѡ҆ цр҃кви, ю́же повелѣ̀ є҆мꙋ̀ ст҃ы́й созда́ти, не и҆мѣ́ бо толи́кѡ и҆мѣ́ніѧ, є҆ли́кѡ бы дово́лно бы́ло къ созда́нію цр҃ко́вномꙋ.
Ѻ҆ба́че и҆ въ то́мъ корни́лій ст҃ы́й не ѹ҆ме́дли помощѝ є҆пс̃кпꙋ: во грѧдꙋ́щꙋю бо но́щь ꙗ҆ви́сѧ нѣ́коемꙋ человѣ́кꙋ и҆́менемъ є҆ѵге́нію бл҃гочести́вꙋ сꙋ́щꙋ, и҆ ѕѣлѡ̀ бога́тꙋ, томꙋ̀ повелѣ̀, да да́стъ и҆мѣ̑ніѧ є҆пс̃кпꙋ сілꙋа́нꙋ, є҆ли́кѡ бꙋ́детъ дово́лно къ созда́нію цр҃кве.
Є҆ѵге́ній же возвѣстѝ видѣ́ніе то̀ є҆пс̃кпꙋ, и҆ вдадѐ є҆мꙋ̀ всѧ̑ ꙗ҆̀же на потре́бꙋ, и҆ наче́нше зда́ти хра́мъ ст҃ы́й, вско́рѣ є҆го̀ соверши́ша, и҆ всѧ́кимъ ѹ҆краси́ша бл҃голѣ́піемъ.
Приспѣ́вшꙋ же вре́мени, въ не́же чс̃тны́ѧ ст҃а́гѡ мо́щы ѿ кꙋпины̀ въ новосо́зданнꙋю цр҃ковь пренесены̀ бы́ти и҆мѣ́ѧхꙋ, собра́сѧ мно́жество вѣ́рныхъ со є҆пс̃кпомъ сілꙋа́номъ, <#152> и҆ со є҆ѵге́ніемъ, и҆мꙋ́ще въ рꙋка́хъ свои́хъ свѣщы̑ возжже́ны.
и҆ є҆гда̀ нача̀ є҆пс̃кпъ съ кли́ромъ пѣ́снь тріст҃ꙋ́ю пѣ́ти, а҆́біе са́мъ ѡ҆ себѣ̀ взѧ́сѧ ковче́гъ.
и҆ несѧ́шесѧ неви́димыми рꙋка́ми къ цр҃кви, никомꙋ́же ѿ люде́й дерза́ющꙋ прикоснꙋ́тисѧ є҆мꙋ̀.
Вси́ же то̀ чꙋ́до ви́дѧще, ꙗ҆́кѡ са́мъ ѡ҆ себѣ̀ грѧде́тъ ковче́гъ, ѹ҆дивлѧ́хꙋсѧ ѕѣлѡ̀ со стра́хомъ, и҆ є҆ди́ными ѹ҆сты̀ вопіѧ́хꙋ: ст҃ъ, ст҃ъ, ст҃ъ гдс̃ь саваѡ́ѳъ, ꙗ҆влѧ́ѧй на́мъ си̑лы и҆ чꙋдеса̀ своѧ̀ корни́ліемъ рабо́мъ свои́мъ.
Приключи́сѧ же та́мѡ бы́ти и҆ невѣ́рнымъ мнѡ́гимъ, и҆̀же ви́дѣвше то̀ чꙋ́до, вѣ́роваша въ гдс̃а на́шего і҆и҃са хрс̃та̀.
Є҆гда́ же доидо́ша цр҃кве, и҆ внидо́ша въ ню̀, ста́ша лю́діе, по ѻ҆бою̀ странꙋ̀ сю́дꙋ и҆ сю́дꙋ, смотрѧ́ще ка́мѡ по́йдетъ ковче́гъ съ мощмѝ, и҆ гдѣ̀ ста́нетъ.
