Во днѝ ца́рства траіа́нова живѧ́ше въ ри́мѣ нѣ́кій воево́да и҆́менемъ плакі́да, доброро́денъ и҆ сла́венъ, и҆ па́че и҆ны́хъ бога́тъ, хра́бръ же въ бра́нѣхъ толи́кѡ, ꙗ҆́кѡ са́мое и҆́мѧ є҆гѡ̀ стра́шно врагѡ́мъ бѣ̀.
Се́й є҆гда̀ ца́рь <#188> ри́мскій ті́тъ воева̀ і҆ꙋде́йскꙋю зе́млю, бы́сть и҆зѧ́щнѣйшій во́ждь ри́мскихъ во́євъ, и҆ мно́гое мꙋ́жество на бра́нѣхъ показа̀.
І҆дѡлопокло́нникъ же сы́й вѣ́рою, дѣла̀ хрс̃тіа́нскаѧ въ житіѝ свое́мъ пока́зоваше: а҆́лчꙋщыѧ пита́ѧ, нагі́ѧ ѡ҆дѣва́ѧ, впа́дающымъ въ бѣдꙋ̀ помога́ѧ, и҆ ѿ ѹ҆́зъ и҆ темни́цы мно́гихъ свобожда́ѧ: мно́жае же ра́довашесѧ ѡ҆ се́мъ, є҆гда̀ комꙋ̀ бл҃годѣ́телствꙋѧ подадѐ рꙋ́кꙋ по́мощи въ бѣдѣ̀ сꙋ́щемꙋ, не́же є҆гда̀ рꙋко́ю свое́ю врагѝ побѣдѝ.
И҆ бѧ́ше ꙗ҆́кѡ дрꙋгі́й корни́лій, є҆го́же а҆пс̃толскаѧ помина́ютъ дѣѧ̑ніѧ, во всѣ́хъ до́брыхъ дѣ́лѣхъ соверше́нъ, то́чію не и҆мѣ̀ ст҃ы́ѧ въ гдс̃а на́шегѡ і҆и҃са хрс̃та̀ вѣ́ры, безъ̃ ко́еѧ всѧ̀ дѡ́браѧ дѣла̀ ме́ртва сꙋ́ть.
и҆мѣ́ѧше же сꙋпрꙋ́жницꙋ та́кожде добродѣ́телнꙋ, во все́мъ є҆мꙋ̀ подо́бѧщꙋюсѧ, съ не́юже родѝ два̀ сы́на.
И҆ бѣ̀ плакі́да съ жено́ю свое́ю ѕѣлѡ̀ до́бръ и҆ ми́лостивъ ко всѣ́мъ: сегѡ̀ то́чію є҆мꙋ̀ не достава́ше, да позна́етъ є҆ди́наго и҆́стиннаго бг҃а, є҆го́же не вѣ́дый, дѣ́лы до́брыми чтѧ́ше.
Человѣколю́бецъ же бг҃ъ всѣ̑мъ хотѧ́й спасти́сѧ, и҆ не презира́ѧй дѡ́браѧ творѧ́щихъ, не презрѣ̀ и҆ сего̀ добродѣ́телнаго мꙋ́жа, и҆ не ѡ҆ста́ви є҆го̀ во тмѣ̀ і҆́дѡлскіѧ пре́лести погиба́ти, но то́й [є҆мꙋ́же, во всѧ́комъ ꙗ҆зы́цѣ боѧ́йсѧ бг҃а, и҆ дѣ́лаѧй пра́вдꙋ, пріѧ́тенъ є҆́сть] пріѧ́тна є҆го̀ себѣ̀ сотворѝ, и҆ и҆зво́ли пꙋ́ть сп҃се́ніѧ є҆мꙋ̀ ꙗ҆ви́ти сицевы́мъ ѻ҆́бразомъ:
Бы́вшꙋ плакі́дѣ во є҆ди́нъ ѿ дне́й по ѻ҆бы́чаю своемꙋ̀ на ло́вѣ ѕвѣре́й со слꙋга́ми свои́ми, ѡ҆брѣ́те ста́до є҆ле́ней, и҆ ѹ҆стро́ивъ ко́нникѡвъ, нача̀ гони́ти є҆ле́ни: ви́дѣвъ же є҆ле́нѧ во все́мъ ста́дѣ бо́лшаго, погна̀ за ни́мъ, и҆ ѿлꙋчи́сѧ є҆ле́нь ѿ ста́да, ѿлꙋчи́сѧ же и҆ плакі́да ѿ во́євъ свои́хъ, съ ма́лою дрꙋжи́ною гонѧ̀ по не́мъ, слꙋги̑ же послѣ́дꙋющіи є҆мꙋ̀ и҆знемо́гше, ѡ҆ста́шасѧ дале́че.
Плакі́да же є҆ди́нъ и҆мѣ́ѧй конѧ̀ быстрѣ́йшаго, погна̀ да́лѣе за є҆ле́немъ въ пꙋсты́ню, до́лгѡ же гонѧ́щꙋ є҆мꙋ̀, и҆ дале́кѡ забѣ́гшꙋ, є҆ле́нь то́й взы́де на высо́кій ка́мень, и҆ ста̀ на не́мъ.
пріѣ́хавъ же бли́зъ плакі́да є҆ди́нъ, помышлѧ́ше въ себѣ̀, каковы́мъ бы ѻ҆́бразомъ того̀ ѹ҆лови́ти є҆ле́нѧ, и҆ смотрѧ́ше на него̀.
Бг҃ъ же ще́дрый ѹ҆строѧ́ѧй всѧ́кими ѻ҆́бразы спасе́ніе человѣ́кѡмъ, и҆ и҆́миже вѣ́сть сꙋдба́ми наставлѧ́ѧй на пꙋ́ть и҆́стинный, то́й ѹ҆ловѝ ловца̀, не ꙗ҆́коже корни́ліа петро́мъ, но ꙗ҆́кѡ па́ѵла ꙗ҆вле́ніемъ свои́мъ.
Стоѧ́щꙋ бо плакі́дѣ до́лгѡ, и҆ на є҆ле́нѧ зрѧ́щꙋ, ꙗ҆ви́сѧ є҆мꙋ̀ хрс̃то́съ гдс̃ь сицевы́мъ ѻ҆́бразомъ: крс̃тъ свѣ́телъ ѕѣлѡ̀ посредѣ̀ рогѡ́въ є҆ле́нихъ показа́сѧ, на него́же плакі́да смотрѧ̀, ви́дѣ подо́біе пло́ти ко крс̃тꙋ̀ пригвожде́ннаго за ны̀ і҆и҃са хрс̃та̀.
Ѹ҆дивлѧ́ющꙋсѧ же є҆мꙋ̀ ѡ҆ стра́нномъ то́мъ видѣ́ніи, ѹ҆слы́ша та́мѡ гла́съ къ себѣ̀ гл҃ющь: что́ мѧ го́ниши плакі́до; и҆ а҆́біе съ си́мъ бжс̃твеннымъ гла́сомъ падѐ стра́хъ на него̀, и҆ спа́дъ съ конѧ̀ на зе́млю, лежа́ше а҆́ки ме́ртвъ.
Є҆два́ же въ себѐ прише́дъ, речѐ: кто̀ є҆сѝ ты̀ гдс̃и гл҃ѧй ко мнѣ̀; гдс̃ь же <#189> речѐ є҆мꙋ̀:
а҆́зъ є҆́смь і҆и҃съ хрс̃то́съ, и҆́же бг҃ъ сы́й, сп҃се́ніѧ ра́ди человѣ́ческагѡ въ пло́ть ѡ҆бле́кшисѧ, во́лею пострада́хъ, и҆ крс̃тъ претерпѣ́хъ: ты́ же мѧ̀ не вѣ́дый чте́ши, дѡ́браѧ бо твоѧ̑ дѣла̀, и҆ мнѡ́гіѧ млс̃тыни взыдо́ша предъ̃ мѧ̀, и҆ помѧнꙋ́хъ сп҃стѝ тебѐ: и҆ сегѡ̀ ра́ди ꙗ҆ви́хсѧ тебѣ̀ на се́мъ живо́тнѣмъ, да ѹ҆ловлю̀ тѧ̀ въ моѐ позна́ніе, и҆ присоединю̀ вѣ̑рнымъ рабѡ́мъ мои́мъ: не хощꙋ́ бо, да человѣ́къ првд̃наѧ дѣла̀ творѧ̀, въ непріѧ́зненныхъ сѣ́техъ ѹ҆вѧ́зъ, поги́бнетъ.
Воста́въ же плакі́да ѿ землѝ, не ви́дѣ никого́же, и҆ речѐ: ны́нѣ гдс̃и вѣ́рꙋю, ꙗ҆́кѡ ты̀ є҆сѝ бг҃ъ нб҃сѐ и҆ землѝ, и҆ творе́цъ всѣ́хъ тва́рей: тебѣ̀ ѹ҆̀бо покланѧ́юсѧ є҆ди́номꙋ, и҆на́го же кромѣ̀ тебѐ бг҃а ѿсе́лѣ зна́ти не хощꙋ̀.
молю́ же тѧ̀ гдс̃и, наста́ви мѧ̀, что̀ и҆́мамъ твори́ти.
И҆ бы́сть гла́съ къ немꙋ̀ гл҃ѧй: и҆дѝ ко і҆ере́ю хрс̃тіа́нскомꙋ, и҆ крс̃ти́сѧ ѿ негѡ̀, и҆ то́й тѧ̀ наꙋчи́тъ сп҃се́нномꙋ пꙋтѝ.
Сіѧ̑ слы́шавъ плакі́да, и҆спо́лнисѧ ра́дости и҆ ѹ҆миле́ніѧ, и҆ па́дши на зе́млю со слеза́ми, поклони́сѧ ꙗ҆́влшемꙋсѧ є҆мꙋ̀ гдс̃ꙋ, и҆ ка́ѧшесѧ, ꙗ҆́кѡ дото́лѣ не вѣ́дѧ пра́вды, не зна́ѧше бг҃а и҆́стиннагѡ.
Ра́довашесѧ же дх҃омъ, ꙗ҆́кѡ сподо́бисѧ таковы́ѧ бл҃года́ти, ꙗ҆́же є҆го̀ къ позна́нію приведѐ, и҆ на пꙋ́ть пра́вый наста́ви.
Всѣ́дъ же на конѧ̀, возврати́сѧ къ свои́мъ въ весе́ліи дх҃а, никомꙋ́же повѣ́даѧ бы́вшее.
Є҆гда́ же возврати́сѧ ѿ ло́ва въ до́мъ сво́й, поѧ́тъ на ѻ҆со́бное мѣ́сто сꙋпрꙋ́жницꙋ свою̀, и҆ возвѣстѝ є҆́й всѧ̑, ꙗ҆̀же ви́дѣ и҆ слы́ша.
Ѻ҆на́ же речѐ: а҆́зъ въ мимоше́дшꙋю но́щь слы́шахъ нѣ́коего гл҃юща ко мнѣ̀: ты̀, и҆ мꙋ́жъ тво́й, и҆ сы́нове твоѝ, ѹ҆́трѡ пріи́дете ко мнѣ̀, и҆ позна́ете мѧ̀ і҆и҃са хрс̃та̀ и҆́стиннаго бг҃а, даю́щаго сп҃се́ніе лю́бѧщымъ мѧ̀.
не ѿлага́имъ ѹ҆̀бо, но ско́рѡ твори́мъ повелѣ́нное на́мъ.
И҆ бы́вшей но́щи, повелѣ̀ плакі́да поиска́ти, гдѣ̀ живе́тъ і҆ере́й хрс̃тіа́нскій: ѹ҆вѣ́давъ же до́мъ є҆гѡ̀, поѧ́тъ женꙋ̀ и҆ ча̑да, и҆ нѣ́кіѧ ѿ вѣ́рныхъ слꙋ́гъ свои́хъ, и҆ и҆до́ша въ до́мъ і҆ере́а и҆́менемъ і҆ѡа́нна, є҆мꙋ́же всѧ̑ подро́бнꙋ возвѣсти́ша ѡ҆ гдс̃нѣмъ и҆̀мъ ꙗ҆вле́ніи, и҆ просѧ́хꙋ креще́ніѧ ѿ негѡ̀.
Ѻ҆́нъ же слы́шавъ сіѧ̑, просла́ви бг҃а собира́ющаго ѿ ꙗ҆зы́къ лю́ди бл҃гоꙋго́дныѧ себѣ̀, и҆ наꙋчи́въ и҆̀хъ ст҃ы́ѧ вѣ́ры, сказа̀ и҆̀мъ всѧ̀ за́повѣди бж҃іѧ.
дово́лнѡ же поꙋчи́въ, и҆ мл҃твꙋ сотвори́въ, крс̃тѝ и҆̀хъ во и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а.
И҆ дано̀ бы́сть плакі́дѣ во ст҃о́мъ кр҃ще́ніи и҆́мѧ є҆ѵста́ѳій, сꙋпрꙋ́зѣ же є҆гѡ̀ ѳеопі́стіа, сынѡ́мъ же и҆́хъ, а҆га́пій и҆ ѳеопі́стъ.
И҆ причасти́въ и҆̀хъ і҆ере́й та́инъ бжс̃твенныхъ, ѿпꙋстѝ съ ми́ромъ, гл҃го́лѧ: бг҃ъ бꙋ́ди съ ва́ми, просвѣти́вый ва́съ свѣ́томъ позна́ніѧ своегѡ̀, и҆ призва́вый въ наслѣ́діе жи́зни вѣ́чныѧ, въ не́йже, є҆гда̀ видѣ́ніѧ є҆гѡ̀ насыща́тисѧ бꙋ́дете, помѧни́те и҆ менѐ дх҃о́внаго ѻ҆ц҃а̀ ва́шего.
И҆ ѿидо́ша въ до́мъ сво́й, ба́нею кр҃ще́ніѧ ѿрожде́ни, и҆ и҆спо́лнени неизрече́нныѧ ра́дости: ѡ҆свѣти́ бо бл҃года́ть бж҃іѧ и҆́хъ дꙋ́шы, и҆ ѹ҆сладѝ сердца̀, ꙗ҆́кѡ мнѣ́тисѧ и҆̀мъ на нб҃сѝ, а҆ не на землѝ бы́ти.
Во ѹ҆́трій же де́нь є҆ѵста́ѳій всѣ́дъ на конѧ̀, и҆ взе́мъ ма́лѡ ѿ слꙋ́гъ, по́йде а҆́ки на ло́въ, на ѻ҆́ное мѣ́сто, и҆дѣ́же ви́дѣ гдс̃а, да та́мѡ бл҃годаре́ніе возда́стъ є҆мꙋ̀ ѡ҆ неисповѣди́мыхъ є҆гѡ̀ да́рѣхъ.
И҆ бы́въ на мѣ́стѣ то́мъ, разсла̀ слꙋгѝ своѧ̑ глаго́лѧ: поищи́те ло́ва.
са́мъ же слѣ́зши съ конѧ̀, падѐ на зе́млю на лицѣ̀ свое́мъ, съ пла́чемъ молѧ́сѧ, и҆ бл҃годарѧ̀ бг҃а ѡ҆ таково́й є҆гѡ̀ неизрече́нной млс̃ти, ꙗ҆́кѡ и҆зво́ли є҆го̀ съ до́момъ свѣ́томъ вѣ́ры просвѣти́ти.
Врꙋча́шесѧ же гдс̃ꙋ своемꙋ̀, возлага́ѧсѧ на є҆гѡ̀ во́лю бл҃гꙋ́ю и҆ соверше́ннꙋю, да по свое́й бл҃гости, всѧ̑ ѡ҆ не́мъ ѹ҆стро́итъ на по́льзꙋ, ꙗ҆́коже вѣ́сть, и҆ ꙗ҆́коже хо́щетъ.
И҆ и҆мѣ̀ та́мѡ ѿкрове́ніе ѡ҆ и҆мꙋ́щихъ на него̀ пріитѝ напа́стехъ и҆ ско́рбехъ: слы́ша бо гдс̃а гл҃юща къ немꙋ̀: є҆ѵста́ѳіе, подоба́етъ тѝ ꙗ҆ви́ти вѣ́ры твоеѧ̀ дѣ́ло, и҆ наде́жды несꙋмнѣ́ніе, и҆ любвѐ твоеѧ̀ ко мнѣ̀ ѹ҆се́рдіе.
сіѧ̑ же не во вре́менныхъ бога́тствахъ и҆ бл҃гополꙋ́чіи сꙋ́етномъ, но въ нищетѣ̀ и҆ напа́стехъ познава́ютсѧ.
И҆́маши ѹ҆́бѡ во мнѡ́гіѧ пріитѝ скѡ́рби, и҆ и҆скꙋше́нъ бы́ти бѣда́ми ꙗ҆́коже дрꙋгі́й і҆́ѡвъ, да ꙗ҆́кѡ зла́то въ горни́лѣ и҆скꙋше́нъ бы́въ, досто́инъ мнѣ̀ ѡ҆брѧ́щешисѧ, и҆ пріи́меши вѣне́цъ ѿ рꙋ́къ мои́хъ.
Є҆ѵста́ѳій же речѐ: гдс̃и, сѐ є҆́смь предъ̃ тобо́ю, творѝ со мно́ю, є҆́же хо́щеши, гото́въ ѿ рꙋ́къ твои́хъ всѧ̑ со бл҃годаре́ніемъ пріѧ́ти: ты́ бо бл҃гъ и҆ млс̃тивъ є҆сѝ, наказꙋ́еши съ поми́лованіемъ ꙗ҆́кѡ ѻ҆ц҃ъ, и҆ не и҆́мамъ ли ѿ милосе́рдныхъ рꙋ́къ твои́хъ ѻ҆ч҃ескагѡ пріѧ́ти наказа́ніѧ; є҆́й гото́въ є҆́смь ꙗ҆́кѡ ра́бъ всѧ̑ на мѧ̀ возлага́ємаѧ носи́ти и҆ терпѣ́ти, то́чію твоѧ̀ всеси́лнаѧ по́мощь да бꙋ́детъ со мно́ю.
И҆ па́ки слы́ша гла́съ: ны́нѣ ли хо́щеши пріѧ́ти ско́рбь, и҆лѝ въ послѣ́дніѧ житіѧ̀ твоегѡ̀ днѝ; є҆ѵста́ѳій же речѐ: гдс̃и, а҆́ще не возмо́жно минꙋ́ти и҆скꙋше́ніѧмъ, то̀ ны́нѣ да́ждь претерпѣ́ти ты́ѧ бѣды̑, то́чію послѝ по́мощь твою̀, да не побѣди́тъ ѕло̀, и҆ ѿто́ржетъ мѧ̀ ѿ любвѐ твоеѧ̀.
Гдс̃ь же речѐ: дерза́й є҆ѵста́ѳіе, бл҃года́ть бо моѧ̀ бꙋ́детъ съ тобо́ю хранѧ́щаѧ тѧ̀.
Є҆гда́ же во глꙋбинꙋ̀ смире́ніѧ пріи́деши, а҆́зъ вознесꙋ̀ тѧ, и҆ просла́влю на нб҃сѝ предъ̃ а҆́гг҃лы мои́ми: но и҆ предъ̃ человѣ́ки почтꙋ̀ тебѐ, по мно́гихъ бо ско́рбехъ па́ки ѹ҆тѣ́шꙋ тѧ̀, и҆ въ пе́рвый тво́й са́нъ вчиню̀: ты́ же не ѡ҆ вре́менной че́сти возвесели́сѧ, но ѡ҆ се́мъ, ꙗ҆́кѡ и҆́мѧ твоѐ въ кни́гахъ напи́сано є҆́сть живо́тныхъ.
Та́кѡ ст҃ы́й є҆ѵста́ѳій неви́димомꙋ собесѣ́дꙋѧ бг҃ꙋ, и҆ ѿкрове́ніѧ є҆гѡ̀ почерпа́ѧ, мно́гіѧ на то́мъ мѣ́стѣ и҆спо́лнисѧ дх҃о́вныѧ ра́дости и҆ бл҃года́ти бж҃іѧ, и҆ возвраща́шесѧ въ до́мъ сво́й, бжс̃твенною разжига́ѧсѧ любо́вію.
Не ѹ҆таи́ же сегѡ̀ и҆ ѿ честны́ѧ своеѧ̀ сꙋпрꙋ́ги, но сказа̀ є҆́й всѧ̀, ꙗ҆̀же ѿ бж҃іѧ ѹ҆вѣ́да ѿкрове́ніѧ, ꙗ҆́кѡ и҆́мꙋтъ на ни́хъ пріитѝ мнѡ́гіѧ напа́сти и҆ скѡ́рби, и҆̀хже подоба́етъ мꙋ́жественнѡ гдс̃а ра́ди терпѣ́ти: всѧ́ же сіѧ̑, а҆́ще претерпѧ́тъ до́брѣ, ѡ҆брати́тъ и҆̀мъ гдс̃ь въ вѣ́чное весе́ліе и҆ ра́дость.
<#191>
Слы́шащи то̀ бл҃горазꙋ́мнаѧ жена̀, речѐ: во́лѧ гдс̃нѧ съ на́ми да бꙋ́детъ, то́чію ѡ҆ се́мъ прилѣ́жнѡ мо́лимъ є҆гѡ̀ бл҃госты́ню, да пода́стъ на́мъ терпѣ́ніе: и҆ живѧ́хꙋ во всѧ́комъ бл҃гоче́стіи и҆ че́стности, подвиза́ющесѧ въ постѣ̀ и҆ мл҃твахъ, творѧ́ще млс̃тыни ѹ҆бѡ́гимъ бѡ́лшіѧ пе́рвыхъ, и҆ проходѧ́ще всѧ́кіѧ добродѣ̑тели ѹ҆се́рднѡ па́че пе́рвагѡ и҆́хъ до́брагѡ житіѧ̀.
Не по мно́гихъ же дне́хъ, бг҃ꙋ попꙋсти́вшꙋ, внидо́ша болѣ̑зни и҆ смє́рти въ до́мъ є҆гѡ̀, на человѣ́ки же и҆ скоты̀, и҆ разболѣ́шасѧ всѝ живꙋ́щіи во дворѣ̀ є҆гѡ̀.
И҆ по ма́ломъ вре́мени и҆зомро́ша ма́лѡ не всѝ рабѝ є҆гѡ̀, и҆ рабы̑ни, и҆ скоты̀, и҆ всѧ́кое живо́тно.
покрадо́ша же и҆ та́тіе и҆мѣ̑ніѧ и҆́хъ но́щію, входѧ́ще въ сокрѡ́вища, ꙗ҆̀же не бѧ́хꙋ ѹ҆жѐ стрегѡ́ма.
а҆́ще же кото́рый ѿ рабѡ́въ и҆ жи́въ бѣ̀, то̀ болѣ́знію ѡ҆держи́мый на ѻ҆дрѣ̀ лежа́ше.
И҆ въ ма́лѣмъ вре́мени сла́вный ѻ҆́ный и҆ бога́тый воево́да ѡ҆бнища̀.
и҆ не ѡ҆печа́лисѧ ѡ҆ се́мъ, ни поскорбѣ̀, во всѣ́хъ си́хъ приключи́вшихсѧ не погрѣшѝ є҆ѵста́ѳій, но бл҃годарѧ̀ бг҃а а҆́ки дрꙋгі́й і҆́ѡвъ, гл҃го́ла: гдс̃ь дадѐ, гдс̃ь ѿѧ́тъ: ꙗ҆́кѡ гдс̃ви и҆зво́лисѧ, та́кѡ бы́сть: бꙋ́ди и҆́мѧ гдс̃не бл҃гослове́нно (во вѣ́ки).
И҆ ѹ҆тѣша́ше сꙋпрꙋ́гꙋ свою̀, да не скорби́тъ ѡ҆ быва́емыхъ.
ѻ҆на́ же па́ки є҆го̀ ѹ҆тѣша́ше, и҆ ѻ҆́ба со бл҃годаре́ніемъ терпѧ́хꙋ, возло́жшесѧ на во́лю гдс̃а своегѡ̀, и҆ ѹ҆тѣша́хꙋсѧ наде́ждою млс̃ти бж҃іѧ.
Ви́дѧ же є҆ѵста́ѳій себѐ ѡ҆бнища́вша, ѹ҆мы́сли ѹ҆таи́тисѧ ѿ всѣ́хъ зна́емыхъ, и҆ въ дале́кой странѣ̀ посредѣ̀ про́ста наро́да скры́вши бл҃горо́дство своѐ и҆ са́нъ вели́кій, въ нищетѣ̀ и҆ смире́ніи жи́ти, да та́кѡ безъ̃ всѧ́кагѡ препѧ́тіѧ и҆ молвы̀ рабо́таетъ ѡ҆бнища́вшемꙋ и҆ смири́вшемꙋсѧ сп҃се́ніѧ ра́ди на́шегѡ хрс̃тꙋ̀ гдс̃ꙋ.
И҆ совѣ́товавши ѡ҆ то́мъ съ свои́мъ подрꙋ́жіемъ, ѹ҆ста́виша вре́мѧ и҆зше́ствіѧ своегѡ̀ въ нощѝ, и҆ сотвори́ша та́кѡ.
ѹ҆таи́вшесѧ дома́шнихъ свои́хъ, и҆́хже ѕѣлѡ̀ ма́лѡ ѡ҆ста́сѧ, и҆ то̀ болны́хъ, поѧ́ша двꙋ́хъ свои́хъ ѻ҆троча́тъ, и҆ и҆змѣни́вше ѻ҆дє́жды многоцѣ̑нныѧ, ѡ҆блеко́шасѧ въ рꙋ́бища:
и҆ взе́мше ма́лѡ ѿ и҆мѣ́ніѧ, є҆ли́кѡ взѧ́ти можа́хꙋ, и҆зыдо́ша но́щію и҆зъ̃ до́мꙋ своегѡ̀, ѡ҆ставлѧ́юще всѧ̑ бг҃а ра́ди, сла́вꙋ, и҆ че́сть, и҆ бога̑тства, въ ни́хже а҆́ще и҆ приѡскꙋдѣ̀ є҆ѵста́ѳій: ѻ҆ба́че можа́ше ѹ҆до́бнѡ па́ки ѻ҆́наѧ стѧжа́ти, сꙋ́щи великоро́денъ и҆ сано́венъ, и҆ люби́мый царю̀, и҆ ѿ всѣ́хъ почита́емый: но всѧ̑ сіѧ̑ ѹ҆мє́ты вмѣнѝ бы́ти, да приѡбрѧ́щетъ бг҃а помо́щника себѣ̀.
И҆ хожда́ше по незна́емымъ мѣста́мъ, кры́ѧсѧ ѿ позна́ніѧ человѣ́ческагѡ, ѹ҆далѧ́шесѧ бѣ́гаѧ, и҆ водворѧ́шесѧ посредѣ̀ препро́стыхъ и҆ невѣ́ждъ.
та́кѡ и҆зше́дши и҆зъ̃ пресвѣ́тлыхъ пала́тъ свои́хъ, стра́нствоваше хрс̃то́въ подража́тель, не и҆мы́й гдѣ̀ главы̀ подклони́ти.
Вско́рѣ же сотвори́сѧ вѣ́домо царю̀ и҆ всѣ́мъ велмо́жамъ, ꙗ҆́кѡ люби́мый и҆́хъ воево́да плакі́да невѣ́домѡ ка́мѡ скры́сѧ.
<#192>
и҆ дивлѧ́хꙋсѧ что̀ є҆мꙋ̀ приключи́сѧ, погꙋби́лъ ли є҆го̀ кто̀ ѿ врагѡ́въ дома́шнихъ; и҆лѝ са́мъ нѣ́кіимъ поги́бе слꙋ́чаемъ; и҆ недоꙋмѣва́хꙋсѧ ѡ҆ не́мъ.
печа́лѧхꙋсѧ же велмѝ, и҆ взыска́ніе творѧ́хꙋ, но не возмого́ша ѹ҆вѣ́дати та́йны бж҃іѧ на є҆ѵста́ѳіи дѣ́ющіѧсѧ: Кто́ бо разꙋмѣ̀ ѹ҆́мъ гдс̃нь; и҆лѝ кто̀ совѣ́тникъ є҆мꙋ̀ бы́сть;
Пребыва́ющꙋ же є҆ѵста́ѳію въ нѣ́коемъ незна́емомъ мѣ́стѣ, речѐ є҆мꙋ̀ жена̀ є҆гѡ̀: доко́лѣ господи́нъ мо́й здѣ̀ живе́мъ; по́йдемъ ѿсю́дꙋ въ страны̀ дале́кіѧ, да не когда̀ позна́етъ на́съ кто̀, и҆ бꙋ́демъ въ поноше́ніе зна́ющымъ на́съ.
и҆ воста́вше съ дѣтмѝ, поидо́ша пꙋте́мъ ведꙋ́щимъ въ є҆гѵ́петскꙋю странꙋ̀, ше́дше же нѣ́коликѡ дне́й, пріидо́ша къ мо́рю: и҆ ѡ҆брѣ́тше въ приста́нищи кора́бль, и҆́же хотѧ́ше къ є҆гѵ́птꙋ ѿплы́ти, внидо́ша въ него̀, и҆ плы́ти нача́ша.
Господи́нъ же кораблѧ̀ тогѡ̀ ва́рваръ свирѣ́пъ ѕѣлѡ̀, то́й ви́дѣвъ женꙋ̀ є҆ѵста́ѳіевꙋ краснꙋ̀, ѹ҆ѧзви́сѧ на ню̀, и҆ мы́слѧше лꙋка́во въ се́рдцѣ свое́мъ, хотѧ̀ ю̀ себѣ̀ ѿѧ́ти ѹ҆ ѻ҆́нагѡ ѹ҆бо́гагѡ человѣ́ка.
приплы́вше же къ бре́гꙋ, на не́мже подоба́ше є҆ѵста́ѳію и҆зы́ти и҆зъ̃ кораблѧ̀, и҆ и҆тѝ въ пꙋ́ть сво́й: господи́нъ же кораблѧ̀ ѻ҆́нагѡ взѧ̀ за прево́зъ женꙋ̀ є҆ѵста́ѳіевꙋ.
Є҆ѵста́ѳій же проти́вѧшесѧ є҆мꙋ̀, и҆ не хотѧ́ше да́ти, но ничто́же возмо́же, и҆́бо свирѣ́пый ѻ҆́ный и҆ безчеловѣ́чный ва́рваръ ѡ҆бнажи́въ ме́чь, хотѧ́ше є҆го̀ ѹ҆би́ти, и҆ воврещѝ въ мо́ре.
Не бы́сть же, да кто̀ помо́жетъ є҆ѵста́ѳію, и҆ нача̀ съ пла́чемъ припа́дати къ нога́мъ ѕла́гѡ тогѡ̀ человѣ́ка, молѧ̀, да не разлꙋча́етъ є҆го̀ съ люби́мымъ подрꙋ́жіемъ.
но ни та́кѡ что̀ ѹ҆спѣ̀, коне́чный бо и҆зречѐ ѿвѣ́тъ глаго́лѧ: и҆лѝ ѿидѝ молча̀, а҆́ще хо́щеши жи́въ бы́ти, и҆лѝ а҆́біе здѣ̀ ѹ҆мрѝ ѿ меча̀ сегѡ̀, и҆ мо́ре сіѐ гро́бъ тѝ бꙋ́детъ.
Тогда̀ є҆ѵста́ѳій съ двꙋмѧ̀ ча́дами и҆зы́де и҆зъ̃ кораблѧ̀ рыда́ѧ.
навкли́ръ же ѻ҆́ный ѿпꙋсти́въ кора́бль ѿ бре́га, воздви́же вѣ̑трила и҆ ꙗ҆́сѧ пла́ваніѧ.
Ко́е та́мѡ бѣ̀ разлꙋче́ніе бг҃оꙋго́дномꙋ человѣ́кꙋ съ цѣломꙋ́дренною и҆ честно́ю сꙋпрꙋ́гою свое́ю!
Є҆ди́нъ дрꙋга́го провожда́ше сле́зными ѻ҆чесы̀, и҆ рыда́ющимъ се́рдцемъ.
Рыда́ше є҆ѵста́ѳій съ ча́ды стоѧ̀ на бре́зѣ, рыда́ше жена̀ є҆гѡ̀ въ кораблѝ ѿ мꙋ́жа ѿе́млема, и҆ въ невѣ́домꙋ странꙋ̀ ѿводи́ма.
и҆ кто̀ и҆зрече́тъ жалѣ́ніе, и҆ пла́чь, и҆ рыда́ніе и҆́хъ;
Стоѧ́въ же є҆ѵста́ѳій на бре́зѣ смотрѧ̀ за корабле́мъ, доне́лѣже можа́ше ѻ҆чесы̀ ѹ҆зрѣ́ти, та́же ꙗ҆́сѧ пꙋтѝ пла́чꙋщи, веды́й съ собо́ю недоро́слыхъ свои́хъ младе́нцєвъ.
и҆ пла́каше мꙋ́жъ ѡ҆ женѣ̀, ча̑да же пла́кахꙋ ѡ҆ ма́тери свое́й.
си́мъ то́чію бл҃же́ннаѧ та̀ дꙋша̀ ѹ҆тѣша́ше себѐ, ꙗ҆́кѡ такѡва́ѧ пріе́млетъ ѿ рꙋкѝ гдс̃ни, безъ̃ є҆гѡ́же во́ли ничто́же твори́тисѧ надъ̃ ни́мъ мо́жетъ: и҆ ꙗ҆́кѡ на сіѐ въ вѣ́рꙋ ст҃ꙋ́ю по́званъ бы́сть, да терпѣ́ніемъ тече́тъ къ нбс̃номꙋ ѻ҆ч҃ествꙋ.
Но не ѹ҆̀ коне́цъ печа́лемъ ѻ҆́нымъ, и҆́бо бѡ́лшіѧ па́че пе́рвыхъ нахожда́хꙋ, є҆щѐ не забы̀ пе́рвыѧ печа́ли, а҆ ѹ҆жѐ дрꙋгі̑ѧ приспѣва́хꙋ, є҆щѐ неда́внѡ разлꙋчи́сѧ сꙋпрꙋ́ги, а҆ ѹ҆жѐ и҆ ча̑дъ лише́ніе не за до́лгѡ.
Слꙋчи́сѧ бо на пꙋтѝ рѣка̀ наводне́нна и҆ быстра̀ ѕѣлѡ̀, на не́йже ни прево́за ни мо́ста не бѣ̀, но та́кѡ ѻ҆́нꙋю подоба́ше преходи́ти: и҆ не возмо́жнѡ бѣ̀, да ѻ҆́ба ча̑да вкꙋ́пѣ пренесе́тъ на ѻ҆́нъ по́лъ рѣкѝ тоѧ̀.
посади́въ ѹ҆̀бо є҆ди́но ѻ҆троча̀ на бре́зѣ, дрꙋго́е же взе́мъ на плєщѝ, чрезъ̃ рѣкꙋ̀ понесѐ.
и҆ прене́съ на ѻ҆́ный бре́гъ, посадѝ є҆̀: и҆ возвраща́шесѧ по дрꙋго́е ѻ҆троча̀, да и҆ то́е та́коже пренесе́тъ.
Бы́вшꙋ же є҆мꙋ̀ посредѣ̀ рѣкѝ, воскрича̀ ѻ҆́трокъ, и҆ возве́дъ ѻ҆́чи є҆ѵста́ѳій, ѹ҆зрѣ̀ льва̀ прите́кша, и҆́же похи́тивъ ѻ҆́трока побѣжѐ въ пꙋсты́ню, и҆ стоѧ́ше є҆ѵста́ѳій зрѧ̀, и҆ жа́лостнѣ вопіѧ̀, доне́лѣже не бѣ̀ ви́дѣти ѕвѣ́рѧ съ похище́ннымъ ѻ҆троча́темъ ѹ҆бѣга́юща.
возврати́сѧ же вспѧ́ть, и҆мѣ́ѧ наде́ждꙋ на дрꙋго́е ѻ҆троча̀: но є҆щѐ не ѡ҆пла́ка є҆ди́нагѡ ѻ҆троча́те, а҆ ѹ҆жѐ и҆ по дрꙋго́мъ пла́кати приспѣ̀.
возвраща́ющꙋсѧ бо є҆мꙋ̀ къ дрꙋго́мꙋ, сѐ внеза́пꙋ притечѐ во́лкъ, и҆ восхи́ти и҆ того̀ ѻ҆́трока, и҆ понесѐ въ лѣ́съ.