ѻ҆́нъ же про́стѡ ше́дши ста̀ бли́зъ ѻ҆лтарѧ̀ по десно́й странѣ̀.
Хотѧ́ше же є҆пс̃кпъ поста́вити є҆го̀ внꙋ́трь ѻ҆лтарѧ̀, но никто́же можа́ше дви́гнꙋти ковче́га съ тогѡ̀ мѣ́ста, на не́мже са́мъ ста̀.
и҆ бы́ша мнѡ́гаѧ чꙋдеса̀ тогда̀ и҆ по то́мъ ѿ ст҃ы́хъ и҆ чꙋдотво́рныхъ моще́й ѹ҆го́дника бж҃іѧ.
Ѹ҆ме́ршꙋ же є҆пс̃кпꙋ сілꙋа́нꙋ, наста̀ по не́мъ філосто́ргій, то́й ѹ҆вѣща̀ і҆кѡнопи́сца нѣ́коего и҆́менемъ Є҆нкра́тіѧ, да всю̀ цр҃ковь і҆кѡнопи́снымъ хꙋдо́жествомъ ѹ҆кра́ситъ, а҆ наипа́че сама́гѡ ст҃а́гѡ корни́ліа і҆кѡ́нꙋ до́брѣ да напи́шетъ.
І҆кѡнопи́сецъ же є҆гда̀ начина́ше писа́ти і҆кѡ́нꙋ ст҃а́гѡ корни́ліа, не можа́ше до́брѣ и҆зъ̃ѻбрази́ти лица̀ є҆гѡ̀, и҆ заглажда́ше є҆̀, и҆ па́ки писа́ше, и҆ па́ки заглажда́ше не могꙋ́щи написа́ти бл҃голѣ́пнѡ, ѡ҆скорби́сѧ же є҆нкра́тій, и҆ нѣ́каѧ хꙋ́лнаѧ словеса̀ на ст҃а́го и҆зре́къ, ѡ҆ста́ви є҆гѡ̀ ѻ҆́бразъ: и҆ хотѧ̀ и҆́но нѣ́что на стѣнѣ̀ цр҃ко́внѣй писа́ти, взы́де на лѣ́ствицꙋ, и҆ поползнꙋ́всѧ нога́ми, падѐ съ лѣ́ствицы на зе́млю, и҆ толи́кѡ сокрꙋши́сѧ, ꙗ҆́кѡ бы́ти є҆мꙋ̀ а҆́ки ме́ртвꙋ.
Взе́мше же є҆го̀ дрꙋзі́и та́мѡ приклю́чшіисѧ, несо́ша въ до́мъ є҆го̀, и҆ положи́ша на ѻ҆дрѣ̀ є҆́ле жи́ва, нижѐ проглаго́лати могꙋ́ща.
Ви́дѧхꙋ же всѝ, ꙗ҆́кѡ бѧ́хꙋ че́рви ѻ҆́крестъ ѹ҆сте́нъ є҆гѡ̀, и҆ є҆ди́ни во ѹ҆ста̀ вхожда́хꙋ, дрꙋзі́и же ѿ ѹ҆́стъ и҆схожда́хꙋ.
Се́ же бы́сть ка́знь за то̀, ꙗ҆́кѡ дерзнꙋ̀ ѹ҆стна́ми свои́ми нѣ́каѧ словеса̀ хꙋ́лнаѧ рещѝ на ст҃а́го.
Ѻ҆ба́че ꙗ҆́коже са́мъ гдс̃ь, та́кѡ и҆ ст҃і́и є҆гѡ̀ рабѝ, не до конца̀ гнѣ́ваютсѧ, ни въ вѣ́къ враждꙋ́ютъ: и҆́бо во ѹ҆́тріе, и҆́же дими́тріевꙋ женꙋ̀ и҆ сы́на ѿ среды̀ разрꙋши́вшихсѧ стѣ́нъ и҆зведѐ жи̑вы, то́й и҆ є҆нкра́тію ꙗ҆ви́сѧ, и҆ є҆́мъ є҆го̀ за рꙋ́кꙋ, а҆́ки ѿ сна̀ воздви́же ѿ ѻ҆дра̀, и҆ неви́димь бы́сть.