Та́кѡ бѣ̀ человѣ́къ ѻ҆́ный ѿвсю́дꙋ ѡ҆бъ̃ѧ́тъ печа́лми, посредѣ̀ рѣкѝ стоѧ̀, въ мо́ри сле́зъ свои́хъ ѹ҆топа́ше.
И҆ кто̀ и҆сповѣ́сть бѡлѣ́зни се́рдца є҆гѡ̀, рыда́ніе, и҆ пла́чь мно́гъ;
лиши́сѧ сꙋпрꙋ́ги цѣломꙋ́дренныѧ, є҆диновѣ́рныѧ, и҆ ст҃ы́ѧ, ꙗ҆́же въ печа́лехъ є҆го̀ ѹ҆тѣша́ше.
лиши́сѧ ча̑дъ, на ни́хже взира́ѧ, въ ско́рбехъ свои́хъ ѿра́дꙋ и҆мѣ́ѧше: и҆ чꙋ́до вои́стиннꙋ, ꙗ҆́кѡ человѣ́къ ѻ҆́нъ жи́въ ѡ҆ста́сѧ, ꙗ҆́кѡ не падѐ посредѣ̀ воды̀ и҆знемо́гши ѿ печа́ли.
крѣ́пкаѧ вы́шнѧгѡ десни́ца ѹ҆крѣплѧ́ше є҆го̀ въ терпѣ́ніи: и҆́же бо попꙋстѝ на него̀ таково́е и҆скꙋше́ніе, се́й подадѐ и҆ терпѣ́ніе.
И҆зше́дъ же и҆зъ̃ рѣкѝ, пла́ка на мѣ́стѣ то́мъ дово́лнѡ, и҆ и҆́де въ пꙋ́ть сѣ́тꙋѧ, є҆ди́нымъ то́чію ѹ҆тѣша́шесѧ ѹ҆тѣ́шителемъ бг҃омъ, въ него́же вѣ́рова, и҆ є҆гѡ́же ра́ди всѧ̑ сіѧ̑ но́ситъ.
не поропта́ же на бг҃а, и҆ не речѐ: на то́ ли мѧ̀ гдс̃и призва́лъ є҆сѝ въ твоѐ позна́ніе, да и҆ сꙋпрꙋ́ги и҆ ча̑дъ лишꙋ́сѧ; такова́ ли вѣ́ры по́льза, да всѣ́хъ человѣ̑къ бѣ́днѣйшій бꙋ́дꙋ; та́кѡ ли вѣ́рныхъ свои́хъ лю́биши, да расточе́ни дрꙋ́гъ ѿ дрꙋ́га поги́бнꙋтъ;
ничесо́же такова́гѡ речѐ првд̃ный ѻ҆́нъ и҆ терпѣли́вый мꙋ́жъ, но прекло́нь вы́ю, смире́ннѡ кла́нѧшесѧ бг҃ꙋ, бл҃годарѧ̀ ѡ҆ є҆гѡ̀ таково́мъ посѣще́ніи: ꙗ҆́кѡ рабѡ́въ свои́хъ не въ бл҃гополꙋ́чіи мірско́мъ, и҆ сꙋ́етной ѹ҆тѣ́хѣ, но въ ско́рбехъ и҆ бѣда́хъ и҆мѣ́ти хо́щетъ, да въ бꙋ́дꙋщій вѣ́къ вѣ́чною ра́достію и҆ весе́ліемъ и҆̀хъ ѹ҆тѣ́шитъ.
Бг҃ъ же всѧ̑ на по́льзꙋ творѧ́й, и҆ попꙋска́ѧй бѣды̑ на првд̃наго, не казнѧ̀, но и҆скꙋша́ѧ вѣ́рꙋ и҆ мꙋ́жество є҆гѡ̀, и҆ не въ печа́ли, но въ терпѣ́ніи є҆гѡ̀ до́брѣмъ бл҃говолѧ̀, и҆ бл҃годаре́ніѧ є҆гѡ̀ послꙋ́шаѧй, ꙗ҆́коже <#194> сохранѝ і҆ѡ́нꙋ во чре́вѣ ки́товѣ неврежде́нна, та́кѡ и҆ ѻ҆́ба ча̑да є҆гѡ̀ ѕвѣрмѝ похищє́ннаѧ, во ѹ҆ста́хъ ѕвѣри́ныхъ цѣ́лы и҆ здра́вы соблюдѐ.
и҆́бо ле́въ вы́ше преплы́въ рѣкꙋ̀ со ѻ҆троча́темъ, ни ма́лѡ вредѝ є҆го̀: є҆гда́ бо несѧ́ше є҆го̀ въ пꙋсты́ню, пастꙋсѝ ѹ҆зрѣ́ша, и҆ нача́ша гони́ти за ни́мъ крича́ще, ѻ҆́нъ же пове́ргъ ѻ҆троча̀ здра́во, са́мъ бѣжа̀.
та́кожде и҆ во́лка несꙋ́ща ѻ҆троча̀ жи́во ѹ҆зрѣ́ша ра́таи, кри́кнꙋша и҆ побѣго́ша за ни́мъ, ѻ҆́нъ же ѡ҆ста́ви и҆̀мъ ѻ҆троча̀ цѣ́ло.
пастꙋси́ же и҆ ра́таи и҆зъ̃ є҆ди́ныѧ ве́си бѣ́ша, и҆̀же пои́мше ѻ҆троча́та, воспита́ша и҆̀хъ.
Є҆ѵста́ѳій же сегѡ̀ не вѣ́дый, и҆дѧ́ше по пꙋтѝ, и҆ ѻ҆́во благодарѧ̀ бг҃а въ терпѣ́ніи, ѻ҆́во ѿ є҆стества̀ побѣжда́емый, пла́каше глаго́лѧ: ѹ҆вы̀ мнѣ̀ и҆ногда̀ бога́тꙋ бы́вшꙋ, ны́нѣ же ни́щꙋ и҆ ѡ҆бнаже́ннꙋ.
ѹ҆вы̀ мнѣ̀ и҆ногда̀ сла́вою цвѣтꙋ́щꙋ, ны́нѣ же безче́стнꙋ.
ѹ҆вы̀ мнѣ̀ и҆ногда̀ домови́тꙋ, ны́нѣ же стра́ннꙋ.
бѣ́хъ и҆ногда̀ ꙗ҆́кѡ дре́во многоли́ственно и҆ бл҃гоплодови́то, ны́нѣ же а҆́ки вѣ́твь и҆зсо́хшаѧ.
бѣ́хъ ѡ҆крꙋжа́емь въ домꙋ̀ дрꙋга́ми, на сто́гнахъ слꙋга́ми, въ бра́нехъ во́ѧми: ны́нѣ же ѡ҆ста́хсѧ є҆ди́нъ въ пꙋсто́мъ мѣ́стѣ.
Но не ѡ҆ста́ви мѧ̀ ты̀ гдс̃и.
не пре́зри мѧ̀ ты̀ всеви́дче.
не забꙋ́ди ты̀ всебл҃гі́й.
Гдс̃и не ѡ҆ста́ви мѧ̀ до конца̀.
помѧнꙋ́хъ гдс̃и словеса̀ твоѧ̑ на мѣ́стѣ, и҆дѣ́же ꙗ҆ви́лсѧ є҆сѝ мнѣ̀, речє́ннаѧ: пріѧ́ти и҆́маши напа̑сти ꙗ҆́кѡ і҆́ѡвъ.
но сѐ бо́лѣе і҆́ѡва на мнѣ̀ бы́сть: ѻ҆́нъ бо а҆́ще и҆ лиши́сѧ своегѡ̀ и҆мѣ́ніѧ и҆ че́сти, но на свое́мъ смѣ́тищи сѣдѧ́ше: а҆́зъ же на чꙋже́й странѣ̀ не вѣ́мъ, ка́мѡ ѡ҆бращꙋ́сѧ.
ѻ҆́нъ и҆мѣ̀ ѹ҆тѣша́ющыѧ є҆го̀ дрꙋ́ги: мое́ же ѹ҆тѣше́ніе, ча̑да моѧ̑ возлю́блєннаѧ, ди́віи ѕвѣ́ри въ пꙋсты́ни се́й ѿе́мше снѣдо́ша.
ѻ҆́нъ а҆́ще и҆ ча̑дъ свои́хъ лише́нъ бы́сть, но можа́ше ѿ сꙋпрꙋ́жницы и҆мѣ́ти, нѣ́кꙋю ѹ҆тѣ́хꙋ и҆ послꙋже́ніе: бл҃га́ѧ же моѧ̀ сожи́телница въ рꙋ́ки беззако́ннагѡ ва́рвара впадѐ, а҆́зъ же ꙗ҆́кѡ тро́сть въ пꙋсты́ни бꙋ́рею го́ркихъ мои́хъ печа́лей коле́блюсѧ.
Но не прогнѣ́вайсѧ на мѧ̀ гдс̃и, ѿ го́рести се́рдца глаго́лющаго: глаго́лю бо ꙗ҆́кѡ человѣ́къ, но ѡ҆ тебѣ̀ промы́сленникѣ мое́мъ, и҆ строи́телѣ пꙋтѝ моегѡ̀ ѹ҆твержда́юсѧ, и҆ на тебѐ надѣ́юсѧ, и҆ твое́ю любо́вію ꙗ҆́коже хла́дною росо́ю, и҆ дыха́ющимъ вѣ́тромъ ѻ҆́гнь печа́ли моеѧ̀ прохлажда́ю, и҆ твои́мъ жела́ніемъ а҆́ки сла́достію го́ресть бѣ́дъ мои́хъ ѹ҆слажда́ю.
Та́кѡ є҆мꙋ̀ съ воздыха́ніемъ и҆ слеза́ми глаго́лющꙋ, до́йде до нѣ́кіѧ ве́си нарица́емыѧ вади́сісъ, и҆ вше́дъ въ ню̀ нача̀ рабо́тати, нае́млющисѧ ѹ҆ ѡ҆бита́ющихъ та́мѡ, да ѿ трꙋда̀ своегѡ̀ пита́етсѧ.
и҆ рабо́таше дѣ́ло, є҆гѡ́же не зна́ѧше пре́жде, и҆ трꙋжда́шесѧ въ то́мъ, къ чесомꙋ̀ не ѡ҆бы́клъ є҆́сть.
По се́мъ ѹ҆молѝ мꙋже́й тоѧ̀ ве́си, да бꙋ́детъ стра́жъ жи́тѡмъ и҆́хъ, ѻ҆ни́ же є҆мꙋ̀ за то̀ да <#195> даю́тъ ѕѣлѡ̀ ма́лый нѣ́кій нае́мъ.
и҆ та́кѡ живѧ́ше въ то́й ве́си пѧтьна́десѧть лѣ́тъ, въ вели́цѣй нищетѣ̀ и҆ смире́ніи, въ трꙋдѣ́хъ же мно́гихъ, ѿ по́та бо лица̀ своегѡ̀ хлѣ́бъ ꙗ҆дѧ́ше.
Добродѣ́тєли же є҆гѡ̀ и҆ по́двиги кто̀ и҆сповѣ́сть; разсꙋди́ти всѧ́кій мо́жетъ, ꙗ҆́кѡ въ таково́й нищетѣ̀ и҆ стра́нничествѣ, ни въ чесо́мже и҆но́мъ та́кѡ ѹ҆пражнѧ́шесѧ, ꙗ҆́коже въ мл҃твахъ, постѣ́хъ, слеза́хъ, бдѣ́ніѧхъ и҆ воздыха́ніѧхъ серде́чныхъ, возносѧ̀ къ бг҃ꙋ ѻ҆́чи, рꙋ́цѣ же и҆ се́рдце, и҆ ѿ є҆гѡ̀ бл҃гоꙋтро́біѧ млс̃ти ѡ҆жида́ѧ.
Ча̑да же є҆гѡ̀ не дале́че во и҆но́й ве́си воспи́тана бы́ша, ѡ҆ ни́хже ѻ҆́нъ не вѣ́дѧще, но ни ѻ҆нѝ зна́ѧхꙋсѧ съ собо́ю, въ є҆ди́ной живꙋ́ще ве́си.
Жена́ же є҆гѡ̀ ꙗ҆́кѡ дрꙋга́ѧ и҆ногда̀ са́рра бы́сть храни́ма ѿ нечистоты̀ ѻ҆́нагѡ ва́рвара, и҆́же тогѡ́жде часа̀, є҆гда̀ ѿѧ̀ ю̀ ѹ҆ првд̃нагѡ мꙋ́жа, пораже́нъ бы́сть нѣ́кою болѣ́знію, и҆ доше́дъ въ свою̀ странꙋ̀, ѹ҆́мре, ѡ҆ста́вивъ чи́стꙋ плѣ́нницꙋ свою̀, не прикоснꙋ́сѧ є҆́й.
Та́кѡ бг҃ꙋ соблюда́ющꙋ вѣ́рнꙋю рабꙋ̀ свою̀, ꙗ҆́кѡ посредѣ̀ сѣ́ти сꙋ́щи не ѹ҆ловле́на бы́сть, но ꙗ҆́кѡ пти́ца и҆зба́висѧ ѿ сѣ́ти ловѧ́щихъ: сѣ́ть сокрꙋши́сѧ, а҆ ѻ҆на̀ и҆зба́влена бы́сть по́мощію вы́шнѧгѡ.
По ѹ҆ме́ртвіи же ѻ҆́нагѡ ва́рвара бы́сть свобо́дна честна́ѧ та̀ жена̀, и҆ живѧ́ше въ ми́рѣ свое́мъ безнапа́стнѡ, пи́щꙋ ѿ трꙋда̀ рꙋ́къ свои́хъ и҆мꙋ́щи.
Въ то̀ вре́мѧ воева́ша и҆ноплемє́нницы на ри́мъ, и҆ мно́гѡ па́костиша, побра́вше нѣ̑кіѧ гра́ды, и҆ плѣни́вше страны̑, тогда̀ траіа́нъ ца́рь въ вели́цѣй бы́сть печа́ли, и҆ помѧнꙋ́въ хра́браго своего̀ воево́дꙋ плакі́дꙋ, глаго́лаше: а҆́ще бы бы́лъ на́шъ плакі́да, не бы̀ вразѝ на́ши посмѣѧ́лисѧ на́мъ; стра́шенъ бо ѻ҆́нъ врагѡ́мъ бѧ́ше, и҆ и҆́мене є҆гѡ̀ боѧ́хꙋсѧ сꙋпоста́ты, хра́бръ бо и҆ бл҃гополꙋ́ченъ бѣ̀ въ бра́нехъ.
и҆ ѹ҆дивлѧ́шесѧ ца́рь со всѣ́ми болѧ́ры свои́ми чꙋ́днѣй се́й ве́щи, ꙗ҆́кѡ невѣ́домѡ ка́мѡ скры́сѧ плакі́да съ жено́ю и҆ ча́дами.
и҆ совѣ́товавъ посла́ти на взыска́ніе є҆гѡ̀ по всемꙋ̀ своемꙋ̀ ца́рствꙋ, речѐ къ предстоѧ́щымъ: А҆́ще кто̀ ѡ҆брѧ́щетъ мѝ плакі́дꙋ моего̀, вели́кою че́стію почтꙋ̀ того̀, и҆ да́ры мнѡ́гіѧ да́мъ є҆мꙋ̀.
и҆ сѐ два̀ до́бріи во́ини а҆нтіо́хъ и҆ а҆ка́кій, и҆̀же бѧ́хꙋ и҆ногда̀ вѣ́рніи дрꙋ́зи плакі́дѣ, и҆ живѧ́хꙋ во дворѣ̀ є҆гѡ̀, рѣ́ша: самодержа́вный царю̀, на́мъ повелѝ поиска́ти того̀ человѣ́ка, и҆́же всемꙋ̀ ри́мскомꙋ ца́рствꙋ є҆́сть ѕѣлѡ̀ бл҃гопотре́бенъ.
а҆́ще бы на́мъ и҆ въ концѣ́хъ землѝ и҆ска́ти є҆го̀, то̀ потщи́мсѧ всѧ́чески.
и҆ ѡ҆бра́довавсѧ ца́рь ѡ҆ и҆́хъ таково́мъ тща́ніи, посла̀ ты́ѧ а҆́біе.
Ѻ҆ни́ же и҆зше́дше проидо́ша не ма́лѡ стра́нъ, по градѡ́мъ и҆ ве́семъ и҆́щꙋще люби́магѡ своегѡ̀ воево́ды, и҆ всѧ́каго приклю́чшагосѧ вопроша́юще: не ви́дѣли ли гдѣ̀ такова́гѡ человѣ́ка.
Та́же прибли́жишасѧ къ ве́си то́й, въ не́йже є҆ѵста́ѳій житіѐ и҆мѣ̀.
Є҆ѵста́ѳій же тогда̀ стрежа́ше жи́та въ по́ли, и҆ ви́дѣвъ грѧдꙋ́щыѧ въ ве́сь во́ины, присмотрѣва́шесѧ и҆̀мъ, и҆ <#196> позна̀ и҆̀хъ и҆здале́ча, ꙗ҆́кѡ сꙋ́ть зна́еміи є҆гѡ̀, и҆ возра́довасѧ, и҆ ѿ ра́дости пла́каше, и҆ въ та́йнѣ срд̃ца своегѡ̀ къ бг҃ꙋ взыва́ше и҆зъ̃ глꙋбины̀ воздыха́ніѧ, и҆ стоѧ́ше при пꙋтѝ, и҆дѣ́же во́ини ті́и минꙋ́ти хотѧ́хꙋ.
Ѻ҆ни́ же доше́дше до є҆ѵста́ѳіа, и҆ привѣ́тствовавшесѧ ѻ҆бы́чнѡ, вопроша́хꙋ: ка́ѧ є҆́сть ве́сь, и҆ кто̀ є҆́ю госпо́дствꙋетъ; Та́же нача́ша вопроша́ти: нѣ́сть ли здѣ̀ стра́ннагѡ какова́гѡ человѣ́ка; є҆гѡ́же во́зрастъ тако́въ, и҆ лицѐ сицево́е, нарица́етсѧ плакі́да.
Є҆ѵста́ѳій же речѐ: ко́еѧ ра́ди вины̀ и҆́щете є҆гѡ̀; ѻ҆ни́ же рѣ́ша: дрꙋ́гъ на́мъ є҆́сть.
и҆ мно́гое вре́мѧ не ви́дѣхомъ є҆гѡ̀, и҆ не вѣ́мы, гдѣ̀ ѡ҆брѣта́етсѧ съ жено́ю и҆ двѣма̀ ча́дами: и҆ а҆́ще бы кто̀ ѡ҆ не́мъ возвѣсти́лъ на́мъ, то̀ мно́гѡ да́ли бы зла́та томꙋ̀ человѣ́кꙋ.
Є҆ѵста́ѳій же речѐ: не вѣ́мъ є҆гѡ̀, нижѐ слы́шахъ когда̀ плакі́дꙋ, ѻ҆ба́че госпо́діе моѝ молю́ вы, пріиди́те въ ве́сь, и҆ почі́йте въ мое́й хи́жинѣ: ви́ждꙋ бо ва́съ, и҆ ко́ни ва́ши ѹ҆трꙋди́вшыѧсѧ въ пꙋтѝ, почі́йте ѹ҆̀бо ѹ҆ менѐ: мо́щно же бꙋ́детъ ва́мъ и҆ ѡ҆ и҆ско́мѣмъ вопроша́ти кого̀ ѿ вѣ́дꙋщихъ.
ѻ҆ни́ же послꙋ́шавше є҆го̀, и҆до́ша съ ни́мъ въ ве́сь, не позна́ша же є҆гѡ̀, но ѻ҆́нъ до́брѣ позна̀ и҆́хъ, и҆ сле́зы ѿ ѻ҆че́съ є҆гѡ̀ и҆сходи́ти хотѧ́хꙋ, ѻ҆ба́че ѹ҆держава́ше и҆̀хъ, да не позна́нъ бꙋ́детъ.
Бы́сть же въ ве́си то́й нѣ́кій человѣ́къ до́бръ, ѹ҆ негѡ́же є҆ѵста́ѳій приста́нище своѐ и҆мѣ̀, къ томꙋ̀ человѣ́кꙋ введѐ ты́ѧ во́ины, молѧ̀ є҆го̀, да препоко́итъ и҆̀хъ, и҆ да предста́витъ и҆̀мъ ѹ҆чрежде́ніе: а҆́зъ, речѐ, и҆́мамъ тѝ возда́ти рабо́тою мое́ю всѐ, є҆́же на ѹ҆гоще́ніе и҆́хъ и҆ждиве́ши: сꙋ́ть бо мѝ, речѐ, зна́еміи.
Человѣ́къ же ѻ҆́нъ, и҆ ѿ бл҃гонра́віѧ своегѡ̀ подвиза́емый, и҆ ѿ є҆ѵста́ѳіева проше́ніѧ, и҆́же и҆мѣ̀ то̀ є҆мꙋ̀ рабо́тою возда́ти, ѹ҆чрежда́ше стра̑нныѧ ты́ѧ дово́лнѡ.
Є҆ѵста́ѳій же слꙋжа́ше и҆̀мъ, ноша̀ и҆ ста́вѧ предъ̃ ни́ми бра̑шна, и҆ прихожда́ше є҆мꙋ̀ на мы́сль пе́рвое є҆гѡ̀ житіѐ, є҆гда̀ та́кѡ є҆мꙋ̀ слꙋжа́хꙋ ті́и, и҆̀мже ѻ҆́нъ ны́нѣ слꙋ́житъ: и҆ побѣжда́шесѧ є҆стество́мъ къ слеза́мъ, ѻ҆ба́че кры́ѧшесѧ, да не позна́нъ бꙋ́детъ.
и҆ и҆зше́дши внѣ̀ хра́мины, ма́лѡ попла́кавъ и҆ ѡ҆те́ръ своѧ̑ сле́зы, а҆́біе вхожда́ше слꙋжа̀ а҆́ки ра́бъ и҆ поселѧни́нъ препро́стый.
Во́ини же ті́и смотрѧ́ще ча́стѡ на лицѐ є҆гѡ̀, нача́ша пома́лꙋ познава́ти, и҆ ти́хѡ глаго́лати къ себѣ̀: подо́бенъ є҆́сть человѣ́къ се́й плакі́дѣ, и҆лѝ вои́стиннꙋ са́мъ ѻ҆́нъ є҆́сть, и҆ глаго́лаша: по́мнимъ ѹ҆ плакі́да ꙗ҆́звꙋ на ші́и глꙋбо́кꙋ, ю́же пріѧ̀ на бра́ни: а҆́ще ѹ҆́бѡ є҆́сть на не́мъ та̀ ꙗ҆́зва, то̀ вои́стиннꙋ ѻ҆́нъ є҆́сть плакі́да.
и҆ ѹ҆ви́дѣвше тꙋ́ю ꙗ҆́звꙋ, а҆́біе вскочи́ша ѿ трапе́зы, и҆ припадо́ша къ нога́мъ є҆гѡ̀, и҆ воста́вше ѡ҆бъ̃ѧ́ша вы́ю є҆гѡ̀, и҆ пла́кахꙋсѧ мно́гѡ ѿ ра́дости, глаго́люще: ты̀ є҆сѝ плакі́да, є҆го́же мы̀ и҆́щемъ.
ты̀ є҆сѝ царе́въ люби́мецъ, по не́мже ца́рь толи́кое вре́мѧ печа́литсѧ.
ты̀ є҆сѝ ри́мскій воево́да, ѡ҆ не́мже всѝ во́ини сѣ́тꙋютъ.
Тогда̀ є҆ѵста́ѳій разꙋмѣ́въ, ꙗ҆́кѡ <#197> пришло̀ є҆́сть вре́мѧ то̀, въ не́же ѡ҆бѣща̀ є҆го̀ гдс̃ь въ пе́рвый є҆гѡ̀ са́нъ и҆ че́сть вчини́ти, речѐ: а҆́зъ є҆́смь бра́тіе, є҆гѡ́же вы̀ и҆́щете.
А҆́зъ є҆́смь плакі́да, съ ни́мже вы̀ мно́гое вре́мѧ вкꙋ́пѣ воева́сте.
а҆́зъ є҆́смь, и҆́же и҆ногда̀ ри́мꙋ сла́венъ, и҆ноплеме́нникѡмъ стра́шенъ, ва́мъ бл҃гопріѧ́тенъ: ны́нѣ же ни́щъ, и҆ непотре́бенъ и҆ незна́емый.
И҆ бы́сть междꙋ̀ и҆́ми ра́дость вели́ка, и҆ ѿ ра́дости сле́зы.
ѡ҆блеко́ша же є҆го̀ во ѻ҆де́жды многоцѣ́нны ꙗ҆́коже воево́дꙋ, и҆ вда́ша є҆мꙋ̀ царе́ва посла̑ніѧ, и҆ прилѣ́жнѡ є҆го̀ молѧ́хꙋ, да не ме́длѧ грѧде́тъ къ царю̀, ре́кше: сѐ вознесо́ша ро́гъ сво́й сꙋпоста́ты, и҆ нѣ́сть си́це хра́брагѡ ꙗ҆́коже ты̀, да побѣди́тъ и҆ разжене́тъ сꙋпроти̑вныѧ.
Господи́нъ же до́мꙋ тогѡ̀ и҆ всѝ є҆гѡ̀ дома́шніи слы́шаще сіѧ̑, дивлѧ́хꙋсѧ, и҆ и҆зꙋмѣва́хꙋсѧ.
и҆ про́йде вѣ́сть по все́й ве́си глаго́лющи: вели́къ человѣ́къ ѡ҆брѣ́тесѧ въ ве́си на́шей.
и҆ теча́хꙋ всѝ ꙗ҆́кѡ на вели́кое чꙋ́до, и҆ чꙋдѧ́хꙋсѧ зрѧ́ще є҆ѵста́ѳіа ѡ҆болче́нна воево́дски, и҆ почита́ема ѿ во́инѡвъ.
А҆нтіо́хъ же и҆ а҆ка́кій повѣ́даша лю́демъ дѣѧ̑ніѧ и҆ хра́брѡсти мꙋ́жа, и҆ сла́вꙋ, и҆ бл҃горо́дство.
ѻ҆ни́ же слы́шаще, ꙗ҆́кѡ є҆ѵста́ѳій тако́въ є҆́сть человѣ́къ, воево́да ри́мскій, дивлѧ́хꙋсѧ глаго́люще: ѽ ка́кѡ мꙋ́жъ се́й вели́кій, нае́мникъ на́мъ бы́сть! и҆ припа́дахꙋ къ немꙋ̀, и҆ покланѧ́хꙋсѧ глаго́люще: почто̀ на́мъ не повѣ́далъ є҆сѝ господи́не великоро́дства и҆ са́на твоегѡ̀; припа́даше же къ немꙋ̀ и҆ господи́нъ є҆гѡ̀, ѹ҆ негѡ́же пребыва́ніе и҆мѣ̀ є҆ѵста́ѳій: молѧ̀ да не прогнѣ́ваетсѧ на него̀, ꙗ҆́кѡ не почита́ше є҆гѡ̀.
и҆ всѝ мꙋ́жіе стыдѧ́хꙋсѧ ѡ҆ се́мъ, ꙗ҆́кѡ такова̀ человѣ́ка за нае́мника ѹ҆ себѐ ꙗ҆́кѡ раба̀ и҆мѣ́ѧхꙋ.
Всади́ша же во́ини є҆го̀ на конѧ̀, и҆ и҆дѧ́хꙋ возвраща́ющесѧ къ ри́мꙋ, вси́ же лю́діе ве́си тоѧ̀ проводи́ша и҆̀хъ дале́че съ че́стію мно́гою.
и҆дꙋ́ще же пꙋте́мъ и҆ бесѣ́дꙋюще, вопроша́хꙋ ѡ҆ женѣ̀ є҆гѡ̀ и҆ ча́дѣхъ.
ѻ҆́нъ же всѧ̑ слꙋчи́вшаѧсѧ є҆мꙋ̀ и҆сповѣ́да и҆̀мъ по рѧ́дꙋ, и҆ пла́кахꙋ слы́шаще такова́ѧ є҆гѡ̀ ѕлоключє́ніѧ.
та́кожде и҆ ѻ҆нѝ повѣ́дахꙋ, ка́кѡ ца́рь бы́сть въ ско́рби є҆гѡ̀ ра́ди.
не то́чію же ца́рь (глаго́лахꙋ), но и҆ ве́сь сѷгкли́тъ, и҆ во́и, скорбѧ́хꙋ твоегѡ̀ ра́ди премѣне́ніѧ:
и҆ та́кѡ бесѣ́дꙋюще, не по мно́гихъ дне́хъ доидо́ша въ ри́мъ, и҆ возвѣсти́ша во́ини ті́и царю̀, ꙗ҆́кѡ ѡ҆брѣто́ша плакі́дꙋ, и҆ ка́кѡ є҆гѡ̀ ѡ҆брѣто́ша.
ца́рь же пріѧ̀ є҆гѡ̀ че́стнѡ со всѣ́ми велмо́жами свои́ми, и҆ ра́достенъ бы́въ ѡ҆блобыза̀ є҆го̀.
и҆ вопроша́ше, ка́кѡ и҆зы́де и҆зъ̃ до́мꙋ своегѡ̀; и҆ что̀ бы́сть є҆мꙋ̀; ѻ҆́нъ же и҆сповѣ́да всѧ̑ прилꙋчи́вшаѧсѧ, и҆ ѡ҆ женѣ̀, и҆ ѡ҆ ча́дѣхъ, и҆ всѝ послꙋ́шающе ѹ҆милѧ́хꙋсѧ.
Тогда̀ ца́рь поста́ви є҆ѵста́ѳіа въ пе́рвый є҆гѡ̀ чи́нъ, и҆ мнѡ́гаѧ дадѐ є҆мꙋ̀ и҆мѣ̑ніѧ бѡ́лшаѧ пе́рвыхъ, и҆ ѡ҆богатѝ є҆го̀ ѕѣлѡ̀, и҆ ве́сь ри́мъ возра́довасѧ ѡ҆ є҆ѵста́ѳіевѣ прише́ствіи.
Та́же молѝ є҆го̀ ца́рь, да и҆́детъ на бра́нь проти́вꙋ ва́рварѡвъ, и҆ пе́рвою свое́ю хра́бростію защи́титъ ри́мъ ѿ и҆́хъ<#198> наше́ствіѧ, и҆ ѿмсти́тъ плѣне́ніе градѡ́въ нѣ́кіихъ.
Є҆ѵста́ѳій же собра́въ всѣ́хъ во́євъ, и҆ ви́дѣвъ, ꙗ҆́кѡ не дово́лно є҆́сть къ таково́й бра́ни, глаго́ла царю̀: да по́слетъ писа̑ніѧ во всѧ̀ предѣ́лы своѧ̀, и҆ соберꙋ́тъ ѿ градѡ́въ же и҆ ве́сей ѹ҆гѡ́дныѧ ю́ношы, и҆ по́слютъ и҆̀хъ въ ри́мъ на ѹ҆чине́ніе во́инское: и҆ бы́сть та́кѡ.
Посла̀ ца́рь писа̑ніѧ, и҆ со́брано бы́сть въ ри́мъ мно́жество люде́й млады́хъ и҆ крѣ́пкихъ, къ бра́ни бл҃гопотре́бныхъ, междꙋ̀ и҆ны́ми преведе́ни бы́ша та́може и҆ два̀ сы́на є҆гѡ̀, а҆га́пій и҆ ѳеопі́стъ: ѹ҆же́ бо возмꙋжа́ли, и҆ лице́мъ бы́ша кра́сны, и҆ тѣ́ломъ вели́ки, и҆ си́лою крѣ́пки.
Сі́и є҆гда̀ приведе́ни бы́ша въ ри́мъ, ѹ҆зрѣ́въ и҆̀хъ воево́да, возлюбѝ ѕѣлѡ̀: са́мо бо є҆стество̀ ѻ҆те́ческое къ ча́дѡмъ свои́мъ прекланѧ́шесѧ, и҆ любо́вію къ ни́мъ побѣжда́шесѧ, и҆ не вѣ́дый є҆ѵста́ѳій, ꙗ҆́кѡ ті́и сꙋ́ть є҆гѡ̀ є҆сте́ственнаѧ ча̑да, ѻ҆ба́че ꙗ҆́кѡ ча̑да своѧ̑ любѧ́ше ты́ѧ, и҆ всегда̀ є҆мꙋ̀ предстоѧ́ша, и҆ трапе́зы своеѧ̀ ѹ҆ча́стники съ собо́ю творѧ́ше ѻ҆́ныѧ, ѹ҆го́дни бо є҆мꙋ̀ бы́ша.
По́йде же є҆ѵста́ѳій на бра́нь, и҆ воева́въ съ ва́рвары, си́лою хрс̃то́вою побѣдѝ и҆̀хъ.
И҆ не то́чію гра́ды и҆ страны̑ плѣнє́нныѧ свободѝ, но и҆ ва́рварскꙋю зе́млю всю̀ повоева̀, и҆ плѣнѝ, и҆ во́євъ и҆́хъ до конца̀ поразѝ.
И҆ ѡ҆ гдс̃ѣ свое́мъ показа̀ хра́брость и҆ побѣ́дꙋ бо́лшꙋю па́че пе́рвыхъ побѣ́дъ, ꙗ҆̀же пока́зоваше пре́жде.
Сконча́вшейсѧ же бра́ни, и҆ ѹ҆жѐ ми́рнѡ возвраща́ющꙋсѧ є҆ѵста́ѳію во своѧ̀, слꙋчи́сѧ є҆мꙋ̀ бы́ти въ нѣ́коей ве́си, и҆мꙋ́щей положе́ніе своѐ на мѣ́стѣ кра́снѣмъ при рѣцѣ̀: та́мѡ ѹ҆́бѡ, ꙗ҆́кѡ мѣ́сто бѣ̀ ѹ҆го́дно ко ѹ҆покое́нію, препочѝ є҆ѵста́ѳій съ во́и свои́ми трѝ днѝ, бг҃ꙋ та́кѡ и҆зволѧ́ющꙋ, да вѣ́рнаго раба̀ своего̀ въ позна́ніе съ жено́ю и҆ ча́дами приведе́тъ, и҆ расточє́нныѧ собере́тъ во є҆ди́но: и҆́бо жена̀ є҆гѡ̀ въ то́й ве́си живѧ́ше, и҆мꙋ́щи вертогра́дъ, и҆ ѿ негѡ̀ пи́щꙋ себѣ̀ со мно́гимъ трꙋдо́мъ стѧжава́ющи.
И҆ по бж҃ію смотре́нію, а҆га́пій и҆ ѳеопі́стъ ничто́же вѣ́дꙋще ѡ҆ ма́тери свое́й, поста́виша кꙋ́щꙋ свою̀ при вертогра́дѣ є҆ѧ̀: ѿ є҆ди́ныѧ бо сꙋ́ще ве́си, є҆ди́нꙋ и҆мѣ́ли кꙋ́щꙋ, є҆ди́но сожи́тіе, є҆ди́нꙋ любо́вь, ꙗ҆́кѡ є҆диноꙋтро́бніи бра́тіѧ.
не вѣ́дѧхꙋ же, ꙗ҆́кѡ бра́тіѧ сꙋ́ть себѣ̀, и҆ не вѣ́дꙋще бра́тства своегѡ̀, бра́тскꙋю любо́вь храни́ша.
вкꙋ́пѣ ѹ҆̀бо при вертогра́дѣ роди́вшіѧ и҆̀хъ, возлего́ша почи́ти, и҆дѣ́же не дале́че и҆ воево́ды и҆́хъ ста́нъ бѧ́ше.
Во є҆ди́нъ же ѿ дне́й тѣ́хъ дѣ́лающи нѣ́что ма́терь и҆́хъ въ вертогра́дѣ свое́мъ въ ча́съ полꙋ́денный, слы́ша бесѣ́дꙋ бли́зъ почива́ющихъ въ кꙋ́щи свои́хъ во́инѡвъ.