Є҆нкра́тій же ѡ҆щꙋти́въ себѐ здра́ва, течѐ къ цр҃кви ст҃а́гѡ, и҆ припа́дши къ чс̃тно́мꙋ ковче́гꙋ, въ не́мже лежа́хꙋ цѣле́бныѧ мо́щы корни́ліевы, съ пла́чемъ проще́ніѧ просѧ́ше за прегрѣше́ніе своѐ.
Бл҃годарѧ́ше же ст҃а́го, ꙗ҆́кѡ поми́лова, и҆ и҆сцѣлѝ є҆го̀ ѿ болѣ́зни близъ̃ сме́рти бы́вша.
Двѣ́ же по́лзы то́й і҆кѡнопи́сецъ ѿ ꙗ҆вле́ніѧ ст҃а́гѡ ѡ҆брѣ́те: и҆сцѣле́ніе, и҆ позна́ніе лица̀ є҆гѡ̀, како́въ бѣ̀ ѻ҆́бразомъ <#153> и҆ и҆зъ̃образѝ на і҆кѡ́нѣ ст҃а́го корни́ліа та́кѡ, ꙗ҆́коже ви́дѣ є҆го̀ ꙗ҆́влшасѧ є҆мꙋ̀, и҆ сла́вѧше хрс̃та̀ бг҃а, со ѻ҆ц҃е́мъ, и҆ ст҃ы́мъ дх҃омъ сла́вимаго во вѣ́ки, а҆ми́нь.
Въ то́йже де́нь па́мѧть ст҃ы́хъ мч҃нкъ: и҆ліѝ, зѡ́тіка, лꙋкіа́на, ѹ҆алеріа́на въ ца́рство лѷкині́ево, ѿ маѯі́ма кнѧ́зѧ страда́вшихъ.
И҆ прпд̃бнагѡ ѻ҆ц҃а̀ на́шегѡ петра̀, и҆́же во а҆тро́и: се́й же мни́тсѧ бы́ти, и҆́же и҆ вы́ше сегѡ̀ мс̃ца въ є҆҃ де́нь, и҆́же во а҆фі́рѣ.
И҆ ст҃а́гѡ сщ҃енномч҃нка і҆ꙋліа́на пресвѵ́тера ѿ а҆гкѵ́ры галаті́йскіѧ въ ца́рство лѷкині́ево за хрс̃та̀ пострада́вшагѡ.
И҆ ст҃ы́хъ мч҃нкѡвъ: крони́да, лео́нтіа, серапіѡ́на во є҆гѵ́птѣ по мно́гихъ мꙋ́кахъ, потопле́нныхъ въ мо́ри.
И҆ ст҃ы́хъ мч҃нкѡвъ: селе́ѵка, макро́віа, и҆ гордіа́на въ галаті́и ѕвѣ́ремъ вда́нныхъ.
Здѣ́ же воспомина́етъ про́логъ ст҃а́гѡ мч҃нка стратоні́ка, по мꙋ́кахъ разли́чныхъ къ двꙋ́мъ садо́вымъ древа́мъ привѧ́заннаго и҆ расте́рзаннаго: но то́й є҆ди́нъ мни́тсѧ бы́ти, и҆́же и҆ вы́ше бѣ̀ въ ѳ҃ де́нь сегѡ̀ мс̃ца, стра́торъ нарече́нный.
Въ се́й же де́нь полага́етъ про́логъ ст҃а́гѡ мч҃нка ѳеодѡ́та во а҆леѯандрі́и за хрс̃та̀ страда́вшаго: но то́йже се́й є҆́сть, и҆́же и҆ ѳео́дѡръ а҆рхіепс̃кпъ а҆леѯандрі́йскій, деке́мвріа въ г҃ де́нь почита́емый.