Бесѣ́да же и҆́хъ бѣ̀ сицева́ѧ: вопроша́ше дрꙋ́гъ дрꙋ́га, ко́егѡ кто̀ ро́да є҆́сть; и҆ речѐ старѣ́йшій: а҆́зъ ма́лѡ по́мню, ꙗ҆́кѡ ѻ҆те́цъ мо́й воево́да бѣ̀ въ ри́мѣ, и҆ не вѣ́мъ, чесѡ̀ ра́ди и҆зы́де и҆зъ̃ ри́ма съ ма́терію, пое́мше менѐ и҆ дрꙋга́го бра́та моего̀ юнѣ́йшаго: два́ бо на́съ ѹ҆ ни́хъ бы́ша: и҆ и҆до́хомъ до мо́рѧ, и҆ внидо́хомъ въ кора́бль.
<#199>
въ мо́ри же пла́вавше, є҆гда̀ приста́хомъ ко бре́гꙋ, и҆зы́де ѻ҆те́цъ и҆зъ̃ кораблѧ̀, и҆ съ ни́мъ а҆́зъ съ бра́томъ мои́мъ, ма́терь же не вѣ́мъ почто̀, въ кораблѝ ѡ҆ста́сѧ.
Сіѐ то́чію по́мню, ꙗ҆́кѡ ѕѣлѡ̀ ѻ҆те́цъ мо́й пла́каше ѡ҆ не́й, и҆ мы̀ пла́кахомъ, и҆ по́йде пꙋте́мъ пла́часѧ.
Є҆гда́ же пріидо́хомъ на рѣкꙋ̀, ѻ҆те́цъ посади́ мѧ на бре́зѣ, юнѣ́йшаго же бра́та взе́мъ на ра́мꙋ, понесѐ на ѻ҆́нъ по́лъ рѣкѝ.
и҆ є҆гда̀ прене́съ є҆го̀, по менѐ и҆дѧ́ше, ле́въ прите́къ похи́ти мѧ̀, и҆ несѐ въ пꙋсты́ню, пастꙋси́ же ѿѧ́ша мѧ̀ ѹ҆ негѡ̀, и҆ воспи́танъ є҆́смь въ то́й ве́си, въ не́йже ты̀ вѣ́си.
Тогда̀ юнѣ́йшій воста́въ ско́рѡ, нападѐ на вы́ю є҆гѡ̀ съ ра́достію и҆ пла́чемъ, глаго́лѧ: вои́стиннꙋ ты̀ мо́й бра́тъ є҆сѝ, и҆́бо а҆́зъ всѐ то̀ по́мню, є҆́же гл҃го́леши, и҆ ви́дѣхъ ѻ҆чесы̀, є҆гда̀ похи́тилъ тѧ̀ ле́въ, и҆ менѐ тогѡ́же часа̀ похи́ти во́лкъ, но земледѣ́лцы мѧ̀ ѿѧ́ша.
И҆ позна́вшесѧ ѻ҆́ба бра́та съ собо́ю, ра́довахꙋсѧ ѕѣлѡ̀, ѡ҆бъ̃е́млюще и҆ лобыза́юще дрꙋгъ_дрꙋ́га, и҆ пла́кахꙋ дово́лнѡ ѿ ра́дости.
Ма́терь же и҆́хъ слы́шащи бесѣ́дꙋ и҆́хъ, ѹ҆дивлѧ́шесѧ, и҆ ѻ҆́чи съ воздыха́ніемъ и҆ слеза́ми къ нб҃сѝ возвожда́ше: позна́ бо, ꙗ҆́кѡ и҆́стиннаѧ сꙋ́ть ча̑да є҆ѧ̀, и҆ се́рдце є҆ѧ̀ ѿ го́рькихъ печа́лей прохлажда́шесѧ.
Ѻ҆ба́че мꙋ́дра жена̀ сꙋ́щи, не смѣ̀ безъ̃ достовѣ́рнѣйшагѡ и҆звѣ́стіѧ и҆̀мъ ꙗ҆ви́тисѧ: ни́ща бо бѣ̀, и҆ хꙋды́ми ри́зами ѡ҆дѣ́ѧна, ѻ҆ни́ же во́ини и҆зрѧ́дніи и҆ честні́и.
И҆ ѹ҆мы́сли и҆тѝ къ воево́дѣ, просѧ́щи, да при є҆гѡ̀ во́ехъ возмо́жетъ въ ри́мъ возврати́тисѧ, и҆ та́мѡ лꙋ́чше сынѡ́мъ свои́мъ въ позна́ніе пріитѝ, и҆ ѡ҆ мꙋ́жѣ свое́мъ и҆звѣсти́тисѧ, є҆́сть ли нѣ́гдѣ жи́въ, и҆лѝ нѝ.
Ше́дши же ста̀ предъ̃ воево́дою, и҆ поклони́сѧ є҆мꙋ̀ глаго́лющи: молю́сѧ тѝ господи́не, повели́ мѧ при свое́мъ полкꙋ̀ въ ри́мъ довестѝ: а҆́зъ бо є҆́смь ри́млѧнынѧ, и҆ плѣне́на бы́хъ ва́рвары въ зе́млю ню̀, сѐ ѹ҆жѐ шестьнадесѧ́тое лѣ́то: и҆ ны́нѣ свобо́дна сꙋ́щи, скита́юсѧ на чꙋжде́й странѣ̀, и҆ страждꙋ̀ нищетꙋ̀ вели́кꙋ.
Є҆ѵста́ѳій же бл҃госе́рденъ сы́й, а҆́біе преклони́сѧ къ є҆ѧ̀ моле́нію, и҆ повелѣ̀ є҆́й безбоѧ́зненнѡ къ своемꙋ̀ возвраща́тисѧ ѻ҆те́чествꙋ.
Тогда̀ жена̀ стоѧ́щи и҆ смотрѧ́щи на воево́дꙋ, позна̀ до́брѣ, ꙗ҆́кѡ мꙋ́жъ є҆ѧ̀ є҆́сть, и҆ ѹ҆ди́влшисѧ стоѧ́ше а҆́ки забы́сѧ: Є҆ѵста́ѳій же не позна̀ жены̀ своеѧ̀.
Ѻ҆на́ же неча́ѧннѡ ѡ҆брѣ́тши ра́дость по ра́дости, ꙗ҆́кѡ и҆ногда̀ печа́ль бѣ̀ по печа́ли, внꙋ́трь къ бг҃ꙋ съ воздыха́ніемъ вопіѧ́ше, и҆ боѧ́шесѧ рещѝ мꙋ́жꙋ своемꙋ̀, ꙗ҆́кѡ жена̀ є҆гѡ̀ є҆́сть: ви́дѧше бо є҆го̀ въ сла́вѣ вели́цѣй, и҆ лице́мъ стра́шна, и҆ предстоѧ́щихъ є҆мꙋ̀ мно́жество, ѻ҆на́ же ꙗ҆́кѡ є҆ди́на ѿ бѣ́днѣйшихъ си́ротъ бѣ̀, и҆ ѿи́де ѿ ѻ҆че́съ є҆гѡ̀ тогда̀, молѧ́щисѧ влд̃цѣ бг҃ꙋ своемꙋ̀, да са́мъ ѻ҆́нъ ѹ҆стро́итъ то̀, да бы позна́на была̀ ѿ мꙋ́жа и҆ ча̑дъ свои́хъ.
Ѹ҆смотрѣ́ же бл҃гополꙋ́чнѣйшее вре́мѧ, па́ки вни́де, и҆ ста̀ предъ̃ воево́дою.
ѻ҆́нъ же воззрѣ́въ на ню̀ речѐ: что̀ є҆щѐ про́сиши ѹ҆ менѐ ста́рице;
ѻ҆на́ же покло́ншисѧ є҆мꙋ̀ до землѝ речѐ: молю́сѧ тѝ господи́не мо́й, не прогнѣ́вайсѧ на мѧ̀ рабꙋ̀ твою̀, ꙗ҆́кѡ и҆́мамъ ѡ҆ нѣ́коей <#200> ве́щи вопроси́ти твоѐ бл҃горо́діе, ты́ же господи́не мо́й, бꙋ́ди терпѣли́въ, послꙋ́шаѧ рабꙋ̀ твою̀.
Ѻ҆́нъ же речѐ є҆́й: до́брѣ, гл҃го́ли.
Ѻ҆на́ же нача̀ глаго́лати: не ты́ ли є҆сѝ плакі́да, во ст҃о́мъ кр҃ще́ніи нарече́нный є҆ѵста́ѳій; не ты́ ли ви́дѣлъ є҆сѝ хрс̃та̀ на крс̃тѣ̀ посредѣ̀ рогѡ́въ є҆ле́нихъ; не ты́ ли бг҃а ра́ди и҆зше́лъ є҆сѝ и҆зъ̃ ри́ма съ жено́ю и҆ двѣма̀ ча́дами а҆га́піемъ и҆ ѳеопі́стомъ;
и҆ ѿѧ̀ ѹ҆ тебѐ ва́рваръ въ кораблѝ женꙋ̀ твою̀, ꙗ҆́же а҆́зъ є҆́смь вои́стиннꙋ, свидѣ́тель мѝ на нб҃сѝ вѣ́ренъ са́мъ хрс̃то́съ гдс̃ь, є҆гѡ́же ра́ди мнѡ́гіѧ подъ̃ѧ́хъ напа̑сти, ꙗ҆́кѡ жена̀ твоѧ̀ є҆́смь, и҆ сохранена̀ блгд̃тію хрс̃то́вою ѿ скве́рны: ва́рваръ бо ѻ҆́ный тогѡ́же часа̀ бж҃іимъ казне́нъ гнѣ́вомъ поги́бе, а҆́зъ же чиста̀ ѿ негѡ̀ ѡ҆ста́хсѧ, и҆ ны́нѣ въ бѣда́хъ скита́юсѧ.
Сіѧ̑ слы́шавъ є҆ѵста́ѳій, а҆́ки ѿ сна̀ возбꙋди́сѧ.
и҆ позна́въ а҆́біе женꙋ̀ свою̀, воста̀ къ не́й, и҆ ѡ҆бъ̃е́мшесѧ ѻ҆́ба, пла́каша дово́лнѡ ѿ ра́дости вели́кіѧ.
и҆ глаго́ла є҆ѵста́ѳій: хва́лимъ и҆ бл҃годари́мъ хрс̃та̀ сп҃са на́шего, и҆́же не ѿста́ви ѿ на́съ ми́лости своеѧ̀, но ꙗ҆́коже ѡ҆бѣща̀ по ско́рбехъ ѹ҆тѣ́шити на́съ, та́кѡ и҆ сотворѝ.
и҆ мно́гѡ ра́дꙋющесѧ и҆ пла́чꙋще, бл҃годари́ша бг҃а.
По се́мъ є҆гда̀ преста̀ є҆ѵста́ѳій ѿ пла́ча, вопросѝ є҆го̀ жена̀: гдѣ́ же сꙋ́ть ча̑да на́ша; ѻ҆́нъ же воздохнꙋ́въ и҆зъ̃ глꙋбины̀ серде́чныѧ, речѐ: ѕвѣ́ри снѣдо́ша и҆̀хъ.
Жена́ же речѐ: не скорбѝ господи́не мо́й, ꙗ҆́коже дадѐ бг҃ъ на́мъ неча́ѧннѡ ѡ҆брѣстѝ дрꙋгъ_дрꙋ́га, та́кѡ да́стъ ѡ҆брѣстѝ на́мъ и҆ ча̑да на́шѧ.
ѻ҆́нъ же речѐ: не рѣ́хъ ли тѝ, ꙗ҆́кѡ ѕвѣрмѝ и҆зъ̃ѧде́ни сꙋ́ть.
Ѻ҆на́ же нача̀ повѣ́дати є҆мꙋ̀ всѧ̑, ꙗ҆̀же вчера̀ въ вертогра́дѣ свое́мъ рабо́тающи, слы́ша ѿ двои́хъ во́инѡвъ є҆гѡ̀ съ собо́ю бесѣ́дꙋющихъ, и҆ позна̀, ꙗ҆́кѡ сы́ны и҆́хъ сꙋ́ть.
Є҆ѵста́ѳій же а҆́біе призва́въ ѻ҆́ныхъ, вопросѝ: ко́егѡ ро́да є҆стѐ; гдѣ̀ рожде́ни; гдѣ́ же воспи́тани;
и҆ нача̀ старѣ́йшій повѣ́дати: мы̀, влады́ко на́шъ, ма́лы ѕѣлѡ̀ ѡ҆ста́хомсѧ ѿ роди́телей на́шихъ, и҆ ма́лѡ что̀ по́мнимъ, ѻ҆ба́че по́мнимъ сіѐ, ꙗ҆́кѡ ѻ҆те́цъ на́шъ бѣ̀ воево́да ри́мскій, ꙗ҆́коже и҆ твоѐ вели́чество, и҆ не вѣ́мы, что̀ бы́сть ѻ҆тцꙋ̀ на́шемꙋ, ꙗ҆́кѡ и҆зы́де и҆зъ̃ ри́ма но́щію съ ма́терію на́шею и҆ съ на́ми двои́ми, и҆ є҆гда̀ преплы́хомъ въ кораблѝ мо́ре, ѡ҆ста́сѧ та́мѡ ма́терь на́ша, не вѣ́мы почто̀.
Ѻ҆те́цъ же на́шъ пла́чꙋщисѧ ѡ҆ не́й, пріи́де съ на́ми къ рѣцѣ̀ нѣ́коей, чрезъ̃ ню́же на́съ по є҆ди́номꙋ преносѧ́щи, є҆гда̀ са́мъ средѣ̀ рѣкѝ бѧ́ше, ѕвѣ́ріе на́съ похи́тиша, менѐ ле́въ, сего́ же во́лкъ: и҆ ѻ҆́ба ѿ снѣде́ніѧ ѕвѣри́на сохране́ни є҆смы̀, мене́ бо пастꙋсѝ, сего́ же земледѣ́лцы ѿъ̃е́мше воскорми́ша.
То̀ слы́шащи є҆ѵста́ѳій съ жено́ю свое́ю, позна́ша ча̑да своѧ̑: и҆ напа́дше на вы́и и҆́хъ, пла́каша на до́лзѣ: и҆ бы́сть ра́дость вели́ка въ станꙋ̀ воево́дскомъ, ꙗ҆́коже и҆ногда̀ во є҆гѵ́птѣ, є҆гда̀ познава́шесѧ і҆ѡ́сифъ съ бра́тіею свое́ю.
<#201>
Про́йде же слꙋ́хъ по всѣ́мъ полка́мъ ѡ҆ ѡ҆брѣ́теніи жены̀ и҆ ча̑дъ воево́ды и҆́хъ, и҆ стеко́шасѧ всѝ ра́дꙋющесѧ, и҆ бы́сть ликова́ніе мно́гое всемꙋ̀ во́инствꙋ, не та́кѡ бо ра́довахꙋсѧ ѡ҆ побѣ́дѣ, ꙗ҆́коже ѡ҆ се́й ра́дости.
Та́кѡ бг҃ъ ѹ҆тѣ́шилъ вѣ̑рныѧ рабы̑ своѧ̑, ѻ҆́нъ бо мертви́тъ и҆ живи́тъ, ѹ҆бо́житъ и҆ богати́тъ, низво́дитъ въ скѡ́рби, и҆ возво́дитъ къ ра́дости и҆ весе́лію.
И҆ можа́ше тогда̀ є҆ѵста́ѳій съ дв҃домъ гл҃ати: Пріиди́те ѹ҆слы́шите, и҆ повѣ́мъ ва́мъ всѝ боѧ́щіисѧ бг҃а, є҆ли̑ка сотворѝ дꙋшѝ мое́й.
Помѧнꙋ̀ сотвори́ти ми́лость со мно́ю, десни́ца гдс̃нѧ вознесе́ мѧ: десни́ца гдс̃нѧ сотворѝ си́лꙋ.
Є҆гда́ же є҆ѵста́ѳій возвраща́шесѧ ѿ бра́ни, ра́дꙋѧсѧ ѡ҆ двою̀, и҆ ѡ҆ побѣ́дѣ и҆ ѡ҆ ѡ҆брѣ́теніи жены̀ и҆ ча̑дъ: тогда̀ пре́жде прише́ствіѧ є҆гѡ̀ въ ри́мъ, ѹ҆́мре траіа́нъ ца́рь, а҆ вмѣ́стѡ є҆гѡ̀ наста̀ а҆дріа́нъ, и҆́же бѣ̀ ѕо́лъ ѕѣлѡ̀, ненави́дѧй дѡ́брыѧ, и҆ гонѧ́й бл҃гочести̑выѧ.
Вше́дшꙋ же є҆ѵста́ѳію во гра́дъ съ торжество́мъ вели́кимъ, ꙗ҆́коже ѻ҆бы́чнѡ бѧ́ше ри́мскимъ воево́дамъ, и҆ ведꙋ́щꙋ съ собо́ю мно́гѡ плѣ́нникѡвъ, и҆ безъ̃ числа̀ драги́хъ коры́стей, пріѧ́тъ бы́сть ѿ царѧ̀ и҆ ѿ всѣ́хъ ри́млѧнъ чс̃тнѡ, и҆ просла́висѧ хра́брость є҆гѡ̀ па́че пе́рвыѧ, и҆ бо́лѣе ѿ всѣ́хъ бѧ́ше почита́емый не́же пре́жде.
ѻ҆ба́че бг҃ъ, и҆́же не хо́щетъ, да рабѝ є҆гѡ̀ въ мі́рѣ се́мъ превра́тномъ и҆ непостоѧ́нномъ почита́еми и҆ сла́вими до конца̀ бꙋ́дꙋтъ сꙋ́етнымъ и҆ вре́меннымъ почита́ніемъ, и҆̀мже ѹ҆гото́ва вѣ́чнꙋю непремѣ́ннꙋю на нб҃сѣ́хъ че́сть и҆ сла́вꙋ:
то́й є҆ѵста́ѳію приведе́ніемъ въ пе́рвꙋю є҆гѡ̀ че́сть то́чію ѿра́дꙋ печа́лемъ є҆гѡ̀ сотворѝ, пꙋ́ть же є҆мꙋ̀ къ нб҃сѝ мч҃нческій прозна́меноваше: и҆́бо не задо́лгѡ па́ки ѡ҆братѝ на безче́стіе и҆ ско́рбь, є҆́же ѻ҆́нъ сла́дцѣ хрс̃та̀ ра́ди претерпѣ̀.
Ѕлочести́вый бо а҆дріа́нъ восхотѣ̀ сотвори́ти же́ртвꙋ бѣсѡ́мъ, кла́нѧѧсѧ и҆̀мъ за побѣ́дꙋ надъ̃ врага́ми.
и҆ входѧ́щꙋ є҆мꙋ̀ въ хра́мъ і҆́дѡлскій съ велмо́жи свои́ми, є҆ѵста́ѳій не вни́де, но ѡ҆ста́сѧ внѣ̀.
вопроси́ же є҆го̀ ца́рь: почто̀ не хо́щеши съ на́ми въ хра́мъ вни́ти, и҆ богѡ́мъ поклони́тисѧ; тебѣ̀ (речѐ) пре́жде подоба́етъ бл҃годаре́ніе богѡ́мъ возда́ти, ꙗ҆́кѡ не то́чію въ бра́ни сохрани́ша тѧ̀ цѣ́ла и҆ здра́ва, и҆ побѣ́дꙋ на врагѝ тебѣ̀ пода́ша, но и҆ женꙋ̀ твою̀ и҆ ча̑да твоѧ̑ тебѣ̀ ꙗ҆ви́ша.
Ѿвѣща̀ є҆ѵста́ѳій: хрс̃тіа́нинъ є҆́смь, и҆ є҆ди́наго бг҃а моего̀ і҆и҃са хрс̃та̀ зна́ю, и҆ того̀ чтꙋ̀ и҆ бл҃годарю̀, и҆ покланѧ́юсѧ є҆мꙋ̀, ѻ҆́нъ бо всѧ̑ сіѧ̀, и҆ здра́віе, и҆ побѣ́дꙋ, и҆ сꙋпрꙋ́гꙋ мою̀, и҆ ча̑да мнѣ̀ дарова̀: і҆́дѡлѡмъ же глꙋхи́мъ, нѣмы́мъ, не дѣ́йственнымъ, не и҆́мамъ поклони́тисѧ: и҆ ѿи́де въ до́мъ сво́й є҆ѵста́ѳій.
Ца́рь же разгнѣ́вавсѧ на него̀, мы́слѧше ко́имъ бы ѻ҆́бразомъ ѿмсти́ти є҆мꙋ̀ безче́стіе богѡ́въ свои́хъ.
и҆ пе́рвѣе по ма́лѣмъ вре́мени ѿѧ̀ ѿ негѡ̀ са́нъ є҆гѡ̀, и҆ ꙗ҆́кѡ про́стꙋ человѣ́кꙋ повелѣ̀ предстоѧ́ти себѣ̀, та́же съ жено́ю и҆ ча́ды предста́вивши, ѹ҆вѣщава́ше и҆̀хъ словесы̀, да пожрꙋ́тъ і҆́дѡлѡмъ: не возмо́гши же <#202> и҆́хъ ѿврати́ти ѿ хрс̃та̀, ѡ҆сꙋдѝ на снѣде́ніе ѕвѣрє́мъ: и҆ и҆дѧ́ше ст҃ы́й є҆ѵста́ѳій сла́вный ѻ҆́ный и҆ хра́брый во́инъ на позо́рищное мѣ́сто съ свои́ми ѡ҆сꙋжде́нъ на сме́рть, и҆ не стыдѧ́шесѧ такова́гѡ безче́стіѧ, ни боѧ́шесѧ сме́рти хрс̃та̀ ра́ди, є҆мꙋ́же ꙗ҆́кѡ нача̀ вѣ́рнѡ рабо́тати, та́кѡ и҆ скончава́ше вѣ́рнѡ ѹ҆се́рдное и҆ бл҃гоꙋго́дное слꙋже́ніе своѐ, и҆сповѣ́дꙋѧ и҆́мѧ є҆гѡ̀ ст҃о́е предъ̃ всѣ́ми ꙗ҆́снѡ.
ѹ҆твержда́ше же сꙋпрꙋ́гꙋ свою̀ чс̃тнꙋ́ю, и҆ люби́маѧ ча̑да, да не ѹ҆страша́тсѧ сме́рти за всѣ́хъ жизнода́вца гдс̃а, та́кожде и҆ ѻ҆нѝ междꙋ̀ собо́ю, є҆ди́нъ дрꙋга́го ѹ҆крѣплѧ́юще словесы̀ и҆ наде́ждою бꙋ́дꙋщагѡ воздаѧ́ніѧ, и҆дѧ́хꙋ а҆́ки на пи́ръ на сме́рть.
И҆спꙋще́ни же бы́ша на ни́хъ ѕвѣ́ри, и҆ не вреди́ша и҆́хъ: кото́рый бо ѕвѣ́рь къ ни́мъ притечѐ, а҆́біе покло́ншисѧ вспѧ́ть возвраща́шесѧ.
ѕвѣ́ріе ꙗ҆́рость свою̀ ѹ҆кроча́хꙋ, ца́рь же мно́жае ꙗ҆рѧ́шесѧ: и҆ повелѣ̀ и҆̀хъ ве́дше съ позо́рища воврещѝ въ темни́цꙋ.
на ѹ҆́тріе же повелѣ̀ разжещѝ вола̀ мѣ́дѧнаго, и҆ воврещѝ во ѻ҆́ный ст҃а́го є҆ѵста́ѳіа съ жено́ю и҆ двои́ми сына́ми.
и҆ бы́сть ст҃ы́мъ мч҃нкамъ разже́нный то́й во́лъ, ꙗ҆́кѡ ѻ҆трокѡ́мъ пе́щь халде́йскаѧ росо́ю прохлажде́ннаѧ: и҆ въ то́мъ волѣ̀ помоли́вшесѧ ст҃і́и мч҃нцы, дш҃ы своѧ̑ ст҃ы́ѧ въ рꙋ́цѣ бг҃ꙋ преда́ша, и҆ преидо́ша къ нбс̃номꙋ црс̃твію.
Въ тре́тій же де́нь пріи́де а҆дріа́нъ къ волꙋ̀ томꙋ̀, хотѧ̀ ви́дѣти пра́хъ сожже́ныхъ мч҃нкѡвъ.
и҆ ѿве́рзше две́ри, ѡ҆брѣто́ша тѣлеса̀ и҆́хъ ст҃ы́ѧ цѣ́ла и҆ невреждє́на, и҆ ни є҆ди́нъ вла́съ съ главы̀ и҆́хъ не сгорѣ̀, но ꙗ҆́кѡ жи́ва, и҆ спѧ̑ща ли́ца и҆́хъ ꙗ҆влѧ́хꙋсѧ, и҆спѡ́лнена па́че є҆стества̀ красоты̀ преди́вныѧ, и҆ ве́сь наро́дъ сꙋ́щій та́мѡ возопѝ: вели́къ бг҃ъ хрс̃тіа́нскій.
Ца́рь же со стꙋдо́мъ возврати́сѧ въ пала́тꙋ свою̀, и҆ всѝ лю́діе ѹ҆корѧ́хꙋ царѧ̀ ѡ҆ є҆гѡ̀ ѕло́бѣ, ꙗ҆́кѡ такова̀ всемꙋ̀ ри́мꙋ бл҃гопотре́бнаго воево́дꙋ всꙋ́е погꙋбѝ.
Хрс̃тіа́не же взе́мше честна́ѧ тѣлеса̀ мꙋ́ченичєскаѧ, подоба́ющемꙋ преда́ша погребе́нію, сла́вѧще бг҃а ди́внаго во ст҃ы́хъ свои́хъ, ѻ҆ц҃а̀ и҆ сн҃а и҆ ст҃а́го дх҃а, є҆мꙋ́же че́сть, сла́ва, и҆ поклоне́ніе ѿ всѣ́хъ на́съ бꙋ́ди ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Всѧ́кое смꙋще́ніе и҆ бра̑ни, и҆лѝ и҆ны́ѧ кі́ѧ па̑гꙋбы, є҆гда̀ ѹ҆́зриши когда̀, не мнѝ, ꙗ҆́кѡ про́стѣ со ѡ҆браще́ніемъ непостоѧ́ннагѡ мі́ра, и҆лѝ ѿ нѣ́коегѡ слꙋ́чаѧ быва́ютъ: но вѣ́ждь, ꙗ҆́кѡ всѧ̀ сіѧ̑ и҆зволе́ніемъ всемогꙋ́щагѡ бг҃а за грѣхѝ на́шѧ попꙋща́ютсѧ, дабы̀ согрѣша́ющіи <#203> приходи́ли въ чꙋ́вство и҆ и҆справле́ніе.
И҆спе́рва ѹ҆́бѡ бг҃ъ ма́лыми наказа́ніи на́съ грѣ́шныхъ наказꙋ́етъ: є҆да́ же не и҆справлѧ́емсѧ, тогда̀ вели̑каѧ наво́дитъ, ꙗ҆́коже дре́вле и҆ на і҆и҃лтѧнѡвъ: на не восхотѣ́вшихъ бо ѿ ве́рвій бича̀ хрс̃то́ва и҆спра́витисѧ, что̀ попꙋстѝ; ѹ҆пасе́ши ꙗ҆̀ (речѐ) жезло́мъ желѣ́знымъ, сі́есть ри́млѧнами, по про̃ро́чествꙋ даніи́ловꙋ.
Ма́лыѧ же ка̑зни, ꙗ҆̀же и҆спе́рва гдс̃ь попꙋща́етъ, сꙋ́ть: мѧте́жи, гла́ды, напра̑сныѧ смє́рти, междоꙋсо́бныѧ бра́ни, и҆ тѣ̑мъ подѡ́бнаѧ.
А҆́ще же тѣ́мъ грѣ́шніи не ѹ҆цѣломꙋдрѧ́ютсѧ, наво́дитъ немлс̃тивное и҆ тѧжча́йшее и҆ноплеме́нныхъ наше́ствіе, да понѐ та́кѡ пріи́дꙋтъ въ чꙋ́вство человѣ́цы, и҆ ѡ҆братѧ́тсѧ ѿ пꙋте́й свои́хъ лꙋка́выхъ, по про̃ро́кꙋ: Є҆гда̀ ѹ҆бива́ше ꙗ҆̀, тогда̀ взыска́хъ є҆го̀.
си́це бы́сть ѡ҆ на́съ и҆ ѡ҆ все́й на́шей землѝ рѡссі́йской.
Є҆гда́ бо мы̀ блгс̃ть всемлс̃тивагѡ бг҃а ѕлонра́віемъ свои́мъ прогнѣ́вахомъ, и҆ бл҃гоꙋтро́біе є҆гѡ̀ попремно́гꙋ ѡ҆горчи́хомъ, въ чꙋ́вство же пріитѝ, и҆ ѹ҆кло́ншисѧ ѿ ѕла̀, бл҃го́е твори́ти ника́коже восхотѣ́хомъ: тогда̀ разгнѣ́васѧ ꙗ҆́ростію на на́съ гдс̃ь ѕѣлѡ̀, и҆ восхотѣ̀ лютѣ́йшею наказа́ти на́ша беззакѡ́ніѧ ка́знію.
Попꙋстѝ ѹ҆̀бо на на́съ пріитѝ безбѡ́жнымъ и҆ безчеловѣ́чнымъ ва́рварѡмъ, и҆̀же нарица́ютсѧ тата́ре, съ нечести́вѣйшимъ и҆ беззако́ннѣйшимъ царе́мъ и҆́хъ баты́емъ, и҆́же въ безчи́сленномъ мно́жествѣ си́лы своеѧ̀ пога́нскіѧ на рѡссі́йскꙋю на́шꙋ зе́млю наше́дше, въ лѣ́то бытіѧ̀ мі́ра ҂ѕѱм҃ѕ, воплоще́ніѧ же бг҃а и҆ сло́ва въ лѣ́то ҂а҆сл҃и, всю̀ си́лꙋ хрс̃тіа́нскихъ царе́й и҆ кнѧзе́й сокрꙋши́ша и҆ потопта́ша.
всѧ̀ гра́ды разори́ша, и҆ всю̀ зе́млю мече́мъ и҆ ѻ҆гне́мъ поплѣни́ша, и҆ пꙋ́стꙋ сотвори́ша, никомꙋ́же могꙋ́щꙋ проти́вꙋ безбо́жныѧ тѣ́хъ си́лы ста́ти, є҆́йже грѣ́хъ ра́ди на́шихъ предадѐ на́съ бг҃ъ, глаго́лѧй въ про̃ро́чествіи: А҆́ще хо́щете, и҆ послꙋ́шаете менѐ, бл҃га̑ѧ землѝ снѣ́сте: а҆́ще же не послꙋ́шаете менѐ, ме́чь вы̀ поѧ́стъ.
Въ то̀ вре́мѧ и҆збы́вшіи ѿ меча̀ и҆ плѣне́ніѧ хрс̃тіа́не, кры́ѧхꙋсѧ по гора́мъ и҆ непроходи́мымъ пꙋсты́нѧмъ, и҆ бѣ̀ ви́дѣти ѹ҆миле́нное видѣ́ніе: селє́ніѧ человѣ̑ческаѧ, гра́ды и҆ вє́си пꙋ́сты: а҆ и҆дѣ́же ди́віи ѕвѣ́ріе живѧ́хꙋ, та́мѡ человѣ́цы водворѧ́хꙋсѧ, кры́ющесѧ ѿ ва̑рваръ.
Въ то̀ вре́мѧ бѣ̀ бл҃гочести́вый и҆ приснопа́мѧтный вели́кій кнѧ́зь кі́евскій и҆ черни́говскій міхаи́лъ, сы́нъ все́волода че́рнагѡ, внꙋ́къ ѻ҆́льговъ, и҆зъ̃ мла́да добродѣ́тельномꙋ житію̀ навы́кшій: хрс̃та́ бо возлюби́въ, томꙋ̀ ѿ всеѧ̀ дꙋшѝ слꙋжа́ше, и҆ свѣтѧ́шесѧ въ не́мъ дꙋше́вное неѕло́біе: бѧ́ше бо кро́токъ, и҆ смире́нъ, и҆ любо́венъ ко всѣ́мъ, и҆ къ ни́щымъ ѕѣлѡ̀ ми́лостивъ: мл҃твами же и҆ говѣ́ніемъ всегда̀ ѹ҆гожда́ше бг҃ꙋ, и҆ всѣ́ми до́брыми дѣ́лы ѹ҆краша́ше свою̀ дꙋ́шꙋ, ꙗ҆́кѡ бы́ти є҆́й кра́сномꙋ селе́нію бг҃а творца̀ своегѡ̀.
И҆мѣ́ѧше же се́й бл҃гочести́вый кнѧ́зь люби́маго себѣ̀ болѧ́рина, во всѣ́хъ добродѣ́телехъ є҆мꙋ̀ подо́бна, <#204> и҆́менемъ ѳео́дѡра, съ ни́мже и҆ дꙋ́шꙋ свою̀ за хрс̃та̀ положѝ, пострада́въ ѿ скве́рнагѡ баты́ѧ, ꙗ҆́коже предлежа́щее ꙗ҆ви́тъ сло́во.
Сꙋ́щꙋ томꙋ̀ бл҃говѣ́рномꙋ и҆ хрс̃толюби́вомꙋ кнѧ́зю на вели́комъ кнѧже́ніи кі́евскомъ, присла̀ ѕлочести́вый баты́й тата́рѡвъ свои́хъ соглѧ́дати кі́евъ: ті́и же ви́дѣвше вели́чество и҆ красотꙋ̀ є҆гѡ̀, ѹ҆диви́шасѧ, и҆ возвра́щшесѧ повѣ́даша баты́ю ѡ҆ пресла́вномъ гра́дѣ кі́евѣ.
Па́ки же баты́й посла̀ къ кнѧ́зю міхаи́лꙋ въ кі́евъ, прелща́ѧ є҆го̀, да покло́нитсѧ є҆мꙋ̀.
Вели́кій же кнѧ́зь міхаи́лъ разꙋмѣ́въ пре́лесть и҆́хъ, ꙗ҆́кѡ лꙋка́вствомъ хотѧ́тъ взѧ́ти гра́дъ, и҆ ѡ҆пꙋстоши́ти є҆го̀.
Слы́шавъ бо ѡ҆ безбо́жіи тѣ́хъ ва̑рваръ, ꙗ҆́кѡ всѣ́хъ, а҆́ще и҆ во́лею предаю́щихсѧ и҆ покланѧ́ющихсѧ и҆̀мъ, неми́лостивнѡ и҆збива́ютъ: повелѣ̀ ѹ҆̀бо послѡ́въ тѣ́хъ погꙋби́ти.
Та́же ѹ҆вѣ́давъ ѡ҆ находѧ́щей вели́кой тата́рской си́лѣ, ꙗ҆́же во мно́гомъ мно́жествѣ, [бѣ́ бо во́инства ше́сть сѡ́тъ ты́сѧщъ] ꙗ҆́кѡ прꙋ́зи, на всю̀ зе́млю рѡссі́йскꙋю на́йде, и҆ взима́ше крѣ́пкіѧ гра́ды: и҆ разꙋмѣ́въ, ꙗ҆́кѡ не возмо́жно кі́евꙋ ѿ приближа́ющихсѧ врагѡ́въ бы́ти цѣ́лꙋ, бѣжа̀ во ѹ҆́гры съ болѧ́риномъ свои́мъ ѳео́дѡромъ, и҆ бѧ́ше пришле́цъ въ землѝ чꙋ́ждей, скита́ѧсѧ и҆ кры́ѧсѧ ѿ бж҃іѧ гнѣ́ва, послꙋ́шаѧ глаго́лющаго: ѹ҆кры́йтесѧ ма́лѡ, є҆ли́кѡ є҆ли́кѡ, до́ндеже мимои́детъ гнѣ́въ гдс̃нь.
По ѿше́ствіи же є҆гѡ̀ и҆зъ̃ кі́ева и҆ні́и кнѧ́зи рѡссі́йстіи кі́евскагѡ кнѧже́ніѧ каса́хꙋсѧ, ѻ҆ба́че не возмого́ша защити́ти кі́ева ѿ нечести́вагѡ баты́а, и҆́же со все́ю си́лою свое́ю прише́дъ, взѧ̀ кі́евъ, ꙗ҆́коже и҆ черни́говъ, и҆ прѡ́чыѧ вели́кіѧ и҆ крѣ́пкіѧ рѡссі́йскіѧ гра́ды и҆ кнѧжє́ніѧ, и҆ весма̀ ѡ҆пꙋстошѝ того̀ ѻ҆гне́мъ и҆ мече́мъ, въ лѣ́то бытіѧ̀ мі́ра ҂ѕѱм҃и, воплоще́ніе же бг҃а сло́ва въ лѣ́то ҂а҆с҃м.
Тогда̀ пресла́вный и҆ превели́кій престо́лный вели́кагѡ кнѧже́ніѧ рѡссі́йскагѡ гра́дъ разоре́нъ бы́сть вконе́цъ хрс̃тоненави́стныхъ пога̑нъ рꙋко́ю: падо́ша си́лніи ѿ меча̀ а҆га́рѧнска лю́діе, ѻ҆́ви и҆збіе́ни, дрꙋзі́и же въ плѣ́нъ ѿведе́ни бы́ша: бж҃іѧ прекра̑сныѧ цр҃кви ѡ҆сквернє́ны и҆ пожжє́ны, ꙗ҆́кѡ и҆сполнѧ́тисѧ словесе́мъ дв҃довымъ: бж҃е пріидо́ша ꙗ҆зы́цы въ достоѧ́ніе твоѐ, ѡ҆скверни́ша хра́мъ ст҃ы́й тво́й, положи́ша трꙋ́піе ра̑бъ твои́хъ бра́шно пти́цамъ небе́снымъ, плѡ́ти прпд̃бныхъ твои́хъ ѕвѣрє́мъ земны́мъ: проліѧ́ше кро́вь и҆́хъ ꙗ҆́кѡ во́дꙋ, и҆ не бѣ̀ погреба́ѧй.
Сіѧ̀ всѧ̑ въ рѡссі́йской землѝ сбыва̑ющаѧсѧ кнѧ́зь міхаи́лъ въ стра́нствованіи сы́й слы́шавъ, рыда́ше неꙋтѣ́шнѣ по є҆диновѣ́рной свое́й бра́тіи, и҆ по ѡ҆пꙋстѣ́ніи землѝ своеѧ̀.
Та́же сотвори́сѧ є҆мꙋ̀ вѣ́стнѡ, ꙗ҆́кѡ ѡ҆ста́вшымъ по градѡ́мъ лю́демъ, и҆́хже не мно́гѡ бѣ̀ и҆збы́вшихъ ѿ меча̀ и҆ плѣне́ніѧ, повелѣ̀ нечести́вый ца́рь безбоѧ́зненнѡ на мѣ́стѣхъ свои́хъ жи́ти, <#205> да̑ни наложи́въ на нѧ̀: и҆ мно́зи рѡссі́йскіи кнѧ́зи бѣжа́вшіи въ дале́кіѧ страны̀, и҆ въ чꙋжды́ѧ зе́мли, слы́шавше то̀, возвраща́хꙋсѧ въ рѡссі́ю: и҆ кла́нѧющесѧ царю̀ нечести́вомꙋ, пріе́млѧхꙋ своѧ̀ кнѧже́ніѧ, и҆ да̑ни є҆мꙋ̀ даю́ще, живѧ́хꙋ въ разоре́нныхъ свои́хъ градѣ́хъ.
Ѹ҆̀бо и҆ бл҃гочести́вый кнѧ́зь міхаи́лъ, съ болѧ́риномъ свои́мъ ѳео́дѡромъ, и҆ со всѣ́ми людмѝ свои́ми возврати́сѧ ѿ стра́нствованіѧ, и҆зволѧ́ющи да̑ни даѧ́ти царю̀ нечести́вомꙋ, и҆ въ ѻ҆те́чествіи свое́мъ, а҆́ще и҆ ѡ҆пꙋстѣ́ломъ жи́ти, па́че не́же пришле́цъ бы́ти въ землѝ чꙋжде́й.
И҆ пріи́де пе́рвѣе въ кі́евъ, и҆ ви́дѣвъ мѣста̀ ст҃а́ѧ пꙋ́ста, и҆ нб҃сѝ подо́бнꙋю це́рковь пече́рскꙋю до по́лꙋ разоре́ннꙋ, пла́касѧ го́ркѡ.
та́же и҆́де въ черни́говъ.
И҆ є҆два̀ ма́лѡ ѿдохнꙋ́вшꙋ є҆мꙋ̀ ѿ пꙋтѝ, слы́шавше тата́ре ѡ҆ возвраще́ніи є҆гѡ̀, пріидо́ша ѿ баты́а, и҆ нача́ша зва́ти є҆го̀, ꙗ҆́коже и҆ про́чихъ кнѧзе́й рѡссі́йскихъ къ царю̀ своемꙋ̀ баты́ю, глаго́люще: не возмо́жно є҆́сть ва́мъ жи́ти на землѝ баты́евой, не поклони́вшымсѧ є҆мꙋ̀.
грѧди́те ѹ҆̀бо, и҆ дади́те є҆мꙋ̀ покло́нъ, и҆ да́нники є҆мꙋ̀ бꙋ́дите, и҆ та́кѡ въ жили́щахъ свои́хъ пребыва́йте.
Бы́сть же таково̀ ѹ҆ нечести́вагѡ тогѡ̀ царѧ̀ ѹ҆строе́ніе: а҆́ще кото́ріи ѿ кнѧзе́й рѡссі́йскихъ кла́нѧтисѧ є҆мꙋ̀ прихожда́хꙋ, то̀ волхвы̀ и҆ жрецы̀ тата́рскіѧ и҆̀хъ взима́хꙋ, и҆ ведѧ́хꙋ сквозѣ̀ ѻ҆́гнь.
и҆ а҆́ще что̀ несѧ́хꙋ въ да́ръ царю̀: ѿ всегѡ̀ тогѡ̀ по ма́лой нѣ́коей ча́сти взе́млюще, во ѻ҆́гнь вмета́хꙋ, проше́дше же ѻ҆́гнь, нꙋ́ждахꙋ покланѧ́тисѧ і҆́дѡлѡмъ, ка́нꙋ, и҆ кꙋ́стꙋ, и҆ со́лнцꙋ, и҆ та́кѡ царю̀ и҆̀хъ представлѧ́хꙋ.
и҆ мно́зи ѿ кнѧзе́й рѡссі́йскихъ стра́ха ра́ди царе́ва, и҆ воспріѧ́тіѧ ра́ди кнѧже́ніѧ своегѡ̀, то̀ сотвори́ша: сквозѣ̀ ѻ҆́гнь проидо́ша, и҆ і҆́дѡлѡмъ поклони́шасѧ, и҆ полꙋча́хꙋ ѹ҆ царѧ̀, є҆́же тре́бовахꙋ.
Слы́шавъ же то̀ бл҃гочести́вый кнѧ́зь міхаи́лъ, ꙗ҆́кѡ мно́зи ѿ кнѧзе́й рѡссі́йскихъ прелсти́вшесѧ сла́вою мі́ра сегѡ̀, поклони́шасѧ і҆́дѡлѡмъ: сожалѣ̀ ѕѣлѡ̀, и҆ возревнова́въ по гдс̃ѣ бз҃ѣ свое́мъ, ѹ҆мы́сли и҆тѝ къ царю̀ непра́веднꙋ и҆ лꙋка́внѣйшꙋ па́че всеѧ̀ землѝ, и҆ дерзнове́ннѡ предъ̃ ни́мъ и҆сповѣ́сти хрс̃та̀, и҆ кро́вь свою̀ за гдс̃а проліѧ́ти.
Сіѧ̑ ѹ҆мы́сливъ, и҆ дꙋ́хомъ возгорѣ́всѧ, призва̀ вѣ́рнаго своего̀ совѣ́тника ѳео́дѡра болѧ́рина, и҆ сказа̀ є҆мꙋ̀ мы́сль свою̀.
ѻ҆́нъ же бл҃горазꙋ́менъ и҆ вѣ́ренъ сы́й, похвалѝ таково́е намѣ́реніе господи́на своегѡ̀, и҆ ѡ҆бѣщава́шесѧ не ѿстꙋпи́ти ѿ негѡ̀ до кончи́ны, но вкꙋ́пѣ съ ни́мъ за хрс̃та̀ положи́ти свою̀ дꙋ́шꙋ.
И҆ та́кѡ совѣща́вшесѧ ѻ҆́ба, ѹ҆тверди́ша сло́во, є҆́же непремѣ́ннѡ и҆ непрело́жнѡ и҆тѝ и҆ ѹ҆мре́ти за и҆сповѣ́даніе і҆и҃съ хрс̃то́во.
Воста́вше же и҆до́ша ко ѻ҆ц҃ꙋ̀ своемꙋ̀ дх҃о́вномꙋ, и҆́менемъ і҆ѡа́ннꙋ, хотѧ́ще є҆мꙋ̀ возвѣсти́ти совѣ́тъ сво́й.
и҆ прише́дше къ немꙋ, речѐ кнѧ́зь: хощꙋ̀ ѻ҆́ч҃е и҆тѝ къ царю̀ ꙗ҆́коже и҆ всѝ рѡссі́йстіи кнѧ́зи.
<#206>
Дх҃овни́къ же тѧ́жцѣ сіѐ сло́во слы́шавъ, и҆ и҆зъ глꙋбины̀ воздохнꙋ́въ, речѐ: мно́зи та́мѡ и҆до́ша, и҆ дꙋ́шы своѧ̑ погꙋби́ша, сотвори́вше во́лю царе́вꙋ, и҆ поклони́вшисѧ ѻ҆гню̀ и҆ со́лнцꙋ и҆ про́чымъ і҆́дѡлѡмъ.
и҆ ты̀ ѹ҆̀бо а҆́ще хо́щеши, и҆дѝ съ ми́ромъ, но то́кмѡ молю́ тѧ, да не ревнꙋ́еши и҆̀мъ, ни да сотвори́ши тогѡ̀, є҆́же ѻ҆нѝ сотвори́ша вре́меннагѡ ра́ди кнѧже́ніѧ: да не и҆́деши сквозѣ̀ ѻ҆́гнь нечести́выхъ, и҆ ме́рзкимъ богѡ́мъ и҆́хъ да не поклони́шисѧ, є҆ди́нъ бо є҆́сть бг҃ъ на́шъ і҆и҃съ хрс̃то́съ: и҆ да ничто́же вни́детъ ѿ скве́рныхъ і҆дѡложе́ртвенныхъ бра́шенъ во ѹ҆ста̀ твоѧ̀, да не погꙋби́ши дꙋшѝ твоеѧ̀.
Кнѧ́зь же съ болѧ́риномъ рѣ́ша: мы̀ хо́щема за хрс̃та̀ проліѧ́ти кро́вь свою̀, и҆ положи́ти за него̀ дꙋ́шы на́шѧ, да бл҃гопріѧ́тна є҆мꙋ̀ же́ртва бꙋ́демъ.
То̀ слы́шавъ і҆ѡа́ннъ, возра́довасѧ дꙋ́хомъ, и҆ весе́лыми ѻ҆чесы̀ на нѧ̀ воззрѣ́въ, речѐ: а҆́ще сіѧ̑ сотвори́те, бл҃же́ни бꙋ́дете, и҆ въ се́мъ послѣ́днѣмъ ро́дѣ новоѧвле́нными мч҃нками нарече́тесѧ.
Поꙋчи́въ же и҆̀хъ дово́лнѡ ѿ є҆ѵг̃ліа и҆ ѿ и҆ны́хъ кни́гъ, причастѝ и҆̀хъ бжс̃твенныхъ та́инъ тѣ́ла и҆ кро́ве влд̃чни.
и҆ бл҃гослови́въ и҆̀хъ, ѿпꙋстѝ съ ми́ромъ, глаго́лѧ: гдс̃ь бг҃ъ да ѹ҆крѣпи́тъ ва́съ, и҆ да по́слетъ ва́мъ да́ръ ст҃а́гѡ дх҃а, во є҆́же бы́ти ва́мъ крѣ́пкимъ въ вѣ́рѣ, и҆ дерзнове́ннымъ во и҆сповѣ́даніи и҆́мене хрс̃то́ва, и҆ мꙋ́жественнымъ въ страда́ніи: и҆ да причте́тъ ва́съ цр҃ь нбс̃ный къ ли́кꙋ пе́рвыхъ ст҃ы́хъ мч҃нкѡвъ.
и҆ та́кѡ ѿидо́ша въ до́мы своѧ̑.
Приꙋгото́влшесѧ же на пꙋ́ть, ми́ръ да́ша дома́шнимъ свои́мъ, и҆ поидо́ша спѣ́шнѡ, молѧ́щесѧ къ бг҃ꙋ, и҆ распалѧ́ющесѧ серде́чною къ немꙋ̀ любо́вію, и҆ жела́юще вѣнца̀ мч҃нческагѡ, ꙗ҆́коже жела́етъ є҆ле́нь на и҆сто́чники водны́ѧ.
Доше́дшымъ же и҆̀мъ къ безбо́жномꙋ царю̀ баты́ю, возвѣще́но бы́сть є҆мꙋ̀ ѡ҆ прише́ствіи и҆́хъ, и҆ призва́въ ца́рь волхвы̀ и҆ жрецы̀ своѧ̑, повелѣ̀ и҆̀мъ, да черни́говскаго кнѧ́зѧ по ѻ҆бы́чаю ведꙋ́тъ сквозѣ̀ ѻ҆́гнь, и҆ і҆́дѡлѡмъ кла́нѧтисѧ да принꙋ́дѧтъ, и҆ та́кѡ да предста́вѧтъ є҆го̀ предъ̃ ни́мъ.
Ше́дше же волхвы̀ къ кнѧ́зю, реко́ша є҆мꙋ̀: зове́тъ тѧ̀ вели́кій ца́рь: и҆ пое́мше є҆го̀, ведо́ша.
послѣ́доваше же є҆мꙋ̀ ꙗ҆́кѡ господи́нꙋ своемꙋ̀ болѧ́ринъ є҆гѡ̀ ѳео́дѡръ.
Є҆гда́ же доидо́ша мѣ́ста, и҆дѣ́же бѣ̀ ѻ҆́гнь по ѻ҆бои́мъ страна́мъ возгнѣще́нный, посредѣ́ же пꙋ́ть ѹ҆гото́вленъ, и҆́мже сквозѣ̀ хожда́хꙋ мно́зи: тѣ́мже пꙋте́мъ и҆ кнѧ́зѧ міхаи́ла вестѝ хотѧ́хꙋ.
Тогда̀ кн҃зь речѐ: не подоба́етъ хрс̃тіа́нѡмъ сквозѣ̀ то́й ѻ҆́гнь и҆тѝ, є҆го́же нечести́віи и҆мѣ́ютъ въ бо́га, а҆́зъ же хрс̃тіа́нинъ є҆́смь: не и҆дꙋ̀ ѹ҆̀бо сквозѣ̀ ѻ҆́гнь, нижѐ поклоню́сѧ тва́ри, но творцꙋ̀ покланѧ́юсѧ ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆́же є҆́сть є҆ди́нъ въ тро̃цѣ бг҃ъ, нб҃а и҆ землѝ созда́тель.
Сіѧ̑ словеса̀ волхвы̀ и҆ жрецы̀ слы́шавше, и҆спо́лнишасѧ стꙋда̀ и҆ ꙗ҆́рости, и҆ ѡ҆ста́вивши є҆го̀, теко́ша возвѣсти́ти царю̀.
<#207>
Тѣ́мъ вре́менемъ къ ст҃о́мꙋ кн҃зю міхаи́лꙋ пристꙋпи́ша и҆ні́и рѡссі́йстіи кнѧ́зи, съ ни́мъ на поклоне́ніе къ царю̀ прише́дшіи, ѿ ни́хже бѣ̀ кн҃зь бори́съ росто́вскій: ті́и жалѣ́юще є҆го̀, и҆ снѣда́ющесѧ ѹ҆тро́бою ѡ҆ не́мъ, вкꙋ́пѣ же и҆ на себѐ гнѣ́ва ца́рска боѧ́щесѧ, совѣ́товахꙋ міхаи́лꙋ, да сотвори́тъ во́лю царе́вꙋ.
да не поги́бнемъ, реко́ша, и҆ мы̀ съ тобо́ю: мо́жеши бо ле́стію сотвори́ти повелѣва́емое, и҆ поклони́тисѧ ѻ҆гню̀ и҆ со́лнцꙋ, то́кмѡ да и҆зба́вишисѧ ꙗ҆́рости царе́вы и҆ лю́тыѧ сме́рти.
є҆гда́ же съ ми́ромъ возврати́шисѧ во своѧ́ си, сотвори́ши, ꙗ҆́коже хо́щеши, не и҆стѧ́жетъ бо бг҃ъ, нижѐ прогнѣ́ваетсѧ за сіѐ на тѧ̀, вѣ́сть бо, ꙗ҆́кѡ нево́лею сіѐ сотвори́лъ є҆сѝ.
А҆́ще же и҆ въ грѣ́хъ ѿ дх҃овника̀ поста́влено бꙋ́детъ тебѣ̀ сіѐ, то̀ мы̀ всѝ покаѧ́ніе твоѐ на сѧ̀ во́змемъ, то́чію послꙋ́шай на́съ, и҆ ше́дъ сквозѣ̀ ѻ҆́гнь, поклони́сѧ богѡ́мъ тата́рскимъ, да и҆ себѐ и҆ на́съ ѿ гнѣ́ва ца́рска, и҆ ѿ го́рькіѧ сме́рти свободи́ши, и҆ мно́гѡ добра̀ землѝ твое́й и҆схода́тайствꙋеши.
сіѧ̑ ѻ҆нѝ ст҃о́мꙋ глаго́лахꙋ со мно́гими слеза́ми.
Бл҃же́нный же болѧ́ринъ ѳео́дѡръ послꙋ́шаѧ и҆́хъ слове́съ, бы́сть въ печа́ли вели́цѣй, боѧ́сѧ, да не ка́кѡ приста́нетъ кн҃зь є҆гѡ̀ къ совѣ́тꙋ и҆́хъ, и҆ ѿпаде́тъ ѿ вѣ́ры.
и҆ пристꙋпи́въ къ немꙋ̀, нача̀ воспомина́ти ѡ҆бѣща́ніе є҆гѡ̀, и҆ словеса̀ дх҃овнико́ва, гл҃го́лѧ: по́мни бл҃гочести́вый кнѧ́же, ка́кѡ ѡ҆бѣща́лсѧ є҆сѝ хрс̃тꙋ̀, положи́ти за него̀ дꙋ́шꙋ свою̀.
воспомѧнѝ словеса̀ є҆ѵг̃лскаѧ, и҆́миже на́съ дх҃о́вный ѻ҆ц҃ъ ѹ҆ча́ше: И҆́же хо́щетъ, речѐ, дꙋ́шꙋ свою̀ спастѝ, погꙋби́тъ ю̀: а҆ и҆́же погꙋби́тъ дꙋ́шꙋ свою̀ менѐ ра́ди и҆ є҆ѵг̃ліа, то́й сп҃се́тъ ю̀.
и҆ па́ки: Ка́ѧ по́льза человѣ́кꙋ, а҆́ще приѡбрѧ́щетъ мі́ръ ве́сь, и҆ ѿтщети́тъ дꙋ́шꙋ свою̀; И҆лѝ что̀ да́стъ человѣ́къ и҆змѣ́нꙋ на дꙋшѝ свое́й;
и҆ па́ки: И҆́же и҆сповѣ́сть мѧ̀ предъ̃ человѣ́ки, и҆сповѣ́мъ є҆го̀ и҆ а҆́зъ предъ̃ ѻ҆ц҃е́мъ мои́мъ, и҆́же є҆́сть на нб҃сѣ́хъ.
А҆ и҆́же ѿве́ржетсѧ менѐ предъ̃ человѣ́ки, ѿве́ргꙋсѧ є҆гѡ̀ и҆ а҆́зъ предъ̃ ѻ҆ц҃е́мъ мои́мъ, и҆́же на нб҃сѣ́хъ.
Кн҃зь же міхаи́лъ си́хъ слове́съ ѿ болѧ́рина своегѡ̀ въ сла́дость послꙋ́шаше, и҆ пала́ше ре́вностію по бз҃ѣ, и҆ съ весе́ліемъ жда́ше мꙋче́ніѧ, гото́въ сы́й ѹ҆мре́ти за жизнода́вца хрс̃та̀.
Кн҃зь же бори́съ, є҆го́же пре́жде помѧнꙋ́хомъ, съ про́чими молѧ́ше є҆го̀ прилѣ́жнѡ, да сотвори́тъ во́лю царе́вꙋ.
ѻ҆́нъ же къ ни́мъ речѐ: не хощꙋ̀ сло́вомъ хрс̃тіа́нинъ и҆менова́тисѧ, а҆ дѣла̀ пога́ныхъ твори́ти.
и҆ ѿрѣши́въ ѿ себѐ ме́чь сво́й, ве́рже є҆го̀ къ ни́мъ, гл҃ѧ: пріими́те сла́вꙋ мі́ра сегѡ̀, а҆́зъ же є҆ѧ̀ не хощꙋ̀.
При се́мъ пріи́де ѿ царѧ̀ по́сланный нѣ́кій велмо́жа, чи́номъ сто́лпникъ, и҆́менемъ є҆лде́га, то́й ст҃о́мꙋ кн҃зю міхаи́лꙋ ца́рскаѧ возвѣстѝ словеса̀, глаго́лѧ:
ца́рь вели́кій глаго́летъ тѝ си́це: почто̀ повелѣ́ніѧ моегѡ̀ не послꙋ́шаеши, и҆ богѡ́мъ мои́мъ не покланѧ́ешисѧ; сѐ ны́нѣ дво́ѧ предлежа́тъ тебѣ̀: живо́тъ и҆ сме́рть, и҆зберѝ себѣ̀ ѿ ѻ҆бои́хъ є҆ди́но.
а҆́ще повелѣ́ніе моѐ сотвори́ши, <#208> и҆ сквозѣ̀ ѻ҆́гнь про́йдеши, и҆ богѡ́мъ мои́мъ покло́нишисѧ: то̀ жи́въ бꙋ́деши, и҆ вели́кꙋ ѹ҆ менѐ благода́ть ѡ҆брѧ́щеши, и҆ кнѧже́нію твоемꙋ̀ господи́нъ бꙋ́деши.
а҆́ще же не послꙋ́шаеши менѐ, и҆ богѡ́мъ мои́мъ не покло́нишисѧ: то̀ ѕло́ю сме́ртію ѹ҆́мреши.
Ст҃ы́й же кн҃зь міхаи́лъ тѣ́хъ слове́съ ца́рскихъ ѿ є҆лде́ги глаго́ланныхъ слꙋ́шаѧ, не ѹ҆страши́сѧ ни ма́лѡ, но дерзнове́ннѡ ѿвѣща̀, гл҃го́лѧ:
рцы̀ царю̀, та́кѡ гл҃го́летъ тебѣ̀ міхаи́лъ кн҃зь ра́бъ хрс̃то́въ: поне́же тебѣ̀ царю̀ врꙋче́но є҆́сть ѿ бг҃а ца́рство, и҆ сла́ва мі́ра сегѡ̀, и҆ на́съ грѣ́хъ ра́ди на́шихъ десни́ца вы́шнѧгѡ твое́й вла́сти покори́ла: ѹ҆̀бо до́лжни є҆смы̀ тебѣ̀ ꙗ҆́кѡ царю̀ кла́нѧтисѧ, и҆ подоба́ющꙋю че́сть твоемꙋ̀ ца́рствꙋ воздава́ти.
а҆ є҆́же хрс̃та̀ ѿврещи́сѧ, и҆ богѡ́мъ твои́мъ поклони́тисѧ: да не бꙋ́детъ.
не сꙋ́ть бо бо́зи, но созда́ніе.
ѹ҆ на́съ же писа́ніѧ про̃рѡ́ческаѧ глаго́лютъ си́це: бо́зи, и҆̀же нб҃сѐ и҆ землѝ не сотвори́ша, да поги́бнꙋтъ.
что́ бо є҆́сть безꙋ́мнѣе па́че сегѡ̀, є҆́же ѡ҆ста́вити созда́телѧ, и҆ поклони́тисѧ созда́нію;
є҆лде́га же речѐ: прелща́ешисѧ міхаи́ле, нарица́ѧ со́лнце созда́ніемъ: рцы́ бо мѝ, кто̀ взы́де на безмѣ́рнꙋю ѻ҆́нꙋ высотꙋ̀ небе́снꙋю, и҆ сотворѝ таково́е вели́кое свѣти́ло, є҆́же ѡ҆свѣща́етъ всю̀ вселе́ннꙋю;
Ст҃ы́й же ѿвѣща̀: а҆́ще хо́щеши послꙋ́шати, а҆́зъ скажꙋ̀ тебѣ̀, кто̀ сотвори́лъ со́лнце, и҆ всѧ̀ ви̑димаѧ и҆ неви̑димаѧ: бг҃ъ безнача́льный и҆ неви́димый, и҆ є҆гѡ̀ є҆диноро́дный сн҃ъ, гдс̃ь на́шъ і҆и҃съ хрс̃то́съ, и҆ то́й та́кожде несозда́нъ, ни нача́ла ни конца̀ и҆мы́й:
ра́внѡ же и҆ дх҃ъ ст҃ы́й, трисоста́вное бжс̃тво̀, є҆ди́нъ же бг҃ъ, то́й сотворѝ нб҃о, и҆ зе́млю, и҆ со́лнце, є҆мꙋ́же вы̀ кла́нѧетесѧ, и҆ лꙋнꙋ̀, и҆ ѕвѣ́зды, та́кожде и҆ морѧ̀ и҆ сꙋ́шꙋ, и҆ пе́рвѣйшаго человѣ́ка а҆да́ма, и҆ дадѐ є҆мꙋ̀ всѧ̑ на слꙋ́жбꙋ.
Зако́нъ же человѣ́кѡмъ положѝ, да не кла́нѧютсѧ нико́емꙋже созда́нію, ни ꙗ҆̀же на землѝ до́лꙋ, ни ꙗ҆̀же на небесѝ горѣ̀, но є҆ди́номꙋ бг҃ꙋ всѧ̑ сотво́ршемꙋ да покланѧ́ютсѧ, томꙋ̀ и҆ а҆́зъ кла́нѧюсѧ:
а҆ є҆́же ѡ҆бѣщава́етъ мѝ ца́рь кнѧже́ніе и҆ сла́вꙋ мі́ра сегѡ̀, то̀ ѡ҆ се́мъ ++небрегꙋ̀, и҆́бо и҆ са́мъ ца́рь вре́мененъ є҆́сть, и҆ вре́менное дае́тъ мѝ госпо́дствіе, є҆гѡ́же а҆́зъ не тре́бꙋю: надѣ́юсѧ бо на бг҃а моего̀, въ него́же вѣ́рꙋю, ꙗ҆́кѡ да́стъ мѝ црс̃твіе вѣ́чное, не и҆мꙋ́щее конца̀ никогда́же.
Є҆лде́га же речѐ: а҆́ще въ се́мъ непокоре́ніи твое́мъ міхаи́ле пребꙋ́деши, и҆ царе́вы во́ли не сотвори́ши: то̀ а҆́біе ѹ҆́мреши.
Ст҃ы́й же ѿвѣща̀: не бою́сѧ тоѧ̀ сме́рти, ꙗ҆́же мѝ є҆́сть приѡбрѣ́теніемъ и҆ хода́тайствомъ вѣ́чнагѡ съ бг҃омъ пребыва́ніѧ.
и҆ что̀ мно́гѡ гл҃го́лю: хрс̃тіа́нинъ є҆́смь, и҆ творца̀ нб҃сѝ и҆ землѝ и҆сповѣ́дꙋю, и҆ въ него̀ несꙋмнѣ́ннѡ вѣ́рꙋю, и҆ ѹ҆мрꙋ̀ за него̀ ра́дꙋѧсѧ.
Ви́дѣвъ же є҆лде́га, ꙗ҆́кѡ ни ласка́ніемъ, ни преще́ніемъ возмо́жетъ є҆го̀ къ во́лѣ ца́рстѣй приклони́ти, ѿи́де къ царю̀, повѣ́дати всѧ̑ слы́шаннаѧ ѿ кн҃зѧ міхаи́ла.
Слы́шавъ же ца́рь словеса̀ міхаи́ломъ чрезъ̃ є҆лде́гꙋ є҆мꙋ̀ глаго́лемаѧ, <#209> возбѣси́сѧ ѿ ꙗ҆́рости, и҆ ꙗ҆́кѡ пла́менемъ преще́ніемъ дыша̀, повелѣ̀ предстоѧ́щымъ, да а҆́біе ѹ҆бію́тъ міхаи́ла кн҃зѧ черни́говскагѡ.
И҆ ѹ҆стреми́шасѧ слꙋги̑ мꙋчи́телевы а҆́ки псѝ на ло́вѣ, и҆лѝ а҆́ки во́лцы на ѻ҆́вцꙋ текꙋ́ще.
Ст҃ы́й же хрс̃то́въ мч҃нкъ стоѧ́ше на є҆ди́номъ мѣ́стѣ съ ѳео́дѡромъ, не радѧ́ще ѡ҆ сме́рти, но пою́ще ѱалмы̀, и҆ молѧ́щесѧ къ бг҃ꙋ прилѣ́жнѡ.
Внегда́ же ѹ҆зрѣ́ша къ себѣ̀ текꙋ́щихъ ѹ҆бі́йцєвъ, нача́ша пѣ́ти: мч҃нцы твоѝ гдс̃и мнѡ́гіѧ мꙋ́ки претерпѣ́ша, и҆ любо́вію твое́ю дꙋ́шы соедини́ша ст҃і́и.
Доспѣ́вше же ѹ҆бі́йцы мѣ́ста тогѡ̀, и҆дѣ́же стоѧ́ше ст҃ы́й, ꙗ҆́ша є҆го̀ ꙗ҆́кѡ ѕвѣ́ріе, и҆ растѧ́гше на землѝ за рꙋ́цѣ и҆ за но́зѣ, неми́лостивнѡ біѧ́хꙋ по всемꙋ̀ тѣ́лꙋ, ꙗ҆́кѡ и҆ землѝ кро́вію ѡ҆багри́тисѧ, и҆ біе́нъ бы́сть надо́лзѣ неща́днѡ.
Ѻ҆́нъ же терпѧ̀ до́блественнѡ, ничто́же гл҃го́лаше, то́чію сіѐ: хрс̃тіа́нинъ є҆́смь.
Є҆ди́нъ же ѿ слꙋ́гъ царе́выхъ и҆́менемъ дома́нъ, и҆́же пе́рвѣе хрс̃тіа́нинъ бѣ̀, по то́мъ ѿве́ргсѧ хрс̃та̀, пріѧ̀ нече́стіе тата́рское: то́й законопрестꙋ́пникъ ви́дѧ ст҃а́го до́блественнѡ мꙋ̑ки терпѧ́ща, ѡ҆горчи́сѧ на него̀, и҆ ꙗ҆́кѡ вра́гъ хрс̃тіа́нскій и҆звлечѐ но́жъ сво́й, и҆ просте́ръ рꙋ́кꙋ, ꙗ҆́тъ ст҃а́го за главꙋ̀, и҆ ѿрѣ́за ю̀, и҆ ѿто́рже ѿ тѣ́ла, є҆щѐ и҆мꙋ́щꙋ во ѹ҆стѣ́хъ и҆сповѣ́дническое сло́во, и҆ гл҃го́лющꙋ: хрс̃тіа́нинъ є҆́смь.
Ѽ чꙋ́до преди́вно! глава̀ ѿ тѣ́ла нꙋ́ждею ѿѧ́та и҆ ѿве́ржена вѣща́ше, и҆ хрс̃та̀ ѹ҆сты̀ и҆сповѣ́даше.
По то́мъ же нача́ша нечести́віи глаго́лати къ бл҃же́нномꙋ ѳео́дѡрꙋ: сотворѝ поне́ ты во́лю царе́вꙋ, и҆ поклони́сѧ богѡ́мъ на́шымъ, и҆ не то́кмѡ жи́въ бꙋ́деши, но и҆ вели́кꙋ че́сть ѿ царѧ̀ пріи́меши, и҆ кнѧже́ніе господи́на твоегѡ̀ наслѣ́диши.
Ст҃ы́й же ѳео́дѡръ ѿвѣща̀: кнѧже́ніе господи́на моегѡ̀ не хощꙋ̀, нижѐ че́сти ѿ царѧ̀ ва́шегѡ тре́бꙋю, но жела́ю тѣ́мже пꙋте́мъ пойтѝ ко хрс̃тꙋ̀ бг҃ꙋ, и҆́мже по́йде ст҃ы́й мч҃нкъ міхаи́лъ кн҃зь господи́нъ мо́й: и҆́бо ꙗ҆́коже ѻ҆́нъ, та́кѡ и҆ а҆́зъ во є҆ди́наго хрс̃та̀ творца̀ нб҃сѐ и҆ землѝ вѣ́рꙋю, и҆ за него̀ хощꙋ̀ пострада́ти да́же до кро́ве и҆ сме́рти.
Ѹ҆бі́йцы же ви́дѣвше непрекло́нна ѳео́дѡра ст҃а́го, ꙗ҆́ша є҆го̀, и҆ мꙋ́чахꙋ неми́лостивнѡ, ꙗ҆́коже и҆ ст҃а́го міхаи́ла.
послѣди́ же и҆ честнꙋ́ю є҆мꙋ̀ главꙋ̀ ѿсѣко́ша, ре́кше: и҆̀же не восхотѣ́ша поклони́тисѧ пресвѣ́тломꙋ со́лнцꙋ, ті́и не досто́йни сꙋ́ть на со́лнце зрѣ́ти.
Та́кѡ до́брѣ пострада́вше ст҃і́и новоѧвле́нніи мч҃ницы міхаи́лъ и҆ ѳео́дѡръ, преда́ша дꙋ́шы своѧ̑ въ рꙋ́цѣ гдс̃ꙋ септе́мвріа въ к҃ де́нь, въ лѣ́то бытіѧ̀ мі́ра ҂ѕѱн҃г, воплоще́ніѧ же бг҃а сло́ва въ лѣ́то ҂а҆см҃є.
Ст҃а́ѧ же и҆́хъ тѣлеса̀ пове́ржена бѧ́хꙋ на снѣде́ніе псѡ́мъ, и҆ чрезъ̃ мно́ги днѝ лежа́хꙋ цѣ̑ла: ничто́же бо и҆̀мъ прикоснꙋ́сѧ, та́кѡ бл҃года́тію хрс̃то́вою неврежде́на пребы́ша.
Ꙗ҆влѧ́шесѧ же сто́лпъ ѻ҆́гненный надъ̃ тѣлеса́ми и҆́хъ, сіѧ́ющь пресвѣ́тлыми зарѧ́ми, и҆ свѣщы̀ горѧ́щыѧ по всѧ̀ но́щи зрѧ́хꙋсѧ.
Є҆́же ви́дѧще вѣ́рніи прилꙋчи́вшіисѧ та́мѡ <#210> въ то̀ вре́мѧ, взѧ́ша ѻ҆́тай ст҃а́ѧ тѣлеса̀ и҆́хъ, и҆ погребо́ша ꙗ҆̀ че́стнѡ.
По ѹ҆біе́ніи же ст҃ы́хъ мч҃нкѡвъ безбо́жный баты́й воздви́гшисѧ є҆щѐ пріи́де со всѣ́ми ѻ҆рда́ми на вече́рнѧѧ и҆ за́паднаѧ госꙋда́рства, сі́есть на по́льшꙋ и҆ ѹ҆́гры.
И҆ ѹ҆біе́нъ бы́сть проклѧ́тый ѿ ѹ҆́горскагѡ королѧ̀ владисла́ва, и҆ пріѧ̀ ѕлы́й коне́цъ ѕло́мꙋ житію̀ своемꙋ̀.
То́й ѹ҆̀бо наслѣ́ди а҆́да, а҆ ст҃і́и мч҃ницы наслѣ́дствꙋютъ црс̃тво нбс̃ное, сла́вѧще ѻ҆ц҃а̀, и҆ сн҃а, и҆ ст҃а́го дх҃а во вѣ́ки, а҆ми́нь.
Мо́щы ст҃а́гѡ бл҃говѣ́рнагѡ кн҃зѧ міхаи́ла черни́говскагѡ пренесены̀ и҆зъ̃ ѻ҆рды̀ въ черни́говъ.
та́же по лѣ́тѣхъ мно́зѣхъ и҆зъ̃ черни́гова въ москвꙋ̀ бы́ша пренесе́ны феѵрꙋа́ріа въ д҃і де́нь.